Policia e Kosovës ka njoftuar se ka arrestuar një person nën dyshimin se ka sulmuar fizikisht bashkëshorten e tij në Prishtinë.
Në raportin 24-orësh bëhet e ditur se viktima e shqetësuar ka tentuar të bëjë vetëvrasje, duke përdorur preparate higjienike.
Viktima është dërguar për tretman mjekësor në QKUK, ndërsa me vendim të prokurorit, i dyshuari është dërguar në mbajtje.
Presidentja e Kosovës Vjosa Osmani, e ka pritur dje në takim ambasadorin e Gjermanisë Jorn Rohde.
Temë e diskutimit në këtë takim ishte edhe rregullorja e Bankës Qendrore të Kosovës, e cila hyri në fuqi më 1 shkurt dhe që e njeh Euron, si valutën e vetme me të cilën mund të bëhet pagesë, për hapat e institucioneve përkatëse ndërlidhur me planin e tranzicionit, për zbatimin e kësaj rregulloreje.
Postimi i plotë:
Presidentja Vjosa Osmani priti në takim ambasadorin e Gjermanisë
Presidentja e Republikës së Kosovës, Vjosa Osmani, ka pritur sot në takim ambasadorin e Gjermanisë, Jörn Rohde.
Në takim u diskutua për raportet bilaterale dhe partneritetin e dalluar në aspektin e bashkëpunimit zhvillimor. Tutje, ata kanë diskutuar edhe për vizitën produktive dhe të rëndësishme të Ministrit të mbrojtjes të Gjermanisë në Kosovë, me ç’rast u konfirmua përkushtimi i përbashkët për thellim të metejmë të raporteve bilaterale.
Me këtë rast, Presidentja Osmani dhe ambasadori Rohde diskutuan edhe për zhvillimet e fundit në vend, për përgatitjet për shënimin e 16 vjetorit të pavarësisë si dhe për hapat e institucioneve përkatëse ndërlidhur me planin e tranzicionit për zbatimin e rregullores së fundit të BQK-së.
Është rritur në 68 numri i të vdekurve si pasojë e rrëshqitjes së dheut në një fshat në jug të Filipineve para rreth një jave, njoftuan zyrtarët filipinas të hënën.
Zyrtarët thonë se edhe 51 njerëz të tjerë janë ende të zhdukur pas fatkeqësisë së 6 shkurtit në provincën Davao de Oro, por ekipet e shpëtimit e kanë pranuar se ka pak shpresa për të gjetur të mbijetuar të tjerë.
Personi i fundit që u nxor i gjallë nga balta ishte një vajzë trivjeçare.
Shpëtimi i saj – pas më shumë se 60 orëve të kaluara nën dhe – u cilësua si mrekulli.
Edward Macapili, një zyrtar provinca Davao de Oro, kishte thënë se shpëtimi i saj u kishte dhënë shpresë ekipeve të shpëtimit.
Por, të hënën, ato shpresa u duke se u shuan.
“U bë një javë pas incidentit dhe… ne mendojmë se askush nuk ka mbetur i gjallë atje”, tha Macapili për agjencinë e lajmeve AFP.
Rrëshqitja e dheut ndodhi të martën e kaluar në mbrëmje, dhe i shkatërroi 55 shtëpi, si dhe i ngufati tre autobusë dhe një minibus, të cilët po prisnin për t’i marrë punëtorët nga një minierë ari në këtë fshat.
Rrëshqitjet e dheut janë të shpeshta në shumicën e pjesëve të Filipineve, për shkak të terrenit malor, shirave të mëdha dhe shpyllëzimit të madh.
Shirat e mëdha sezonale kanë shkaktuar rrëshqitje dheu dhe vërshime në Mindanao, duke i detyruar dhjetëra mijëra njerëz të zhvendosen në strehimore emergjente.
Kjo zonë është goditur edhe nga një sërë tërmetesh, përfshirë të shtunën e kaluar kur ekipet e shpëtimit u detyruan ta ndërprisnin punën për shkak të një tërmeti 5.9 ballësh./REL/
Deputeti i Partisë Demokratike të Kosovës (PDK), Hisen Berisha, ka thënë se televizioni publik po i shërben Qeverisë, ndërsa tentim atentatin ndaj kryeministrit Albin Kurti, e sheh si viktimizim para elektoratit të tij në “luftën kundër Serbisë”.
Duke folur për raportimet për tentim atentatin ndaj kryeministrit Albin Kurti, deputeti i PDK-së, ka thënë se do të propozojë formimin e një komisioni hetimor lidhur me këto pretendime.
