ATV

Category: Lajme

  • Osmani për Reuters: Kosova është nën sulm

    Osmani për Reuters: Kosova është nën sulm

    Presidentja e Kosovës Vjosa Osmani ka akuzuar Serbinë dhe presidentin e saj Aleksandar Vuçiq se janë pas sulmit terrorist në Banjskë të Zveqanit të dielën e 24 shtatorit.

    Sulmi më i madh që nga pas lufta e vitit 1999, ka ngjallur reagime të shumta tek komuniteti ndërkombëtar.

    Në një intervistë për Reuters, presidentja Osmani ka akuzuar presidenti serb se ndodhet pas sulmit terrorist, me qëllim që të arrijë krijimin e ‘Krimesë në Republikën e Kosovës’.

    “Ajo që unë do t’i thosha presidentit Vuçiq është ndaloni ngatërresat me Kosovën. Kosova do ta mbrojë lirinë, pavarësinë dhe sovranitetin e saj me çdo çmim”, tha Osmani.

    “Ata po përpiqen të kryejnë një model të Krimesë në Republikën e Kosovës, por ne absolutisht nuk do ta lejojmë të ndodhë… [ne] do të mbrojmë çdo pëllëmbë të territorit të Kosovës.”

    Qeveria e Kosovës ka publikuar fakte që tregojnë se grupi ka qenë i trajnuar, i armatosur dhe ka marrë mbështetje të tjera nga qeveria e Beogradit dhe agjencitë e sigurisë.

    Osmani tha se sulme të ngjashme mund të përsëriten edhe në një të ardhme të afërt dhe kërkoi nga bashkësia ndërkombëtare që të bëjë gjithçka që Serbia të mos përkrahë grupe të tilla.

    “Jam shumë e shqetësuar se sulme të tilla, qoftë edhe më të mëdha, mund të ndodhin në të ardhmen nëse Serbia nuk dënohet, para së gjithash për këtë akt terrorist agresioni”, tha ajo.

    Kosova dhe Serbia kanë më shumë se një dekadë në bisedime për normalizimin e marrëdhënieve, në një proces ndërmjetësimi të udhëhequr nga Bashkimi Evropian. Në fillim të këtij viti ata ranë dakord për një marrëveshje të propozuar nga BE, por që atëherë ata nuk kanë qenë në gjendje të bien dakord se si ta zbatojnë atë.

    Osmani tha se bisedimet mes të dyve nuk mund të vazhdojnë si më parë.

    “Absolutisht nuk është më biznes si zakonisht. Ne kemi qenë viktima të një agresioni të Serbisë dhe të gjithë duhet ta trajtojnë atë si të tillë, edhe në qasjen e tyre ndaj Serbisë tani e tutje”, tha ajo.

    Policia e Kosovës ka arritur vrasjen e tre terroristëve serbë, ndërsa ka arrestuar edhe tetë të tjerë si të dyshuar për përfshirjen në sulmin terrorist.

    Përpos kësaj, Policia e Kosovës ka sekuestruar edhe armatim, që sipas llogaritjeve arrin vlerën e 5 milionë eurove.

  • Serbia shpalli ditë zie, BE: Nuk mund të barazohen terroristët me viktimat e terrorizmit

    Serbia shpalli ditë zie, BE: Nuk mund të barazohen terroristët me viktimat e terrorizmit

    Bashkimi Evropian ka kritikuar Serbinë lidhur me shpalljen e ditës së zisë për sulmuesit e vrarë në veri të Kosovës më 24 shtator.

    Zëdhënësi i Bashkimit Evropian, Peter Stano, tha për gazetarët se “nuk mund të barazohen viktimat e terrorizmit me terroristët”.

    Ai shtoi se në zyrat e BE-së në Prishtinë flamuri u ul në gjysmështizë të hënën – pasi në Kosovë ishte ditë zie – për të nderuar policin e vrarë të Kosovës, Afrim Bunjaku, por nuk ka vepruar kështu kur në Serbi u shpall ditë zie.

    “Kemi parë se Serbia dje ka shpallur ditë zie. Të hënën zyra e BE-së në Prishtinë vendosi flamurin në gjysmështizë për të nderuar policin e vrarë dhe policët e plagosur, viktima të sulmit qyqar terrorist të dielën. Qëndrimi ynë është i qartë dhe ai është shprehur nga përfaqësuesi i lartë [Josep Borrell] më 24 shtator. Për më tepër, sulmuesit kurrë nuk mund të barazohen me viktimat. Prandaj, delegacioni i BE-së në Serbi nuk e ka vendosur flamurin në gjysmështizë. Në përgjithësi, BE-ja është fundamentalisht kundër madhërimit të kriminelëve dhe terroristëve dhe kundër mbajtjes së zisë për ta”, tha Stano.

