Category: Lajme

Përfundimi i akteve nënligjore në bazë të Ligjit për mbrojtjen e fëmijës, ishte temë diskutimi ndërmjet anëtarëve të Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione me përfaqësues të shoqatave për mbrojtjen e fëmijëve, raporton Ekonomia Online.

Të pranishëm ishin edhe përfaqësues nga Zyra për Qeverisje të Mirë në kuadër të Zyrës së Kryeministrit, me ç’rast Qëndresa Ibra nga kjo Zyre tha se koha e pandemisë dhe ndryshimet e Qeverisë e kanë pamundësuar implementimin e tërësishëm të Ligjit për Mbrojtjen e Fëmijës.

“Sa i përket nxjerrjes së akteve nënligjore që burojnë nga Ligji për Mbrojtjen e Fëmijës, siç e dini që Ligji është aprovuar në vitin 2019 dhe ndoshta nuk ka qenë ndoshta koha më e mirë e mundshme e cila na derivon në nxjerrjen e udhëzimeve administrative sepse në atë kohë ka qenë koha e Covid-19, ku mundësia që me u zhvillu dokumentet ku kanë kërku një pjesëmarrje më të madhe të grupeve punuese, ka qenë e limituar”, deklaroi ajo.

“Kohëve të fundit është bërë edhe ndryshimi i strukturës organizative të brendshme të Qeverisë dhe kushtimisht kjo ka ndikuar edhe në ndaljen e hapave sa i përket aprovimit të të gjitha udhëzimeve administrative që burojnë prej Ligjit për Mbrojtjen e Fëmijës”, shtoi ajo.

“Realisht nga Ligji për Mbrojtjen e Fëmijëve kërkohen të nxjerrën 17 udhëzime administrative, 15 prej të cilave janë nën përgjegjësinë e institucioneve qeveritare, ndërsa 2 të institucioneve të pavarura, siç është Këshilli i Gjyqësor dhe Këshilli i Pavarur i Mediave. Prej këtyre 15 udhëzimeve që janë nën përgjegjësinë e Qeverisë, janë aprovuar nëntë, aktualisht janë finale të cilat i kanë tejkaluar edhe procedurat e konsultimit publik dhe procedurat e konsultimit paraprak dhe janë gjashtë udhëzime administrative. Njëra është nën përgjegjësinë e MASHTI-t që ka të bëjë me edukimin për mbrojtjen e fëmijës si dhe të gjitha udhëzimet tjera janë nën domenin e Ministrisë së Drejtësisë. Ideja se përse këto dokumente na kanë mbet pa aprovuar në Qeveri është për faktin se në kohën kur janë zhvilluar dokumentet, përgjegjësia e çështjes sociale ka qenë në kuadër të Ministrisë së Financave, Punës dhe Transfereve dhe kohëve të fundit ky mandat u ndryshu kaloi në kuadër të përgjegjësisë së Ministrisë së Drejtësisë dhe ishte e pamundur që ne të vazhdojmë punën me aprovimin e dokumenteve në fjalë pa u rregullu juridikisht aspekti i strukturës organizative të brendshme”, u shpreh tutje ajo.

Deputetja e Partisë Demokratike të Kosovës, Ariana Musliu-Shoshi, kërkoi të di për ngecjet sa i përket implementimit të këtij ligji.

“E pata një kërkesë që të kemi një raport të detajuar edhe nga ZQM-ja por edhe nga organizata tjera, që ta dimë se ku jemi duke ngecur me implementimin e këtij Ligji jashtëzakonisht shumë të rëndësishëm”, u shpreh ajo.

“Çka më intereson të di më konkretisht është që Ligji zyrtarizon Programin e Vizitave në Shtëpi. Të gjitha gratë që janë shtatzëna dhe fëmijët 0-3 vjeç. Pra ky është paraparë që të përdorët si mjet identifikimi për rrezikun eventual dhe pastaj të përcillet referimet tek sektorët tjerë përgjegjës. Më intereson të di se ku jemi me këtë pikë të zbatimit të Ligjit sepse e vlerësoj se është jashtëzakonisht e rëndësishme se numri i grave shtatzëna po ashtu edhe fëmijëve, të drejtat e tyre jo gjithmonë janë duke u respektuar”, pyeti Musliu-Shoshi.

E për këtë, mori përgjigje nga përfaqësuesja e ZQM-së.

“Më kujtohet atë kohë kur e kemi zhvilluar çështjen që ju po i referoheni në kuadër të nenit për shëndetësi, ne e kemi vendos këtë dispozitë me idenë që të ndikojmë në masën më të madhe në aspektin e parandalimit të dukurive të ndryshme negative që mund evitohen tek fëmijët, andaj edhe kemi menduar që në kuadër të vizitave në shtëpi t’i bëjmë obligative për çdo fëmijë nga 0-3 vjeç”, deklaroi ajo.

Ambasadori i Gjermanisë në Prishtinë, Jorn Rohde, ka paralajmëruar se këtë të premte fillon Konferenca e Sigurisë në Mynih, me tematikë për dinamikën “humbje-humbje” në politikën ndërkombëtare.

