Category: Lajme

Reshjet e dendura të borës dhe ato të shiut në mbarë Gjermaninë më 17 janar kanë shkaktuar anulimin e qindra fluturimeve dhe linjave të transportit me trena, si dhe mbylljen e shkollave.

Në aeroportin e Frankfurtit – që është aeroporti më i madh në Gjermani – mbi 500 fluturime janë anuluar. Ndërkaq, në Munih mbi 250 fluturime që pritej të ateronin dhe të niseshin, po ashtu u anuluan.

Aeroporti Saarbruecken në perëndim të Gjermanisë u mbyll, përderisa aeroportet në Dyseldorf dhe Koln, po ashtu janë prekur nga vonesat dhe anulimet e fluturimeve.

Operatori kombëtar i trenave, Deutsche Bahn, ka anuluar disa udhëtime në distancë të gjatë dhe ka njoftuar se maksimumi i shpejtësisë së trenave të tij të shpejtë do të kufizohet deri në 200 kilometra në orë për shkak të motit ekstrem.

Reshjet e shiut në mbarë Gjermaninë perëndimore dhe jugore po ashtu kanë shkaktuar ngrirjen e rrugëve, gjë që ka rezultuar me shumë aksidente rrugore mëngjesin e së mërkurës. Si masë parandaluese, shumë shkolla dhe çerdhe në vend janë mbyllur, ndërkaq disa kompani u kanë ofruar punonjësve të tyre mundësinë që të punojnë nga shtëpia./rel/

Një dërgesë me ilaçe për dhjetëra pengje që po mbahen nga Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – është nisur për në këtë territor, pasi Franca dhe Katari ndërmjetësuan marrëveshjen e parë mes Izraelit dhe grupit radikal që nga armëpushimi njëjavor, i cili përfundoi në nëntor.

Dërgesa me ilaçe po dërgohet përmes Egjiptit dhe do t’i dorëzohet Komitetit Ndërkombëtar të Kryqit të Kuq, i cili më pas do t’ia dorëzojë Hamasit. Katari tha se marrëveshja po ashtu përfshin dërgimin e ndihmës shtesë mjekësore dhe humanitare për palestinezët në enklavën e rrethuar.

Marrëveshja vjen pas më shumë se 100 ditë që kur ka nisur lufta e cila ka nxitur tensione në mbarë Lindjen e Mesme, përderisa ditët e fundit ka pasur sulme dhe kundërsulme nga veriu i Irakut për në Detin e Kuq dhe nga jugu i Libanit për në Pakistan.

Në Gazë, radikalët palestinezë ende po rezistojnë në territorin bregdetar që po përballet me një nga fushatat më vdekjeprurëse ushtarake në historinë moderne. Rreth 85 për qind e popullsisë së territorit prej 2.3 milionë banorësh janë larguar nga shtëpitë e tyre, dhe sipas Kombeve të Bashkuara, çereku i popullsisë është duke u përballur me uri.

Izraeli është zotuar se do të shkatërrojë Hamasin dhe aftësitë e tij qeverisëse për t’u siguruar që grupi të mos e përsëris më sulmin e 7 tetorit, që nxiti luftën. Luftëtarët e Hamasit sulmuan jugun e Izraelit, duke vrarë afër 1.200 persona, shumica civilë, dhe duke marrë afër 250 pengje.

Izraeli po ashtu është zotuar se do të kthejë në shtëpi mbi 100 pengje që ende janë në Gazë, pasi shumica prej tyre u liruan në nëntor, gjatë këmbimit me palestinezët e burgosur në Izrael. Izraeli ka thënë se vetëm presioni ushtarak do të sjellë lirimin e më shumë pengjeve, por përderisa lufta vazhdon, pengjet janë në rrezik që të vriten nga sulmet izraelite apo gjatë operacioneve të shpëtimit.

Hamasi ka thënë se nuk do të lirojë pengje derisa të arrihet një armëpushim i përhershëm, kërkesë që është refuzuar nga Izraeli dhe aleatja e tij kryesore, SHBA-ja.

Që kur ka nisur lufta, gjatë ofensivës ajrore, detare dhe tokësore të Izraelit në Gazë janë vrarë 24.285 palestinezë, sipas Ministrisë së Shëndetësisë në Gazën e kontrolluar nga Hamasi. Kjo ministri nuk bën dallimin e civilëve dhe luftëtarëve të vrarë, por ka thënë se dy të tretat e të vrarëve ishin gra dhe fëmijë. Mbi 60.000 persona janë plagosur dhe vetëm më pak se gjysma e spitaleve në Gazë janë pjesërisht funksionale./REL/

Një shtetas i Serbisë është arrestuar nga Policia e Kosovës pasi i njëjti është munduar ta korruptojë një polic duke i dhënë bashkë me dokumente, një kartëmonedhë prej pesë eurosh.

