Category: Lajme

Presidentja Vjosa Osmani, ka thënë se Kosova ka bërë hapa të rëndësishëm në avancimin e sundimit të ligjit në përputhje me strategjinë e miratuar gjithëpërfshirëse kombëtare, një nga rezultatet më të rëndësishme në kuadër të zotimeve në Samitin për Demokraci.

Në kuadër të Samitit të tretë për Demokraci, i mbajtur në Republikën e Koresë, e para e vendit tonë tha se Kosova ka dëshmuar gjithashtu edhe përkushtimin ndaj standardeve ndërkombëtare dhe bashkëpunimit, duke miratuar Deklaratën kundër ndalimit arbitrar në marrëdhëniet ndërshtetërore; duke u bërë pjesë e Deklaratës së Parimeve për ta luftuar represionin transnacional së bashku me gjashtë vende të tjera demokratike, në tetorin e kaluar, si dhe duke punuar ngushtë me Shtetet e Bashkuara drejt avancimit të përpjekjeve të përbashkëta për të luftuar manipulimin e informacioneve nga ndonjë shtet i huaj.

Osmani ka thënë se zotimet e marra në kuadër të Samitit për Demokraci i kanë prirë rrugëtimit të Kosovës në politikë dhe vendimmarrje.

“Teksa po flas para jush, ne jemi duke i bërë përgatitjet për ta mbajtur edicionin e dytë të Forumit Ndërkombëtar për Gratë, Paqen dhe Sigurinë, i cili do të mbahet në muajin prill në Prishtinë. Në këtë edicion, ne do të fokusohemi jo vetëm në partneritetet dhe dialogun për ta ndërtuar paqen e qëndrueshme përmes sigurimit të përfaqësimit më të madh të grave në të gjitha nivelet e vendimmarrjes. Jam e lumtur ta ndajë me ju lajmin për themelimin e Qendrës së parë Rajonale të Ekselencës për Gratë, Paqen dhe Sigurinë në Ballkanin Perëndimor, në partneritet me Zyrën e Sekretarit të Shtetit të SHBA-ve, në përputhje me Strategjinë për Gratë, Paqen dhe Sigurinë 2023 të SHBA-ve, si dhe Planin Kombëtar të Veprimit”.

“Këto masa përfaqësojnë në tërësi një qasje të fuqishme drejtë forcimit të sundimit të ligjit, duke shfaqur përkushtimin e Kosovës ndaj reformës ligjore, transparencës si dhe mbrojtjes dhe avancimit të të drejtave të njeriut. Në këtë rrugëtim, angazhimi i brezit të ardhshëm në proceset demokratike është jetik. Jam e bindur se nëpërmjet njohurive të tyre digjitale gjithnjë në zhvillim, ne kemi mundësi të jashtëzakonshme për ta zhvilluar tutje demokracinë. Veprimet e të rinjve tanë, pasioni i tyre dhe përkushtimi ndaj demokracisë mund ta nxisin një epokë të re prosperiteti. Kjo, ngase, ku ka qëndrueshmëri, këmbëngulje, unitet dhe ambicie, demokracia gjithmonë fiton”, ka përfunduar Osmani.

Në mbledhjen e Qeverisë më 15 mars, kryeministri Albin Kurti ka kërkuar nga Agjencia Kadastrale e Kosovës ta zbatojë vendimin e Gjykatës Kushtetuese për t’ia regjistruar pronën Manastirit të Deçanit.

Historianët e Kosovës një gjë të tillë po e konsiderojnë si jo të drejtë, pasi nuk përkon me realitetin dhe të dhënat historike dhe se me këtë po cenohet identiteti historik dhe kulturor i Kosovës.

Bedri Muhadri nga Instituti i Historisë, thotë për KosovaPress se ky vendim cenon identitetin historik dhe kulturor të Kosovës. Sipas tij, arsyeja që ka ardhur në këto vendime bazohet në faktin që në vitin 2021 organizata “Europa Nostra” e ka cilësuar Manastirin e Deçanit si “të rrezikuar.”

