Një person është arrestuar në Fushë Kosovë, për keqpërdorim të detyrës zyrtare, njoftoi Policia e Kosovës.
Ai dyshohet se gjatë vitit 2022 ka keqpërdorur pozitën e tij dhe ka dëmtuar paranë publike.
Tutje, Policia njoftoi se me vendim të prokurorit i dyshuari është dërguar në mbajtje.
Komisioni Evropian (KE) i ka qortuar Kosovën dhe Serbinë për moszbatimin e marrëveshjeve të arritura në dialogun e ndërmjetësuar nga Bashkimi Evropian (BE) në raportet e tij të progresit për të dy vendet, të cilat pritet të publikohen të mërkurën.
Radio Evropa e Lirë e ka parë një draft të raportit 150-faqesh, në të cilin vlerësohet përmbushja apo jo e kritereve nga ana e Kosovës, si dhe e rekomandimeve që ka dhënë KE-ja në raportet e mëhershme.
Kosova ka bërë “përparime të kufizuara” në përmbushjen e standardeve të nevojshme për t’iu bashkuar BE-së. Ky është vlerësimi më i shpeshtë në Raportin të cilin KE-ja pritet ta miratojë nesër pas takimit të Kolegjit të Komisionarëve.
Por, në raportet e këtij viti, si në atë për Kosovën, ashtu edhe në atë për Serbinë, një vëmendje e shtuar i është kushtuar përmbushjes së detyrimeve që dalin nga dialogu i Brukselit dhe në këtë çështje të dyja vendet qortohen për moszbatim e tyre.
Normalizimi i marrëdhënieve mes Kosovës dhe Serbisë është vlerësuar me tekstin e njëjtë në të dyja raportet individuale të progresit, për secilin vend përkatës, pasi këto obligime janë pjesë e kritereve edhe për avancim në procesin e integrimeve evropiane.
Duke e rikujtuar arritjen e marrëveshjes në Bruksel në shkurt dhe aneksit për zbatimin e saj një muaj më vonë në Ohër, raporti shpreh keqardhje që palët nuk kanë filluar ende t’i kryejnë obligimet e tyre.
“Si Kosova, ashtu edhe Serbia, akoma nuk e kanë filluar zbatimin e obligimeve të tyre përkatëse, të cilat dalin nga Marrëveshja, të cilat janë të vlefshme dhe detyruese për palët dhe pjesë e rrugëtimit të tyre evropian. Palët duhet urgjentisht të nisin angazhimin më konstruktiv dhe të nisin implementimin pa vonesa të reja, apo parakushte“, thuhet në Raportin e Progresit.
Raporti nënvizon detyrimin e Kosovës për ta themeluar Asociacionin e komunave me shumicë serbe. Në këtë pikë, dokumenti thekson se drafti i parë i statutit të Asociacionit, i cili ishte paraqitur në takimin e nivelit të lartë të dialogut në muajin maj, e që praktikisht ishte draft i Serbisë “nuk ka qenë në përputhje me marrëveshjet relevante nga dialogu“.
Raporti tani kërkon që Asociacioni të themelohet në bazë të propozimit të fundit që palëve u është dhënë me 21 tetor.
“Nga Kosova pritet ta nisë procesin i cili çon deri te themelimi i Asociacionit të komunave me shumicë serbe bazuar në propozimin evropian, i cili u propozua para palëve me 21 tetor 2023 dhe nga Serbia kërkohet ta mbështesë këtë proces dhe paralelisht ta fillojë përmbushjen e obligimeve të veta kyçe nga Marrëveshja“, paralajmëron raporti, i cili bën thirrje që “formalitetet, përfshirë edhe ato që lidhen me miratimin, nuk duhet të jenë pengesa në rrugën e progresit në zbatimit”.
Raporti e quan tërheqjen e serbëve të Kosovës nga institucionet e Kosovës në nëntor të vitit 2022 dhe bojkotin e tyre të zgjedhjeve lokale të prillit të vitit 2023 si “shkelje të obligimeve të Serbisë nga dialogu dhe paraqet kthim të madh mbrapa të Serbisë në përmbushjen e obligimeve nga marrëveshja e parë për parimet për normalizimin e marrëdhënieve dhe shkelje direkte e marrëveshjes për drejtësinë të vitit 2015“.