Në raportin 24-orësh të policisë, thuhet se njëjti është arrestuar nga policia dhe është dërguar në stacionin policor në Prizren

“Me date 16.01.2023, rreth orës 16:30 një patrulle policore e Njësisë e së Rregullimit të Komunikacionit Rrugor, Drejtoria Rajonale e Policisë në Prizren, në fshatin Piranë të Prizrenit ka ndaluar një kamion me tabela të Serbisë për shkak të tejkalimit të shpejtësisë”, thuhet në komunikatën e PK-së.

“Shoferi kamioni I. V. I lindur në vitin .1983 në Krushevac – Serbi, Shtetas Serb, pasi është ndaluar nga patrulla policore dhe i janë kërkuar dokumentet, ai bashke me dokumente jep edhe një kartëmonedhë prej pesë (5) eurove. I njëjti është prangosur nga policia dhe është dërguar në Stacionin Policor Prizren Veri”, vazhdon njoftimi.

Pas intervistimit në prani të avokatit mbrojtës, me urdhër të prokurorit kujdestar, të njëjtit i është dhënë aktvendimi për ndalim për 48 orë.

Kundër të njëjtit është dërguar kallëzim penal për veprën penale “Dhënia e ryshfetit”.

Kryeministri Albin Kurti ka kujtuar Jusuf e Bardhosh Gërvallën dhe të Kadri Zekën në 42 vjetorin e vrasjes së tyre nga shërbimi sekret serb në Gjermani.

Kurti tha se mes atentateve politike në historinë moderne të Kosovës, rasti i tyre paraqet një dosje më vete.

Postimi i plotë:
“Përmes saj mund të lexohet vet historia e ekzilit politik të shqiptarëve, përndjekja e tyre nga strukturat e sigurisë të Serbisë dhe historia e bashkëpunëtorëve të tyre. Atentati ndaj Jusuf Gërvallës, Bardhosh Gërvallës dhe Kadri Zekës u krye 42 vite më parë, më 17 janar 1982. Ata u vranë ashtu siç ishte organizuar nga shërbimet e fshehta të Serbisë, që kishin bërë përvojë paraprakisht me atentate të ngjashme ndaj ekzilit politik kroat”.

“Atë të diel dimri dhe me borë në Gjermani, tre veprimtarët politikë shqiptarë të shënjestruar, Jusuf Gërvalla, vëllai i tij Bardhoshi dhe gazetari Kadri Zeka, sapo kishin dalë me makinë nga një garazhë në Untergrupenbach pranë Heilbronnit. Fare pak metra më tutje, dy persona anonimë kishin dalë nga një punishte ndërtimi dhe me revolet e tyre kishin shtënë 12 plumba në drejtim të makinës. Prej tyre, gjashtë plumba e kapën Bardhoshin që po e voziste makinën, kurse Jusufi dhe Kadriu u goditën me nga dy plumba”.

Kurti tha se ishte një atentat i kryer qartazi nga vrasës të trajnuar dhe i ideuar politikisht, “sipas stilit famëkeq të shërbimeve sekrete të Serbisë, që veçanërisht pas demonstratave të vitit 1981 në Kosovë, i kishte ashpërsuar shumëfish përndjekjet, arrestimet, burgosjet dhe torturat mbi aktivistët politikë shqiptarë që i gjurmonte edhe jashtë shtetit”.

“Por historia e veprimtarisë së tyre politike, pasuar nga veprat letrare të Jusufit dhe këngët e tij me Bardhoshin, sikur edhe profili prej gazetari dhe aktivisti i Kadriut, vetëm sa kanë shkuar duke u bërë më të kristaltë. Nga koha kur janë vrarë më 17 janar 1982 dhe deri sot pas 42 vitesh kur po i kujtojmë, Jusufi, Bardhoshi dhe Kadriu janë kthyer në emra referencialë për të gjithë ata që janë angazhuar dhe kanë luftuar për lirinë e Kosovës. Lavdi Kadri Zekës dhe Jusuf e Bardhosh Gërvallës, për veprat e tyre atdhetare dhe për jetën e dhënë në rrugën për lirinë e Kosovës!”, ka shkruar Kurti në Facebook.