Rohde ka pyetur se a nuk i përshtatet kjo dinamikë situatës aktuale sa i përket raportit në mes të Kosovës dhe Serbisë.

Ambasadori gjerman ka thënë se të dy shtetet i kënaqin audiencat lokale, ndërkohë që s’bëjnë përparim drejt afrimit tek synimi i përbashkët që është Bashkimi Evropian.

“Tema e këtij viti: Dinamika humb-humbje në politikë. A nuk përputhet në mënyrë të përkryer me atë që shohim aktualisht midis Kosovës dhe Serbisë. Që të dyja deri tani po e kënaqin audiencën e tyre lokale, por nuk u afrohen më shumë qëllimeve të përbashkëta si BE-ja”, ka shkruar Rohde.

Ambasador i Kosovës në NATO, Astrit Zemaj, është takuar me Kryetarin e Komitetit Ushtarak të NATO-s, admiralin Rob Bauer.

“Gjithmonë një nder i madh të takohem me Kryetarin e Komitetit Ushtarak, Admirali Rob Bauer, veçanërisht në këto kohë kritike për Evropën”, shkruan Zemaj.

“Shprehu mirënjohjen e Kosovës për mbështetjen e vazhdueshme të NATO-s dhe KFOR-it për paqe dhe stabilitet në Kosovë dhe në rajon”.

Ministri i Financave, Punës dhe Transfereve, Hekuran Murati ka deklaruar se ligji për skemën sociale është drejt finalizimit dhe së shpejti do të jetë në Kuvend, porse është kritikuar nga opozita për reformat në pensionale dhe sociale.

Gjatë raportimit të tij në Komisionin për Shëndetësi dhe Mirëqenie Sociale lidhur me strategjinë legjislative për skemat sociale dhe pensionale për vitin 2024, si dhe planet dhe prioritetet për fushën e skemave sociale dhe pensionale për vitin 2024, Murat tha se Kuvendi ka ratifikuar marrëveshjen me Bankën Botërore, edhe pse me vonesë nga ana e Kuvendit.

Me anë të ligjit, ai shtoi se do të ketë edhe përmirësim sa i përket zbatimit duke shtuar se ideja është që mbështetja të jetë e bazuar në madhësinë e familjes, por edhe në aftësinë për të gjeneruar të ardhura në mënyrë graduale.

“Sivjet do të fillojë pilotimi, siç është paraparë me njërën nga kompanitë e atij projekti, dhe paralelisht jemi duke punuar edhe në ligj. Ligji pak a shumë është drejt finalizimit për skemat apo mbështetjen sociale, dhe do ta kemi shumë shpejt para jush. Por, po presim edhe pilotimin që të ketë informim të bazuar në informacion konkret nga terreni se si do të mund të dukej zbatimi në praktikë, por edhe si mund të informohej nga përvoja që mund të marrim nga pilotimi. Ligji parasheh heqjen e kritereve diskriminuese siç kanë qenë në kategori, ose me ligjin ekzistues janë dy kategori, njëra është familjet që kanë fëmijë nën moshën pesë vjeçare, mund të përfitojnë, është si kriter diskriminues, kurse kriteri tjetër është se nëse nuk plotësojnë kriterin e një fëmije nën moshën pesë vjeçare, i bie që askush nga familjet mos të jetë i aftë për punë… Ka edhe mekanizma tjerë që kemi synuar t’i përfshijmë në ligj e që janë edhe inkurajimi për të punuar, pra familjet të cilët duan të regjistrohen për përfitim në asistencën sociale duhet fillimisht të regjistrohen anëtarët aktiv të aftë për punë dhe të moshës së punës të regjistrohen si punëkërkues aktiv në zyret e punësimit”, deklaroi Murati.

Duke folur për skemat sociale, ai tha se këtë vit do të adresojnë skemat pensionale sa i përket moshave. Siç tha ai do të bëhet një reformë sa i përket kritereve të përfitimit, derisa shtoi se do të ketë përmirësim në zbatimin e tyre.

“Sa i përket skemave pensionale janë disa, mirëpo do t’i konsideroja në disa kategori, por fillimisht çka ne kemi synim që këtë vit të adresojmë dhe që kemi konsideruar më emergjente është çështja e skemave pensionale të moshës. Pra që ka të bëjë me kontributet apo pensionet bazike si dhe pensionet e financiare nga shteti, edhe këtu parashihet të bëhet një reformë sa i përket kritereve të përfitimit, por edhe të bëhet një ridizajnim, ashtu që fondet e pensionit apo kontributet pensionale në Fondin pensional që janë në Trust aktualisht të jenë epiqendra e një pensionisti, kurse shteti të ofertojë sublementimin, apo mbështetjen shtesë për ato raste që kanë nevojë. Kemi raste ku mund të ketë dikush kontribute të larta në findin pensinal dhe kur del në pension e merr edhe pensionin bazik që është në vlerë 100 euro, njësoj sikur ai që s’ka fare kontribute në Trust, ideja është që të riorientohet dhe të bëhet në përshtatje në bazë të nevojës. Mirëpo, këtu ende jemi në konceptim dhe sapo që kemi një koncept përfundimtar do të mund të lëvizim edhe në draftimin e ligjit të cilin do ta sjellim para jush”, tha Murati.

