Presidentja e vendit, Vjosa Osmani, ka takuar ambasadorin amerikan në Kosovë, Jeffrey Hovenier.
Bëhet e ditur se gjatë takimit, Osmani e Hovenier folën për zhvillimet e fundit në vend, ku në fokus ishte miratimi i Programit të Shitjeve Ushtarake nga Departamenti amerikan i Shtetit.
“Me këtë rast, Presidentja Osmani e falënderoi ambasadorin Hovenier për angazhimin e tij të vazhdueshëm dhe vlerësoi lartë punën e institucioneve në të dyja anët”.
Javën e kaluar është bërë e ditur se Kosovës i është konfirmuar blerja e raketave antitank “Javelin” në vlerë prej 75 milionë dollarë.
Kryetari i Kryeqytetit, Përparim Rama, ka bërë një postim të shkurtër në orët e mbrëmjes në lidhje me rrëzimin e kulmit të ndërtesës së re të Komunës në lagjen Arbëria, që ndodhi sot rreth mesditës.
Një 23-vjeçare ka marrë lëndime të rënda nga çatia që e hodhën erërat në tokë.
“Menjëherë kam kontaktuar me familjarët e të lënduarës për t’iu qëndruar pranë në këto momente. Lutemi për shërimin e saj të shpejtë dhe të plotë”, ka shkruar Rama në Facebook.
“Si Kryetar i Kryeqytetit kërkoj nga organet kompetente që të hetojnë rastin në tërësi dhe të marrin të gjitha masat dhe veprimet në pajtim me legjislacionin në fuqi”.
Komuna e Prishtinës e rindërtoi për 386 mijë euro kulmin e objektit të Komunës së re në fillim të vitit të kaluar. Kjo është hera e dytë që ky pullaz rrëzohet, pasi kishte ndodhur edhe në vitin 2017.
POSTIMI I PLOTË I RAMËS:
Të dashur qytetarë,
Sot, në objektin e Kryeqytetit në lagjen “Arbëria” për shkak të erërave të forta ka kolapsuar një pjesë e kulmit, ku për pasojë një person është lënduar dhe tani është nën kujdes mjekësor.
Menjëherë kam kontaktuar me familjarët e të lënduarës për t’iu qëndruar pranë në këto momente. Lutemi për shërimin e saj të shpejtë dhe të plotë.
Si Kryetar i Kryeqytetit kërkoj nga organet kompetente që të hetojnë rastin në tërësi dhe të marrin të gjitha masat dhe veprimet në pajtim me legjislacionin në fuqi.
Kryeministri i Kosovës, Albin Kurti është takuar me Monika Bickert, zëvendëspresidenten për Politika të Përmbajtjes në Meta.
Kurti asaj i ka kërkuar që të zgjerojë monetizimin.
“Ndër çështjet kryesore që u diskutua në takim ishte zgjerimi i mundësive të monetizimit në Facebook për Kosovën. Aktualisht, vendi ynë përballet me kufizime për të shfrytëzuar shumicën e veçorive të monetizimit në Facebook. Hyrja e monetizimit në Kosovë mund të liberalizojë ndjeshëm tregun, duke krijuar mundësi të konsiderueshme për krijuesit lokalë për të përfituar përmes platformës së Facebook-ut.”
Njoftimi i plotë i Zyrës së Kryeministrit:
Takimet në ditën e tretë në Forumin Ekonomik Botëror, Kryeministri i Republikës së Kosovës, Albin Kurti i vazhdoi me Monika Bickert, Zëvendëspresidenten për Politika të Përmbajtjes në Meta, kompaninë amë të Facebook, Instagram dhe WhatsApp.
Kryeministri Kurti e njoftoi Znj. Bickert me veçoritë e politikave dhe tregut të punës e shërbimeve që e karakterizojnë Kosovën, vëmendjen e Qeverisë ndaj agjendës së saj digjitale dhe potencialin që vendi ynë ka në fushën e teknologjisë.
