Category: Lajme

Ministri në detyrë i Mbrojtjes, Ejup Maqedonci, është pritur nga Ndihmës Sekretari i Luftës, Daniel Zimmerman, me të cilin ka biseduar për situatën e sigurisë, zhvillimin e mëtejmë të Forcës së Sigurisë së Kosovës (FSK) dhe zgjerimin e bashkëpunimit në industrinë e mbrojtjes.

Në takim është diskutuar gjithashtu për angazhimet e përbashkëta për paqe dhe stabilitet global, si dhe për projektet strategjike që synojnë forcimin e partneritetit Kosovë–SHBA dhe avancimin e rrugës së Kosovës drejt NATO-s.

Sipas Maqedoncit, përfaqësuesi amerikan ka vlerësuar rritjen e investimeve të Kosovës në fushën e mbrojtjes, zhvillimin e kapaciteteve ushtarake, si dhe vendimet për pjesëmarrjen e ushtarëve kosovarë në operacione ndërkombëtare të paqes dhe përkrahjen ndaj Ukrainës.

Ai ka theksuar se partneriteti me Shtetet e Bashkuara mbetet themel i sigurisë së Kosovës dhe garanci për ndërtimin e një ushtrie moderne dhe profesionale.

Komisioni Qendror i Zgjedhjeve ka njoftuar se është duke vazhduar periudha e aplikimit për akreditimin e vëzhguesve dhe mediave për vëzhgimin e zgjedhjeve të parakohshme për Kuvendin e Kosovës, të cilat do të mbahen më 7 qershor.

Periudha e aplikimit për akreditim të vëzhguesve, e cila ka filluar më 5 maj, do të përfundojë më 30 maj 2026.

Gjatë kësaj periudhe 26-ditore, KQZ thotë se subjektet politike të certifikuara, OJQ-të, organizatat qeveritare dhe ndërqeveritare, organizatat ndërkombëtare të specializuara të cilat merren me zgjedhjet dhe mbrojtjen e të drejtave të njeriut, mediat si dhe përfaqësuesit e vendeve të huaja, mund të dorëzojnë online kërkesën e tyre për akreditimin e vëzhguesve.

Si bëhet aplikimi?

Hapi i parë: Përfaqësuesi i autorizuar (i organizatës joqeveritare, organizatës qeveritare/ndërqveritare, organizatës ndërkombëtare të specializuar në zgjedhje dhe të drejtat e njeriut; mediave; dhe përfaqësuesi i vendeve të huaja) duhet të plotësojë online të dhënat që kërkohen në platformën: https://apliko.kqz-ks.org

Hapi i dytë: Pas aplikimit, Zyra për Regjistrim, Certifikim dhe Kontrollin Financiar të Subjekteve Politike (ZRCKFSP) do të shqyrtojë dhe do të miratojë ose jo aplikimin fillestar. Pas vërtetimit të aplikimit, ZRCKFSP, do t’i përcjellë përmes e-mailit përfaqësuesit të autorizuar kredencialet për t’u qasur në platformën online në mënyrën që të bashkangjesë edhe të dhënat për personat e organizatës / medias që kërkon të akreditohen.

Një seri vitesh me temperatura rekord është “pothuajse e sigurt” deri në vitin 2030, ndërsa kriza klimatike vazhdon të përkeqësohet, ka paralajmëruar Organizata Botërore Meteorologjike e OKB-së (Organizata Botërore Meteorologjike).

Sipas raportit të ri, i përgatitur nga Zyra Meteorologjike e Mbretërisë së Bashkuar, ekziston një probabilitet prej 86% që të paktën një vit midis 2026 dhe 2030 të thyejë rekordin e vitit 2024 si viti më i nxehtë i regjistruar ndonjëherë. Po ashtu, ka 75% shans që temperatura mesatare globale për periudhën 2026–2030 të kalojë 1.5°C mbi nivelet para-industriale.

Shkencëtarët paralajmërojnë se rritja e vazhdueshme e emetimeve të dioksidit të karbonit nga lëndët djegëse fosile po “bllokon” nxehtësi në atmosferë, duke shtuar valët ekstreme të të nxehtit, thatësirat dhe përmbytjet në shumë rajone të botës.