Deputeti nga radhët e PDK-së, Bekim Haxhiu ka akuzuar ministrin Murati për mosmbajtje të premtimeve që kanë dhënë tash e tre vite.

“Keni premtuar ristrukturimin e skemave social dhe pensionale për të ulur varfërinë, por ky projektligj për skemat sociale dhe personale prej vitit 2021 vazhdon të bartet në çdo program legjislativ të qeverisë. Keni premtuar skema për punësim sezonal për familjet që janë asistencë sociale, keni premtuar punësimin e së paku një anëtari të të çdo familje që janë me asistencë sociale, zero deri më tani. Mbështetja përmes subvencionimit, më shumë ka përfitim për bankat sesa për ta. Të varfrit vazhdojnë të përkeqësohet gjendja, ndërsa oligarkët e bankave në Kosovë kanë shifra rekorde për përfitimet në dy vitet e fundit. Keni premtuar ndryshimin e pushimit të lehonisë dhe prindëror, keni premtuar se këtë do ta bëni me ligj, dhe po hymë në vitin e katër të qeverisë tuaj dhe ligj nuk ka… Këtë model që e prezantuat sot nuk e keni në program qeverisës…Me ligjin për pagën minimale keni diskriminuar, veteranët, pensionistët e Trepçës, paraplegjikët, të verbrit dhe tetraplegjikët, si do ta evitoni këtë pabarazi dhe diskriminim ndaj këtyre kategorive, a mund këto kategori të ushqejnë familjen me 170 euro, pasi me këtë shumë nuk iu dalin të blejnë barna për vete”, tha Haxhiu.

Derisa, deputeti i AAK-së, Shemsedin Dreshaj, e ka pyetur ministrin se sa pensionist kanë përfituar nga skema e re pensionale, pasi sipas tij, janë vonuar në pilotimin e këtij programi.

“Sa pensionist kanë fituar nga kjo reformë që keni bërë… Për skema sociale duhet të ngrihet zhurmë dhe të debatojmë. A po iu duket që është vonë që pas 3 viteve të pilotoni një program”, tha ai.

Anën tjetër, deputeti nga radhët e LDK-së, Armend Zemaj, ka thënë se asnjëherë nuk është saktësuar se sa është dhënë nga buxheti i vendit përtej numrit të përgjithshëm të fondit të skemës sociale.

“E kam një konstatim që është politik, kjo është fusha kryesore më të cilën ju keni abuzuar me pushtetin të mos trajtimit adekuat të skemës pensionale, por edhe të trajtimit të qytetarëve me nevojë që janë pjesë e skemave të ndryshme sociale. Tri vite të kësaj qeverisje ju fare nuk i keni kushtuar vëmendje as në kuptimin legjislativ as përmbajtjesor, por e keni shndërruar në sektor të shpërndarjes së parasë publikë, një lloj lëmoshë për gjitha këto kategori, asnjëherë nuk është saktësuar sa është dhënë nga buxheti i Kosovës përtej numrit të përgjithshëm të fondit të skemës sociale”, tha Zemaj.

Ndërsa, deputeti nga LVV, Mirsad Shkreta është shprehur i shqetësuar me ligjin për skemat sociale, për çfarë thotë se duhet të ketë një sistem të menaxhimit të dhënave. Sipas tij, nga një numër enorm i përfitueseve të skemave, ka rënë numri në mënyrë rapide.

“Ajo që më shqetëson mua është ligji edhe për skemat sociale, a do të kemi mundësi të kemi një sistem të menaxhimit të te dhënave. Ne kemi qenë dëshmitar që në momente të caktuara për një periudhë kohore shumë të vogël nga një numër enorm i përfitueseve të skemave, ka rënë numri në mënyrëe rapide. Tash a ka rënë skema sociale, nevojtarët, apo ka pas abuzime”, ka pyetur Shkreta.

Lidhur me akuzat nga opozita, ministri Murati tha se një pjesë e madhe e premtimeve janë duke i realizuar, porse sipas tij, jo gjithçka mund të realizohet në vitin e parë.

“Një pjesë të madhe të tyre (premtimeve) po i realizojmë, jo gjithçka mund të realizohet në vitin e parë, aq më tepër kur ka probleme të akumuluara…Ne kemi bërë mjaftë politika që të ofrojmë mundësi të punësimit, duke filluar me masën qeveria për familjet, që është një masë e cila ka rezultuar deri më tani me rreh 2600 të punësuar, pra, anëtar të familjes të cilët nuk e kanë asnjë të punësuar, janë ndërmjetësuar nga Agjencia e Punësimit, dhe punësimi tyre është subvencionuar në mënyrë që ata të gjejnë një vend të punës të rregullt…Çështje tjera ishin edhe disa prej ligjeve te cilat janë në procedurë e sipër, ka disa ligje që merr më shumë kohë reforma, e disa që janë kryer më herët”, ka thënë Murati.

