ATV

Category: Lajme

  • Policia speciale rrit praninë në veri pas sulmit në Banjskë

    Policia speciale rrit praninë në veri pas sulmit në Banjskë

    Përgatiti: Fatlum Jashari

    Në ditën e pestë të operacionit, në fshatin Banjskë të Zveçanit, Policia vazhdoi me angazhimet e saj hetimore, lidhur me sulmin terrorist nga i cili u vra rreshteri Afrim Bunjaku dhe u plagosën dy të zyrtarë të tjerë policorë.

    Krahas specialëve, të cilët janë vendosur përgjatë rrugëve, në fshat e përreth manastirit, dhe kujdesen për sigurinë, Policia angazhoi edhe njësi të tjera të specializuara në kërkim dhe hetim.

    “Situata në përgjithësi në këtë fshat dhe në krejt rrethinën është e qetë, këtë mund ta konfirmoj. Gjithçka në rregull… Operacioni policor vazhdon, nuk do të thotë që ka përfunduar në përgjithësi. Sot ju e shihni njësinë policore me qen, të cilët kohë pas kohe e frekuentojnë terrenin malor dhe në vende të caktuara, të dyshimta, bëjmë verifikime”, tha zëvendësdrejtori i Policisë së Kosovës në rajonin e veriut, Veton Elshani.

    Hetimet po vazhdojnë kryesisht në malet përreth dhe shtigjet që terroristët i përdorën për të ikur.

    “Për gjithçka, trupa, armë, municion, eksploziv, çdo gjë që mund të hasim, çdo gjë që kemi gjetur herën e kaluar, nëse ka ende”, tha Elshani.

    Puna e Policisë vazhdoi edhe në vend-pritën ku mbeti i vrarë rreshteri Bunjaku.
    Teksa kontrollet e kohëpaskohshme të automjeteve vazhdojnë, rrugët janë hapur për qarkullim.

    Megjithatë, i mbyllur mbetet Manastiri dhe ndërtesa përcjellëse në të cilën u pa nënkryetari i Listës Serbe, Milan Radojicic.

    Krahas Policisë së Kosovës, në intervale të caktuara te ky monument fetar ortodoks qëndrojnë edhe ekipe të KFOR-it dhe EULEX-it.

    Ndërsa, rrugëve malore që shpijnë kah kufiri me Serbinë, përveç Policisë, u panë edhe patrullime nga KFOR-i.

  • Njohësit: Dialogu të ndahet në dy etapa, para dhe pas 24 shtatorit

    Njohësit: Dialogu të ndahet në dy etapa, para dhe pas 24 shtatorit

    Përgatiti: Arton Hamiti

    Pas sulmit terrorist të 24 shtatorit, që la të vdekur rreshterin Afrim Bunjaku dhe plagosi 3 kolegë të tij, dialogu mes Kosovës dhe Serbisë më nuk është i njëjtë.

    Ndikimi i sulmit në Banjskë të Zveçanit, në procesin e dialogut, për Valon Murtezajn është i pamohueshëm.

    “Mund të themi që, ka qenë dialogu para 24 shtatorit dhe do të jetë procesi i dialogut pas 24 shtatorit. Arsyeja është sepse pas një sulmi të tillë të organizuar mirë dhe të planifikuar sipas evidencave aktuale, të bërë nga shteti i Serbisë, por në vazhdën e agresionit rus në Ukrainë”, tha Murtezaj.

    Sipas profesorit të diplomacisë, pas një hetimi të gjithmbarshëm duhet të përcaktohen hapat e ardhshëm në procesin e dialogut.

    “Tani më, një rol tepër të rëndësishëm e ka Bashkimi Evropian dhe Shtetet e Bashkuara të Amerikës. Më nuk mund të thuhet se nuk ka ndodhur asgjë. Pra sulmi terrorist, akti terrorist, e ka bërë që dialogu në të ardhmen të jetë serioz, në mënyrë që të nxirret përfundimi i këtij procesit që është njohja e Kosovës nga Serbia”, tha Murtezaj.
    Megjithatë, në një takim potencial të radhës, pala kosovare është në pozitë më të favorshme, pas ngjarjes së fundit në veri.

    “Presioni ndërkombëtar ka qenë mbi Kosovën ndërkohë tash, ky sulm terrorist ka kriju një momentum të ri në dialog, sepse tashmë është shpërfaqë fytyra e vërtetë e presidentit të Serbisë, Aleksandër Vucic”, tha Fitim Mulolli nga Polcon.

