Category: Lajme

Shefi i Grupit Parlamentar të Aleancës për Ardhmërinë e Kosovës, Besnik Tahiri, po qëndron në Jordani.

Tahiri ka shpërndarë një video në llogarinë e tij në Facebook, nga Deti i Vdekur i Jordanisë, më saktësisht afër Izraelit dhe Palestinës.

Ai ka shtuar se lufta mes Izraelit dhe Hamasit po trazon rajonet por edhe botën.

“Banorët e kësaj toke të bekuar janë duke u ballafaquar më një konflikt dhe luftë të tmerrshme. Lutemi që kjo të përfundojë sa më shpejtë, për shkak se është duke e trazuar rajonin këtu, mirëpo edhe gjithë botën”, ka thënë Tahiri.

Kryeministri Albin Kurti, i pyetur në lidhje me deklaratën e emisarit Miroslav Lajçak, i cili ka thënë se çështja e Asociacionit është çështje e brendshme e Kosovës dhe se për këtë s’nevojitet nënshkrimi i Serbisë, ka thënë se në bazë të kësaj deklarate i bije që Kosova ka humbur kohë sa herë është ngritur Asociacioni në tryezën e dialogut në Bruksel, raporton Ekonomia Online.

Kurti ka thënë se kur çështja e Asociacionit ngritej si temë nga presidenti i Serbisë, Aleksandar Vuçiq, në Bruksel, ajo konsiderohej legjitime nga ndërmjetësuesit. Kurti ka theksuar se nuk ka thënë se do ta shkruaj Asociacionin.

“Në bisedimet e Brukselit vazhdimisht është thënë që për një draft-statut duhet të ketë marrëveshje Kosovë-Serbi dhe është sjellë në tryezën e dialogut. Më 2 maj kam dëgjuar me durim ish-deputeten e SNS-së, Daniela Vujeçiq, udhëheqëse e të ashtuquajturit Ekip Menaxhues, duke e laboruar gjysmë ore se si duhet të duket Republika Serbe në Kosovë. Ka pas shumë trysni mbi qeverinë që edhe ne të propozojmë një draft, ndërsa drafti i saj s’ishte zhvlerësuar nga ndërmjetësi”.

“Paraprakisht kur ngritej nga presidenti i Serbisë çështja e Asociacionit dhe një gjë e tillë, një ngritje e tillë e temës konsiderohej legjitime nga ndërmjetësit unë pata ofruar më 18 mars, që në tri parime, të paraqesin principet mbi të cilit unë nënshkruaj draftin. Patën thënë se është e papranueshme për Serbinë dhe rrjedhimisht çështja pat ngecur”.

“Dhe tash nëse draft-statuti i asociacionit prej ndërmjetësit thuhet se është një çështje e brendshme e Kosovës ky është regjistër tjetër i gjërave. Me fjalë tjera, ne paskemi humbur kohë sa herë është ngritur Asociacioni në tryezën e dialogut në Bruksel. Por, unë s’e kam ngritur asnjëherë, tjetërkush e ka bërë atë. Kjo i bie që koha në Bruksel për draftin për Asociacionin gjatë këtyre dy viteve paska qenë e panevojshme si temë, rrjedhimisht e humbur si kohë. Kjo është arsyeja pse thashë që nëse është një çështje ekskluzivisht e Kosovës, plotësisht dakord, atëherë Kosova për çështje të brendshme jo vetëm që ka Qeveri, por edhe ministra përkatës. Unë s’kam thënë se do ta shkruaj, por kam thënë se mund ta shkruaj draftin dhe kam treguar se cilët janë ministrat e mi se kush janë ata”, tha ai.

Presidenti i Bullgarisë, Rumen Radev, i cili po qëndron për një vizitë zyrtare në Kosovë, sot ka vizituar edhe zyrat e KFOR-it ku është pritur nga Komandanti i KFOR-it, Ozkan Ulutas në Film City në Prishtinë.

Komandanti i KFOR-it në takim ka shprehur vlerësimin e tij për mbështetjen dhe kontributin e Bullgarisë në misionin e KFOR-it

“Presidenti i Republikës së Bullgarisë,Rumen Georgiev Radev ka vizituar komandantin Özkan Ulutaş, në Camp Film City, në Prishtinë. Gjatë takimit, Komandanti i KFOR-it shprehu vlerësimin e tij për kontributin e patundur të Bullgarisë në misionin e KFOR-it”, thuhet në njoftimin e KFOR-it.

