Category: Lajme

Përgatiti: Kastriot Tahiri

Në rregulloren e re, e cila aktualisht është në diskutim publik, parashihet që nëpunësit e kategorisë profesionale, specialistëve, kategorisë të nivelit të ulët, të mesëm dhe të lartë drejtues në sektorin e shëndetësisë, t’iu nënshtrohen një vlerësimi.

Në ketë projekt- rregullore, parashihet vlerësimi i rezultateve në punë, sjellja profesionale dhe objektivat e punës. Ndonëse në diskutim publik, në hartimin e rregullores, nuk morën pjesë ata të cilët do të vlerësohen.

Kryetari i Odës së Mjekëve, Pleurat Sejdiu, tha se rregullorja ka mangësi. Madje nuk pret që të ketë as rezultate.

“Nuk do të ketë rezultat, sepse ajo që është paraqitur në përgjithësi është vetëm 42 për qind e vlerësimit të një punëtori shëndetësor. Te ana profesionale, duhet par cilat janë indikatorët? Indikator duhet me u bazua në protokollet klinike, ku janë protokollet klinike?. Ka shumë mangësi dhe do i japim komentet tona”, tha Sejdiu.

Oda e Mjekëve madje nuk e di as si do të bëhet vlerësimi i punës së profesionistëve shëndetësor. Megjithatë kërkohet që kurdo që të ndodhë të jenë bëhet nga persona të kualifikuar.
“Janë vetëm termat administrativ asgjë profesionale, ndërsa vlerësimi i punëtorëve shëndetësor është më shumë profesional. Është shkencë në vete çështja e vlerësimit të punëtorëve shëndetësor sepse duhet të nxirren rezultatet e të bëhen përmirësime nga sistemi”, tha Sejdiu.

Megjithatë, Shoqata për të Drejtat e Pacientëve me këtë rregullore po pajtohet në një pikë. Respektivisht, pika e vlerësimit të sjelljes profesionale.

“Kjo rregullore është e mirëseardhur për faktin se stafi shëndetësor aktualisht nuk ka mbikëqyrje të mjaftueshme e cila po ndikon në vëllimin e punës, cilësinë dhe sigurinë e shërbimit të ofruar ndaj pacientëve. Është shumë e rëndësishme se si do të funksionoj në praktikë, pasi që vendi ka shumë dokumente të mira por që nuk jam zbatuar”, tha Besim Kodra nga Shoqata për të Drejtat e Pacientëve.

Në lidhje me atë se kur dhe si pritet të behën këto vlerësime, ATV ka dërguar pyetje në Ministrinë e Shëndetësisë. Por askush nga ky dikaster nuk ktheu përgjigje.

Më shumë detaje i gjeni në Edicionin Qendror të lajmeve në videon më poshtë:

Përgatiti: Armand Hoti

Pemët qenë produkti më i shtrenjtuar në muajin janar me një rritje prej 13,6%.

Pas tyre, produktet tjera që iu rrit çmimi janë peshqit me 9,7% dhe perimet me 9,3%.

Sipas Agjencisë së Statistikave, inflacioni vjetor për muajin që shkoi ishte 1.8%. Kjo tregon për trend të rënies në tre muajt e fundit, meqë në nëntor inflacioni ishte 2,9%, teksa në dhjetor 2,3%.

Ekonomisti Mustafë Kadriaj thotë se janari nuk duhet të merret si muaj referente meqë edhe aktiviteti ekonomik në fillimvit është i ulët.

“Kur nuk ke fuqi blerëse reduktohet shporta e konsumit dhe si rezultat bien çmimet për faktin që nuk ka kujt t’I shet dhe bizneset tentojnë t’i përshtaten thjeshtë fuqisë blerëse, dhe kur bëhet krahasimi me muajin e fundit të vitit paraprak është diqka që muaji dhjetor është ndër muajt më të fuqishëm të fuqisë blerëse…në momentin që rritet fuqia blerëse, rritet kërkesa dhe si rezultat rriten çmimet. Si nga muaji në muaj mundë të mirren në vazhdimësi po jo si muaj krahasues”, tha Kadriaj.

