Category: Lajme

Ka dështuar raportimi i zëvendëskryeministrit të parë, Besnik Bislimi për ecurinë e dialogut Kosovë-Serbi në Komisionin për Punë të Jashtme dhe Diasporë, në mungesë të kuorumit, raporton Ekonomia Online.

Kryetarja e Komisionit për Punë të Jashtme dhe Diasporë, Arbreshë Hyseni, tha se Bislimi ka qenë në mbledhje të Qeverisë, dhe në ndërkohë po priste kuorumin për të ardhë në raportim.

Ajo theksoi se është e paarsyeshme sjellja e deputetëve të opozitës, anëtarë të këtij komisioni, që nuk e pritën Bislimin.

Deputetja e LDK-së, Doarsa Kica-Xhelili tha se do e lëshuan sallën pas 15 minutash, ngase Bislimi ishte dashur të vijë me kohë në raportim.

Qeveria e Kosovës nuk do të vazhdojë më të mbulojë shpenzimet për konsumin e energjisë elektrike në komunat veriore të vendit.

Ministrja e Ekonomisë, Artane Rizvanolli theksoi se që prej vitit të kaluar, i është dhënë fund pagesës së faturave të energjisë elektrike për këto komuna.

Ajo në një konferencë për media theksoi se Serbia po e saboton zbatimin e marrëveshjes për energji, Udhërrëfyesin për energjinë.

“Sa i përket mbulimit të konsumit të energjisë për komunat veriore të vendit, kemi pasur një Udhërrëfyes vitin e kaluar me një afat prej 100 ditësh, ne kemi thënë me atë rast se pagesat e fundit që do të bëhen nga buxheti i Kosovës do të jenë deri në afatin e zbatimit të kësaj marrëveshje. Kemi pasur kërkesa të vazhdueshme nga KOSTT-I që nga ajo kohë, mirëpo nuk kemi ndarë mjete shtesë si qeveri. Ne kemi bërë të qartë për të gjitha palët se një mënyrë e tillë e funksionimit nuk mund të vazhdojë. Sigurisht që ne si institucione dhe të gjithë operatorët, qoftë KOSTT, KEDS-, ZRRE, i kemi kryer detyrat tona në afate të duhura sipas kësaj marrëveshje. Ndërsa, nga pala tjetër (Serbia) kemi pasur sabotim dhe zvarritje, mirëpo me kërkesën e ndërmjetësuesve ne kemi vazhduar të diskutojmë shqetësimet. Mirëpo, pa bërë kompromise shtesë apo ndryshim të kësaj marrëveshje dhe e kemi bërë të qartë që verzioni I fundit I kontratës I cili është dërguar “Elektroseverit”, disa muaj më parë, është verzioni i fundit të marrëveshjes, i cili duhet të nënshkruhet nga ata. Dje, operatori I distribucionit ‘KEDS-I” i ka I ka dërguar kërkesën e fundit për nënshkrim të kompanisë “Elektrosever” dhe presim që kjo të ndodhë shpejt, brenda ditësh. Nëse jo, atëherë sigurisht që duhet ti shohim të gjitha opsionet e tjera për të adresuar këtë çështje”, theksoi ajo.

Ministrja Rizvanolli në konferencë për media pas mbledhjes së Qeverisë theksoi se një kredi prej 15 milionë eurosh shtesë për Telekomin e Kosovës do t’i shfrytëzojë për investime në rrjetin mobil dhe fiks.

“Sot në qeveri e miratuam edhe një kredi prej 15 milionë eurosh shtesë për Telekomin e Kosovës, me të cilat mjete Telekomi I Kosovës do të bëjë investime në rrjetin mobil dhe atë fiks për të vazhduar investimet që tani më i ka filluar me kontratën e nënshkruar prej 13 milionë eurosh në vitin e kaluar… Telekomi do të vazhdoj të investoj në pajisje të tjera, deri te zbatimi i plotë i rrjetit të gatshëm për 5 G”, theksoi Rizvanolli.

