Category: Lajme

Guvernatori i Bankës Qendrore të Kosovës (BQK), Ahmet Ismaili mori pjesë në Ministerialin në kuadër të Procesit të Berlinit “BP6 drejt Zonës së Vetme të Pagesave të Bashkimit Evropian (SEPA)”, i cili në Tiranë mblodhi Ministrat dhe Guvernatorët e bankave qendrore të Ballkanit Perëndimor.

Në njoftim thuhet se guvernatori Ismaili gjatë këtij takimi të nivelit të lartë, ku ishin prezent përfaqësuesit e Komisionit Evropian dhe akterë të tjerë të institucioneve financiare ndërkombëtare, prezantoi aktivitetet e ndërmarra nga BQK-ja dhe ato në proces që mundësojnë anëtarësimin Republikës së Kosovës në skemën SEPA, duke nënvizuar përfitimet ekonomike dhe financiare.

Sipas Guvernatorit Ismaili, BQK-ja është duke ndërmarrë veprime drejt avancimit dhe përafrimit të legjislacionit dhe infrastrukturës, për të plotësuar kriteret për anëtarësim në SEPA, në pajtim me objektivat e Planin Strategjik 2024-2028.

“I pari i BQK-së nënvizoi se zhvillimi i sistemit kombëtar të pagesave të shpejta “instant” dhe me objektivin final lidhjen me sistemin TIPS, do të kanë ndikim të rëndësishëm në ekonominë, veçanërisht për lëvizjen e lirë të kapitalit me partnerin më të madh të Kosovës, Bashkimin Evropian”, thuhet në komunikatë.

Në kuadër të këtij takimi ndërkombëtar, vendet e Ballkanit Perëndimor u zotuan të ndërmarrin hapa konkret drejtë plotësimit të kritereve për anëtarësim në SEPA, i cili do të lehtësonte tregtinë në të gjithë rajonin dhe me BE-në, duke mbështetur lëvizjen e kapitalit, aktivitetin ekonomik dhe një sistem inovativ, të sigurt dhe efikas të pagesave.

Bullizmi në shkolla dhe rrjete sociale, është një dukuri shqetësuese e cila po shfaqet te fëmijët. Kështu vlerësojnë njohës të arsimit, të cilët u bëjnë thirrje institucioneve dhe prindërve të kujdesen më shumë për sjelljen e fëmijëve, derisa thonë se në të kundërtën ky fenomen do të rritet.

Njohësi i arsimit, Rinor Qehaja vlerëson se mungon reagimi institucional për të ulur apo eliminuar këtë dukuri negative që po shkaktohet te fëmijët.

Qehaja për KosovaPress, konsideron se për të mposhtur këtë fenomen, nevojitet një edukim më i madh i fëmijëve nga prindërit. Ai kërkon edhe nga institucionet përgjegjëse të veprojnë në këtë drejtim, qoftë me ndërgjegjësimin përmes fushatave apo ligjëratave të ndryshme në shkolla.

“Padyshim që bullizmi prezanton rrahje të dhunës jo fizike që vazhdon të jetë prezent në shkolla tona, mirëpo shpeshherë është i paidentifikuar dhe për të cilin mungon reagimi institucional. Pra, atë që e kemi me rëndësi është një vetëdijesim i komunitetit, shkollave të vendit tonë, vetëdijesimi i nxënësve, mësimdhënësve dhe prindërve se çka është më së pari bullizmi dhe pastaj reagimi të jetë në proporcion…:02:27 Bullizmi, ngacmimi dhe çfarëdo tjetër që janë prezentë në rrjete sociale, për këtë padyshim që nevojitet përsëri një vetëdije më e lartë për raportim të tyre. Kjo është e ndjeshme dhe kërkon një përfshirje më të gjerë, por kjo mund të vijë vetëm kur nxënësit, prindërit dhe mësimdhënësit i raportojnë në mënyrë të menjëhershëm këto raste dhe reagimi është i menjëhershëm. Një vetëdije e lartë, mirëpo edhe një qasje shumë më pro-aktive karshi këtyre rasteve, qoftë në ndëshkim, rimodelim të sjelljeve të bullizuesve, në mënyrë që shkollat tona me të vërtetë të ofrojnë mirëqenie për çdo nxënës,” thotë Qehaja.