Ky thotë paralajmëron se inflacioni të shënoj rritje të natyrshme nga muaji prill e tutje.

Ndërkaq, profesori i ekonomisë, Fidan Qerimi, numëron dy faktorë si shkak për rënien e inflacionit.

“Kjo mendoj që është si rrjedhojë e zvogëlimit Qeveritar të projekteve, Qeveria ka zgjedhur që të jetë më kursimtare në këtë drejtim dhe ky është ndikimi i parë. Ndikim tjetër është rritja e normave të inflacionit nga bankat sidomos nga Banka Qëndrore që reflekton edhe në rritjen e nivelit të normave të intertesit në banka komerciale. Ndikimi i flotacionit do ketë pasoja në ngritjen e papunësisë dhe rritjen e GDP-së”, tha Qerimi.

Sipas projeksioneve të Bankës Qendrore të Kosovës, për vitin 2024, inflacioni pritet të jetë 3,0%.

Më shumë detaje i gjeni në Edicionin Qendror të lajmeve në videon më poshtë:

Përgatiti: Arton Hamiti

Stadiumi i qytetit të Gjilanit, këtë pamje mund ta ketë edhe për një kohë. Në rast se paneli i Organit Shqyrtues i Prokurimit e merr parasysh rekomandimin e ekspertit pas ankesave, tenderi 15 milionësh i hapur në dhjetor të vitit të kaluar do të kthehet në pikën zero.

Pretendimet e kompanisë ankuese se Komuna e Gjilanit në dosjen e tenderit ka vendosur kritere që favorizojnë operatorë të caktuar, janë mbështetur nga ekspertja e autorizuar për këtë rast.

“Duke u bazuar në sqarimet e lartpërmendura, eksperti shqyrtues i propozon panelit të OSHP-së që ankesa e kompanisë ankuese të aprovohet si e bazuar, ndërsa njoftimi për kontratë të anulohet në mënyrë që Komuna e Gjilanit të bëjë përmirësimet e nevojshme në harmoni me nenin 53 të LPP-së”, thuhet në rekomandimin e ekspertit shqyrtues.

Rastet kur paneli i Organit Shqyrtues i Prokurimit vendos ta dëgjojë rekomandimin e ekspertit janë të shumta. Por, bazuar në dinamiken e punës së OSHP-së, duhet kohë.

Megjithatë Komuna e Gjilanit tha se nuk do të deklarohet për tenderin në fjalë deri në një vendim përfundimtar të OSHP-së.

Ndërkohë, kritika ndaj qeverisjes lokale, sa i përket procedurave të tenderimit ka edhe opozita në Gjilan.

Projekti për stadiumin e Gjilanit filloi në vitin 2016, teksa Zyra Kombëtare e Auditimit, gjatë vitit 2023 kishte konstatuar se MKRS-ja dhe Komuna e Gjilanit, nuk kanë ndjekur procedurat e duhura të prokurimit duke cenuar transparencën dhe konkurrencën.

Sidoqoftë, funksionalizimi i stadiumit të Gjilanit, është pjesë e planit për organizimin e Lojërave Mesdhetare 2030.

Më shumë detaje i gjeni në Edicionin Qendror të lajmeve në videon më poshtë:

Përgatiti: Fatlum Jashari

Qeveria ende nuk e ka finalizuar listën e projekteve për të cilat synon të përfitojë mbështetje financiare nga Plani i Rritjes i BE-së për Ballkanin Perëndimor.

Deri tani, Qeveria ka dorëzuar listën e reformave, përmes realizimit të së cilave mund të përfitojë pjesë nga fondi në vlerë të përgjithshme 6 miliardë euro, për të gjashtë vendet e Ballkanit Perëndimor.

“Sa i përket listës së projekteve, ai është aspekt drejt të cilit puna vijon. Momentalisht jemi në fazën e përcaktimit të planit të reformave me Komisionin Evropian, ndërsa faza e përpilimit të listës së projekteve do të vijojë pas dakordimit dhe vlerësimit të reformave në Planin e Rritjes. Kjo për arsye sepse projektet pritet që të ndihmojnë dhe lehtësojnë realizimin e reformave për rritje ekonomike. Kur të vijë momenti, lista e projekteve do të dorëzohet konform reformave e planit të dakorduar, dhe për këtë diskutimet e konsultimet me BE-në po vijojnë”, tha këshilltari i zëvendëskryeministrit Bislimi, Klisman Kadiu.

