Category: Lajme

Albi Mall në bashkëpunim me Spitalin Amerikan në Kosovë dhe YessPharma me datat 27 dhe 28 tetor, nga ora 16:00 deri në orën 19:00, ju mundësojnë të bëni Echo të gjirit falas!

Tetori, në të gjithë botën është muaji i ndërgjegjësimit për zbulimin e hershëm të kancerit të gjirit. Muaji i ndërgjegjësimit për kancerin e gjirit është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit të gjirit, për zbulimin e hershëm të kancerit të gjirit te gratë dhe vajzat në të gjithë botën.

Edhe Albi Mall si pjesë e pandashme e shoqërisë, duke krijuar vend dhe hapësira pothuajse për çdo gjë, qoftë argëtim, festë apo edhe ndërgjegjësim si në këtë rast, ka marrë iniciativë që muajin tetor të mos e lë pa e shënuar duke dashur t’i dalë në ndihmë gruas, për të shpëtuar jetë.

Albi Mall në bashkëpunim me Spitalin Amerikan në Kosovë si dhe me YessPharma kanë marrë iniciativën që të krijojnë hapësira përbrenda qendrës duke mundësuar që falas të bëni Echo të gjirit.
Nga Dr. Arta Kamberi do të kryhen falas Echo të gjirit dhe gjithashtu mund të bëhen falas edhe matjet e glicemisë (sheqerit në gjak) dhe tensionit.

Vendi ku do të jenë të lokalizuar për t’i kryer këto shërbime falas do të jetë në katin -1,

(afër Hipermarketit) ndërsa ditët e ndara janë datat 27 dhe 28 tetor me orare si vijon:

16:00 – 19:00!

Për të shpëtuar jetë, për të mirën tuaj, gjatë këtyre datave, ne do të jemi në shërbim tuajin në orarin e lartëpërmendur, prandaj ejani dhe së bashku të bëhemi pjesë e ndërgjegjësimit për zbulimin e hershëm të kancerit të gjirit.

Në këtë kohë ku planeti ynë përballet me sfida mjedisore, shoqëritë tona përballen me pabarazi sociale dhe bizneset mbahen përgjegjëse për praktikat e tyre etike, sot shënuam një hap të rëndësishëm drejt ndërtimit të një të ardhmeje më të qëndrueshme. Ngjarja për parimet ESG-së e organizuar nga NLB Banka sot mblodhi biznese, ekspertë, liderë dhe individë të pasionuar që janë të përkushtuar për të nxitur ndryshime pozitive. ESG nuk është thjesht një akronim; ajo përfaqëson një qasje gjithëpërfshirëse ndaj praktikave të qëndrueshme dhe të përgjegjshme që prekin jo vetëm botën e biznesit, por të gjithë komunitetin tonë global.

Gjatë kësaj ngjarje, të pranishmit u njoftuan për së afërmi me Agjendën e Grupit NLB, Kornizën e Qëndrueshmërisë dhe rrugëtimin në integrimin e ESG-së. Për më tepër, ata u informuan për produktet dhe shërbimet e Bankës të krijuara për t’i ndihmuar bizneset drejt integrimit të objektivave të ESG-së, përfshirë edhe partneritetet me Bankën Evropiane për Rindërtim dhe Zhvillim dhe Fondin Kosovar për Garanci Kreditore. Ngjarja kulmoi me një panel diskutimi dinamik, i pasur me ekspertë të fushës, ku u diskutuan sfidat dhe mundësitë për biznese në integrimin e ESG-së.

Ndër të tjera, z. Gazmend Kadriu, Kryetar i Bordit Udhëheqës të Bankës tha: “Klientët tanë, Banka jonë dhe çdo palë e interesuar sot janë forcat lëvizëse që do të kthejnë parimet e ESG-së në realitet, jo vetëm për ne, por për botën. Së bashku, ne do të ndërtojmë një të ardhme të qëndrueshme dhe më të përgjegjshme.”

Qëllimi ynë është të eksplorojmë dhe promovojmë parimet dhe praktikat më të mira të ESG-së, si dhe të nxisim bashkëpunimin mes palëve të interesuara për të krijuar një botë më të qëndrueshme.

Më shumë informata rreth Qëndrueshmërisë: www.nlb-kos.com/qendrueshmeria

Janë bërë gati një javë që kur është ndaluar uji për pije dhe gatim nga liqeni i Badocit. Për këtë, kompania Rajonale e Ujësjellësit “Prishtina” njofton se edhe sot (e mërkurë) ka vendosur dy autobote me ujë të pijshëm te rruga”B” në Prishtinë.