“Vendimi si i tillë mbetet për të mos u përkrahur, sepse në radhë të parë cenohet identiteti historik, kulturor i Dardanisë dhe Kosovës që bart në vete. Si pjesë e tërë kulturës shpirtërore, arkeologjike dhe historike është edhe Manastiri i Deçanit dhe manastireve tjera në specifiket e veta historike në një kohë të sunduesit… është cenim i identitetit tonë historik, por edhe qasja e kryeministrit lë për të dëshiruar dhe jo shumë e admirueshme për faktin se thotë vendimin po e zbatojmë edhe pse është vendim i dëmshëm… Arsyeshmëria pse ka ardhur deri te këto vendime, bazohen në faktin që në 2021 organizata “Evropa Nostra” e ka cilësuar Manastirin e Deçanit se është në gjendje të rrezikshmërisë, që rrezikohet nga popullata vendase”, ka thënë Muhadri.

Sipas tij, vendimi nuk është dashur të zbatohet si kompromis, pasi kompromiset po derivojnë me kompromise të ardhshme.

“Për mendimin tim është një vendim jo i drejtë, i cili nuk përkon me realitetin dhe të dhënat historike, vendim për të cilin kanë thënë vetë institucionet, krerët tanë pak para se të vjen në zbatim, sepse kanë kontestuar mënyrën se si ka ardhur deri te vendimi i Gjykatës Kushtetuese…Nëse thuhet po bën kompromis për të hyrë në Këshillin e Evropës, po njohim pronat e manastirit ortodoks, pastaj mund të vijë një ditë që për t’u futur në UNESCO si pjesë e organizatës të ruajtjes të trashëgimisë botërore, atëherë mund të jetë që të avancohet statuti i këtyre institucioneve…Vendimi nuk është dashur të zbatohet si kompromis, sepse kompromiset po derivojnë me kompromise të ardhshme, rrjedhat politike gjithherë kanë shkuar duke u avancuar në kompromise të mëtejshme. Institucionet e shtetit gjithherë duhet të kenë parasysh që me kompromise nuk prosperohet ardhmëria e vendit”, ka shtuar ai.

Për Manastirin e Deçanit, historiani Muhadri ka theksuar se është ndër më të rëndësishmit të trashëgimisë kulturore mesjetare dhe ballkanike.

“Manastiri i Deçanit është institucion i rëndësishëm kulturor, mesjetar i cili rezulton si vlerë mjaft e rëndësishme e trashëgimisë historike, kulturore të Kosovës. Kur themi trashëgimi e Kosovës domosdo duhet të them se Manastiri i Deçanit e ka historiken e vet të formimit dhe veprimtarisë si institucion kulturor dhe religjioz…Manastiri i Deçanit sot është ndër manastiret më të rëndësishme të trashëgimisë kulturore mesjetare dhe ballkanike dhe është në listën e trashëgimisë kulturore, botërore të UNESCO-s… Historia e manastirit dhe trashëgimia që bart Manastiri i Deçanit është pjesë e kulturës historike dhe mesjetare të Kosovës dhe të popullit shqiptar në përgjithësi si real arbëror”, ka theksuar Muhadri.

Ndryshe, Dioqeza e Rashkës dhe Prizrenit e Kishës Ortodokse Serbe në Kosovë sot ka konfirmuar se Manastiri i Deçanit ka regjistruar në emër të tij 24 hektarë tokë në Agjencinë Kadastrale të Kosovës, pasi kryeministri Albin Kurti më herët gjatë këtij muaji urdhëroi të bëhej një gjë të tillë.