Lufta e Izraelit për të shkatërruar Hamasin – grupin palestinez të shpallur organizatë terroriste nga SHBA-ja dhe Britania – ka vrarë mbi 20.000 palestinezë, thanë zyrtarët shëndetësorë në Gazë, përderisa Izraeli ka zgjeruar ofensivën e tij dhe ka urdhëruar edhe dhjetëra mijëra persona të largohen nga shtëpitë e tyre.

Vdekjet në Gazë paraqesin pothuajse 1 për qind të popullsisë së territorit para se të niste lufta 11 javë më parë.

Fushata ajrore dhe tokësore e Izraelit ka qenë një prej fushatave ushtarake më shkatërruese në historinë moderne, duke zhvendosur pothuajse 85 për qind të popullsisë prej 2.3 milionë banorësh të Gazës dhe duke rrafshuar pjesë të mëdha të enklavës. Pothuajse gjysmë milion persona në Gazë – çereku i popullsisë – janë duke u përballur me uri, sipas të dhënave të prezantuara më herët gjatë javës nga Kombet e Bashkuara dhe agjenci të tjera.

Izraeli shpalli luftë ndaj grupit radikal të Hamasit, pasi luftëtarët e tij sulmuan Izraelin më 7 tetor, duke vrarë 1.200 persona dhe duke marrë peng 240 të tjerë. Izraeli është zotuar se do të vazhdojë luftën derisa Hamasi të shkatërrohet e të rrëzohet nga pushteti në Gazë si dhe të lirohen të gjitha pengjet.

Ministria e Shëndetësisë në Gazë tha se ka dokumentuar 20.057 vdekje në luftime dhe mbi 50.000 të plagosur. Kjo ministri nuk bën dallimin midis civilëve dhe luftëtarëve të vrarë. Paraprakisht, zyrtarët shëndetësorë kishin thënë se dy e treta e viktimave ishin gra dhe fëmijë.

Izraeli fajëson Hamasin për numrin e lartë të civilëve të vrarë, duke thënë se grupi operon në zonat e banuara.

Ushtria izraelite ka thënë se 139 ushtarë të saj janë vrarë gjatë ofensivës tokësore. Ajo ka thënë se ka vrarë mijëra luftëtarë të Hamasit, përfshirë edhe rreth 2.000 në tri javët e fundit, por nuk ka paraqitur asnjë dëshmi për këto pretendime./REL/

Tajvani ka raportuar për avionë luftarakë dhe luftanije të Kinës përreth ishullit të shtunën, përfshirë edhe avionë që kanë kaluar vijën e ndjeshme në Ngushticën e Tajvanit, përderisa Pekini po vazhdon aktivitetet ushtarake tri javë para se Tajvani të mbajë zgjedhje.

Ishulli vetëqeverisës i Tajvanit, që Kina thotë se është pjesë e territorit të saj, është ankuar për katër vjet se Kina kryen patrullime dhe stërvitje ushtarake afër ishullit.

Fushata është duke u zhvilluar për zgjedhjet presidenciale dhe parlamentare që do të mbahen në Tajvan më 13 janar. Raportet me Kinën janë në epiqendër të fushatës.

Ministria tajvaneze e Mbrojtjes tha se që nga ora 13:30, sipas kohës lokale, të së shtunës, kanë detektuar avionë të llojeve J-10, J-11 dhe J-16, në pjesën veriore dhe jugperëndimore të hapësirës ajrore të Tajvanit.

Dhjetë avionë kanë kaluar vijën e Ngushticës së Tajvanit, apo i janë afruar shumë, përderisa luftanijet kineze kanë kryer “patrullime për gatishmëri të luftimeve”, tha Ministria.

Vija në Ngushticën e Tajvanit është një kufi jozyrtar mes dy palëve, por avionët kinezë rregullisht e shkelin atë.

Ministria e Mbrojtjes tha se forcat e saj po monitorojnë situatën.

Kina nuk ka komentuar për aktivitetet e fundit ushtarake afër Tajvanit. Më herët, ajo i kishte thënë se aktivitetet ushtarake synonin të parandalonin “përplasjen” midis separatistëve të Tajvanit dhe Shteteve të Bashkuara dhe kishin për qëllim të mbronin integritetin territorial të Kinës.

