Policia ka njoftuar se një mashkull në Prishtinë është dërguar pas shenja jete në QKUK.
Sipas tyre, vdekjen e viktimës e kanë konstatuar mjekët, ndërsa nuk dihen rrethanat e vdekjes.
“Viktima mashkull kosovar është sjellë në QKUK pa shenja jete. Vdekjen e viktimës e ka konstatuar ekipi mjekësor, ndërsa nuk dihen rrethanat e vdekjes. Lidhur me rastin është informuar edhe prokurori, ndërsa njësitet policore janë duke hetuar rastin”, thuhet në njoftimin e Policisë.
Presidenti i Shteteve të Bashkuara, Joe Biden, ka thënë të martën se deklaratat e ish-presidentit Donald Trump, që e vunë në dyshim përkushtimin amerikan për t’i mbrojtur nga sulmet aleatët e vet në NATO, janë “joamerikane” dhe “të rrezikshme”.
Trump tha të shtunën se dikur kishte paralajmëruar se do ta lejonte Rusinë të bëjë çfarë të dojë me vendet anëtare të NATO-s të cilat nuk e përmbushin zotimin për t’i shpenzuar 2 për qind të bruto produktit të brendshëm për mbrojtjen.
Duke folur në Shtëpinë e Bardhë të martën, Bideni tha se komentet e Trumpit – i cili i prin garës së republikanëve për t’u nominuar për president në zgjedhjet e nëntorit në SHBA – ishin “tronditëse” po ashtu.
“E tërë bota e dëgjoi këtë dhe më e keqja është se ai e ka me gjithë mend”, tha Biden.
Bideni tha se “kur Amerika e jep fjalën, kjo është diçka e rëndësishme”, si dhe tha komentet e Trumpit që e vunë në dyshim përkushtimin e SHBA-së janë “joamerikane”.
“Ai nuk e kupton se përkushtimi i shenjtë që e kemi bërë, është edhe në dobinë tonë”, tha Biden.
Çfarë tha Trumpi për NATO-n?
Si president amerikan nga viti 2017 deri më 2021, Trumpi shpesh i kritikonte NATO-n dhe anëtarët e saj si, Gjermaninë, duke i akuzuar se nuk po paguanin mjaftueshëm për mbrojtjen e vet dhe se po mbështeteshin në Uashingtonin për t’i mbrojtur.
Ai e vuri në dyshim haptazi parimin e mbrojtjes së përbashkët.
Edhe administratat e tjera amerikane i kanë akuzuar evropianët për shpenzime të pamjaftueshme në mbrojtje, por me ton më të butë.
Kritikat e Trumpit arritën në një shkallë tjetër gjatë një fushate zgjedhore të shtunën në Karolinën e Jugut, kur ai kujtoi, siç tha, një bisedë me “një president të një vendi të madh”.
“Epo, zotëri, nëse ne nuk paguajmë dhe na sulmon Rusia – a do të na mbroni ju?” Trumpi e citoi liderin anonim të ketë thënë.
“Unë i thashë: ‘Ju nuk keni paguar? Ju jeni fajtor?’ Ndërsa, ai më tha: ‘Po, të themi se ndodhi ajo.’ Jo, unë nuk do t’ju mbroja juve. Në fakt, unë do t’i nxisja ata [Rusinë] të bëjnë çfarë dreqin duan. Ju duhet të paguani”, tha Trump.
Sipas vlerësimeve të NATO-s nga korriku i vitit të kaluar, 11 vende anëtare pritej ta arrinin synimin e 2 përqindëshit më 2023. Ato ishin: Polonia, Shtetet e Bashkuara, Greqia, Estonia, Lituania, Finlanda, Rumania, Hungaria, Letonia, Britani e Madhe dhe Sllovakia.
Gjermania, e cila ka ndër ekonomitë më të mira në Evropë, shpenzoi rreth 1.75 për qind të GDP-së për mbrojtjen. Por, zyrtarët gjermanë kanë thënë se presin se do ta arrijnë cakun prej 2 për qind këtë vit, kryesisht falë një fondi të veçantë prej 1 miliard eurove të themeluar si përgjigje ndaj luftës ruse në Ukrainë.
