Category: Lajme

Gjashtëdhjetë shtetas të Maqedonisë së Veriut janë evakuuar nga Izraeli që nga fillimi i sulmit masiv të militantëve të Hamasit, të shtunën, më 7 tetor, bëri të ditur ministri i Punëve të Jashtme i Maqedonisë së Veriut, Bujar Osmani.

Ai tha se autoritetet kanë regjistruar rreth 150 shtetas të Maqedonisë së Veriut në qytete të ndryshme të Izraelit dhe në territoret palestineze. Por, ky numër mund të arrijë deri në 200 persona pasi disa nuk janë paraqitur për identifikim në thirrjen e autoriteteve të Shkupit.

Të shtunën, sipas Osmanit, pritet të kthehen në Shkup edhe 90 të tjerët, të cilët janë duke komunikuar me shtabin e krizës të formuar menjëherë pas shpërthimit të konfliktit të Izrael.

Shefi i diplomacisë maqedonase tha se ambasada në Kajro, është duke komunikuar me dy persona të tjerë që ndodhen brenda zonave të rrezikuara të Gazës, të izoluara nga Izraeli, pasi nuk arritën të dilnin para mbylljes së pikës së vetme kufitare me Egjiptin.

“Situata atje është shumë e ndryshueshme dhe vlerësojnë se janë të ekspozuar ndaj rrezikut. Ne po punojmë, gjithashtu, me autoritetet në Egjipt për t’i liruar ata dhe më pas do të organizojmë transportin nga Egjipti. Mirëpo, për momentin nuk kemi si t’i nxjerrim nga Gaza”, tha Osmani.

Disa nga shtetasit maqedonas që gjendeshin në zonat e rrezikuara në rajonin e Gazës, të mërkurën në mbrëmje kanë arritur Athinë prej nga me autobus janë transferuar në kufirin e Maqedonisë së Veriut.

Sipas Osmanit, fillimisht fokusi ishte identifikimi, kontaktimi dhe nxjerrja e qytetarëve nga zonat e rrezikuara dhe më pas transportimi i tyre në Tel Aviv.

Osmani theksoi se një pjesë e qytetarëve të kthyer, kanë ardhur përmes Jordanisë, Shqipërisë, Turqisë, Malit të Zi dhe Serbisë, me ç’rast u shprehu mirënjohje autoriteteve të këtyre shteteve.

Maqedonia e Veriut i ka dënuar sulmet e militantëve të Hamasit ndaj Izraelit, ndërsa ka bërë thirrje për dialog për zgjidhjen e mosmarrëveshjeve.

“Ne i dënojmë fuqishëm sulmet terroriste të Hamasit ndaj Izraelit. Mendimet tona janë me popullin izraelit, me të cilin solidarizohemi dhe ndajmë dhimbjen. Bëjmë thirrje për zgjidhje me dialog pasi bota ka nevojë për paqe”, thuhet në reagimin me shkrim të kryeministrit maqedonas, Dimitar Kovaçevski./REL/

Kreu i Kuvendit, Glauk Konjufca e ka lëshuar sallën e Kuvendit të Kosovës, pas kërkesës së deputetes së PDK-së, Ganimete Musliu.

Musliu, kritikoi mazhorancën për mosparaqitje në seancë dhe i ka bërë thirrje kryeparlamentarit Konjufca, që t’i ftojë në seancë deputetët e pozitës, duke i thënë që nuk është njeri pa fuqi në VV.

“Kryetar nuk jeni krejtësisht i pafajshëm në krejt këtë ngjarje sepse nuk jeni pa fuqi politike brenda subjektit tuaj politik dhe unë mendoj që edhe për ju tani më mirë do të ishte që t’u bëni thirrje publike deputetëve të partisë tuaj që të jenë këtu dhe t’i përkrahin kërkesat e Policisë së Kosovës ose ta lironi karrigen dhe t’ia lironi një nënkryetari ta udhëheq këtë seancë”, tha ajo.

I menjëhershëm qe reagimi i kryekuvendarit Konjufca.

“Atëherë zonja Musliu unë pajtohem plotësisht me kërkesën tuaj. Seancën pra le ta udhëheq nënkryetari i juaj PDK-së ose i LDK-së. Faleminderit”, ka thënë Konjufca dhe është ngritur për të dalë nga salla.

Seanca me këtë rast nuk ka vazhduar më.

Pas refuzimit të deputetëve të Lëvizjes Vetëvendosje për të marrë pjesë në seancën ku do të votohej Rezoluta për Policinë e Kosovës, kryetari i Partisë Demokratike të Kosovës, Memli Krasniqi ka thënë se pushteti e do policinë vetëm për mburrje.

Krasniqi, përmes një postimi në Facebook, theksoi se sot, për herë të dytë brenda një jave, Lëvizja Vetëvendosje kundërshtoi Rezolutën e propozuar nga Partia Demokratike e Kosovës, e cila, me miratimin e saj, do të ndihmonte shpejtë dhe konkretisht Policinë e Kosovës.