Se kjo dukuri është në rritje dhe po ndikon keq të fëmijët e thotë edhe sekretari i Këshillit të Prindërve, Enver Balaj.

Balaj për KosovaPress, thotë se Ministria e Arsimit, duhet të ndërmarrë hapa që të ndalohet kjo dukuri.

“Kam informacione dhe është një gjë shumë e vërtetë se në vendet e tranzicionit është fenomen dhe dukuri në rritje bullizmi, por nuk është vetëm në shkollat tona, është nëpër gjithë shkollat e botës, njëfarë forme shfaqet bullizmi, por në forma të ndryshme. Zakonisht më shumë shfaqet nëpër vendet e varfra të cilat e kanë standardin më të ulët ekonomik, ka bullizëm më shumë. Por, ne si prind dhe shoqëri, e Ministri e Arsimit duhet ndërmarrë shumë masa që të rregullohet ky problem, të vetëdijesohen qytetarët dhe fëmijët tanë, që mos t’i nënçmojnë dhe bullizojnë fëmijët nëpër shkolla, por duhet me qenë të gjithë të vetëdijesuar, të kuptojnë edhe botën e shtresës së pasur, të mesme dhe asaj të varfër, dhe botën e nxënëseve më të mirë e më të dobët. Do të duhej të punohet shumë më shumë me fëmijët tanë dhe shkollat tona për ta rritur cilësinë në arsim dhe të zhduket ky fenomen që është tepër në rritje. Është shumë shqetësues në Kosovë”, thotë Balaj.

Po ashtu, psikologu Rron Kastrati shprehet se duke qenë i bullizuar apo duke bullizuar, mund ta keq funksionojnë situatën shoqërore, arsimore.

Sipas tij, zakonisht fëmijët e bullizuar mund të krijojnë komplekse nga më të ndryshmet, të cilat mund të shkaktojnë nivele të larta të çrregullimeve të personalitetit, ndjenja të pasigurisë, reagime agresive, sjellje të papërshtatshme ose ankthe dhe keqinterpretim në mësim.

Sipas Kastratit, mënyrat më relevante që mund ta përmirësojnë gjendjen e përgjithshme në shkolla, janë bashkëpunimi i prindërve me psikologët, pedagogun e shkollës, menaxhmentin dhe mësimdhënësit.

“Bullizmi në shkolla veçanërisht prej rrjeteve sociale, ndikon në keq formimin dhe keq zhvillimin e personalitetit …00:39 Duke qenë i bullizuar apo duke bullizuar, mund ta keq funksionojmë situatën shoqërore, arsimore dhe njëkohësisht fëmijët zakonisht të bullizuar mund të krijojnë komplekse nga më të ndryshmet, të cilat mund të shkaktojnë nivele të larta të çrregullimeve të personalitetit, ndjenja të pasigurisë, reagime agresive, sjellje të papërshtatshme ose ankthe, dhe bullizmi në shkolla mund të ndikojë negativisht në performancën arsimore të mësim-nxënies…02:35 Mënyrat më relevante që mund ta përmirësojnë gjendjen e përgjithshme në shkolla, janë bashkëpunimi i prindërve me psikologët, pedagogun e shkollës, menaxhmentin e shkollës dhe mësuesen…06:21 Ne psikologët jemi të fokusuar për t’i identifikuar shkaktarët dhe të gjitha pasojat që ky bullizëm është tashmë i shprehur online në botën ku fëmijët kanë një kontakt të drejtpërdrejt e të tepruar nga mbi përdorimi i telefonave të mençur dhe rrjeteve sociale,” shprehet ai.

Lidhur me këtë çështje, KosovaPress ka pyetur edhe Ministrinë e Arsimit, por ata nuk kanë kthyer përgjigje.