Këtë çështje, Berisha e sheh si mundësi për të krijuar një luftë brenda shqiptarëve në Maqedoni të Veriut, ndërsa e sheh edhe si tendencë për ta mbuluar dështimin në mbledhjen e Këshillit të Sigurimit në OKB.
“Këto janë terma shumë shqetësuese, unë mendoj se këtë temë këtë frymë siç e ka prezantuar kryeministri ne duhet ta ngrisim një komision hetimorë brenda parlamentar. Së pari do ta ngrisë në këtë komision ku ishim edhe pse nuk arritëm për shkak të përplasjeve por do ta ngrisë unë në parlament që të ketë një komision që e heton këtë pretendimet e kryeministrit, kjo është shumë e rrezikshme, e tashti nëse nga kompleksi i pozicionit të vet në raport me Serbinë dhe Vucicin në tavolinë, skenarëve që kanë krijuar për të destabilizuar Kosovën”, ka thënë Berisha për EO.
“Dëmet që i bëri Kosovës me takimin në Këshillin e Sigurimit të OKB-së, me një vendim të panevojshëm sepse çështja është rregulluar me ligj dhe me Kushtetutë. Nga ky kompleks mundohet me kriju armiq të brendshëm, atëherë kjo është shumë shqetësuese, vetitë e propagandës armiqve të brendshëm janë vetitë e diktatorëve, autokratëve dhe regjimeve komuniste dhe bashkësitë, kështu e kemi pasur regjimin e Enver Hoxhës”, u shpreh Berisha.
Teksa ka folur për këtë çështje, Berisha ka thënë se tentimi për atentat do ta ndryshonte komplet agjendën e kryeministrit. Këtë, Berisha e sheh edhe si viktimizim para elektoratit të tij në “luftën kundër Serbisë”.
“Nëse ka pasur edhe sikur të kishte pas (tentim për atentat) shërbimi inteligjent e kishte kap me kohë. Ai nuk e bënë publike fare media, e lëviz agjendën e kryeministrit komplet, unë e njoh natyrën e funksionimit të shteteve e lëviz komplet agjendën shtetërore të kryeministrit e shmang mundësin duke mos e ndalur hetimin dhe kapjen e atyre që kanë pretenduar diçka të tillë. Prandaj kjo është thjeshtë një lloj strategjie e viktimizimit dhe me dëshmu para elektoratit të vet, ‘shihe sa patriot jam unë, çka po i bëjë unë Serbisë sa që po dojnë edhe mem vra’, duke involvuar edhe një konflikt brenda shqiptarëve, kjo është një strategji shumë e rrezikshme”, deklaroi Berisha.
Ndërkohë, Ministria e Punëve të Brendshme e Maqedonisë së Veriut ka mohuar se ka pasur tentim atentati ndaj kryeministrit të Kosovës, Albin Kurti, sa ka qenë në vizitë në Shkup.
Kurti ka thënë të shtunën se ka parë forca të shumta policore në Shkup gjatë mbledhjes që pati me partitë socialiste. Ai katheksuar se ka shumë kërcënime nga individë e struktura që rrënjët i kanë në Beograd.
Por, Ministria e Brendshme e Maqedonisë së Veriut e ka quajtur të pavërtetë lajmin se ka pasur tentim për atentat.
“Ju njoftojmë se gjatë vizitës së Kryeministrit të Republikës së Kosovës, Albin Kurti, në Shkup, nuk ka pasur asnjë tentim për vrasjen e tij. Sa i përket sigurisë gjatë vizitës së kryeministrit Kurti, ajo është e organizuar sipas rregullave të paracaktuara dhe vlerësimeve të sigurisë”, deklaroi Ministria e Punëve të Brendshme në një deklarim për media.
Ishte Radiotelevizioni Publik i Kosovës që fillimisht raportoi sipas burimeve se ka pasur tentativë kundër kryeministrit të Kosovës.
Ministri i Financave, Punës dhe Transfereve, Hekuran Murati sot raporton para Komisionit për Shëndetësi dhe Mirëqenie Sociale.
Në këtë komision, temë diskutimi do të jetë strategjia legjislative lidhur me skemat sociale dhe pensionale për vitin 2024.
Në këtë takim do të diskutohet edhe për planet dhe prioritetet për fushën e skemave sociale dhe pensionale për vitin 2024.
Takimi nis në orën 11:00, në Kuvendin e Kosovës.
Data 13 shkurt shënon Ditën Ndërkombëtare të Radios. UNESCO e ka shpallur këtë festë për të promovuar radion si mediumin dhe të gjitha mundësitë që ajo ofron.
