Category: Lajme

Venecia filloi sot një provë të një bilete hyrëse prej 5 eurosh, si pjesë e përpjekjeve për të kufizuar flukset turistike që rrezikojnë të “mbysin” qytetin e Lagunës. Kjo provë do të vazhdojë për 30 ditët e ardhshme kur numri i vizitorëve në qytet pritet të jetë veçanërisht i lartë.

Vizitorët do të duhet të rezervojnë biletat në internet paraprakisht. Banorët, udhëtarët, studentët, fëmijët nën 14-vjeç, njerëzit që qëndrojnë në qytet gjatë natës dhe njerëzit që vizitojnë për ngjarje sportive do të përjashtohen nga detyrimi për të blerë biletën.

“Ne kemi për detyrë t’i ruajmë këto qendra të mëdha historike të botës,” tha kryebashkiaku Luigi Brugnaro në një konferencë shtypi për këtë nismë.

Ai tha se kjo nuk do të thotë se “qyteti do të mbyllet” dhe mohoi se masa kishte për qëllim mbledhjen e parave për këshillin e qytetit. Brugnaro tha gjithashtu se Venecia nuk do të kufizojë hyrjet, por vetëm do t’i detyrojë njerëzit të paguajnë për të parë qendrën historike. /ANSA

Ministri i Financave, Punës dhe Transfereve, Hekuran Murati konsideron se mënyra e mëparshme ku nxënësit furnizoheshin me libra çdo vit ka pasur efekte negative, përkundër qëllimit fisnik që mund të ketë pasur.

Sipas tij, me shtypjen e librave çdo vit dhe shpërndarjen e tyre tek nxënësit, ka ndikuar në aspektin e cilësisë dhe në shpenzimet e buxhetit.

Në seancën e sotme plenare të Kuvendit të Kosovës, ministri Murati vlerësoi si metodë më të mirë, blerjen e librave nga vetë prindërit, ngase sipas tij tekstet zgjidhen me më kujdes sa i përket cilësisë dhe mund të ruhen për disa vite që të përdoren nga gjeneratat e tjera.

“Çështja e librave të financuara apo të siguruara nga shteti në fillimet e saj mund të ketë qenë edhe një synim fisnik, nëse do të flisnim sipërfaqësisht…Megjithatë, përgjatë rrugëtimit kemi parë se është stërkeq kjo metodë dhe stërkeqja ka ardhur qoftë nga mekanizmi dhe mënyra se si është përzgjedhur apo edhe nga rregullimet ligjore që janë bërë në të kaluarën…Stërkeqja ka ardhur në aspektin e sasisë vjetore të librave. Për shembull nëse para 15 viteve, në klasën e parë kanë qenë dy libra, abetarja dhe matematika, për shkak të këtij mekanizmi të krijuar ku shteti paguan pavarësisht sa libra janë të nevojshme, ka pasur incentive që shtëpitë botuese që ndoshta t’i korruptojnë komisionet të cilat kanë caktuar kurrikulat se çfarë libra duhet të ketë dhe tash kemi përfunduar që klasa e parë t’i ketë 14 libra…Çështja e dytë që e stërkeq apo që ka ndikuar pastaj edhe në mos shfrytëzim efikas të buxhetit ka qenë edhe cilësia e vetë librave dhe ruajtja e tyre. Nëse në të kaluarën një libër e ka blerë vetë prindi dhe ka vendosur cilin libër po e merr e ka shikuar që libri të jetë I cilësisë dhe të jetë i lidhur mirë dhe të jetë I qëndrueshëm. Po ashtu, është siguruar që libri të ruhet sepse ka qenë pronë e familjes. Ka pasur edhe aspekti i cilësisë, kursimit buxhetor por edhe aspektin ambiental. Nuk ka pasur nevojë të shtypen 300 apo 400 mijë libra çdo vit”, tha Murati.

Gjatë seancës plenare, në të cilën po diskutohet për formimin e Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit, Murati potencoi se koha kur prindërit blinin vetë tekstet shkollore për fëmijët, ndonëse ka qenë i imponuar si mekanizëm, ka pasur efekte pozitive.

Presidentja e Kosovës, Vjosa Osmani priti sot në takim të rregullt ambasadorin e SHBA-së në Prishtinë Jeffrey Hovenier.

Në takim u diskutua për zhvillimet e fundit në vend me fokus të veçantë në procesin e anëtarësimit të Kosovës në Këshillin e Evropës.

Osmani dhe Hovenier diskutuan edhe për përgatitjet që po bëhen për mbajtjen e zgjedhjeve në veri, si dhe aspekte të ndryshme të bashkëpunimit bilateral.