Ai i bën thirrje Serbisë t’i nxitë serbët e Kosovës “që menjëherë të kthehen në institucione”, ndërsa i bën thirrje Kosovës ta bëjë të mundur një gjë të tillë.
“Që nga nëntori i vitit 2022 asnjëra palë nuk e ka bërë asnjë hap në këtë drejtim“, thuhet në raport.
Qeveria thotë se mbështet mbajtjen e zgjedhjeve në veri sipas udhëzimit administrativ
Lista Serbe thotë se është e gatshme të marrë pjesë në zgjedhjet e reja në veri
Raporti përmend edhe disa obligime të tjera nga dialogu të cilat nuk janë zbatuar, përfshirë edhe hapja e urës në Mitrovicë, marrëveshja për energjinë etj. Serbia përmendet si palë e cila nuk zbaton as marrëveshjen për kadastrat dhe diplomat universitare.
Nga Serbia kërkohet të bëjë më shumë edhe në rifillimin e takimeve të rregullta për zbatimin e marrëveshjes për menaxhimin e përbashkët të kufirit (IBM), për mbylljen e rrugëve ilegale për kalimin e vijës kufitare dhe ta zgjidhë çështjen e lëshimit të targave të veturave “pasi kjo çështje ka potencial të shkaktojë tensione në Kosovë”.
Kosovës dhe Serbisë i kërkohet të kenë “sjellje konstruktive” në nismat rajonale. Për më tepër, Serbisë i kërkohet t’i respektojë obligimet për pjesëmarrjen e Kosovës, ndërsa Kosovës të mos i mbajë të bllokuara proceset siç e bën, sipas këtij raporti, si në rastin e CEFTA-s.
Raporti i Progresit i këtij viti i përshkruan me kujdes tensioneve në veri të Kosovës, duke ardhur në përfundim se të dyja palët kanë ndikuar që të ketë kriza të tilla për shkak të veprimeve të tyre. Kosova, sipas raportit, ka ndikuar në rritjen e tensioneve me praninë e shtuar të njësive speciale të Policisë dhe me ligjin për shpronësim në veri, ndërsa Serbia me tërheqjen e serbëve nga institucionet dhe bojkotimin e zgjedhjeve lokale.
Në veçanti, raporti flet për ngjarjen më të rëndë që ka ndodhur në këtë periudhë; sulmin ndaj Policisë së Kosovës nga një grup i serbëve të armatosur në fshatin Banjskë të Zveçanit.
Megjithëse në deklaratat publike të përfaqësuesit të lartë të BE-së për politikë të jashtme dhe siguri, Josep Borrell, ky sulm është cilësuar si “terrorist“, në Raporti i Progresit i referohet atij vetëm si “sulm i dhunshëm“ ndaj Policisë së Kosovës, ndërsa brenda në raport si një “operacion i madh i kontrabandës së armëve“.
“Kriza më serioze gjatë periudhës që përfshinë raporti ndodhi më 24 shtatorë të vitit 2023, kur Policia e Kosovës u sulmua nga individë të armatosur rëndë, të cilët u zunë në befasi gjatë një operacioni të madh të trafikimit të armëve, duke lënë një polic të vrarë dhe tre të plagosur. Gjatë operacionit sulmuesit morën peng disa pelegrin duke u barrikaduar në manastirin ortodoks serb në Banjskë, të cilët i lanë pas kur u larguan“, thuhet në raport.
Raporti i bën thirrje Serbisë për bashkëpunim të plotë në hetime dhe t’i sjellë para drejtësisë përgjegjësit.
“Sulmi nuk duhet të shërbejë si një arsyetim për cilëndo palë për largimin e vëmendjes nga dialogu i lehtësuar nga BE-ja. Kosova dhe Serbia duhet të bëjnë përpjekjet domethënëse për shtensionimin, si dhe të sigurojnë mbajtjen e zgjedhjeve të reja në veri të Kosovës sa më shpejtë që të jetë e mundur, me pjesëmarrjen aktive të serbëve të Kosovës“, thuhet në raport.
