Category: Lajme

Pas vdekjes së vajzës 4-vjeçare nga Gjakova, ka reaguar edhe ministri i Shëndetësisë, Arben Vitia.

Vitia përmes një shkrimi në Facebook, ka thënë se janë të njoftuar për pretendimet e prindërve në raport me trajtimin e 4-vjeçares nga ana e mjekëve, duke shtuar se kushdo që është përgjegjës në sistemin shëndetësor duhet të ketë masa, pa vonesë.

“Humbja e jetës së vajzës 4 vjeçare nga Gjakova na ka prekur të gjithëve. Jemi informuar për përvojën që kanë pasur prindërit nga deklarimet e tyre publike. Për cilindo që ka mundur të jetë përgjegjës në sistemin shëndetësor duhet të ketë masa, pa vonesë. I bëj thirrje organeve të hetimit që sa më parë rasti të hetohet në çdo detaj. Ngushëllime të sinqerta familjes dhe të afërmve!”,  ka shkruar ai.

Shtimi i shpenzimeve në armatime të nxitura nga lufta në Ukrainë dhe konflikti Izrael-Gaza i ka sjellë fitime rekord prodhuesve britanikë të armëve ‘BAE Systems’ vitin e kaluar, teksa rritje e mëtejshme pritet dhe në vitin në vijim.

Kompania e listuar në bursën FTSE 100 regjistronte fitime në 2.7 miliardë paundë pa llogaritur interesin, nga shitjet e armëve në rreth 25.3 miliardë paundë në vitin 2023, shkruan e përditshmja The Guardian.

Aksionet e kompanive të armatimeve në përgjithesi janë rritur në dy vitet e fundit pas nisjes së luftës së Rusisë në Ukrainë në shkurt 2022 teksa qeveritë kanë rivlerësuar planet e tyre të shpenzimeve ushtarake.

Lufta brutale në Lindjen e Mesme e nisur më 7 tetor ishte një tjetër faktor, e nxitur nga sulmi i papritur i Hamas brenda Izraelit ku raportohet se u vranë rreth 1000 izraelitë, çka u pasua më një fushatë të gjerë bombardimesh nga ushtria izraelite në Gaza, ku kanë humbur jetën më shumë se 25 000 palestinezë.

Ndërkohë grupi britanik BAE Systems shton fitimet e saj teksa ka zgjeruar interesat dhe në ndërtimin e nëndetëseve, tankeve dhe avionëve luftarakë, përveç armëve e municioneve.

Kreu i saj Charles Woodburn, tha se prodhuesi priste rritje të mëtejshme biznesi në vitet në vijim.

“Mungesa e stabilitetit në Evropë dhe në Lindjen e Mesme, ashtu si dhe në pjesë të tjera të botës ka sjellë në fokus rolin tonë në mbrojtje të sigurisë kombëtare”, tha ai sot për gazetarët.

“Megjithse shumica e volumit të shitjeve vjen nga programe ekzistuese para konfliktit në Ukrainë, porosi të reja kanë ardhur për blinda të rëndë dhe municione”.

BAE është krijuar në 1999 nga shkrirja e grupeve Marconi Electronic Systems dhe kompanisë shtetërore britanike të aeronautikës British Aerospace, e Hawker Siddeley.

Grupi është përfshirë dhe në kontratën e fundit për ndërtimin e nëndetëseve bërthamore për Australinë, për të cilën Franca u ankua se i takonte asaj, si dhe një seri pajisjesh të luftës ajrore për Italinë, Japoninë e Britaninë.

Ëoodburn tha se ishte i kënaqur me vlerësimet në bursën e Londrës.

Ai shtonte se BAE Systems nuk do të bëjë si kompani të tjera që po listohen në bursën e SHBA, pasi biznesi po ecën mire dhe qeveria e ndalon të bjerë në pronësi të huaj. /tch

Qendra Klinike Universitare e Kosovës ka dalë me një sqarim lidhur me vdekjen e 4 vjeçares e cila vdiq të hënën në Qendrën Emergjente të QKUK-së, kishte pësuar infeksion akut të rëndë të shkallës së lartë – sepsë.