Asambleja Parlamentare e Këshillit të Evropës ka njoftuar se diskutimi për anëtarësimin e Kosovës do të mbahet më 15 prill, nga ora 14:00-15:15, dhe aty do të prezantohet raporti nga raportuesja për Kosovën Dora Baokyannis, Azdeh Rojhan nga Suedia dhe Beatrice Fresko-Rolfo nga Monako.

Pas debatit, pritet të ketë votim dhe nëse Kosova kalon me sukses këtë fazë, votimi që pritet të ndodhë në maj në Këshillin e Ministrave të Këshillit të Evropës do të jetë përcaktues nëse vendi do të anëtarësohet në KiE.

Ndryshe, Komiteti për Çështje Politike dhe Demokraci i Këshillit të Evropës ka rekomanduar anëtarësimin e Kosovës në Këshillin e Evropës pa asnjë parakusht shtesë. Opinioni i Bakoyannis kërkon largimin e fusnotës nga denominimi i Kosovës, e cila është përdorur që nga viti 2008 në çdo raport dhe komunikim mbi dhe me Kosovën. Gjithashtu, rekomandohet që Kosova të ftohet si shtet, sipas nenit 4 të Statutit të KiE, dhe jo si vend, sipas nenit 5. Anëtarësimi i Kosovës në Këshillin e Evropës do të ketë ndikim të jashtëzakonshëm në promovimin dhe mbrojtjen e të drejtave të të gjitha komuniteteve të vendit.

Kosova paraqiti kërkesën e saj për anëtarësim në Këshillin e Evropës në maj të vitit 2022. Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës. Këshilli mbron lirinë e shprehjes dhe të mediave, barazinë dhe minoritetet në vendet anëtare.

Shefi i NATO-s shënoi të enjten 75-vjetorin e Aleancës, duke thënë se ajo jo vetëm që përhap “paqe, demokraci dhe prosperitet” në të gjithë Evropën, por gjithashtu “shumëfishoi fuqinë e Amerikës.”

“Sot ne festojmë 75 vjetorin e aleancës më të fortë, më të qëndrueshme dhe më të suksesshme në histori,” tha sekretari i Përgjithshëm Jens Stoltenberg në ceremoninë përkujtimore në Bruksel.

“Evropa ka nevojë për Amerikën e Veriut për sigurinë e saj. Në të njëjtën kohë, Amerika e Veriut gjithashtu ka nevojë për Evropën,” tha ai. “Aleatët evropianë ofrojnë ushtri të klasës botërore, rrjete të mëdha inteligjence dhe leva unike diplomatike, duke shumëfishuar fuqinë e Amerikës.”

Ai theksoi se nuk beson në “Amerikën vetëm” apo “Evropën vetëm.”

“Unë besoj në Amerikën dhe Evropën së bashku në NATO, sepse ne jemi më të fortë dhe më të sigurt së bashku,” shtoi ai.

Ai theksoi gjithashtu se ndarja e drejtë e barrës midis anëtarëve është thelbësore dhe tha se Evropa po investon më shumë, pasi shumica e aleatëve të NATO-s do të investojnë të paktën dy për qind të bruto prodhimit vendor në mbrojtje në vitin 2024. /AA

Në vazhdën e aktiviteteve për luftimin e kontrabandës, Policia e Kosovës, më datë 2 prill 2024, në fshatin Bërnjak në një objekt, ish-fabrikë, ka identifikuar disa automjete ku në njërin prej tyre ka pasur dyshime për materiale ilegale.

Njësitet policore kanë ndërmarrë veprimet e kontrollit dhe kanë vërejtur se brenda një kamioni me targa serbe kishte të ngarkuar disa kuti me mjete të ndryshme të dyshuara si mjete piroteknike sasia e të cilave vlerësohet të jetë 3.681 kilogramë.

Lidhur me rastin janë njoftuar dhe kanë dalë në vendin e ngjarje të gjitha njësitet relevante të PK-së përfshirë njësinë e antiterrorit, forenzikës, hetimet rajonale, K9 dhe Njësia për menaxhimin e mjeteve eksplozive, të cilat janë marrë me procedurat e nevojshme.

Kamioni së bashku me ngarkesën janë konfiskuar dhe dërguar në terminal doganor për procedura të mëtejme ligjore nga autoritetet.

