Category: Lajme

Elza Ujkani, vajza e cila u lëndua rëndë si pasojë e rënies së çatisë së objektit të Komunës së Prishtinës para rreth dy javësh, është në gjendje stabile shëndetësore.

Lajmin për këtë e dha deputeti i Listës Guxo, Haxhi Avdyli, i cili tha se nga dje ajo është transferuar në Klinikën e Neurokirurgjisë për trajtim të mëtutjeshëm, duke thënë se është e vetëdijshme, komunikative dhe e lëvizshme.

Shkrimi i plotë:

Lajme të mira për Elza Ujkani. Lajme të mira nga Neurokirurgjia

Ngjarja tragjike e shembjes së kulmit të Komunës së Prishtinë mbi të renë Elzen, e ka prek çdo qytetarë të Kosovës.

Pas qëndrimit në mjekim intenziv dhe pas operacionit gadi 4 orë për të evakuar e ndalur gjakderdhjen intrakraniale, Elza ia doli.

Nga dje ajo është transferuar në Klinikën e Neurokirurgjisë për trajtim të metutjeshëm.

Ajo është e vetëdijshme, komunikative , e lëvizshme me të gjitha ekstremitetet, përkundër që ka thyerje në para krah dhe ne vertebrën cervikale C7.

Falë punës dhe profesionalizmit të lartë të kolegëve të mi nga Neurokirurgjia Dr Faik Qosja si operator, e asistentëve të tij, dhe tërë kolegevë tjerë në krye me drejtorin dr Besnik Elshani të cilët po kujdesen që edhe këtë fazë postoperatore ta kaloj sa më lehtë.

Mos ta harrojmë punën madhe që kanë bërë anesteziologet në Kujdes intenziv për ta mbajtur në aparate reanimuese pas operimit , pastaj për ta zgjuar dhe rehabilituar pas zgjimit nga koma.

Tani Elza ka nevojë për qetësi dhe rehabilitim disa ditor deri në transferim në shtëpi.

Falenderojmë të gjithë miqtë, kolegët e tanë për interesimin e përditshëm nga Presidenca e Republikës së Kosovës Vjosa Osmani, Kryeministri Albin Kurti, ministri Arben Vitia, zv M Arsim Berisha, kolegut kirurgut Dr Mirsad Shkreta e të gjithë që janë interesuar që rasti i Elzës të përfundoi në mënyrën sa më të mirë.

Më 6 shkurt u bë një vit nga tërmeti shkatërrues në Turqi.

Në orët e para të mëngjesit, një dridhje toke me magnitudë prej 7.8 shkallësh e më pas disa goditje pasuese, lanë 53.537 viktima e 107.213 të lënduar, derisa dridhja kishte prekur edhe zonën siriane, ku ishin regjistruar mijëra të vdekur.

Epiqendër e tërmetit ishte zona Antakia, e ky ishte konsideruar tërmeti më i fuqishëm që nga viti 1939.

Dridhjet ishin dëgjuar edhe në disa shtete të tjera. Më pas ishin regjistruar mbi 30.000 pasgoditje përgjatë tre muajve të pasues, e ekspertët e Kombeve të Bashkuara vlerësuan se 1.5 milionë persona mbetën të pastrehë.

Autoritetet turke kishin regjistruar edhe shumë rrugë të dëmtuara e ndërprerje të linjave të komunikimit.

Për dridhjet patën reaguar edhe autoritetet e Kosovës, duke shprehur gatishmëri për ndihmë.

Një grabitje e armatosur ka ndodhur dje në rrugën “Agim Ramadani”, në Prishtinë.

Sipas policisë, rasti ka ndodhur në një pikë shitëse.

Rasti është duke u hetuar nga njësitet kompetente policore.

“ Rr. Agim Ramadani, Prishtinë/ 05.02.2024-16:43. Viktima mashkull kosovar, në një pikë shitëse ka raportuar se gjersa ai ishte në vendin e tij të punës, një i dyshuar duke e kanosur me armë i ka grabitur para nga arka dhe është larguar nga vendi i ngjarjes. Rasti është duke u hetuar nga njësitet kompetente policore”, thuhet në njoftim.

Deputetët e rinj të Kuvendit të Serbisë do të mblidhen këtë të martë në seancën konstituuese.

Në rend të ditës janë gjashtë pika, ndërkaq e para prej tyre është konfirmimi i mandatit të deputetëve të zgjedhur në zgjedhjet e jashtëzakonshme të 17 dhjetorit.