    Presidenti i Serbisë, Aleksandar Vuçiq, ka deklaruar se nuk mund t’i konsiderojë “kurrë terroristë” sulmuesit në Banjskë. Duke u përgjigjur në pyetjet për këtë deklaratë, Stano tha se sipas BE-së, sulmi ndaj Policisë së Kosovës më 24 shtator ishte sulm terrorist dhe si i tillë duhet të trajtohet dhe hetohet.

    “Para së gjithash më lejoni të përsëris shumë qartë qëndrimin e Bashkimit Evropian për atë që ndodhi të dielën. Ai ishte një sulm terrorist dhe si sulm terrorist duhet të hetohet. Dhe ata që janë përgjegjës duhet të sillen para drejtësisë. Secili që ka rol duhet të bashkëpunojë në mënyrë që ky sulm terrorist jo vetëm të hetohet në tërësi, por të ketë përgjigje para drejtësisë për ata që e planifikuan, kryen dhe që qëndrojnë prapa këtij sulmi”, tha Stano.

    Ai shtoi se BE-ja “nuk lëshohet në komente për çdo deklaratë apo secilin interpretim”, por theksoi se “duhet të ketë qartësi për atë që ndodhi të dielën”.

    Më herët BE-ja ka thënë se po pret përfundimin e hetimeve për të vendosur nëse do të ndërmarrë masa, teksa në bllok disa shtete kanë kërkuar që Serbia të ndëshkohet për rastin në Banjskë të Zveçanit./REL/

  • Raportohet se një 19-vjeçar kosovar ka vdekur pasi u sulmua me thikë në kufirin Serbi – Kroaci

    Raportohet se një 19-vjeçar kosovar ka vdekur pasi u sulmua me thikë në kufirin Serbi – Kroaci

    Një ngjarje e rëndë raportohet të ketë ndodhur në kufirin Serbi – Kroaci, saktësisht në hyrje të fshatit Batrovci, ku dy të rinj janë sulmuar me thikë.

    19-vjeçari nga Kosova, dyshohet se ka humbur jetën si pasojë e plagëve të marra, transmeton Sinjali.

    Siç raporton mediumi serb Blic.rs, të dyshuarit janë arratisur nga vendi i ngjarjes, teksa Policia është vënë në kërkim të tyre.

    Një shofer kamioni nga Bosnje e Hercegovina ka rrëfyer ngjarjen, duke thënë se ka parë një burrë dhe një grup njerëzisht që ishin në rrugën përballë kufirit.

    “Pashë një burrë dhe një grup njerëzish që u gjendën në rrugën përballë kufirit dhe një burrë duke vrapuar. Pak më vonë, mes kamionëve, pashë një tjetër të ri që kishte rënë. Nuk isha i sigurt se çfarë po ndodhte dhe zakonisht nuk dalim nga kamioni në këtë pjesë të rrugës, veçanërisht natën, sepse ka emigrantë të fshehur në zonë. Policia ka ardhur rreth orës 22:00”, ka thënë dëshmitari.

    Njëri prej të rinjve kosovarë, raportohet të ketë shpëtuar nga sulmi me thikë, ku thuhet se i dyshuari është një migrant nga Afganistani.

  • Osmani në Ditën e Boshnjakëve: Ndajmë historinë e përbashkët të gjenocidit serb

    Osmani në Ditën e Boshnjakëve: Ndajmë historinë e përbashkët të gjenocidit serb

    Në Ditën e Boshnjakëve, Presidentja e Kosovës Vjosa Osmani, u ka ndarë mirënjohje dhe dekorata disa nga personaliteteve të shquara të këtij komuniteti, për kontributin e dhënë në shtetndërtim.

    Osmani ka thënë se populli i Kosovës është mirënjohës ndaj komunitetit boshnjak, me të cilin ndan “një histori të përbashkët të dhimbjeve, vrasjeve, persekutimeve, deri tek gjenocidi i kryer kundër nesh”, raporton EO.

    Ajo ka thënë se synimet hegjemoniste të Serbisë nuk po ndalen ende, por se Kosova nuk do të zmbrapset asnjëherë për vendosjen e rendit dhe ligjit.

