Policia e Kosovës ka shqiptuar gjithsej 2 mijë e 504 gjoba trafiku gjatë 24 orëve të fundit në vend.
Sipas raportit policor, gjatë kësaj periudhe janë regjistruar 15 aksidente trafiku me persona të lënduar.
36 aksidente të tjera kanë përfunduar me dëme materiale.
Dy automjete janë përfshirë në një aksident në Koshtovë të Mitrovicës, ku lëndime kanë pësuar katër persona.
Në njoftimin e policisë thuhet se njëra njëra veturë ishte me targa vendore dhe tjetra me targa të Serbisë, ndërkaq dy nga të lënduar janë duke u trajtuar në Spitalin rajonal të Mitrovicës së Jugut dhe dy në Mitrovicë të Veriut.
“Raportohet për një aksident trafiku në mes dy automjeteve, njëra me targa vendore dhe tjetra me targa të Serbisë. Si pasoj lëndime trupore kanë pësuar katër persona. Dy janë duke u trajtuar në Spitalin rajonal Mitrovicë Jug dhe dy në Mitrovicë Veri. Rasti nën hetime”, thuhet në raportin e policisë.
Kryetari i AAK-së, Ramush Haradinaj ka kujtuar të rënët në Sagonë të Kaçanikut.
Përmes një postimi në Facebook, Haradinaj tha se Kaçaniku me rrethinë i doli zot atdheut në të gjitha etapat, ndërsa shtoi se kjo trevë e dëshmoi veten edhe në luftën e fundit për liri.
“Sot, në përvjetorin e rënies, kujtojmë dëshmorët e rënë në Sagonë të Kaçanikut; Kemajl Thaqi dhe Ekrem Gudaqi, të cilët ranë nën udhëheqjen e Komandantit, tanimë Hero i Kosovës, Agim Bajrami. Po ashtu, me respektin më të lartë, nderojmë martirët e rënë në këtë datë të vitit 1999; Hanife Jaha, Selvije Krivanjeva, Baki Bela, Hanife Gudaqi, Ramush Jaha, Ibush Rrushi, Ramadan Dashi, Fahri Mani, Bahrije Elezi, Sevdije Guri, Hamdi Dashi, Brahim Dashi dhe Fitim Gudaqi”.
“Trashëgimia që e lanë pas, të na shërbejë si shtytës në përpjekjet tona për një Kosovë të sigurt e të zhvilluar. Lavdi e përjetshme të rënëve për liri. Heroizmi i tyre u trashëgoftë ndër breza!”, ka shkruar Haradinaj.
Dy vajza të mitura janë raportuar të zhdukura gjatë ditës së mërkurë në Fushë-Kosovë.
Sipas raportit 24-orësh të policisë, në rastin e parë babai ka raportuar rreth orës 12:30 se vajza e tij është larguar nga shtëpia dhe nuk dihet vendndodhja e saj.
Ndërkaq, në rastin e dytë, i raportuar rreth orës 22:00, është bërë e ditur se një tjetër vajzë e mitur është larguar nga shtëpia dhe ende nuk dihet se ku ndodhet.
Të dy rastet janë duke u hetuar nga Policia e Kosovës.
Kryetari i kryeqytetit, Përparim Rama, ka mbajtur konferencë për media në “Ishullin Urban” në Prishtinë, lidhur me bllokimin e punimeve nga Inspektorati për Trashëgimi Kulturore (ITK)
Rama, ka ftuar Prokurorinë që të ndërmarrë masa të menjëhershme, duke thënë se të gjithë sabotuesit duhet të shkojnë në Prokurori.
“Në punishten e Ishullit Urban ku për fat të keq prapë punët tona po bllokohen. Po bllokohen 30 mijë banorë të kryeqytetit me ju krijua mundësinë me kalu të sigurtë prej anës të “Arbërisë” në qendër të kryeqytetit. Kujt po i pengojnë këto punë? Qeveria vazhdon për çështje puro-politike me blloku kryeqytetin, derisa të njëjtën kohë ju jep leje sektorit privat. Çfarë hipokrita, çfarë hipokrizie. Ne e kemi kriju projektin, e kemi ndarë buxhetin, kemi filluar punimet, po vazhdojnë punimet me intensitet e ata vijën edhe e bllokojnë kryeqytetin ën mënyrë të jashtëligjshme. Nuk do të lejoj si kryetar i kryeqytetit të bllokohen banorë të kryeqytetit nga njerëz që janë të paaftë, që nuk ia dojnë të mirën këtij qyteti që nuk ia dojnë të mirën këtij vendi”, ka thënë ai.
