Category: Lajme

Përgatiti: Armand Hoti

Pagën e dhjetorit e kemi marrë me kohë, ose mund të themi se e kemi marrë para kohës.

Por që pagat t’i marrin, u nevojit intervenimi i institucioneve. Në dhjetor, për ndërmarrjen “Trepça” u ndan afro dy milionë e 800 mijë euro subvencion.

Gjatë muajit dhjetor ndërmarrja publike “Trepça” Sh.A. është mbështetur me mjete financiare, subvencione në vlerë prej 2,797,127.30 euro për mbulimin e shpenzimeve si në vijim: Paga, energji elektrike, ujë dhe obligime të tjera”, thuhet në njoftimin e Ministrisë së Ekonomisë.

Profesori i ekonomisë, Fidan Qerimi, thotë se subvencionimi për mbulim të shpenzimeve operative, nuk është në funksion të mirëfunksionimit të ndërmarrjes.

“Si Qeveri duhet t’i kryejnë obligimet ndaj një kompanie që është 80% në pronësi të kompanisë. Çfarë më shqetëson, fakti se Qeveria po financon shpenzime operative, kurse investimet kapitale, ato që do të gjeneronin të hyra për me e rikthy “Trepçën” si kompani që fillimisht mund të mbijetojë pa subvencione e më pas edhe të mendojë për fitime të tjera”, tha Qerimi.

Në muajin nëntor, Ministrja e Ekonomisë, Artane Rizvanolli, u shpreh se nga viti 2019 deri në atë 2023, “Trepça” u subvencionua me 27 milionë euro. Pjesa më e madhe e këtyre mjeteve, u orientua në mbulimin e shpenzimeve operative të ndërmarrjes.

Ndërkaq, për dhjetë muaj të vitit që lamë pas, “Trepça” nuk arriti të realizojë as gjysmën e shitjeve të planifikuara për tërë vitin.

Sipas projeksionit të të hyrave të përgjithshme të ndërmarrjes për vitin aktual, me përjashtim të njësisë veriore nga llogaritja, ndërmarrja synon të gjenerojë të hyra në vlerë prej më shumë se 22 milionë eurosh.

Kurse shpenzimet e përgjithshme, referuar planit të biznesit për vitin 2024, pritet të jenë mbi 21 milionë euro.

Policia e Kosovës ka konfirmuar se ka pasur gjuajtje me armë në rrugën “Bajram Bahtiri” në Kodrën e Trimave në Prishtinë, derisa njoftuan se një person i plagosur është dërguar në QKUK për trajtim mjekësor.

“Rreth orës 20:15, është raportuar për gjuajtje me armë zjarri të ndodhur në rrugën “Bajram Bahtiri” në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se për pasojë një person ka marrë plagë nga arma e zjarrit”.

“Ndërkohë që i plagosuri është dërguar në QKUK për trajtimin e nevojshëm mjekësor, policia po vijon punën e saj me veprime të ekzaminimit të vendngjarjes si dhe me veprime të tjera operativo-hetimore me qëllim identifikimin e të dyshuarve të implikuar në rast, si dhe sqarimin e plotë të rrethanave të ngjarjes”, thuhet në njoftim.

Sipas disa dëshmitareve që kanë folur në kushte anonimiteti të dyshuarit kanë gjuajtur nga vetura.

Përgatiti: Krenare Mulliqi

Pas gati gjysmë viti nga shqiptimi i dënimit nga shkalla e parë e cila i gjeti fajtor për vrasjen e Marigona Osmanit, Dardan Krivaqa dhe Arbër Sejdiu u paraqitën sërish në Gjykatë.

Në seancën e së mërkurës të Gjykatës së Apelit u shqyrtuan ankesat e të dyja palëve për aktvendimin e Gjykatës Themelore të Ferizajt të 4 gushtit, që Krivaqën e dënoi me burg të përjetshëm, ndërkaq Sejdiun me 15 vjet burgim për ndihmë në kryerjen e vrasjes.

Megjithatë për shkak të ndjeshmërisë së rastit, seanca u mbyll për media.

“Për shkak të veprës penale “Dhunimi”, kjo seancë duhet të mbyllet për publikun, ndërsa mediat janë lejuar vetëm të marrin pamje”, tha Xhevdet Abazi, gjyqtar.