Iva dhe Georgi janë ndër pjesëmarrësit e nismës Guests of Tundzha, në të cilën fermat në fshatrat e komunës Tundzha në rajonin e Yambol hapin dyert e tyre për vizitorët e të gjitha moshave. Të dy janë në fillim të të 30-tave dhe u kthyen në Bullgari nga Danimarka në fillim të vitit 2023. Ata vendosën të vendosen në fshatin Hanovë dhe të bëjnë realitet ëndrrën e tyre – të krijojnë një fermë perimesh për bujqësi rigjeneruese dhe ushqim ekologjikisht të pastër të quajtur ferma NorDig. Në Danimarkë, Georgi punonte si kuzhinier profesionist në restorantet me yje Michelin, ndërsa Iva kishte një profesion si arkitekte peizazhi. Sipas tyre, ndryshimin rrënjësor të dy e kanë bërë më së shumti për kuriozitet, por edhe me entuziazëm të madh dhe jo më pak “me idenë për të bërë një ndryshim, për të menduar jashtë kutisë”, sipas fjalëve të Georgit.

Në kopshtin e tyre, ata rritin perime sezonale duke përdorur teknologji miqësore me tokën, pa lejuar lërim, gërmim, përpunim ose bluarje. Përdorimi i pesticideve dhe plehrave kimike këtu është rreptës i ndaluar. “Ne mbështetemi në rritjen e tokës së shëndetshme, në mënyrë që bimët të kenë imunitet të mirë”, tha Iva. “Kur njerëzit na pyesin se çfarë po rritim, them se kujdesemi mirë për mikroorganizmat në tokë”, shtoi Georgi duke buzëqeshur. “Kur toka bluhet, ndodh krejt e kundërta – të gjithë mikroorganizmat e dobishëm janë të ekspozuar ndaj kushteve atmosferike që nuk mund t’i përballojnë. Mikroorganizmat që jetojnë në thellësi janë anaerobe, vdesin kur i nxjerrim në sipërfaqe”, tha Georgi.

Iva shtoi se në fshat mbjellin vetëm varietete jo hibride, të vjetra që u kujtojnë shijen e fëmijërisë së tyre. Klima lokale i lejon ata të prodhojnë të ashtuquajturat super ushqime, si lakra jeshile dhe chard. Sipas Georgit, ai krenohet me faktin që tani mund të bëjë vetë kompost, ndërsa në fillim i është dashur ta blejë. Për këtë qëllim ai mbledh mbetjet bimore nga i gjithë fshati. Bujqësia natyrore dhe organike po fillon të zhvillohet gjithnjë e më shumë në Bullgari, tha çifti. “Mendimi im personal është se brenda katër apo pesë viteve do të bëhet pjesa mbizotëruese e bujqësisë”, theksoi Georgi. “Rendimenti, shija dhe cilësitë ushqyese janë më të mira në krahasim me kultivimin e tokës në mënyrë konvencionale”, shtoi Iva. Për iniciativën ata kanë përgatitur një fushë eksperimentale për vizitorët, në të cilën fëmijët mund të mbjellin fara me ndihmën e tyre. Ata kanë përgatitur edhe shumë surpriza, lojëra dhe argëtim për vizitorët e vegjël. “Mendoj se qëndrimi ndaj natyrës është themelor në edukim, ndërgjegjja e një fëmije zhvillohet në një mënyrë krejt tjetër, shumë nga fëmijët sot për fat të keq nuk kanë kontakt me fshatin, nuk e kanë idenë se nga ku vjen një perime e dhënë – qoftë nga një pemë apo nga një bimë”, tha Iva. Sipas çiftit, nisma është jashtëzakonisht e vlefshme për të popullarizuar më shumë këtë lloj bujqësie. “E gjithë ideja dhe misioni që kemi nuk është të prodhojmë dhe të shesim produkte. Ne duam të tregojmë se çfarë është bujqësia rigjeneruese, që të gjithë të kenë qasje në ushqim të pastër”, theksojnë Iva dhe Georgi. /BTA

Deputeti i Partisë Demokratike të Kosovës, Ardian Kastrati ka vendosur në foltoren e Kuvendit të Kosovës një pankartë të ministres së Arsimit, Arberie Nagavci dhe të anëtares së kryesisë Lëvizjes Vetëvendosje, Dejona Milahit, si dhe shenjën e shtëpisë botuese “Albas” në mes, duke thënë se përmes saj janë vjedhur miliona.

Ai pati një përplasje me ministren e Arsimit, Arbërie Nagavci, për çka kjo e fundit u akuzua për vjedhje milionëshe në procesin e subvencionimit me tekste shkollore për nxënësit.

Kastrati i quajti “rrencë” kryeministrin e Kosovës, Albin Kurti dhe ministren Nagavci.