13 shkurti është zgjedhur pasi në këtë datë, në vitin 1946, Radio e Kombeve të Bashkuara ka emetuar programin e parë.
Ish-sekretari i përgjithshëm i OKB-së, Ban Ki-moon në fjalët e tij për radion ka pohuar se radioja luan një mision të mirëfilltë në argëtim, edukim, informim, si dhe ndihmon në popullarizimin e ndryshimeve demokratike në gjithë globin.
Radioja është një media e fuqishme e cila ka përballuar me sukses edhe ndryshimet që solli epoka e dixhitalizimit.
Ajo është një media me kosto të ulët, e përshtatur për të arritur edhe në komunitetet më të largëta dhe njerëzit në nevojë. Për 13 shkurtin e 2023, UNESCO thotë se duhet të vërë në pah radiot e pavarura si shtylla që parandalojnë konfliktet dhe që ndërtojnë paqen.
Narrativa e një medieje si radioja, mund të shtojë tensionet ose të kontribuojë për paqe. Gjatë raportimit dhe informimit të publikut, një radio mund të formësojë opinionin publik dhe të kornizojë narrativën duke influencuar situatat dhe vendimmarrjen.
Kështu që rritja e standardeve gazetareske të radios duhet konsideruar si investim për paqen, thotë UNESCO.
Përgatiti: Pranvera Krasniqi
Gjatë kësaj jave, Kuvendi i Kosovës do të mbajë tri seanca plenare.
Fillimisht, deputetët do të mblidhen të mërkurën për të shqyrtuar një varg pikash të mbetura nga seancat e kaluara.
Ndërkaq marrëveshjet ndërkombëtare, të cilat nuk u votuan javën e kaluar në mungesë kuorumi si dhe plotësim-ndryshimet kushtetuese për procesin e vetingut do të shqyrtohen në seanca të ndara ditën e enjte.
“Nga mbledhja e rregullt e Kryesisë me GP u dakorduam qe për këtë jave Kuvendi të mbaj 3 seanca plenare. E para është të mërkurën e cila do të vazhdojmë me seancën e papërfunduar”, tha shefja e grupit parlamentar të LVV-së, Mimoza Kusari-Lila.
Në këtë seancë, PDK-ja ka paralajmëruar se do të iniciojë themelimin e komisionit hetimor parlamentar për kontratat njëburimore dhe për tekstet shkollore.
“Ajo që ishte me e habitur ishte refuzimi për votimin e Komisionit për hetimin në lidhje me humbjen e mostrave të rastit Dehari. Është një rast që është keqpërdorur shumë nga VV-ja. I bëj thirrje kësaj mazhorance që të votoj një Komision të tillë. Kërkoj që të mos refuzohet sepse ne do ta përsërisim një gjë të tillë. Do t’i iniciojmë edhe dy Komisione hetimore tjera”, tha shefi i grupit parlamentar të PDK-së, Abelard Tahiri.
Në anën tjetër, shefi i Grupit Parlamentar të AAK-së, Besnik Tahiri, vuri në pah nevojën për miratimin e disa ligjeve.
“Kemi mbledhur nënshkrimet për thirrjen e një seance të jashtëzakonshme për ligjin e Sigurimeve Shëndetësore. Mos e bë Zot me iu sëmurë dikujt prindi apo fëmija, krejt kursimet duhet me i shkri, me hy në borxh për shërimin. Paga në sektorin publik”, tha Tahiri.
Ndërkaq, të shtunën është paraparë të mbahet seancë solemne për nder të 16-vjetorit të Pavarësisë së Kosovës.
Përgatiti: Kastriot Tahiri
Uji që u përdor për të fikur zjarrin, që përfshiu mbrëmjen e së dielës një pjesë të kësaj ndërtese 7 kateshe në Ferizaj, ka mbetur ende në korridorin e ndërtesës.
Si pasoj e flakës dhe tymit 10 persona kanë kërkuar ndihmë mjekësore në qendrën kryesore të mjekësisë familjare, ndërsa 6 prej tyre u dërguan për trajtim të mëtutjeshëm në Qendrën Klinike Universitare të Kosovës.
“Në nivelin terciar janë pranuar 6 të lënduar, katër prej tyre janë liruar për në shtëpi ndërsa, dy të tjerë po vazhdojnë të marrin tretman mjekësore dhe u janë nënshtruar disa analizave laboratorike në klinikën e Biokimisë. Gjendja e tyre është jashtë rrezikut për jetë”, tha drejtori i Klinikës Emergjente, Naser Syla.
Policia që së bashku me ekipet emergjente dolën menjëherë në vend të ngjarjes, janë duke hetuar shkaktarët e zjarrit.
