Category: Lajme

Presidenti i Francës, Emmanuel Macron, e përsëriti të enjten se nuk e përjashton mundësinë e dërgimit të trupave në Ukrainë, duke shtuar se kjo çështje do të bëhej “legjitime”, nëse Rusia depërton përtej vijave ukrainase të frontit dhe nëse Kievi e bën një kërkesë të tillë.

Ai i bëri këto deklarata në një intervistë për Economist, që u publikua më 2 maj.

Ekonomist tha se Macron e dha këtë intervistë, pasi e mbajti një fjalim javën e kaluar, kur deklaroi se Evropa është “e vdekshme” dhe “mund të vdesë”, pjesërisht për shkak të kërcënimit që paraqet agresioni rus, pasi Moska e nisi pushtimin e paprovokuar të Ukrainës në shkurt 2022.

“Nuk e hedh poshtë asnjë mundësi, sepse ne po përballemi me dikë i cili nuk e hedh poshtë asnjë mundësi”, tha Macron kur u pyet nëse ende u qëndron komenteve që i bëri në fillim të këtij viti, kur tha se nuk e përjashton mundësinë që Perëndimi të dërgojë trupa në Ukrainë.

Disa analistë besojnë se Rusia mund të jetë buzë fillimit të një ofensive të re shumë të madhe në Ukrainë.

Macroni tha se “nëse Rusia vendos të shkojë më larg, ne do të detyrohemi, në çdo rast, t’ia bëjmë vetes këtë pyetje” për dërgimin e trupave në Ukrainë. Ai e përshkroi një lëvizje të tillë si “paralajmërim strategjik për homologët e mi”.

Ai e përshkroi Rusinë si një “fuqi e destabilizimit rajonal” dhe si “kërcënim për sigurinë e evropianëve”.

“E kam një synim të qartë strategjik: Rusia nuk mund të fitojë në Ukrainë”, theksoi Macron.

“Nuk do të ketë siguri në Evropë, nëse Rusia fiton në Ukrainë. Kush mund të pretendojë se Rusia do të ndalet aty? Çfarë sigurie do të ketë për vendet e tjera fqinje, Moldavinë, Rumaninë, Poloninë, Lituaninë dhe të tjerët?” pyeti ai./REL/

Zëdhënësi i BE-së, Peter Stano ka thënë se diskutimet për heqjen apo jo të masave ndaj Kosovës janë duke vazhduar teksa shton se të njëjtat do të hiqen në momentin kur vendet anëtare të BE-së vendosin

Lidhur me deklaratën e kryeministrit të Kosovës, Albin Kurtit, i cili tha se shteti i ka përmbushur të gjitha kërkesat e Bashkimit Evropian për heqjen e masave kufizuese që blloku ka vendosur ndaj Kosovës, ka reaguar zëdhënësi i BE-së, Peter Stano.

Ai ka thënë se diskutimet për heqjen apo jo të masave ndaj Kosovës janë duke vazhduar teksa shton se të njëjtat do të hiqen në momentin kur vendet anëtare të BE-së vendosin.

Stano ka potencuar se ky vendim i takon vendeve anëtare e jo politikanëve të Kosovës.

“Kur BE-ja paraqiti masat kundër Kosovës, shkaku i krizave, vendimeve të njëanshme eskalimet në raport me Serbinë, Bashkimi Evropian ishte i qartë se ato janë të kthyeshme. Kështu që ato do të hiqen në momentin që vendet anëtare vendosin, e përsëris kur vendet anëtare vendosin, e jo kur politikanët e Kosovës vendosin. Pra, kur vendet anëtare vendosin se nuk ka më arsye për t’i mbajtur masat në fuqi. Dhe kjo nuk ka ndodhur deri tani, vendet anëtare vazhdojnë diskutimet dhe këto janë procese të brendshme”, tha ai në një konferencë për media.

Stano rikujton se masat janë ende në fuqi.

“I kemi parë zgjedhjet në katër komunat si një prej elementeve që dërguan në vendosjen e masave, por mbetet te vendet anëtare, siç edhe thuhet në Konkluzat e Këshillit të Punëve të Përgjithshme nga dhjetori i vitit të kaluar. U mbetet vendeve anëtare të rivlerësojnë situatën dhe më pas me institucionet evropiane të vendosin nëse duhet hequr masat ose jo. Mund vetëm të konfirmoj se diskutimet ende po vazhdojnë dhe rikujtoj se masat nuk janë hequr”.

