Instituti për Hulumtimin e krimeve të kryera gjatë luftës, do të organizojë sot tryezë diskutimi me përfaqësuesit e institucioneve e organizatave, lidhur me hulumtimin e dokumentimin e krimeve të kryera gjatë luftës në Kosovë.
Në këtë tryezë do të marrë pjesë edhe kryeministri i Republikës së Kosovës, Albin Kurti.
Aleanca për Ardhmërinë e Kosovës, gjatë ditës së sotme do të mbajë mbledhjen e Kryesisë për të diskutuar për versionin zyrtar të draft-statutit të Asociacionit të Komunave me Shumicë Serbe, pranuar nga Bashkimi Evropian.
Kryetari i AAK-së, Ramush Haradinaj, ka qenë i pari që publikisht ka thënë se e ka parë draft-statutin për Asociacionin, ndonëse dy partitë tjera opozitare e patën mohuar që e kanë parë atë.
“Patëm mundësinë që të njoftohemi me dokumentin e draft-statutit, pra që ta lexojmë në tërësi”. Kjo ishte deklarata e kryetarit të subjektit opozitar, Aleanca për Ardhmërinë e Kosovës, Ramush Haradinaj, pas takimit me emisarin evropian për dialogun Kosovë-Serbi, Mirosllav Lajçak.
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.
Draft-statuti i Asociacionit i është prezantuar fillimisht kryeministrit Albin Kurti gjatë vizitës së pesëshes evropiane në Prishtinë gjatë muajit tetor, e ku ishte i pranishëm edhe i dërguari i BE-së për dialogun Kosovë-Serbi, Miroslav Lajçak.
Në Dhomat e Specializuara të Kosovës (DHSK) në Hagë, sot vazhdon gjykimi i Thaçit dhe të tjerëve.
Dëshmitarja Sandra Mitchell do të vazhdojë edhe sot.
Gjatë dëshmisë së saj në Hagë, ish-zyrtarja e OSBE-së, Sandra Mitchell pretendoi se kishte informacione se policia serbe i detyronte njerëzit apo individë të caktuar që të vishnin uniformat e Ushtrisë Çlirimtare të Kosovës.
Sandra Mitchell, ish-zyrtare e OSBE-së në Kosovë.
Më 5 nëntor, janë bërë 3 vjet nga arrestimi i ish-udhëheqësve të UÇK-së nga Dhomat e Specializuara të Kosovës, me seli në Hagë.
Hashim Thaçi, Kadri Veseli, Rexhep Selimi dhe Jakup Krasniqi po akuzohen për krime lufte dhe krime kundër njerëzimit.
Aktakuza fillestare kundër katër të akuzuarve u konfirmua më 26 tetor 2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27 shkurt 2023.
Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.
Policia në ShBA thotë se tre persona janë vrarë në të shtëna në kampusin e Las Vegasit të Universitetit të Nevadës të mërkurën në mëngjes.
Në një shkëmbim zjarri, policët gjuajtën dhe vranë të dyshuarin, i cili mbetet i paidentifikuar.
Një viktimë tjetër mbetet në gjendje kritike në një spital lokal, tha policia në një deklaratë.
Burimet e zbatimit të ligjit duke folur për transmetuesin amerikan CBS e përshkruan të armatosurin si një ish-profesor të bardhë kolegji në të gjashtëdhjetat e tij.
Kushtrim Hodaj, kryeshef i Inspektoriatit Policor, ka folur për aktivitetin e këtij institucioni në parandalimin dhe luftimin e krimit dhe keq-menaxhimit policor, si dhe për temat tjera.
Hodaj së pari foli për ngjarjen ditëve të fundit, ku gazetarët u përballën me ‘sprej’ dhe gaz lotsjellës gjatë protestës së organizuar nga PSD, kundër kryetares së Gjykatës Speciale Trendafilova, ku për këtë kishte reagim edhe nga AGK, e cila shprehu shqetësimin për sjelljet e zyrtarëve policorë.
Ai tha se lidhur me këtë ngjarje IPK-ja ka dalë me një komunikatë, ku njoftohet se është nisur një hetim preliminar, duke u bazuar në publikimet në medie, për hetimin e mënyrës së sjelljes apo të menaxhimit të protestës nga ana e zyrtarëve policorë.
“Jemi akoma në proces, ende nuk kemi një verdikt final, sigurisht që nëse vlerësohet se ka elemente të veprës penale ne do të vendosim bashkë me prokurorin e shtetit për të proceduar më tutje”, deklaroi Hodaj.
Lidhur me raportin vjetor të Inspektoratit Policor në parandalimin dhe luftimin e krimit dhe keq-menaxhimit policor, Hodaj tha se zakonisht këtë e bëjnë pas përfundimit të vitit.
“Aktualisht kemi rreth 1560 ankesa të qytetarëve që kemi pranuar në forma të ndryshme, të cilat i kemi trajtuar si Inspektoriat, derisa një numër i veprave penale janë hetuar penalisht, prej nga disa zyrtarë policorë janë hetuar penalisht, numri i të cilëve arrin në 166 zyrtarë policorë, ndërkohë që janë proceduar në Prokurori mbi 160 raste penale; rreth 35 të arrestuar, prej tyre 21 zyrtarë policorë dhe 14 qytetarë, të cilët kanë qenë të përfshirë në veprat penale”, deklaroi Hodaj.
Ai shtoi se numri i ankesave është me një rritje të lehtë për këtë vit, diku rreth 0.4-0.5 për qind, në krahasim me vitin e kaluar. Ndërkaq numri i zyrtarëve të hetuar apo të suspenduar a të arrestuar në vitin e kaluar ka qenë më i madh, për shkak të luftimit të korrupsionit
“Megjithatë, Policia e Kosovës performon më mirë se policitë e rajonit”, deklaroi Hodaj.