Administrata e presidentit Joe Biden, po e shqyrton mundësinë që të hedhë me avionë ushtarakë amerikanë ndihmë në Gazë, pasi dërgesat tokësore po bëhen gjithnjë e më të vështira. Kështu tha një zyrtar amerikan më 28 shkurt.

Ofensiva e ushtrisë izraelite kundër Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Gazë ka rrafshuar shumicën e enklavës të populluar dendur, duke vrarë afër 30.000 persona dhe duke detyruar pothuajse gjysmën e popullsisë prej 2.3 milionë banorësh që të zhvendoset. Lufta ka shkaktuar krizë humanitare, teksa shumë përballen me urinë.

Sipas të dhënave të Kombeve të Bashkuara, volumi i ndihmës humanitare që ka hyrë në Gazë në shkurt është përgjysmë më pak sesa në janar.

Të paktën 576.000 persona në Rripin e Gazës – një e katërta e popullsisë – janë buzë urisë, tha Zyra për Koordinim të Çështjeve Humanitare e OKB-së. Kjo zyrë tha se grupet e ndihmës po përballen “me pengesa të mëdha vetëm për të dërguar minimumin e furnizimeve në Gazë”.

OKB shtoi se një në gjashtë fëmijë nën moshën dyvjeçare në veri të Gazës vuan nga kequshqyerja akute dhe praktikisht të gjithë banorët në enklavën palestineze varen nga ndihmat ushqimore për të mbijetuar “që mjerisht janë të pamjaftueshme”.

Zëvendësambasadori i SHBA-së në Izrael, Jonathan Miller, i cili ishte i pari që të martën përmendi mundësinë e dërgimit të ndihmave nga ajri, citoi disa zyrtarë amerikanë të cilët kanë thënë se ndihmat e dërguara në këtë mënyrë do të kenë efekt të kufizuar pasi avionët mund të hedhin ndihma në sasi që janë të barasvlershme me ndihmat që mund të transportohen nga një apo dy kamionë.

Përveç SHBA-së, edhe Kanadaja ka deklaruar se po punon për të dërguar ndihmë humanitare nga ajri. Ndihma humanitare në këtë mënyrë në Gazë veçse janë dërguar nga ushtria jordaneze në bashkëpunim me Francën.

Lufta në Gazë nisi pasi Hamasi sulmoi Izraelin më 7 tetor, duke vrarë 1.200 persona dhe duke rrëmbyer afër 250 të tjerë. Ushtria izraelite u kundërpërgjigj me ofensivë të ashpër ajrore dhe tokësore. Kryeministri izraelit, Benjamin Netanyahu, vazhdimisht ka përsëritur se do të luftojë në Gazë deri në një “fitore absolute”, që siç ka thënë ai, nënkupton shkatërrimin e aftësive ushtarake dhe udhëheqëse të Hamasit, grup që kontrollon Gazën./REL/

Një 18-vjeçar është arrestuar për falsifikim të parasë në Ferizaj.

Policia njofton përmes një komunikate për media, se dje rreth orës 23:00 ka pranuar një informacion se në një lokal në rrugën “Bajram dhe Gursel Sylejmani”, një person kishte kryer pagesën e shërbimeve me një kartëmonedhë të dyshuar prej 50 euro dhe ishte larguar me një veturë me targa vendore në drejtim të panjohur.

“Policët hetues nën autorizim të prokurorit kujdestar nga Prokuroria Themelore në Ferizaj i kanë nisur hetimet. Pas një pune intensive në terren, grumbullimit të informacioneve dhe shikimit të kamerave të sigurisë, kanë arritur të identifikojnë automjetin Golf VI dhe të dyshuarin A.M ( M/K) i moshës 18 vjeçar, të cilin në ora 01:30 të datës 29.02.2024 e kanë shoqëruar në stacionin e policisë në Ferizaj, ndërsa i janë gjetur edhe pesë (5) kartëmonedha me nga pesëdhjetë (50) euro të dyshuara si të falsifikuara, të cilat si provë materiale janë sekuestruar”, thuhet tutje në njoftim.