Sa i përket përparimeve që arritur Kosova në fushat që i mbikëqyr Komisioni Evropian, “përparim i kufizuar“ është arritur në luftë kundër korrupsionit, funksionimit të gjyqësorit, në luftën kundër krimit të organizuar dhe në lirinë e shprehjes. Në të shumtën e rasteve, raporti thekson se nuk ka pasur sa duhet rezultate në zbatim, ndonëse është arritur përparim në miratimin e kornizës ligjore.
Raporti vlerësoi se Kosova ka dështuar ta reformojë aministratën publike duke nënvizuar se “nuk ka pasur përparim“ në këtë fushë.
Situata politike në Kosovë vlerësohet si qëndrueshme, ku raporti e përmend faktin se Lëvizja Vetëvendosje gëzon një shumicë të mjaftueshme në Kuvendin e Kosovës e cila ia ka “mundësuar ta çojë përpara një agjendë ambicioze të reformave evropiane”.
Kosova vlerësohet për reformën e ligjit zgjedhor. Tashmë, si problem kronik, përmendet pengimi i punës së Kuvendit të Kosovës si pasojë e mungesës së kuorumit, përkundër faktit se partia në pushtet ka shumicën e nevojshme në Kuvend. Problem i veçantë edhe në punën e Kuvendit, sipas raportit, është bojkoti i deputetëve serbë të cilët shkojnë vetëm sa për t’i ruajtur mandatet por vazhdojnë bojkotin.
Raporti ka dhënë disa vërejtje në fushën e lirisë së mediave. Ai përmend sulmet dhe kërcënimet ndaj gazetarëve, problemet me financim të mediave që i bën ato të ndjeshme ndaj ndikimeve të interesave politike apo financiare, jo transparenca e pronësisë së mediave. Si shqetësim i veçantë në raport përmendet gjendja e lirisë së mediave në veri të Kosovës.
Të mërkurën, në takimin e Kolegjit të 27 Komisionarëve, do të miratohet paketa e zgjerimit, së bashku me raportet individuale të progresit për të gjitha vendet e përfshira në procesin e zgjerimit.
Është hera e parë që raportet do të miratohen për 10 vende që janë në këtë proces. Janë gjashtë vende të rajonit të Ballkanit Perëndimor, Shqipëria, Bosnja e Hercegovina, Kosova, Mali i Zi, Maqedonia e Veriut dhe Serbia, pastaj Moldavia, Gjeorgjia dhe Ukraina, ndërsa raport i progresit i bëhet ende edhe Turqisë që vazhdon formalisht ta ketë statusin e vendit kandidat./REL/
Protesta e paralajmëruar për ditën e sotme nga punëtorët e KEK-ut është shtyrë.
Kështu ka bërë të ditur Sindikata e KEK-ut me anë të një njoftimi, në të cilin thuhet se morën zotim se kërkesat e tyre do të realizohen.
Sipas njoftimit, vendimi për shtyerjen e protestës është marrë kryesuesin e bordit drejtues dhe menaxhmentin e KEK-ut.
“Duke ju njoftuar për zhvillimet e fundit në lidhje me negociatat tona për ngritjen e pagave dhe pagesën e fundjavës për punëtorët me ndërrime, kemi disa lajme të rëndësishme për të ndarë me ju. Sot, pas një takimi të gjatë me kryesuesin e bordit drejtues dhe menaxhmentin e KEK-ut, kemi arritur në një marrëveshje që na jep shpresë dhe besim se kërkesat tona do të realizohen. Kryesuesi i bordit drejtues dhe menaxhmenti i KEK-ut është zotuar për të kryer kërkesat tona dhe ka premtuar se do të vazhdojë dialogun me sindikatat për të adresuar çështjet e punëtorëve në mënyrë të drejtë”, thuhet tutje.
Siç bën të ditur njoftimi, qëllimi i tyre është të hapet rrugë për dialog dhe zgjidhjen e kërkesave tona në një mënyrë të qetë dhe të drejtë
“Me këtë mendim dhe duke iu besuar zotimit të KEK-ut për të ndërmarrë veprime konkrete, kemi vendosur të shtyjmë protestën tonë të planifikuar për nesër më datën 7 nëntor 2023. Qëllimi ynë është të hapim rrugën për dialog dhe zgjidhjen e kërkesave tona në një mënyrë të qetë dhe të drejtë”.
Sindikata e KEK-ut ka paralajmëruar veprime sindikale nëse kërkesat e tyre nuk realizohen.