Ai lidhur me korrupsionin në radhët e policisë vlerësoi se paga nuk është faktori kryesor që një polic të korruptohet.
Ndërkaq lidhur me rastin e vrasjes së Liridonë Ademajt, dhe të grabitjes së një argjentarie në Suharekë, Hodaj tha se në të dyja këto raste Policia e Kosovës ka vepruar në mënyrë tejet profesionale.
Kryeministri Edi Rama ka komentuar zhvillimet në veri të Kosovës, ku tha se Shqipëria ka mbajtur qëndrimin e duhur.
I ftuar në A2 CNN, Rama tha se Kosova do duhet t’ia imponojnë Serbisë njohjen e Kosovës, vetëm duke u ulur në tryezë.
“Nuk kam pasur iluzione për asnjë, nga këto aktorët publik që i njoh, nuk kam qëndrime për të modifikuar, të kthehesha pas ,do i bëja sërish, nuk jam i kushtëzuar në qëndrimet e mia, kur ndodh diçka si në Banjskë mbajta qëndrimin e duhur, nuk duhet të jemi linear, por fleksibël në përpjekje për ta çuar kauzën aty ku duhet, dhe kjo arrihet vetëm të mundin Serbinë në tryezë, ta imponojmë në tryezë njohjen e Kosovës.
Ai tha se nëse Kosova do të pranonte propozimin e tij për Asociacionit, do kishte rezultate më të mira.
“Tani që është bërë fakt publik propozimi që kam bërë unë për Asociacionit, e kanë parë që do ishte më e udhës të mos ta kishin përjashtuar, por ta kishin lexuar, se do kishin dalë në një rezultat edhe më të mirë”, u shpreh kreu i qeverisë.
Dy persona janë identifikuar dhe arrestuar në Podujevë për ngacmim seksual.
Sipas Policisë, rasti kishte ndodhur gjatë muajve korrik dhe gusht. Të arrestuarit pas intervistimit me vendim të prokurorit janë dërguar në mbajtje.
Pas ditës së djeshme ku u zhvilluan dhjetë ndeshje, faza 1/16 e Kupës së Kosovës vazhdon sot edhe me tri ballafaqime të tjera.
Ulpiana përballet me Vjosën, Prishtina e Re e pret Beharin, kurse klubi i themeluar këtë vit, Suhareka do të ketë punë me Trepçën e Mitrovicës, raporton KosovaPress.
Të gjitha këto ndeshje nisin nga ora 12:00.
Deri më tani, skuadrat e kualifikuar në fazën tjetër janë këto: Drita, Ballkani, Feronikeli, Dukagjini, 2 Korriku, Prishtina, Gjilani, Rilindja, Vëllaznimi, Trepça ’89, Llapi dhe Malisheva.
Më 7 dhjetor 1941, ndodh një sulm i papritur ushtarak ajror nga marina perandorake japoneze marinës kundër bazës detare të Shteteve të Bashkuara në Pearl Harbor, Havai.
Sulmi çoi në hyrjen e Shteteve të Bashkuara në Luftën e Dytë Botërore që kishte filluar më 1939.
Gjatë dy vjetëve të para të konfliktit global, Shtetet e Bashkuara kishin mbajtur neutralitetin formal, ndërsa furnizonin Britaninë, Bashkimin Sovjetik dhe Kinën me materiale të luftës përmes ligjit të hua-qirasë nënshkruar më 11 mars 1941.
Gjatë luftës mbi 16 milionë amerikanë shërbyen në ushtri, 290 mijë u vranë në veprim, 670 mijë u plagosën, 130.201 u zunë robër, prej të cilëve 116.129 u kthyen në shtëpi pas luftës.
Shënimi i Ditës Ndërkombëtare të Aviacionit Civil ndihmon në gjenerimin dhe përforcimin e ndërgjegjësimit botëror për rëndësinë e aviacionit civil për zhvillimin shoqëror dhe ekonomik të shteteve, si dhe rolin unik të Organizatës Ndërkombëtare të Aviacionit Civil (ICAO) për të ndihAmuar shtetet që të bashkëpunojnë dhe realizojnë një transit të shpejtë global në shërbim të njerëzimit.
Ndërsa OKB ka miratuar Agjendën 2030 dhe ka filluar një epokë të re në zhvillimin e qëndrueshëm global, rëndësia e aviacionit si një motor i lidhjes globale nuk ka qenë kurrë më e rëndësishme për objektivat e Konventës së Çikagos për të parë fluturimin ndërkombëtar si një mundësuesi themelor për paqe dhe prosperitet në botë.
Çdo pesë vjet, që përkon me përvjetorët e ICAO 2014/2019/2024/2029 /etj., Këshilli i ICAO krijon një temë të veçantë përvjetori për Ditën Ndërkombëtare të Aviacionit Civil. Midis këtyre viteve të përvjetorit, përfaqësuesit e Këshillit zgjedhin një temë të vetme për periudhën e plotë ndërhyrëse katërvjeçare.
Këshilli ka vendosur që nga tani deri në 2023, tema do të jetë: “Avancimi i Inovacionit për Zhvillimin Global të Aviacionit”.
Ndryshe, Dita Ndërkombëtare e Aviacionit Civil është themeluar në vitin 1994 si pjesë e aktiviteteve të 50-vjetorit të ICAO.
Asambleja e Përgjithshme e Kombeve të Bashkuara njohu zyrtarisht 7 dhjetorin si Ditën Ndërkombëtare të Aviacionit Civil në vitin 1996.