Në një reagim të Shërbimit Spitalor Klinik Universitar thuhet se pacientja ishte pranuar të dielën në mesditë nga Spitali i Gjakovës “Isa Grezda”.

Sipas njoftimit, pacientja ishte pranuar “me parametra vital dhe me gjendje mjaftë të rënduar shëndetësore”.

QKUK-ja ka thënë se në Qendrën Emergjente janë kryer të gjitha procedurat.

“Në Qendrën Emergjente të QKUK-së, kryhen të gjitha analizat laboratorike dhe ato diganostike – radiologjike, thirrën në konsultë edhe mjekët e lëmenjve përkatëse. Pas të gjitha konsultave, vendoset për trajtim të mëtejmë në Repartin Intensiv në Klinikën e Pediatrisë, me diagnozë të punës Sepsë (infeksion akut i rëndë i shkallës se lartë). Përkundër të gjitha masave reanimatore të ekipeve të mjekëve të Klinikës së Pediatrisë, për shkak të gjendjes së rënduar shëndetësore, fëmija ndërron jetë me datë 19 shkurt 2024”, thuhet në njoftim.

SHSKUK-ja ka thënë se ka kërkuar raporte të detajuara nga Spitali në Gjakovë dhe QKUK-ja.

Ky institucion ka apeluar që të mos ketë spekulime për rastin deri në rezultatet e hetuesisë, për të cilat është shprehur se do t’i marrë parasysh për veprime të mëtejme.

Presidenti rus, Vladimir Putin, i ka dhuruar liderit të Koresë së Veriut Kim Jong Un një makinë luksoze të prodhimit rus.

Media shtetërore e Phenianit tha se limuzina iu dorëzua ndihmësve kryesorë të Kim të dielën.

Zëdhënësi i Kremlinit, Dmitry Peskov, më vonë konfirmoi dhuratën, duke thënë se ishte një Aurus, veturë luksoze me përmasa të plota të llojit të përdorur nga vetë zoti Putin.

Dy vendet e izoluara ndërkombëtarisht kanë krijuar marrëdhënie të ngushta që nga pushtimi i Ukrainës nga Rusia.

Koreja e Veriut mendohet se po furnizon Rusinë me artileri, raketa dhe raketa balistike për luftën, pavarësisht sanksioneve ndërkombëtare ndaj të dy vendeve. Të dyja palët mohojnë shkeljen e sanksioneve.

Putin e mirëpriti Kim në Kozmodromin Vostochny në Lindjen e Largët Ruse shtatorin e kaluar, i cili ishte udhëtimi i tij i parë jashtë vendit në katër vjet.

Kim Jong-un besohet të jetë një entuziast i makinave dhe se ka një koleksion të automjeteve të huaja luksoze.

Motra e Kim, Yo Jong tha se “dhurata shërben si një demonstrim i qartë i marrëdhënieve të veçanta personale midis liderëve të lartë” të dy vendeve, në komentet e cituara nga agjencia shtetërore e lajmeve të Koresë së Veriut KCNA.

Por Ministria e Jashtme e Koresë së Jugut tha se dhurata shkeli sanksionet e Këshillit të Sigurimit të OKB-së kundër Koresë së Veriut, të cilat ndalojnë furnizimet e disa kategorive të automjeteve, përfshirë makinat luksoze.

Si Rusia ashtu edhe Koreja e Veriut kanë treguar se Putin do të vizitojë Phenianin në të ardhmen e afërt. /BBC/

Guvernatori i Bankës Qendrore të Kosovës, Ahmet Ismaili së bashku me bashkëpunëtorë priti në takim ambasadorin e Austrisë në vendin tonë, Georg Schnetzer, shoqëruar nga zëvendës shefja e Misionit, Clarissa Castek.

Guvernatori Ismaili në fillim të takimit e ka njoftuar ambasadorin Schnetzer dhe bashkëpunëtoren e tij lidhur me nismat për avancimin e sistemit financiar, përfshirë projektin për modernizimin e sistemit të pagesave dhe synimin për anëtarësimin në Zonën e Vetme të Pagesave Euro të Bashkimit Evropian, i njohur si SEPA.