Ai e ftoi atë që ta vizitojë Kosovën për të konsideruar mundësitë e bashkëpunimit dhe për të marrë pjesë në ngjarjet që planifikohen të organizohen në Prishtinë në fushën e teknologjisë.
Ndër çështjet kryesore që u diskutua në takim ishte zgjerimi i mundësive të monetizimit në Facebook për Kosovën. Aktualisht, vendi ynë përballet me kufizime për të shfrytëzuar shumicën e veçorive të monetizimit në Facebook. Hyrja e monetizimit në Kosovë mund të liberalizojë ndjeshëm tregun, duke krijuar mundësi të konsiderueshme për krijuesit lokalë për të përfituar përmes platformës së Facebook-ut.
Besart Ramadani erdhi në Gjykatën Themelore të Prishtinës, dega në Fushë Kosovë, për ta paditur komunën e Fushë-Kosovës, për mungesë të qasjes në institucione e në trotuare.
Por edhe tek objekti i gjykatës ai u përball me të njëjtat vështirësi.
“Ne si persona me aftësi të kufizuara përballemi me shumë sfida, kur dalim në qytet. Kemi mungesë të infrastrukturës në hapësira publike si vështirësi në rrugë, vështirësi në trotuare, nëpër objekte, mungesë të parkingjeve e vështirësi të tjera. Pothuajse asnjëherë nuk mund të dal pa asistencë, edhe sot këtu pata vështirësi ju e patë edhe vetë”, tha Ramadani.
Avokatja e Besartit tha se në padi është kërkuar që të ndalohet trajtimi diskriminues ndaj kësaj kategorie.
“Padia është për mbrojtje nga diskriminimi dhe shpërblim dëmi në përgjithësi. Përmes këtyre padive është kërkuar mbrojtja edhe në të ardhmen nga diskriminimi
dhe ndalimi i trajtimit diskriminues, kryesisht për qasjen në infrastrukturë”, tha Latife Neziri, avokate.
Para padisë, Ramadani thotë se bashkë me avokaten, nëpërmjet postës elektronike, kishin kërkuar nga komuna që ta rregullojë qasjen dhe të mos diskriminohen personat me aftësi të kufizuara, mirëpo asnjë nga zyrtarët e kësaj komune nuk iu ishte përgjigjur.
Zyrtarët e kësaj komune njësoj vepruan edhe sot me ekipin e ATV-së.
Shuma e dëmshpërblimit që Ramadani po kërkon nga komuna e Fushë-Kosovës, është 13 mijë euro.
Sipas Shoqatës së paraplegjikëve dhe paralizës “Handikos”, nga viti 2015, nëpër Gjykata Themelore janë dërguar 8 padi për diskriminim.
Me një kurorë lulesh e një mesazh në tri gjuhë, Çedomir Stojkoviq, avokat i politikanit serb, Nikola Sanduloviq, ka bërë homazhe pasditen e së enjtes në kompleksin memorial “Adem Jashari”.
“Urrejtja vdes. Ti jeton përgjithmonë”, është mesazhi në tri gjuhë që ai e la mbi varrin e Blerina Jasharit.
Avokati me këtë vizitë në Prekaz, ka thënë se i sfidon autoritetet e Serbisë, nëse do ta arrestojnë njësoj sikurse kishin vepruar me klientin e tij.
Klienti i tij, Sanduloviq ishte arrestuar dhe ka pretenduar se është rrahur nga shërbimi sekret serb pikërisht për këtë arsye.
Politikani opozitar serb, Nikolla Sanduloviq, është liruar para pak ditësh nga paraburgimi për t’u mbrojtur në liri.
Atij homazhet te varri i Komandantit Legjendar, Adem Jashari, në Prekaz, dhe kërkim falja për krimet e Serbisë gjatë luftës në Kosovë, i kishin kushtuar me arrestim dhe maltretim.
Sanduloviq është ndër figurat e pakta në Serbi, që e përkrahin hapur pavarësinë e Kosovës.
