Policia ka arritur që ta parandaloj garat e shpejtësisë në autostradën “Ibrahim Rugova”.
Njësitet policore hasën dy automjete duke zhvilluar shpejtësi prej 225 kilometra në orë dhe 230 kilometra në orë, në zonën ku kufizimi i shpejtësisë ishte 100 kilometër në orë.
“Të njëjtit janë gjobitur me nga 300€ dhe 3 muaj iu është ndaluar drejtimi i mjetit me veprim motorik”, thuhet në njoftimin e policisë.
Pjesëtarët e Policisë së Kosovës kanë dhuruar gjak me moton “Dhuro gjak, shpëto jetë”, si dhuratë për Vitin e Ri.
Sipas komunikatës së Policisë së Kosovës, dhurimi vullnetar i gjakut u organizua në Kampin e Njësisë Speciale “Vrella”.
“Policia e Kosovës me të kuptuar mungesën e gjakut në Qendrën Kombëtare të Transfuzionit të Gjakut, është paraqitur vullnetarisht për dhurim të gjakut, e që pastaj në koordinim me Drejtorinë e Shërbimeve Shëndetësore është organizuar aksioni i dhurimit të gjakut nga pjesëtarët e Njësisë Speciale Operative! Në këtë aksion humanitar ka marrë pjesë dhe ka dhuruar gjak edhe drejtori i përgjithshëm i Policisë së Kosovës, kolonel Gazmend Hoxha bashkë me stafin ekzekutiv! Aksionit iu kanë përgjigjur më shumë se 100 pjesëtarë të Policisë në Kampin “Vrella” dhe në Qendrën e Njësive Speciale “Enver Zymeri” në Mitrovicë, si dhe zyrtarë të njësiteve të ndryshme të cilët kanë dhuruar gjak në QKTGJ”, thuhet në komunikatë.
Sipas njoftimit të Policisë, pjesëtarët e këtij institucioni edhe këtë herë kur Qendra Kombëtare e Transfuzionit të Gjakut ka nevojë shumë për gjak, u bë promotor në ofrimin e pjesës më të shtrenjtë nga trupi i tyre-gjakut, duke u bërë shembull për të tjerët! “DHURO GJAK, SHPETO JETË”- është dhurata më e mirë për ata që kanë nevojë.
Ish kryetari i Autoritetit Kosovar të Konkurrencës, Valon Prestreshi, në emisionin A LIVE në ATV, ka treguar se si duhet të kontrollohen njësorët digjital të energjisë elektrike se a po e bëjnë mirë llogaritjen e konsumit.
Ai tregon se tarifa e lirë e rrymës fillon në ora 22:00 dhe mbaron në ora 7:00.
Prestreshi thotë se ka dyshime që orët digjitale të energjisë elektrike mund të mos përputhen me kohën reale kur është duke u shpenzuar nga konsumatorët.
“Dua ta informoj opinionin publik sepse ne si shoqëri, si media, si njerëz të cilët ndikohen nga kjo me qenë se Qeveria s’po ndërmerr masa, dua ta njoftoj opinionin publik që ta shikojnë orën digjitale nëse është në përputhshmëri me kohën reale, sepse unë kam informata, më kanë dërguar qytetarët fotografi të orave të tyre me orën reale, ku ora digjitale është 4 orë përpara se koha reale. Për shembull, nëse koha reale është 18:00 dhe në orë digjitale është 22:00, në këtë rast, konsumimi me tarifën e lirë fillon në ora 18:00 dhe mbaron në 3:00 të mëngjesit, e jo në 7:00. Këtu qytetarët mashtrohen, nuk janë të informuar dhe si për të mirë, si për të keq, ata që e dinë përfitojnë, ata që nuk e dinë mashtrohen dhe faturohen dyfish”, tregoi Prestreshi. /atvlive.tv
Për më shumë detaje, shikoni videon më poshtë:
LEXO EDHE:
Kjo është metoda se si të llogaritni faturën e rrymës, përfundimi tregon a jeni “mashtruar”
Prokuroria Speciale njoftoi se ka ngritur aktakuzë në Gjykatën Themelore në Prishtinë – Departamentin Special, kundër një personi me inicialet M.M., për rastin e Oliver Ivanoviqit.