Vendet që shpenzuan më së paku nga GDP-ja e brendshme ishin: Spanja, Belgjika dhe Luksemburgu, sipas të dhënave të NATO-s./REL/
Avokati Ardian Bajraktari, ka kërkuar më shumë konsultime kur bëhet fjalë për institucione të pavarura. Duke folur për Projektligjin për Komisionin e Pavarur për Media, Bajraktari për Ekonomia Online ka kërkuar që i njëjti të mos konsiderohet si cenim i lirisë së medias.
Lirinë e Mediave, Bajraktari e konsideron se është në pajtim të plotë me standardet e avancuara ndërkombëtare dhe si e tillë ajo duhet ruajtur.
“Procesi i harkimit dhe finalizimit të legjislacionit këtë rast aq më tepër kur kemi të bëjmë me institucione të pavarura, dhe të kategorisë kushtetuese duhet të shoqërohet me konsultime, e debate diskutime shteruese, në administrim të sfidave, dhe përgjithësive, që gjithë secilit institucion, natyrisht kur kemi te çështja e mediave tek çështja e lirisë së mediave, kjo është e përcaktuar edhe me kapitullin 2 të Kushtetutës në kuadër cilës bënë pjesë edhe liria e medias si njëra prej lirive të garantuara me kushtetutën tonë”, u shpreh Bajraktari.
“Në rast se ka diçka që është në pajtim jashtëzakonisht të madh me standardet me të avancuara ndërkombëtare, natyrisht që është kapitulli 2 përkatësisht të drejtave dhe liritë e njeriut, andaj vlerësoj që edhe Qeveria me rastin e hartimit të projektligjeve, edhe kuvendi me rastin e miratimit të këtyre veçmas kur kemi të bëjmë me institucione të kësaj natyre, duhet të jenë të kujdesshëm në drejtim të adresimit të sfidave mirëpo të mos ndërmarrin hapa e veprime që mund të konsiderohen si cenim i lirisë së medias”,
Duke folur për këtë Projektligj, Bajraktari thekson se përbën shkelje të nenit 6 të Komisionit të Pavarur për Media. Për këtë, kërkon më shumë kujdes.
“Komisioni i Pavarur për Media është institucioni i pavarur i kategorisë kushtetuese dhe në rrjedh të kësaj përveç që është i tillë punën dhe veprimtarin e tij e rregullon me ligjin përkatës me ligjin për Komisionin e Pavarur për Media, dhe janë autonom në punën dhe vendimmarrjen e tyre, dhe ushtrimin e përgjithësive të tyre kushtetuese dhe ligjore dhe në këtë drejtim ata kushdo qoftë deputet apo kushdo tjetër nuk mund të interferoj në punën dhe veprimtarinë e KPM-së për faktin se bënë veprime që bien ndesh me dispozitat e Ligjit për Komisionin e Pavarur për Media, përkatësisht nenit 6 të këtij Ligji. Andaj deputetët apo kushdo tjetër nuk mund të interferoj në punën dhe veprimtarinë e KPM-së për faktin se bënë veprime që bien ndesh me dispozitat e ligjit për Komisionin e Pavarur të Mediave”, u shpreh ai.
Deputetët e Kuvendit të Republikës së Kosovës do të mblidhen sot për të vazhduar seancën plenare të mbetur në gjysmë.
Përmes një komunikate për media, Kuvendi njofton se në seancën që pritet të fillojë në orën 11:00, në rend dite janë katër pika.
Rendi i ditës:
18. Votimi për emërimin e 3 (tre) anëtarëve vendorë të Këshillit Shtetëror të Cilësisë të Agjencisë së Kosovës për Akreditim,
19. Propozimi për përzgjedhjen e një (1) kandidati për gjyqtar në Gjykatën Kushtetuese të Republikës së Kosovës,
20. Zgjedhja e Komisionerit Parlamentar për Forcën e Sigurisë së Kosovës,
21. Zgjedhja e një (1) anëtari të Këshillit Prokurorial të Kosovës nga radhët e fakulteteve juridike të Republikës se Kosovës.