    “Është një mundësi e shkëlqyer për t’i vlerësuar edhe një herë të arriturat tuaja, rolin tuaj në procesin e lirisë e të pavarësisë dhe shtetndërtimit të Kosovës dhe ndërtimin e një shoqërie demokratike në vendin tonë”.

    “Populli i Kosovës ju është mirënjohës për kontributin tuaj historik në promovimin e vlerave tona të përbashkëta demokratike. Boshnjakët sot janë pjesë e rëndësishme e jetës demokratike të vendit tonë. Ne ndajmë një histori të përbashkët të dhimbjeve, vrasjeve, persekutimeve deri tekë gjenocidi i kryer kundër nesh.

    “Synimet hegjemoniste të Serbisë nuk po ndalen as sot siç ndodhi edhe me sulmin e fundit terrorist, akti agresioni kundër vendit tonë ku u vra rreshteri policor Afrim Bunajku. Për vendosje të rendit e ligjit dhe të mbrojtjes së sovranitetit nuk do të zmbrapsemi asnjëherë. Kosova është shtet përgjithmonë dhe shtëpi e të gjithëve, e tillë do të mbetet për herë”, ka thënë Osmani.

    Me këtë rast ajo për ish-luftëtarin e UCK-së, Nehat Demiri, ndau çmimin post-mortum “Urdhi i lirisë”, për kontributin e tij.

    Me dekorimin post-mortum është dekoruar edhe akademiku Jashar Regjep Agiq, me medalje  presidenciale të meritave, për kontributin në arsimin dhe promovimin e identitetit boshnjak në Kosovë.

  • Bislimi priti në takim Ambasadorin e Turqisë në Kosovë, Sabri Tunç Angılı

    Bislimi priti në takim Ambasadorin e Turqisë në Kosovë, Sabri Tunç Angılı

    Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, priti në takim Ambasadorin e Turqisë në Kosovë, Sabri Tunç Angılı.

    Fillimisht, Ambasadori Angılı shprehu ngushëllimet e tij për familjen e të ndjerit Afrim Bunjaku, Policinë dhe popullin e Kosovës. Ai tha se Turqia e mbështet Kosovën në këtë moment të vështirë pas këtij sulmi.

    Zëvendëskryeministri Bislimi e falënderoi Ambasadorin për mbështetjen dhe mesazhin e tij. Ai e informoi atë më tej mbi sulmin terrorist të së dielës, duke thënë se ishte i orkestruar e organizuar nga Beogradi zyrtar.

    Tashmë ka prova të mjaftueshme që faktojnë përfshirjen e Serbisë në këtë sulm, nga prezenca e nënkryetarit të Listës Serbe, prezenca e truprojës së shefit të BIA, Vulin, e deri tek mjeti i gjetur e konfiskuar në pronësi të Ministrisë së Punëve të Brendshme të Serbisë, vërtetimi i dhënë nga ushtria serbe për pajisje me armatim të rëndë e strehimi i terroristëve në Serbi. Ky ka qenë një skenar i përgatitur nga Beogradi zyrtar për destabilizimin e Republikës së Kosovës.

    Më tej, palët diskutuan edhe për mundësitë e thellimit të marrëdhënieve të shkëlqyera bilaterale dhe rritjen e bashkëpunimit mes dy vendeve tona.

  • BE-ja thotë se po presin hetimet e plota para se të marrin masa ndaj Serbisë

    BE-ja thotë se po presin hetimet e plota para se të marrin masa ndaj Serbisë

    Zëdhënësi i Bashkimit Evropian për Politikë të Jashtme e Siguri, Peter Stano, ka deklaruar se qëndrimi i bllokut evropian është i qartë se të dielën në Banjskë u krye sulm terrorist.

    Gjatë një konference për media, Stano ka thënë se BE-ja po pret të kryhen hetimet e plota, para se të ndërmarrë ndonjë masë.

    “Dua ta përsërisë qartë pozitën e BE-së për atë që ndodhi të dielën. Ky ishte sulm terrorist dhe ai duhet të hetohet, e përgjegjësitë duhet të sillen para drejtësisë. Të gjithë që janë të përfshirë apo që mund, janë të obliguar të bashkëpunojnë në mënyrë që të sigurohet që ky sulm të hetohet plotësisht dhe ata që e kanë planifikuar, që e kanë ekzekutuar apo që ishin prapa të sillen para drejtësisë. Këtë pozicion BE-ja e ka përsëritur disa herë”, ka thënë Stano.