    Pa dhënë detaje për një takim eventual të nivelit të lartë në kuadër të dialogut, zëdhënësi i Bashkimit Evropian, Peter Stano, tha se urgjencë për takime mes kryeministrit Albin Kurti dhe presidentit Aleksandër Vuçiq, ka pasur edhe para 24 shtatorit.

    Ndryshe, vrasja e rreshterit Afrim Bunjaku, nga grupi terrorist serb, ndodhi 10 ditë pas takimit të dy liderëve që u zhvillua më 14 shtator, me ndërmjetësimin e Bashkimit Evropian.

  • Ministria e Shëndetësisë nuk i realizon kërkesat e FSSHK-së

    Ministria e Shëndetësisë nuk i realizon kërkesat e FSSHK-së

    Përgatiti: Sara Shehu

    Ndonëse me Ligjin e ri për Paga, mjekët dhe specialistët kanë pagën më të lartë në rajon, punëtorët shëndetësorë vazhdojnë të jenë të pakënaqur.

    Teksa kërkojnë ndryshime në Ligjin për Pagat, Ministri i Shëndetësisë, Arben Vitia, tha se është e pamundur që kërkesat e Federatës së Sindikatave të Shëndetësisë të realizohen.

    “Me Federatën deri tani kemi pasur shumë takime, mirëpo nuk janë shumë sa ka nevojë, kërkesat e federatës janë ato që janë. Ne ju kemi treguar që për disa kërkesa përkundër faktit që i mirëkuptojmë, momentalisht nuk janë të realizueshme”, tha Vitia.

    Por përkundër kësaj, Vitia tha se do ta vazhdojnë dialogun me Federatën për gjetjen e gjuhës së përbashkët.

    “Ndoshta jo me dinamikën e nevojshme, por dialogu social po vazhdon dhe me padurim po pres që përkundër shumë mospajtimeve që i kemi, do ta përfundojmë këtë dialog me një kontratë, atë që do ta nënshkruajmë si kontratë kolektive. Nuk do të nënshkruajmë kontratë që do të duket që Ministria ka nënshkruar diçka e kur vjen puna te zbatimi dalin 100 e 1 mijë probleme. Shpresoj që në takimin e radhës të jemi disa hapa para”, tha Vitia.

    Nga ana tjetër, Kryetarja e FSSHK-së, Tevide Imeri, tha se zbritja e pagave nuk duhet të zbatohet.

    “Pakënaqësia ime është zbritja e pagave, sidomos në stafin mbështetës, kërkoj qe kjo mundësi të mos zbatohet, zbritja e pagave mos të bëhet për shkak edhe të inflacionit, çmimet janë rrit pothuajse 100%”, tha Imeri.

    Kurse, Burim Tahiri, nga Zyra e Avokatit të Popullit, ka shtuar se kanë regjistruar edhe ankesa për këtë ligj.

    “Ne si institucion procedurën e hartimit dhe miratimit të këtij ligji, jemi mundu me përcjell, pas miratimit të këtij ligji janë disa pozicione që kanë përfituar, janë mbi 130 ankesa që janë në institucionin e Avokatit të Popullit, ne kemi pritë më shumë ankesa më shumë reagim, por praktika e zbatimit të ligjit ka shpërfaq edhe diçka tjetër, të gjithë duhet me u rezervu prej saj derisa Gjykata Kushtetuese të vendos çka duhet të bëhet më këtë”, tha Tahiri.

    Ligji për pagat në sektorin publik, u diskutua në një tryezë të rrumbullakët të organizuar nga Iniciativa Kosovare për Stabilitet, në bashkëpunim me FSSHK-në.

  • Kosova merr kredi 20 milionë dollarë për digjitalizim

    Kosova merr kredi 20 milionë dollarë për digjitalizim

    Përgatiti: Pranvera Krasniqi

    Tash e tutje, Kosova pritet të ketë sistem më të avancuar në ofrimin e shërbimeve administrative pas nënshkrimit të projektit për qeverisje digjitale.

    Mbështetja financiare e projektit 5-vjeçar, sipas ministrit të Financave, Hekuran Murati, është kredi koncesionare prej 20 milionë dollarësh.

    “Ky projekt që financohet nga Banka Botërore është kredi koncesionare prej 20 milionë dollarësh, nga Asociacioni Ndërkombëtar për Zhvillim (IDA) i Grupit të Bankës Botërore. Kredia ka maturitet prej 25 vjetësh dhe grejs-periudhë prej 5 vjetësh, me normë interesi 1,25%”, tha Murati.