Ndër të tjera, ai tha se subvencionimi i nxënësve me tekste shkollore është një skenar përmes të cilit është bërë korrupsion e krim i organizuar.

“Kjo është logoja e Albasit, ajo që po e shihni këtu mes Dejona Mihalit dhe kësaj tjetrës. Këto nuk janë aventurat e Cipolinos por janë aventurat e verës me agjin, dhe autore është Nagavci dhe Krenare Lleshi dhe Alida Thaçi. Pra, e ka paguar Albasi këtë. Këto nuk ka nevojë të bëjnë kamuflimi e manipulime e të thonë jo kështu jo deklarimet jo pasuria e të tjera…Me fotografi duam ta ilustrojnë se pse ka ndodhur i gjithë ky skenar kaotik vitin e kaluar për të ardhur deri tek një krim i organizuar me këto milionat e Albasit të cilët i kanë shumëfishuar pasi që ju keni ardhur në pushtet… Po të shpallej një olimpiadë ndërkombëtare për gënjeshtarë ky (Albin Kurti) e zë vendin e parë, por po të shpallej një konkurs ndërkombëtarë nëse ka organizata të tilla të specializuara për ta bërë sa më kaotik fillimin e vitit shkollor, nuk keni konkurrencë e bëni ju. Parvjet me greva, me sindikata dhe vitin e kaluar me këtë temën që po flasim sot… Ky skenar është i organizuar, ka erë të madhe të korrupsionit që shkojnë në krimin e organizuar. Filluat kinse, ofertat janë shtrenjtë, doli atje kompania dhe tha e keni katër për qind më lirë. Kur e bëtë 8 minuta para fillimit të vitit shkollor dolët dhe improvizuat me një vendim. Vendim ky që e dëmtoi buxhetin, mësimdhënësit, shkollën fëmijët…Ju e keni shkelur edhe parimin e Kushtetutës së Kosovës. Sa miliona i keni vjedhur përmes Albasit?”, tha Kastrati.

Lidhur e këto akuza, Nagavci tha se e ka të pamundur të diskutojë për tekstet shkollore me folësit që sipas saj i ka zgjedhur PDK-ja, derisa tha se kjo parti nuk ka ide se si funksionon procesi i furnizimit me tekste.

Nagavci tha se mezi pret që të formohet Komisioni Parlamentar Hetimor lidhur me këtë çështje, e që sipas saj do të mund të hetohen abuzimet dhe keqpërdorimet që janë bërë nga partitë e tjera përgjatë viteve sa udhëhiqnin ministrinë e Arsimit.

Ndër të tjera, Nagavci tha se shumë shpejtë do të publikohet një raport i auditorit, i cili do të tregojë keqpërdorimet miliona euroshe në procesin e dixhitalizimit.

“Do të doja shumë të diskutoja me profesor universitar për tekstet mësimore, por jo është e pa mundur me këta folës që PDK-ja ka zgjedhur t’i bëjë. Ju nuk e keni idenë e procesit të furnizimeve me tekste. Pra, i shihni gjithmonë shtëpitë botuese si euro, si transaksione, si xhirollogari. Ma shpjego pak se si mund të keqpërdoren mjetet kur në vend se të shkojë në xhirollogaritë e tre katër shtëpive botuese, dy siç keni bërë ju shkojnë tek qindra mijëra qytetarë. Përtej kësaj, PDK-ja ka pasur ish ministra të arsimit përfshirë Enver Hoxhën me të cilin ju mburreni. Pse nuk është sot këtu të flas për reformat dhe tekstet. Mezi po pres ta formojmë Komisionin Hetimor. Askush nga ne nuk ka të bëjë me këto ëndrra që ju I shihni…Shumë mirë që fole edhe dixhitalizimin. Një raport i auditorit që do të publikohet shumë shpejtë do të nxjerrë të palarat edhe në dixhitalizim. Miliona euro të keqpërdorura edhe në dixhitalizim nga PDK-ja…Ju do të duhej fare të mos flisni”, tha Nagavci.

Ndërkaq, Partia Demokratike e Kosovës ka kërkuar themelimin e Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe të mesëm të ulët për vitin shkollor 2023-2024.

Presidentja e Republikës së Kosovës, Vjosa Osmani priti sot në takim të rregullt Ambasadorin e Shteteve të Bashkuara, Jeffrey Hovenier.

Siç njoftoi Presidenca, në takim u diskutua për zhvillimet e fundit në vend me fokus të veçantë në procesin e anëtarësimit të Kosovës në Këshillin e Evropës.

Tutje, Presidentja Osmani dhe Ambasdaori Hovenier diskutuan edhe për përgatitjet që po bëhen për mbajtjen e zgjedhjeve në veri, si dhe aspekte të ndryshme të bashkëpunimit bilateral.