Kurti kishte deklaruar se Qeveria e Kosovës ka qenë para dy opsioneve, të zbatojë vendimin e Gjykatës Kushtetuese dhe të mundësohet ecja tutje me qëllim të anëtarësimit në Këshillin e Evropës këtë vit ose heqja e çështjes së Kosovës nga agjenda e anëtarësimit./kp/

Presidentja Vjosa Osmani, ka thënë se Turqia ka qindra ushtarë në Kosovë dhe se është ndër shtetet me kontributin më të madh në kuadër të KFOR-it.

Ajo ka njoftuar se mbrëmë në një iftar të përbashkët, i ka falënderuar të gjithë ushtarakët që shërbejnë larg vendit e familjeve të tyre në mënyrë që të ketë paqe e siguri në Kosovë..

Në mungesë të kuorumit, ka dështuar mbledhja e Komisionit Hetimor Parlamentar në lidhje me procedurat për furnizimin dhe menaxhimin me rezervat shtetërore. Në pikë të rendit të ditës ishte diskutimi rreth kërkesave për sjellje të dokumentacionit.

Deputeti i VV-së, Driton Hyseni, pati kritika për mungesë të opozitës. Tha se në mbledhjen e mëhershme janë marrë vendime pa u konsultuar mazhoranca.

“Nuk kemi kushte për fillimin e punës së këtij takimi mirëpo konsideroj të papranueshme thirrjen e mbledhjes së komisionit hetimor dhe mos gatishmërinë e opozitës për të marrë pjesë në këtë mbledhje. Gjithsesi ne do dëshironim të trajtonim disa çështje që kanë rrjedh nga mbledhja e fundit e komisionit hetimor, çështjet  të cilat nuk kanë filluar mirë vendimmarrjen në këtë komision. Nga koleget e opozitës janë marrë hapa në mënyre të njëanshme duke dërguar shkresa pa ndonjë vendimmarrje të komisionit hetimor”, tha Hyseni.

“Konsideroj që mungesa e sotëm është mungesë serioziteti pa marrë parasysh angazhimeve të tjera. Mbledhja është thirr nga kryesuesi zotëri Qalaj dhe unë nuk e di pse është dashur të thirret mbledhja kur të paktën ai e ka dit qe është jashtë vendit. Ne koleget këtu jemi prezentë për të shprehur gatishmërinë për trajtimin e subjektit i cili kuvendi Kosovës na ka  mandatuar ta trajtomë pra  hetimin e çështjes së rezervave shtetërore, respektivisht pretendimet që janë dhënë nga opozita që mund të kemi ndonjë keqpërdorim të mundshëm nga këto rezerva”, u shpreh Hyseni.

E deputetja e LDK-së, Valentina Bunjaku-Rexhepi, e cila e kryesoi këtë mbledhje, tha se për mungesë të Qalajt ka qenë e njoftuar. Ndërsa theksoi se fajtor për dështim të mbledhjes janë edhe deputetët e VV-së.

“Nuk bën me luajt rolin duke u viktimizua që jeni të interesuar me zbardh të vërteten sepse ne si opozitë ju kemi ftuar që katër muaj dhe katër muaj na kanë dështuar mbledhjet e komisionit dhe opozita këtë rast është hera parë që e ka dështu mbledhjen është hera parë që ka mungu tjetër është që kanë dështuar mbledhjet mes përplasjeve por me prezencë është hera parë si opozitë që po mungojmë, kështu që nuk është mirë me luajt rolin e viktimës që ju jeni të interesuar me zbardh të vërteten”, tha ajo.

“Mos u bëni viktimë se është hera e parë që kanë munguar si opozitë. Ku ishit ju që katër muaj”, ju kundërpërgjigj tutje Bunjaku.

Por për mungesën e deputetëve të pozitës, reagoi deputeti i VV-së, Driton Hyseni. Ai tha se bojkoti i tyre ndërlidhet me votimin e marrëveshjeve ndërkombëtare. Ai tha se në momentin që kanë kaluar ato, kanë qenë pjesëmarrës në mbledhje.