    Sipas Muratit, projekti i cili do të zbatohet nga Agjencia Për Shoqërinë e Informacionit, do të fokusohet në tri pika themelore.

    “Projekti ka tre komponentë, transformimin digjital të Qeverisë, transformimin digjital për shërbime publike dhe ngritjen e kapaciteteve. Te transformimi digjital i Qeverisë, një shembull i kësaj do të ishte nënshkrimi digjital, i cili na është kërkuar nga Banka Botërore”, tha Murati.

    Projekti u nënshkrua edhe nga menaxheri i Bankës Botërore për Kosovën dhe Maqedoninë e Veriut, Massimiliano Paolucci.
    “Digjitalizimi i suksesshëm i shërbimeve dhe nxitja e përdorimit të tyre do t’i përforcojnë përpjekjet e Kosovës për luftimin e korrupsionit, për përmirësimin e fuqizimit të grave, si dhe për luftimin e ndryshimeve klimatike”, tha Paolucci.

    Ndër të tjera, ai ka thënë se Kosova është vendi i vetëm në rajon që ka internet të shtrirë në 100% të territorit.

  • Dështon të fillojë rigjykimi për rastin e “Veteranëve të rrejshëm”

    Dështon të fillojë rigjykimi për rastin e “Veteranëve të rrejshëm”

    Përgatiti: Nora Luta

    Janë përpjekjet e të pranishmëve në sallën e gjykimit për të kuptuar nëse Shukri Buja, njëri prej të akuzuarve në rastin e Veteranëve, do të jetë prezent në Gjykatën Themelore të Prishtinës.

    Kryetari i trupit gjykues ofron kohë, por edhe pas më shumë se 20 minutave, Buja, ndryshe nga të akuzuarit Ahmet Daku e Nuredin Lushtaku, nuk paraqitet në sallë, për çka Gjykata detyrohet të marrë një vendim.

    Në mungesë të Bujës, siç edhe e përcakton Kodi i Procedurës Penale, seanca ku pritej të fillojë rigjykimi në këtë rast ku po akuzohen për keqpërdorim me listat e veteranëve, Agim Çeku, Rrustem Berisha, Xhavit Jashari e të tjerë, dështoi.
    Megjithatë, mbrojtja u ankua se nuk është pajisur me të gjitha shkresat e lëndës, por kjo u kundërshtua nga Prokuroria Speciale.

    E vetë Faik Fazliut nuk i kujtohet ku i ka shkresat, të cilat Prokuroria ia ka dorëzuar qysh në vitin 2019. Deklaratat kundërthënëse të tij, e shtynë trupin gjykues për tjetër paralajmërim.

    Në vitin 2021, Gjykata i kishte liruar nga akuzat për keqpërdorim me listat e veteranëve Çekun e të tjerët, por nga marsi i vitit të kaluar kur rasti u kthye në rigjykim, nuk ka arritur të mbahet asnjë seancë.

    Apeli kishte gjetur më shumë se dhjetë vërejtje në aktgjykimin e Themelores, përfshirë se nuk ishin administruar si prova dëshmitë e të akuzuarve në prokurori, dhe ka kërkuar që të administrohen aplikacionet e 19 mijë e 500 personave që pretendohet se përfituan rrejshëm statusin e veteranit.

    Sipas aktakuzës, fryrja e listës së veteranëve i ka shkaktuar dëm buxhetit të shtetit mbi 88 mijë euro.

  • ​Miratohet rezoluta, Kuvendi dënon sulmin terrorist në Banjskë

    ​Miratohet rezoluta, Kuvendi dënon sulmin terrorist në Banjskë

    Përgatiti: Benita Zeneli

    Seanca e së enjtes e Kuvendit filloi me një minutë heshtje në nderim të policit Afrim Bunjaku.

    Bunjaku u vra në detyrë pas sulmit të një grupi të armatosur serb ndaj Policisë së Kosovës, të dielën në fshatin Basnjkë të Zveçanit.

    Duke e dënuar këtë sulm të 24 shtatorit, deputetët miratuan një rezolutë sipas së cilës, përpos që dënohet ky sulm, përmendet edhe nevoja për hetim ndërkombëtar lidhur me rolin e mundshëm të shtetit serb.
    Rezoluta është miratuar me 97 vota për, asnjë votë kundër dhe asnjë abstenim.

    Veç kësaj, ndaj Serbisë u kërkua të vendosen sanksione.

