Category: Lajme

Ministria e Punëve të Jashtme dhe Diasporës ka njoftuar të gjithë shtetasit e Republikës së Kosovës se që nga nesër, me fillim në ora 06:00 të mëngjesit e deri me datën 4 prill, në ora 06:00 të mëngjesit, kufijtë e Greqisë do të jenë të mbyllur, si pasojë e një greve 48 orëshe të paralajmëruar nga shërbimi doganor grek.

MPJD njofton shtetasit e saj se kalimi i kufirit do të lejohet vetëm për këmbësorët, pa bagazhe dhe për personat me probleme serioze shëndetësore.

“Shtetasit e Republikës së Kosovës që mund të kenë nevojë për informacione shtesë inkurajohen të kontaktojnë Zyrën e Interesave të Kosovës në Athinë në numrin e mëposhtëm të telefonit:+30 210 721 1711”, thuhet në njoftim.

Dy persona janë arrestuar dhe janë sekuestruar një shumë e parave të gatshme, substanca të dyshuara narkotike të llojit marihuanë, një telefon celular, 240 qese të vogla plastike të zbrazura dhe një trotinet.

Sipas Policisë, ata janë arrestuar dje pasdite në Prizren, ku pas intervistimit me vendim të prokurorit janë dërguar në mbajtje.

Ministri Mbrojtjes në Qeverinë e Shqipërisë, Niko Peleshi fton të rinjtë të bëhen pjesë e Forcave të Armatosura.

“Nuk ka kohë më të mirë për të bërë një hap drejt një karriere të suksesshme si ushtar apo detar profesionist në Forcat e Armatosura”, u shpreh Peleshi.

Ministri tha se “me 389 pozicione të lira në dispozicion, është koha për të nisur një përvojë mbresëlënëse zhvillimi dhe krenarie, duke u bërë versioni më i mirë i vetes. Regjistrohu sot për të filluar rrugëtimin drejt një të ardhmeje të re”, u shpreh Peleshi.

Afati kohor për dorëzimin e dokumentacionit pranë MM është deri më 12 prill 2024.

Nga 500 euro po i marrin gratë që lindin në Qendrën Kryesore të Mjekësisë Familjare në Komunën e Rahovecit, që nga fillimi i këtij viti. Menjëherë pas këtij vendimi të kryetarit të komunës, Smajl Latifi, ky subvencionim ka prodhuar efekt pozitiv duke shtuar interesimin dhe gatishmërinë e grave shtatzëna për të lindur në QKMF-në e kësaj komune.

Kushti i vetëm për të marrë këtë mbështetje nga komuna është që gratë rahoveciane të lindin në spitalin e Rahovecit. Kryetari Smajl Latifi ka thënë për KosovaPress, se kjo përkrahje për gratë e Rahovecit ka vazhduar edhe më herët dhe do të vazhdojë gjithmonë.

Latifi tha se subvencionimi ka për qëllim që të rritë natalitetin në vend dhe të dëshmojë se QKMF-ja plotëson kushtet për çdo lindje. Sipas tij, ky është një shembull i mirë që duhet ta praktikojnë edhe kryetarët e tjerë në komunat e tyre.

“Tashmë kanë nënshkruar vendime individuale për lindjet të cilat kanë ndodhur në këtë repart. E kemi forcuar kapacitetin në repartin në Rahovec, kemi rinovuar sallën e lindjeve, ka kushte optimale për lindje të zakonshme në këtë repart, dhe ka edhe shtim të kuadrove…. Në qoftë se i ka tre fëmijë, ne e rritim shumën… qëllimi i parë është që të dëshmojmë se kjo qendër e lindjeve jo vetëm që është funksionale por është i gatshëm me pranuar gra që do të i mundësohet një lindje e zakonshme me sukses të plotë, besimi i qytetarëve, grave, nënave në repartin tonë…..Ndikimi i këtij subvencionimi nuk besoj që nuk kalon pa prodhuar efekte, për shkak se ne subvencionojmë lindje, i japim përparësi dhe mbështetje, lindjes, jetës, gjallërisë….. Ne i ftojmë që të kenë besim, kuadrot mjaftë të angazhuara dhe po përpiqemi të forcojmë pozicionin përmes investimeve direkt dhe indirekt që bëjmë në repartin e gjinekologjisë, më herët kanë lindur nga 13 foshnje një foshnje, pse tash mos të lindin….Po munden, besoj që është shembull i mirë dhe praktikë që mund të shfrytëzohet, sipas mundësive dhe nga komunat e tjera në mënyrë që çfarë bënë qeveria, ka bërë pak mendoj për lindjet, nënat dhe gratë lehona. Ne mund të bëjmë si komuna dhe të kryejmë punëtorë dhe të krijojmë një ndjenjë të mirë me 500 euro nuk është një mrekulli, por ndihmë edhe për nënën edhe për fëmijën dhe atë familje…. I ftoj kolegët e mi, kryetarët që të ndërmarrin veprime në qoftë se kanë mundësi”, tha Latifi.

