Category: Lajme

Një zyrtare e bankës në Podujevë ka raportuar në Polici se përgjatë 5 viteve, të dyshuar kanë deponuar 7 mijë e 380 monedha 2-euroshe të falsifikuara.

Sipas njoftimit të Policisë, ankuesja – zyrtare e bankës, i ka dërguar monedhat në Polici, derisa për këtë rast kanë filluar hetimet.

“Rr. Bulevardi i Dëshmorëve, Podujevë 13.02.2024 – 10:00. Ankuesi femër kosovare-zyrtare e bankës, ka sjellë në stacion policor 7380 monedha metalike nga 2 € që dyshohet se janë të falsifikuara. Sipas ankuesit paratë janë deponuar në bankë nga klientë të ndryshëm gjatë një periudhe 5 vjeçare. Lidhur me rastin është njoftuar prokurori, ndërsa rasti është duke u hetuar”, thuhet në raportin policor.

Koreja e Veriut ka gjuajtur disa raketa lundruese në det. Ky është testimi i pestë i armëve të tilla që nga janari, sipas ushtrisë jugkoreane, testime që kanë rritur tensionet në rajon.

Shtabi i Përgjithshëm i Koresë së Jugut tha se së bashku me ushtrinë amerikane po analizojnë lëshimet e raketave që u detektuan në ujërat në verilindje dhe në lindje të qytetit Vonsan. Ushtria jugkoreane nuk ofroi detaje për numrin e saktë të raketave të lëshuara apo sa gjatë ato fluturuan.

Ende është e paqartë nëse raketat u lëshuan nga toka apo nga deti.

“Ushtria jonë ka rritur vëzhgimin dhe vigjilencën dhe po punon ngushtë me partnerët amerikanë, duke monitoruar nga afër sinjalet e aktivitetit të mëtejmë nga Koreja e Veriut”, tha Shtabi i Përgjithshëm i ushtrisë së Koresë së Jugut.

Ekspertët kanë thënë se Koreja e Veriut po rrit presionin ndaj rivalëve në vitin kur Koreja e Jugut dhe SHBA-ja mbajnë zgjedhje presidenciale, duke tentuar që të detyrojë Uashingtonin që të pranojë idenë që Veriut është një fuqi bërthamore dhe të nxjerrë koncesione ekonomike dhe të sigurisë nga ky pozicion.

Lideri verikorean, Kim Jong Un, ka lëshuar deklarata luftënxitëse ndaj Koresë së Jugut, përfshirë edhe deklaratën se ai do të heqë dorë nga objektivi për pajtim me këtë shtet dhe duke kërcënuar se do ta asgjësojë Jugun me armë bërthamore nëse e provokon Veriun.

Ndryshe, raketat lundruese janë të dizajnuara që të manovrohen më lehtë në fluturime sikurse ato me avionë të vegjël. Këto raketa janë në mesin e një numri në rritje të armëve që po zhvillon Veriu, së bashku me raketat balistike që janë të dizajnuara të lëshohen nga toka dhe deti.

Testimi i së mërkurës është i gjashti gjatë këtij viti i Veriut, nëse përfshihet edhe testimi i 14 janarit, kur Peniani testoi raketën e parë me rreze të mesme veprimi, që operon me karburante të ngurta. Këto testime shfaqin përpjekjet e këtij shteti për të avancuar armatimet e tij, me qëllim që armët të arrijnë të shënjestrojnë caqet amerikane në Paqësor, përfshirë edhe qendrën ushtarake në Guam.

Koreja e Veriut më herët gjatë vitit ka testuar edhe raketa lundruese që lëshohen nga nëndetëset dhe raketa lundruese me rreze të gjatë veprimi, që potencialisht mund të arrijnë bazat ushtarake amerikane në Japoni.

SHBA-ja, Koreja e Jugut dhe Japonia kanë shpeshtuar stërvitjet e përbashkëta ushtarake dhe po forcojnë strategjitë e tyre të parandalimit bërthamor./REL/

Forumi i Rinisë së Lidhjes Demokratike të Kosovës, kanë zhvilluar të mërkurën një aksion simbolik para ndërtesës së Qeverisë. Një performancë artistike, në një zemër që simbolizon 14 shkurtin – Ditën e të Dashuruarve, kanë shkruar “Zemër ke dështu!”, raporton EO.

