Category: Lajme

Ministri i Mbrojtjes i Gjermanisë, Boris Pistorius të premten paralajmëroi se presidenti rus Vladimir Putin mund të sulmojë një vend të NATO-s “brenda 5-8 vjetësh”.

“Ne dëgjojmë kërcënime nga Kremlini pothuajse çdo ditë … kështu që duhet të marrim parasysh se Vladimir Putin mund të sulmojë edhe një vend të NATO-s një ditë,” tha Pistorius në një intervistë për gazetën me seli në Berlin, Der Tagesspiegel.

Ndërsa një sulm rus nuk ka të ngjarë “për momentin”, ministri shtoi: “Ekspertët tanë presin një periudhë prej pesë deri në tetë vjet në të cilën kjo mund të jetë e mundur”.

Vërejtjet nga Pistorius përkojnë me paralajmërimet e ministrit suedez të Mbrojtjes Civile Carl-Oskar Bohlin, i cili tha se “lufta mund të vijë në Suedi”.

Pistorius tha për Der Tagesspiegel se paralajmërimet suedeze ishin “të kuptueshme nga një perspektivë skandinave”, duke shtuar se Suedia u përball me “një situatë edhe më serioze”, duke pasur parasysh afërsinë e saj me Rusinë.

Suedia gjithashtu nuk është ende anëtare e aleancës së NATO-s, në pritje të miratimit nga Turqia dhe Hungaria.

“Por ne gjithashtu duhet të mësojmë të jetojmë përsëri me rrezik dhe të përgatitemi – ushtarakisht, shoqërisht dhe në aspektin e mbrojtjes civile,” theksoi Pistorius.

Të martën, e përditshmja gjermane Bild raportoi se qeveria gjermane po përgatit një plan sekret për agresion të mundshëm rus ndaj NATO-s, duke thënë më tej se Ministria e Mbrojtjes po përgatitet për një luftë të mundshme gjithëpërfshirëse evropiane në të ardhmen e afërt.

Sipas Bild, i cili ka parë planet, “skenari i stërvitjes” i skicuar nga qeveria gjermane parashikon një grumbullim të ardhshëm të trupave ruse në Bjellorusi dhe enklavën Kaliningrad, territori më perëndimor i Rusisë, duke ushtruar presion mbi kufirin e Polonisë.

Në përgjigje të këtij kërcënimi në rritje, plani parashikon që NATO do të vendosë trupat e saj në Evropën Lindore, duke rritur tensionet në rajon. /AA

Çedomir Stojkoviq, avokati i politikanit opozitar serb, Nikolla Sandulloviq, i cili bëri homazhe të enjten në Kompleksin Memorial “Adem Jashari” në Prekaz, është ndaluar nga autoritetet e Serbisë në kufi për katër orë dhe më pas është liruar.

Ai ka shkruar në platformën ‘X’, se pas 4 orë mbajtje është lejuar të lëviz lirisht.

“Zyrtarët e BIA-s që folën me mua kishin një qasje profesionale. Ata bënin pyetje që i interesonin dhe u sollën me shumë edukatë. Nuk ndjeva asnjë armiqësi pavarësisht dallimeve natyrore që kemi. Paraburgimi im prej katër orësh (maksimumi ligjor) është rezultat i vendimeve të dikujt tjetër. Pa dyshim, ndoshta prokurori publik në Beograd mendon ndryshe. Të shohim kur të vijë”, shkroi ai në ‘X’.

OKB-ja tha të premten se më shumë se 350.000 njerëz në Republikën e Kongos kanë nevojë për ndihmë urgjente humanitare për shkak të reshjeve ekstreme në javët e fundit.

Duke e quajtur katastrofën e përmbytjeve në vend “të paprecedentë në shkallë për gjashtë dekada”, Jens Laerke, zëdhënës i Zyrës së OKB-së për Koordinimin e Çështjeve Humanitare (OCHA), tha në një konferencë në Gjenevë se nëntë nga 12 departamentet e vendit mbeten nën ujë rreth tre javë pasi u shpall një emergjencë më 29 dhjetor dhe gjithsej 1.8 milionë njerëz janë prekur.