Pasi përmendi efektet e masave ndëshkuese të BE-së, eksperti i ekonomisë Safet Gërxhaliu, theksoi se në rastin e Kosovës, krahas reformave, niveli i përfitimit është i lidhur direkt me procesin e normalizimit të marrëdhënieve me Serbinë.

“Duhet të kuptohet që mekanizmi kyç i absorbimit të mjeteve janë projektet e gatshme dhe ato që kanë arsyeshmëri apo fizibilitet ekonomik dhe këto në Kosovë mungojnë. Në anën tjetër, është utopike të mendohet se ne mund të jemi përfitues të këtyre projekteve pa stabilitet politik”, tha Gërxhaliu.

Përtej kësaj, referuar aspekteve përgatitore dhe diplomacisë ekonomike, ai shtoi se Kosova rrezikon të marrë vetëm një pjesë vogël nga mjetet në dispozicion.

“Duhet të them me keqardhje që shumë vende të rajonit janë të parapërgatitura dhe përgatitura, aplikacionet i kanë ndërtuar shumë më herët, sepse kanë pasur informacione të dorës së parë përmes kanaleve diplomatike se këto mjete do të jenë në qarkullim. Në Kosovë shumë më tepër jemi marrë me agjendë politike sesa ekonomike”, tha Gërxhaliu.

Në prezantimin e planit në Prishtinë, në fund të Tetorit, presidentja e Komisionit Evropian, Ursula Von Der Leyen, tha se përfitimi varet nga reformat e brendshme dhe avancimi në procesin e normalizimit të marrëdhënieve me Serbinë.

Në fillim të muajit Shkurt, liderët e shteteve anëtare të BE-së i dhanë mbështetje Planit të Rritjes në Këshillin Evropian, teksa vijojnë diskutimet për marrëveshjen me Parlamentin lidhur me aspektet e financimit.

Plani i Rritjes me qëllim përafrimin ekonomik dhe infrastrukturor të Ballkanit Perëndimor me BE-në ndahet në mbështetje përmes granteve në vlerë 2 miliardë euro dhe 4 miliardë euro të tjera përmes kredive.

Më shumë detaje i gjeni në Edicionin Qendror të lajmeve në videon më poshtë:

Përgatiti: Pranvera Krasniqi

Për ta ulur numrin e qenve endacakë, komuna e Prishtinës premtoi nga 50 euro në muaj për këdo që adopton një kafshë të tillë.

Mirëpo ky projekt nuk i doli siç priste pushteti në kryeqytet, i udhëhequr nga Përparim Rama. Për 6 muaj, vetëm 54 qenë u morën nën përkujdesje.

Derisa nëpër rrugë mendohet se sillen edhe mbi 4900 tjerë.

“Ne kemi pasur një shpresë të madhe që me udhëzimin e ri administrativ të bëhet një ndryshim në trajtimin e kësaj problematike por përsëri mbeten kritere të njëjta përveç që ka kushte të reja për strehimoren”, tha shefi i sektorit për Shërbime Publike në Prishtinë, Habib Qorri.

Krahas kësaj, komuna ende as nuk e ka gjetur vendin e përshtatshëm për ta ndërtuar strehimoren për rreth 100 qenë endacakë.

“Veç se është duke u kërkuar një lokacion i përshtatshëm për t’i adoptuar qentë endacak, jemi në shqyrtim të kësaj…”, tha drejtori i Shërbimeve Publike në Prishtinë, Bekim Brestovci.

Opozitari Leutrim Retkoceri nga Partia Demokratike, po kërkon zgjidhje urgjente të këtij problemi.

“I kam dyshimet e mija, para gjitha këtyre fjalëve ata që po pësojnë më së shumti janë qytetarët andaj le të fillojnë dhe të veprojnë, të shihen rezultatet…”, tha Retkoceri.