    Njëherit, Stano është pyetur se a ka ndonjë marrëveshje ku policëve shqiptarë të Kosovës nuk u lejohet hyrja në veri.

    “Nuk komentojmë çdo deklaratë, çdo interpretim në lidhje me atë çfarë ka ndodhur. Ne kemi një situatë shumë serioze. Por, ne nuk angazhohemi me partnerët në rajon nëpërmjet kanaleve publike. Nëse kemi diçka për të thënë u themi direkt partnerëve tanë. Të gjithë kanë obligime e dinë shumë mirë se se çfarë prejt BE-ja. Kur shtetet anëtare t’i kenë të gjitha informacionet, më pas do të vendosin nëse duan të reagojnë ndan ndonjë deklarate, interpretimi apo se si do të reagojnë në lidhje me ata që zbulohen se ishin fajtorë për sulmin”, ka thënë Stano.

  • Miratohet rezoluta, Kuvendi dënon sulmin terrorist në Banjskë

    Miratohet rezoluta, Kuvendi dënon sulmin terrorist në Banjskë

    Kuvendi i Kosovës me 97 vota për ka miratuar rezolutën që dënon sulmin terrorist ndaj Policisë së Kosovës më 24 shtator në Banjskë të Zveçanit, ku mbeti i vrarë rreshteri policor, Afrim Bunjaku.

    Pas koordinimit ndërmjet pozitës dhe opozitës, tekstin e rezolutës e paraqiti kryetari i Kuvendit, Glauk Konjufca, ku mes tjerash kërkohet nga faktori ndërkombëtar të ballafaqojë Serbinë me rolin e saj në raport me organizimin dhe mbështetjen që i ka bërë këtij grupi.

    Aty i ofrohet mbështetje Policisë së Kosovës për ushtrimin e detyrave të saja në tërë territorin e Kosovës.

    Po ashtu i bëhet thirrje Qeverisë së Kosovës që të punojë me aleatët ndërkombëtarë, si dhe kërkohet nevoja për një hetim ndërkombëtar ndaj Serbisë në lidhje me organizimin e aktiviteteve terroriste.

    “Duke marrë për bazë gjendjen e sigurisë që po kalon vendi pas sulmit terrorist të organizuar nga Republika e Serbisë ndaj sovranitetit shtetëror dhe integritetit territorial të Kosovës, duke vlerësuar rëndësinë e ruajtjes dhe mbrojtjes së sovranitetit shtetëror dhe integritetit territorial të Kosovës si dhe përcaktimin dhe angazhimin tonë shtetëror për t’i kontribuar paqes dhe stabilitetin në rajon, të vendosur që Republika e Kosovës që të jetë vend i lirë dhe demokratik dhe atdhe i qytetarëve të saj të cilëve iu garantohen të drejtat, liritë dhe barazia ndaj ligjit. Të përkushtuar për të luftuar dhe parandaluar me mjete kushtetuese dhe ligjore çfarëdo veprimi dhe përpjekje që cenon, rrezikon dhe sulmon rendin kushtetues të Kosovës, Kuvendi i Kosovës e dënon me termat më të ashpër sulmin terrorist mbi Policinë e Kosovës me datë 24 shtator 2023, si dhe kërkon nga faktori ndërkombëtar që të ushtrojë ndikimin e tij për ta ballafaquar Serbinë me rolin e saj në raport me organizim dhe mbështetjen e çfarëdo llojshme që i ka bërë grupit terrorist për sulmin në veri të Republikës së Kosovës. Vlerëson punën dhe angazhimin e rezultateve të jashtëzakonshme të institucioneve të sigurisë së Kosovës dhe institucioneve partnere të sigurisë EULEX dhe KFOR për t’i zmbrapsur dhe asgjësuar sulmet terroriste të organizuara nga Serbia”, tha Konjufca.

    Në këtë rezolutë po ashtu theksohet nevoja për pluralizëm politik në komunitetin serb në Kosovë.