Presidentja e Kosovës, Vjosa Osmani, ka pritur mbrëmë në takim lamtumirës ambasadorin e Mbretërisë së Bashkuar në Kosovë, Nicholas Abbott, të cilin e ka falënderuar për bashkëpunimin dhe kontributin e vazhdueshëm në thellimin e marrëdhënieve ndërmjet të dy shteteve.
Në takim, Osmani vlerësoi lart angazhimin personal të ambasadorit Abott, i cili përveç rolit në promovimin e marrëdhënieve reciproke, mbështeti edhe shumë kauza të rëndësishme për shoqërinë kosovare.
“Ambasadori Abbott, për ne ju jeni më shumë se një përfaqësues diplomatik. Ju jeni një mik i vërtetë i Kosovës, një bashkëpunëtor i çmuar dhe një mbështetës i palëkundshëm i aspiratave tona për një shoqëri të lirë, të hapur dhe të drejtë. Përkrahja juaj e vazhdueshme për të drejtat e njeriut, paqen dhe integrimin e Kosovës në familjen euroatlantike, si dhe fuqizimin e përgjithshëm ndërkombëtar të saj tregon përkushtimin tuaj ndaj Kosovës”, është shprehur Osmani.
Presidentja Osmani i ka uruar ambasadorit Abbott sukses në angazhimet e mëtejme, duke e konsideruar një mik të Kosovës, i cili do të jetë gjithnjë i mirëseardhur në shtetin tonë.
Në takim, u shpreh gatishmëria e të dy bashkëbiseduesve që Kosova dhe Mbretëria e Bashkuar të vazhdojnë edhe më tej bashkëpunimin në fusha të ndryshme, duke përfshirë çështjet e sigurisë, zhvillimin ekonomik, arsimin, kulturën dhe përforcimin e lidhjeve njerëzore ndërmjet qytetarëve të dy shteteve.
Përgatiti: Sara Shehu
Ditëve të fundit në disa shkolla të Komunës së Gjakovës janë evidentuar 14 raste të prekura me zgjebe, sëmundje kjo ngjitëse e cila bartet me kontakt fizik.
Ekipet mjekësore të Qendrës Kryesore të Mjekësisë Familjare kanë zbuluar rastet përgjatë vizitave sistematike të cilat po i realizojnë nëpër shkolla sidomos në zonat rurale.
Drejtoresha e Shëndetësisë në këtë komunë, Adelina Shehu-Kola, tha se nxënësit e prekur nga zgjeba janë izoluar në shtëpitë e tyre.
“Drejtoria e Arsimit kanë vërejtur disa mungesa të nxënësve si shkak disa shqetësimeve dhe kanë kërkuar që të dërgohen disa ekipe mjekësore në ato shkolla. Janë dërguar 4 ekipe, ku është bërë evidentimin disa nxënësve me zgjebe, janë kryesisht në disa shkolla në zonat rurale dhe situate është nën kontrolle, Pra, prej datës -09 e deri më sot nuk kemi identifikuar ndonjë rasti të ri, janë vetëm këto 13 raste , janë marrë të gjitha masat, janë dezinfektuar klasat dhe fëmijët e prekur me zgjebe janë të izoluar sipas udhëzimeve të IKShPK-së, nxënësit janë prej 6 vjet deri në 12”, tha Shehu-Kola.
ATV-ja ka provuar të marrë përgjigje edhe nga Instituti Kombëtar i Shëndetësisë Publike lidhur me numrin e rasteve me zgjebe në nivel vendi por të dhëna nuk janë ofruar.
Megjithatë lidhur me zgjeben në komunën e Gjakovës specialisti i Shëndetit Publik nga IKSHPK-ja, Faik Hoti tha se situata është stabile.