Këshilli për Mbrojtjen e të Drejtave e të Lirive të Njeriut ka reaguar lidhur me vdekjen e 54 vjeçarit me inicialet H.M nga Mamusha, duke vlerësuar se kishte mungesë të përkujdesjes shëndetësore.

KMDLNj thotë se është informuar se me datë 12.02.2024 në Emergjencën e Spitalit në Pejë, në ora 19.00, ishte konstatuar vdekja e të burgosurit H.M., 54 vjeçar i lindur në Mamushë.

“I burgosuri ishte sjellur në gjendje jashtëzakonisht të rëndë shëndetësore nga NjSHB, stacionari i Q.K. në Dubravë ku trajtohej sipas udhëzimeve të specialistëve të fushës. Fillimisht, para se të transferohej në Stacionar në Dubravë ishte vendosur në Q.P. në Prishtinë ku nuk kishte kapacitete e as mundësi të trajtohej në përputhje me problemet e rënduara shëndetësore që i kishte”, thuhet në reagim.

Reagim i KMDLNj – së:

VDEKJA E TË BURGOSURIT H.M. SHQETËSIM PËR KMDLNJ

Nga burime të sigurta, KMDLNj- ë ishte informuar se me datë 12.02.2024 në Emergjencën e Spitalit në Pejë në ora 19.00 ishte konstatuar vdekja e të burgosurit H.M., 54 vjeçar i lindur në Mamushë. I burgosuri ishte sjellur në gjendje jashtëzakonisht të rëndë shëndetësore nga NjSHB, stacionari i Q.K. në Dubravë ku trajtohej sipas udhëzimeve të specialistëve të fushës. Fillimisht, para se të transferohej në Stacionar në Dubravë ishte vendosur në Q.P. në Prishtinë ku nuk kishte kapacitete e as mundësi të trajtohej në përputhje me problemet e rënduara shëndetësore që i kishte. Në ndërkohë ishte lajmëruar edhe gjyqtari i rastit për pamundësinë e trajtimit shëndetësorë si dhe menaxhimit të rastit por se nuk kishte asnjë përgjigje, as sa i përket ndryshimit të masës së shqiptuar apo rekomandimit për trajtim shëndetësorë kashtë institucionit mbajtës.

KMDLNj- ë edhe më heret ka reaguar se NjSHB përkatësisht stacionari në Dibravë nuk ka as kapacitete materiale e as profesionale për të trajtuar rastet e rënda përkundër përpjekjeve maksimale që e bënë stafi shëndetësorë. KMDLNj- ë e rithekson domosdoshmërinë e formimit të një Spitali që do të pajisej profesionalisht dhe materialisht e që do të përkujdesej për shëndetin e personave të privuar nga liria siç e kanë vendet e rajonit. KMDLNj- ë e rikujton opinionin se në institucionet e mbajtjes në Kosovë një numër i konsiderueshëm i të burgosurve mbahen në kundërshtim të plotë me të drejtat e njeriut shkaku se vuajnë nga sëmundje të pashërueshme apo kanë çrregullime të rënda të shëndetit mendor prandaj kërkojnë mbikëqyrje 24 orëshe apo të pjesshme. Në këto raste kemi të bëjmë me shkelje të rënda të njeriut dhe personave të privuar nga liria përkatësisht shkelje të Konventës për Parandalim të Torturës dhe Trajtim Degradues. Nëse një qytetar bjen në kundërshtim me ligjin nuk nënkupton se privohet nga të drejtat e personave të privuar nga liria. Për shkak të mungesës së kushteve materiale dhe profesionale për trajtim të plotë shëndetësorë të burgosurve iu mohohet e drejta kryesore njerëzore, e drejta për jetë sikur që ishte rasti mr H.M.dhe rastet e mëparshme. Që nga çasti i privimit nga liria, shteti e merr tërë përgjegjësinë për përkujdesjen dhe trajtimin e të burgosurve dhe me asgjë nuk mund të arsyetohet për humbjen e jetëve të personave të privuar nga liria për shkak të mungesës së trajtimit të duhur shëndetësor. Në këto raste hallka e fundit e zinxhirit të përgjegjësisë është Njësia Shëndetësore e Burgjeve që është në gërshërë midis ministrive përkatëse dhe gjykatave e që janë adresat kryesore të përgjegjësisë. KMDLNj- ë i shprehë ngushëllime të sinqerta familjes së të ndjerit H. M. duke kërkuar hetime profesionale pas së cilave do të përcaktohej përgjegjësia e mundshme, disiplinore apo penale.

