Category: Lajme

Zëvendësndihmës sekretarit amerikan, Gabriel Escobar ka theksuar rëndësinë e marrëveshjes së Ohrit dhe bëri thirrje për zbatimin e saj të shpejtë si nga Kosova ashtu edhe nga Serbia.

Stabiliteti në Ballkan dhe paqja më e gjerë rajonale ishin temat kryesore gjatë takimit të Odës Ekonomike Amerikane në Kosovë dhe Escobar.

Në njoftimin e OEAK-së thuhet se gjatë diskutimit në Departamentin e Shtetit të SHBA-së, zëvendësndihmës sekretari Escobar nënvizoi lidhjen e rrënjosur thellë ndërmjet Shteteve të Bashkuara dhe popullit të Kosovës.

“Ai më tej theksoi rëndësinë e marrëveshjes së Ohrit dhe bëri thirrje për zbatimin e saj të shpejtë si nga Kosova ashtu edhe nga Serbia”, citohet Escobar në komunikatë.

Delegacioni i Odës Amerikane, i udhëhequr nga drejtori ekzekutiv, Arian Zeka, foli për raste të mundësive të humbura të biznesit në Kosovë për shkak të tensioneve në rajon. Në përgjigje të kësaj, zëvendësndihmës sekretari Escobar theksoi se normalizimi i marrëdhënieve do të zhbllokonte rritjen signifikante ekonomike për Kosovën dhe rajonin më të gjerë.

Në komunikatë thuhet po ashtu se të dyja palët ranë dakord për rëndësinë e madhe të stabilitetit dhe paqes në Ballkan, si elemente themelore për prosperitet.

“Më tej, u diskutua për ndërlidhjen midis marrëdhënieve të normalizuara ndërmjet Kosovës dhe Serbisë dhe stabilitetit të përgjithshëm rajonal”, thuhet në njoftim.

Duke theksuar vizionin e përbashkët për të ardhmen, Escobar dhe përfaqësuesit e Odës Amerikane u pajtuan se rruga përpara për Kosovën dhe vendet e tjera të Ballkanit varet nga hyrja e tyre në Bashkimin Evropian. Po ashtu në njoftim thuhet se ata u pajtuan se një integrim i tillë do të sillte një epokë të mundësive të shtuara ekonomike, si dhe do të forconte harmoninë rajonale.

Në mungesë të kuorumit, ka dështuar të mbahet mbledhje e Komisionit për të Drejtat e Njeriut, në te cilën do të shqyrtohej peticioni i Sindikatës së Policisë se Kosovës.

Në këtë mbledhje munguan deputetë nga partia në pushtet. Ndërkaq, kryesuesja në këtë komision, Dude Balje bashkë me deputetet nga opozita vendosën që të mbajnë dëgjim publik, në këtë formë t’i dëgjojnë kërkesat e Sindikatës, porse jo në bazë të Rregullores së Kuvendit.

Të pranishme në mbledhje ishin, deputetja nga PDK-ja, Ariana Musliu-Shoshi, nga AAK, Albana Bytyqi, dhe deputetja nga LDK, Marigona Geci.

Kryetari i Sindikatës, Imer Zeqiri derisa ka ritheksuar kërkesat e PK-së, tha se sigurimi shëndetësor mbetet shumë i nevojshëm për PK. Ndërsa ka shtuar se nga implementimi i Ligjit për paga, policia ende nuk ka marrë shtesa të rrezikshmërisë.

Ndërsa, nënkryetari i sindikatës, Avni Hoti theksoi se policia është në gjendje të rëndë.

OKB-ja është informuar nga ushtria izraelite për një urdhër për evakuimin e rreth 1,1 milionë banorëve nga veriu i Gazës drejt jugut brenda 24 orëve, tha Stephane Dujarric, zëdhënës i sekretarit të përgjithshëm të organizatës duke kërkuar që ky urdhër të anulohet.

