Category: Lajme

Përgatiti: Pranvera Krasniqi

2023-shin e përmbylli me më së shumti pjesëmarrje në përurime punësh në Podujevë. Kryeministri Albin Kurti edhe vitin 2024 e nisi në Podujevë me të tilla pjesëmarrje.

Ai kishte marr pjesë në përurime të çerdheve, shkollave, e edhe në zgjerimin e më shumë se 30 kilometrave rrugë. Ndërkaq, Kurti e mohoi nëse kjo komunë ka qenë e favorizuar për shkaqe partiake.

“Sigurisht që jo është e vërtetë që Podujeva llapi në përgjithësi është shndërruar në një kantier ndërtimi, nuk është shtëpia e parë që po përurohet në Podujevë, do të ketë edhe të tjera, por ne i duam të gjitha komunat njësoj sepse e duam Republikën e Kosovës”, tha Kurti.

Por, njohësit e politikës, projektet në këtë komunë i konsiderojnë marketing nga niveli qendror.

“Nuk është që s’është tregu përjashtues, përderisa në komunat e tjera pjesëmarrja e tij është fare e vogël”, tha analisti politik, Bekim Kabashi.
Hakmarrje ndaj komunave që nuk e përkrahen në zgjedhjet lokale, Kabashi konsideron edhe ndarjen buxhetore.

“Komunat që i kanë kthyer shpinën në zgjedhjet lokale është tregues që nëse nuk më mbështetni mua s’mund të kaloni mirë”, tha Kabashi.

Kritik me qasjen e qeverisë Kurti për ndarjet buxhetore për komunat ka edhe Sokol Haliti, kryetar i komunës së Vitisë, e i cili vjen nga LDK-ja.

“Bashkëpunimi me nivelin qendror mbetet për t’u dëshiruar për shkak se ka mundur të bashkëpunojnë shumë më shumë. Ndarja buxhetore ka mujt me qenë më gjithëpërfshirëse për numër të banorëve edhe për komunën që përfaqësoj unë 4 euro për kokë banori vërtet ka qenë selektive”, tha Haliti.

Ndërkaq, vitin e kaluar Kurti kishte marrë pjesë edhe në përurime në Klinë, Shtime e Graqanicë, mirëpo numri i projekteve në këto komuna ishte më i vogël.

Më shumë detaje i gjeni në Edicionin Qendror të lajmeve në videon më poshtë:

Partia Socialdemokrate (PSD) ka zgjedhur organet e reja drejtuese dhe kryetarin edhe për një mandat.

Në Kuvendin zgjedhor të kësaj partie i mbajtur të dielën, Dardan Molliqaj është rizgjedhur në krye të PSD-së edhe për 4 vjet. Ai mori 123 vota për, 1 kundër dhe 4 abstenime.

“Kuvendi zgjedhor i Partisë Socialdemokrate i mbajtur sot, me 28.01.2024 zgjodhi organet drejtuese të partisë për katër vitet e ardhshme. Me shumicë votash, u zgodh Këshilli Drejtues i përbërë nga 101 anëtarë, Kryetari i partisë, Dardan Molliqaj me 123 vota pro, 1 votë kundër dhe 4 abstenime”.

“Gjithashtu u bën disa plotësime dhe ndryshime statusore”, thuhet në komunikatën e PSD-së.

Nga kjo parti kanë thënë se përballë pushtetit autoritar dhe popullit do të qëndrojnë në vlerat e tyre progresive.

“PSD angazhohet për liri, barazi, mirëqenie dhe qytetari aktive. Përballë pushtetit autoritar dhe populist, ne qëndrojmë të palëkundur në vlerat tona progresive. Ashtu siç jemi angazhuar deri më sot, edhe në të ardhmen PSD-ja do të jetë kundërshtare e pakompromis ndaj këtij pushteti”, thuhet tutje.

Talat Xhaferi është zgjedhur kryeministër i Qeverisë teknike të Maqedonisë së Veriut, duke u bërë shqiptari i parë që do të mbajë këtë post në këtë shtet.

Me këtë rast Xhaferin e ka uruar edhe kryeministri i Kosovës, Albin Kurti.

“Ish Kryetarit të Kuvendit të Maqedonisë së Veriut, z. Talat Xhaferi dëshiroj t’i uroj suksese për detyrën e tij të re, atë të kryeministrit në qeverinë teknike e cila pas tre muajsh do ta çojë në zgjedhje vendin tonë fqinj e partner. Miqësia dhe bashkërendimi për projekte të përbashkëta uroj të jenë shenjues të dy qeverive tona gjatë qeverisjes Xhaferi”, ka shkruar Kurti.