Komisioni Evropian kishte vendosur masa ndëshkuese ndaj Kosovës një vit më parë për shkak të përshkallëzimit të situatës së sigurisë në veri të shtetit.

Kurti tha se javën e kaluar BE-ja miratoi Planin e Rritjes ekonomike – në vlerë prej 6 miliardë eurosh – për Ballkanin Perëndimor, i cili një ndër synimet ka edhe përshpejtimin e anëtarësimit të rajonit në bllok.

“Masat, që janë në fuqi ndaj Kosovës, bien ndesh me përpjekjet e rajonit për integrim të përshpejtuar në BE, sidomos edhe në Planin e Rritjes dhe qëllimin e tij. Në anën tjetër po vazhdojmë me përpjekjet tona që të hapim më tepër mundësi në kuadër të dialogut të reformave me BE-në. Në këtë kontekst, kemi përmbushur të gjitha kërkesat e BE-së për heqjen masave kufizuese dhe këto masa duhet të largohen”, tha Kurti gjatë mbledhjes së Këshillit ministror për integrim evropian më 2 maj.

Masat e vendosura nga BE-ja ndaj Kosovës përfshinin: suspendimin e përkohshëm të grupeve punuese për Marrëveshjen e Stabilizim Asociimit, mosftesën e Kosovës në takime të nivelit të lartë dhe suspendimn e vizitave bilaterale.

Gjithashtu, u suspendua edhe programimi i fondeve për Kosovën, të cilat ishin paraparë të dorëzoheshin përmes Kornizës së Investimeve në Ballkanin Perëndimor dhe IPA 2024 (Intrumentet e Para-Anëtarësimit).

Pas masave ndëshkuese, Kosova mbeti jashtë granteve që BE-ja miratoi në korrik të vitit të kaluar, në vlerë prej 2.1 miliardë eurosh.

Ministri i Mjedisit, Planifikimit Hapësinor dhe Infrastrukturës, Liburn Aliu, gjatë fjalës së tij në seancën e Kuvendit deri sa ka folur për borxhet e kompanive që ambalazhojnë ujin, ka thënë se nuk ka asnjë vendim për falje borxhi, raporton EO.

“Në lidhje me borxhin e kompanive që ambalazhojnë nuk ka asnjë vendim për falje të asnjë borxhi. Qysh njëjtë nuk ka asnjë vendim i cili përcakton çfarë pretendohet, çka ka pagesa të rregullat, normale siç kanë qenë në secilën qeveri. Sipas raportimeve të kompanive për sasitë e ujit që kanë pasur për kompanitë që nuk kanë raportuar dhe kanë borxhe, në cilëndo qeveri ka pasur kalkulime të një borxhi të supozuar në bazë të udhëzimit administrativ që thotë me marrë sasinë maksimale të ujit që shpenzohet. Kjo është në shpërputhje me vet udhëzimin administrativ”, ka thënë ministri Aliu.

Deputeti i PDK-së. Xhavit Haliti tha se Kosova dhe të gjitha vendet e Ballkanit Perëndimor “janë përballur me raporte të tilla”, ndërsa foli në seancën e Kuvendit ku po diskutohet për raportin kritik të Departamentit amerikane të Shtetit dhe atë të Freedom House për Kosovën.

“Por nuk jemi përballur asnjëherë me vetveten”, theksoi Haliti. “Nuk kemi diskutuar asnjëherë se a kemi përnjëmend korrupsion në Kosovë, apo nuk kemi. Jemi vërtetë aq të pastër ne krahasuar me këto vendet tjera që i kemi përreth, ose që qeveritë tona kanë qenë të gjitha të pastra, siç po diskutohet këtu dhe edhe kjo është shumë e pastër dhe pa pikën e korrupsionit?”, pyeti ai.