Ndonëse nuk pati një program të veçantë, në mesin e rreth 12 mijë vizitorëve gjatë vitit 2023, Muzeun Kombëtar të Kosovës e vizituan edhe fëmijët e kopshteve.

Krahas renovimit, restaurimit dhe trajtimit të fondit muzeor që pritet të fillojë gjatë vitit 2024, kërkohet edhe një program i veçantë për këtë grup-moshë, në mënyrë që ata të ndahen sa më të kënaqur.

Në një intervistë për KosovaPress, drejtoresha e Muzeut Kombëtar të Kosovës, Vjollca Aliu thotë se deri në gjysmën e dhjetorit 2023, numri i vizitorëve është 11 mijë e 451.

Ajo thotë se mbi tre mijë persona kanë vizituar Kompleksin etnologjik “Emin Gjiku”, ndërsa rreth katër mijë të tjerë Muzeun “Shtëpia e Pavarësisë së Kosovës Dr. Ibrahim Rugova”.

Aliu potencon se krahas detyrave dhe prioriteteve për 2024, obligohen të hartojnë edhe një program për fëmijët e kopshteve.

“Numri i vizitorëve në Muzeun Kombëtar të Kosovës, është 11 mijë e 451 vizitorë. Nuk është përfundimtar, sepse pas këtij raporti kemi pas edhe më tutje vizitorë. Kemi një numër prej 3 mijë e 617 në kompleksin etnologjik ‘Emin Gjiku’ dhe kemi një numër të vizitorëve diku ndoshta te katër mijë në ‘Shtëpinë e Pavarësisë së Kosovës Dr. Ibrahim Rugova’ … Muzeun Kombëtar të Kosovës këtë vit e kanë frekuentuar të gjitha grup-moshat, flas edhe për fëmijët e kopshteve. Mendoj që kjo përbën risi, në cilësinë e vizitorëve, që të gjithë kanë ardhur në mënyrë të organizuar, vizita të paralajmëruara dhe konfirmuara nga stafi i muzeut…Krahas shumë detyrave dhe prioriteteve që na parashtrohen për vitin e ardhëm na obligon që të ndërtojmë dhe një program, sado që është i vogël, i thjeshtë në kuptimin e fjalës që të kemi një program edhe për këto grup-mosha. Muzeu është shquar vite për programin e njohur ‘ABC-ja e Muzeut”, por që nuk e ka përfshirë këtë grup-moshë”, thotë Aliu.

Nevoja për të filluar renovimin, restaurimin dhe trajtimin e Muzeut Kombëtar të Kosovës po konsiderohet më se domosdoshme nga drejtoresha, Vjollca Aliu.

Ajo shpreson që gjatë vitit 2024, projekti për rregullimin e Muzeut do të jetë prioritet i Ministrisë së Kulturës.

“Është përtej nevojave dhe obligimeve parashtrohet një prej kërkesave imediate jo vetëm si ndërtesë, si funksion gjithsesi, prioriteti është te fondi muzeor për çka edhe ekziston Muzeu Kombëtar i Kosovës, sepse ka një fond të jashtëzakonshëm… Sa i përket angazhimeve konsideroj që tani jemi në fund të vitit dhe një pjesë e madhe e obligimeve kanë përfunduar…Projekti ka qenë në proces të rishqyrtimit dhe përfundimisht është miratuar nga Instituti i Kosovës për mbrojtje të monumenteve, e kemi të konfirmuar nga ministria që ka pasur angazhime në mënyrë që proceduar të iniciohet këtë vit. Shpresoj që në fillim të vitit të ardhshëm do të jetë një nga projektet që ministria do t’i trajtojë me prioritet përsëri, në mënyrë që të fillojë renovimi, restaurimi dhe trajtimi i fondit të muzeut”, thekson Aliu.

Ministri i Kulturës, Rinisë dhe Sportit, Hajrulla Çeku, thotë se tashmë ekziston projekti përfundimtar i restaurimit të përgjithshëm të ndërtesës së Muzeut Kombëtar të Kosovës.

Ai shton se projekti ka kaluar fazat e vlerësimit nga komisioni i Institutit të Kosovës për Mbrojtjen e Monumenteve dhe shumë shpejt do të nisë procedura për angazhimin e operatorit për restaurimin e ndërtesës.

Çeku potencon se pjesë qendrore e renovimet janë depot, hapësirat ku ruhen eksponatet, artefaktet dhe koleksioni muzeor. Ai beson se me këto punime, do të krijohen kushte për ruajtjen më të mirë dhe më të dinjitetshme të pasurisë së muzeut.

