Category: Lajme

Presidentja e Kosovës, Vjosa Osmani kujtoi ka përkujtuar 25-vjetorin e masakrës së Izbicës së Skenderajt.

“Kujtesa historike është në funksion të respektimit të të kaluarës sonë, dokumentimit, sikurse edhe ndërtimit të së ardhmes”, u shpreh Osmani.

Më tutje ajo kujtoi të rënët në këtë masakër.

“Ndaj sot kujtojmë 25 vjetorin e masakrës së Izbicës, kur forcat gjenocidale të Serbisë masakruan 147 civilë, në mesin e të cilëve edhe vajzën 6-muajshe, Dafina Qelaj. Ajo dhe të tjerët u vranë në shtëpitë e tyre vetëm pse ishin shqiptarë”.

“Mizoria në Izbicë, mbetet e skalitur në kujtesën tonë, duke na sjell në vëmendje çmimin e lirisë”, tha Osmani.

“Në tentim për t`i fshehur gjurmët e krimit, viktimat civile regjimi gjenocidal i Serbisë i varrosi në varrezë masive në Petrovo Sello në Beograd, në Novolan dhe në Bistricë”.

Osmani u shpreh se kujtimin për Izbicën dhe të gjitha masakrat gjithandej Kosovës do ta mbajnë gjallë gjithnjë si një dëshmi për rrugën e vështirë nëpër të cilën kaluam dhe si kërkesë të përhershme për drejtësi.

“Qoftë i paharrueshëm kujtimi për 147 të vrarët në Izbicë!”.

25 vjet nga masakra në Izbicë

Nga 25 deri me 28 mars 2024, anëtaret e Shoqatës së Grave në Policinë e Kosovës, të udhëhequra nga Kryetarja e Shoqatës, Major Teuta Nimani, morën pjesë në Konferencën Globale për Barazinë Gjinore në Polici, e cila u mbajt në Budvë, Mal të Zi.

Në konferencë u fol për rëndësinë e pjesëmarrjes më të madhe të grave në sektorin e sigurisë, me qëllim të forcimit të integritetit, me ç’rast kryetarja e Shoqatës së Grave në Policinë e Kosovës, ndau me të pranishmit rrugëtimin dhe të arriturat  e shoqatës për avancimin e mëtejmë të pozitës së gruas në Policinë e Kosovës duke mos e anashkaluar edhe punën e madhe të menaxhmentit të Policisë për rritjen e numrit të grave në forcën policore, ku, në disa raste, gjatë procesit të rekrutimit, ka ndërmarrë masa afirmative të cilat ishin komfor Ligjit për Barazi gjinore dhe akteve tjera ligjore.

Në këtë kontest, përfaqësueset e policive nga 23 shtete, në këtë ngjarje të rëndësishme ndërkombëtare prezantuan masat që po ndërmerren për përmirësimin e situatës në fushën e barazisë gjinore.

Në hapje të konferencës, të pranishmëve iu drejtuan zyrtarë të lartë shtetëror, drejtori i Akademisë së Policisë në Danilovgrad, përfaqësuesja e OSBE-së, përfaqësuesja e Iniciativës Globale, e shumë personalitete vendore dhe ndërkombëtare.

Konferenca, ku morën pjesë rreth 70 pjesëmarrës nga 23 vende, u organizua nga Seksioni i Shoqatës Ndërkombëtare të Policisë në Mal të Zi dhe Shoqata e Grave në Policinë e Malit të Zi, në bashkëpunim me Rrjetin Evropian të Grave në Polici.

Katër persona, përfshirë një adoleshente, u vranë dhe të paktën pesë të tjerë u plagosën, pasi një burrë kreu një sulm me thikë në disa lokacione në shtetin amerikan të Illinoisit, tha policia.

Incidenti ndodhi të mërkurën mbrëma, tha policia në qytetin Rokford. Në deklaratën e policisë u tha se një i dyshuar 22-vjeçar është arrestuar.

Autoritetet amerikane nuk kanë bërë të ditur se cili mund të jetë motivi i këtij incidenti.

Rokford, qytet me afër 150.000 banorë, gjendet rreth 144 kilometra në veriperëndim të Çikagos.