Më pastaj vijnë zgjedhja e kryetarit të kuvendit, zgjedhja nënkryetarit, emërimi i sekretarit të përgjithshëm, zgjedhja e trupave punuese dhe e anëtarëve të përhershëm të delegacioneve në institucione ndërkombëtare, raporton Euronews.rs.

Nga zgjedhjet e fundit në parlamentin serb kanë hyrë 10 lista zgjedhore, pesë prej të cilave janë nga minoritetet.

Në këtë seancë si deputet do të betohet edhe Shaip Kamberi, që do të jetë shqiptari i vetëm në kuvendin serb.

Policia e Kosovës njoftoi se dje është arrestuar një burrë në Prishtinë, nën dyshimin se ka kryer veprën penale “Dhunë në familje.

Siç njoftoi Policia, i dyshuari pas një mosmarrëveshje kishte sulmuar fizikisht bashkëshorten e tij.

Tutje, bëhet e ditur se viktima ka marrë trajtim mjekësor, ndërsa i dyshuari, me vendim të prokurorit është dërguar në mbajtje./atvlive.tv/

Policia e Kosovës për rajonin e Gjilanit gjatë kontrolleve në trafik, kanë hasur në dy kundërvajtës, njëri në zonën ku kufizimi i shpejtësisë së lejuar është 40 km/h duke vozitur me 127 km/h dhe tjetri në zonën ku kufizimi i shpejtësisë së lejuar është 50 km/h duke vozitur me shpejtësinë 133 km/h.

Sipas një njoftimi për media të dy kundërvajtësve veç e veç u janë shqiptuar gjoba në vlerë prej 300 euro, tri pikë negative dhe masën e përkohshme të ndalim vozitjes së mjeteve motorike në afat prej tre muaj.

“Drejtoria rajonale e Policisë në Gjilan, apelon vozitësit që të i respektojnë normat dhe ligjet e trafikut rrugor, po ashtu inkurajon mediat dhe qytetarët që për të gjitha kundërvajtjet që mund të shkaktohen në komunikacion të njoftojnë Stacionin më të afërm të Policisë, apo përmes aplikacionit digjital “Lajmëro Policinë’’, E-mail: [email protected] dhe numrat kundestarë:192; 0385045047001”, thuhet në njoftim.

Forcat izraelite kanë vrarë dhjetëra sulmues palestinezë dhe kanë ndaluar shumë të tjerë në operacionet e zhvilluara në 24 orët e fundit në Han Junis – qytetin që ndodhet në jug të Gazës, tha ushtria në një deklaratë të martën.

Qytetin jugor, ushtria e ka përshkruar si fokus të luftimeve, derisa ka bërë të ditur se ka ndaluar rreth 80 persona.

Sipas ushtrisë izraelite, në mesin e të ndaluarve ka persona të cilët akuzohen për pjesëmarrje në vrasjet dhe rrëmbimet e 7 tetorit në jug të Izraelit.

Më 7 tetor 2023 grupi palestinez Hamas, i shpallur organizatë terroriste nga Shtetet e Bashkuara dhe Bashkimi Evropian, ka sulmuar Izraelin duke vrarë 1.200 persona – shumë prej tyre civilë, dhe duke rrëmbyer rreth 250 të tjerë.

Si pasojë e ofensivës izraelite, në Rripin e Gazës janë vrarë mbi 27.000 persona, sipas Ministrisë së Shëndetësisë në Gazën e udhëhequr nga Hamasi. Kjo ministri, që nuk bën dallimin mes luftëtarëve dhe civilëve të vrarë, ka thënë se shumica e viktimave ishin gra dhe fëmijë.

Izraeli ka vazhduar ofensivën e tij në jug të Gazës edhe gjatë fundjavës, duke paralajmëruar se forcat tokësore mund të përparojnë drejt qytetit Rafah, si pjesë e fushatës së tyre për të zhdukur Hamasin.

Në përpjekje për të arritur një marrëveshje të re armëpushimi në luftën mes Izraelit dhe Hamasit, sekretari amerikan i Shtetit, Antony Blinken ka udhëtuar të hënën për në Lindjen e Mesme.

Ai pritet të vizitojë Arabinë Saudite, Izraelin, Egjiptin dhe Katarin gjatë turneut të tij të pestë në rajon, prej kur nisi lufta.

Një armëpushim ishte propozuar gjatë një takimi në janar, të mbajtur në Paris, mes zyrtarëve të lartë të SHBA-së, Izraelit, Egjiptit dhe Katarit.