Në mbledhje janë miratuar edhe propozim-vendimi për aprovimin e ndarjes buxhetore për subvencionim të ndërtimit të shtëpive për komunitetet joshumicë, kërkesën e Ministrisë së Financave për lirim zero nga Tatimi Doganor dhe atë për Normën e Tatimit të Akcizës.

Edhe sot, në Dhomat e Specializuara të Kosovës (DhSK) në Hagë do të vazhdojë dëshminë dëshmitari i 30-të (me kodin W04769) në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Ky dëshmitarë për të cilin Gjykata Speciale njoftoi se është ish-pjesëtar i UÇK-së, ka dëshmuar edhe në seancën e djeshme, e cila ka qenë e mbyllur për publikun, raporton “Betimi për Drejtësi”.

Dëshmitari i 30-të, u ftua në sallë pasi që i 29-ti tha se nuk ishte i gatshëm që të dëshmonte, por ishte i gatshëm që të shkonte në burg. Po ashtu, ai kërkoi edhe nga trupi gjykues Charles Smith III që t’i japin një muaj kohë në këtë proces.

Kërkesa e tij u refuzua pjesërisht nga trupi gjykues, kështu që u morë vendim që dëshmitari i 29-të, a vazhdojë dëshminë e tij të hënën më 16 tetor.

Vlen të theksohet se seanca e ditës së sotme do të jetë më e shkurtë, për shkak se do të mbahet konferenca javore. Në këtë konferencë do të jepen informata javore lidhur me procedurat gjyqësore dhe veprimtaritë e tjera publike të Gjykatës.

Gjithashtu, do të ketë edhe konferencë mbi ecurinë e çështjes ndaj Ismet Bahtijarit dhe Sabit Januzit, të cilët në seancën e parë para gjyqtarit të procedurës paraprake Nicolas Guillou, janë deklaruar të pafajshëm për akuzat që iu vihen barrë nga Zyra e Prokurorit të Specializuar.

Aktakuza ndaj tyre është ngritur më 4 tetor 2023, me të cilën ngarkohen se kanë tentuar të bindnin një dëshmitar të mos japë dëshmi.

Ndryshe, gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse. Pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.

Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.

Më 11 prill ka filluar paraqitja e provave të Prokurorisë ku dëshmitarja e parë e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.

Më 17 prill ka filluar dëgjimi i dëshmitarit të dytë, po ashtu i mbrojtur, i cili ka vazhduar dhënien e dëshmisë edhe më 18 prill, 19 prill dhe 20 prill, ku ka përfunduar dhënien e dëshmisë edhe dëshmitari i tretë. Kurse më 10 maj ka filluar dhënien e dëshmisë dëshmitari i katërt, dëshmia e të cilit përfundoi më 17 maj.

Tutje, dëshmitari i pestë ka filluar dëshminë më 17 maj dhe e përfundoi më 22 maj, ku filloi dëshminë dëshmitari i gjashtë i cili e përfundoi më 23 maj, në të njëjtën ditë me dëshmitarin e shtatë.

Kurse, më 12 qershor ka filluar dëshminë e tij dëshmitari i tetë, i cili përfundoi dëshminë e tij më 14 qershor, ndërkaq me 15 qershor ka përfunduar dëshmia e dëshmitarit të nëntë.

Më 19 qershor ka përfunduar dëshminë dëshmitari i dhjetë, në ditën ku ka filluar dëshminë dëshmitari i 11-të. Dëshmitari i 11-të e ka përfunduar dëshminë e tij më 20 qershor.

Ndërsa, më 10 korrik ka filluar dëshminë dëshmitari i 12-të, i cili ka përfunduar dëshminë më 11 korrik, në seancën ku ka filluar dëshminë Rrustem Mustafa, ish-komandat i zonës operative të Llapit.

Mustafa ka vazhduar dhënien e dëshminë së tij në seancën e 12, 13, 14, 17 dhe 18 korrikut.

Ndërsa dëshmitari i 14-të me radhë, Francis Ladwidge, oficeri britanez që shërbeu në Kosovë filloi dëshminë po më 18 korrik dhe e mbaroi më 19 korrik, ku nisi dëshminë dëshmitari i 15-të, i cili e përfundoi më 20 korrik.