POSTIMI I PLOTË:

Ish Kryetarit të Kuvendit të Maqedonisë së Veriut, z. Talat Xhaferi dëshiroj t’i uroj suksese për detyrën e tij të re, atë të kryeministrit në qeverinë teknike e cila pas tre muajsh do ta çojë në zgjedhje vendin tonë fqinj e partner. Miqësia dhe bashkërendimi për projekte të përbashkëta uroj të jenë shenjues të dy qeverive tona gjatë qeverisjes Xhaferi.

Një Maqedoni e Veriut me orientim të fortë euroatlantik, partnere e Prishtinës dhe e perëndimit dhe sa më larg Moskës e fijeve të saj, një Maqedoni e Veriut që promovon vlerat e bashkëjetesës dhe lufton diskriminimin etnik, është ajo që dëshirojmë. Për këto synime e për plot bashkëpunime të tjera, jam i sigurt se do të vazhdojmë rrugën e bashkëpunimit ndërqeveritar edhe me homologun z.Xhaferi, ashtu siç ka ndodhur edhe me paraardhësin e tij, z. Kovaçevski, të cilin e përgëzoj për vlerat që reflektoi gjatë drejtimit të tij.

Kryetari i LDK’së, Lumir Abdixhiku, në emër të anëtarësisë së partisë, e ka uruar Talat Xhaferin pasi u zgjodh kryeministër i Maqedonisë së Veriut.

“Në emër të gjithë anëtarësisë së Lidhjes Demokratike të Kosovës, uroj z. Talat Xhaferin për arritjen historike në zgjedhjen si Kryeministër i Maqedonisë së Veriut.”

Abdixhiku ka shkruar se ky duhet të jetë inspirim për secilin shqiptar.

“Le të jetë ky një inspirim për secilin shqiptar tjetër në këtë Republikë, në vazhdimin e kësaj rruge, tashmë të shtruar me plot dinjitet dhe sakrificë. Shqiptarët, si popull autokton, janë jo vetëm faktor stabiliteti në Maqedoni të Veriut, por dhe prijës të denjë në gjithë rrugëtimin euroatlantik për secilën shoqëri. Talat Xhaferi është i tillë!”

Kryeparlamentari i Kosovës, Glauk Konjufca e ka uruar Talat Xhaferin që u zgjodh kryeministri i Maqedonisë së Veriut, duke u bërë shqiptari i parë që mbërrin deri në krye të shtetit.

Konjufca shkroi në Facebook se zgjedhja e Xhaferit “thye një barrierë të përceptimit për këdo”.

Ai tha se kjo erdhi si mundësi për integrimin e pashmangshëm të shqiptarëve.

“Talat Xhaferit ia uroj pozitën e re të Kryeministrit të Maqedonisë së Veriut, këtë arritje të rëndësishme për të gjithë shqiptarët. Deri dje ai udhëhoqi shkëlqyeshëm Kuvendin e këtij vendi mik. Kryeministri shqiptar, sado me kompetenca dhe kohë të limituar, thyen një barrierë të perceptimit për këdo”, shkroi Konjufca.

“Urojmë që kjo përgjegjësi e re t’iu shërbejë të gjithë qytetarëve pa dallim. Bërja e Z. Xhaferi kryeministër deri në realizimin e zgjedhjeve në Maqedoninë e Veriut vjen si mundësi që pjesëmarrja dhe integrimi i plotë i shqiptarëve të vlerësohet si synim i pashmangshëm, aq sa edhe përparimtar, prej të cilit përfiton më së miri vetë Maqedonia e Veriut”, shtoi ai.

“Urime z. Xhaferi dhe suksese në detyrën tuaj, duke shpresuar dhe besuar se kjo do t’i hap rrugën ndryshimeve të përparimit të vazhdueshëm politik!”, shkroi kryetari i Kuvendit të Kosovës.

Talat Xhaferi e ka mbajtur fjalimin e parë pas marrjes së detyrës si kryeministri i parë shqiptar në Maqedoninë e Veriut.

Xhaferi foli për përgjegjësinë para qytetarëve në udhëheqjen e qeverisë teknike.

“Gjithsesi që në këtë paraqitje të parë nuk kam më shumë më tepër të shtoj sesa ajo që thashë para deputetëve. Me krenari dhe ndërgjegje të pastër dhe përgjegjësi të plotë kam pranuar, kam përgatitur dhe kam fituar këtë besim të qytetarëve përmes përfaqësueseve të tyre në Kuvend. I mbetem koshient përgjegjësisë, transparencës dhe llogaridhënies para qytetarëve dhe atyre që kanë vendosur ardhmërinë e këtij vendi”, tha Xhaferi.

Ai iu tha qytetarëve të Maqedonisë së Veriut që të mos brengosen për fotografinë familjare në të cilën mungojnë disa deputetë të propozuar nga opozita. Gjatë shërbimit, ai tha se fotografia do të ndryshojë.