“Bëjmë monitorimin nonstop përfshirë zgjebën ne kemi informacione sporadike por që të qartësojmë që zgjeba menaxhohet dhe se nuk është e rrezikshme. Për në komunën e Gjakovës jemi në kontakt në mënyrë që secilit rast t’i bëhet zgjidhje dhe të menaxhohen. Është një sëmundje kontakti infektive, por jo në të gjitha rastet përhapet nga mosmirëmbajtja e higjienës. Me rëndësi duhet të dezinfektohen këta persona”, tha Faik Hoti, specialist i shëndetit publik, IKSHPK.
Sipas të dhënave të IKSHPK-së, vitin e kaluar janë regjistruar mbi 800 raste me zgjebe në gjithë Kosovën.
Përgatiti: Pranvera Krasniqi
Pamje si kjo është e shpeshtë në Prishtinë.
Kontejnerët janë pak metra larg. Megjithatë, mbeturinat u lanë në cepa të rrugëve. Sipas qytetarëve numri i kontejnerëve është i vogël.
“Pe shihni edhe vet këtu sa ka arrit lartësia e bërllokut, përreth këtej në tokë, nuk është që nuk po i largojnë por krahas numrit të banorëve këta kontejnerë janë shaka veç të vijnë për çdo ditë t’ a largojnë…”, tha Selim Rafuna, banor.
Qytetarët madje u frikësohen edhe epidemive.
“Këtu mundet me pas kafshë të ngordhura, baktere, mish, shumë problem duhet të reagojnë komuna e institucionet për këtë problem që kaq shumë vite…”, tha Rafuna.
“Gjendje alarmante me menaxhimin e mbeturinave” dhe “mungesa e rezultateve” sipas kryetarit Përparim Rama ishin arsyet për shkarkimin e Ilirik Musliut nga detyra e drejtorit të shërbimeve publike. Tashmë pasardhësi i tij, Bekim Bestovci, thotë se ka nisur punën për shtimin e kontejnerëve.
“Për 3 muaj jam optimist se do të fillojmë me vendosjen e kontejnerëve të ri në shumë lagje të kryeqytetit…”, tha Bestovci.
Dyshime në kohën që caktoi Brestovci për zgjidhjen e çështjes së mbeturinave ka asamblisti i PDK-së Leutrim Retkoceri. Mes tjerash ai thotë se shumicën e punëve veçse i ka përfunduar udhëheqësia e shkuar e kësaj drejtorie.
“Kam dyshimet e mia meqë kjo është një problematikë si e qenve endacak, që sa kohë, nuk është mirë të jepen afate vetëm për fillim të mandatit, meqë edhe Iliriku ka punuar shumë…”, tha Retkoceri.
1370 kontejnerët, sa janë paraparë të vijnë në lagjet e kryeqytetit në tre muajt e ardhshëm, komunës së Prishtinës do t’i kushtojnë rreth 380 mijë euro.
Përgatiti: Haris Ademi
Era mund të sjell investitorë nga matanë kontinentit, në Kosovë.
Qeveria thotë se plani për shpalljen e ankandit të parë të këtij lloji të energjisë së ripërtëritshme, në gjysmën e dytë të këtij viti, ka tërhequr kompani të këtij sektori.
“Gjatë promovimit të ankandit solar si dhe Pakos Investive të Burimeve të Ripërtëritshme të Republikës së Kosovës, odat ekonomike e kompanitë nga Evropa e nga Azia kanë shprehur interesim mbi investimet në kapacitetet e erës, përpos atyre diellore. Andaj, vlerësojmë që ankandi do të tërheqë interesim të kënaqshëm”, thuhet në njoftimin e Ministrisë së Ekonomisë.
Ministria e Ekonomisë në fillim të shkurtit i bëri publik gjashtë emrat për ankandin me energji të diellit. Kompanitë vijnë nga Turqia, Gjermania, Franca, Egjipti e Zvicra.
Mirëpo ky projekt s’u shkoi sipas planeve, pasi u shty disa herë. Tash, nga ME thonë se nuk pritet ndërrim afatesh për ankandin me erë.
Njësoj beson edhe njohësi i energjisë, Naim Bujupi.