Ata kanë shpërndarë fletushka në formë të zemrës për qytetarët, në të cilat shkruhet “Me zemrën në darkë, për zemër jashtë vendit”, “Zemra të mban gjallë, por t’lëshon kur të vjen fatura”, “Zemrën plot, kuletën thatë”.

Kryetari i Forumit Rinor të LDK-së, Paris Guri, tha se aksioni i tyre ka për qëllim t’ia përkujtojnë Qeverisë që po u përfundon mandati “me dështime në çdo fushë”.

Guri para mediave përmendi siç tha dështimet e për këto vite qeverisjeje.

“Sot në Ditën e të Dashuruarve, jemi mbledhur këtu me një aksion simbolik për t’ia rikujtuar Qeverise se po u përfundon mandati me dështime në përmirësimin e jetës së qytetareve në Kosove në çdo fushë. Në vitin e saj të katërt, kjo Qeveri po vazhdon me dështime në arsim, në shëndetësi, në ekonomi, në marrëdhënie ndërkombëtare, në ngritjen e mirëqenies së qytetareve, në energji, dhe në secilën sferë tjetër. Të rinjtë e vendit tonë, ashtu si secili qytetarë i Kosovës, janë duke u përballur me një depresion kolektiv të shkaktuar nga popullistët të cilët kanë braktisur gjithçka, përfshirë edhe shtresën me vitale të shoqërisë sonë, rininë”.

“Problemet me të cilat ballafaqohemi sot, nga shtrenjtimi i produkteve bazike për jetesë dhe i energjisë elektrike, deri tek dështimet e njëpasnjëshme në arsim e shëndetësi që shpërfaqen me debaklin në testin PISA, me listat e gjata të pritjes në spitalet tona dhe me qytetarët që duhet të udhëtojnë për trajtim jashtë vendit, po e bëjnë jetën tonë këtu te papërballueshme”, deklaroi ai.

Sot janë bërë tri vjet nga fitorja e Lëvizjes Vetëvendosje në zgjedhjet e 14 shkurtit të vitit 2021. Qeveria e drejtuar nga kryeministri Albin Kurti, sipas analistëve politikë, nuk ka sjell ndryshime të mëdha në zhvillimin e vendit, por theksojnë rolin e ekzekutivit në vendosjen e sundimit të ligjit në pjesën veriore të vendit. Sipas tyre, gjatë udhëheqjes së Kurtit, veriu po frymon më ndryshe sesa më parë si dhe po luftohen grupet kriminale dhe terroriste atje.

Analisti politik, Arton Demhasaj, thotë për KosovaPress se në veri ka më shumë shtrirje të sundimit të ligjit, por sipas tij, vendi po vazhdon të mbetet nën masa ndëshkuese të Bashkimit Evropian për shkak të mosshpalljes së zgjedhjeve të reja në veri.

“Sa i përket veriut ka pasur lëvizje për shkak se policia tashmë është më prezente, mund të themi se grupet terroriste që janë vërtetuar me rastin e 24 shtatorit në Banjskë, pak a shumë janë larguar nga ajo pjesë. Veriu po frymon pak më ndryshe sesa ka qenë para dy apo tri viteve, por prapë se prapë gjithçka po lidhet me dialogut. Kosova ka mbetur e stagnuar në procesin e dialogut, janë dy marrëveshje që janë arritur nga kjo qeveri dhe presioni ndërkombëtar për zbatimin e këtyre marrëveshjeve është shumë i madh. Kosova akoma mbetet e sanksionuar nga Bashkimi Evropian pikërisht për shkak të situatës në veri”, thotë Demhasaj.

Në anën tjetër, analisti tjetër politik, Gazmir Raci, thotë se shtrirja e sovranitetit në veri është suksesi më i madh i Qeverisë Kurti.

Ai deklaron për KosovaPress se ekzekutivi ka një rezultat të jashtëzakonshëm në shpartallimin e grupeve kriminale në veri dhe luftimin e kontrabandës.

“Është rezultat i jashtëzakonshëm qasja ndaj veriut dhe sidomos në shpartallimin e grupeve kriminale në veri dhe jo hyrja në bisedime me grupe kriminale sa për të qeverisur koalicionin në Prishtinë, përmes Listës Serbe. Mendoj se rendi dhe ligji në veri, lufta kundër krimit, kontrabandës, mbi 15 laborator të narkotikëve janë mbyllur në veri. A e dini çfarë dëmi të madh i janë shkaktuar Kosovës në ato laboratorë, jo vetëm në aspektin financiar, por edhe në aspektin njerëzor. Kriptovalutat, krimi në barna, ka sektorë të ndryshëm që lufta kundër krimit dhe korrupsionit ka progres të jashtëzakonshëm”, thekson ai.