Raporti thekson gjithashtu ndikimin e mundshëm të një fenomeni El Niño, i cili pritet të rrisë temperaturat globale. Sipas parashikimeve, ka deri në 96% mundësi për zhvillimin e një El Niño midis dhjetorit 2026 dhe shkurtit 2027, çka mund ta bëjë vitin 2027 një kandidat të fortë për rekord të ri të temperaturës globale.

Drejtori i OKB-së për klimën, Simon Stiell, ka paralajmëruar se valët ekstreme të të nxehtit tashmë po shkaktojnë pasoja serioze për jetën dhe ekonomitë, duke theksuar nevojën urgjente për largim nga varësia ndaj karburanteve fosile dhe kalim drejt energjisë së pastër.

El Niño është një nga faktorët natyrorë që mund të përforcojë përkohësisht ngrohjen globale, duke çliruar nxehtësi të akumuluar nga oqeanet në atmosferë.

Ndërkohë, shkencëtarët theksojnë se tejkalimi i 1.5°C rrit ndjeshëm rrezikun e fenomeneve ekstreme të motit, ndërsa çdo ulje e emetimeve mund të ndihmojë në kufizimin e dëmeve të ardhshme.

Kryetari i PDK-së dhe kandidati për kryeministër, Bedri Hamza, ka bërë thirrje për një fushatë të ndershme tek të gjitha partitë, raporton Ekonomia Online.

Në një konferencë për media, Hamza tha se pushteti ka përgjegjësi që të garantojë barazi dhe ndershmëri në zgjedhje, duke shtuar se nuk duhet lejuar përdorimi i resurseve shtetërore në funksion të fushatës.

Hamza tha se veprimet nga pushteti ditëve të fundit, garën për fushatë e bëjnë të pabarabartë.

“Sot më 28 maj, në Ferizaj do të hapim zyrtarisht fushatën zgjedhore për zgjedhjet e datës 7 qershor. Në orën 20:00, në sheshin te komuna e Ferizajt, ftoj të gjithë qytetarët të na bashkohen. Po hyjmë në këtë fushatë me respekt për qytetarët, me besim te demokracia, dhe me vizion të qartë për ta nxjerr Kosovën nga kriza. Prandaj, dua të iu bëj thirrje të gjitha partive politike që kjo fushatë të jetë e qetë, demokratike, me korrektësi të ndërsjellë dhe me respekt për standardet e zgjedhjeve të lira”, tha Hamza.

Një 70-vjeçar ka humbur jetën si pasojë e një aksidenti në rrugën Viti – Ramnishtë

“Sot, më 28.05.2026, rreth orës 08:30, në rrugën Viti – Ramnishtë, ka ndodhur një aksident trafiku ndërmjet dy veturave. Në vendin e ngjarjes kanë dalë njësitet e Trafikut Rajonal, ndërsa sipas hetimeve të para, lëndime trupore kanë pësuar të dy drejtuesit e automjeteve, të cilët janë banorë të Komunës së Vitisë”, ka thënë zëdhënësi i Policisë për Rajonin e Gjilanit, Ismet Hashani.

“Si pasojë e aksidentit, njëri prej tyre ka pësuar lëndime të rënda trupore. Të lënduarit janë transportuar me urgjencë në Spitalin Rajonal në Gjilan për trajtim mjekësor. Personi i lënduar, rreth 70-vjeçar nga fshati Lubishtë i Komunës së Vitisë, përkundër përpjekjeve të mjekëve dhe trajtimit të ofruar në Spitalin e Gjilanit, nuk ka arritur t’u mbijetojë plagëve të marra dhe ka ndërruar jetë”.

“Lidhur me rastin është njoftuar Prokurori i Shtetit, i cili ka urdhëruar që ndaj drejtuesit tjetër të automjetit të caktohet masa e ndalimit për 48 orë, ndërsa trupi i pajetë i viktimës të dërgohet për obduksion në Institutin e Mjekësisë Ligjore në Prishtinë”.

“Hetimet për zbardhjen e rrethanave të këtij aksidenti të rëndë janë duke u zhvilluar nga hetuesit rajonalë të aksidenteve të trafikut të Policisë së Kosovës në Gjilan’.

Ministri në detyrë i Punëve të Brendshme, Xhelal Sveçla, ka bërë të ditur se është themeluar grupi punues që do të analizojë dhe propozojë modalitetet për krijimin e Xhandarmërisë së Kosovës, raporton Ekonomia Online.