“Është e mjerueshme dhe për keqardhje kjo qasje e pushtetit ndaj policëve tanë. Shpejt e harruan sakrificën e Heroit Afrim Bunjaku dhe kolegëve të tij, të cilët, çdo ditë e vënë jetën e tyre në rrezik për të garantuar sigurinë e qytetarëve dhe sovranitetin e shtetit tonë”, ka shkruar kreu i PDK-së.

Krasniqi tha se PDK nuk do të ndalet dhe do të insistojë, përmes të gjitha mënyrave dhe mekanizmave që këtë Rezolutë të miratohet. “Shtesat për rrezikshmërinë, sigurimi shëndetësor dhe miratimi i Ligjit për pensionim të parakohshëm – janë më të paktat që meritojnë policët tanë”, është shprehur Krasniqi.

Deputeti i LDK-së, Avdullah Hoti, në seancën tha se është cenuar demokracia parlamentare në Kosovë.

Ai përmendi tri instrumente që opozita i ka në dorë dhe sipas tij që të tria po cenohet drejtpërdrejtë nga vendimet e shumicës, raporton Ekonomia Online. Ai tha se Konjufca duhet t’i japë rrugë kësaj çështje ose të shpërbëhet Kuvendi.

“Situata e sotme ka kulmuar me një pozicion që besoj që cenohet demokracia parlamentare në Kosovë. Janë tri instrumente që i ka opozita në dorë: seanca e jashtëzakonshme, komisionet parlamentare dhe pyetjet parlamentare të deputetëve. Të tria këto, në dy javët e fundit janë cenuar drejtëpërdrejtë me vendime të shumicës. Pak ju mbaj përgjegjës juve dhe kryesinë e Kuvendit, ju duhet të uleni të diskutoni këtë situatë, kjo është e patolerueshme”.

“Nuk është veprim i thjeshtë parlamentar mosprezenca e mazhorancës sot këtu ose veprim i thjeshtë i kryeministrit mos e u përgjigj në pyetjet parlamentare, ose pamundësimi i konstituimit të komisionit hetimor. Ky është cenim i rendit kushtetues”, tha ai.

Auditimi i organizatave buxhetore është një proces me sfida, por pavarësisht vështirësive sjell vlera thelbësore që fondet publike të administrohen në dobi të qytetarëve. Kështu u tha në konferencën “Roli i Institucioneve Supreme të Auditimit në dobi të qytetarëve”, me rastin e 20 vjetorit të themelimit të Zyrës Kombëtare të Auditimit (ZKA).

Auditorja e Përgjithshme në Zyrën Kombëtare të Auditimit, Vlora Spanca tha se roli i auditimit është thelbësor, meqë sipas saj transparenca dhe llogaridhënia e institucioneve publike çdo herë e më shumë bëhet më e domosdoshme.

“Transparenca dhe llogaridhënia e institucioneve publike çdo herë e më shumë bëhet më e domosdoshme, prandaj roli i auditimit është padyshim thelbësor. Auditimi është një proces i përcjellë me sfida, por pavarësisht vështirësive, sjell vlerë thelbësore që fondet publike të administrohen në dobi të qytetarëve e me këtë edhe rrit besimin e publikut në ata që i administrojnë fondet e besuara. Që nga themelimi ZKA ka pasur një zhvillim të hovshëm si në aspektin organizativ ashtu edhe në atë profesional. Tani ZKA numëron rreth 170 punonjës prej tyre rreth 87 për qind janë staf auditues”, tha Spanca.

Ajo shtoi se përmes auditimit për temën “Efektiviteti i Institucioneve për trajtimin e rasteve të dhunës në familje”, është vendosur në qendër të vëmendjes së Qeverisë, Kuvendit dhe qytetarëve nevoja për të adresuar dukurinë e dhunës në familje.

Tutje, Spanca tha se auditimi për temën “Programi i Trajtimit të Pacientëve Jashtë Institucioneve Shëndetësore Publike”, ka ndikuar në përshpejtimin e përditësimit te Udhëzimit Administrativ, derisa shtoi se kjo u lehtësoi qytetarëve procedura e aplikimit.

“Rezultatet e auditimit të performancës “Programi i Trajtimit të Pacientëve Jashtë Institucioneve Shëndetësore Publike” përmes së cilit është përshpejtuar përditësimi i Udhëzuesit administrativ me anë të të cilit qytetarëve u është lehtësuar procedura e aplikimit dhe mundësia për të përfituar nga programi tani është e barabartë për të gjithë. Po ashtu, nëse rekomandimet e dhëna merren seriozisht dhe zbatohen, atëherë, qytetarët përfitojnë përshpejtim të vlerësimit të aplikacioneve dhe mundësi të vlerësimit të saktë dhe meritorë për secilin rast. Qytetarët mund të përfitojnë vetëm për rastet të cilat realisht nuk trajtohen në institucionet shëndetësore publike, gjë që mundëson përfitim nga ky subvencionim për një numër të madh të qytetarëve”, potencoi Spanca.