“Më shumë se 350.000 njerëz kanë nevojë urgjente për ndihmë humanitare, por qasja është një sfidë për shkak të përmbytjeve dhe shumë fshatra mund të arrihen vetëm me varkë,” tha Laerke.

Ai theksoi se përmbytjet i kanë lënë komunitetet lokale pa strehim ose qasje në shërbimet shëndetësore parësore, duke shtuar se ka “qasje të kufizuar ose aspak” në ujë të pijshëm të pastër ose kanalizime në zonat më të prekura.

Rreth 27.000 fëmijë janë jashtë shkollës, tha ai.

Duke paralajmëruar se përmbytjet mund të kenë edhe pasoja afatgjata, ai tha: “Vlerësimet tona fillestare vlerësojnë se 2300 hektarë tokë të kultivuar janë përmbytur, gjë që ngre shqetësimin se do të thotë të prodhosh ushqim, për shembull pemë frutore dhe pajisje peshkimi, është shkatërruar dhe bagëtia është zhdukur”.

Laerke tha se për përgjigje të menjëhershme, agjencitë e OKB-së dhe qeveria e Republikës së Kongos mblodhën një buxhet total prej 26 milionë dollarësh, duke i dhënë përparësi strehimit, sigurisë ushqimore, ushqimit, shëndetit dhe ujit, kanalizimeve dhe higjienës.

“Për të mbështetur përgjigjen fillestare, është bërë një ndarje prej 3.6 milionë dollarë nga Fondi Qendror i Përgjigjes së Emergjencave për të adresuar nevojat më urgjente të 270,000 njerëzve,” tha Laerke. “Megjithatë, për të zbatuar përgjigjen, do të nevojiten më shumë fonde ndërkombëtare.” /AA

Shtetasit shqiptarë vijojnë të kryesojnë në raport me shtetasit e tjerë nga vendet e Ballkanit Perëndimor për numrin e lartë të kërkesave për azil në vendet e Bashkimit Evropian.

Sipas raportit më të fundit të Agjencisë Evropiane për Azilin, publikuar të premten, shqiptarët paraqitën vetëm gjatë muajit nëntor të vitit 2023 rreth 892 aplikime për azil në vendet e Bashkimit Evropian.

Shqiptarët pasohen nga shtetasit nga Maqedonia e Veriut, me 711 aplikime, shtetasit nga Serbia që kishin paraqitur 507 kërkesa, nga Kosova me 281 kërkesa, nga Bosnja me 127 dhe Mali i Zi 30.

Sipas raportit prirja e të gjithë shtetasve nga Ballkani është të kërkojnë azil në tre vende të BE: Francë, Gjermani dhe Itali. Shqiptarët kanë edhe numrin më të lartë të kërkesave për azil që mbeten në pritje në vendet e BE-së për t’u shqyrtuar.

Kështu sipas të dhënave të Agjencisë evropiane për Azilin, 3.278 shtetas shqiptarë janë në pritje të shqyrtimit të kërkesave për azil, ndërkohë që nga shtetasit nga Maqedonia e Veriut janë 2.146, Serbia 1.250, Kosova 966, Bosnjë e Hercegovina 540 dhe Mali i Zi 118 kërkesa.

Të gjitha kërkesat për azil nga vendet e Ballkanit Perëndimor të shqyrtuara në vendet e BE-së kanë një nivel tejet të ulët të pranimit.

Kështu, sipas raportit, shqiptarët kanë vetëm 0,55 % të kërkesave të shqyrtuara që janë pranuar ndërsa asnjë nga vendet ballkanike nuk e kalon 1% të kërkesave të pranuara për azil. Agjencia evropiane për Azilin tha se në nëntor vendet e BE-së morën 118 mijë kërkesa për azil.

Ndërsa për periudhën janar-nëntor 2023 aplikime për azil në vendet e Bashkimit Evropian shkuan në mbi 1 milionë, një nivel që kujton sipas Agjencisë evropiane për Azilin krizën e refugjatëve të viteve 2015-2016.

Në nëntor të vitit 2023 Gjermania ruajti pozicionin e saj si destinacioni kryesor për azilkërkuesit në vendet e BE-së, duke marrë gati një të tretën e gjithë kërkesave për azil që u paraqitën në vendet e BE-së.