Pas intervistimit nga policët hetues, në prani edhe të avokatit mbrojtës, me vendim të prokurorit të rastit është ndaluar në mbajtje për 48 orë, për procedura tjera hetimore, ndërsa rasti është cilësuar “Falsifikim i parasë”.

Në Samitin rajonal mbi Planin e Rritjes në Tiranë nuk do të merr pjesë fizikisht kryeministri i Kosovës, Albin Kurti.

Kurti do të jetë pjesë e Samitit virtualisht përmes një video-adresimi. Kështu ka konfirmuar për KosovaPress zëdhënësi i Qeverisë së Kosovës, Përparim Kryeziu.

Ai ka treguar arsyet përse Kurti nuk do të jetë pjesë e këtij samiti fizikisht.

“Për shkak të angazhimeve të mëparshme, kryeministri I Kosovës, Albin Kurti nuk do të jetë I pranishëm fizikisht në Samitin e sotëm në Tiranë. Megjithatë kryeministri Kurti do të jetë pjesë e Samitit virtualisht përmes përmes një video-adresimi”, thuhet në përgjigjen me shkrim për KosovaPress të zëdhënësit të Qeverisë së Kosovës, Përparim Kryeziu.

Të enjten në Tiranë mbahet Samiti rajonal mbi Planin e Rritjes dhe Konvergjencës me fokus integrimin e Ballkanit Perëndimor drejt Bashkimit Evropian, si edhe zbatimin e Planit të Rritjes për Ballkanin Perëndimor.

Ky samit mbahet një ditë pas atij Ukrainë-Evropa Juglindore në kryeqytetin shqiptar dhe do të ofrojë mundësi të reja për një shkëmbim pikëpamjesh mbi të ardhmen evropiane të rajonit dhe mbi sfidat e përbashkëta rajonale.

Në samit do të jetë i pranishëm edhe komisionari i Bashkimit Evropian për Zgjerimin dhe Fqinjësinë, Oliver Varhelyi.

Deputeti i Aleancës për Ardhmërinë e Kosovës, Pal Lekaj, beson në pafajësi në rastin 53 milionësh. Ai për Ekonomia Online, tha se nuk do të vajtojë këtë rast.

Deputeti i AAK-së, konsideron se nuk është vendimmarrës por ish-Qeveria Haradinaj, teksa shprehet optimist se Apeli do ta ndryshojë këtë vendim.

“Më ka habit fakti deri sa u nxjerr atë vendim derisa unë nuk kam qenë vendimmarrës ka qenë qeveria Kosovës por unë nuk e kam ndërmend që tani të vajtoj është apeli do të thotë shkalla e dytë që do të vendos dhe një e di që ketë drejtim pikë faji nuk kam dhe nuk dua që ta luaj rolin e viktimës se nuk kam nevojë dhe mendoj që qytetarët fund do të binden që unë nuk kam marrë para dhe kjo më çudit fakti që ma kanë bërë gjykimin publik dhe sikur të ishte ajo sot unë nuk isha i lirë dhe nuk është dashtë të jesh i lirë, por dihet që për çka është aktakuza për çështje administrative apo për ata që unë kam tejkaluar kompetencat e mija por unë nuk kam marr vendim”, u shpreh Lekaj.

Gjatë aktiviteteve të rregullta në mbështetje të komuniteteve lokale, ekipet ndërlidhëse dhe monitoruese të misionit KFOR të udhëhequr nga NATO, ka gjetur një person me lëndim në kokë në afërsi të Krushës së vogël.

Sipas njoftimit, njësia ka ofruar ndihmë të menjëhershme dhe e ka transportuar të lënduarin në qendrën shëndetësore më të afërt.