Ndërkaq, përmes një video mesazhi, drejtori i përgjithshëm i Iniciativës për Zhvillim, Einar Gorrisen tha se ka ndjekur zhvillimin e Zyrës së Auditimit të Kosovës, derisa shtoi se ka vërejtur zhvillime të suksesshme.

“Ndikimi i auditmit në përmirësimin e financave publike ngre një temë shumë të rëndësishme. Shpresojmë që do të sigurojmë që auditimet tona do të çojnë në ndryshime shoqërinë tonë dhe jo vetëm të kemi si raporte të tilla. Nga eksperienca ime kjo kërkon marrjen në konsideratë të shumë gjërave gjatë auditimit, për shembull fillimin me selektimin e temave nga shoqëria civile dhe trajtimin e rekomandimeve të auditimit…Kam pasur privilegjin të punoj m ISA-në në të gjithë botën. Kam ndjekur zhvillimin e Zyrës Kombëtare të Auditimit të Kosovës, dhe kam parë zhvillime dhe kam parë të zhvillohet një institucion auditimi i suksesshëm”, tha Gorrisen.

Ndërsa, auditori i Përgjithshëm i Shteteve të Bashkuara, Gene Dodaro vuri në pah rëndësinë e avancimit të teknologjisë informatike, duke thënë se në këtë mënyrë mund të rritet siguria kibernetike.

Ai shtoi se pandemia Covid-19 nxori në pah se institucionet supreme të auditimit kanë shumë sfida, derisa shtoi se duhet përgatitur më mirë ndaj situatave urgjente.

Ndryshe, në kuadër të 20 vjetorit të themelimit të ZKA-së, nga ky institucion u zotuan se do të vazhdojnë të mbajnë standarde të larta, kjo ngase sipas tyre janë gardianë të llogaridhënies, transparencës dhe mbrojtës të fondeve publike./KP

Partia në pushtet ka vendosur të mos marrë pjesë në seancën e jashtëzakonshme të Kuvendit të Kosovës, e ftuar nga opozita, ku është paraparë të shqyrtohet propozim-rezoluta për mbështetjen urgjente financiare të Policisë së Kosovës. Kjo është bërë e ditur nga shefja e deputetëve të mazhorancës, Mimoza Kusari-Lila, në një konferencë për media, në kohën kur parashihej të fillonte seanca.

Kusari-Lila ka kritikuar partitë opozitare për mos votim të marrëveshjeve ndërkombëtare dhe sipas saj kërkesat e tyre kanë synim dëmtimin e interesit të shtetit.

“Arsyeja e ftesës për këtë konferencë është që para opinionit publik të shpalosim qëndrimin e Grupit Parlamentar të LVV-së për mospjesëmarrje në seancën e jashtëzakonshme të ftuar sot nga opozita e drejtuar në ftesën e sotme nga Grupi Parlamentar i PDK. Që nga java e kaluar Grupi Parlamentar i PDK-së ka tentuar që të ndryshojë rendin e ditës në seancë për të futur një pikë të cilën nuk e kanë pasur ende të dorëzuar me shkrim, që ka të bëjë me një rezolutë për kushtet dhe disa prej legjislacionit që ata konsiderojnë tash të nevojshëm për të kaluar për Policinë e Kosovës. Përderisa ky material tashmë është dorëzuar, ne e vlerësojmë se tendenca apo qëllimi i PDK-së dhe AAK-së që nuk votojnë asgjë në Kuvendin e Kosovës, nuk votojnë marrëveshje ndërkombëtare dhe ligje me rëndësi jetike për qytetarët, nuk ka të bëjë me gjendjen apo statusin e PK-së, por ka të bëjë vetëm me arsyetimin dhe argumentimin e tyre se kinse Qeveria nuk është e angazhuar sa duhet dhe synimi i tyre i vetëm është pushteti dhe jo interesi i shtetit. Ne sot po qëndrojmë në mbi 400 milionë euro marrëveshje ndërkombëtare të pa votuara, disa prej të cilave janë edhe për mbështetje të drejtpërdrejt të buxhetit të Kosovës, të cilët do të përfitonin të gjitha kategoritë shoqërore, përfshirë edhe Policinë e Kosovës. Përderisa ata refuzojnë të votojnë, kanë kërkesat të cilat synimin e vetëm e kanë dëmtimin e interesit të shtetit, vetëm për çmimin e tyre të ardhjes në pushtet”, ka thënë Kusari-Lila.

Ka dështuar mbledhja e Komisionit Parlamentar për Punë të Jashtme për shkak të mungesës së kuorumit.

Deputetët e partive opozitare kanë lëshuar sallën. Në këtë mbledhje ishte paraparë që zëvendëskryeministri i parë Besnik Bislimi të raportonte lidhur me dialogun Kosovë-Serbi i cili nuk është para aty.

E pranishme nga Lëvizja Vetëvendosje ishte vetëm kryetarja e këtij komisioni, Arbëreshë Kryeziu- Hyseni.