Megjithatë, analisti Demahasaj, shton se Qeveria Kurti në rrafshin e brendshëm ka qenë e dobët, pasi s’ka realizuar ndonjë reformë ose ndryshim që do të ishte i prekshëm për qytetarët.

Ai përmend dikasterin e arsimit, shëndetësisë, reformat në drejtësi dhe zhvillimit ekonomik ku ka çaluar më së shumti Qeveria Kurti.

Sipas tij, Kurti s’ka bërë progres as në fuqizimin ndërkombëtar të Kosovës, sigurimin e njohjeve të reja dhe as anëtarësimin në ndonjë organizatë ndërkombëtare.

“Mund të themi se relativisht ka qenë një qeverisje e dobët për shkak se në aspektin e brendshëm nuk ka pasur ndonjë reformë apo ndryshim të madh që mundet me qenë e prekshme për qytetarët. S’ka pas ndryshime as në aspektin e arsimit, shëndetësisë dhe as të zhvillimit ekonomik ose të tregut energjetik. Në një mënyrë Kosova ka stagnuar dhe ka mbetur aty ku ka qenë si para tri viteve. Njëjtë mund të themi se është situata edhe sa i përket reformave që janë filluar nga kjo qeveri, si reforma në drejtësi, siç kanë përmendur për Vettingun e gjëra të tjera. Por tri vjet kanë shkuar dhe akoma jemi në start të diskutimit për reformën në drejtësi. Për këto tri vite nuk ka ndodhur ndonjë ndryshim i madh, të paktën nga ajo që ka proklamuar LVV-ja. Njëkohësisht mund të themi se kanë vazhduar punësimet partiake, punësimet politike në krejt institucionet e pavarura, që sish dashur me qenë”, thekson Demhasaj.

Partia në pushtet, Lëvizja Vetëvendosje, në zgjedhjet e vitit 2021 kishte fituar mbi 50 për qind të votave, ku edhe e vetme ka formuar kabinetin qeveritar.

Policia e Kosovës ka dhënë sot detaje të reja për vdekjen e shtetases amerikane në Qendrën e Skijimit në Brezovicë.

Në raportin 24-orësh thuhet se ajo ishte gjetur nga ekipet e kërkim-shpëtimit e vdekur në vendin e quajtur “Foleja e Shqiponjës”.

Sipas bashkëshortit të saj, atë dyshohet se e ka zënë orteku i borës.

Me vendim të prokurorit trupi i pajetë i viktimës është dërguar në IML për obduksion.

“Qendra e Skijimit, Brezovicë 13.02.2024 – 15:35. Një femër shtetase Amerikane është gjetur nga ekipet e kërkim-shpëtimit pa shenja jete në vendin e quajtur “Foleja e Shqiponjës”. Viktima sipas bashkëshortit të saj (shtetas britanik), me të cilin ishin duke skijuar bashkë, dyshohet se është zënë nga orteku i borës. Me vendim të prokurorit trupi i pajetë i viktimës është dërguar në IML për obduksion”, thuhet në njoftimin e policisë.

Numri i madh i aksidenteve në trafik po vazhdon të jetë shqetësues, derisa një aksident i tillë ka ndodhur mëngjesin e sotëm në rrugën e “Gjilanit” në Ferizaj.

Në pamjet e siguruara nga ATV-ja shihet se si pasojë e një vetëaksidenti, një veturë ka përfunduar në shtegun e dedikuar për këmbësor.

Sipas burimeve të ATV-së, janë shkaktuar dëme materiale, ndërsa nuk raportohet për ndonjë të lënduar.

Ndërkohë, Policia ka dalë në vendin e ngjarjes./ATVLIVE.TV/

Kryeministri i Republikës së Kosovës, Albin Kurti, priti ditën e djeshme në takim lamtumirës ambasadorin e Mbretërisë së Bashkuar, Nicholas Abbott.

Ky takim u zhvillua pas pritjes së organizuar nga Zyra e Kryeministrit për ambasadorin më 1 shkurt.