    REZOLUTA E PLOTË:

    – Duke marrë për bazë gjendjen e sigurisë nëpër të cilën po kalon vendi pas sulmit terrorist të organizuar nga Republika e Serbisë ndaj sovranitetit shtetëror dhe intergritetit territorial të Republikës së Kosovës;

    – Duke vlerësuar rëndësinë e ruajtjes dhe mbrojtjes së sovranitetit shtetëror dhe intergritetit territorial të Republikës së Kosovës si dhe përcaktimin dhe angazhimin shtetëror për t’i kontribuuar paqes dhe stabilitetit në rajon;

    – Të vendosur që Republika e Kosovës të jetë vend i lirë, demokratik, paqedashës dhe atdhe i qytetarëve të saj, të cilëve ju garantohen të drejtat, liritë dhe barazia para ligjit;

    – Të përkushtuar për të luftuar dhe parandaluar me mjete kushtetuese dhe ligjore çfarëdo veprimi dhe përpjekje për të cënuar, rrezikuar apo sulmuar rendin kushtetutes të Republikës së Kosovës;

    Kuvendi i Republikës së Kosovës

    1. DËNON me termat më të ashpër sulmin terrorist të organizuar nga Republika e Serbisë mbi Policinë e Kosovës më datën 24 shtator 2023, si dhe kërkon nga faktori ndërkombëtar që të ushtroj ndikimin e tij për ta ballafaquar Serbinë me rolin e saj në raport me organizimin dhe mbështetjen e çdo llojshme që i ka bërë grupit terrorist për sulmin në veri të Republikës së Kosovës;

    2. VLERËSON punën, angazhimin dhe rezultatet e jashtëzakonshme të institucioneve të sigurisë së Republikës së Kosovës dhe të institucioneve partnere ndërkombëtare të sigurisë (Eulex dhe KFOR), në aksionin e përbashkët për të zmbrapsur dhe asgjësuar sulmet terroriste të organizuara nga Serbia në veri të vendit;

    3. OFRON mbështetjen e plotë dhe të pa rezervë për Policinë e Kosovës në ushtrimin e përgjegjësisë për ruajtjen e rendit dhe sigurisë publike në tërë territorin e Republikës së Kosovës.

    4. KËRKON nga të gjitha institucionet e Republikës së Kosovës që të vazhdojnë punën e përbashkët për integrimin e plotë dhe bashkëjetesën mes të gjitha komuniteteve pa dallim që jetojnë në Republikën e Kosovës;

    5. INKURAJON dhe MBËSHTET pluralizimin politik në radhët e komunitetit serb në Kosovë, zhvillimi i të cilit mundëson progresin demokratik dhe rrit transparencën e llogaridhënien para këtij komuniteti dhe jetëson promovimin e interesave reale të tij në Republikën e Kosovës.

    6. KËRKON nga Qeveria e Republikës së Kosovës që të bashkëpunoj me aleatët ndërkombëtarë, veçanërisht me SHBA-të, për të fuqizuar Shtetin e së Drejtës dhe vlerat e përbashkëta euro-atlantike;

    7. KONSTATON nevojën për hetim ndërkombëtar ndaj Republikës së Serbisë lidhur me organizimin e aktiviteteve terroriste dhe vazhdimin e ekzistencës së kampeve stërvitore të grupeve terroriste në territorin e Serbisë.

  • Kështu ishte planifikuar gjithçka nga terroristët serb, detajet e planit i tregon gazetari Jashari

    Kështu ishte planifikuar gjithçka nga terroristët serb, detajet e planit i tregon gazetari Jashari

    Fshati Banjskë në Komunën e Zveçanit është hapur dje për qarkullim, pas përleshjes së armatosur që ndodhi atje të dielën, më 24 shtator, mes Policisë së Kosovës dhe një grupi të armatosur, terrorist serb, me ç’rast mbeti i vrarë rreshteri i Policisë së Kosovës, Afrim Bunjaku dhe dy pjesëtarë tjerë mbetën të lënduar. 

    Mirëpo, pesë ditë pas këtyre ngjarjeve, situata në veri të Kosovës po raportohet e qetë, ani pse, gjurmë të shumta kanë mbetur pas në këtë fshat. Ishte pikërisht Manastiri Ortodoks i Banjskës dhe objektet përreth tij, që u përdor si vendstrehim nga grupi terrorist, pasi vranë policin Bunjaku.

    Autoritetet e Kosovës kanë thënë se nënkryetari i Listës Serbe – partisë më të madhe të serbëve në Kosovë – Millan Radoiçiq i ka organizuar sulmet dhe ka qenë pjesë e tyre. Ato madje e kanë publikuar një pamje me dronë, dhe aty pretendohet se shihet Radoiçiq i armatosur, në mesin e një grupi burrash, po ashtu me armë në duar dhe të veshur me uniforma, i cili po ashtu kërkohet nga autoritetet e Kosovës, për disa vepra penale.

