Category: Lajme

Ministri i Kulturës, Rinisë dhe Sportit, Hajrulla Çeku, në emisionin CONTEXT në ATV, paralajmëroi bizneset dhe kubet se nuk do të mund t’i gëzojnë të drejtat nga Ligji i Sponsorizimit, në qoftë se klubet apo Federatat nuk kanë qenë të licencuara.

“Rregulli dhe udhëzimi ka qenë shumë i qartë, për derisa nuk je i licencuar si klub, qoftë si Federatë, nuk mundesh të drejtat dhe benifitet që t’i jep Ligji në vendin tonë. Pra, as Ligji për Sponsorizime, sepse parakusht për me perfitu nga Ligji për Sponsorizime është që ti me zhvillu aktivitet legal sportiv, kjo i bjen me pasë licencë. Kur nuk ka licencë, nuk ka as sponsorizim. Dy komisionet tona, Komisioni për Sponsorizim dhe Komisioni për Licencim kanë komuniku njëra me tjetrën dhe këta të Licencimit iu kanë thënë këtyre të Sponsorizimit, këta që nuk kanë licencë, nuk mundeni me ua lëshu vërtetimin e Sponsorizimit. Marrëveshjen në të cilën kanë hyrë disa biznese me klube ose Federata pa qenë ato të licencuara, janë marrëveshje të paligjshme”, tha Çeku.

Ai tha se nuk do të ketë dënim ndaj klubeve apo bizneseve nëse kanë bërë marrëveshje të paligjshme, por ndaj atyre nuk do të aplikohet heqja e tatimit.

Çeku përmendi se janë duke u zhvilluar auditime nga ZKA-ja si dhe hetime nga Policia e Kosovës për listën e Sponsorizimeve sidomos të viteve të kaluara.

“Janë tri procese të rëndësishme që po zhvillohen aktualisht në raport me Sponsorizimet. I pari është një auditim i veçantë që po e realizon Zyra Kombëtare e Auditimit vetëm për Sponsorizimet. I dyti proces janë hetimet që po zhvillohen nga Policia e Kosovës. Të dyja këto i kemi inicu ne, me kërkesën tonë, kemi kërku një auditim të veçantë nga ZKA-ja dhe kemi kërkuar hetime nga Policia për listën e Sponsorizimeve sidomos të viteve të kaluara, aty ku kemi dyshu që mund të ketë keq përdorime. I treti proces që po zhvillohet aktualisht është i Komisionit Parlamentar për Arsim, Kulturë dhe Sport. Janë bërë pesë vite nga hyrja në fuqi e këtij Ligji dhe Komisioni po bënë një raport të vlerësimit, zbatimit të këtij Ligji. Të tria këto, besoj shumë do të na ndihmojnë që vitin e ardhshëm ta bëjmë plotësim ndryshimin e këtij Ligji”, tha Çeku. /atvlive.tv

Kryetari i Lidhjes Demokratike të Kosovës (LDK), Lumir Abdixhiku ka reaguar pas ankesave të qytetarëve për faturat e energjisë elektrike.

Abdixhiku ka thënë se tarifat e rrymës janë rritur tri herë për tre vjet.

Ai ka thënë se gjendja aktuale është rezultat i mosnjohjes së realitetit qytetar në vend.

“Tarifat e energjisë elektrike, herën e fundit, janë rritur nga prilli i këtij viti. Para kësaj, ishin rritur edhe dy herë të tjera. Pra gjithsejtë 3 herë për 3 vjet. Gjendja e tanishme është produkt i mosnjohjes së realitetit qytetar në vend. Siç dhe thoshin vet, ‘qytetarët po shpenzojnë shumë sepse rryma është e lirë’”, ka shkruar Abdixhiku në Facebook.

Ai e ka akuzuar Qeverinë për paaftësi.

“Do të gjejnë arsyetime; do të ju mbushin me ankesa, nga privatizimi e deri te luftërat nëpër botë, por e vërteta e vetme është si më poshtë. Paaftësia kushton! Shiheni vet”, ka shkruar Abdixhiku.

Faturat e energjisë për muajin dhjetor kanë nxitur reagime të shumta të qytetarëve, të cilët përmes rrjeteve sociale janë ankuar në drejtim të KESCO-s për dyfishim deri në trefishim të tyre.

Lideri i opozitës ruse është bërë i gjallë pas disa javësh heshtjeje. Alexei Navalny është rikthyer në rrjetet e tij sociale nga burgu i largët në Arktik ku e kanë transferuar.