“Megjithatë, është e rëndësishme që të kemi parasysh se këto janë premtime, dhe ne do të jemi të përgatitur për veprime sindikale nëse kërkesat tona të drejta dhe ligjore nuk realizohen në mënyrë të plotë. Do të vazhdojmë të jemi aktiv dhe do të ndërmarrim hapa të duhur për të mbrojtur të drejtat tona”, njofton Sinidikata.
Protesta ishte paraparë të niste nga ora 11:00 para zyrave të KEK-ut në Prishtinë.
Sot në vendin tonë do të mbajë mot i vranët dhe me intervale të shkurta me diell.
Sipas Institutit Hidrometeorologjik të Kosovës, temperaturat minimale do të lëvizin ndërmjet 4-7 gradë Celsius, ndërsa maksimalet e ditës parashihen të lëvizin ndërmjet 15-18 gradë Celsius.
Do të fryjë erë kryesisht nga jugperëndimi dhe juglindja me shpejtësi 1-9m/s.
Sot do të protestojë edhe Sindikata e KEK-ut në lidhje me pagat.
Ata po kërkojnë rritje pagash dhe që t’u paguhet fundjava punëtorëve.
Protesta do të nisë në ora 11:00 para zyrave të KEK-ut në Prishtinë.
I dërguari i posaçëm i Bashkimit Evropian (BE) për dialog Mirosllav Lajçak, takon liderët e partive opozitare. Takimi është paraparë të mbahet nga ora 10:00 në ambientet e zyrës së BE-së në Prishtinë.
E pas Kosovës, i dërguari i posaçëm i BE-së do ta vizitojë edhe Beogradin, kështu të paktën thonë nga Bashkimi Evropian.
Zëdhënësi i Bashkimit Europian, Peter Stano ka komentuar vizitën e të dërguarit të Posaçëm të BE-së Miroslv Lajçak në Kosovë. Stano është shprehur se vizita e Lajçak në Prishtinë vjen të kuadër të përpjekjeve për fillimin e procesit të dialogut mes Kosovës dhe Serbisë.
Gjithashtu zëdhënësi i BE-së zbuluar se Lajçak ka në plan të vizitojë Serbinë së shpejti, për të disktuar për hapat e ardhshëm rreth dialogut.
Emisari i BE-së për dialogun Kosovë – Serbi, Miroslav Lajçak, ka thënë se me zëvendëskryeministrin e Kosovës, Besnik Bislimi, mbrëme ka biseduar për nevojën për zbatim të plotë të marrëveshjes së normalizimit pa vonesa e parakushte.
Ai ka thënë se me Bislimin është dakorduar për hapat e radhës. Ajo që shihet është se takimi nuk është mbajtur në Qeveri.
““Jam takuar me zëvendëskryeministrin e parë Besnik Bislimi për të vazhduar bisedimet për takimin e fundit me liderët evropianë në Bruksel dhe nevojën për zbatimin e plotë të Marrëveshjes për Rrugën e Normalizimit pa vonesa dhe parakushte. Po ashtu jemi pajtuar për hapat e radhës”, ka shkruar Lajçak në platformën “X”, pas takimit.
Edhe qeveria ka njoftuar për këtë takim.
Sipas tyre tema kryesore e diskutimit ishte Marrëveshja Bazike e Brukselit dhe Aneksit Implementues të Ohrit.
“Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, pati një darkë pune me Përfaqësuesin Special të BE-së për Dialogun Kosovë-Serbi, Miroslav Lajçak.
Në këtë takim u diskutua në lidhje me të gjitha aspektet e ndërlidhura me zbatimin e plotë të Marrëveshjes Bazike të Brukselit dhe Aneksit Implementues të Ohrit.
Republika e Kosovës është e përkushtuar për normalizim të plotë të marrëdhënieve me Serbinë dhe për njohje reciproke”, thuhet në njoftim e qeverisë.
Në Vizita dy ditore, e paparalajmëruar, e emisarit të BE’së për dialogun Kosovë-Serbi, Miroslav Lajçak, në Kosovë, në agjendë parasheh edhe një takim të tij të përbashkët me krerët e opozitës në Kosovë.
