Category: Lajme

Kryetari i Aleancës për Ardhmërinë e Kosovës (AAK) Ramush Haradinaj ka kujtuar Betejën e Zhegocit në 25-vjetorin e saj duke thënë se nuk do t’i ndalin përpjekjet që autorët e krimeve serbe ndaj shqiptarëve të marrin dënimin e merituar.

Ai përmes një postimi në llogarinë në Facebook, ka thënë se duke kujtuar Betejën e Zhegocit, nderojnë kontributin e Zonës Operative të Karadakut, rezistencën, sakrificën dhe rënien e bijve më të mirë të saj.

Haradinaj po ashtu ka kujtuar martirët e rënë në Sllovi të Lipjanit dhe në Lagjen e Boshnjakëve në Mitrovicë.

15 prilli i pranverës së fundit në robëri, gjeti pushtuesin në një operacion të gjerë për spastrim etnik, e përballë tyre, luftëtarët trima të Ushtrisë Çlirimtare të Kosovës. Kujtojmë sot Betejën e Zhegocit dhe nderojmë kontributin e Zonës Operative të Karadakut – rezistencën dhe sakrificën e luftëtarëve më të zotë të saj!

Po të njëjtën ditë, për të shfryer egërsinë dhe mllefin e humbjeve në frontet e luftës, pikërisht gjatë Betejës së Zhegocit, armiku do të sulmonte popullatën e paarmatosur në Sllovi të Lipjanit, duke vrarë civilë të pafajshëm shqiptarë. Njëjtë do të pësonin edhe motrat e vëllezërit tonë në Lagjen e Boshnjakëve në Mitrovicë.

Më shumë se dy dekada e drejtësia ende nuk është vënë në vend. Ne nuk do t’i ndalim përpjekjet tona që ata të cilët kryen këto krime të marrin dënimin e merituar.

Prokuroria Speciale, njofton se sipas ftesës së kësaj prokurorie, Rozeta Hajdari, ministrja e Ministrisë e Industrisë, Ndërmarrësisë dhe Tregtisë, është paraqitur në Prokurorinë Speciale për t’u intervistuar në cilësinë e të pandehurës, nën dyshimin se ka kryer veprën penale ‘’Keqpërdorim i pozitës apo autoritetit zyrtar’’, nga neni 414 i Kodit Penal të Republikës së Kosovës, lidhur me rezervat shtetërore.

“Mirëpo, e njëjta sot nuk është deklaruar, dhe siç e parasheh Kodi i Procedurës Penale ka shfrytëzuar të drejtën për t’u mbrojtur në heshtje”, thuhet në komunikatë.

Sulmi i Iranit ndaj Izraelit dhe implikimet e mundshme për paqen dhe sigurinë globale dhe rajonale ishte temë qendrore e Këshillit të Sigurisë së Kosovës mbrëmë me ftesë të kryeministrit të Kosovës Albin Kurti. Qeveria e Kosovës ka dënuar menjëherë sulmin e Iranit ndaj Izraelit, duke e cilësuar si akt të paprecedent që paraqet rrezik për destabilizimin e Lindjes së Mesme dhe të eskalimit të mëtutjeshëm të situatës së sigurisë.

Sulmi u krye me dronë Shaheed, prodhim iranian. Mijëra dronë të tillë i ka në posedim edhe Serbia, e cila në vazhdimësi shfaqë sjellje agresive ndaj Republikës së Kosovës, veçanërisht përgjatë kufirit që ndajmë, thuhet në njoftim. Institucionet e sigurisë së Kosovës janë duke i përcjellë zhvillimet e fundit me vëmendje të shtuar, dhe janë duke e monitoruar gjendjen e sigurisë në baza të vazhdueshme dhe në bashkërendim e bashkëpunim të ngushtë me KFOR-in dhe me partnerët strategjikë.Irani ka sulmuar Izraelin me dronë dhe raketa, shumica e të cilave janë rrëzuar.

25 vjet më parë, forcat okupatore serbe grumbulluan rreth 80 shqiptarë në shtëpinë e Mustafë Sahitit në Lagjen e Boshnjakëve, ku i keqtrajtuan, torturuan e masakruan 23 prej tyre.