“Furnizimi me ujë të pijshëm përmes autobotit te rruga “B” në Prishtinë, dy autobote”, thuhet në njoftim.

KRU “Prishtina”, ka vendosur autobot edhe në Qendrën e Paraburgimit në Hajvali, te shkolla” Ismail Qemajli” dhe në rrugën “Muharrem Fejza”.

Instituti Kombëtar i Shëndetësisë Publike të Kosovës (IKSHPK) u ka bërë thirrje të enjten e kaluar qytetarëve të cilët furnizohen nga Fabrika e ujit në liqenin e Badovcit që të mos përdoret uji për pije dhe përgatitje të ushqimit, pasi që analizat e mostrave të ujit në rezultatet laboratorike kanë treguar se ka vlera të rritura të manganit.

IKSHPK ka bërë të ditur se ka ngritur shkallën e gatishmërisë dhe kontrollit të cilësisë së ujit për pije në zonën e mbulueshmërisë dhe se mos përdorimi i ujit për pije dhe përgatitje të ushqimit do të vlejë deri në njoftimin e radhës.

Në Dhomat e Specializuara të Kosovës (DhSK) në Hagë ka përfunduar dëshminë e tij 3-ditore dëshmitari Mark Shala në çështjen gjyqësore ndaj Pjetër Shalës.

Gjatë kësaj seance pyetjet ndaj dëshmitarit i ka parashtruar trupi gjykues, mirëpo në pyetje janë ndërlidhur edhe avokati mbrojtës i Pjetër Shalës, avokati Mohamed Hedi Aouini dhe prokuroja e Zyrës së Prokurorit të Specializuar, Gaia Pergolo.

Pyetjen e fundit që parashtroi avokati Hedi Aouini kishte të bënte me uniformat të cilët janë përdorur gjatë luftës nga pjesëtarët e UÇK-së.

“Me sa dini ju, ju na thatë që uniformat ishin rastësore, varet se ku gjendeshin, masat, me sa dini ju a është bërë përpjekje nga ndonjë sektor që të përpiqeshin të dalloheshin nga sektori tjetër përmes uniformave?”, pyeti avokati Hedi Aouini.

Ndërsa, dëshmitari Shala tha se nuk ka pasur tentim që të bëhen dallime.

“Nuk ka pas tentim të bëhet dallimi, përveç stafit mjekësor që ata kur e kanë kryer punën mjekësore i kanë pas uniformat e tyre, mantelet e bardh sidomos kur e kanë kry punën në spitalet fusharë”, tha dëshmitari Shala.

Ndërsa prokurorja Pergolo e pyeti dëshmitarin se kur ka filluar operacioni “Shigjeta” nën komandën e Ruzhdi Seramatit a kishte pasur ndonjë drejtim apo pozicion të caktuar në fron.

“Drejtimi i tij është quajtur drejtimi numër 4 dhe ka qenë drejtimi Kukës-Goruzhub-Qafëmorinë”, u përgjigj dëshmitari Shala në pyetjen e prokurores Pergolo.

Ndryshe, kryetarja e trupit gjykues njoftoi se seanca e radhës në çështjen ndaj Pjetër Shalës pritet që të mbahet me 20 nëntor. /BetimipërDrejtësi

Gjykata Themelore në Gjakovë, ka shpallur aktgjykim lirues ndaj të pandehurve A.Ç., J.D., dhe G.H., të cilët sipas aktakuzës së Prokurorisë Themelore të Gjakovës, akuzoheshin për veprën penale “Keqpërdorimi i pozitës apo autoritetit zyrtar”, ndërsa i pandehuri B.F., i cili sipas aktakuzës akuzohet për veprën penale “Deklarimi i rremë nën betim”.

Sipas njoftimit, trupi gjykues së bashku me kryetarin e këtij trupi, Sulltan Dobraj, pas mbajtjes së shqyrtimit gjyqësor, dëgjimit të palëve, administrimit dhe analizimit të të gjitha provave, ka ardhur në përfundim se nuk është vërtetuar se të akuzuarit kanë kryer veprat penale si në aktakuzë.

“Të pandehurit A.Ç., J.D. dhe G.H., akuzoheshin se në konkursin e shpallur nga bordi i drejtorëve të K.R.M. “Çabrati”, për pranimin e kryeshefit ekzekutiv të kompanisë, kanë keqpërdorur detyrën e tyre zyrtare, në atë mënyrë që duke qenë në cilësinë e anëtarëve të komisionit rekrutues kanë shpërfillur udhëzimin administrativ (MASHT) nr. 126/2016, lidhur me parimet dhe procedurat e njohjes së diplomave, duke përzgjedhur kandidatin që nuk i plotëson kriteret sipas konkursit si dhe duke i cenuar të drejtat e punësimit të tjerëve në atë mënyrë që kandidatit B.F., në dokumentacionin e konkursit ka prezantuar diplomë të Universitetit “K.”, i lëshuar në Republikën e Shqipërisë, të pa nostrifikuar, si dhe nuk i plotëson kriteret e parapara që të ketë përvojën e punës në nivelin e lartë drejtues, me ç’rast iu kanë shkaktuar dëm kandidatëve të tjerë”, thuhet në komunikatë.