Në njoftim thuhet se ambasadori Schnetzer u informua edhe lidhur me Rregulloren për Operacione me Para të Gatshme, duke sqaruar aspektet kryesore, efektet dhe argumentet për pozicionin e saj. U sqarua se Rregullorja avancon integritetin e sistemit financiar dhe përafron Republikën e Kosovën me standardet e BE-së, si dhe ajo nuk ndalon apo kufizon pranimin e mjeteve në llogaritë bankare në Euro, nuk kufizon aktivitetin këmbimor që kryhen nga institucionet financiare bankare ose jo-bankare të licencuara nga BQK.

“Në takim u diskutua për mbështetjen që shteti austriak po i jep Republikës së Kosovës në proceset integruese, përfshirë këto aspekte lidhur me Sistemin e Kartonit të Gjelbër, Kodin ISO që lidhet me platformat botërore të pagesave dhe procese tjera me rëndësi të veçantë për vendin tone”, thuhet në komunikatë.

Guvernatori i BQK-së me këtë rast falënderoi Ambasadorin Schnetzer për mbështetjen e vazhdueshme të qeverisë së tij dhe popullit austriak për institucionet dhe popullin e Kosovës.
Gjithashtu, në takim u diskutua edhe për avancimin e kornizës rregullative dhe ligjore, duke përfshirë Ligjin për Bankat, Ligjin për Shërbimin e Pagesave dhe ligje tjera, të cilat kanë si synim përafrimin me direktiva të BE-së. Është biseduar lidhur me veprimet e ndërmarra ndaj parave të falsifikuara, si dhe planet tjera për fuqizimin e integritetit të sistemit financiar, me praktikat më të mira ndërkombëtare.

Në këtë aspekt, Ambasadori austriak u njoftua edhe për Planin e BQK-së për zbatimin e kësaj Rregulloreje në praktikë, si dhe veprimet për lehtësimin e efekteve të saj, krahas angazhimit konstruktiv të BQK-së për lehtësimin e transferimit të mjeteve sipas modelit të propozuar dhe gatishmërisë për të diskutuar opsionet e mundshme ligjore.

Në fund të takimit u theksua se BQK në mënyrë aktive po vazhdon me aktivitete të informimit dhe sensibilizimit, përfshirë lëshimin e linjës pa pagesë të dedikuar për qytetarët tanë dhe materiale tjera informuese, duke ftuar ata që ende nuk kanë llogari të hapin një të tillë te secila bankë, e cila për grupe të cenueshme nuk ka tarifë të hapjes e as të mirëmbajtjes, nga 1 janari 2024 me Rregulloren e BQK-së për Qasje në Llogari Pagese për Shërbime Bazike.

Partitë opozitare në Kuvendin e Kosovës kanë vazhduar kritikat ndaj Qeverisë së Kosovës për rrezikim të aleancave me ShBA-në dhe Bashkimin Evropian. Sipas Partisë Demokratike të Kosovës(PDK) dhe Aleancës për Ardhmërinë e Kosovës(AAK), ekzekutivi ka dështuar në menaxhimin e duhur të vendimit të Bankës Qendrore të Kosovës për rregulloren e re, ku ndalohet përdorimi i dinarit serb. Megjithatë, në partinë në pushtet, Lëvizjen Vetëvendosje, thonë se komunikimi me ShBA-në dhe vendet të tjera aleate po vazhdon normalisht dhe se dallimet e vetme janë në afatet kohore të zbatimit të vendimit dhe jo në çështje përmbajtjesore.

Deputetja e PDK-së, Blerta Deliu-Kodra, tha se vendimi për ndalimin e dinarit serb është kushtetues, por duhet të ketë koordinim me aleatët ndërkombëtar për zbatimin e tij.