Ministri i Punëve të Brendshme Xhelal Sveçla dhe ministri i Administrimit të Pushtetit Lokal Elbert Krasniqi, familjarë të të rënëve, deputetë e qytetarë, sot u mblodhën në shtëpinë përkujtimore për të shënuar këtë ditë dhe për të nderuar sakrificën e 23 të rënëve për lirinë e çlirimin e vendit.

“I përulemi sakrificës së të rënëve për lirinë që e gëzojmë ndërsa si institucione të Republikës së Kosovës po angazhohemi çdo ditë në zbardhjen e krimeve që Serbia kreu në Kosovë dhe sjelljen e kriminelëve para drejtësisë,” ka shkruar Sveçla në Facebook.

Konferenca e dytë për sigurinë e Detit të Zi në kuadër të Platformës ndërkombëtare të Krimesë u hap zyrtarisht në Sofje të hënën., organizuar nga ministritë e Punëve të Jashtme dhe Mbrojtjes të Bullgarisë dhe Ukrainës, në partneritet me Qendrën për Strategjitë e Mbrojtjes Ukrainë.

Investimi në sigurinë e rajonit të Detit të Zi është investim në zonën euroatlantike të paqes dhe lirisë, tha ministri i Jashtëm në detyrë Stefan Dimitrov, i cili hapi forumin.

Mbështetja për Ukrainën do të mbetet në fokusin e politikës mbrojtëse të qeverisë së përkohshme, tha ministri i Mbrojtjes në detyrë Atanas Zapryanov.

“Konferenca e sotme do të shërbejë si një platformë e rëndësishme për sigurinë e rajonit të Detit të Zi,” tha ministri i Jashtëm ukrainas Dmytro Kuleba në një video-fjalim në konferencë.

Ai shtoi se është thellësisht mirënjohës për mbështetjen e qeverisë bullgare dhe qytetarëve të vendit.

“Të gjithë duam ta shohim Detin e Zi si një zonë paqeje dhe zhvillimi ekonomik”, tha Kuleba.

Deti i Zi duhet të bëhet një det i NATO-s, paqes dhe stabilitetit, tha ai. Kjo tashmë ka ndodhur me Detin Baltik pasi Finlanda dhe Suedia u bashkuan me Aleancën, vuri në dukje ministri i Jashtëm ukrainas.

Presidenti rus Vladimir Putin besonte se Kievi do të binte shpejt, ai gjithashtu besonte se fqinjët e Ukrainës në rajonin e Detit të Zi do të ndaheshin, tha sekretari amerikan i Shtetit Antony Blinken në një video-adresim. Në të gjitha frontet, Putin është provuar se ka gabuar, nënvizoi Blinken.

Ai vuri në dukje se me guximin e Ukrainës dhe mbështetjen e vendeve në rajon dhe në mbarë botën, vendi rifitoi më shumë se gjysmën e territoreve që i ishin marrë nga Rusia.

“Rajoni i Detit të Zi përfaqëson një udhëkryq kulturash, traditash dhe paqeje. Stabiliteti dhe prosperiteti janë jetike për ata që jetojnë në të,” tha sekretarja e Përgjithshme e Këshillit të Evropës Maria Pejçinoviq-Buriq në një video-fjalim. Këshilli i Evropës është i përkushtuar për të garantuar të drejtat e njeriut dhe demokracinë, shtoi ajo.

“Të mos harrojmë kurrë se lufta e Rusisë kundër Ukrainës filloi në vitin 2014 me pushtimin e Krimesë”, kërkoi në një video-adresim sekretari i Përgjithshëm i Organizatës së Shteteve Amerikane, Luis Almagro. Ai theksoi se janë injoruar shenjat paralajmëruese se diçka më e keqe do të ndodhte.

Në forum do të diskutohet edhe zbatimi i formulës së paqes në Ukrainë. Ndër ata që marrin pjesë në forum janë deputetë, diplomatë dhe personel ushtarak. /BTA

Presidentja e Kosovës, Vjosa Osmani në vazhdën e takimeve bilaterale është takuar edhe me Kryetaren e Kuvendit të Shqipërisë, Lindita Nikolla dhe Ambasadorin e Republikës së Shqipërisë në Kosovë, Petrit Malaj, raporton EO.

Edhe ky takimi është realizuar në ambientet ku po mbahet edicioni i dytë i Forumit për Gratë, Paqen dhe Sigurinë.