Që paradoksi të jetë edhe më i madh në ditën kur të burgosurit kosovarë vdesin, H.M. për shkak të mungesës së përkujdesjes shëndetësore, ministri i Drejtësisë së Danimarkës, në kundërshtim me të drejtën ndërkombëtare i bënë presion partive opozitare të Kosovës që ta votojnë Marrëveshjen kriminale raciste që i përshtatet shtetit racist danez dhe që e dëmton rëndë Kosovën. Deputetët e Kuvendit të Kosovës duhet të kërkojnë formimin e një Komisioni Hetimor për vdekjet dhe vetvrasjet e të burgosurve në Kosovë sikur edhe të mos e votojnë marrëveshjen për burgje me Danimarkën. Në kohën kur të burgosurit kosovarë vdesin apo vetvriten për mungesë të trajtimit të duhur shëndetësorë, në Burgun e Gjilanit po bëhen renovime me të cilat përkujdesja shëndetësore për të burgosurit jodanezë që do të blihen nga Danimarka, do të jetë sipas standardeve të Danimarkës. Çfarë diskriminimi.

Ministrja e Drejtësisë, Albulena Haxhiu, sot ka pritur në takim në ministrinë e Drejtësisë, homologun danez, Peter Hummelgaard.

Gjatë takimit u diskutua rreth rëndësisë së ratifikimit të marrëveshjes mes Kosovës dhe Danimarkës për marrjen në shfrytëzim të hapësirave të burgut në Gjilan.

Në njoftimin e Ministrisë së Drejtësisë thuhet se që nga muaji korrik, për shkak të bllokimit me mosvotim të marrëveshjeve ndërkombëtare, kjo marrëveshje ka mbetur pa u ratifikuar.

Në anën tjetër, Haxhiu ka njoftuar Hummelgaard se Shërbimi Korrektues i Kosovës veçse ka filluar procedurat për hartimin e specifikave teknike për adoptimin e hapësirave banuese si dhe rekrutimin e stafit shtesë.

Kryetari i Komunës së Lipjanit, Imri Ahmeti së bashku me Drejtorin e Bujqësisë, Rexhep Rexhepi sot kanë vizituar një nga fermat e blegtorisë, të cilëve u ka dhënë një lajm të mirë.

Gjatë kësaj vizite Ahmeti ka potencuar se së shpejti do të filloj me subvencionimin për fermerët me 0.4 cent për litër qumështi dhe se këto ditë pritet të shpallet thirrja publike nga Komuna e Lipjanit për të gjithë fermerët prodhues të qumështit.

Kryetari Ahmeti ka thënë se me këtë po fillojmë të mbështesim edhe këtë kategori të fermerëve me qëllim të nxitjes së prodhimit të qumështit dhe në të njëjtën kohë do të vazhdojmë edhe me mbështetjen e kategorive të tjera të sektorit të bujqësisë.

Mbrojtja e Haxhi Shalës, Ismet Bahtjarit dhe Sabit Januzit janë ankuar se nuk janë duke u financuar nga Ministria e Drejtësisë (MD), për të përfaqësuar juridikisht të akuzuarit gjatë procesit gjyqësorë në Dhomat e Specializuara të Kosovës (DhSK) në Hagë. Për këtë arsye, ata gjithashtu kërkuan pezullimin e këtij procesi deri sa të zgjidhet kjo çështje.

Në parashtrimet e tij avokati i Januzit, Jonathan Elystan Reese tha se një kërkesë për financim e kishte bërë më 4 dhjetor 2023, por që deri tani nuk ka ndonjë rezultat, raporton “Betimi për Drejtësi”.

“Mbrojtja e Januzit ka bërë kërkesë në përputhje me kriteret e saj më 4 dhjetor 2023. Sipas kritereve, Ministria e Drejtësisë duhet të krijojë një komision për t’i dhënë përgjigje kësaj kërkese brenda 10 ditësh. Ne i kemi kërkuar vazhdimisht MD-së që të trajtojë këtë kërkesë brenda dhjetë ditësh të parashikuara dhe më pas këtë e kemi bërë përmes një korrespodencë inter-partes ku MD-ja kërkoi që ta shtyjmë këtë çështje, ndërkohë që do të zgjidhnin çështjen e mungesës së numrit të duhur të personave që do të merrnin pjesë në komision”, tha Reese.

Ai tha se Ministria e Drejtësisë iu ka dhënë disa data se kur do të mbahej takimi i këtij Komisioni, e që kjo ka zgjatur që nga dhjetori deri në javën e kaluar.

“Ne na i kanë dhënë disa data kur do të takohej ky Komision dhe herë pas here në çdo rast na kanë thënë që do të vonohen më tutje për të vazhduar gjatë gjithë dhjetorit, janari dhe shkurtit dhe deri në javën e shkuar. Ne jemi përpjekur që të vazhdojmë bashkëpunimin tonë dhe iu kemi besuar kur na kanë thënë se do të zgjidhej kjo çështje, por në fakt kjo është kosto për ne, është dështim për ne pasi edhe sot që ndodhemi këtu, nuk është na është komunikuar ndonjë vendim i ndonjë takimi…Është shtyrë vazhdimisht. Unë nuk jam në gjendje që të tregoj ndonjë afat. Unë po them se na kanë thënë që do të mbahet një takim i ri gjatë kësaj jave se a do të mbahet a jo, nuk e di.”, tha ai.