Pas përfundimit të seancës e cila zgjati më pak se një orë, avokati i familjes së Marigona Osmanit tha se kërkoi që të dënuarit Arbër Sjediut t’i rritet dënimi ta paktën me 25 vjet burgim.

Rexhepi tregoi se avokatët e Krivaqës dhe Sejdiut, kërkuan ulje të dënimit apo rigjykim të rastit.

Gjykata themelore, Krivaqën dhe Sejdiun i kishte liruar nga akuza e dhunimit, përkatësisht ndihmës në kryerjen e dhunimit, pasi sipas Gjykatës, nuk kishte pasur prova të mjaftueshme për të vërtetuar një gjë të tillë.

Marigona Osmani ishte 18-vjeçare kur u vra më 22 gusht të vitit 2021 në banesën e të akuzuarit kryesor, Dardan Krivaqa, në qytetin e Ferizajt. Sipas aktakuzës, një ditë më herët Krivaqa dyshohet se aty, pa pëlqimin e Marigona Osmani, e kishte detyruar atë të kryente marrëdhënie seksuale dhe e kishte abuzuar e maltretuar në forma të ndryshme. Një ditë më pas, ata akuzohen se e kishin privuar atë nga jeta, në përpjekje për ta fshehur veprën penale të dhunimit.

Komuna e Prishtinës, përmes një njoftimi në faqen e saj zyrtare në facebook, ka njoftuar se monitorimin e sistemit të vëzhgimit me kamerë do ta bëjë Policia e Kosovës dhe po ashtu infrastrukturën teknike të pajisjeve, ruajtjen dhe mbikëqyrjen.

“Sistemi i regjistrimit të të dhënave, që do të bëhet nga këto kamera do të krijojë mundësinë e vlerësimeve statistikore, pa përfshirë përpunimin e karakteristikave biometrike dhe menaxhimi i tyre do të bëhet vetëm nga Policia e Kosovës mbi bazën e autorizimeve ligjore të saj”, thuhet në njoftimin e Komunës së Prishtinës.

Njoftimi i plotë:

Me qëllim të koordinimit ndërinstitucional, përkatësisht sigurimin e mbrojtjes së të dhënave personale të qytetarëve të Republikës së Kosovës, Udhëheqësit e Institucioneve, znj. Krenare Sogojeva-Dermaku, Komisionere e Agjencisë për Informim dhe Privatësi (AIP), Nënkolonel Basri Shabani, Drejtor i Drejtorisë Rajonale në Prishtinë- Policia e Kosovës (PK) dhe z. Lulzim Fushtica, Drejtor për Siguri dhe Emergjenca i Kryeqytetit-Prishtinë, janë takuar për diskuar lidhur me vendosjen e kamerave në Kryeqytet.

Kërkesa për blerjen dhe vendosjen e kamerave brenda hapësirave publike në Kryeqytet, që ka për qëllim ruajtjen e rendit dhe sigurinë publike, parandalimin dhe zbulimin e veprave penale, identifikimin, gjetjen dhe kapjen e kryerësve të veprave penale, si dhe arritjen e objektivave tjera të ligjshme policore, është bërë nga Policia e Kosovës, drejtuar Kryeqytetit.

Projekti me specifikat teknike është përgatitur nga Grupi Punues në përbërje të anëtarëve nga Policia e Kosovës dhe Kryeqytetit.

Monitorimin e sistemit të vëzhgimit me kamerë do ta bëjë Policia e Kosovës dhe po ashtu infrastruktura teknike e pajisjeve, ruajtja dhe mbikëqyrja do të sigurohen nga Policia e Kosovës.

Sistemi i regjistrimit të të dhënave, që do të bëhet nga këto kamera do të krijojë mundësinë e vlerësimeve statistikore, pa përfshirë përpunimin e karakteristikave biometrike dhe menaxhimi i tyre do të bëhet vetëm nga Policia e Kosovës mbi bazën e autorizimeve ligjore të saj.