“Ne tashmë e kemi projektin përfundimtar të restaurimit të përgjithshëm të ndërtesës së Muzeut Kombëtar të Kosovës. Projekti ka kaluar edhe fazat e vlerësimit nga komisioni i Institutit të Kosovës për mbrojtjen e monumenteve dhe shumë shpejt do të nisë procedura për angazhimin e operatorit që do ta bëjë restaurimin e ndërtesës. Pjesë qendrore e restaurimit janë depot, hapësirat ku ruhen eksponatet, artefaktet, pra koleksioni muzeor i Muzeut Kombëtar të Kosovës, por edhe hapësirat e tjera ekspozuese të cilat përfshijnë edhe ri konceptimin e ekspozitave permanente, por edhe ri dizajnimin e hapësirave për ekspozita të përkohshme. Besoj që me këtë ndërhyje që do të bëhet në Muzeun Kombëtar të Kosovës do të krijohen kushte edhe për ruajtjen më të mirë dhe më të dinjitetshme të pasurisë, të koleksionit muzeor, por edhe për aktivitete më të mira në të ardhmen për ekspozita të përkohshme në hapësirat e këtij institucioni”, tha ministri Çeku.

Ndër ekspozitat më të veçanta, drejtoresha Vjollca Aliu konsideron fotografitë e fotografëve Afrim Hajrullahut dhe Alban Bujarit, derisa vlerësoi si të mira edhe ekspozitat e tjera.

Presidentja e vendit, Vjosa Osmani ka folur për ndryshimin “për të mirë” në raportet me kryeministrin shqiptar, Edi Rama.

Osmani ka thënë se pavarësisht dallimeve në disa çështje, është shumë me rëndësi që shqiptarët të unifikojnë politikën e tyre të jashtme.

“Me qëllim të shtyrjes përpara të prioriteteve tona, është shumë me rëndësi që shqiptarët në rajon të unifikojnë politikën e jashtme. Shqipëria është zëri ynë atje ku nuk kemi përfaqësim, ndaj pavarësisht dallimeve që kemi pasur në disa çështje, ne duhet të vazhdojmë të koordinohemi dhe ta konsiderojmë shtetin shqiptar jo vetëm shtet simotër, por aleat strategjik të fuqishëm në përballje me sfidat që i kemi përpara. Kosova duhet të vlerësojë e të fuqizojë më shumë se çdo herë tjetër aleancat e saj. Bashkëpunimi e bashkërendimi me ata që na qëndruan pranë në momentet më të rënda të historisë sonë është veprim në shërbim të shtetit. Shteti ynë i ka themelet e forta sepse qëndron mbi sakrificën e popullit tonë, por edhe mbi partneritetet që i kemi ndërtuar. Prandaj, bashkëpunimi me Shqipërinë në fuqizimin e shtetit të Kosovës është esencial”, ka thënë presidentja Osmani per Reporterin.

Sipas të dhënave doganore, Kosova në vitin 2023 ka realizuar import në vlerë prej 5.6 miliardë euro, ndërkohë që eksporti ka arritur vetëm 820 milionë euro.  Por, krahasuar me vitin 2022 është shënuar rënie prej 100 milionë euro pasi që një vit më herët, kishte thyer rekord duke eksportuar mallra me vlerë 920 milionë euro.

Derisa, ministri i financave Hekuran Murati thotë se qeveria është duke e ngushtuar bilancin e shëkmbimit të mallrave, kryetari i Aleancës së Bizneseve Agim Shahini, thotë se qeveria nuk e ka prioritet zhvillimin ekonomik.

Kosova është shteti i vetëm që nuk e subvencionon eksportin dhe deficiti tregtar është diku rreth 88%, pra qeveria e vendit e favorizon importion, pra qeveria nuk e ka prioritet zhvillimin e vendit, promovimin e prodhimeve”, tha Shahini.

Gjatë vitit 2023, Kosova shënoi një rritje ekonomike prej 3.5 përqind, të cilën njohës të fushës së ekonomisë e konsiderojnë të natyrshme dhe jo si rezultat të zhvillimit ekonomik.

Sot mbushen plot 556 vjet nga vdekja e Heroit tonë Kombëtar Gjergj Kastriot Skënderbej, më 17 janarin e vitit 1468, në Lezhë.

Gjergj Kastrioti, Heroi Kombëtar i Shqipërisë lindi në vitin 1403. I përkiste familjes mbretërore të Kastriotëve.

