Category: Lajme

Përgatitjet e partive politike për zgjedhje të reja, kanë shtyrë që edhe qytetarët t’i kërkojnë ato. E disa prej tyre, të intervistuar nga Ekonomia Online, e shohin sërish fituese Lëvizjen Vetëvendosje.

Ata shprehen optimist në fitoren e Lëvizjes Vetëvendosje, që zyrtarisht pritet të mbahen vitin e ardhshëm.

Hamdi Gashi u shpreh i kënaqur me qeverisjen aktuale, ndërsa fituese e sheh sërish VV-në kurdo që mbahen zgjedhjet.

“Ma të mirë s’ka hala, jemi tepër të kënaqur, edhe nëse ka zgjedhje prapë do fitoj Albini”.

Mendim të ngjashëm ka edhe Nur Dino i cili kërkon që vendi të shkojë në zgjedhje për shkak “se nuk po funksionon asgjë”. Thotë se Qeveria i ka duart e lidhura.

“Sipas të gjithave gjasave, vendi duhet të shkoj në zgjedhje, nuk po funksionon kuvendi, nuk po funksionon asgjë, duhet të shkojmë në zgjedhje. Qeveria ka qenë e zënë, i ka pasur duart e lidhura, 20 vjet e kanë pasur pushtetit këta burokratët, e kanë lënë keq, s’ka mundur me bë diçka ky për tri vjet. Sipas mendimit tim nëse në shkojmë në zgjedhje, e para duhet të dal Lëvizja Vetëvendosje, e dyta duhet të jetë LDK-ja e të tjerat këto që janë bërë tash bashkë”, u shpreh ai.

Edhe Osman Rama, një qytetar tjetër, për Ekonomia Online tha se edhe nëse ka zgjedhje Kurti është fitues, ndërsa apelon te partitë tjera që të mos lodhen.

“Së pari 600 fabrika kanë qenë në Kosovë, mbi 40 vite përvojë e punë i merr vetëm 130 euro pension, çka me prit prej tyre, këta duhet të hiqen e të vinë të rinjtë, edhe me pas zgjedhje s’kanë tash çka me bë, se ato veçse janë hëngër tashmë, e nëse ka zgjedhje sipas meje vetëm Albin Kurti duhet të fitoj s’ka tjetër njëherë për njëherë, tjerët as mos u lodhni”, u shpreh ai.

Ndërsa për Ramadan Berishën nuk ka rëndësi se cila parti duhet të fitoj por që primare ka avancimin e shtetit.

“Po si çdo shtet që i ka rregullat e veta që duhet me iu përmbajt, njëjtë janë edhe zgjedhjet, partia e cila është më e drejta, e që bën avancimin e shtetit. Sipas meje nuk ka rëndësi cila është vetëm që ta kryej punën mire”.

Bashkimi Evropian i ka bërë thirrje Kosovës dhe Serbisë që të shmangin veprimet e pakoordinuara të cilat nuk janë në frymën e normalizimit të raporteve dhe, siç thanë nga blloku, mund të ndikojnë negativisht në situatën në terren.

Kjo thirrje u bë edhe lidhur me rastin e vendimit të Bankës Qendrore të Kosovës, e cila ka miratuar një rregullore për operacionet me para të gatshme. Kjo rregullore parasheh që pagesat të kryhen vetëm me valutën euro, vendim që nga Serbia është parë si ndalesë për pagesat me dinarë serbë.

Zëdhënësi i BE-së, Peter Stano, duke iu përgjigjur pyetjeve lidhur me këtë vendim të BQK-së, që do të hyjë në fuqi më 1 shkurt, tha se blloku evropian ende është duke e analizuar këtë çështje.

“Ne jemi ende duke e analizuar dhe duke kërkuar sqarime për këtë vendim, motivet dhe implikimet që ai mund t’i ketë… Kosova dhe Serbia duhet të shmangin veprimet e pakoordinuara që nuk shkojnë në frymën e normalizimit të raporteve dhe që mund të kenë ndikim negativ në situatën në terren”, tha Stano.