Kurse, më 14 gusht filloi dhënien e dëshmisë dëshmitari i 16-të, e që e përfundoi më 16 gusht dhe më 17 gusht përfundoi dëshminë dëshmitarja e 17, Dragica Bozhaniq.

E dëshmia e dëshmitarit të 18-të ka filluar më 28 gusht dhe ka mbaruar më 29 gusht, në ditën kur filloi dëshminë dëshmitari i 19-të, i cili përfundoi dëshminë më 30 gusht.

Më 4 shtator përfundoi në të njëjtën ditë dëshminë dëshmitari i 20-të, kurse pa masa mbrojtëse, dëshmitari i 21-të, Agim Idrizi filloi të dëshmojë, i cili përfundoi dëshminë më 5 shtator, ku edhe filloi dëshmia e zyrtarit nga organizata ndërkombëtare “Human Rights Watch”, të Frederick Abrahams, i cili përfundoi më 11 shtator.

Më 11 shtator ka përfunduar edhe dëshmia e dëshmitarit të 23-të, ndërkaq më 12 shtator ka filluar të dëshmojë dëshmitari i 24-të.

Në të njëjtën ditë ka filluar dëshminë dëshmitari i 25-të Douglas Young, ish-oficer i ushtrisë britanike, i cili ka përfunduar dëshminë më 14 shtator.

Kurse, më 25 shtator ka filluar dëshminë dëshmitari i 26-të, i cili ka përfunduar më 26 shtator, ku në seancë të mbyllur ka filluar dëshminë dëshmitari i 27-të. Më 9 tetor ka filluar dhe më 10 tetor ka mbaruar dëshminë e tij dëshmitari i 28-të, ish-reporteri i Tanjugut, Nebojsha Radosheviq (me kodin 03880). Po më 10 tetor, ka filluar dëshminë e tij dëshmitari i 29-të i mbrojtur me kodin Ë04577, në këtë proces. Ndonëse, kërkoi një muaj kohë në këtë proces, dëshmitari i 29-të pritet që dëshminë e tij ta vazhdojë me 16 tetor.

Ndërsa, në po të njëjtën ditë me dëshmitarin e 29-të, ka filluar dëshminë edhe i 30-ti e që pritet ta vazhdojë edhe në ditën e sotme.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Kryeministri izraelit Benjamin Netanyahu ka deklaruar se çdo anëtar i Hamasit është “njeri i vdekur”, pas takimit të tij të parë me anëtarët e kabinetit të qeverisë së formuar mbrëmë, raporton BBC.

Netanyahu pranoi që formojë qeverinë e luftës me ish-ministrin e Mbrojtjes, Benny Gantz. Ata vendosën të lënë anash mosmarrëveshjes dhe rivalitetin politik.

Benny Gantz tha se tani “është koha për luftë” dhe porositi qytetarët izraelitë se qeveria e re e formuar mbrëmë është e “bashkuar” dhe e “gatshme” të heq nga faqja e dheut Hamasin.

E rivali kryesor nga opozita Yair Lapid akoma nuk i është bashkuar qeverisë së luftës, por Netanyahu dhe Gantz në një kumtesë të përbashkët njoftuan se është rezervuar një vend edhe për të, përcjell Telegrafi.

Qeveria e Kosovës, në mbledhjen e sotme ka aprovuar në parim kërkesën e Telekomit për huamarrje prej 15 milionë eurosh për projekte investive në këtë ndërmarrje, transmeton Reporteri.net.

Ministri i Financave, Hekuran Murati, ka thënë se ministria ka shqyrtuar kërkesën e Telekomit e cila fillimisht ka qenë 20 milionë euro.

“Kjo kredi do të shërbejë për investime në pajisje dhe sisteme telekomunikuese dhe përmirësimin e shërbimeve nga Telekomi”, ka thënë ai duke shtuar se Telekomi ka pasur nevojë për këtë kredi shtesë.