Ndërkaq, se subvencionimi do të vazhdojë të rritet për çdo vit dhe nuk do të ndalet e thotë edhe, drejtoresha e Shëndetësisë në Komunën e Rahovecit, Saranda Sallteku.

“Subvencionimi ka qenë në vitin e kaluar, kurse gjatë këtij viti me vendimin e kryetarit e kemi rritur në shumën 500 euro, dhe qëllimi i këtij vendimi ka qenë që të rritet nataliteti dhe të krijohen kushte sa më të mira për gratë që lindin në Rahovec. …. Ky vendim është për vitin 2024 dhe secilin vit po rritet subvencionimi….. Prej viteve të ardhshme mundet me u rrit ky subvencionim”, tha Sallteku.

Po ashtu, edhe drejtori i Qendrës Kryesore të Mjekësisë Familjare në Rahovec, Elbunit Kryeziu tha se me hyrjen në fuqi të subvencionimit me nga 500 euro për gratë që lindin në këtë repart, ka pasur shumë interesim edhe për gratë që kryejnë edhe lindje të tjera.

Drejtori Kryeziu tha se në krahasim me vitin e kaluar, numri i lindjeve në këtë repart ka shkuar deri në gjashtë lindje dhe se presin që ky numër të rritet.

“Lindje sigurisht që ka pasur, por sikur në krejt Kosovën ka rënë, në vitin e kaluar i kemi pasur 18 lindje. Këtë vit nga 1 janari deri më sot i kemi gjashtë lindje. Subvencionet kanë qenë edhe vitin e kaluar, nëse nuk gaboj me 400 euro ose më pak, këtë vit me 500 euro, por ka disa vite që trendi i lindjeve ka rënë…Sigurisht që po, normalisht me indikacionet që mund të kryhen në Rahovec, kryhen gjithmonë me referim, me leje të mjekut, kemi gjinekolog, në momentin që paraqitet një shtatzënë ata vijnë e shohin si po shkon, lindja dhe nëse kryhet normal, e përfundojmë këtu…..Ka pas pyetje të shumta, edhe prej grave që lindin me “seksio” por ato sigurisht nuk mund t’i marrë. Subvencionimi ka qenë vetëm për gratë që lindin në maternitetin e QKMF-së në Rahovec. Presim që të rritet numri, viti ka filluar shumë mirë, gjashtë lindje nuk është numri i vogël”, tha Kryeziu,

Subvencionimi për gratë që lindin në Rahovec në vitin 2021 ka qenë 200 euro, në vitin 2022, 300 euro, në vitin 2023, ka qenë 400 euro, ndërsa në këtë vit subvencionimi do të jetë 500 euro./kp

Një person është arrestuar dje në Podujevë, pasi që nga pa kujdesia e tij kishte djegur disa hektar mal të ankuesit mashkull kosovar.

Me vendim të prokurorit i dyshuari pas intervistimit është liruar dhe rasti shkon në procedurë të rregullt.

Ambasadore e Shtetit të Izraelit në Republikën e Kosovës, Tamar Ziv, përmes një postimi në platformën “X”, ka njoftuar për rritjen e numrin të prodhimeve kosovare në tregun izraelit.

“Jam e lumtur të shoh gjithnjë e më shumë prodhime kosovare të pranishme në tregun izraelit, me kompaninë e njohur kosovare të shitjes me shumicë të pijeve “Frutomania” tani të qasshme për konsumatorët këtu në Izrael. Mbetemi të përkushtuar për afrimin e ekonomive tona dhe qytetarëve tanë”, ka shkruar ambasadorja Ziv.