Sipas Prokurorisë, aktakuza kundër tij është ngritur për shkak se i njëjti ka kryer veprat penale “Pjesëmarrje ose organizimi i grupit kriminal të organizuar”, “Pengimi i të provuarit apo procedurës zyrtare”, ‘’Kanosja” dhe ‘’Falsifikimi i dokumenteve”.
Rasti ka të bëjë me vrasjen e tani të ndjerit Oliver Ivanoviq, ku i pandehuri si pjesë e grupit veprimet i ka ndërmarrë pas ndodhjes së vrasjes duke penguar procedurën penale dhe pas hetimit i njëjti ka përdorë dokumente të falsifikuara si dhe ka kanosur personat zyrtar të cilët kanë zhvilluar procedurë penale ndaj tij.
Oliver Ivanoviq u vra më 16 janar të vitit 2018, me gjashtë të shtëna në shpinë, para objekteve të partisë së tij në Mitrovicën e Veriut.
Me rastin e festave të fundvitit, presidentja e Kosovës Vjosa Osmani, i ka vizituar të vegjlit në Klinikën e Onkologjisë dhe Kirurgjinë e Fëmijëve.
Osmani tha se puna që stafi bën në këto dy klinika është e jashtëzakonshme.
“Jep shpresë e forcë për këta fëmijë dhe për prindërit e tyre që ndiejnë dhimbjen më të madhe të jetës së tyre”, tha Osmani.
Ajo shprehu mirënjohje për punën e gjithsecilit.
“Duke ofruar jo vetëm shërbime mjekësore, por edhe dashuri e përkrahje të pafund!”, theksoi ajo.
E para e shtetit aty bëri edhe shpërndarjen e dhuratave.
Ministri i ekonomisë, Hekuran Murati ka deklaruar se është miratuar vendimi që buxheti prej afro 12 milionë eurosh nga katër komunat e Veriut do ti transferohet KOSTT-it për shlyerje të borxhit.
Sipas tij borxhi duhet paguar.
Postimi i plotë:
Energjia elektrike e shpenzuar është borxh, dhe borxhi duhet paguar.
Andaj me vendimin që morëm sot në mbledhje të Qeverisë, do të merret buxheti i katër komunave në veri të vendit, dhe do të shfrytëzohet për të paguar një pjesë të borxhit ndaj KOSTT-it që është akumuluar nga devijimet deri më tani.
Shuma totale prej 11,880,246.33 euro, përfshirë edhe mjetet e alokuara të Fondit Zhvillimor në Mirëbesim, merret nga katër komunat Leposaviq, Zubin Potok, Zveçan, Mitrovicë e Veriut dhe i transferohet KOSTT-it për të paguar një pjesë të borxhit për energjinë e shpenzuar.
Ish kryetari i Autoritetit Kosovar të Konkurrencës, Valon Prestreshi, në emisionin A LIVE në ATV, ka shpjeguar se si bëhet llogaritja e kilovatëve të shpenzuar të energjisë elektrike.
Ai shpjegon se fatura e energjisë elektrike përmbanë katër seksione.
Seksioni A1/B1 tregon kilovatët e shpenzuar gjatë ditës që është prej orës 7:00 mëngjes deri në ora 22:00 mbrëmje, vlera e të cilit është 0.0779 euro për një kilovat.
Seksioni A2 /B1 tregon kilovatët e shpenzuar gjatë mbrëmjes që është prej orës 22:00 deri në ora 07:00 në mëngjes, vlera e të cilit është 0.0334 euro për një kilovat.
Seksioni A1/B2 që është llogaritja e shpenzimit gjatë ditës, fillon të llogaritet kur tejkalohet vlera e 800 kilovatëve dhe faturohet më çmimin dyfish, pra nga 0.0779 në 0.1445 për një kilovat.