“Nuk mendoj se do të përsëritet e njëjta, pasi ministria e ka bërë një përvojë, në ankandet e para gjithmonë janë përvojë për të ardhshmet”, tha Bujupi.
Sipas një studimi të 2020-ës nga Banka Botërore, Kosova ka potencial të prodhim të energjisë elektrike përmes erës rreth 1200 megavatë.
“Ka kapacitet, diku 35% të kohës gjatë vitit prodhojnë energji…”, tha Bujupi.
Sipas strategjisë njëdekadëshe të energjisë, në Kosovë mëtohet që deri më 2031 të ndërtohen kapacitete prej 1600 megavatë. 600 nga to, pritet të jenë duke e shfrytëzuar erën si burim.
Përgatiti: Arton Hamiti
Brenda këtij objekti bëhen të gjitha planet shtetërore për infrastrukturën e vendit. Mirëpo, vet ndërtesa e Ministrisë së këtij dikasteri, zor që i plotëson kushtet për punë. Teksa në disa vende ka rënë fasada, në hapësira brenda ish-objektit të Gërmisë është shfaqur myku.
Veç kësaj, zyrtarëve të ministrisë iu kërkua që nga qershori i vitit të kaluar ta lirojnë objektin, meqë është pronë e Komunës së Prishtinës.
Qeverisja lokale në kryeqytet këtu planifikon ndërtimin e “Sallës se Koncerteve dhe Galerisë së Arteve”.
“Komuna e Prishtinës ka dërguar disa herë kërkesa në Ministrinë e Punëve të Brendshme dhe atë të Kulturës që të lirojnë objektin e ish-shtëpisë së mallrave “Gërmia”, meqë kryeqytetit i duhet për të realizuar projektin e saj kapital “Salla e Koncerteve dhe Galeria e Arteve”. Mirëpo, pavarësisht kërkesave, MPB dhe MKRS ende nuk kanë liruar hapësirat me arsyetimin se nuk kanë ku ta vendosin stafin e tyre. Moslirimi i këtyre hapësirave cenon fillimin e realizimit të projektit të Kryeqytetit në këtë objekt”, thuhet në njoftimin e Komunës së Prishtinës.
Por, 8 muaj pas kërkesës, Ministria e Infrastrukturës nuk e ka gjetur lokacionin e ardhshëm për stafin.
“Jemi në komunikim me Ministrinë e Punëve të Brendshme dhe Administratës Publike, për të gjetur zgjidhje për akomodimin e stafit, sapo të gjejmë zgjidhjen do të lirohet objekti”, thuhet në njoftimin nga Ministria e Infrastrukturës.
Ndërkohë, për kushtet e punës nuk kanë kthyer përgjigje. Sidoqoftë, një pjesë e fondeve për ndërtimin “Sallës Koncertale dhe Galerisë” vazhdojnë të jenë ngrira për shkak të masave ndëshkuese të Bashkimit Evropiane.
Përgatiti: Krenare Mulliqi
Kriteri që ua ndalon ndihmën sociale familjeve të cilat nuk kanë fëmijë nën 5 vjet, pritet të largohet nëpërmjet reformës në skemën sociale.
Ndryshime pritet të ketë edhe në skemat pensionale, përkatësisht tek ato baziket dhe të kontributeve. Sipas Ministrit të Financave Hekuran Murati, Ligji i ri është drejt finalizimit dhe po punohet me Bankën Botërore në njësinë e pilotimit.
Por, skemën të cilët Murati e prezantoi para anëtarëve të Komisionit për Shëndetësi dhe Mirëqenie Sociale, u kundërshtua nga deputetë opozitar.
Ata thanë se kjo skemë nuk është e njëjta që është prezantuar gjatë fushatës.
Po ashtu, u kërkua të sqarohet sa pensionistë do të përfitojnë nga kjo reformë dhe si është e mundur të preken kontributet e pensionistëve.
Reforma në skemën sociale dhe pensionale do të bëhet me Bankën Botërore nëpërmes kredisë në vlerë prej 47 milionë eurosh.