Sveçla tha se themelimi i kësaj strukture synon forcimin e kontrollit kufitar dhe reagimin ndaj kërcënimeve të sigurisë.

“Në kuadër të kompetencave të mia si Ministër i Punëve të Brendshme, unë kam themeluar grupin punues për analizimin dhe propozimin e modaliteteve për themelimin e xhandarmërisë, me qëllim të forcimit të kontrollit në vijën kufitare, mbrojtjen e integritetit territorial dhe sovranitetit, si dhe reagim të shpejtë ndaj kërcënimeve në përmasa të ndryshme”, tha ai.

Ai shtoi se grupi punues tashmë ka nisur punën për analizimin e aspekteve të ndryshme që lidhen me krijimin e këtij institucioni.

“Tashmë grupi punues është duke punuar në analizimin e aspekteve ligjore, institucionale, organizative, financiare dhe operacionale të themelimit të xhandarmërisë si agjenci ekzekutive në kuadër të Ministrisë së Punëve të Brendshme përmes ligjit të veçantë”, tha ai.

Sipas Sveçlës, funksionalizimi i Xhandarmërisë do t’i mundësojë Policisë së Kosovës të fokusohet më shumë në detyrat e saj të rregullta.

“Themelimi dhe funksionalizimi i xhandarmërisë do t’i mundësojë Policisë së Kosovës që të fokusohet në sigurinë dhe rendin publik, parandalimin dhe hetimin e krimit, sigurinë në komunikacion si dhe detyra të tjera sipas autorizimeve ligjore”, tha ai.

Ai foli edhe për numrin e pjesëtarëve që mund të ketë Xhandarmëria, duke thënë se kjo çështje do të përcaktohet nga grupi punues.

“Për sa i takon numrit unë siç e theksova grupi punues do të punoj intensivisht për përcaktimin e të gjitha modaliteteve dhe nevojave operacionale përfshi edhe numrin e nevojshëm të pjesëtarëve të xhandarmërisë në momentin kur takimi të përcaktoj patjetër që ne jemi gati”, tha ai.

Kryeministri në detyrë, Albin Kurti, ka deklaruar se ndihmat dhe mbështetjet financiare të fundit për qytetarët nuk lidhen me nisjen e fushatës zgjedhore, por me nevojën për t’u përballur me rritjen e kostos së jetesës dhe inflacionin, raporton Ekonomia Online.

I pyetur nëse ndihmat e fundit kanë lidhje me fillimin e fushatës zgjedhore, Kurti tha se Qeveria kishte planifikuar një pako të re për përballjen me inflacionin, por sipas tij kjo u pamundësua nga zgjedhjet e parakohshme.

“Siç e dini ne kemi pasur në plan të bëjmë pakon për përballjen me inflacion, 2.0. Mirëpo kjo nuk u mundësua për shkak se u shkaktuan zgjedhjet e parakohshme, të panevojshme, meqenëse patëm një bllokim opozitar sa i përket çështjes së zgjedhjes së presidentit. Dhe tash ne po përpiqemi të bëjmë çfarë është e mundur në mënyrë se qytetarët e Republikës në përballje me nevojat e shtuara në njërën anë dhe me pritjet tërësisht të arsyeshme në anën tjetër t’ju dalim zot atyre”, tha ai.

Kurti përmendi mbështetjet financiare që, sipas tij, janë dhënë gjatë mandatit të qeverisë së tij për kategori të ndryshme të qytetarëve.

“Tash ne jemi të mirënjohur ta zëmë për shtesat për fëmijë, për mbështetjen financiare për nënat lehonë, pastaj për mbështetjen financiare për punëtorët, mandej për studentët dhe pa harruar pensionistët. Ta zëmë për pesë vjet qeveria jonë ka mbështetur shtatë herë gjithsej pensionistët me mbështetje të njëhershme 100 euro. Pensionin që e kemi gjetur bazik 90 euro e kemi bërë 100 euro, që është për 2/3 më i lartë se që e kemi gjetur. Pra, rritjen ekonomike të vendit tonë nuk e mbajmë për shtet, e shpërndajmë në popull, më së shumti, më së pari tek ata të cilët i kanë nevojat më të mëdha”, tha ai.