”Mbrëmë, zyrtarët e OKB-së në Gaza u informuan nga oficerët e tyre ndërlidhës ushtarakë izraelitë se e gjithë popullata në veri të Gazës duhej të zhvendosej drejt jug brenda 24 orëve. Një evakuim i këtyre përmasave është i pamundur pa shkaktuar pasoja shkatërruese humanitare”, tha ai.

OKB-ja ka nisur një apel urgjent për donacione me vlerë 294 milionë dollarë për të përmbushur nevojat urgjente të banorëve më të rrezikuar të Bregut Perëndimor dhe Rripit të Gazës, ku më shumë se 400 000 palestinezë janë larguar nga shtëpitë e tyre ditët e fundit dhe rreth 50 000 gra shtatzëna nuk kanë më akses në kujdes.

Sipas Zyrës së Kombeve të Bashkuara për Koordinimin e Çështjeve Humanitare (OCHA), më shumë se 423 000 persona janë detyruar të braktisin shtëpitë e tyre në Rripin e Gazës nën rrethimin dhe bombardimet e ushtrisë izraelite.

Sipas një deklarate nga zyra e Kombeve të Bashkuara, numri i personave të zhvendosur në këtë territor me popullsi të dendur prej 2,3 milionë banorësh u rrit nga 84 444 në 423 378.

Një video e së mërkurës e një prej sulmeve të Izraelit në Gaza duket se tregon përdorimin e fosforit të bardhë, një municioni të diskutueshëm që mund të shkaktojë dëm serioz nëse përdoret kundër civilëve, sipas ”Washington Post”.

Izraeli thotë se ka hedhur rreth 6 000 bomba, me peshë 4 000 tonë, në objektivat e Hamasit në Gaza në gjashtë ditë duke goditur më shumë se 3 600 objektiva. /ANSA/

Senatorja amerikane Jeanne Shaheen, tha se përgjegjësit për ngjarjen e 24 shtatorit duhet të japin llogari, duke u shprehur e shqetësuar për atë që ka ndodhur në veri të Kosovës, raporton Ekonomia Online.

Ajo pas takimit me presidenten Osmani pohoi se shpreson që Serbia do të bashkëpunojë në këtë drejtim. Sipas saj, për paqe afatgjate duhet që të gjendet një zgjidhje ndërmjet Kosovës e Serbisë.

“Kishim planifikuar një udhëtim në rajon. Deshëm të shfrytëzojmë mundësinë që pas ngjarjeve të 24 shtatorit të vijmë këtu dhe t’i shprehim shqetësimet tona. E dimë se është shumë shqetësuese kjo ngjarje për Kosovën. Mendojmë se është e rëndësishme që përgjegjësit për ngjarjet e 24 shtatorit të japin llogari, shpresoj që Serbia do të bashkëpunojë në këtë drejtim”.

“Kjo na tregon se për stabilitet dhe paqe afatgjate në Kosovë duhet vazhduar me mbështetjen e BE-së dhe ShBA-së në mënyrë që të gjendet një bashkëjetesë afatgjate paqësore me Serbinë”.

Një person është arrestuar dje në Pejë, pasi i njëjti dyshohet se ka kryer veprën dhunim seksual.

Policia nuk ka dhënë më shumë informata, por thekson se me vendim të prokurorit i dyshuari është dërguar në mbajtje.

Një person derisa kishte qenë në vendin e punës është rrezuar dhe si pasojë kishte pësuar lëndime të rënda trupore. Ai është dërguar në QKUK dhe nga mjeku është konstatuar vdekja e tij.

Ngjarja ka ndodhur dje në Prishtinë. Në vendin e ngjarjes përveç njësive relevante policore, kanë dalë inspektorët e punës dhe prokurori i shtetit, i cili e ka cilësuar rastin.

Me urdhër të prokurorit trupi i pajetë i viktimës është dërguar në IML për obduksion.