“Nuk po e shoh shumë të nevojshme të thellohemi në detaje rreth qëndrimit politik. Kur ka qenë qëndrim publik politik i vëreni edhe në seancën e Kuvendit, në Komision e në çdo  intervistë që kemi dhënë rreth çështjes që është duke trajtu në komision hetimor.  Krejt ideja ka qenë  ta  bindim opozitën t’i votojmë marrëveshjet ndërkombëtare dhe ne të marrim pjesë në konstutuimin e këtij komisioni dhe të vazhdojmë me punën. Në momentin që kaluar marrëve veshjet ndërkombëtare dhe janë votuar në seancë të Kuvendit marrëveshjet ndërkombëtare në vlerë mbi 310 milionë euro në të mirë të qytetareve”, tha Hyseni.

Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka dhënë një intervistë për Euronews nga Greqia, ku ka folur lidhur me rrugën e Kosovës drejt BE-së dhe sfidat me të cilat përballemi në këtë rrugëtim.

Besnik Bislimi po ashtu thekson se Kosova duhet të përballet me sfida edhe më shumë se vendet e tjera të Ballkanit Perëndimor, të cilat janë vërtet të jashtme.

Në dhjetor të vitit 2022, Kosova aplikoi për anëtarësim në BE. Pas një votimi të rëndësishëm në Parlament në prill 2023, Kosova përfitoi nga udhëtimi pa viza në zonën Shengen, i cili hyri në fuqi në janar 2024. Kosova është e etur për t’u anëtarësuar në Bashkimin Evropian në sfondin e marrëdhënieve të vështira që vazhdon të ketë me Serbinë.

“Ende nuk ka progres me aplikimin tonë sepse ne duhet të kalojmë një pengesë shtesë, e cila është vendimi i Këshillit për të ngarkuar Komisionin që të dorëzojë një pyetësor. Megjithatë, kjo nuk e pengon Kosovën që të bëjë detyrën e saj për t’i përafruar më tej politikat dhe reformat tona me standardet e BE-së. Pothuajse, pra, synimi ynë është që të jemi gjithnjë e më afër sa herë që vjen ai moment dhe ne vërtet shpresojmë se ky moment do të vijë më shpejt, sepse ekziston një ndërgjegjësim për rëndësinë dhe rëndësinë strategjike të integrimit të shpejtë evropian të rajonit”, thotë Bislimi për Euronews nga Greqia.

Sipas tij, nuk mund të ketë një integrim të shpejtë të një pjese të rajonit. “Ose të gjitha shtetet e Ballkanit Perëndimor do të kenë sukses ose ne të gjithë do të mbetemi pas”, tha ai.

Bislimi po ashtu thekson se Kosova duhet të përballet me sfida edhe më shumë se vendet e tjera të Ballkanit Perëndimor.

“Pengesat tona të brendshme janë pothuajse të ngjashme me barrierat me të cilat përballen fqinjët e tjerë rajonal. Këto janë rezultat i kapaciteteve të kufizuara përthithëse të administratës publike, ndoshta infrastrukturës së pamjaftueshme e të tjera. Dhe kjo është plotësisht nën kontrollin tonë dhe do të varet nga aftësitë e qeverisë për të reformuar institucionet”, tha ai.

Megjithatë, sipas tij krahasuar me vendet e tjera Kosova edhe disa pengesa shtesë.

“Jemi i vetmi vend që nuk e kemi ende statusin kandidat. Ne jemi ende duke luftuar me njohjen nga pesë anëtarë të BE-së dhe ne jemi ende në procesin e dialogut. Por ne kemi pak kontroll mbi rezultatin e këtij procesi. Kjo është arsyeja pse një vendi që duhet të bëjë pak a shumë më shumë në drejtim të konvergjencës i kërkohet gjithashtu të bëjë më shumë në aspektin e hapave, ndërsa në të njëjtën kohë ka potencial më të ulët se pjesa tjetër”, tha Bislimi.