Ai foli edhe për alokimin e fundit të mjeteve buxhetore në vlerë prej 2 milionë eurosh për avikompanitë, duke thënë se bëhet fjalë për mbulim të nevojave gjatë sezonit veror.

“Ndërkaq sa i përket alokimit të mjeteve buxhetore prej 2 milionë euro , këtë e kam shpjeguar me një tekst në faqen time në Facebook dje pasdite. Ju kisha inkurajuar të gjithëve që keni dilema të lexoni e ta rilexoni dhe gjithçka është në shërbim të qytetarëve dhe bëhet fjalë për një mbulim të një gjendje jo të zakonshme që po e bëjnë edhe shtetet e tjera. Dhe nuk ka të bëjë me muajin qershor, po ka të bëjë me komplet stinën e verës deri në fund të tetorit. Pra, do të vepronim ndryshe po të kishim Kuvend. Meqë s’kemi Kuvend, veprojmë me çfarë mundemi e dimë dhe besojmë që po bëjmë shumë mirë”, tha ai.

Organizata e Veteranëve të Luftës së Ushtrisë Çlirimtare të Kosovës (OVL UÇK) ka reaguar ndaj Prokurorisë Speciale, duke e akuzuar për përpjekje për të diskredituar dëshmitarë ndërkombëtarë në proceset gjyqësore që lidhen me luftën në Kosovë.

Në reagimin e saj, OVL UÇK thekson se etiketimi i figurave si Wesley Clark dhe James Rubin si të njëanshëm apo të pabesueshëm është i papranueshëm.

Sipas organizatës së veteranëve, dëshmitarët ndërkombëtarë nuk kanë paraqitur qëndrime të fabrikuara për luftën në Kosovë.

OVL UÇK vlerëson se kontestimi i dëshmive të tyre përbën qasje të motivuar politikisht dhe jo juridikisht.

Postimi i plotë:

OVL UÇK hedh poshtë përpjekjen e Prokurorisë Speciale për të diskredituar dëshmitarët ndërkombëtarë që dëshmuan për të vërtetën e Luftës Çlirimtare të Kosovës. Etiketimi i figurave si Gjeneral Wesley Clark dhe James Rubin si të njëanshëm apo të pabesueshëm, e nxjerr Prokurorinë nga argumentimi ligjor dhe e zhyt në armiqësi politike, madje edhe në absurditet profesional.

Këta dëshmitarë nuk trilluan histori. Nuk i shërbyen asnjë agjende personale. Ajo çfarë deklaruan është ajo që pa e gjithë bota: UÇK-ja zhvilloi luftë të drejtë dhe të domosdoshme kundër shtypjes jugosllave, përkrah një aleance euroatlantike që e njihte dallimin mes çlirimit dhe agresionit. Të sulmosh ata që i qëndruan pranë Kosovës në orën e saj vendimtare, do të thotë të sulmosh vetë historinë që e bëri të mundur lirinë.

Sjellje të tilla shfaqin panikun e tyre përballë fakteve që refuzojnë t’i nënshtrohen një vendimi të paracaktuar. Asnjë zyrë prokurorie, sado e paprekshme të jetë nga llogaridhënia, nuk ka të drejtë të përqeshë dëshmitë e ndershme, thjesht sepse ato ia rrëzojnë akuzën.

Kërkojmë që Gjykata t’i trajtojë këto manovra me përbuzjen që meritojnë, duke peshuar provat dhe jo mërinë politike. Historia e kësaj lufte u shkrua me gjak. Arroganca institucionale nuk do të mund ta përmbysë.

Ministria e Shëndetësisë e Libanit ka thënë se të paktën 11 persona janë vrarë në sulmet izraelite këtë mëngjes.

Kjo shifër përfshin dy fëmijë, ndërsa 21 persona të tjerë janë plagosur.

Ministria ka bërë të ditur se një sulm ndaj një ndërtese në qytetin Sidon ka vrarë pesë persona – shih postimin tonë të mëparshëm për pamjet nga pasojat.

Dje, Ministria e Shëndetësisë tha se 31 persona janë vrarë në sulme izraelite në një nga ditët më vdekjeprurëse që nga hyrja në fuqi e armëpushimit të brishtë mes Izraelit dhe Hezbollahut të mbështetur nga Irani, muajin e kaluar.