    “Nëse kalon e pandëshkuar, atëherë ajo do ta përsërisë krimin. Kërkojmë që organizatat “Mbrojtja Civile” dhe “Brigada Veriore” të shpallen organizata terroriste nga shtetet partnere të Kosovës”, tha Kurti.

    Mbështetje të parezervë Rezolutës i dhanë edhe partitë opozitare.

    Rezoluta e votuar u përpilua në bashkëpunim të të gjitha grupeve parlamentare në Kuvend.

    Njëkohësisht sulmin e së dielës ndaj Policisë e ka dënuar edhe bashkësia ndërkombëtare, duke bërë thirrje që fajtorët të përballen me drejtësi.

  • DASH: Nuk mund të barazohet vrasja e policit me atë të sulmuesve

    DASH: Nuk mund të barazohet vrasja e policit me atë të sulmuesve

    Shtetet e Bashkuara të Amerikës kundërshtojnë përpjekjet që të barazohet vrasja e rreshterit të Kosovës, Afrim Bunjaku, me sulmuesit “që ishin të përfshirë në vrasjen” e tij.

    Kështu ka thënë zëdhënësi i Departamentit amerikan të Shtetit, Mathew Miller, në pyetjen lidhur me atë se si SHBA-ja i cilëson personat që sulmuan Policinë e Kosovës në Banjskë të Zveçanit më 24 shtator.

    “Ne kemi qenë shumë të qartë: SHBA-ja dënon fuqishëm sulmet e koordinuara dhe të dhunshme ndaj Policisë së Kosovës më 24 shtator dhe ne shprehim ngushëllime për familjen e rreshterit të Policisë së Kosovës i cili u vra gjatë detyrës. Ne kundërshtojmë përpjekjet për të barazuar vdekjen tragjike të rreshterit të Policisë së Kosovës [Afrim] Bunjaku me vdekjen e individëve që ishin të përfshirë në vrasjen e një polici. Përgjegjësit duhet të dalin para drejtësisë përmes një procesi hetimor transparent. Ky hetim është duke u zhvilluar”, tha Miller, për REL.

    Më 24 shtator, Policia e Kosovës u sulmua në Banjskë të Zveçanit, teksa po kryente një operacion për heqjen e një barrikade të vendosur në rrugë.

    Si pasojë e sulmit mbeti i vrarë rreshteri Afrim Bunjaku dhe u plagosën disa policë të tjerë.

    Sulmuesit e dyshuar – që sipas autoriteteve në Kosovë ishin rreth 30 – u strehuan në manastirin e Banjskës dhe prej aty vazhduan përleshjet me Policinë.

    Tre sulmues të dyshuar mbetën të vrarë gjatë shkëmbimit të zjarrit, ndërkaq katër persona janë arrestuar për këtë sulm, që Kosova e konsideron terrorist dhe për të e fajëson Serbinë.

    Beogradi ka mohuar se ka gisht në këtë ngjarje.

    Më 27 shtator në Serbi u shpall ditë zie për tre serbët e vrarë në Banjskë. Ky vendim u kritikua edhe nga Bashkimi Evropian.

    Zëdhënësi i bllokut, Peter Stano, deklaroi se “nuk mund të barazohen viktimat e terrorizmit me terroristët”.

    Presidenti i Serbisë, Aleksandar Vuçiq, tha më 27 shtator se ai kurrë nuk mund t’i cilësojë si “terroristë” pjesëtarët e grupit të armatosur që sulmuan Policinë e Kosovës.

    Zyrtarët në Kosovë kanë thënë se nënkryetari i Listës Serbe, Millan Radoiçiq, ka udhëhequr dhe ka marrë pjesë në sulmin në veri.

    Radoiçiq – që është nën sanksione amerikane – sipas presidentit serb do të merret në pyetje nga organet kompetente serbe.

  • MPJ: Një shtetas i Kosovës është gjetur i vdekur në territorin e Serbisë

    MPJ: Një shtetas i Kosovës është gjetur i vdekur në territorin e Serbisë

    Ministria e Punëve të Jashtme dhe Diasporës nëpërmjet Zyrës Ndërlidhëse të Republikës së Kosovës në Serbi, është njoftuar se një shtetas i Kosovës, është gjetur pa shenja jete në territorin e Serbisë.

    Rrethanat e vdekjes së tij nuk janë sqaruar ende krejtësisht, mirëpo nga informacionet e deritanishme nuk ka indikacion për një vdekje të shkaktuar nga ana e autoriteteve serbe.