Ndërsa i pandehuri B.F., akuzohej se në cilësinë e kandidatit, me vetëdije paraqet deklarim të rremë në konkursin e shpallur nga bordi i drejtorëve të K.R.M. “Çabrati”, për pranim të kryeshefit Faqe 2 nga 2 ekzekutiv të kompanisë, paraqet një deklaratë nën betim në kundërshtim me Ligjin për Ndërmarrjet Publike, se kandidati duhet të ketë pesë (5) vjet përvojë – së paku në një nivel të lartë të menaxhmentit dhe një deklaratë nën betim, në të cilën deklaron se ai i përmbushë kushtet e kualifikimit. Për kundër faktit, i njëjti nuk i plotëson kriteret për përzgjedhje sipas konkursit për pranimin e kryeshefit ekzekutiv, në Kompaninë Rajonale të Mbeturinave “Çabrati” në Gjakovë.

Kundër këtij aktgjykimi, palët kanë të drejtë ankese në afat prej tridhjetë (30) ditëve nga dita e pranimit të aktgjykimit në formë të shkruar.

Kryetari i Grupit të Miqësisë Estoni-Kosovë, Parlamenti i Estonisë, Kristo Enn Vaga tha se shteti i tij po e përcjell me vëmendje situatën e sigurisë në Kosovës, raporton Ekonomia Online.

Ai u ka bërë thirrje të dy shteteve që të punojnë për de-eskalimin e situatës. Madje ka garantuar mbështetjen e shtetit të tij në çdo hap për Kosovë. Ai pohoi se do të punojë me vendet anëtare që të gjendet paqe në rajon.

“Sigurisht që ne diskutuam për situatën në Kosovë. Parlamenti i Estonisë me vëmendje e ka përcjell situatën. Kosova po punon, por edhe duhet që të punojë në de-eskalimin e situatës. I bëjmë thirrje Serbisë që të punojë në de-eskalimin e situatës që të gjendet një zgjidhje”.

“Ne po e montojmë situatë dhe do ta ndihmojë Kosovën në çdo hap, unë personalisht do të mundohem të flas me diplomatët dhe të gjithë që ata kanë ndikim që të ketë paqe”.

Fitore Pacolli, kryetare e Grupit të Miqësisë Kosovë-Estoni, në këtë takim është përmendur bashkëpunimi në fushën e dixhitalizimit dhe investimeve.

Deputetja Pacolli, tha se në këtë takim është diskutuar edhe në lidhje me sulmin e 24 shtatorit në veri të Kosovës, ku sipas saj, Kosova e ka mbështetjen e plotë të shtetit të Estonisë.

“Gjatë dy viteve të fundit ka pasur shkëmbime të shpeshta ndaj dy shteteve. Interesi mes dy shtete është shumë i madh që të vazhdojmë bashkëpunimin tutje dhe të bashkëpunojmë në fushat e digjitalizimit”.

“U përmend sulmi terrorist i cili u organizuar me 24 shtator, këtu e kemi mbështetjen e fortë të Estonisë sa i përket luftë tonë për demokraci dhe për paqen në rajon po ashtu sa i përket edhe të drejtësi së Kosovës për të marr pjesë në organizata ndërkombëtare si shtet më të drejta tw plota, për të mos u bllokuar nga Serbia. Gjithashtu dhe mbështetje e pa rezervë të Estonisë për anëtarësim në Këshillin e Evropës sidomos dhe në anëtarësim në BE”, tha ajo.

Gjatë ditës së djeshme në një aksident rrugor humbi jetën tragjikisht pjesëtari i KFOR-it italian, Claudio Caddedu.

Ministri i Mbrojtjes, Ejup Maqedonci, u ka shprehur ngushëllime familjes Caddedu, ministrit Crosetto dhe gjithë ushtarakëve të KFOR-it të cilët humbën pjesëtarin e tyre.

“Me dhimbje të madhe shprehi ngushëllimet e mija familjes Caddedu, ministrit Crosetto dhe gjithë ushtarakëve të KFOR-it të cilët humbën pjesëtarin e tyre”, ka shkruar Maqedonci në Facebook.