Mbrojtja e Januzit kërkoi që t’i vendoset një afat urgjent Ministrisë së Drejtësisë për këtë çështje dhe në rast që nuk bëhet atëherë çështja të dërgohet në Kushtetuese.

“Nëse ju do të bëni këtë gjë dhe do t’i vendosni Ministrisë së Drejtësisë një afat urgjent dhe në qoftë se nuk zbatohet ky afat, mua më duket se rezultati do të ishte që këtë çështje ta dërgojmë në Dhomën Kushtetuese. Edhe në këtë rast do t’i kërkonim trupit gjykues që kjo çështje të zgjidhet sa më shpejtë të jetë e mundur duke iu referuar apo duke çuar çështjen në Dhomën Kushtetuese nga vetë trupi gjykues me qëllim që ato të mund ta ndjekin çështjen e moszbatimit të angazhimit që ka MD-ja sipas ligjit”, tha Reese.

Avokatja e Ismet Bahtjarit, Felicity Gerry KC, tha se e mbështetë parashtrimin e mbrojtjes së Januzit.

“Dua ta mbështesë parashtrimin e z.Reese dhe të bëjë të njëjtën kërkesë në emër të Z.Bahtjari. Ne jemi në të njëjtën gjendje. Kemi bërë një numër kërkesash pranë Ministrisë së Drejtësisë për t’i dhënë përgjigje kërkesës sonë për financim dhe kur u bë e qartë që ky takim i Komisionit nuk do të mbahej gjatë javës së shkuar, unë e njoftova vetë zyrën administrative se kishte një problem. Të njëjtën gjë bëra edhe me ZPS-në”, tha Gerry.

Ajo potencoi se nuk ka marrë asnjë e-mail që nuk do të miratohen fondet, por që është informuar se duhet të formohet një komision.

Avokatja Gerry tha se është duke kërkuar edhe një kontroll mjekësor për të mbrojturin e saj për të parë nëse ai është në gjendje që të ndjek këtë proces gjyqësor në DhSK. Kurse, shtoi se këtë seancë është duke e ndjekur përmes video-lidhjes për shkak të mungesës së financimit.

Mbrojtja e Bahtjarit kërkoi që t pezullohet kjo konferencë me qëllim që Ministria e Drejtësisë të përgjigjet në bazë të kërkesave që iu kanë bërë.

“Kërkoj nga ju që ta pezulloni këtë konferencë të sotme me qëllim që Ministria e Drejtësisë të përgjigjet në bazë të kërkesës që kemi bërë, kërkesës që ka bërë z.Resse dhe ne të vijmë këtu nesër dhe të kemi përditësimin e duhur. Ndërkohë mund të them që nuk është e drejtë, ne kemi nevojë për ndihmën e trupit gjykues që të respektohen të drejtat e z.Bahtjari për një gjykim të drejtë”, tha Gerry KC.

Ndërsa, avokati i Haxhi Shalës, Toby Cadman tha se nuk do t’i përsërisë gjërat që kanë thënë dy parafolësit e tij lidhur me komunikime.

Cadman potencoi se kjo çështja e financimit nuk do të ndikojë në përfaqësimin juridik të Haxhi Shalës.

“Edhe ne jemi të prekur në të njëjtën mënyrë. Ajo që mund të them është se unë i kam premtuar Z.Shala se pavarësisht financimit, ne do të vazhdojmë ta përfaqësojmë atë. Sigurisht, që kemi nevojë për një vendim nga ana e Ministrisë së Drejtësisë. Ne e kemi diskutuar me z.Shala çështjen e sigurimit të fondeve përmes DhSK-së në qoftë se Ministria nuk jep përgjigjen e duhur. Por, z.Shala është i paraburgosur për një periudhë prej dy muajsh dhe nuk duam që të ketë vonesa me tej të kësaj çështje. Sa i përket hetimeve afatgjate që do t’i bëjë, pala mbrojtëse sigurisht që do të preket nga kjo çështje e financimit”, tha Cadman.

Ai tha se ia ka bërë të qartë Shalës se kjo çështje e financimit nuk do të prek faktin se do ta përfaqësojnë në këtë proces, pasi kanë detyrime të cilat do t’i përmbushin.

Ndërsa, prokurorja Jasmine Shahabbudin nga ZPS kundërshtoi kërkesat për pezullim të procedurës.

“ZPS-ja kundërshton çdo kërkesë për të pezulluar apo vonuar procedurën bazuar në këtë problemin e financimin që u shtjellua sot në hollësi. Mendoj që pika kryesore këtu është që DhSK-ja ka një kornizë funksionale gjithëpërfshirëse për të trajtuar çështjet e përfaqësimit dhe financimit”, tha Shahabbudin.

Kurse, Gerry KC kërkoi sërish që ky proces të pezullohej për një afat prej një muaj.

Ndërsa, ZPS-ja tha se ka mekanizma pranë DhSK-së që e trajtojnë financimin e mbrojtjes së të akuzuarve.

