ATV

Category: Lajme

  • Axhançiq kritikon procesin e regjistrimit të popullsisë

    Axhançiq kritikon procesin e regjistrimit të popullsisë

    Përgatiti: Armand Hoti

    Nënkryetarja e Komunës së Mitrovicës së Veriut, Katarina Axhançiq, ka kritika për Agjencinë e Statistikave të Kosovës, lidhur me fushatën e organizuar për regjistrimin e popullsisë.

    Ajo vlerëson se shumica serbe në veri të vendit nuk janë të informuar sa duhet për këtë proces. Megjithatë, thotë se komuniteti serb duhet të marrë pjesë në regjistrim.

    “Institucionet sikur nuk kanë punuar shumë për një fushatë të vërtetë për informimin e qytetarëve në terren. Unë vërtetë nuk kam vërejtur nga ana e Agjencionit të Statistikave të Kosovës, kërkoj falje nëse ndihen të ofenduar, që janë përkushtuar vërtetë për një kampanjë informative në rajonin e veriut. Nuk din secili të hap faqen zyrtare të ASK-së në kompjuter dhe të informohet”, tha Axhançiq.

    Axhançiq shpreson në anëtarësimin e Kosovës në Këshillin e Evropës, pasi kjo sipas saj, do të ofronte opsione ankese për vendimet e gjykatave vendore.

    “Unë para disa vitesh kam dashur të ankohem për shkak të disa parregullsive, në Gjykatën e Strasburgut, më patën thënë se nuk ka mundësi sepse Kosova nuk është anëtare e KiE-së, u pata ndjerë keq. Kjo është mënyra e drejtë e zgjidhjes së shumë vendimeve të padrejta”, tha Axhançiq.

    Anëtarësimi potencial i Kosovës në KiE, qe tema që kjo dhe dy homologet nga Zveçani dhe Leposaviqi, diskutuan të takimin me kryeministrin Albin Kurti.
    Për këtë të fundit, Axhançiq tha se nuk e ka fare problem ta takojë publikisht.

    “Mendoj se një prej arsyeve kryesore të takimit ishte se (Kurti) dëshiron të dëgjojë të vërtetën nga terreni. Është pra një komunikim ku nga dora e parë dëgjon nevojat e qytetarëve për të ardhmen, krijimin e kushteve më të mira për ata”, tha Axhançiq.

    Nënkryetaret veriore u takuan me Kurtin dy herë, në dy javët e fundit.

    Më shumë detaje i gjeni në Edicionin Qendror të lajmeve në videon më poshtë:

  • “Për ngecjet në diskutimet për të zhdukurit”, BE-ja bën përgjegjëse Kosovën

    “Për ngecjet në diskutimet për të zhdukurit”, BE-ja bën përgjegjëse Kosovën

    Përgatiti: Fatlum Jashari

    “Zbatimi i deklaratës së përbashkët nuk ka filluar ende”, është konstatimi zyrtar i Bashkimit Evropian për dokumentin e dakorduar në takimin e nivelit të lartë Kurti-Vucic, më 2 Maj 2023, për çështjen e të zhdukurve me dhunë.

    Edhe pse ishte cilësuar çështje humanitare, me nevojë urgjente për zgjidhje, një vit pas, ende nuk ka pajtim për finalizimin dokumenteve përcjellëse për të nisur jetësimin e deklaratës.

    “Fatkeqësisht jo, nuk ka risi, nuk ka progres për të raportuar në këtë fazë. Ende po presim, si Bashkim Evropian, nëse do të mund të shohim palët të lëvizin përpara. Kjo është për dialogun në përgjithësi dhe këtë çështje në veçanti. Marrëveshjet e dakorduara duhet të përcillen me veprime konkrete, dhe nuk është BE-ja ajo që ka mungesë vullneti për veprime, janë palët”, ka thënë zëdhënësi i Bashkimit Evropian për Politikë të Jashtme dhe Siguri, Peter Stano.

    Në një përgjigje plotësuese, krahas thirrjes që palët të merren vesh sa më shpejtë për Termat e Referencës së Grupit Punues, zëdhënësi i bllokut 27-antarësh për bllokadën përgjegjëse e bëri Kosovën.

    “Negociatat për Termat Referencës filluan në Maj 2023. Aktualisht, ato kanë ngecur si pasojë e përgjigjes së pazakontë ndaj draftit të fundit të propozuar (i katërti që nga fillimi i negociatave), të cili lehtësuesi i BE-së e ndau me palët në Dhjetor 2023… Deklarata, është një dokument i rëndësishëm i cili saktëson zotimin e palëve për të mos e politizuar çështjen e personave të zhdukur, për të avancuar bashkëpunimin përfshirë ndarjen e informacioneve, identifikimin e përbashkët të zonave të varrezave dhe përcjelljen efektive të gërmimeve”, ka thënë Stano.

    Në Qeverinë e Kosovës nuk dhanë përgjigje të re.

    Më 21 Mars, zëvendëskryeministri Besnik Bislimi kishte thënë se pas prezantimit të draftit final të Termave të Referencës, Serbia kishte sjellë një propozim të ri – të cilin ai e pati cilësuar “ndërhyrje me qëllim të zvarritjes së procesit”.