Ish-kryenegociatori serb, Borko Stefanoviq ka akuzuar presidentin e Serbisë, Aleksander Vuçiq, se me lidhjet e tij me Moskën, po e largon Serbinë nga rruga e Bashkimit Evropian dhe po e afron me presidentin Putin.

Stefanoviq që është nënkryetari i Partisë për Liri dhe Drejtësi, tha se urimi i Vuçiqit për Putinin për fitoren e tij në zgjedhjet e fundit, ishte një kthim i borxhit ndaj presidentit rus, i cili ishte nder të vetmit që e uroi Vuçiqin dhe partinë e tij, për fitoren e kontestuar nga opozita në zgjedhjet e dhjetorit në Serbi.

Ai ka shtuar se me mesazhin e urimit të dërguar ambasadorit rus, Vuçiq ka dërguar dy mesazhe.

“E para, është se nuk e shqetëson atë, se zgjedhjet në Rusi organizohen nën hijen e të vdekurit Alexei Navalny dhe luftës në Ukrainë, dhe e dyta, është persekutimi dhe arrestimi i kundërshtarëve politikë, gazetarëve dhe kujtdo që guxon të kritikojë qeverisjen atokratike të tij (Putinit)”, deklaroi Stefanoviq, i cili akuzon Vuçiqin se po dëshiron të bëhet si presidenti rus.

Ai shtoi se në këtë mënyrë Vuçiq po e distancon Serbinë nga e ardhmja evropiane, e cila është garancia e vetme për një jetë normale. Madje Stefanoviq tregon se në Rusi ka qëndruar përfaqësuesi i Vuçiqit, Vladimir Gjukanoviq “për të mësuar se si do të zhvillohet procesi zgjedhor”.

“Ata që ëndërrojnë gulagët nuk mund t’i sigurojnë një jetë të mirë popullit të tyre. Lufta për zgjedhje të ndershme nuk është vetëm e drejtë, por edhe obligim i çdo personi që beson se meriton të vendosë në mënyrë të pavarur për fatin dhe të ardhmen e tij”, përfundoi Stefanoviq.

Me pjesëmarrje të familjarëve, kryetarit të Komunës së Skenderajt, Fadil Nura dhe drejtorëve komunal, sot është shënuar 25 vjetori i Masakrës së Qytetit të Skenderajt, me ç’rast janë bërë homazhe te lapidari i ngritur në nderim të viktimave, te Pishat e qytetit.

Lidhur me këtë ditë, kryetari Nura ka shkruar:

“Sot, në 25 vjetorin e Masakrës së Qytetit, kujtojmë me respektin më të lartë të gjitha viktimat e asaj ngjarjeje të llahtarshme të shkaktuar nga forcat policore e ushtarake serbe, për të na bërë të vetëdijshëm se rruga deri te liria e më vonë edhe te pavarësia e Kosovës, ishte e mundimshme me shumë sakrifica e vuajtje të populli tonë!

Lavdi e përjetshme të gjithë dëshmorëve dhe martirëve të lirisë së Kosovës!”.

Emisari i Bashkimit Evropian, Miroslav Lajçak, ka dhënë detaje nga takimi i së martës mes dy kryenegociatorëve të Kosovës dhe Serbisë.

Lajçak njoftoi se kanë diskutuar për avancimin e zbatimit të Marrëveshjes për Rrugën drejt Normalizimit, si dhe për ndikimin e vendimit të fundit të Bankës Qendrore të Kosovës.