Në rast se Ministria e Drejtësisë nuk do të paguajë për mbrojtjen e të akuzuarve, gjyqtari i procedurës paraprake, Nicholas Guillou tha se është sistemi i ndihmës financiare pranë DhSK-së dhe se ata do të paguhen ose nga ky sistem ose nga vetë të akuzuarit.

“Dua ta bëjë të qartë që nuk do ta bëj që kjo çështje të ngelet peng i gatishmërisë së Ministrisë së Drejtësisë së Kosovës për t’i financuar ekipet e mbrojtjes dhe do të marrë urgjentisht vendimin lidhur me çështjen nëse Ministria do t’i paguajë apo jo ekipet e mbrojtjes. Në qoftë se MD-ja merr vendim negativ apo nuk e merr vendimin në ditët në vazhdim, ne kemi një kuadër ligjor. Ne kemi sistemin e ndihmës financiare ligjore e cila aktivizohet në momentin që të akuzuarit nuk janë në gjendje të paguajnë për ekipet e tyre të mbrojtjes. Në qoftë se Ministria e Drejtësisë nuk dëshiron të kontribuojë për pagesat për mbrojtjen e të akuzuarve pranë DhSK-së, mbrojtësit do të paguhen ose nga të akuzuarit ose përmes sistemit të ndihmës ligjore”, tha Guillou.

Ai shtoi se është e rëndësishme që MD-ja të dalë me një vendim.

Ndryshe, gjatë kësaj seance përgatitore pritet të diskutohen edhe procedurat e nxjerrjes së materialeve dhe provave, të diskutohet për ecurinë e hetimeve nga ana e ZPS-së dhe mbrojtjes, kur parashikohet të transmetohet dosja gjyqësore, kur pritet që të jetë gati për gjykim, e të tjera.

Në konferencën e tretë me radhë mbi ecurinë e çështjes ndaj Ismet Bahtjarit dhe Sabit Januzit, gjykatësi i procedurës paraprake Nicolas Guillou, kishte nxjerrë një urdhër gojor, ku ZPS-në e urdhëroi që aktakuzën e përbashkët ndaj Bahtjarit, Januzit dhe Haxhi Shalës, ta dorëzojë jo më vonë se 12 janari 2024.

Ndryshe, më 8 shkurt, gjyqtari i procedurës paraprake Guillou ka miratuar kërkesën e Zyrës së Prokurorit të Specializuar (ZPS) për bashkimin e aktakuzave të konfirmuara në çështjen gjyqësore ndaj Ismet Bahtjarit dhe Sabit Januzit me atë të Haxhi Shalës.

Në vendimin për bashkimin e aktakuzave, thuhet se gjyqtari i procedurës paraprake ka konstatuar se dy aktakuzat e konfirmuara në rastin 10 dhe 11 i ngarkojnë tre të akuzuarit për vepra të njëjta penale duke specifikuar që kanë vepruar si grup. Po ashtu, në vendim thuhet se vërehet që aktakuzat e konfirmuara në këto dy raste lindin nga të njëjtat pretendime faktike.

Në bazë të kësaj, gjyqtari ka vendosur që ZPS-së t’i jep leje për të ndryshuar aktakuzën e konfirmuar në rastin 10 duke iu referuar amendamentit të parë, ndërsa amendamenti i dytë u refuzua.

Gjithashtu, gjyqtari Guillou udhëzoi ZPS-në që të paraqesë një kërkesë për ndryshimin e aktakuzës së konfirmuar në rastin 10 sipas amendamentit të dytë, por në përputhje me dispozitat e Rregullores 86.

Pasi u miratua bashkimi i dy aktakuzave, Guillou vendosi se çështja e përbashkët do të vazhdojë me numrin KSC-BC-2023-10, i cili do të riemërohet në atë mënyrë që të përfshihen të tre të akuzuarit.

Ndryshe, mbrojtja e Ismet Bahtjarit, përmes avokatit Felicity Gerry KC kishte dorëzuar pranë DhSK-së një mocion me anë të secilit ka kundërshtuar bashkimin e çështjeve “Bahtjari dhe Januzi” me atë të Haxhi Shalës.

Zyra e Prokurorit të Specializuar (ZPS) kishte dorëzuar me 12 janar aktakuzën e përbashkët për çështjen gjyqësore të Sabit Januzit dhe Ismet Bahtjarit dhe atë të Haxhi Shalës.

Në seancën e parë, para gjyqtarit të procedurës paraprake, Nicolas Guillou, Bahtjari dhe Januzi janë deklaruar të pafajshëm për akuzat që iu vihen barrë nga Zyra e Prokurorit të Specializuar.

Aktakuza ndaj tyre është ngritur më 4 tetor 2023, me të cilën ngarkohen se kanë tentuar të bindnin një dëshmitar të mos japë dëshmi.

Ata akuzohen për përpjekje për pengim të personave zyrtarë për kryerjen e detyrës zyrtare, me anë të kërcënimit të rëndë, midis më së paku 5 dhe 12 prillit 2023, vepër penale kundër rendit publik, e ndëshkueshme në bazë të neneve 17, 21, 28, 31, 33, 35 dhe 401 (1) dhe (5) të KPK-së, dhe neneve 15 (2) dhe 16 (3) të Ligjit.