Udhëheqësit e institucioneve të Kosovës Agjencia për Informim dhe Privatësi, znj. Krenare Sogojeva-Dermaku, Komisionere e Agjencisë për Informim dhe Privatësi (AIP), Nënkolonel Basri Shabani, Drejtor i Drejtorisë Rajonale në Prishtinë- Policia e Kosovës (PK) dhe z. Lulzim Fushtica, Drejtor për Siguri dhe Emergjenca i Kryeqytetit, janë zotuar se do të sigurojnë që zbatimi i projekti do të realizohet në harmoni të plotë me legjislacionin përkatës në fuqi.

Agjencia për Informim dhe Privatësi, siguron qytetarët e Republikës së Kosovës se bazuar në mandatin ligjor do të bëjë monitorimin e zbatimit të këtij projekti për të siguruar zbatimin e Ligjit për Mbrojtjen e të Dhënave Personale duke përshirë edhe inspektimin e realizimit të projektit.

Një ngjarje e rëndë ka ndodhur në Prizren, ku një person po dyshohet se ka bërë vetëvrasje, në rrethana dhe për motive akoma të panjohura.

Bëhet fjalë për një 60-vjeçar, i cili u gjet pa shenja jete dhe vdekja e tij u konfirmua nga ekipi mjekësor që intervenoi në vendin e ngjarjes.

Në vendin e ngjarjes kanë dalë edhe njësitë përkatëse të Policisë, ku kanë kryer ekzaminimet e nevojshme për të ndriçuar rastin./Sinjali

Ministri i Mbrojtjes, Ejup Maqedonci, ka konfirmuar se Kosova ka bërë kërkesë për blerjen e sistemit raketor antitank “Javelin”.

Ai ka thënë se për këtë blerje ka diskutuar në Departamentin amerikan të Shtetit dhe Departamentin e Mbrojtjes.

Maqedonci ka thënë se kjo lëndë është përcjellë për aprovim në Kongres dhe se presin përgjigje pozitive.

“Ministria e Mbrojtjes mbështet Forcën e Sigurisë se Kosovës për t’i ndërtuar kapacitetet e mbrojtjes së territorit në koordinim me partnerët strategjikë, me theks të veçantë Shtetet e Bashkuara te Amerikës, në këtë aspekt Qeveria e Republikës së Kosovës me ShBA-të ka program bashkëpunimi për blerje ushtarake direkt me ShBA përmes programit FMS (Foreign Military Sales). Në kuadër të këtij programi parashihen blerjet ushtarake, duke përfshirë sistemin raketor antitank “Javelin”, por dhe sisteme tjera të armatimit. Për sistemin Javelin është dërguar dhe pranuar kërkesa dhe për këtë rast blerje kam diskutuar në Departamentin e Shtetit dhe Departament të Mbrojtjes. Sipas informacioneve publike që keni marrë edhe nga ambasadori Hill, kjo lëndë tashmë është përcjellë për aprovim në Kongres dhe presim vendim pozitiv”, ka thënë Maqedonci për Dukagjinin.

Gjykata Themelore në Prishtinë e ka refuzuar kërkesën e Prokurorisë Themelore për caktimin e paraburgimit për 12 zyrtarët e ATK-së dhe biznesmenin Feim Pulaj të arrestuar nën dyshimin për korrupsion.

Kjo është konfirmuar për “Betimi për Drejtësi” nga Majlinda Sadiku, e cila është avokate e të arrestuarit Xhemajl Hertica.

Gjykata e ka caktuar masën e ndalimit të ofrimit të personit apo vendit të caktuar.

Ndryshe, 12 zyrtarët dhe biznesmeni janë arrestuar të martën (9 janar 2024) nën dyshimin për disa vepra penale, ndërsa të mërkurën ishte kërkuar caktimi i masës së paraburgimit.

Zyrtarët e ATK-së të arrestuar nën dyshimin për korrupsion janë: Masar Zejnullahu, Nesim Bajrami, Safet Temaj, Avdil Jakupi, Muhamet Rafuna, Murtez Zeqiri, Milaim Berisha, Gazmend Gjocaj, Adil Paqarizi, Vllaznim Krasniqi, Agim Rama, Xhemajl Hetica.

Ilir Murtezaj, drejtor i Administratës Tatimore të Kosovës (ATK), ka thënë se Prokuroria ka ardhur në përfundim për ngritje të aktakuzës dhe se hetimet kishin filluar qysh në vitin 2020.