“Mos u shqetësoni për mua, jam mirë”, shkroi kundërshtari i Vladimir Putinit në platformën “X” në një sërë postimesh me anë të të cilave përshkroi transferimin që zgjati 20 ditë dhe kushtet e paraburgimit.

“Tani jetoj mbi Rrethin Arktik. Në fshatin Kharp në Yamal. Qyteti më i afërt ka emrin e bukur Labytnangi”, shkruan Navalny teksa thotë me ironi se tashmë mund të cilësohet një Babagjysh në regjim special. Për t’i ngjarë Babagjyshit e ndihmon mjekra e rritur dhe rrobat e trasha të dimrit.

Siç tregon vetë, 20 ditët e udhëtimit kanë qenë mjaft rraskapitëse për të.

“Por unë jam ende në humor të mirë”, shton ai.

“Më sollën këtu të shtunën në mbrëmje. U transportova me aq masa paraprake dhe në një rrugë kaq të çuditshme (Vladimir – Moskë – Chelyabinsk – Yekaterinburg – Kirov – Vorkuta – Kharp) sa nuk prisja që të më gjenin para mesit të janarit. Për këtë arsye u habita shumë kur dje u hap dera e qelisë me fjalët: “Ja avokati është këtu për ju.”

Kushtet e burgimit

Në postimet e tij, 47-vjeçari përshkruan me detaje edhe kushtet e paraburgimit.

“Për fat të keq drerë nuk ka, por kemi qen të mëdhenj stani. Hedh sytë nga dritarja nga ku mund të shoh natën pastaj pasditen, pastaj natën sërish. Gardhi është shumë pranë. Bëra dhe një shëtitje në oborrin me borë.”

Kujtojmë se një ditë më parë, ekipi i liderit të opozitës ruse bëri të ditur se ishin vënë më në fund në kontakt me Navalny-n dhe se ai ndodhej në një burg të largët në veriperëndim të Siberisë./A2

Përgatiti: Pranvera Krasniqi

26 gra janë vrarë nga të afërm të tyre në Kosovë, në 15 vjetët e fundit, sipas organizatës joqeveritare Fourth Wave.

Në përkujtim të tyre, kjo organizatë mbajti të martën një aksion simbolik në sheshin “Skënderbeu” në Prishtinë me mbishkrime kundër femicidit.

“Duke e parë numrin e rasteve të dhunës, ne sot zaptuam hapësirën publike përmes kukullave, ato mishërojnë idenë se si shteti i sheh qytetarët e tij”, tha Anita Mjeku, organizatore e aktivitetit.

Nerimane Ferizi, aktiviste për të drejtat e grave, përmendi disa raste të vrasjes së grave, të cilat institucionet dështuan t’i parandalonin.

“Kemi rastin e gruas e cila para ca javëve u vra nga burri i saj dhe organet kompetente deri vonë nuk ishin askund…”, tha Ferizi.

Gjatë aksionit, pjesëmarrësit kërkuan më shumë angazhim nga institucionet.

“Çfarë po na brengos është heshtja institucionale, kinse femrat të vriten është normale, duhet angazhim nga ta në këtë çështje serioze”, tha Ferizi.

Aksioni simbolik që zgjati deri në orën 18:00 dhe ditët në vijim, pritet të mbahet edhe në qytetet e tjera të Kosovës.

Përgatiti: Arian Hajdaraj

Në këtë rrugë të fshatit Ozdrim, të hënën mbrëma zyrtarë policorë po kryenin kontrolle rutinore. Por, njëri prej ngasësve refuzoi t’i bindej urdhrit për ndalje, e madje edhe e goditi me veturë policin.

“Nuk u është ndaluar zyrtarëve policorë. E ka sulmuar me veturë, duke i shkaktuar lëndime. Prokurori e ka cilësuar vrasje në tentativë”, tha zëdhënësi i Prokurorisë së Pejës, Shkodran Nikçi.

Mbrëmë, pas kryerjes së veprës, ai arriti të largohej nga vendi i ngjarjes, por vetëm përkohësisht.

VOX: SHKODRAN NIKÇI, ZËDHËNËS I PROKURORISË SË PEJËS –
“Prokurori ka dhënë urdhër që të arrestohet. Në këto momente kur po flasim, është arrestu dhe është sekuestru vetura… është cilësu si vrasje e rëndë e mbetur në tentativë”, tha Nikçi.

Ky person, madje, ishte i njohur për policinë.