    ”Ministria e Punëve të Jashtme dhe Diasporës ka udhëzuar Zyrën Ndërlidhëse të Republikës së Kosovës në Serbi që të ndërmarrë të gjitha hapat e nevojshëm dhe veprimet e duhura sa i përket riatdhesimit të trupit të pajetë dhe është në kontakt të vazhdueshëm me familjen e viktimës për t’i ofruar atyre m

    Një 19-vjeçar nga Kosova është therrur me thikë në kufirin Kroaci-Serbi. Pas plagëve të marrë ai ka gjetur vdekjen. Ngjarja ka ndodhur në fshatin Batrovc.

  • Dy asambleistët e Listës Serbe në Obiliq mbajnë një minutë heshtje për rreshterin Afrim Bunjaku

    Dy asambleistët e Listës Serbe në Obiliq mbajnë një minutë heshtje për rreshterin Afrim Bunjaku

    Dy asambleistët e Listës Serbe Radomir Ristiç dhe Biljana Spasiç, në seancën e sotme të Kuvendit Komunal në Obiliq, kanë mbajtur një minutë heshtje për rreshterin e rënë në dëtyrë, Afrim Bunjaku, raporton ATV.

  • Vuçiq kërkon tërheqjen e Policisë nga veriu i Kosovës

    Vuçiq kërkon tërheqjen e Policisë nga veriu i Kosovës

    Presidenti i Serbisë, Aleksandar Vuçiq, bëri thirrje për tërheqjen e pjesëtarëve të Policisë së Kosovës nga veriu i Kosovës.

    Kjo thirrje e liderit serb vjen në kohën kur autoritetet e sigurisë kanë konfirmuar për Radion Evropa e Lirë se është rritur prania e njësive speciale të Policisë së Kosovës në pjesën veriore.

    Pjesëtarë policorë në Banjskë të Zveçanit më 27 shtator 2023.

    Gjatë takimit me ministrin e Jashtëm të Danimarkës, Lars Rasmussen, në Beograd më 28 shtator i bëri thirrje komunitetit ndërkombëtar që të ndërmarrë të gjitha masat për të parandaluar “lëvizjet e rrezikshme dhe të papërgjegjshme të Prishtinës” dhe “të mbrojnë popullatën serbe”, njoftoi Presidenca serbe.

    Vuçiq e cilësoi situatën në Kosovë si “më të ndërlikuarën dhe më të rrezikshmen deri më tani” dhe shtoi se ngjarjet e 24 shtatorit janë “treguesi më i qartë i qëllimeve të Prishtinës për të parandaluar çdo marrëveshje me Beogradin”.

    Sipas presidentit serb, shteti i tij “është i gatshëm të punojë në vazhdimin e dialogut e ndërmjetësuar nga Bashkimi Evropian”.

    Policia e Kosovës u sulmua nga një grup i maskuar dhe i armatosur, teksa forcat e rendit po tentonin të largonin barrikadat që ishin vendosur në një rrugë në fshatin Banjskë të Zveçanit – një prej katër komunave në veri, të banuara me shumicë serbe.

    Grupi i armatosur – që sipas autoriteteve përbëhej prej rreth 30 personash – më pas u strehua në manastirin e Banjskës, prej ku gjatë gjithë të dielës u përlesh me policinë.

    Policia dhe ministri i Punëve të Brendshme, Xhelal Sveçla, kanë thënë se udhëheqës dhe pjesëmarrës i këtij sulmi ishte Millan Radoiçiq, nënkryetar i Listës Serbe – partisë kryesore të serbëve në Kosovë që gëzon mbështetjen e Beogradit zyrtar.

    Për pjesëmarrjen e Radoiçiqit – i cili është nën sanksione amerikane dhe kërkohet në Kosovë për frikësimin e dëshmitarëve në rastin gjyqësor të njohur si Brezovica – Sveçla ka publikuar edhe një video të incizuar me dron, që tha se e shfaq zyrtarin e Listës Serbe në Banjskë.

    Ministri i Punëve të Brendshme të Kosovës, Xhelal Sveçla. Mitrovicë e Jugut, 25 shtator 2023.

    Presidenti i Serbisë, Aleksandar Vuçiq, ka thënë më 27 shtator se Radoiçiq gjendet në Serbi dhe ai do të merret në pyetje nga organet serbe.

    Aktualisht, katër persona janë të arrestuar për ngjarjet në Banjskë, teksa Policia ka ekspozuar më 25 shtator armë dhe pajisje të tjera që ka thënë se janë konfiskuar në këtë fshat.

    Kosova e ka bërë përgjegjëse Serbinë për sulmin, ndërsa Beogradi zyrtar serbët e Kosovës.