“Kemi kërkuar që për procese të cilat janë të rëndësishme edhe për çështjen e dinarit, natyrisht që është një vendim kushtetues, këtë e kemi thënë disa herë. Por të ketë koordinim me partnerët tanë, mos të ketë tensione dhe të ketë një bashkërendim të agjendës sonë. Ne kemi shënuar ditë më parë përvjetorin e pavarësisë së Kosovës, s’ka pasur asnjëherë përvjetor më të zbehtë. Kosova ka shënuar këtë përvjetor të pavarësisë pa miqtë të rëndësishëm, pa aleatë dhe ata që e kanë ndihmuar Kosovën në rrugëtimin e saj që nga bërja shtet dhe konsolidim. Kemi kërkuar tash e sa kohë, në kohën kur Kosova është nën sanksione dhe kur Kosova çdo ditë e më shumë po i cenon aleancat me partnerët, vetëm të ketë koordinim dhe qartësi në rrugëtimin tonë euro-atlantik”, tha ajo.

Më kritik u shfaq shefi i Grupit Parlamentar të AAK-së, Besnik Tahiri, i cili tha se marrëdhëniet e Kosovës me Unionin Evropian dhe ShBA-në kurrë s’kanë qenë më keq.

“Nuk është problemi që janë rreziku. Problemi është që marrëdhëniet e Kosovës me unionin evropian dhe ShBA-në kurrë s’kanë qenë më keq. Kjo është një temë që dihet botërisht. Kosova është nën sanksione, ndërsa Shtetet e Bashkuara të Amerikës e trajtojnë Kosovën jo si partnere si përpara, por si palë e diskutimit”, shtoi ai.

Në anën tjetër, shefja e Grupit Parlamentar të LVV-së, Mimoza Kusari-Lila, tha se me aleatët ndërkombëtar kanë pajtueshmëri për përmbajtjen e rregullores së BQK-së, por dallimet e vetme janë në aspektet kohore të zbatimit.

“Besoj se ka qenë mjaftueshëm e theksuar gjatë gjithë deklarimeve, në veçanti këto të 16 vjetorit të pavarësisë që të gjithë krerët shtetëror e shohin si të veçantë dhe të përhershme bashkëpunimin dhe partneritetin me ShBA-në dhe vendet të tjera mike, që i ndihmuan Kosovës në periudhën e çlirimit, shpalljes së pavarësisë dhe shtet-ndërtimit. Në këtë pikë mund të them se koordinimi dhe komunikimi po vazhdon me ta. Janë disa çështje të cilat, si në rastin e rregullores së BQK-së në të cilat nuk ka pasur dallime në parime, por ka pasur dallime në afatet kohore të zbatimit apo implementimit…Komunikimi vazhdon me ShBA-në dhe vendet të tjera por konsiderojmë se është çështje e Kosovës dhe zbatimit të Kushtetutës”, theksoi Kusari-Lila.

Këto komente ata i bën pas mbledhjes së Kryesisë së Kuvendit, e cila dështoi për shkak të mungesës së kuorumit. Megjithatë, kryetari i Kuvendit, Glauk Konjufca ka caktuar të enjten seancën plenare, me pika të papërfunduara nga seancat e kaluara.

Edhe sa i përket punës së Kuvendit, opozita u shpreh kritike ndaj mazhorancës, ku sipas tyre puna në legjislativ ka degraduar plotësisht.

“Çfarë po shohim tash e një kohë të gjatë është se ka një degradim të punës së Kuvendit. Janë diku 50 pika që presin që të shqyrtohen në Kuvendin e Kosovë, ndërkohë ne kemi zvarritje të agjendës legjislative për shkak të pafuqisë dhe degradimit të institucionit”, tha deputetja e PDK-së, Blerta Deliu-Kodra.

Ndërkaq, shefi i deputetëve të AAK-së, Besnik Tahiri, tha se mazhoranca ka një papërgjegjësi totale në Kuvend.

“Na kanë mbledhur 62 pika të rendit të ditës dhe Kuvendi vazhdon punën me avazin e vet. Kjo është një papërgjegjësi totale”, theksoi ai.