Ai përsëriti thirrjen për të dyja palët që edhe këtë çështje ta adresojnë në kuadër të dialogut për normalizimin e raporteve, që ndërmjetësohet nga BE-ja./Rel/

Kryeministri i vendi, Albin Kurti, në një panel të mbajtur gjatë Forumit Ekonomik Botëror në Davos të Zvicrës ka folur për, siç është shprehur ai, sukseset e Kosovës.

Në pamjet e publikuara nga kryeministri Kurti në llogarinë e tij në platformën X, shihet se pjesë e panelit ishte edhe kryediplomati britanik David Cameron, i cili para pak javësh vizitoi për herë të parë Kosovën.

Në mbishkrim, Kurti tha se të gjithë pjesëmarrësit panelit ishin entuziastë për përparimin e Kosovës.

“I nderuar të mbaj fjalën hyrëse në Forumin Botëror Ekonomik rreth Kosovës si një histori suksesi në një panel mbi financat ndërkombëtare të moderuar nga Sara Pantuliano, krahas David Cameron, Fettah Nadia, Songëe Vera… të gjithë të cilët ndajnë entuziazmin tonë për përparimin e Kosovës”, ka shkruar ai.

Lindja e një foshnje jo çdoherë po shoqërohet me ngrohtësi dhe dashuri, pasi ende ka prindër të cilët po ua kthejnë shpinën fëmijëve të tyre të vegjël. E fëmijëve të braktisur vazhdon t’i dal në ndihmë SOS Fshati i Fëmijëve të Kosovës, ku aktualisht jetojnë 37 fëmijë, të cilëve po u kushtohet kujdes e vëmendje e madhe.

Megjithatë, sfidat për ata fëmijë nisin kur mbushin 18 vjeç, pasi kjo mbështetje fillon të zbehet, derisa ata të rinj nisin të pavarësohen si nga kujdesi, ashtu edhe nga ana ekonomike.

SOS fshati mbetet mbështetja e vetme për fëmijët që u mungon kujdesi prindëror. Megjithatë, drejtuesit e këtij institucioni i përjetojnë rënd momentet kur nuk kanë vend për t’i strehuar fëmijët.

Udhëheqësi i kujdesit alternativ në SOS Fshatrat e fëmijëve të Kosovës, Besnik Peci thotë për KosovaPress, se në këtë fshat janë 37 fëmijë të vendosur në shtatë sos familje, në kuadër të këtij fshati, të cilëve iu ofrohen shërbime me qëllim që të mos e ndjejnë mungesën e familjes.

Këta fëmijë në Sos Fshat, aktualisht janë nën përkujdesjen e sos nënave dhe ekipit mbështetës.

“Në Sos Fshatin e Fëmijëve, aktualisht i kemi 37 fëmijë, të cilët janë të vendosur te 7 familje sos, të cilat ne i kemi ndërtuar për ata, si dhe i kemi 12 të rinj që janë pjesë e programit të gjysmë pavarësimit që vazhdojnë të jemi organizata e vetme që ofrojmë përkrahje për të rinjtë pa përkujdesje prindërore, të cilët i kanë mbushur moshën 17 vjeçar, do të thotë përkrahen tri vite përpiqemi me ndihmën e donatorëve, me ndihmën e njerëzve të vullnetit të mirë, që më u siguruar së paku standardin minimal të kushteve për jetës. Secili fëmijë e ka shtratin e vet, e ka dollapin e vet dhe tavolinën e vet, ku ai mëson dhe mandej pjesa tjetër e hapësirave të përbashkëta të shtëpisë, është si ne që i shfrytëzojmë shtëpia tona, ashtu edhe ata”, tha ai.

Peci derisa tregon se gjatë viti 2023, janë pranuar katër fëmijë në Sos fshat, thekson edhe vështirit që i kalojnë ata në rastet kur nuk ka vend për pranimin e fëmijëve të ri në fshat.

“Për Sos Fshatin e fëmijëve është kënaqësi jashtëzakonisht e madhe, emocionale dhe profesionale për të gjitha rastet që ne kemi hapësira për t’i pranuar dhe punojmë me adaptimin e tyre që ata të integrohen sa më shpejt që me stopuar procesin negativ të zhvillimit të tyre dhe thjesht të ndërtojnë dhe t’i zhvillojnë të gjitha sprovat që i nevojiten për jetë. Është shumë e vështirë rastet kur nuk kemi vend dhe kemi shumë kërkesa për me pranuar fëmijë dhe me keqardhje detyrohemi me i refuzuar. Në vitin 2023, i kemi pranuar katër fëmijë të rinj, mirëpo kemi pasur kërkesa më tutje, por për fat të keq për shkak të hapësirës të limituar s’kemi mbërri me i pranuar më fëmijë”, tha ai.