“Çfarë fillimi i ngarkuar i javës në Bruksel! Dje prita dy kryenegociatorët e Kosovës dhe Serbisë për të diskutuar se si të avancohet zbatimi i Marrëveshjes për Rrugën drejt Normalizimit, si dhe çështje të tjera që kanë të bëjnë me Dialogun, duke përfshirë ndikimin e vendimit të fundit të Bankës Qendrore të Kosovës në operacionet me para të gatshme ndaj serbëve të Kosovës dhe komuniteteve të tjera. Ishte e rëndësishme të vërtetoheshin disa fakte dhe ne ramë dakord që të vazhdojmë diskutimin tonë për këtë çështje të hënën e ardhshme në Bruksel, bazuar në propozimet konkrete dhe realiste që Palët pritet të paraqesin paraprakisht. Në të njëjtën kohë, takimi tregoi gjithashtu se zbatimi i Marrëveshjes për rrugën drejt normalizimit dhe mënyrat shtesë se si të zyrtarizohet ajo do të duhet të adresohen në nivelin më të lartë në një takim të liderëve nën kujdesin e Dialogut”, tha Lajçak.

Ai poashtu dha detaje edhe të takimit të javës së kaluar që kishte në Prishtinë e në Beograd.

“Javën e kaluar i përfundova përgatitjet e mia intensive në Beograd, ku udhëtova për t’u takuar me Presidentin e Serbisë Aleksandar Vuçiq dhe kryenegociatorin Petar Petkoviq. Diskutimet tona u përqendruan rreth çështjeve urgjente në agjendën e Dialogut, duke përfshirë zbatimin e Marrëveshjes për rrugën drejt normalizimit, rregulloren e Bankës Qendrore të Kosovës dhe zgjedhjet lokale në komunat me shumicë serbe në veri të Kosovës. Ky takim shërbeu si vazhdim i diskutimeve të mia javën e kaluar me zëvendëskryeministrin e parë të Kosovës, Besnik Bislimi, në pritje të takimit të sotëm në nivel të kryenegociatorëve. Në të dyja takimet, nënvizova nevojën e zbatimit të Marrëveshjes pa vonesë dhe trajtova çështjet urgjente që prekin Dialogun”, ka shkruar Bislimi në Facebook.

Emisari i BE-së, tha se në përputhje me traditën e mirë të angazhimit me brezat e rinj, ka marr pjesë edhe në një leksion të moderuar në Universitetin Matej Bel në Banská Bystrica, për të folur për punën e EEAS dhe zgjedhjet e ardhshme evropiane.

“Është thelbësore të komunikohet rreth këtyre temave për të rritur kuptimin e publikut për rolin dhe ndikimin e rëndësishëm të BE-së në jetën e tyre”, përfundoi ai.

Pas një ndërrimi të gjatë dhe të mbytur në minierën e Trepçës në Stanterg në veri të Kosovës, Hasani kontrollon një orë për të ditur se kur do të perëndojë dielli në sipërfaqe dhe nëse ka ardhur koha për të ngrënë.

I ulur rreth një tavoline të vogël në një zyrë të improvizuar në minierë, ai dhe katër kolegë nxjerrin hurma, kos, turshi dhe djathë, të cilat i përcjellin me çaj të zi me sheqer.

Burrat qeshin dhe bisedojnë me njëri-tjetrin teksa ndajnë vaktin e Iftarit, të ngrënë pas një dite agjërimi midis lindjes së diellit dhe perëndimit të diellit gjatë muajit të shenjtë të myslimanëve, Ramazanit.

“Unë jam gjithmonë i lidhur me Allahun, në kohë si tani ku jemi 800 metra nën tokë”, tha Hasani para se të lexonte lutjet e tij. “Sa më thellë të shkoj, aq më shumë ndihem afër Allahut”.

Kosova është një vend me shumicë myslimane dhe qindra minatorë në minierën shtetërore të plumbit, zinkut dhe argjendit po kremtojnë Ramazanin, ndonjëherë duke duruar temperaturat afër 40 gradë Celsius dhe lagështinë ekstreme.

“Agjërimi nuk është problem për ne por mungesa e ajrit të pastër, pajisjeve moderne, veshjeve dhe këpucëve janë problem i madh”, tha shefi i turnit Fehmi Hajredini.