Njoftimi i plotë:

Sot, një nga ekipet ndërlidhëse dhe monitoruese të misionit #KFOR të udhëhequr nga #NATO, ka hasur në një person me lëndim në kokë në afërsi të Krushës së Vogël/Mala Krusha, gjatë një prej aktiviteteve të tij të rregullta në mbështetje të komuniteteve lokale. Njësia ka ofruar ndihmë të menjëhershme dhe e ka transportuar të lënduarin në qendrën shëndetësore më të afërt. Ata gjetën edhe familjen e tij dhe ia dorëzuan me sukses vëllait të tij.

Projektligji mbi ndihmat e huaja me vlerë 95 miliardë dollarë, i miratuar nga Senati këtë muaj, mbetet i bllokuar nga shumica republikane në Dhomën e Përfaqësuesve, duke rrezikuar ndihmën prej 60 miliardë dollarësh për Ukrainën.

Udhëheqësit e Kongresit amerikan u takuan me Presidentin Biden të martën në Shtëpinë e Bardhë për të diskutuar ngërçin mbi ndihmën për Ukrainën, ndërsa ajo vazhdon luftën kundër agresionit rus.

Ndërsa ukrainasit varrosin viktimat dhe shënojnë përvjetorin e dytë të fillimit të sulmit në shkallë të gjerë të Rusisë, Presidenti amerikan Joe Biden bëri një paralajmërim për ligjvënësit amerikanë.

“Pasojat e mosveprimit janë të rënda për Ukrainën”, tha ai. Kryetari i Dhomës së Përfaqësuesve Mike Johnson thotë se nuk do ta hedhë për votim projektligjin mbi ndihmat e huaja prej 95 miliardë dollarësh, i cili përfshinë 14 miliardë dollarë për Izraelin, 60 miliardë dollarë për Ukrainën dhe 4.8 miliardë për partnerët në rajonin e Indo-Paqësorit, përfshirë Tajvanin, për të luftuar agresionin kinez, para se të merren masa për përmirësimin e situatës në kufirin SHBA-Meksikë.

“Përparësia e parë e vendit është sigurimi i kufijve tanë. Besoj se Presidenti mund ta ndryshojë këtë menjëherë përmes urdhrave ekzekutivë”, tha ai, shkruan VOA, transmeton KosovaPress.

Një marrëveshje dypartiake për ndryshimin e ligjeve amerikane të imigracionit në këmbim të miratimit të ndihmës për Ukrainën dështoi pas negociatave disa mujore për shkak të kundërshtimeve nga ligjvënësit republikanë. Kryetari i shumicës demokrate në Senat, Chuck Schumer tha se ai i ka bërë thirrje Kryetarit të Dhomës së Përfaqësuesve Mike Johnson që të marrë një vendim të drejtë për këtë çështje.

“Pavarësisht pasojave të tanishme politike, do të pendoheni nëse nuk merrni një vendim të drejtë për këtë”, tha ai. Por shumë ligjvënës republikanë nuk mendojnë se një raund i ri ndihmash për Ukrainën do të ketë një ndikim të madh në luftën e saj me Rusinë.

“Realiteti me të cilin po përballemi është se Vladimir Putini nuk ka për ta humbur luftën”, tha senatori republikan Ron Johnson. Demokratët kanë opsionin e përdorimit të një manovre procedurale për të anashkaluar republikanët, për ta hedhur në votë projektligjin për ndihmat e huaja. Ligjvënësi demokrat Jamie Raskin tha për Zërin e Amerikës se ka mbështetje të mjaftueshme për këtë manovër procedurale.

“Një peticion për të hedhur në votim projektligjin për ndihmat e huaja do të merrte firmat e shumicës së anëtarëve të Kongresit. Peticioni do të kërkonte që projektligji të dilte nga komisionet dhe të hidhej për votim nga ligjvënësit”, tha ai. Anëtarët e Dhomës së Përfaqësuesve të mërkuren kthehen nga pushimi, por ata duhet menjëherë të përqendrohen në përpjekjet për miratimin e buxhetit të qeverisë amerikane para afateve të 1 dhe 8 marsit./ VOA