Dhoma e Tregtisë dhe Industrisë Kosovë njofton se Banka Qendrore e Republikës së Kosovës (BQK), ka larguar tarifën nga BQK për depozitimin e monedhave metalike.

Në përgjigjen zyrtare të pranuar nga Banka Qendrore e Kosovës drejtuar DhTIK, sqarohet se tashmë bizneset nuk detyrohen të paguajnë një tarifë të tillë gjatë depozitimit të monedhave metalike, ndërsa me kërkesë të BQK-së dhe me dakordim paraprak me Drejtuesit e Bankave Komerciale të njëjtën praktikë e kanë zbatuar të gjitha bankat komerciale në vend.

Dhoma e Tregtisë dhe Industrisë Kosovë nëpërmjet një komunikate thekson se tash e disa vite vazhdimisht ka kërkuar dhe zhvilluar takime e aktivitete të vazhueshme duke kërkuar që tarifa për valutat metalike për bizneset të cilëve iu janë ndaluar 3.7%, 5%, 8% e shumë së dorëzuar gjatë depozitimit të monedhave metalike nga qarkullimi i tyre, të largohet sepse kjo tarifë ka dëmtuar rëndë bizneset të cilat operojnë me monedha metalike.

“Si shembull për ilustrim po sqarojmë se para ndryshimit të tarifës për depozitimin e monedhave metalike nga BQK, për dorëzimin e 10.000 EUR para metalike në bankat komerciale, biznesit i janë ndaluar 370 deri në 500 euro. Bizneset që janë afektuar më së tepërmi nga kjo tarifë ishin furrat e bukës, marketet, dyqanet e vogla etj., që më së shumti kanë punë me monedha metalike, e të cilat operojnë me marzha shumë të ulëta të fitimit, andaj aplikimi i kësaj tarife ka shkaktuar një barrë të madhe për këto biznese. Dhoma e Tregtisë dhe Industrisë Kosovë përshëndetë largimin e kësaj tarife nga Banka Qendrore e Kosovës, duke mbetur me shpresë se institucionet e vendit do të marrin parasysh imputet nga përfaqësuesit e bizneseve dhe hapa konkret për lehtësimin dhe krijimin e një klime sa më të përshtatshme për të bërë biznes në vend”, thuhet në komunikatë.

Kryetari i komunës së Prishtinës, Përparim Rama ka bërë të ditur se është zgjedhur projekti fitues për dizajnin e çerdheve dhe kopshteve në Lagjen Kolovicë.

Sipas tij, pjesë e projektit do jetë edhe një kopsht i quajtur “Kopshti i qetë”.

“Projekti fitues në konkursin ndërkombëtar për dizajnin e çerdheve dhe kopshteve në Lagjen Kolovicë, krijuar nga arkitektët Serhat Sen, Kemal Tas, Dilara Akdemir, Alican Tugenkoglu dhe Ramiz Laçi, sjell një frymë të re në krijimin dhe realizimin e çerdheve dhe kopshteve. 🌳

Ngrehina është vendosur në një nga kodrinat e parcelës është dizajnuar mbi idenë e dizajnit që sheh nga brenda. Përmes krijimit të një shiriti të gjelbër në fasadë, ne kemi pasur për qëllim ta shfyrtëzojmë dheun i cili do të zhvendoset për ndërtim. Hapësirat funksionale përfshijnë zyrat, depotë dhe dhomat teknike, të vendosura në të dy anët e hyrjes. Në holl, ana e majtë të çon tek ndarjet e kujdesit ditor, të lidhura me një atrium dhe një kopsht të jashtëm, të cilin e kemi quajtur “Kopshti i qetë”. Ngjitur, në anën e djathtë të hollit është korridori i lojërave, që të çon tek kopshti. Kjo hapësirë ka disa oborre të brendshme, njëri prej të cilëve është më i madh se të tjerët, brenda të cilit është një amfiteatër i cili është i ndërlidhur me me çatinë. Po ashtu, një hapësirë tjetër e përbashkët, e ndërlidhur me ato të kopshtit, e cila zgjerohet në një oborr të brendshëm”, ka shkruar Rama.