Emisari special evropian për dialogun Kosovë-Serbi Miroslav Lajçak ka takuar sonte zëvendëskryeministrin Besnik Bislimi, me të cilin ka biseduar mbi takimin e 26 tetorit, mes kryeministrit Albin Kurti me liderët e BE-së.
Lajçak ka shkruar rrjetin X se është e nevojshme zbatimi i plotë dhe pa parakushte i marrëveshjes për rrugën e normalizimit, të arritur në Ohër.
“Sapo u takova me zëvendëskryeministrin e parë Besnik Bislimi për të përcjellë takimin e fundit me liderët evropianë në Bruksel dhe nevojën për zbatimin e plotë të marrëveshjes për rrugën e normalizimit pa vonesa dhe parakushte. Ne ramë dakord edhe për hapat e ardhshëm”, ka shkruar ai.
Ndryshe, diplomati sllovak ndodhet për një vizitë të paparalajmëruar dyditore në Kosovë. Ai nesër do të ketë një takim me liderët e partive opozitare në Kosovë.
Vizita vjen në kohën kur në Kosovë po zhvillohet debat rreth draftit për themelimin e asociacionit, të cilin kah fundi i tetorit ua kanë paraqitur emisarët euro-amerikanë.
Kurti pati deklaruar se ai kishte ofruar që ky draft, sikurse dhe Marrëveshja bazë dhe Aneksi për implementim i Marrëveshjes së Ohrit, të nënshkruhen.
Ndërsa, shefi i diplomacisë evropiane Josep Borrell kishte thënë se “kushtëzimet e palëve, që ishin të papranueshme për palën tjetër, ishin pengesë për pajtim”.
Por në një deklaratë të përbashkët pas samitit të BE-së, liderët e tri shteteve më të mëdha bën ftesë që Kosova të nisë themelimin e asociacionit, ndërsa Serbia të njohë de facto Kosovën.
Përgatiti: Sara Shehu
Punimet me intensitet të lartë i nisën 2 javë më parë.
Por pavarësisht kësaj, rrugë e re, e cila do të bëjë lidhjen me Fushë-Kosovën, nëpërmjet nënkalimit në rreth-rrotullimin e Lakërishtës, nuk do të jetë gati deri vitin e ardhshëm.
“Aty janë duke vazhduar punimet me intensitet të lartë, por nuk mund të kaloj pa e ritheksuar faktin se këto punime kanë filluar për disa pengesa në projekt. Ndërkohë, punimet do të vazhdojë në nëntor dhe dhjetor, përurimi dhe fillimi i përdorimit të kësaj rruge do të bëhet nga muaji maj, apo qershor”, tha nënkryetari i Komunës së Prishtinës, Alban Zogaj.
Sipas ekspertit të komunikacionit, Bekim Ahmeti, punimet për këtë rrugë kanë nisur në një kohë të papërshtatshme. Sipas tij, kushtet atmosferike do të ndikojnë në përfundim të projektit.
Ndërsa, qytetarët teksa e mirëpresin këtë projekt, kritikojnë komunën që punimet nuk i ka nisur më herët.
“Këto investime janë që bash i nevojiten qytetarëve. Për shembull ky investim ka me lehtësu komunikacionin, duke marrë parasysh se sa i dendur është trafiku, sidomos tek Bill Kllinton. Çdo projekt që ish bo sa më herët ish kanë për të mirën e qytetarëve e sa më vonë është më keq”, tha Idriz Servadiku, qytetar.
“Epo komuna ka arsye që ka pas demek projekte ma të mëdha, e ky oshtë një segment ma i vogël, ka pas pengesa po masi osht tu punu, mirë oshtë”, tha Ilazi Ismaili, qytetar.
Shtimi i një rruge anësore, vlerësohet se do të jetë zgjidhje për ngarkesën e trafikut në segmentin rrugor më të ngarkuar, atë “Tirana” dhe “Bill Clinton”.
Vlera e këtij projekti është rreth 80 mijë euro.
Përgatiti: Donisa Fazliu
Blerton Pajaziti nga Fshati Shalë e Lipjanit, që nga nesër fëmijën e tij do ta dërgojë në çerdhe.
Madje, për të për gjashtë muaj nuk do të paguajë.
Kjo është bërë e ditur nga kryetari i Lipjanit, Imri Ahmeti, me rastin e përurimit të çerdhes.