    Gazetari i ATV-së Fatlum Jashari në një lidhje direkte për emisionin “A LIVE”, ka treguar detajet e planit të këtij sulmi./atvlive.tv/

    Raportimin e plotë të gazetarit Jashari e gjeni në videon e mëposhtme:

     

  • Eskalon dhuna në Suedi, tre të vrarë nga një shpërthim e dy sulme me armë brenda disa orëve

    Eskalon dhuna në Suedi, tre të vrarë nga një shpërthim e dy sulme me armë brenda disa orëve

    Tre persona u vranë gjatë natës së kaluar në tri incidente të ndara në Suedi, përderisa eskaloi dhuna e ndërlidhur me një përplasje mes bandave kriminale.

    Të mërkurën vonë, një djalë 18-vjeçar u qëllua për vdekje në periferi të Stokholmit. Disa orë më vonë, një burrë u vra dhe një tjetër u plagos nga të shtënat në Jordbro, në jug të kryeqytetit suedez, raporton agjencia “Associated Press”.

    Të enjten herët, një grua në të njëzetat vdiq nga një shpërthim në Uppsala, në perëndim të Stokholmit. Shpërthimi dëmtoi pesë shtëpi dhe po trajtohet nga policia si rast i vrasjes. Mediat suedeze raportuan se gruaja që vdiq me gjasë nuk ishte në shënjestër.

    Televizioni suedez, SVT, theksoi se dy rastet fatale të të shtënave e kanë çuar në 11 numrin e të vdekurve nga dhuna me armë, duke e bërë atë muajin më vdekjeprurës nga të shtënat që nga fillimi i mbajtjes së statistikave nga policia më 2016.

    Nuk qe e ditur nëse të shtënat ose shpërthimi ishin të ndërlidhura mes vete, por mediat suedeze thanë se dy prej tri ngjarjeve ishin disi të lidhura me përplasjen mes grupeve kriminale, problem në rritje në Suedi, ku janë regjistruar shumë të shtëna e shpërthime.

    Tre persona janë ndaluar nën dyshimin për bashkëfajësi në të shtënat fatale në Jordbro. Policia tha se dy persona janë arrestuar për shpërthimin në Uppsala, i cili ishte aq i fortë, saqë fasadat e dy shtëpive kishin rënë në tokë.

    Më herët këtë javë, dy shpërthime të fuqishme ndodhën në ndërtesa banimi në pjesën qendrore të Suedisë, duke lënë të paktën tre të lënduar e duke dëmtuar ndërtesa.

  • Kurti kërkon ekstradimin e sulmuesve që kanë ikur në Serbi

    Kurti kërkon ekstradimin e sulmuesve që kanë ikur në Serbi

    Kryeministri i Kosovës, Albin Kurti, ka kërkuar ekstradimin e sulmuesve që kanë ikur në Serbi.

    Përveç tyre, Kurti ka thënë se të gjithë sulmuesit tjerë ose janë vrarë, ose janë arrestuar, raporton Ekonomia Online.

    Në seancën plenare të Kuvendit të Kosovës, ai ka kërkuar që Serbia të ndëshkohet nga bashkësia ndërkombëtare, sepse në të kundërt, ajo do të vazhdojë njësoj.

    “Të dielën përjetuam një sulm agresor nga bandat kriminale të Serbisë ndaj shtetit demokratik. Sulmi i organizuar nga bandat terroriste la të vrarë rreshterin Afrim Bunjaku. Ishte ditë e rëndë për vendin tonë. Policisë do t’i mungojë një pjesëtar e do ti mungojë edhe familjes së tij”, tha Kurti.

    “I vetmi polic që u vra ishte ai që u zu në prit. Ata u vranë ose u arrestuan ose po përndiqen. Kishte sulm terrorist që cenoi sovranitetin dhe sigurinë kombëtare. Sulmuesit që ikën, duhet të ekstradohen. Organizata ‘Mbrojtja Civile’ duhet të shpallet organizatë terroriste edhe nga vendet tjera në rajon, siç vepruam ne”.

    “Serbia duhet të ndëshkohet nga bashkësia ndërkombëtare dhe nëse nuk e bën këtë, ajo mund ta përsëris këtë gjë”.

    Kurti ka përmendur edhe armët që janë gjetur në këtë aksion, duke thënë se të gjitha janë të prodhuara në Serbi.