Gazetari i REL (edicioni në gjuhën angleze), Rikard Jozwiak ka analizuar se si Kosova mund t’i marrë nesër shumicën e votave në Asamblenë e Përgjithshme me 306 anëtarë, ku do të debatohet dhe më pas votohet për një hap tjetër drejt anëtarësimit të Kosovës në Këshillin e Evropës.

Këshilli i Evropës ka 46 shtetet anëtare, 12 prej tyre nuk e njohin Kosovën, por pritet që Kosova t’i marrë edhe votat e deputetëve nga vendet që se njohin.

“Është e mundur që shumica prej 2/3 të arrihet. Aktualisht 12 nga 46 vende anëtare nuk e njohin Kosovës si të pavarur – që janë më pak se pakica që mund të bllokojë. Kjo i përfshin vendet si Serbia, Bosnja; dhe pesë mosnjohëset në BE, Qipro, Greqia, Rumania, Sllovakia dhe Spanja; sikurse edhe Armenia, Azerbejxhani, Gjeorgjia dhe Moldavia. Ukraina po ashtu se njeh pavarësinë e Kosovës, më së shumti nga frika se Rusa mund ta përdorë këtë si pretekst për t’I njohur më shumë ndërkombëtarisht territoret e Ukrainës që aktualisht janë të okupuara”, shkruan ai.

Tutje, REL thotë se përfaqësuesit e vendeve (depuetët në APKiE, mund të mos votojnë sipas qëndrimve politike të kryeqyteteve të tyre ndaj Kosovës.

“Për shembull përfaqësuesit e Ukrainës do të kenë një “votë të lirë” dhe mund të ndodhë që edhe vendet tjera t’i ndjekin”

Jozwiak pret që deputetet e APKiE nga partia në pushtet Fidesz me gjasë do të vootjnë kundër mocionit pavarësisht njohjes së shtetësisë së Kosovës nga Hungaria – që përbën një refleksion të lidhjeve në rritje të Budapestit me Beogradin.

Po ashtu do të ketë edhe disa përfaqësues që do abstenojnë, që do të shkojë në favor të Prishtinës.

“Është signifikante se autorja e raportit, Dora Bakoyannis është ish-ministrja e jashtme e Greqisë dhe motra e Kryeministrit aktual Kyriakos Mitsotakis. Nuk është e pamundur që, pavarësisht qëndrimit mosnjohës të Greqisë për mosnjohjen e Kosovës, delegacioni grek do të mbështes anëtarësimin e Prishtinës” analizon Jozwiak.

Fondi Evropian i Investimeve (FEI), pjesë e Grupit të Bankës Evropiane të Investimeve (EIB), ka nënshkruar marrëveshje garancie të portofolit me 11 banka dhe ndërmjetës financiarë në ekonomitë e vendeve të Ballkanit Perëndimor.

Këto marrëveshje të financuara nga BE-ja në kuadër të Instrumentit për Sipërmarrje dhe Inovacion në Ballkanin Perëndimor (WB EDIF) Iniciativa e Garancive për Qëndrueshmërinë e NVM-ve do t’u mundësojnë bankave dhe institucioneve financiare vendase të krijojnë një portofol kredish për ndërmarrjet e vogla dhe të mesme për një shumë totale prej mbi 750 milionë euro, së bashku me ato që do të nënshkruhen deri në gjysmën e parë të vitit 2024.

Këto burime financiare synojnë të rrisin qasjen në financa te bizneset e vogla dhe të përmirësojnë qëndrueshmërinë e tyre ndaj vështirësive të vazhdueshme ekonomike, duke krijuar njëkohësisht kushte për zgjerimin e biznesit, punësimin dhe inovacionin.

Në Kosovë, ky instrument pritet të shpërndajë kredi me një vlerë totale prej 37 milionë eurosh, të disponueshme me kushte të favorshme kreditimi për rreth 690 ndërmarrje të vogla dhe të mesme, duke mbështetur rreth 9.500 vende pune.

Marjut Falkstedt, drejtori ekzekutiv i FEI-t, tha këto burime financiare do të përmirësojnë kapacitetin e tyre për risi dhe rritje, duke kontribuar në integrimin e mëtejshëm brenda ekonomisë së BE-së.