Salla e sporteve në Zubin Potok është përcaktuar si lokacion për peticionin që ka për synim mundësimin e votimit për shkarkimin e kryetarit të komunës.
Mbledhja e nënshkrimeve nisë të premten, pasi komuna miratoi kërkesën e grupit iniciues për shfrytëzimin e kësaj hapësire publike.
Me gjithë dhënien e lejes, kryetari Izmir Zeqiri u shpreh skeptik për atë që mund të prodhojë kjo nismë.
“Nuk bëhet zgjidhja në komunat e veriut me shkarkimin e kryetarëve, sepse ne kemi edhe kuvendet që udhëhiqen kryesisht prej pakicave, kështu që kur të duan mund të shfaqin pakënaqësi, pakënaqësia është se po udhëhiqen nga pakica. E shoh më shumë si një iniciativë për të ngatërruar procesin sesa për ta zgjidhur problemin”, tha Zeqiri.
Ai ka dyshime edhe për ligjshmërinë e procesit, veçmas në fazën e radhës, në atë që e quajti “njëlloj referendumi pa ligj për referendumin”.
“Besoj se kjo iniciativë mund të vijë me atak kushtetues, ligjeve tona. Kështu që ne jemi të obliguar t’i zbatojmë ligjet. Çdo gjë që mund të shkelet, ligji ose Kushtetuta, natyrisht që mund të ketë ankesa nga ana jonë”, tha Zeqiri.
Zeqiri do të preferonte një marrëveshje politike, përfshirë dorëheqjet, me garancinë që procesi i ri zgjedhor të zhvillohet pa presion e ndikime.
“Nuk ka premisa se mund të ketë vullnet të shumicës, tash për tash, për të zhvilluar zgjedhje të lira, demokratike dhe fer. Jam skeptik se ka, mirëpo ne do ta zbatojmë ligjin”, tha Zeqiri.
Po ashtu të premten nga ora 9 do të fillojë edhe mbledhja e nënshkrimeve në Zveçan.
Afati i rregullt për mbledhjen e 20% të nënshkrimeve nga lista e votuesve skadon të dielën.
Peticioni për mundësimin e votimit për shkarkimin e kryetarit të Mitrovicës së Veriut, mund të mbyllet së shpejti pasi tashmë është arritur minimumi i kërkuar i nënshkrimeve të qytetarëve nga lista e votuesve.
Megjithëkëtë, iniciuesit nuk përjashtojnë mundësinë e vazhdimit të peticionit edhe për disa ditë, për t’u siguruar që është tejkaluar pragu prej 20%.
“Ne jemi shumë-shumë të kënaqur me ardhjen e qytetarëve, me nënshkrimet dhe me numrat. Nuk e di sa gjatë do të qëndrojmë këtu. Sigurisht, sot deri në orën 16. Por, nuk jam e sigurt nëse do të jemi edhe nesër apo pasnesër, por mbase do të qëndrojmë, sepse duam të kemi numër shumë më të madh sesa minimumi i kërkuar”, tha Sanja Krtinic, iniciuese e peticionit.
Pasi këtë nismë e quajti zgjatim të Listës Serbe, opinionisti Branislav Krstic tha se mobilizimi vjen pas urdhrit nga Beogradi, të përcjellë me presione e shantazh.
Ai vlerësoi se për Listën Serbe, më sfiduese sesa mbledhja e nënshkrimeve, do të jetë mobilizimi i më shumë se 9 mijë votuesve për shkarkimin e kryetarit, në hapin eventual të radhës.
“Ajo do të na shpjegojë se duhet me importu disa serbë, të cilët kanë letërnjoftime të shtetit të Kosovës, që janë duke jetuar në disa qytete në Serbi. Jam i sigurt që do të kemi paqe këto ditë, që më duket se është kryesorja. Por, mekanizmat e atij diktatorit në Beograd, për të kontrolluar dhe shantazhuar serbët janë ende prezentë”, tha Krstic.