Në mesin e të vrarëve ishin një vajzë 15 vjeçe, një grua 63-vjeçare dhe dy burra të moshës 49 dhe 22 vjeç, tha policia. Sipas autoriteteve, tre nga viktimat vdiqën në vendin e ngjarjes, ndërkaq një në spital.

“Sot jemi të tronditur nga një tjetër akt i dhunës së tmerrshme kundër pjesëtarëve të pafajshëm të komunitetit tonë”, tha kryetari i Rokfordit, Tom McNamara.

Policia tha se pesë persona të tjerë janë plagosur, por mediat amerikane më vonë, duke cituar policinë, thanë se shtatë persona ishin plagosur./REL/

Policët të mbështetur edhe nga Njësia e Reagimit të Shpejtë në Ferizaj kanë arritur ta arrestojnë personin e kërkuar, i moshës 38-vjeçar.

Ai ishte i kërkuar me urdhëresë të Gjykatës Themelore në Ferizaj për veprën penale:‘‘ Lëndim trupor” me dënim burgimi prej trembëdhjetë muajve.

Pas kompletimit të dokumentacionit është dërguar në vuajtje të dënimit.

Kryeministri i Kosovës Albin Kurti në 35 vjetorin e zhvillimeve dramatike të lëvizjes gjithpopullore ka kujtuar vrasjen e 25 demonstruesve dhe u plagosjen e 603 të tjerëve.

“Mes kapitujve të historisë së shtypjes së shqiptarëve të Kosovës nga Serbia pushtuese dhe të rezistencës e kryengritjes së popullit të Kosovës për liri, sot i kujtojmë demonstratat popullore të vitit 1989, në 35-vjetorin e tyre.

Më 27 dhe 28 mars të vitit 1989, policia e Serbisë i shtypi demonstratat paqësore të shqiptarëve gjithandej Kosovës, ku vetëm gjatë atyre dy ditëve u vranë 25 demonstrues dhe u plagosën 603 të tjerë. Ata po kërkonin të drejtat e tyre politike, duke e kundërshtuar shtypjen politike dhe instalimin e regjimit diskriminues dhe kriminal të Serbisë, që vetëm katër ditë më parë ia kishte suprimuar autonominë Kosovës. Në ditët që i pasuan këto demonstrata, 1200 demonstrues shqiptarë u burgosën pas gjyqesh politike”, ka shkruar Kurti në Facebook.

“Lavdi të rënëve në demonstratat e vitit 1989 mes të rënëve në rrugën e gjatë të popullit të Kosovës për liri!”, ka shkruar ai.

Kryetari i SBAShK-ut, Rrahman Jasharaj ka deklaruar se nëse qeveria aktuale në vend nuk merret me kërkesat dhe shqetësimet e paraqitura nga kjo sindikatë, do ndërmerren veprime sindikale, raporton Ekonomia Online.

Jasharaj bëri të ditur se ky vendim erdhi nga takimet me përfaqësues të sindikatës në nivele komunale dhe ato të universiteteve.

“Për ta mbajtur anëtarësinë e informuar ne mbajmë takime të rregullta me kryetarët e niveleve  komunal dhe universiteteve të cilët janë përfaqësues tonë që nga çerdhet deri në universitet dhe debatojmë për çështjet të cilat janë kërkesa e shqetësime të anëtarësisë. Në mbledhjen e fundit që e mbajtëm online e konsideruar mbledhje pak më  e jashtëzakonshme kryetarët raportuan se janë shtuar pakënaqësitë në anëtarësi”.

Ai renditi disa arsye të pakënaqësive të cilat mund të dërgojnë nga protesta deri në grevë