“Në këtë mënyrë, këto fonde të konsiderueshme do të ofrojnë një shtysë për zhvillimin e ekonomive rajonale të fuqishme dhe konkurruese, si dhe avancimin e tyre në zinxhirët globalë,” tha ai.

Në Kosovë, garancitë e FEI-t zhbllokuan rreth 190 milionë euro në total deri më tani për afro 3 mijë ndërmarrje të vogla dhe të mesme, të cilat ndihmuan në ruajtjen e 31.000 vendeve të punës.

Ambasadori i BE-së në Kosovë, Tomash Szunyog tha se ndërmarrjet e vogla dhe të mesme në Kosovë do të jenë në gjendje të rrisin mundësitë e tyre të financimit dhe të marrin kredi me kushte të favorshme.

“Kjo nismë e financuar nga BE-ja do t’i ndihmojë ndërmarrjet e tilla në të gjithë rajonin e Ballkanit Perëndimor që t’i përgjigjen më mirë sfidave ekonomike dhe të rriten,” tha ai.

Fondi Evropian i Investimeve (FEI) është pjesë e Grupit të Bankës Evropiane të Investimeve. Misioni qendror i tij është të mbështesë ndërmarrjet mikro, të vogla dhe të mesme (NVM) duke i ndihmuar në qasjen në financa.

FEI harton dhe zhvillon kapital sipërmarrjeje dhe rritjeje, garanci dhe instrumente mikrofinancimi që synojnë posaçërisht këtë segment të tregut. Përmes këtij roli, FEI nxit objektivat e BE-së për mbështetje të inovacionit, kërkimit dhe zhvillimit, sipërmarrjes, rritjes dhe punësimit.

Zëvendëskryeministri Besnik Bislimi, gjatë një takimi sot me zëvendësdrejtorin menaxhues për Evropë të Shërbimit Evropian të Veprimit të Jashtëm (EEAS) të BE-së, Marko Makovec, ka kërkuar heqjen sa më parë të masave ndëshkuese të Bashkimit Evropian ndaj Kosovës, gjersa ato vijojnë të mbeten të padrejta.

Bislimi theksoi domosdoshmërinë e avancimit të Kosovës në rrugëtimin drejt integrimit evropian, veçanërisht trajtimit të aplikimit për anëtarësim në BE, ku mbetet i vetmi vend në Ballkanin Perëndimor pa statusin e vendit kandidat, përkundër progresit në luftimin e krimit dhe korrupsionit.

Në takim u bisedua edhe mbi zhvillimet e fundit në vend e rajon, fuqizimi i bashkëpunimit rajonal, vizioni i Planit të Rritjes si instrument që duhet të ndihmojë në konvergjencën mes shteteve të rajonit, por edhe atë me BE-në dhe perspektiva e zhvillimit dhe prosperitetit në shtetin tonë.

BE vazhdon të mbajë masat penalizuese ndaj Kosovës që përfshijnë pezullimin e përkohshëm të punës së trupave të krijuara në bazë të Marrëveshjes së Stabilizim Asociimit (MSA), mos ftesën e Kosovës në takime të nivelit të lartë dhe pezullimin e vizitave dypalëshe.

Masat e tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit), si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga bordi më 29 dhe 30 qershor 2023.

Ka ndërruar jetë 21-vjeçarja e cila ishte goditur nga treni në lagjen Lakrishtë të Prishtinës.

Lajmin e ka konfirmuar për Telegrafin, shefi i Mjekimit të Intesives, Shaqir Uka.

Ai ka deklaruar se viktima nuk ka mundur t’i përballojë lëndimet e marra nga goditja e trenit.

“Fatkeqësisht sot në orët e hershme të mëngjesit ka ndërruar jetë, nuk ka mundur t’i përballojë lëndimet e marra nga goditja e trenit”, theksoi ai.

Ndryshe, policia kishte njoftuar se aksidenti kishte ndodhur më 26 mars, rreth orës 16:30.

“Aksidenti ka ndodhë në hekurudhë ku kanë qenë të përfshirë një tren dhe një këmbësore. Si pasojë e aksidentit lëndime të rënda trupore kanë pësuar këmbësorja e cila është dërguar për tretman mjekësor. Me rastin po merret Njësiti i Trafikut”, kishte deklaruar zëdhënësja e Policisë së Kosovës, Flora Ahmeti.