Peci tregon se për fëmijët e moshës katër deri në 18 vjeç, kujdesen 14 punonjës.

“Për fëmijët të cilët janë të shpërndarë në shtatë sos familjet, do të thotë përkujdesen 14 punonjës, të cilët ofrojnë kujdes bazik, janë sos nëna dhe sos tezja dhe kuadri mbështetës profesional, do të thotë është psikologu, pedagogu, punëtori social, edukatori dhe këshilltari për të rinj, të cilët përpiqen me intervenuar, me i identifikuar nevojat e fëmijëve dhe me punuar mbi ato nevoja që fëmijët me qenë të përmbushur dhe me i marrë shërbimet në kohë dhe mënyrë adekuate….. Kemi prej moshës 4 vjeçar deri në moshën 18 vjeçar”, tha Peci.

E vështirësi për fëmijët që jetojnë në sos fshatra, është kur ata mbushin 18 vjet.

“Gjatë gjithë kohës sa fëmijët sos qëndrojnë në Sos fshatrat e fëmijë të Kosovës, kuadri psikopatologjikë punon me ata që me i përgatit ata drejt jetesës së pavarur, kryesisht dhe më intensivisht prej moshës 16 vjeçare deri në moshën 18 vjeçare, do të thotë është puna më e dendur që bëhet me ta, me qëllim që ata me qenë të gatshëm për të vazhduar tutje. Kur i mbushin 18 vjeç, ne i mbështesim edhe tri vite, pasi që dalin nga organizata jonë, do të thotë fillimisht i mbështesim me 75 për qind nevojat e tyre jetësore, në vitin e dytë 50 për qind dhe në vitin e tretë, 25 për qind. Krejt kjo përkrahje financiare bije, mirëpo përkrahja psikologjike, përkrahja me këshilla dhe me orientimet në punë dhe në karrierë dhe motivim për punësim, vazhdojnë vazhdimisht deri sa i riu ta gjen veten dhe të jetë plotësisht i pavarur për jetën e tij”, tha ai.

Kryeministri i Kosovës, Albin Kurti së bashku me ministrin e Shëndetësisë, Arben Vitia, kanë shkuar në Qendrën Klinike Universitare (QKUK), për ta vizituar 23-vjeçaren, e cila u lëndua pas rënies së kulmit të objektit komunal në Prishtinë.

23 vjeçarja që ka pësuar lëndime nga rrëzimi i kulmit të ndërtesës së Komunës së Prishtinës, po vazhdon trajtimin në Mjekimin Intenziv Qendror (MIQ). Për gjendjen e saj, ka folur për Ekonomia Online shefi i MIQ-it, Shaqir Uka.

Ai ka deklaruar se mbrëmë 23 vjeçarja iu është nënshtruar një intervenimi kirurgjik për shkak të lëndimeve që ka pësuar. Si pasojë e lëndimeve, ajo ka pësuar gjakderdhje në indin trunor dhe trajtimin po e bën e fjetur me barna dhe e varur nga aparatura e frymëmarrjes.

Uka ka deklaruar se në orët në vazhdim do t’i bëhen ekzaminime shtesë për të bërë vlerësim definitiv.

“Pacientja për të cilën ju referoheni është një paciente 23 vjeçare, e cila ka marrë lëndime dje në orët e pasdites në afërsi të ndërtesës së Komunës së re. Është sjellë në Qendrën Emergjente fillimisht për shkak të lëndimeve që ka pësuar në regjionin e kokës dhe lëndimeve të tjera. Pas ekzaminimeve laboratorike dhe rëntgenologjike, pacientja është rivlerësua pas disa ore dhe për shkak të lëndimeve që ka pësuar është dashur që t’i nënshtrohet një intervenimi kirurgjik nga ana e ekipes së neurokirurgëve. Pas intervenimit kirurgjik, pacientja është sjellë për trajtim të mëtutjeshëm në Njësinë e Mjekimit Intenziv Qendror (MIQ), është sjellë pak minuta pas orës 23:00 dhe vazhdon të qëndrojë edhe më tutje e fjetur me barna e varur nga aparatura e frymëmarrjes dhe e mbuluar me terapinë standarde që bëhet për lëndimet e tilla”, ka deklaruar Uka.