I ati ishte Gjon Kastrioti, udhëheqës i qyteteve më të mëdha të asaj kohe, Krujës dhe Mirditës dhe e ëma ishte Vojsava. Kur lindi Gjergji, i ati, Gjon Kastrioti, ishte sundimtar i një shteti të rëndësishëm, që shtrihej së paku nga rrethinat e Prizrenit e të Tetovës në lindje deri në detin Adriatik në perëndim.

Gjergj Kastriot Skënderbeu vdiq në moshën 63-vjeçare.

Ai konsiderohet nga shumë vende të Evropës Perëndimore si heroi që pengoi Perandorinë otomane të pushtonte Perëndimin e Evropës. Gjergj Kastriot Skënderbej mbetet figura legjendare e kombit shqiptar në shekuj.

Vdekja e Skënderbeut nënkuptoi fundin e pavarësisë së Shqipërisë, që vetëm falë tij arriti të shfaqej si një shtet i bashkuar dhe i pavarur. Kruja që për shumë vite u quajt si Akropoli i Kristianizmit, rezistoi vetëm një rrethim tjetër pa Prijësin e saj.

Gjergj Kastrioti – Skënderbeu, Heroi Kombëtar i Shqipërisë vulosi me veprat e tij rezistencën kundër turqve pushtues në shekullin e 15 dhe ishte një shembull për imitim për të gjithë heronjtë e mëvonshëm. Mbeti në histori si luftëtar, si gjeneral njeri me principe dhe me ideale. Gjergj Kastrioti ishte personaliteti më i madh politik dhe ushtarak i kohës së tij. U njoh si komandant i të gjitha fiseve Shqiptare dhe mbrojtës i Kristianizmit.

Arriti të ndalonte për 25 vite me rradhë përhapjen e hordhive turke në Ballkan pa humbur qoftë edhe një betejë. Me luftën e tij heroike arriti të fitonte admirimin e të gjithë Europës Kristiane.Në Shqipëri, Skënderbeu është një legjendë, imazhi i vërtetë i një heroi, një gjysëmperëndie që gjithmonë ndodhej në vijën e parë të luftës, që kurrë nuk ngurroi të sakrifikonte jetën e tij për idealet e tij, për ato që ai besonte, për atdheun dhe bashkëluftëtarët e tij.

Sot në Shqipëri kujtimi i tij është mjaft i gjallë, dhe kështu në nder të tij, që nga dita kur ai vdiq, mbiemri i tij u kthye ne emër nderi për djemtë.

Dhe kështu njerëzit emërojnë fëmijët e tyre, në mënyrë që këta fëmijë t’i ngjajnë këtij Heroi. Për këtë në Shqipëri është një nder të quhet dikush Kastriot, por edhe një përgjegjësi e madhe që të mund ta nderojë dikush këtë emër në çdo moment.

Sot shënohet 42-vjetori i vrasjes së veprimtarëve të shquar të çështjes kombëtare, Jusuf e Bardhosh Gërvalla dhe Kadri Zeka. Vëllezërit Gërvalla dhe Kadri Zeka, si veprimtarë të shquar të çështjes kombëtare, u vranë nga shërbimi sekret jugosllav 42 vjet më parë në Shtutgart të Gjermanisë. As pas katër dekadave, vrasja e tre veprimtarëve shqiptarë nuk është zbardhur.

Për vrasjen e tyre ende nuk është hetuar ose dënuar askush.

Në vitin 2017 Suzana Gërvalla, bashkëshortja e veprimtarit Jusuf Gërvalla, kishte njoftuar se shteti gjerman kishte riaktivizuar hetimet për vrasjen e Jusufit.

Atentati mbi dy vëllezërit Gërvalla dhe Kadri Zeka kishte ndodhur në Gjermani, teksa nga autoritet shtetërore gjermane ishte lajmëruar se vrasës të panjohur kanë vrarë tre jugosllavë dhe se ky ishte kulminacion i ri në luftën e fshehtë në të cilën agjentët e sigurimit jugosllav dhe kundërshtarët e pushtetit po luftonin mes tyre.

Gazeta gjermane “Der Spiegel” më 25 janar të vitit 1982 për motivin e krimit do të shkruante se identifikimi i shpejtë i viktimave e ka sqaruar edhe motivin dhe drejtimin politik të tyre: “Jugosllavë në ekzil që i takonin kombësisë shqiptare nga provinca e Kosovës, në jug të shtetit ballkanik dhe që të tre veprimtarë kundër qeverisjes së Beogradit” do të shkruhej në artikull.