“Prandaj, ftoj prokurorinë që të ndërmarrë masa të menjëhershme. Të gjithë këta bllokues e sabotues të shkojnë në Prokurori… Nuk kanë asnjë bazë ligjore, thirren në dokumente që nuk ekzistojnë. E ftoj prokurorinë që ti marrë në pyetje. Nuk ka asgjë që e ndalë kryeqytetin…Do ta dorëzojmë kallëzimin menjëherë”, ka thënë ai.
“Do të vazhdojmë me punë edhe në sheshin “Xhorxh Bush”, sikurse do të vazhdojmë edhe në “Ishullin Urban”, ka shtuar Rama. /Ekonomiaonline
Ish-kryeministri i Kosovës dhe kreu i Aleancës për Ardhmërinë e Kosovës, Ramush Haradinaj, ka folur në emisionin “Oponencë” për politikat ekonomike dhe nismat rajonale, duke u ndalur si te raportet me Serbinë, ashtu edhe te “Ballkani i Hapur”.
Haradinaj u shpreh se taksa 100% ndaj produkteve serbe, e vendosur gjatë qeverisjes së tij, nëse do të ishte mbajtur, do të kishte ndikuar në forcimin e integrimit ekonomik mes Kosovës dhe Shqipërisë.
“Nëse do ishte mbajtur kjo taksë do unifikoheshim si treg Kosova dhe Shqipëria”, deklaroi ai.
Ai shtoi se gjatë asaj kohe ka pasur ankesa nga kompani të mëdha për masën ndaj produkteve serbe.
“Me janë ankuar kompani të mëdha për taksën dhe u kam thënë: nëse vendosni kompaninë në Shqipëri, do e marrim produktin pa taksë, ndërsa ata operojnë nën legjislacionin serb”, u shpreh Haradinaj.
Duke folur për bashkëpunimin rajonal, Haradinaj u ndal edhe te nisma “Ballkani i Hapur”, për të cilën tha se është i hapur në parim, por me një kusht të qartë politik.
“Jam për Ballkanin e Hapur por me një kërkesë: Serbia të njohë Kosovën”, deklaroi ai.
Sipas tij, një nismë e tillë duhet të garantojë barazi mes shteteve dhe të mos krijojë tensione apo përplasje mes palëve, duke theksuar se çdo vend duhet të ketë mundësi të bashkëpunojë lirshëm me shtete të tjera.
“Ballkani i Hapur duhet të ketë mundësinë që çdo shtet të jetë më i hapur me shtete të tjera, pa u mërzitur palët e tjera”, përfundoi Haradinaj.
Ministria e Industrisë, Ndërmarrësisë, Tregtisë dhe Industrisë ka publikuar çmimet e derivateve për 24 orët e ardhshme.
Krahasuar me dje, nafta dhe benzina sot do shiten 1 cent më shtrenjtë krahasuar me dje, përkatësisht 1 euro e 64 centë litri i naftës dhe 1 euro e 55 centë litri i benzinës.
Gasi ndërkohë po shitet 75 centë për litër.
Çmimet hyjnë në fuqi nga ora 10:00.
Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, përgjatë magjistrales Ferizaj-Prishtinë.
Zëdhënësi i Policisë për rajonin e Ferizajt, Kanun Veseli, ka bërë të ditur për Klankosova se rasti ka ndodhur dje, rreth orës 15:40.
“Sot kemi pranuar informatën se në magjistralen Ferizaj-Prishtinë, në fshatin Babush, te një objekt, një person kishte rënë nga kulmi (pullazi) dhe kishte pësuar lëndime trupore”, ka deklaruar Veseli.
Sipas tij, i lënduari fillimisht është transportuar për trajtim mjekësor në Emergjencën e Ferizajt, ndërsa më pas, për shkak të natyrës së rëndë të lëndimeve, është dërguar në Qendrën Klinike Universitare të Kosovës për trajtim të mëtejmë.
Lidhur me rastin, Veseli ka thënë se hetuesit e stacionit policor kanë dalë në vendin e ngjarjes për ekzaminimin e rrethanave të incidentit, ndërsa janë njoftuar edhe inspektorët e punës.
“Për të gjitha veprimet policore është njoftuar prokurori i shtetit, ndërsa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, tha Veseli
Policia Rajonale e Ferizajt ka kërkuar bashkëpunimin e qytetarëve për identifikimin e një personi të dyshuar, në kuadër të veprimeve hetimore për zbardhjen e një rasti penal.
Sipas njoftimit të Policisë, rasti ka të bëjë me veprën penale “Vjedhje”, e cila dyshohet se ka ndodhur më 17 prill 2026, në rrugën “Vëllezrit Gërvalla”, në një qendër tregtare në Ferizaj.
Me autorizim të Prokurorit të Shtetit, Policia ka publikuar fotografinë e personit të dyshuar, i cili dyshohet të jetë i përfshirë në këtë rast.