“E këto pakënaqësi lidhen kogja shumë me ligjin për pagat, sepse kishim një pjesë kogja mirë të punëtorëve të arsimit që ishin të pakënaqur me vet ligjin dhe ato që u solli ligji e pakënaqësia u shtua shumë me vendimin e pa konsultuar të qeverisë Kurti, ngritjen ironike të koefcinetit nga 105 në 110 euro lëvizje kjo që i shtoi pakënaqësitë te anëtarësia ngase kemi lëvizje ironike për vetëm 28 euro ne kishim kërkuar me shkresa së paku 130 euro, jo për tu bërë të pasur punëtorët e arsimit por të përballen më lehtë me kërkesat e  kohës dhe çmimet që vazhdimisht po ngriten por qeveria vendosi ashtu siç tek dhe pakënaqësitë janë shtuar shumë e këto pakënaqësi janë prezente për shkak se u bënë kogja do vite në Kosovën e çliruar dhe punëtorët e arsimit s’kanë ligj për sigurime shëndetësore. Përkundër premtimeve  reagime ka edhe takimet që i bëjmë për shkak të kushteve të punës nëpër shkolla të cilat nuk janë të shekullit 21 sepse qeveria po i sfidon punëtorët e arsimit të punojnë me shkumësa e shpuza karshi kërkesave shumë të mëdha të Kosovës dhe kjo beteja e mësimdhënësve edhe pse ata angazhohen vazhdimisht nuk po i jep rezultatet e pritura dhe një pjesë e opinioneve në vend që të kritikojnë qeverinë pse nuk po furnizon shkollat me mjete të duhura, pse bëri lojëra me tekste shkollore në këtë vit shkollor duke thënë se duhet ti bleni në librari dhe e keqja më e madhe pse e ka krijuar këtë tensionim jo vetëm në qeveri është  mungesa totale dhe gatishmërisë të qeverisë Kurti për dialog”.

Jasharaj tha se të njëjtën rrugë, sipas tij po e ndjek edhe minstrja e arsimit, Arbërie Nagavci.

“Në këtë rast një shkollë të tillë të Kurtit po e vazhdon që nga greva e shtatorit zonja Nagavci e cila përkundër kërkesave tona nuk gjen kohë për tu takuar duke u arsyetuar se gjoja qenka shumë e angazhuar ose në Kosovë ose jashtë por ajo po harron se në mungesë të dialogut situatat sa vijnë e shtohen.”

E në mungesë të dialogut, sindikatë -qeveri, Jashari bëri të ditur se më 1 Maj do të ketë protestë me numër të kufizuar.

“Dhe kemi ardhur në këtë moment kur në mbledhjen e fundit me kryetarët e niveleve komunale dhe univesiteteve u shtuan zërat që në mungesë të dialogut që është faji vetëm i qeverisë dhe i askujt tjetër duhet me hi në diçka tjetër dhe kur nuk ka dialog dihet ka veprime sindikale dhe unë jam i sigurt se kryetarët marrin detyra që  të punojnë  me anëtarësinë që e bisedojnë  dhe jam i sigurtë se me 1  maj do të kemi një protestë në numër të kufizuar fillimisht do shkojmë me kryetarët e shoqatave të sindikatave, qerdheve, universiteteve me kryetarët e nivelit komunal dhe me stafin qendror këtu si alarm se po fillohet me veprimet sindikale”.

Jasharaj ka shtuar se frikësohet se qeveria do të barikadohet si gjithmonë, do të hesht, nuk do të ulet as me 1 maj me përfaqësuesit e sindikatave.

“Kam frikën se qeveria do të barikadohet si gjithmonë, do të hesht, nuk do të ulet as me 1 maj me përfaqësuesit e sindikatave dhe pastaj mund të shtohet pakënaqësia dhe anëtarësia mund të kërkoj që të vazhdohet me veprime sindikale dhe mund të vie e përsëritet fatkeqësisht vitit 2022 kur më në fund në mungesë totale dialogut për shkak të një qasje tejet të gabuar erdhi deri të ajo greva që filloi me pjesën e fundit të gushtit e vazhdoi tërë shtatorin duke krijuar një bllokadë totale të sistemit arsimor, me qerdhe të mbyllura, me shkolla të mbyllura dhe ne bëmë çmos ta lusim anëtarësinë duke parë se zoti Kurtit po i pëlqejnë grevat dhe o dëshirojnë të vazhdojnë ne e lutëm anëtarësinë ta mbyllin grevën dhe këtë e bëmë për hir të prindërve që ishin ën siklet ku ti lën fëmijëvet në mungesë të qerdheve dhe për hir të nxënësve të cilët po humbnin një muaj të tërë”

Se sa do jetë afati i qeverisë, Jashari deklaroi se kjo gjë nuk dihet ende, teksa tha se protestës së Një Majit do i bashkohen edhe sindikata tjera.