“Çerdhja është një lehtësim shumë i madh e sidomos për neve prindërit që jemi të punësuar, do të jetë në përkujdesje të këtij institucioni parashkollor. Është një lehtësim shumë i madh, por edhe pagesa prej 30 eurove është shumë simbolike”, tha Blerton Pajaziti, prind.
“Është çerdhja e parë që po e bëjmë dhe së shpejti edhe një në fshatin Rufc ku në total do të jenë katër çerdhe brenda dy viteve dhe natyrisht ndihem jashtëzakonisht mirë, sepse në këtë pjesë të largët nga qyteti, ka qenë jashtëzakonisht e nevojshme ku përveç Shalës e Krojmirit e fshatrat përreth mund t’i sjellin fëmijët e tyre në këtë çerdhe”, tha kryetari i Komunës së Lipjanit, Imri Ahmeti.
Në këtë çerdhe familjarët do të paguajnë vetëm 30 euro për fëmijë.
“Vështirësi të jashtëzakonshme kemi pasur për të futur stafin në listën e pagave sepse numrat janë të kufizuar dhe ne kemi arritë me hap duke punësuar në kuadër të departamentit të Arsimit. Çerdhja në gjashtë muajt e parë për të gjithë fëmijët do të jetë gratis, sepse duam ta shohim se sa do të jetë pjesëmarrja e fëmijëve në këtë regjion, ndërkaq pas gjashtë muajve pagesa simbolike do të jetë 30 euro, sepse dëshirojmë që të participojmë prindërit”, tha Ahmeti.
Çerdhja ka kapacitet për 70 fëmijë dhe për ndërtimin e saj janë shpenzuar rreth 200 mijë euro.
Përgatiti: Driton Sadiku
Njësia speciale intervenuese e Policisë nuk do të zmbrapset nga kërkesat e saj.
Kjo njësi elitare të martën do të protestojë përsëri para qeverisë me kërkesa të njëjta.
Veçse kësaj here, ajo ka thirrur edhe njësitet e tjera për t’iu bashkuar, ndonëse nuk dihet nëse thirrjes së saj do t’i përgjigjen edhe të tjerët.
Sidoqoftë, që kërkesat e saj të plotësohen, do të duhet medoemos që të ndryshohet ligji për paga në sektorin publik me gjithë shtojcën përcjellëse.
“Është shtojca d.t.th., ku bëhet kategorizimi i pozitave te zyrtarët publikë, por edhe te të gjitha pozitat që marrin pagë nga buxheti i shtetit, është pjesë përbërëse e vetë ligjit për pagat, kështu që në mënyrë që kjo shtojcë të plotësohet apo të ndryshohet, atëherë do të nënkuptonte që duhet të plotësohet dhe ndryshohet edhe vetë ligji”, tha Ehat Miftaraj nga Instituti i Kosovës për Drejtësi.
Kërkesa bazë e kësaj njësie është kategorizimi si njësi e veçantë dhe përfshirja në listën e ekspertëve, që rrjedhimisht do ta kishte koeficientin e pagës më të lartë.
“Janë një kategori e pozitave ekspertë nëpër institucione të ndryshme si në OSHP, prokurori speciale e pozita të tjera, të cilat kanë trajtim më të mirë dhe koeficienti i të cilëve kalon prej 9”, tha Miftaraj.
Me një koeficient të tillë prej 9.4, i bie që një zyrtar policor i kësaj njësie të merrte 987 euro pagë bazë. E nëse do t’i paguhej edhe rrezikshmëria siç po kërkon njësia, prej 50 për qind e pagës bazë, i bie që një zyrtar policor i njësisë speciale të merrte pagë 1480 euro.
Mirëpo, me ligjin e ri shtesa për kushte specifike ku hyn edhe rrezikshmëria, nuk mund të jetë më e lartë se 1% e fondeve totale të përdorura nga organizata buxhetore, për pagën bazë të zyrtarëve publikë të organizatës buxhetore në të njëjtin vit financiar. Kësisoj i bie që nga buxheti prej rreth 84 milionë eurosh për policinë e Kosovës, vetëm 840 mijë euro të jenë për shtesa për kushte specifike të punës.
Megjithatë, Qeveria, të paktën në një javë nga protesta e parë, nuk i mori parasysh kërkesat e kësaj njësie policore.