Në këtë takim, kryeministri Kurti e falënderoi ambasadorin Abbott për punën, dedikimin e tij dhe bashkëpunimin gjatë gjithë mandatit.

Gjatë bisedës, ata reflektuan mbi arritjet e qeverisë, sfidat e mundësitë që paraqiten në rrugën tutje drejt zhvillimit dhe progresit.

Gjithashtu u përmend dhe rëndësia që shënon ky vit në 25-vjetorin e ndërhyrjes së NATO-s, ku mbështetja e Mbretërisë së Bashkuar dhe ajo e shumë individëve luajti rol kyç në ndaljen e gjenocidit të Serbisë në Kosovë.

Ambasadori Abbott ka kontribuar në mënyrë të çmueshme në ruajtjen dhe thellimin e marrëdhënieve mes Kosovës dhe Mbretërisë së Bashkuar, e si vend aleat dhe partner, ajo do të vazhdojë dhe me ambasadorin e ardhshëm.

Kryeministri Kurti gjithashtu e uroi ambasadorin Abbott për detyrën e tij të radhës dhe i dëshiroi suksese të mëtejme.

Dy të dyshuar janë paraqitur dje në polici, në Prizren, pasi një ditë më parë u kishin shkaktuar lëndime të rënda trupore dy të dyshuarve të tjerë.

Rasti është duke u trajtuar si vrasje në tentativë.

“Janë paraqitur në stacion dy të dyshuar meshkuj kosovarë të cilët u kishin shkaktuar lëndime të rënda trupore dy viktimave meshkuj kosovarë”, thuhet në raportin e Policisë.

Njoftohet se të dyshuarit pas intervistimit, me vendim të prokurorit janë dërguar në mbajtje.

14 Shkurti është Dita Ndërkombëtare e Epilepsisë. Ditë e shënuar e cila promovon vetëdijësimin dhe ndërgjegjësimin pёr epilepsinë nё mё shumё se 130 vende tё ndryshme tё botёs duke llogaritur edhe Kosovën.

Çdo vit nё tё hёnёn e dytё tё muajit shkurt njerëzit mblidhen sё bashku tё njoftohen mbi problemet me tё cilat ballafaqohen personat qё vuajnë nga epilepsia dhe anëtarët e familjeve tё tyre.

Qëllimi kryesor i shënimit të kësaj dite është ngritja e vetëdijes për nevojën e përmirësimit të tretmanit dhe kujdesin për 6 milionë njerëz në Evropë të cilët konsiderohen se e kanë epilepsinë.

Arsyeja e shënimit të kësaj dite në Kosovë është thirrje për aksion për të gjithë ata që me kontributin e tyre do te përkrahin luftën kundër epilepsisë.

Në botë janë të prekur më shumë se 50 milionë njerëz, e kjo e bënë këtë një problem të rëndësishëm në shëndetin publik. Në të kaluarën kanë ekzistuar shumë paragjykime dhe dogma për epilepsinë. Sot, qëndrimet bashkëkohore të ILAE tregojnë se personat me epilepsi mund të jetojnë dhe punojnë normalisht, sikurse çdo individ tjetër i shëndoshë.

Kriza epileptike shkaktohet nga zbrazja enorme e qelizave te eksituara nervore. Një sulm epileptik nuk do të thotë epilepsi. Meshkujt vuajnë pak më shumë se femrat. Epilepsia mund të fillojë në çdo moshë por më e zakonshme është në fëmijëri dhe në moshat e shtyra mbi 65-vjeç.

Deri në 70% e personave me epilepsi kanë kontrolle të plotë të krizave me përdorimin e terapisë antiepileptikë. Terapia për epilepsinë doemos duhet të merret me rregull, ashtu si është udhëzuar nga neurologu/epileptologu, me kontrolle të rregullta, si dhe kontrolli i ilaçit në gjak dhe EEG.

Ngasja e automjetit kërkon një qasje individuale, edhe pse nuk rekomandohet vozitje profesionale. Në më shumë vende të botës, personave që s’kanë pasur sulm në periudhë prej 1-3 vjet, u lejohet ngasja e automjetit nën kontroll.

Shtatzënia tek femrat me epilepsi duhet të jetë e planifikuar dhe në konsultim me epileptologun. Personat me epilepsi duhet të jetojnë dhe të punojnë në një atmosferë normale e të shëndoshë, me përkrahje të familjes dhe mjedisit shoqëror.