Kosova dhe Serbia nuk kanë arritur të pajtohen për çështjen e dinarit serb, i cili u ndalua në Kosovë, as pas takimit të tretë radhazi të enjten në Bruksel, tha kryenegociatori serb, Petar Petkoviq.

Duke folur për gazetarë në kryeqytetin belg, Petkoviq tha se Prishtina nuk tregoi “vullnet të mjaftueshëm” për një marrëveshje dhe se pritet edhe një takim lidhur me këtë temë, raporton Radio Evropa e Lirë.

“Ne përsëritëm edhe një herë qëndrimin dhe propozimin tonë, i cili është i balancuar dhe nënkupton një zgjidhje kompromisi. Nga ana tjetër, nuk kishte vullnet të mjaftueshëm nga ana e Prishtinës. Nuk do të flas më shumë për këtë, duke qenë se do të ketë një takim tjetër për këtë temë”, tha ai.

Ai i bëri këto deklarata pas takimit trepalësh mes tij dhe kryenegociatorit të Kosovës, Besnik Bislimi, nën ndërmjetësimin e të dërguarit të BE-së për dialogun, Mirosllav Lajçak.

Në takimin e kaluar në Bruksel, Petkoviq kishte thënë se pala serbe do të përpiqet që të vazhdojë funksionimi i bankës së Serbisë në Kosovë, Kursimora e Postës, në mënyrë që serbët të marrin pagat, pensionet dhe ndihmën tjetër.

Petkoviq theksoi gjithashtu se pret që Lajçaku të bëjë një ftesë të re për diskutime për pagesat brenda dhjetë ditëve.

“Më pas do të shohim se si do të zhvillohen gjërat”, shtoi ai.

Ai përsëriti se kjo çështje do të ishte e zgjidhur, sikur të ekzistonte Asociacioni i komunave me shumicë serbe në Kosovë.

Të enjten më herët në mëngjes, Lajçak e zhvilloi një takim dypalësh me kryenegociatorin serb Petkoviq.

Përdorimi i dinarit për pagesa me para të gatshme në Kosovë u ndalua më 1 shkurt, kur Banka Qendrore e Kosovës e futi në fuqi një rregullore të re e cila përcaktoi euron si valutën e vetme zyrtare në vend.

Bashkimi Evropian, i cili e lehtëson dialogun mes Kosovës dhe Serbisë në Bruksel, shpresonte se do të tejkaloheshin dallimet në qasje mes palëve dhe të arrihej një zgjidhje, sipas së cilës qytetarët serbë në Kosovë do të mund të vazhdojnë t’i pranojnë beneficionet nga shteti serb.

Kjo çështje, pos që zemëroi Serbinë, nxiti mospajtime edhe mes Qeverisë së Kosovës dhe bashkësisë ndërkombëtare, pasi komuniteti serb në Kosovë, prej vitesh, merr pagesa në dinarë nga buxheti i Serbisë.

Diplomatë perëndimorë i kërkuan Kosovës që ta pezullojë rregulloren, për t’iu dhënë kohë qytetarëve të prekur që të përshtaten me praktikën e re.

Takimi i sotëm ishte i treti në javët e fundit mes kryenegociatorit të Kosovës, Besnik Bislimi dhe atij të Serbisë, Petar Petkoviq, ndërsa i katërti në përgjithësi për këtë çështje në Bruksel.

Në takimet e deritanishme, sipas BE-së, palët kanë paraqitur propozimet e tyre për gjetjen e një zgjidhjeje praktike dhe afatshkurtër për qytetarët serbë në Kosovë që paguhen në dinarë nga Serbia.

Por, ka pasur dallime mes palëve, prandaj edhe është thirrur edhe ky takim që zhvillohet sot, e enjte, në përpjekje për të gjetur një zgjidhje.

Qeveria e Kosovës ngul këmbë se vendimi i BQK-së nuk është politik, por i një institucioni të pavarur. Megjithatë, ajo është shprehur e gatshme për një zgjidhje praktike që do t’u ndihmonte qytetarëve, por pa vënë në dyshim vendimin e BQK-së.

Në një intervistë dhënë REL-it në mars, kryeministri i Kosovës, Albin Kurti, tha se nuk do të pranohen propozime për dinarin që janë në kundërshtim me rregulloren e BQK-së.

Burimet e BE-së kanë thënë se shpresojnë në arritjen e zgjidhjes, por kanë përsëritur se kjo, mbi të gjitha, do të varet nga gatishmëria e palëve. /REL