Pavarësisht lëndimeve të marra nga goditja, zyrtari policor është jashtë rrezikut për jetë.

I papolitizuar, por me politikë dhe strategji ekonomike, Instituti Hulumtues për Ekonomi dhe Financa do të jetë në shërbim të zhvillimit ekonomik të Kosovës.

Kështu u tha në një konferencë për media që ky institut e organizoi për fundvit.

Ish-drejtori i Bankës Qendrore, Fehmi Mehmeti, kërkoi që qeveria të shpallë një zonë ekonomike në nivel nacional, në mënyrë që investitorëve t’iu krijohen kushtet e favorshme.

“Ne nuk kemi palë që të merremi me të kaluarën, por qëllimi është që t’i identifikojmë problemet dhe t’iu japim zgjidhje atyre. Dy sfidat që i ka pasur Kosova janë papunësia dhe deficiti i lartë tregtar. Prioritetet që duhet t’i ketë Qeveria për zgjidhjen e problemeve dhe sfidave, janë që qeveria për të pasur zhvillim ekonomik dhe rritje ekonomike, nevojitet që qysh në fillim t’i formojë grupet punuese në nivel nacional të ekspertëve të ekonomisë, që të krijojnë strategjinë e zhvillimit ekonomik në nivel nacional”, tha drejtori ekzekutiv i IHEF-së, Fehmi Mehmeti.

Pa një strategji të tillë, sipas ekonomistit Medain Hashani, investimet e huaja do të mungojnë.

Ndërkaq, sfidat që e presin Qeverinë gjatë vitit 2024, vlerësohen të jenë të shumta.

Ndryshe, roli i Institutit Hulumtues për Ekonomi dhe Financa është kryesisht orientues dhe rekomandues, në kuadër të një zhvillimi të qëndrueshëm ekonomik të vendit. /atvlive.tv

Përgatiti: Benita Zeneli

Për 9 muaj të këtij viti, 5 komuna shpenzuan mbi 50% të buxhetit për investime kapitale. Ndërkohë, dy të tjera, Malisheva e Obiliqi prinin në këtë aspekt me mbi 90%.

Por, pas gati 3 muajsh deri në përfundim të vitit, sipas Asociacionit të Komunave, 14 komuna kanë arritur ta shpenzojnë buxhetin mbi 80%. Njëra prej tyre, është ajo e Lipjanit.

“Viti që po e lëmë pas, besoj është një ndër vitet më të suksesshëm e parashikuar me realizmin e buxhetit, edhe pse kemi akoma kohë ditë deri në fund të vitit. Investimet kapitale janë realizuar 80%”, tha kryetari i Lipjanit, Imri Ahmeti.

Por disa komuna qëndrojnë akoma më mirë, duke e përmbyllur vitin me shpenzim prej 100% të buxhetit.

“Apo janë afër 100%, janë Obiliqi, Malisheva, Parteshi, Deçani, Rahoveci, Ferizaj Skenderaj, mirëpo edhe shumica janë që i kanë shpenzuar mbi 80%”, tha : Sazan Ibrahimi nga AKK.

Sipas Ibrahimit, shumica e komunave të tjera kanë shpenzuar mbi 70% të buxhetit, derisa vetëm 4 komuna anëtare të asociacionit kanë shpenzuar më pak se 50%.

“Kanë pasur probleme sa i përket shpenzimeve, sepse kanë pranuar buxhetin me vonesë nga niveli qendror ka pasur probleme nga të hyrat vetanake dhe kanë arritur rezultat jashtëzakonisht të mirë në raport me nivelin qendror”, tha Ibrahimi.

Njëkohësisht, mesatarja e të gjitha komunave arrin në 67% të shfrytëzimit të buxhetit. Megjithatë, sipas institutit GAP, ka mbetur një numër i lartë i projekteve që nuk janë nisur gjatë këtij viti.

“I kontraktojnë punët në gjysmën e dytë të vitit, çka nënkupton që pagesat e atyre projekteve i bëjnë pas muajit shtator, që nuk reflektojnë në këto përqindje, pra përqindja gjithsesi rritet deri në fund të vitit. Instituti GAP ka gjetur se janë 1700 projekte kapitale që nuk kanë nisur në terren gjatë këtij viti e 1100 janë të komunave”, tha Bekim Salihu nga Instituti GAP.

Ndërkaq, 4 komunat veriore për shkak se nuk i raportojnë shpenzimet, figurojnë me 0% të shfrytëzimit të buxhetit për investime kapitale.