Krahas lëndimeve në kokë e gjakderdhje në indin trunor, pacientja ka lëndime edhe pjesë torakale dhe në duar.

“Pacientja i ka lëndimet kryesisht në regjionin e kokës, gjakderdhje në regjionin e indidit trunor. Kjo ka qenë edhe arsyeja që është dashur me iu nënshtru intervenimit kirurgjik. Ka edhe lëndime të një unazës së pjesës së qafës dhe dy unazave të pjesës torakale, gjegjësisht pjesës së gjoksit. Ka edhe një lëndim të kockës së dorës së djathtë. Janë duke u kryer ekzaminimet shtesë, analizat laboratorike dhe pritet që në orët e ardhshme të bëhet vlerësimi definitiv, eventualisht për intervenime të tjera, nëse ka me pas nevojë”, u shpreh Uka.

Fëmijët në Gazë po vuajnë nga “kushtet e tmerrshme” dhe territori i përfshirë nga lufta vazhdon të jetë vendi më i rrezikshëm në botë për fëmijët. Kështu deklaroi zëvendësshefi i agjencisë për fëmijët i Kombeve të Bashkuara.

Ted Chaiban, pas përfundimit të vizitës treditore në Gazë, tha se që nga vizita e tij paraprake në këtë territor dy muaj më parë “situata ka shkuar nga katastrofike në buzë kolapsit”.

Nëse vazhdon ky trend i përkeqësimit të kushteve, “ne mund të shohim vdekje si pasojë e konfliktit pa dallim të shoqëruara me vdekje për shkak të sëmundjeve dhe urisë”, tha përmes një deklarate zëvendësshefi i UNICEF-it.

Chaiban tha se të martën ishte takuar me një vajzë 11-vjeçare, e quajtur Sama, në spitalin al-Nasser në Han Junis. Ajo po luante me miqtë e saj kur një copëz e predhës e goditi në stomak, duke bërë që ajo të humbte shpretkën. Tani, tha ai, sistemi i saj imunitar është komprometuar “në një zonë lufte të mbushur me sëmundje dhe infeksione”.

Dhjetë minuta më vonë, tha ai, u takua me Ibrahimin, 13 vjeç, i cili kishte qenë duke u strehuar në një zonë të cilësuar të sigurt, kur gjithçka kolapsoi. Dora e tij, që u lëndua rëndë, nuk u trajtua, dhe më pas plaga iu shndërrua në gangrenë dhe mjekët ia amputuan krahun.

“Disa orë pasi ne u larguam, shumë familje u larguan nga spitali al-Nasser, pasi luftimet u afruan më afër zonës”, tha Chaiban.

Lufta “ndaj fëmijëve” duhet të ndalojë, tha ai, duke përmendur shifrat e publikuara nga Ministria e Shëndetësisë në Gazën e udhëhequr nga Hamasi – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Kjo ministri ka raportuar për pothuajse 25.000 persona të vrarë që nga nisja e luftës më 7 tetor, duke thënë se 70 për qind e viktimave ishin gra dhe fëmijë.

Lufta mes Izraelit dhe Hamasit nisi pasi grupi radikal palestinez sulmoi jugun e Izraelit, duke vrarë 1.200 persona dhe duke rrëmbyer afër 250 të tjerë.

Koreja e Veriut ka testuar sistemin e tij të armëve nënujore bërthamore, në shenjë proteste ndaj stërvitjeve të përbashkëta ushtarake që këtë javë kanë mbajtur Shtetet e Bashkuara, Koreja e Jugut dhe Japonia, raportoi media shtetërore KCNA.