Një kontingjent i Forcës së Sigurisë së Kosovës është nisur mbrëmë në Britaninë e Madhe, ku atje do të trajnojë ushtarët e Ukrainës.

FSK-ja do të bëhet pjesë e operacionit INTERFLEX, ndërsa Ambasada e Britanisë së Madhe sot ka përgëzuar FSK-në dhe Kosovën për solidaritet me Ukrainën që nga fillimi i luftës atje.

“Mbrëmë i uruam lamtumirën një kontingjenti të ushtarëve të FSK-së para se të fluturonin në Britani të Madhe për të mbështetur operacionin INTERFLEX. Kosova ka mbështetur dhe demonstruar solidaritet me Ukrainën dhe popullin ukrainas që nga fillimi i luftës”, thuhet në njoftim.

“Operacioni INTERFLEX zhvillohet në Mbretërinë e Bashkuar dhe ka për qëllim stërvitjen e trupave të ushtrisë ukrainase. Ministria e Mbrojtjes dhe FSK-ja kanë ofruar gatishmëri për angazhimin e instruktorëve për të ndihmuar në procesin stërvitor të Ushtrisë së Ukrainës në kuadër të këtij operacioni”, shkruan Ambasada.

Komisioni i Pavarur i Mediave (KPM), të premten ka mbajtur mbledhjen e parë për këtë vit. E në rend dite ishin ankesat e shumta të qytetarëve në lidhje me largimin e kanaleve të DigitAlb nga operatorët e shpërndarjes, raporton Ekonomia Online.

Që nga 1 janari e deri më 18 janar, KPM-ja i ka pranuar 340 ankesa për këtë çështje, ndërsa shumica e tyre janë kundër platformës Artmotion, me 221 ankesa, pasuar nga Kujtesa me 87. E shkak i shkeljeve të shumta, KPM-ja ka gjobitur katër operatorët me 100 mijë euro.

“Duke pasur parasysh gjithë ato ankesa qe kemi pranuar, ne kemi ardhur në përfundim se kemi shkelje të rregullores së KPM-së, nga Ipko, Kujtesa, Artmotion e Telkos. Ato kanë shkelur nenin 15-të. Gjitha këto dështime në implementim të rregulloreve tona paraqesin dëm të madh drejtuar qytetarëve. KPM-ja do veproj për sanksionimin duke ofruar gjobën maksimale e që është 100 mijë euro. Artmotion 64 mijë euro, Kujtesa 26 mijë euro, IPKO 7mijë dhe Telkos me 3 mijë euro”, u shpreh Mehmeti.

“Ka pasur ankesa rreth këtij rasti ku platformat televizive kanë ndryshuar kanalet dhe deri dje kanë ardhur 340 ankesa të qytetarëve dhe nga këto ankesa, 221 janë kundrejt platformës Artmortion, 87 për Kujtesën, 23 IPKO dhe 9 për Telkos”, deklaroi kryetari i KPM-së, Jeton Mehmeti.

Ai tha se natyra e ankesave është e njëjte, ballafaqim me reklamime mashtrues nga këta operatorë të cilët e kanë ditur se nga 1 janari nuk do i kenë shërbimet e DigitAlb.

Mehmeti tha se kontrata e fundit është bërë më 28 dhjetor pra vetëm tri ditë para se e drejta për shfrytëzim të Digilalb të skadojë.

Policia e Shtetit sot ka arrestuar në flagrancë shtetasin G. C., 27-vjeç, banues në Fier, pasi në lagjen “1 Maji”, gjatë kontrollit të ushtruar në automjetin me të cilin qarkullonte, iu gjetën doza kokaine të gatshme për shitje, të cilat u sekuestruan në cilësinë e provës materiale.

Arrestimi ka ndodhur pas hetimeve disaditore me metoda proaktive, si rezultat i kontrolleve të pandërprera në të gjithë territorin e qarkut, të kryera në kuadër të megaoperacionit policor “Tempulli”, njofton Policia e Shtetit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

Policia e Kosovës ka pranuar donacion vetura dhe pajisje teknologjike nga Ambasada Gjermane.