Qeveria në mbledhjen e së enjtes ka shtyrë disa projektligje të cilat ishin të planifikuara për këtë vit për shkak të numrit të madh të tyre.

Projektligji për plotësimin dhe ndryshimin e Ligjit për bashkëpunim ndërkomunal, ai për planifikim hapësinor, për harmonizim të ligjeve të veçanta me Ligjin për inspektimet dhe ai për harmonizimin e ligjeve të veçanta me Ligjin për leje dhe licenca, janë projektligjet që u shtynë për vitin e ardhshëm.

Telekomi i Kosovës është kompani publike, e transformuar në shoqëri aksionare.

Qeveria e Kosovës është pronare e të gjitha aksioneve të Telekomit.

Deri në vitin 2015, kjo ka qenë kompania më fitimprurëse në vend.

Nga viti 2008 deri më 2015, ajo i ka paguar Qeverisë së Kosovës mbi 250 milionë euro dividenda – mjete që ndahen kur kompania shënon rezultate të mira financiare.

Por, viteve më pas, është përballur me përkeqësim të situatës financiare.

Kjo, sipas ekspertëve të telekomunikacionit, ka ndodhur si pasojë e kontratave të dëmshme, vendimmarrjes së gabuar, mungesës së investimeve, ndërhyrjes së politikës në vendimmarrje strategjike të kompanisë dhe nepotizmit.

Qeveria e Kosovës ka shtuar në listën e saj për lirim nga akciza disa produkte për prodhuesit vendës, raporton EO.

Në mbledhjen e Qeverisë, ministri i Financave, Punës dhe Trasnfereve, Hekuran Murati, ka thënë se do të lirohen disa aksesorë për montim të prodhuesve e kanaçet nga çeliku.

“Si Qeveri jemi të përkushtuar në mbështetjen për prodhuesit vendor, duke filluar nga subvencionet e ndryshme, pjesëmarrjen nëpër panaire e kështu më radhë. Në diskutime me akterë të ndryshëm, listës së lirimit nga akciza i shtohen disa mallra rezervë të makinerive”, ka thënë Murati.

Presidenti rus Vladimir Putin mbërriti në Republikën e Azisë Qendrore të Kirgistanit mëngjesin e sotëm.

Kjo është vizita e tij e parë e huaj këtë vit dhe gjithashtu hera e parë që shefi i Kremlinit largohet nga Rusia që kur Gjykata Penale Botërore në Hagë lëshoi ​​urdhër-arrestin.

Udhëheqësi i Kremlinit planifikon të mbajë një sërë takimesh dypalëshe në Kirgistan dhe gjithashtu të marrë pjesë në samitin e Komonuelthit të Shteteve të Pavarura (CIS), në të cilin ish-republikat sovjetike punojnë së bashku.

Në mbledhjen 165-të të Qeverisë së Kosovës, kryeministri Albin Kurti, ka bërë të ditur se institucionet e sigurisë dhe të inteligjencës kanë vërejtur rrezikun në rritje të inskenimeve të sulmeve të dhunshme nga grupe të strukturave kriminale të Serbisë në Kosovës.

Ai u ka bërë thirrje të gjithë qytetarëve serbë në Kosovës që të jenë të vëmendshëm dhe të vetëpërmbahen nga cytjet e inskenuara dhe dashakeqe të Serbisë.

“Ju bëj thirrje veçanërisht juve të nderuar bashkëqytetarë serbë, që ditëve, javëve dhe muajve në vijim, të jeni të vëmendshëm dhe të vetëpërmbajtur nga cytjet dhe aktet e dhunës të inskenuara dhe dashakeqe”, ka thënë Kurti.

Ai ka theksuar se në Kosovë të gjithë janë qytetarë të barabartë sepse shteti është ligjor dhe shoqëria është demokratike.

“Nuk ka komunitete të padëshiruara. Ata që duan të na rrënojnë, nuk do të ia dalin sepse jemi të përgatitur dhe bashkë për paqe, siguri dhe demokraci”, ka thënë tutje kryeministri Albin Kurti.