“Policia rajonale e Ferizajt, njësitet e hetimit po punojnë që të zbardh rastin”, tha zëdhënësi i Policisë Rajonale të Ferizajt, Kanun Veseli.
Nga zjarri, dëme pati edhe në lokalet e gastronomisë. Madje disa prej tyre, këtë të hënë nuk patën mundësi të punojnë fare.
“Kam qenë pak në vend të ngjarjes por nga fundi, e kam qel lokalin kish pas tym të madh, deri në 2-3 të mëngjesit kom qëndrua këtu. Sot kur erdha sërish rrymë s’ka tym është ende. Dëmet nuk po mundemi me i ditë se cilat janë sepse nuk po e di pa pas rrymë”, tha Bedri Bushi, pronar.
Bushi, e pronarët e tjerë të gastronomisë janë të shqetësuar se problemet me energji elektrike do të zgjasin, si rrjedhojë kërkojnë nga organet kompetente që sa më parë t’iu bëhet një zgjidhje.
Përgatiti: Nora Luta
Duke e paraqitur pronën e komunës së Istogut në sipërfaqe prej 22 ha, dhe kooperativës së Dubravës prej 20 ha, si pronë në emër të Eduard Musollaj, Gjon Musolli kishte përfituar subvencione në vlerë prej 12 mijë e 600 euro.
Se nuk përputhet gjendja faktike me të dhënat në aplikim e kishin gjetur gjatë inspektimit dy zyrtarët ,Bajram Gashi dhe Musa Nivokazi, por që të dy sipas Prokurorisë Speciale e kishin hartuar rrejshëm raportin në tetor të vitit 2020.
Gashi e Nivokazi nuk e kanë pranuar fajësinë mbi këto akuza, ndryshe nga Gjon Musolli, i cili sipas Prokurorisë, i shkaktoi dëm buxhetit të shtetit afër 26 mijë euro.
Në shqyrtimin fillestar që u mbajt në Gjykatën Themelore të Prishtinës, Musolli tha se ka qenë i shtyrë të kryejë veprën penale.
Fajësinë e pranoi edhe fermeri Halit Berisha, i cili kërkoi sqarim nga PSRK-ja rreth precizimit të dëmit të shkaktuar.
Përveç Berishës e Musollit, fajësinë në janar të këtij viti, e kishte pranuar edhe Bajram Gashi, me të cilin PSRK-ja kishte arritur marrëveshje, por e njëjta u refuzua nga Gjykata.
Prokuroria Speciale i akuzon edhe tetë persona të tjerë, zyrtarë të Agjencisë për Zhvillimin e Bujqësisë, por që të gjithë të hënën e mohuan fajësinë, përfshirë edhe Bajram Gashin.
Sipas aktakuzës veprat penale janë kryer gjatë periudhës gusht të vitit 2020 deri më 24 shkurt të 2021-s.
Kjo është aktakuza e katërt e PSRK-së rreth mashtrimeve me subvencione.
Përgatiti: Nora Luta
25 vjet burgim unik i ka shqiptuar Gjykata Themelore e Prishtinës, Ragip Gashit për vrasjen e bashkëshortes së tij M.G.
Gashin, Gjykata e ka gjetur fajtor për vrasje të rëndë, e cila kishte ndodhur në vitin 2016 në lagjen “Mati 1”, të Prishtinës. Për këtë pikë të aktakuzës, Gjykata e dënoi Gashin me 24 vjet burgim. Ndërsa për armëmbajtje pa leje, me dy vjet.
Sipas kryetares së trupit gjykues Fatime Dermaku, gjykata në këtë rast, e ka shqyrtuar edhe shqiptimin e dënimit me burgim të përjetshëm.
Ragip Gashi, sipas aktakuzës së Prokurorisë Themelore të Prishtinës më 21 dhjetor 2016 në Prishtinë, në lagjen “Mati 1”, i nxitur nga motivet e ulëta të xhelozisë, në mënyrë dinake e privon nga jeta gruan e tij, M.G.
Ai që nga ajo kohë ndodhet në paraburgim, dhe të hënën nuk u soll në Gjykatë për ta dëgjuar vendimin.
Sipas aktit akuzues, në ditën kritike, Gashi i kishte thënë të ndjerës se do ta priste në rrugë, pasi i kishte thënë fillimisht se do të shkonte për ta marrë në shtëpinë e disa familjarëve ku ishte për vizitë.
Sipas aktakuzës vëllai i saj i e kishte përcjellë, por papritmas atyre iu kishte dalë në pritë Gashi me revole në dorë, i cili me dashje që ta privojë nga jeta, kishte shtënë në drejtim të viktimës M.G.