Seksioni A2/B2 që është llogaritja e shpenzimit gjatë natës, fillon të llogaritet kur tejkalohet vlera e 800 kilovatëve dhe faturohet më çmimin dyfish, pra nga 0.0334 në 0.0681 për një kilovat.
Për më shumë detaje se si bëhet llogaritja e kilovatëve të shpenzuar, shikoni videon më poshtë:
Kryetari i Drenasit, Ramiz Lladrovci, ka njoftuar se janë shpallur “Qytetarë Nderi” Hashim Thaçi, Kadri Veseli, Jakup Krasniqi dhe Rexhep Selimi, të cilët po mbahen në paraburgim në Hagë.
“Sot, me propozimin tim, Kuvendi i Drenasit ua dha një mirënjohje simbolike, bijve të denjë të kombit, ish presidentit Hashim Thaçit, ish kryeparlamentarit Kadri Veselit, ish kryeparlamentarit dhe deputetit Jakup Krasniqit dhe ish deputetit Rexhep Selimi, titullin “Qytetar Nderi”. Mirënjohja nuk ka të bëj me politikën, por, ne këtu, në Kuvendin e komunës së Drenasit, dëshmojmë se ata janë heronj të luftës dhe paqes, për kontributin e tyre jetësor, ata janë edhe “Qytetarë Nderi”, të komunës së Drenasit, për aq sa do të ekzistojmë si komunë.”
Lladrovci ka thënë se historia lindi në Drenicë.
“Historia lindi këtu, në Drenicë, dhe ne me një simbolikë të thjeshtë, duam ta japim lajmin se ata edhe si qytetarë nderi, janë krenari e komunës tonë dhe krenari e kombit! Sot, jam shumë krenar, sepse mund të japim së bashku me asamblenë, një titull, titull që flet se ata janë pjesë e jona, janë krenaria jonë, Hashim Thaçi, Kadri Veseli, Jakup Krasniqi, Rexhep Selimi. Megjithëse jeni me trup larg, ne ju kemi pranë, sot e gjithmonë, juve çlirimtarë, juve liridashës, juve heronj të luftës e paqes! Krenar me asamblistët dhe asamblenë e komunës së Drenasit! Lavdi Ushtrisë Çlirimtare të Kosovës! Lavdi heronjve, dëshmorëve e martirëve të kombit!”.
KQZ shqyrtoi dhe miratoi ndaras rekomandimet e Zyrës për Regjistrimin, Certifikimin dhe Kontrollin Financiar të Partive Politike (ZRCKFPP) për pezullimin e dy partive politike, Lëvizjes për Bashkëveprim dhe Partisë Socialdemokrate, të cilat nuk kanë mbajtur kuvendet e tyre zgjedhore sipas afatit ligjor.
Afati i fundit për mbajtjen e kuvendit/konventës zgjedhore për partinë politike Lëvizja për Bashkëveprim ka qenë data 8 dhjetor 2023, ndërsa për partinë politike Partia Socialdemokrate ky afat ka qenë më 15 dhjetor 2023.
Sipas vendimit të KQZ-së, këto dy parti politike obligohen që të mbajnë kuvendin e tyre zgjedhore në një afat shtesë prej 45 ditësh dhe nëse kjo nuk arrihet, atëherë sipas Rregullores për regjistrimin dhe funksionimin e partive politike, KQZ merr vendim për çregjistrim nga regjistri i partive politike në Kosovë, raporton ATV.
Sipas Ligjit Nr. 08/L-288 për Zgjedhjet e Përgjithshme në Republikën e Kosovës, të gjitha partitë politike të regjistruara janë të obliguara që të mbajnë kuvendin zgjedhore brenda 6 muajve nga data e regjistrimit të partivë dhe pastaj së paku çdo 48 muaj. /atvlive.tv
Palestinezi 15-vjeçar Abdullah Abu Sultan nga tenda ku ai dhe familja e tij strehohen në Rripin e Gazës që ndodhet në sulmet intensive izraelite, po shkruan një libër me tregime për “jetët e tyre të shkatërruara” për shkak të bombardimeve.