Po ashtu, për përpjekje për pengim të personave zyrtarë për kryerjen e detyrës zyrtare, me anë të pjesëmarrjes në veprimin e përbashkët të një grupi, midis më së paku 5 dhe 12 prillit 2023, vepër penale kundër rendit publik, e ndëshkueshme në bazë të neneve 17, 21, 28, 33, 35, dhe 401 (2) dhe (5) të KPK-së, dhe neneve 15 (2) dhe 16 (3) të Ligjit. Po ashtu, për përpjekje për frikësim gjatë procedurës penale, midis më së paku 5 dhe 12 prillit 2023, vepër penale kundër administrimit të drejtësisë dhe administratës publike, e ndëshkueshme në bazë të neneve 17, 21, 31, 33, 35 dhe 387 të KPK-së, dhe neneve 15(2) dhe 16 (3) të Ligjit.

Më 6 tetor, në një njoftim të Zyrës së Prokurorit të Specializuar është thënë se Ismet Bahtjari dhe Sabit Januzi janë arrestuar dhe transferuar në Hagë nën dyshimin se kanë tentuar të bindnin një dëshmitar të mos japë dëshmi.

Sipas aktakuzës, Sabit Januzi dhe Ismet Bahtjari, përmes kërcënimit të rëndë dhe veprimit të përbashkët të një grupi personash në të cilin të dy morën pjesë, tentuan të pengonin persona zyrtarë, si gjykatës, prokurorë, zyrtarë të gjykatës, zyrtarë të prokurorisë apo persona të autorizuar nga gjykata ose prokuroria, në kryerjen e detyrave zyrtare.

Kurse, në aktakuzën e 12 dhjetorit 2023, Kryeprokurorja e Specializuar, Kimberly West akuzon Shalën për frikësim të dëshmitarëve, tentativë me anë të kërcënimit të rëndë për të penguar personat zyrtarë në kryerjen e detyrave zyrtare individualisht dhe me pjesëmarrje në grup. Detajet nga aktakuza ndaj Shalës, mund t’i gjeni: KËTU. /BetimipërDrejtësi

Policia e Kosovës në bashkëpunim me Doganën e Kosovës kanë parandaluar kontrabandën e 250 pakove “Argeta”, dje në Novosellë të Kamenicës.

Në njoftimin e lëshuar thuhet se ishte vërejtur një veturë me targa vendore, për të cilën kishte informatë se ishte duke kontrabanduar mallra nga Serbia përmes fshatit Breznicë.

“Gjatë kontrollit të automjetit i cili drejtohej nga H.Gj., (viti i lindjes 1972, mashkull kosovar), është vërejtur se i dyshuari kishte pasur të ngarkuar rreth 250 pako me argeta me nga 14 copë gjithsej 3500 copë për të cilat nuk kishte asnjë dokument dhe dyshohet se kanë prejardhje nga Serbia”.

“Lidhur me rastin të gjitha veprimet janë ndërmarrë në bashkëpunim me Prokurorinë e Shtetit, ku me urdhër të prokurorit kompetent malli i kontrabanduar sekuestrohet dhe dërgohet në terminalin doganor-Dheu i Bardhë”, thuhet në njoftim.

Senati amerikan ka miratuar paketën e ndihmës në vlerë prej 95.34 miliardë dollarësh, ku përfshihet edhe ndihma ushtarake dhe ekonomike për Ukrainën në vlerë prej 61 miliardë dollarësh.

Megjithatë, fati i këtij legjislacioni mbetet i paqartë, pasi republikanët që kontrollojnë Dhomën e Përfaqësuesve kanë sinjalizuar se nuk do të mbështesin këto masa.

Senatorët amerikanë votuan me 70 vota për dhe 29 ishin kundër këtij projektligji, duke tejkaluar 60 votat e nevojshme për miratim. Kjo u arrit pasi 22 senatorë republikanë iu bashkuan atyre demokratë për të mbështetur këtë paketë të ndihmës.

Në paketën e miratuar përfshihen edhe 14 miliardë dollarë ndihmë për Izraelin dhe ndihmë për shtetet e tjera.

Presidenti ukrainas, Volodymyr Zelensky, falënderoi Senatin amerikan për miratimin e këtij legjislacioni.

“Për ne në Ukrainë, vazhdimi i ndihmës së SHBA-së na ndihmon të shpëtojmë jetë nga terrori rus. Kjo nënkupton se jeta do të vazhdojë në qytetet tona dhe do të triumfojë ndaj luftës”, shkroi ai në X, që më herët njihej si Twitter.

“Ndihma amerikane sjell më afër paqen në Ukrainë dhe rivendos stabilitetin botëror, duke rezultuar në rritje të sigurisë dhe prosperitetit për të gjithë”.

Ndihma financiare dhe ushtarake amerikane ka qenë thelbësore për Ukrainën, shtet që po lufton kundër pushtimit që Rusia nisi pothuajse dy vjet më parë.