Armëpushimi i propozuar parasheh një pauzë të luftimeve fillimisht për gjashtë javë që Hamasi të lirojë pengje në këmbim të të burgosurve palestinezë që mbahen nga Izraeli./REL/

Ministrja e Ekonomisë, Artane Rizvanolli ka thënë se bashkë me zëvendësministrat, Getoar Mjeku e Nenad Stanojević dhe deputeten Arjeta Fejza të hënën kanë vizituam ndërmarrjen e Trepçës dhe Minierën e Stan Tërgut.

Ajo ka thënë se ishte përjetim i veçantë të flasim me ta për së afërmi e të përjetosh ambientin e vështirë të punës që për minatorët është përditshmëri, por ishte edhe frymëzuese të shohim vullnetin dhe zellin e tyre për punë.

“Në Horizontin X takuam Fisnikun, Naserin e kolegët e tyre që punonin në nxjerrje të mineralit e mirëmbajtje të makinave të stërvjetruara. Ishte përjetim i veçantë të flasim me ta për së afërmi e të përjetojmë ambientin e vështirë të punës që për minatorët është përditshmëri, por ishte edhe frymëzuese të shohim vullnetin dhe zellin e tyre për punë”.

Tutje ajo ka thënë se së bashku me Kryesuesen e Bordit të Ndërmarrjes, Rrezarta Pllana, Kryeshefin Ekzekutiv, Bashkim Kurti dhe Drejtorin e Njësisë, Shyqri Sadiku i siguruan ata që në investmet e planifikuara në Trepçë, pajisjet e mjetet e punës, sigurisë e mbrojtjes për minatorët do të jenë prioritet.

“Përkundër sfidave, Trepça ka nevojë që të gjithë të punojmë të unifikuar për të mirën e ndërmarrjes për ta sjellë Trepçën aty ku e meriton, si bosht i zhvillimit ekonomik e shoqëror të Mitrovicës dhe tërë atij rajoni. Bordin dhe të gjithë ata që kontribuan në këtë periudhë të vështirë për ndërmarrjen i falënderova, e menaxhmentit të ri u urova sukses”, ka shkruar ministrja.

Para 25 viteve, më 6 shkurt të vitit 1999 i filloi punimet Konferenca e Rambujesë. Ky takim, i cili u mbajt në afërsi të Parisit të Francës, synoi zgjidhjen e krizës në Kosovë.

Iniciues të konferencës, që zgjati deri më 23 shkurt ishte Grupi i Kontaktit, ndërsa ndërmjetës ishin Christopher Hill nga SHBA-të, Boris Maiorsky, Rusi dhe Wolfgang Petritsch nga BE.

Delegacioni i Kosovës kishte pranuar parimisht propozim-marrëveshjen për zgjidhjen e krizës në Kosovë, të cilën e kishte propozuar Grupi i Kontaktit. Delegacioni serb, sado që parimisht pranoi këtë propozim-marrëveshje, mbrojti qëndrimin që trupave të NATO-s të mos u lejohet kalimi nëpër Serbi dhe forcat ndërkombëtare në Kosovë të jenë në kuadër të Kombeve të Bashkuara.

Edhe rrethi i dytë i bisedime që filloi më 15 mars në Paris përfundoi pa sukses. Delegacioni kosovar dhe ai serb kishin nënshkruar më 18 mars marrëveshje të ndryshme. Delegacioni i Kosovës kishte nënshkruar marrëveshjen e ofruar nga bashkëbiseduesit ndërkombëtarë, ndërkohë që delegacioni serb kishte nënshkruar projektmarrëveshjen politike – marrëveshjen për vetëqeverisjen në Kosovë.

As tentimi i fundit, më 22 mars 1999 i të dërguarit special të SHBA-ve, Richard Holbrooke nuk ishte i suksesshëm. Ai nuk ia doli ta bind presidentin e atëhershëm të RSFJ, Sllobodan Millosheviq që të pranojë marrëveshjen për Kosovën dhe vendosjen e trupave ndërkombëtare.

Më 24 mars 1999, NATO filloi bombardimin e trupave ushtarake dhe paramilitare të Serbisë. Bombardimet përfunduan më 6 qershor 1999 me nënshkrimin e Marrëveshjes së Kumanovës që parashihte tërheqjen e trupave jugosllave nga Kosova dhe vendosjen e trupave paqësore ndërkombëtare.

Më pas, Këshilli i Sigurimit i OKB-së miratoi rezolutën 1244 me të cilën u vendos protektorati, prania ndërkombëtare në Kosovës, UNMIK-ut si mision civil dhe KFOR-it, mision ushtarak.

Ndërkaq, më 17 shkurt 2008, Kosova shpalli pavarësinë.