Krahas vlerësimit se pas Banjskës, siç u shpreh ai, “Serbia ka marrë rol konstruktiv dhe servil në raport me ndërkombëtarët”, ai tha se qytetarët në veri janë viktima të politikës.
“Kemi politikën e dy standardeve. Beogradi zyrtarisht është duke hequr dorë nga Kosova, por në anën tjetër janë duke ngulur serbët kundër institucioneve të shtetit të Kosovës. Dhe, mua më duket se bash qytetarët tanë nga veriu janë viktimat te të dyja palët”, tha Krstic.
Përveç Mitrovicës së Veriut, edhe qytetarët nga komuniteti serb në Leposaviq janë duke i mbledhur nënshkrimet për mundësimin e votimit për shkarkimin e kryetarit që fitoi mandatin në zgjedhjet që ky komunitet i bojkotoi.
Ish-hetuesja policore në njësinë regjionale të hetimeve në Mitrovicë, Mirsada Omeragiq, kishte qenë një ndër hetueset e para që kishte arritur në vendin e ngjarjes kur ishte vrarë Oliver Ivanoviqi, më 16 janar të 2018-s.
Ajo për këtë ka dëshmuar në Gjykatën Themelore të Prishtinës, dhe është pyetur kryesisht për veprimet e ish-zyrtarëve policorë, Nedelko Spasojeviq, Dragisha Markoviq dhe Zharko Jovanoviq, të cilët janë në mesin e gjashtë të akuzuarve për përfshirje në vrasjen e ish-liderit serb.
“Gjithçka është kryer sipas rregullave, janë vendosur shiritat dhe nuk ka pasur asnjë lëshim”, tha Mirsada Omeragiq, dëshmitare.
Në videot-incizimet shihen në vendin e ngjarjes edhe dy ish-policët e tjerë, Dragisha Markoviq dhe Zharko Javanoviq, por kur është pyetur nga trupi gjykues, dëshmitarja ka thënë se nuk i kujtohet t’i ketë parë.
Sipas saj, me të ardhur hetuesit nga Prishtina, asgjë nuk ishte ndërmarrë pa autorizimin e tyre.
Megjithatë, sipas dëshmitarit tjetër, gjithashtu ish-hetues në këtë rajon, grupi hetimor i përbashkët për hetimin e vrasjes së Ivanovicit ishte formuar një ose dy ditë pas.
“Shiritat kanë qenë, por kanë qenë në hapësirë më të ngushtë, e ne kemi zgjeruar sigurimin e vendit të ngjarjes”, tha Jugollsav Bugovac, dëshmitar.
Më tej, ai është pyetur edhe për kamerat e sigurisë, të cilat bashkë me hetues të tjerë i kishin sekuestruar në ditën kritike.
“Se kamerat nuk kanë punuar, kam dëgjuar nga mediat, sepse unë s’kam qenë pjesë e grupit hetues dhe nuk mund të flasë tutje çfarë ka ndodhur, ato janë dërguar për ekspertizë”, tha Bugovac.
Gjykimi për vrasjen e Ivanovicit do të vazhdojë të premten me administrimin e provave.
Me polemika si kjo, u përcoll pothuajse e gjithë seanca e jashtëzakonshme, e para për sesionin pranveror.
I gjithë diskutimi ishte fokusuar në një pikë të rendit të ditës: Rritja e çmimit të Energjisë elektrike.
Në këtë seancë, PDK-ja kishte edhe një propozim rezolutë, e cila përmbante 5 pika, ndër të cilat u kërkua ulja e çmimit të energjisë elektrike dhe heqja e bllok-tarifës.
Por, sipas ministres së Ekonomisë, Artane Rizvanolli, bllok-tarifa ishte shtyrë para në vitin 2017 nga PDK-ja e LDK-ja.
Ndërkohë derisa, Rizvanolli tha se Kosova e ka çmimin më të ulët në rajon, reagim kishte nga ana e opozitës. Shefi i grupit parlamentar nga Lidhja Demokratike e Kosovës, Arben Gashi, ka thënë se Qeveria Kurti ia shet 3 centë kilovatin KEDS-it, ndërsa sipas tij, KEDS-i atë kilovat ia shet 14 centë qytetarit.