Derisa potencoi se kanë mbledhur nënshkrimet për thirrjen e një seance të jashtëzakonshme, javën e ardhshme sa i përket sigurimeve shëndetësore./KP/

Dëshmitari i 45-të i Zyrës së Prokurorit të Specializuar me kodin W04576, Hajrush Kurtaj, në gjykimin ndaj Hashim Thaçit dhe të tjerëve, e ka paralajmëruar prokurorin James Pace që nëse vazhdon të përdorë fjalën “rrenë”, ai pa marrë parasysh pasojat do të ndërpresë dëshminë e tij.

Paralajmërimi i Kurtajt erdhi pasi prokurori Pace i tha atij senën betimin e gjykatësve, informatat që ia ka dhënë ZPS-së në një intervistë në muajin shkurt të vitit 2020, nuk kanë qenë të vërteta, por gënjeshtër, raporton “Betimi për Drejtësi”.

“Prokuror, disa herë e përmende fjalën rrenë, rrenë nuk dëshiroj ta dëgjoj. Se ma herët thatë se për profesorin se ka rrejt. Nëse vazhdoni me këtë komunikim unë e ndërpres, pa marrë parasysh pasojat. Nuk mërzitna për pasoja absolut. Fjalën rrenë heke prej fjalorit”, tha Kurtaj.

Sipas dëshmitarit, prokurori edhe gjatë hetuesisë e ka përdorur fjalën “rrenë”.

“Edhe gjatë hetuesisë ke thënë, ka rrejtë profesori, keni rrejt ju. Fjalën rrenë e hekni, ose nga ky moment e ndërpres pa marrë parasysh pasojat. E di që jeni fuqi dhe mund të merrni masa, por për atë punë nuk mërzitna. Vetëm nuk toleroj që të përdoret fjala rrenë as për mua as për profesorin, as për një qytetarë të Republikës së Kosovës”, shtoi dëshmitari Kurtaj.

Ky debat filloi pasi prokurori Pace ia kujtoi dëshmitarit Kurtaj një intervistë të dhënë për ZPS-në në muajin shkurt të vitit 2020, ku ishte pyetur për një pjesë të librit të tij ku flet për një Plan Operativ të Shtabit të Përgjithshëm të UÇK-së, dhe ku në këtë intervistë të vitit 2020 kishte folur për informata që kishte lidhur me këtë plan. Ndërsa në dëshminë që është duke e dhënë sot, është duke e mohuar që di diçka për planin në fjalë.

Spitali i Përgjithshëm i Gjakovës ka reaguar pas raportimeve për vdekjen e një vazjë 4-vjeçare e cila fillimisht ishte trajtuar në këtë spital.

Në reagimin e tyre, ata kanë mohuar akuzat që janë ngritur nga familja për mostrajtimin e duhur të fëmijës së tyre, duke thënë se pati mbikëqyrje profesionale mjekësore.

“Spitali i Përgjithshëm “Isa Grezda”, në Gjakovë, në lidhje me raportimet për trajtimin e fëmiut (4 vjeçar), fillimisht ju njofton se me datë 16 shkurt 2024, rasti ishte referuar nga urgjenca e mjekësisë familjare, për në Repartin e Pediatrisë, ku pas konsultimit me Pediatrin, Ortopedin dhe Kirurgun , fëmija ndalohet për trajtim të mëtejmë në repartin e Kirugjisë.”

“Konsultimet dhe mbikëqyrja profesionale mjekësore ka vazhduar derisa gjendja ka filluar të përkeqësohet dhe mjekët kanë konstatuar se nevojitet trajtim i mëtejmë në QKUK, pra trajtim në nivelin terciar.” – thuhet në reagimin e tyre.

Tutje, Spitali i Gjakovës ka thënë se kanë ofruar të gjitha dokumentet e kërkuar nga Policia dhe Prokuroria.

“Lidhur me rastin në fjalë, ju njoftojmë se Policia e Kosovës, dhe Prokuroria kanë filluar hetimet. Spitali i Përgjithshëm në Gjakovë, ka ofruar të gjithë dokumentacionin e kërkuar që nga momenti i pranimit të rastit, e deri në momentin e referimit të pacientes për QKUK. Shprehim ngushëllime familjes me rastin e humbjes së fëmijës së tyre, bashke ndjejmë me familjen.” – përfundon reagimi i tyre.