Drejtori i Përgjithshëm, Gazmend Hoxha, është shprehur mirënjohës ndaj ambasadës gjermane për përkrahjen e vazhdueshme ndaj Policisë së Kosovës, teksa ka thënë se dhurimi i këtyre donacioneve do të ndikojë pozitivisht në luftimin e të gjitha akteve kriminale.

Njëherit, pjesë e ceremonisë zyrtare ishte edhe ambasadori i Gjermanisë në Kosovës, Jorn Rohde si dhe menaxhmenti i lartë i PK-së.

“Me datën 19 janar 2024, përmes ceremonisë zyrtare ku morën pjesë drejtori i Përgjithshëm i Policisë së Kosovës kolonel Gazmend Hoxha, ambasadori i Gjermanisë në Kosovë z. Rohde si dhe menaxhmenti i lartë i PK-së, u nënshkrua pranim-dorëzimi i donacionit me vetura si dhe pajisje të teknologjisë për Policinë e Kosovës nga shteti gjerman, gjegjësisht Ambasada Gjermane në Kosovë. Drejtori i Përgjithshëm, kolonel Hoxha, ndër të tjera tha se Policia e Kosovës është mirënjohëse ndaj Ambasadës Gjermane për përkrahjen e vazhdueshme për Policinë e Kosovës në avancimin e mëtutjeshëm të kapaciteteve operacionale, logjistike dhe të teknologjisë. Përkrahja nga partneret tanë ndërkombëtarë do të ndikojë në mënyrë pozitive në luftimin e të gjitha akteve kriminale, do të ndihmojë drejtpërsëdrejti në kryerjen e aktiviteteve policore në terren si dhe do të rrisë efikasitetin e punës policore në shumë fushëveprime”, thuhet në komunikatën e Policisë.

Po ashtu, thuhet se Rohde ka theksuar se automjetet dhe pajisjet e dhuruara, janë pjesë e një bashkëpunimi, brenda të cilit Policia Federale Gjermane ndanë teknologjinë më moderne dhe taktikat hulumtuese, kështu duke e forcuar përkushtimin e Kosovës për të siguruar kufijtë e saj dhe për të kontribuar në sigurinë e të gjithë rajonit.

“Ambasada e Republikës së Gjermanisë si partnerë i përhershëm i Policisë së Kosovës gjatë dy viteve të fundit 2022 dhe 2023 ka përkrahur Policinë e Kosovës, më konkretisht Policinë Kufitare në ngritje të kapaciteteve operacionale dhe logjistike me 59 vetura, 5 kombi-bus dhe 10 motorë të terrenit, në fushën e teknologjisë informative me 130 kompjuter, 16 llaptop, laborator për pikën kufitare Hani i Elezit, projektorë, pajisje të ndryshme për kontrollimin e dokumenteve dhe skenimin e veturave gjatë kontrollit në kufi, dylbi, kamera termike, detektor për identifikim te njerëzve dhe pajisje tjera”, thuhet tutje në komunikatë.

Po ashtu, një kontribut të veçantë nga ambasada gjermane, policia kufitare ka pranuar në ngritjen edhe të kapaciteteve të burimeve njerëzore ku janë mbajtur 20 trajnime të ndryshme me pjesëmarrje të mbi 150 zyrtarëve policorë.

Policia e Kosovës shpreh mirënjohjen e saj për ambasadën e Gjermanisë, për përkrahjen dhe mbështetjen e vazhdueshme ndaj PK-së, e cila vazhdon të mbetet e përkushtuar në përmbushjen e vizionit dhe misionit të saj në shërbim ndaj vendit dhe qytetarëve pa dallim.

Presidentja e Kosovës, Vjosa Osmani, ka pritur sot në takim shefin e EULEX-it, Giovanni Pietro Barbano.

Sipas një komunikate nga presidenca, në takim u diskutua për zhvillimet e fundit të sigurisë dhe sundimit të ligjit.

Osmani dhe Barbano diskutuan edhe për bashkëpunimin ndërmjet institucioneve të Republikës së Kosovës dhe EULEX-it, brenda mandatit teknik të EULEX-it për monitorim, mentorim dhe këshillëdhënie.