Për shkak të sulmeve të Izraelit në Rripin e Gazës, humbjet e jetëve të grave, fëmijëve dhe civilëve po rriten çdo ditë e më shumë. Po shkatërrohen edhe jetët e familjeve palestineze që kanë mbijetuar. Me më shumë se 20 mijë të vrarë dhe mbi 50 mijë të plagosur, janë shpërbërë shumë familje për arsye të tilla si largime nga shtëpitë e tyre dhe migrimi i detyruar.
Edhe 15-vjeçari Abdullah Abu Sultan që jeton në qytetin e Gazës, është një nga palestinezët që është detyruar të migrojë bashkë me familjen e tij si pasojë e bombardimeve izraelite. Pas zhvendosjes disa herë me familjen e tij, Abu Sultan është strehuar në një kamp në qytetin Rafah dhe nga tenda po shkruan libër me tregime që tregojnë shkatërrimin e jetëve të tyre për shkak të bombardimeve.
Duke folur për Anadolu, Abu Sultan tha se vazhdon “shkrimin” e librit me tregime si një detyrë (borxh) besnikërie ndaj rekomandimit nga mësuesi i tij i dashur që humbi jetën në sulmin izraelit. Abu Sultan tha se po shkruan tregimet (historitë) e palestinezëve të shkatërruar (copëtuar) me sulmet izraelite në Gaza dhe se veprën e tij e ka emërtuar “të shkatërruarit” (të copëtuarit).
“Jemi zhvendosur disa herë nga vendi ynë”
Pasi shpjegoi përjetimet e tyre në sulmet e Izraelit në qytetin e Gazës, Abu Sultan tha: “Jemi zhvendosur nga vendi ynë për shkak të bombardimeve të vazhdueshme të zonës ku ndodhej shtëpia jonë. Shkuam në shtëpinë e dajës, aty ishte shtëpia e parë ku u strehuam. Por, edhe aty situata u përkeqësua. Zona filloi të bombardohej vazhdimisht, shtëpitë përreth bombardoheshin gjithnjë”.
Më pas familja migroi në lagjen Zahra ku disa ditë më pas edhe ndërtesa në të cilën qëndruan u bombardua, tha Abu Sultan duke shtuar se në zonën Zahra u shenjëstruan dhe u shembën të gjitha ndërtesat shumëkatëshe. “Nga bombardimi i lagjes Zahra, u strehuam në një ndërtesë në sheshin ‘Palestina’ dhe që nga aty u shënjestruam nga avionët luftarakë izraelitë”, tha Abu Sultan i cili ndau informacionin se janë zhvendosur shumë herë.
Ai tha se si pasojë e shënjestrimit të vendeve ku strehoheshin u detyruan të dalin nga qyteti i Gazës dhe se në kërkim të një vendi të sigurt kanë ardhur në Rafah.
“Kur mbërritëm në Rafah mësova se mësuesi im Majid Azzam kishte rënë dëshmor. Ishte personi i cili më mbështeste që unë të shkruaja, më inkurajonte për aftësitë e mia në këtë çështje. Më kishte inkurajuar që të shkruaja tregimin tim të parë të emërtuar ‘Mbeta vetëm’”, tha Abu Sultan duke theksuar se bashkë me familjen e tij janë strehuar në “Qendrën e Strehimit Kuds” në Rafah.
“Duke shkruar largohem nga bota brenda të cilës ndodhem”
Abu Sultan thotë se pasi mësuesi i tij ndërroi jetë, filloi të shkruajë edhe si detyrë besnikërie ndaj inkurajimit të mësuesit. Ai bëri të ditur se ka filluar të shkruajë tregimin e dytë. “Duke shkruar dhe lexuar përpiqem të largohem nga bota dhe vështirësitë brenda të cilave ndodhem”, u shpreh ai.
Ai tha se dëshiron përfundimin sa më parë të sulmeve dhe rikthimin në shtëpinë e tij në qytetin e Gazës. “Ashtu si të gjithë fëmijët në botë dëshiroj të jetoj një jetë normale me familjen time larg nga bombardimet dhe shkatërrimet”, tha palestinezi Abu Sultan.