E sipas kryetarit të PDK-së, 100 eurot që u ndanë nga Qeveria, qytetarëve ua mori menjëherë nëpërmjet faturave të larta.
Për fatura e fryra foli edhe Shefja e Grupit Parlamentar të Lëvizjes Vetëvendosje, Mimoza Kusari-Lila. Sipas saj, ekzistojnë dyshimet për faturim të pasaktë të energjisë elektrike.
Pas debatit rreth pesë-orësh, nuk pati deputetë të mjaftueshëm në sallën plenare për ta hedhur në votim rezolutën e PDK-së, ku kërkohej ulja e çmimit të energjisë elektrike dhe heqja e bllok-tarifës.
Andaj, në mungesë të kuorumit ka përfunduar seanca e Kuvendit të Kosovës.
Pagesa me këto të holla do të tolerohen vetëm edhe për pak ditë.
Rregullorja e re e miratuar nga Banka Qendrore e Kosovës për operacionet për paratë e gatshme, parasheh që valuta e vetme që lejohet për kryerjen e transaksioneve të pagesave me para të gatshme në Kosovë është Euro.
Këtë po e kundërshtojnë banorët serb të Graçanicës të cilët thonë se është vendim jo të drejtë.
“Kjo është padrejtësi, kjo është gjenocid ndaj popullit serb këtu gjithmonë është paguar me dinar dhe duhet të vazhdojë qarkullimi i saj. Në pranojmë pensione nga Serbia në dinar. Do të jetë e vështir edhe për shqiptarët e Bujanocit e Medvegjes sepse ata vazhdojnë të jenë shtetas të Serbisë dhe ti marrin pensionet në dinarë”, thotë një banor serb.
“Nuk e di çfarë të them por shumë vështir është, por mbase mund të merren vesh mes veti diçka”, thotë një tjetër banor serb.
Sipas rregullores së BQK-së e cila hynë në fuqi nga 1 shkurti thuhet se valutat jo euro mund të përdoren vetëm për t’u ruajtur “në formë fizike apo në llogaritë bankare”.
“Valutat tjera jo euro mund të përdoren në Republikën e Kosovës vetëm si vlera për ruajtje në formë fizike apo në llogarite bankare në valuta jo euro, për kryerjen e pagesave ndërkombëtare në valuta jo euro dhe për aktivitetet e këmbimit valutor. Këmbimet valutore mund të kryhen në Republikën e Kosovës vetëm përmes institucioneve të licencuara nga Banka Qendrore e Republikës së Kosovës që ofrojnë këtë shërbim”, thuhet në rregulloren e BQK-së.
Rregullorja e BQK-së u bë edhe temë politike, meqë nga Presidenti i Serbisë Aleksandar Vucici u interpretuar si ndalim i qarkullimit të dinarit dhe shkelje e parimeve të dialogut.
Mirëpo, zëvendëskryeministri Besnik Bislimi, në një reagim në facebook sqaroi se rregullorja nuk merret me ndalim të qarkullimit të dinarit, nuk e përmend dinarin fare dhe nuk merret me ndalim të valutave tjera. Sipas Bislimit, në rregullore vetëm precizohet se Euro është valutë e vetme dhe se Banka Qendrore e Kosovës është autoritet i pavarur bankar.
Përveç Prishtinës dhe Baogradit është prononcuar edhe Brukseli. Ndërmjetësuesi në dialog, Miroslav Lajçak, ka thënë tha se për këtë ka biseduar edhe me zëvendës kryeministrin Bislimi dhe shpreson në një zgjidhje pa pasoja negative.
Një vendim i tillë po konsiderohet i drejtë dhe i duhur nga ekonomistët.
Kosova ka pranuar Euron si valutë që nga fillimi i aplikimit të kësaj valute në Bashkimin Evropian, në vitin 2002.