“Mendoj që ne do të duhej vërtetë të diskutonim, jo për elektoratin, jo për ta bindur njëri-tjtetrin se kush është më i korruptuar ose kush ka qenë më i korruptuar, por të diskutojmë se si raporti i DASH-it dhe raporti i Freedom House vitin e ardhshëm të mos jetë kështu”, tha Haliti.

Ky raport, Haliti tha se “është për këtë qeverisje”, duke shtuar se “për qeverisjet e kaluara ka pasur edhe raporte të ngjashme”.

“Asnjëherë deri sot nuk jemi përballë me këtë fenomen”, tha ai.

Më tej, iu drejtua Qeverisë.

“Kam pa edhe njerëz të sëmurë që keni bë filma me kamera e me televizione. Pasi që i keni arrestu, i keni kthy edhe një herë për me i qitë në televizor. Pra, filma s’dojmë me bë. Duhet me vepru, dhe ju s’keni vepru”.

Ministrja e Drejtësisë, Albulena Haxhiu gjatë seancës së Kuvendit ka thënë se Kosova ka ende probleme për të luftuar korrupsionin dhe krimin e organizuar për fatin që nuk mjafton vetëm puna e qeverisë por duhet edhe puna e institucioneve të drejtësisë, raporton EO.

Haxhiu deri sa ka folur për punën e qeverisë Kurti ka theksuar se nuk ka ministra të korruptuar dhe se Kurti nuk është i korruptuar.

“Është hera e parë që Kuvendi diskutoi për raporte të tilla. Përtej raporteve unë vlerësoj që askush nuk mund të theksoj që nuk ka një përkushtim më të madh se qeveria e Kosovës për të luftuar krimin dhe korrupsionin. Kosova ka ende probleme për të luftuar korrupsionin dhe krimin e organizuar për fatin që nuk mjafton vetëm puna e qeverisë por duhet edhe puna e institucioneve të drejtësisë. Janë mbi 200 lëndë që qeveria Kurti i ka dërguar çoftë në Polici apo Prokurori dhe për asnjërën prej këtyre rasteve nuk ka aktakuza ndaj personave që ne i kemi kallëzuar. Në qeverinë Kurti nuk ka ministra të korruptuar, Kurti nuk është i korruptuar. S’ka më ministra që kërkojnë favore në tender. Ju e dini si ka funksionuar në Kosovë, ka qenë rregull i pa shkruar 10 përqindëshi, 12 përqindëshi. Nuk ka ministra që bëhen milionera vetëm duke qenë ministër. Ka ministra që jetojnë prej pagës së ministrit. Kur të doni shkojmë në zgjedhje, shpërndani Kuvendin. Rrëzimi nuk mund të bëhet, dorëheqja nuk bëhet. Nëse doni me shku në zgjedhje shpërndani Kuvendin, aty do të dëshpëroheni më shumë se sa jeni dëshpëruar në vitin 2021”, ka thënë ministrja Haxhiu.

Nënkryetarja e Kuvendit, Saradnda Bogujevci ka kërkuar që sigurimi ta largojë nga salla e Kuvendit deputetin e LVV-së, Sali Zyba dhe deputetin e PDK-së, Ferat Shala.

Thirrja erdhi pasi situata u tensionua paksa ndërsa PDK-ja kërkonte ta vazhdonte diskutimin me mazhorancën dhe Bogujevci tha se rregullorja s’lejonte që diskutimi të vazhdonte në atë mënyrë.

“Mimoza kundër-replikë. Jo, më falni, nuk mundem secilën herë në bazë të kërkesave të juaja, me dalë jashtë rregullores. Ishte replikë dhe kundër-replikë. Nuk mund t’ia japë fjalën dikujt në kundër-replikë të dikujt tjetër”, tha Bogujevci dhe shefja e grupit parlamentar të LVV-së, Mimoza Kusari Lila e mori fjalën.

Pasi doli në foltore, deputeti i PDK-së e kapi mikrofonin, ndërsa për të ndërhyrë shkoi deputeti i LVV-së.

“I nderuar, e shkelë rregulloren. E shkelë rregulloren. Uluni të gjithë në vendin e juaj. Zoti Zyba në vendin tuaj. Z. Shala në vendin tuaj. Zoti Zyba ju lutem në vendin tuaj dhe zoti Shala a mundeni… mos më detyroni ta thërras sigurimin për të dy. Sigurimi e hiqni prej sallës zotin Shala dhe zotin Zyba. Tani! Tani! Sigurimi (futuni) tani në sallë dhe i largoni të dy deputetët që i përmenda me emër”, tha Boguevci.