Testimi i sistemit “Haeil-5-23”, emrin që Koreja e Veriut ua ka vendosur dronëve sulmues nënujorë me kapacitete bërthamore, u krye nga një grup ekspertësh i Ministrisë së Mbrojtjes. Testimi u krye në ujërat afër bregdetit lindor verikorean, tha KCNA-ja, pa dhënë detaje se kur ndodhi kjo ngjarje.

Një zëdhënës i paidentifikuar i Ministrisë së Mbrojtjes akuzoi SHBA-në, Korenë e Jugut dhe Japoninë se po bëhen “të papërmbajtshme” me stërvitjet ushtarake, duke paralajmëruar për “pasoja katastrofike”.

Marinat e tri shteteve kanë mbajtur stërvitje të rregullta treditore, që përfunduan të mërkurën. Në stërvitje mori pjesë edhe aeroplanmbajtësja amerikane, Carl Vinson. Stërvitjet u mbajtën si pjesë e përpjekjeve për të përmirësuar përgjigjen e këtyre shteteve ndaj kërcënimeve bërthamore dhe raketore të Koresë së Veriut.

Testimi i armëve nënujore të Koresë së Veriut nuk ka mundur të verifikohet në mënyrë të pavarur.

Ministria e Mbrojtjes së Koresë së Jugut më 19 janar lëshoi një paralajmërim kundër testimeve të fundit të kryera nga Veriu, duke kërkuar ndërprerjen e menjëhershme të tyre.

“Ushtria jonë është e përgatitur plotësisht për provokimet e Koresë së Veriut nën një qëndrim të përbashkët të mbrojtjes me SHBA-në”, tha ministria përmes një deklarate, duke u zotuar për përgjigje “dërrmuese” nëse Koreja e Veriut bën një provokim të drejtpërdrejtë.

Ndërkaq, ministri i Jashtëm i Japonisë, Yoko Kamikawa, gjatë një konference për media u pyet për testimin e fundit të Veriut, por ai nuk pranoi të komentonte. Megjithatë, ai u zotua se do të vazhdojnë përpjekjet për të frenuar zhvillimin e armëve të Penianit.

I cilësuar si “Haeil”, që do të thotë cunami, sistemi i ri i dronëve fillimisht ishte raportuar se është testuar në mars të vitit 2023, dhe media shtetërore ka raportuar se ky sistem mund të kryejë sulme tinëzare në ujërat e armiqve dhe të shkatërrojë sulmet detare dhe operacionet e mëdha të nisura nga portet, duke krijuar një valë të madhe radioaktive përmes shpërthimeve nënujore./REL/

Gjermania pritet të premten ta miratojë ligjin që shkurton rrugën për marrjen e shtetësisë dhe e bënë më të lehtë mbajtjen e dy shtetësive, lëvizje kjo e dizajnuar për të lehtësuar mungesën e fuqisë punëtore duke e bërë vendin më tërheqës për punëtorët migrantë.

Pas dy vjetësh pune, shumë mosmarrëveshje e shtyrje, ligji i ri ka mundësi të kalojë në votim të premten në Bundestag.

Ligji thotë se personat që kanë qenë rezidentë në Gjermani për pesë vjet do të kenë të drejtën për pasaportë gjermane. Ata po ashtu do të mund ta mbajnë edhe shtetësinë e tyre, raportoi Reuters.

Por, në rastet kur qytetarët tregojnë arritje të larta në punën e tyre dhe flasin nivelin C1 të gjermanishtes, ata do të kenë të drejtë të aplikojnë për nënshtetësi pas tre vjetësh.

Zëvendëskryeministri dhe ministri i Jashtëm Italian, Antonio Tajani tha të premten se Italia do të ishte e gatshme të merrte pjesë në një mision paqeruajtës të OKB-së në Gaza nëse bashkësia ndërkombëtare do binte dakord për një të tillë.

“Më shumë se 1000 ushtarakë italianë që ndodhen në Liban janë atje për një mision të OKB-së”, tha Tajani për Radio24.

“Nëse nevojitet një mision paqeruajtës në Gaza, në një fazë kalimtare, ne jemi të gatshëm të dërgojmë personelin tonë ushtarak me OKB-në si paqeruajtës”, vazhdoi ai, duke shtuar se “nuk ka asnjë kërkesë amerikane për të zgjeruar misionin libanez në këtë drejtim” për momentin. /Ansa/