Autoritetet u bëjnë thirrje qytetarëve që, nëse kanë ndonjë informacion që mund të ndihmojë në identifikimin apo lokalizimin e personit në fjalë, ta njoftojnë Policinë e Kosovës përmes numrit emergjent 192, stacionit më të afërt policor apo aplikacionit digjital “Lajmëro Policinë”.
Policia ka bërë të ditur se të gjitha informacionet do të trajtohen me konfidencialitet të plotë.
“Bashkëpunimi juaj është shumë i rëndësishëm për zbardhjen e rastit dhe garantimin e sigurisë publike”, thuhet në njoftim.
Sistemi arsimor parauniversitar në vend po përballet me një tkurrje të shpejtë të numrit të nxënësve, si pasojë e faktorëve demografikë me plakjen e popullsisë dhe emigracionit në moshat e reja.
Të dhënat më të fundit zyrtare nga INSTAT tregojnë se brenda vetëm një viti akademik 2024-2025, numri i përgjithshëm i nxënësve që ndjekin arsimin 9 vjeçar dhe te mesëm ka pësuar një rënie me 10,020 personash ose 3%. Numri total i të regjistruarve në të gjitha nivelet arsimore ka zbritur nga 349,827 nxënës që ishin në vitin akademik 2023-24, në 339,807 nxënës në vitin vijues 2024-25.
Duke marrë në konsideratë se numri mesatar i nxënësve për kasë është 25, i bie që gjatë vitit shkollor 2024-2025 të jenë mbyllur 400 klasa.
Kjo rënie reflektohet në mënyrë të ngjashme në të gjitha ciklet e shkollimit, por goditjen më të rëndë e ka marrë arsimi fillor, i cili ka humbur numrin më të madh të nxënësve. Ky cikël ka pësuar një tkurrje prej 4,710 fëmijësh më pak, duke u tkurrur me 3% dhe duke zbritur në 136,379 nxënës të regjistruar. I njëjti trend negativ vërehet edhe në ciklin e lartë të arsimit bazë, ku numri i nxënësve ra me 2,745 persona, duke shkuar në 114,238 nga rreth 117 mijë që ishin një vit më parë.
Në të njëjtin trend ishte ecuria edhe ne arsimin e mesëm, ku gjimnazet dhe shkollat profesionale numërojnë 2,565 nxënës më pak për vitin akademik 2024-25, çka përkon me një rënie prej 3% të këtij grupi. Ekspertët e fushës e shohin këtë dinamikë si një kambanë alarmi, pasi zbrazja e klasave në arsimin fillor parashikon një tkurrje afatgjatë që do të zhvendoset gradualisht edhe në universitetet e vendit dhe në tregun e punës në vitet në vijim.
Emigracioni i familjeve të reja mbetet një nga shkaqet kryesore dhe më të dukshme. Ndryshe nga vitet e kaluara ku emigronin kryesisht individë të vetëm, vitet e fundit vihet re emigrim me familje.
Rënia e lindshmërisë është një tjetër faktor me ndikim afatgjatë. Ndryshimi i stilit të jetesës, kostot e rritura të jetesës dhe shtyrja në kohë e moshës për të krijuar familje kanë sjellë një rënie të ndjeshme të numrit të lindjeve të reja çdo vit. Vitin e kaluar linden rreth 21400 foshnja në të gjithë vendin nga 32,715 të tilla në vitin 2015.
Krahas largimit jashtë vendit, ekziston edhe një braktisje e zonave rurale dhe qyteteve të vogla drejt qendrave të mëdha urbane si Tirana apo Durrësi. Ndërsa në kryeqytet disa shkolla mund të përballen ende me mbingarkesë, në rrethe dhe në fshatra situata është kritike, duke çuar shpesh në mbylljen e shkollave apo krijimin e klasave kolektive për shkak të mungesës së nxënësve.
Tkurrja me mbi 10 mijë nxënës brenda një viti në arsimin para-universitar do të reflektohet në goditje zinxhir në të gjithë ekonominë, tregun e punës.
Në planin afatshkurtër, rënia e numrit të nxënësve sjell një çekuilibër të menjëhershëm në menaxhimin e burimeve njerëzore në arsim. Mbyllja e klasave apo e tërë shkollave, veçanërisht në zonat rurale dhe qytetet e vogla, krijon një tepricë të stafit mësimor.
Kjo do të thotë se qeverisë do t’i duhet të rishikojë formulën e financimit të shkollave, ndërsa mësuesit rrezikojnë të mbeten pa normë të plotë orësh ose pa punë. Nga ana tjetër, rënia e numrit të nxënësve në shkollat e mesme përkthehet automatikisht në më pak aplikime në universitete pas pak vitesh, duke vënë në rrezik ekzistencën e shumë degëve të studimit, sidomos në universitetet rajonale./monitor