“Unë nuk e di nuk vendos vetëm uroj që protesta e 1 Majit të shkoj mbarë, pa probleme uroj që ti bashkohen edhe sindikata tjera SBASHKUT, ….për shkak se ne komunikojmë vazhdimisht me ta e edhe mediat e dinë se janë pakënaqësi kogja të mëdha edhe tek policia jonë e nderuar dhe kolegu im kryetari kishte ngritur vazhdimisht zërin…. dhe unë mendoj se ata në masën tonë e kanë të pamundur por edhe ata do jenë në mënyrë simbolike sepse janë në masë të vogël por do jenë në protestën e 1 Majit në mënyrë që ta alarmojmë dhe ti tregojmë qeverisë se pakënaqistë janë të mëdha dhe ne tash po kërkojmë veprime sindikale, çfarë do ndodh pas një majit nuk varen nga unë varet nga zëri i anëtarësisë dhe unë jam betuar se çdo kërkesë të shumicës së anëtarësisë  do jem në ballë të atij aktiviteti qoftë  në protestë qoftë ne grevë”.

Sot mbushen 25 vjet nga themelimi i Brigadës 137 “Gjakova”. Krijimi i këtij formacioni ushtarak përbën një nga kapitujt më të rëndësishëm të luftës në Gjakovë dhe Kosovë.

Themelimi i kësaj brigade ishte bërë me urdhrin e komandantit të Zonës Operative të Dukagjinit, Ramush Haradinaj.

Kjo brigadë u ngrit pas kërkesave të ushtarëve gjakovarë të UÇK-së për ndërhyrje në qytetin e tyre, me qëllim të ndalimit të masakrave dhe krimeve të ushtrisë serbe ndaj civilëve në këtë komunë.

Me datë 28 mars 1999 nga fshati Dashinoc, Komandant i ZOD-it, Ramush Haradinaj jep urdhëresën me nr. L8/862/99 për krijimin e njësitit në shkallë Brigade, të emërtuar Brigada 137 “Gjakova” e UÇK- së, bashkë me emërtimin e kuadrit komandues.

Një ditë pas themelimit, pra më 29 mars 1999 kjo brigadë me shumë pjesëtarë të armatosur, secili prej tyre i pajisur edhe me nga një armë dhe armatim shtesë, u futen në qytetin e Gjakovës. Kjo brigadë ishte ndarë në 4 grupe, të cilat ishin vendosur në 4 pozicione të qytetit, si pikat më të mira strategjike të mundshme për zhvillimin e aktivitetit ushtarak të kësaj brigade.

Tri grupet dhe Shtabi i Brigadës ishin vendosur në lagjet e Çabratit dhe një grupi vendoset në Orize. Në kuadër të detyrave të parashtruara, luftëtarët e kësaj brigade ndërmorën aksione të shumta për mbrojtjen e popullatës civile të Gjakovës.

Veçohet “Epopeja e Çabratit” kur në luftën frontale me armikun, në një distancë të afërt, në datat 7, 8 dhe 9 maj ranë heroikisht 17 dëshmorë të kësaj brigade.

Prishtina dy net më parë u trondit nga një ngjarje e rëndë që ka ndodhur në rrugën ‘Jeronim De Rada’, ku si pasojë e një përleshjeje mes dy grupeve, ka mbetur i vrarë me armë zjarri i riu, Egzon Haziri, teksa u plagosën edhe tre persona tjerë. Në mesin e të plagosurve ishte edhe Zejnije Gashi, e cila nuk arriti t’i përballojë plagët e marra dhe si pasojë ndërroi jetë dje në spital.

Familjarë, miq e të afërm do të mblidhen sot për t’i dhënë lamtumirën e fundit 48-vjeçares.

Sipas njoftimit të familjes, ceremonia mortore do të mbahet me kohën e ikindisë në varrezat e qytetit në Arbëri.

E ndjera ka lënë pas vetes bashkëshortin dhe katër fëmijë.

Katër personat që po dyshohen për plagosje dhe vrasje, të cilët ndodhen në arrati tashmë janë shpallur në kërkim nga Policia.

Fitim Doda dhe Arijan Sijarina dyshohen për tentim vrasjen në lagjen Kolovicë, në orët e pasdites, ndërsa vëllezërit Naim dhe Ahmet Berisha po kërkohen për vrasjen e rëndë, që ndodhi në mbrëmje.

Edhe pse po hetohen si dy raste, motivi dyshohet se lidhet me konfliktin pas plagosjes së Naim Berishës, viktimë e rastit të parë dhe i dyshuar për rastin e dytë.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.