Tajvani u nda nga Kina gjatë luftës civile më 1949, por Pekini vazhdon të pretendon se ishulli prej 23 milionë banorësh është territor kinez, duke mos përjashtuar as përdorimin e forcës që ta rimarrë atë./REL/

Ish-kryetari Odës Ekonomike të Kosovës (OEK), Safet Gërxhaliu, në një prononcim për Ekonomia Online, ka thënë se realiteti me të cilin janë duke u përballur qytetarët dhe ajo se çka është duke ndodhur në Kosovë është pasqyra më e mirë e që mund të tregoj rritjen ekonomike në vend.

Ai duke komentuar raportin e Fondi Monetar Ndërkombëtar, sipas të cilit thuhet se Kosova pritet që të ketë rritje ekonomike prej 3.8 përqind për vitin 2023, tha se sanksionet nga Bashkimi Evropian janë rezymeja më e mirë karakterizuese e aktualitet ekonomik në Kosovë.

Tutje Gërxhaliu ka përmendur disa çështje sipas së cilit mund të vendoset pastaj se sa vlen një renditje e tillë.

“Çka flitet e thuhet nëpër institucione të ndryshme është për t’u respektuar, mirëpo besoj realiteti më i mirë i rritjes ekonomike është ajo çka ndodh në Kosovë, atë që e shijojnë Kosovarët dhe atë që e ndjen qytetari i Kosovës”.

“Kisha pas dëshirë që të jetë e vërtetë ajo që qarkullon nëpër media, mirëpo në qoftë se kemi shkallën e inflacionit, në qoftë se kemi ngritjen e çmimeve çoftë të produkteve bazike, në qoftë se kemi rënie të investimeve të huaja direket, në çoftë se kemi tkurrje të projekteve kapitaleve, keq menaxhim të buxhetit vjetor, rënie të eksporteve dhe jemi shoqëri e varur nga importi, nëse kemi pakënaqësi sa i përket pagave në Kosovë çoftë në nivelin publik e atë privat, raportet nga ShBA-të, BE-ja e në veçanti këto rajonale aty ku hyn edhe Shqipëria, në çoftë se kemi këtë zbrazjen masive të Kosovës ,atëherë shtrohet pyetja se sa ka kuptim një term i tillë dhe se në çka është i bazuar”,- vazhdoi tutje ai.

Eksperti i çështjeve ekonomike tha se Kosova ka nevojë për rritje ekonomike, çoftë edhe për një përqind apo 1.5%.

“Duhet të ketë sa më shumë investime të huaja direket, rritje te eksporteve, dialog publik-privat, vende të reja të punës, edukime në funksion të zhvillimit ekonomik dhe atij masovik, perspektiva që të rinjtë të mbesin në Kosovë, pra në këto duhet të jemi të orientuar të arrihen”,- tha Gërxhaliu deri sa shtoi faktin se çfarë është blerë vitin e kaluar me 100 euro sot nuk mund të merret as me 150-të.

Në raportin e FMN-së për Kosovën, për dallim nga raporti i prillit ku parashikohej rritje ekonomike prej 3.5%, në raportin e tetorit, kreditori global e ka rritur projeksionin në 3.8% për vitin 2023.

Sipas raportit inflacioni pritet që të ngadalësohet për 4.7 përqind në 2023 nga 11.7 përqind nga viti paraprak, para se të bie në 3.1 përqind më 2024.

Një foshnjë ka vdekur dje në Suharekë, njoftoi Policia e Kosovës.

Sipas raportit 24 orësh, prindërit e kanë dërguar në emergjence foshnjën pasi që iu ishte përkeqësuar gjendja shëndetësore, por sipas mjekut kujdestar foshnja ishte dërguar pa shenja jete.

“Suharekë 21.12.2023 – 15:40. Raportohet se nga prindërit është dërguar në emergjence foshnja e porsalindur, pasi që iu ishte përkeqësuar gjendja shëndetësore. Sipas mjekut kujdestar, foshnja është sjell pa shenja jete. Në vendin e ngjarjes kanë dalë njësit përkatëse policore. Me vendim të prokurorit trupi i pa jetë i viktimës dërgohet në IML për obduksion”, thuhet në raport.