“E kam të pamundshme në secilën seancë ku burrat çohen në këmbë dhe më tregojnë mua se si ta bëj interpretimin e rregullores”, tha ajo.

Nënkryetarja e Kuvendit tha se “sigurimi s’po hyn”, duke konfirmuar se kërkesa e saj nuk u përfill.

Kreu i Bashkimit Demokratik për Integrim (BDI) në Maqedoninë e Veriut, Ali Ahmeti, u nderua këtë të enjte me titullin “Qytetar Nderi” në Tiranë.

Të pranishëm në ceremoni ishin, veç tjerësh, kryeministri Edi Rama, kryeparlamentarja Lindita Nikolla e ministri i Punëve të Brendshme, Taulant Balla.

“Një shqiptar ndër më të mirët, një luftëtar që politikën e diplomacinë i ka kthyer në një mjeshtëri të admirueshme, një udhëheqës që i ka bërë vend të veçantë vetes në historinë e shqiptarëve dhe në zemrat e në mendjet e të gjithëve, përfshirë edhe mendjet e kundërshtarëve e armiqve të tij”, shkroi Rama në Facebook për Ahmetin.

Kryebashkiaku i Tiranës, në nisje të ceremonisë tha se “nuk është Tirana që nderon Ali Ahmetin me titullin ‘Qytetar nderi’ është nder në historinë e Tiranës që ju na jepni duke qenë pjesë e familjes sonë, e skuadrës sonë dhe e misionit tonë”.

“Nuk është vetëm Tirana që nderon burrin, që e ka shqiptarinë bosht të ekzistencës së vetë, por Tirana vetë nderohet duke vlerësuar një figurë të jashtëzakonshme, si miku ynë, vëllai ynë, kryetari ynë Ali Ahmeti”, tha Veliaj.

Prokuroria Themelore në Prizren, ka ngritur aktakuzë kundër të pandehurve A.S., dhe I.H., të cilët gjenden në paraburgim për shkak të dyshimit të bazuar mirë se në bashkëkryerje kanë kryer veprën penale “Rrezikimi i trafikut publik”.

Sipas aktakuzës, të pandehurit A.S., dhe I.H., me datë 16. dhjetor 2023 rreth orës 22:30, në autostradën “Ibrahim Rugova” në Prizren, nga aksi rrugor “Prizren-Veri” në drejtim të aksit rrugor “Prizren Jug” ku shpejtësia e lejuar e lëvizjes është 120 km/h, në bashkëkryerje kanë vepruar në kundërshtim me Ligjin për Rregullat e Trafikut Rrugor duke organizuar gara të kundërligjshme automobilistike.

“I pandehuri i parë, A.S me automjetin A rreshtohet në shiritin e majtë të rrugës, derisa i pandehuri i dytë, I.H me automjetin B rreshtohet në shiritin e djathtë të rrugës dhe fillojnë zhvillimin e garës, me ç’rast duke lëvizur paralelisht me automjetet e tyre, me një shpejtësi dukshëm më të madhe në raport me shpejtësinë e lejuar, i akuzuari i parë humb kontrollin mbi drejtimin e automjetit duke devijuar në mënyrë diagonale nga shiriti i majtë i rrugës, me ç’rast e godet automjetin C, i cili ishte i ndalur në shiritin emergjent të autostradës dhe për pasojë godet për vdekje këmbësorët, të cilët ishin duke e ndjekur zhvillimin e garës, gjegjësisht viktimat: N.B., M.D., dhe L.S., dhe në të njëjtën kohë u shkakton lëndime të rënda trupore të dëmtuarve: M.Z., dhe B.P., si dhe lëndime të lehta trupore të dëmtuarit S.Z., të cilët gjithashtu ishin në vendin kritik duke ndjekur zhvillimin e garës së kundërligjshme”, thuhet në aktakuzë.

Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprën penale për të cilën akuzohen të shpallen fajtorë dhe të dënohen sipas ligjit.