Trepça punësoi më shumë se 22,000 punëtorë në vitet 1970 dhe 80 dhe përbënte dy të tretat e produktit të brendshëm bruto të Kosovës (BPV). Tani ajo punëson vetëm 3,000 në miniera dhe objekte të tjera.

Çmimet e ulëta të mineraleve dhe pakësimi i prodhimit do të thotë se kompania nuk mund të mbulojë kostot operative dhe po kërkon subvencione nga qeveria.

Në qytetin e Mitrovicës, pak larg nga miniera, Bashkim Kurti, CEO i Trepçës, tha se ishte në bisedime me qeverinë për një kredi prej 20 milionë euro për përmirësimin e kushteve të punës dhe rritjen e prodhimit./Reuters

Ministria e Punëve të Jashtme dhe Diasporës (MPJD) ka organizuar mbledhjen komemorative, në nderim të jetës, veprës dhe kontributit të zyrtarit të kësaj ministrie, Arben Rugova, i cili vdiq të mërkurën, raporton EO.

Ministrja e Punëve të Jashtme dhe Diasporës, Donika Gërvalla tha se lajmi për vdekjen e Arben Rugovës i ka tronditur të gjithë.

“Lajmi për vdekjen e hershme na ka tronditur të gjithë neve në Ministri dhe të gjithë ata që e njohën. Jemi mbledhur për ta kujtuar, angazhimin e Arben Rugovës, përmes kontributit të tij ai dëshmoi vullnet dhe përkushtim të palëkundur në Republikën tonë”, tha Gërvalla.

“Angazhimi i tij në Ministrinë e Jashtme ka lënë gjurmë të thella në institucionin ku punoi. Vdekja e tij e hershme ka krijuar një zbrazëti në institucionin tonë dhe mungesa e tij do vërehet për një kohë të gjatë. Do mbetet pjesë e historisë dhe arritjes së tij në Ministrinë e Jashtme”, shtoi ministrja.

Gërvalla tha se Arbenin do ta kujtojnë edhe si njeri të mirë urte e të afërt me kolegë.

“Do t’u mungojë shokëve, miqve por më së shumti familjes së tij e cila më shumë se kurrë ka nevojë për ne. Ne emër të Ministrisë shprehu ngushëllime për familjen Rugova. Ta kujtojmë përherë Arbenin si njeri të qeshur, dashur e të zellshëm”, tha ajo.

Ndërsa, Sekretari i Ministrisë së Punëve të Jashtme, Behar Isma, tha se ka vështirë të flas për të ndjerin Arben Rugova, vdekja e tij e hershme ka lënë zbrazëti të madhe.

“Në këto momente kur jemi mbledhur për Arbenin, por pa Arbenin, kam vështirë të gjejë fjalë qoftë për juve familjarë miq e shokë. Largimi nga kjo botë i njerëzve si Arbeni krijon zbrazëti për vendin në përgjithësi. Ishte një gazetar, bashkëpunëtori i jashtëzakonshëm për gjithë vitet që ka punuar në Ministri. Arbeni kishte barrë kryesore informimin detyrën që e kreu me përgjegjësi. Ne sot po i japim lamtumirën e fundit por Arbeni di kujtohet gjithmonë, vepra puna do jetë e paharrueshme për MPJD”, tha ai.

Kurse, Ragip Rugova, nga familja tha se Arbeni vuante që të jepte maksimumin në punën e tij, duke qenë një njeri i përkushtuar.

“Njeriu në këto raste bën përpjeke që t’i radhit do koncepte dhe pastaj e kupton se duhet me iu kthy thjeshtësisë. Kur jemi të drejtë thjesht atëherë kemi krijuar një bazament”, tha ai.

“Se kam lehtë të flas për Arbenin, ka aspekte të një personaliteti të dikujt të afërtit dhe familja e din më së miri, e njohin më thellësi të shpirtit. Jam vëlla i mixhës së Arbenit, por kam qenë shumë me shumë kaq se kemi nda shumë të përbashkëta”, tha Rugova.