Çdo ditë, 7 deri në 8 pacientë marrin trajtim mjekësor prej sulmeve nga qentë endacakë në Qendrën Kryesore të Mjekësisë Familjare në Prishtinë.

Më shumë detaje i gjeni në Edicionin Qendror të lajmeve në videon më poshtë:

Përgatiti: Kastriot Tahiri

Kështu kaq lirshëm si këta kaproj po lëvizte edhe një dre në Malësinë e Marecit, në komunën e Prishtinës, derisa u vra nga gjuetar ilegal.

Dy javë më parë, koka e kësaj kafshe u gjet e varur në pemë, e gëzofi në qese.

Vrasja e drerit është shkelje e ligjit për gjuetinë, dhe dënohet nga 1 mijë deri në 10 mijë euro.

Kryetari i Federatës së Gjuetarëve, Nuredin Ibishi, thotë se këtë vepër e kanë bërë ilegalët.

“Si specie janë të mbrojtura nuk ka të drejt askush me i gjuajt ata. Para pak kohësh e kemi pa një drerë të vrarë në teren në Marec. Kjo flet për gjuetinë ilegale, është e dënueshme, së pari nuk janë dhanë në menaxhim terrenet e Prishtinës. Gjuetarët ilegal që i vrasin në mënyrë të kundërligjshme, speciet e mbrojtura dhe speciet e tjera që janë në mungesë në Kosovë”, tha Ibishi.

Ndërsa fotografi i botës së egër, Arian Mavriqi, ngrit alarmin se ka edhe kafshë tjera që mbrohen me ligj në Kosovë, por janë në rrezik të vriten.

“Për fat të keq numri i drerëve nuk ka qenë i kënaqshëm që një kohë të gjatë. Këtë na vërteton edhe kamerat kurth që i kemi vendosur. Jemi në kulmin e rrezikshmërisë për tu zhdukur fare për shkak të gjuetisë ilegale. Për fat të keq në shënjestër eshët edhe ariu, e disa shpezë. Por më së shumti problemin e kemi te vrasja e kaprojve autokton edhe dhive të egra”, tha Mavriqi.

Sezoni i gjuetisë është hapur më 5 nëntor 2023, dhe tashmë është mbyllur më 29 janar.

Ndërkaq, dënimi sipas ligjit, nëse gjuetari gjuan kafshë të egra jashtë sezonit të hapur, është nga 1.000 deri 10.000 €.

Më shumë detaje i gjeni në Edicionin Qendror të lajmeve në videon më poshtë:

Dega e PDK-së në Itali ka organizuar një tubim madhështorë për nder të përvjetorit të pavarësisë së Kosovës.

Në këtë tubim në të cilin morën pjesë një numër i madh i shqiptarëve që jetojnë këtë shtet, prezent ishin edhe strukturat më të larta drejtuese të këtij subjekti.

Kreu i PDK-së, Memli Krasniqi në fjalën e tij ka kujtuar gjithë ata që janë më meritorët për lirinë e Kosovës, dëshmorët e Kombit.

Krasniqi ka folur edhe për krerët e UÇK-së që ndodhen në Hagë, pa të cilët, sipas tij, është e zbehtë çdo festë.

Kreu i PDK-së ka thënë se zotimi i tij dhe subjektit që ai e drejton është që ta bëjë Kosovën një shtet me të cilin krenohen qytetarët e saj dhe një shtet dinjitoz.

Ai ka çmuar kontributin e diasporës dhënë para, gjatë dhe pas lufte.

Krasniqi ka përgëzuar degën e PDK-së në Itali për organizimin e sotëm.

Ndërsa, kryetari i PDK-së në Itali, Patriot Krasniqi ka thënë se po e shënojnë edhe këtë përvjetor pa prezencën e idetorëve dhe kreatorëve të UÇK-së dhe pavarësisë së Kosovës.

Krasniqi i ka bërë thirrje të gjithëve që sa më shumë ta mbështesin PDK-në veçanërisht në diasporë, pasi sipas tij, PDK është adresa e dëshmuar në të gjitha etapat.

Të pranishmëve me nga një fjalë rasti i janë drejtuar edhe Vlora Çitaku, Elmi Reçica dhe Ragip Xhaka.