    “Ka një kërkesë për ndryshimin e një prej neneve të dokumentit apo termave të referencës, ku tregon se çka ndodhë në rastet kur ka mosmarrëveshje në Grupin Punues. Kjo bie ndesh me idenë se pse e kemi fut atë nen në plotni, dhe mendoj se Serbia dëshiron të ndryshon substancën e marrëveshjes”, ka thënë Bislimi.

    Nëpërmjet rishikimit dhe përditësimit të Termave të Referencës të Grupit Punues, gjë që parashihet në pikën e fundit të Deklaratës së 2 Majit, Kosova synon të largojë UNMIK-un nga dokumenti.

    Afër 25 vjet nga përfundimi i luftës, rreth 1600 persona mbesin ende të zhdukur.

    Më shumë detaje i gjeni në Edicionin Qendror të lajmeve në videon më poshtë:

  • Qëndrimi i Borrellit, “tregues i politikës së pabalancuar dhe çorientuar”

    Qëndrimi i Borrellit, “tregues i politikës së pabalancuar dhe çorientuar”

    Përgatiti: Fatlum Jashari

    Me kritika u përcoll reagimi i Përfaqësuesit të Lartë për Punë të Jashtme dhe Siguri i BE-së, Josep Borrell, për zgjedhjen e Qeverisë së re të Serbisë – pjesë e së cilës janë të sanksionuarit nga SHBA-ja, Aleksandar Vulin dhe Nenad Popovic.

    Në vlerësimin e profesorit Dritëro Arifi, i cili problemin e sheh përtej dy anëtarëve të kabinetit qeveritar, qëndrimi i Borrellit është tregues i humbjes së kredibilitetit të politikës së jashtme të unionit evropian.

    “Problemi është tek ideologjia politike dhe filozofike e Serbisë. Pra, një serbi që ka një qëndrim anti-perëndimor, në njëfarë mënyre këtu BE-ja po dështon të prodhojë politika pozitive për Ballkanin Perëndimor dhe kjo do të jetë edhe një lloj kurthe për vetë BE-në, për shkak se mos-vendosmëria e tyre për të shtyrë procese përpara do ta penalizojë Ballkanin dhe vetë BE-në në një të ardhme të afërt”, tha Arifi.

    Me qeverinë e re në Beograd ai nuk pret që Milan Radoicic dhe përgjegjësit tjerë të vihen para drejtësisë për sulmin terrorist të 24 Shtatorit, teksa vë në dyshim qasjen e BE-së në raport me ndëshkimin eventual të Serbisë.

    “Cili kriminel e dënon vetveten?! Pra, nuk ka sens të presim diçka të tillë. E dyta, BE-ja po bie në kontradiktë tash kur Kosova ka masa… Ndërsa nga ana tjetër Serbia mbetet një vend kandidat për BE dhe i ka hapur negociatat. Prandaj po them, politika e BE-së është e pa balancuar dhe e çorientuar, mos të themi që mund të ketë gabime të njëpasnjëshme, sidomos në politikën e jashtme nëse vazhdohet me këtë ritëm”, tha Arifi.

    Pasi theksoi nevojën që BE-ja dhe SHBA-ja të aplikojnë politikë më rigoroze ndaj Serbisë, politologu Fidan Ukaj tha përbërja e qeverisë së re e shtetit fqinj është mesazh i qartë kundër perëndimit.

    “Kjo përbërje e Qeverisë është jo-shpresëdhënëse se do të ketë normalizim të raporteve në mes Kosovës dhe Serbisë, dhe se Ballkani mund t’i bashkohet BE-së. Për arsye se pjesë e Qeverisë janë persona të sanksionuar nga ana e SHBA-së, e po ashtu, dëshmon se Qeveria e Serbisë nuk është e interesuar që t’i plotësojë kushtet dhe kriteret e BE-së, e po ashtu t’i dorëzojë akterët ose kryerësit e aktit terrorit në veri të Kosovës”, tha Ukaj.

    Ndryshe nga blloku evropian, duke rikujtuar se Vulin dhe Popovic mbesin në listën e të sanksionuarave, Shtetet e Bashkuara të Amerikës janë shprehur të zhgënjyera me përfshirjen e tyre në Qeverinë e re të Serbisë.

    Më shumë detaje i gjeni në Edicionin Qendror të lajmeve në videon më poshtë:

  • Deputeti i Bundestagut: Komiteti i Ministrave i ka dy zgjedhje, anëtarësimi i Kosovës në KiE këtë muaj, e vetmja rrugë përpara

    Deputeti i Bundestagut: Komiteti i Ministrave i ka dy zgjedhje, anëtarësimi i Kosovës në KiE këtë muaj, e vetmja rrugë përpara

    Këshilli i Europës feston sot 75 vjetorin e themelimit dhe deputeti i Bundestagut, Knut Abraham ka gjetur rastin të kujtojë sot se Asambleja Parlamentare e kësaj organizate të rëndësishme muajin e kaluar konkludoi me shumicë të madhe votash se Kosova i ka përmbushur të gjitha standardet për t’u bërë anëtare e saj.

    Tash, Abraham shkruan se Komiteti i Ministrave i ka dy zgjedhje dhe se nëse respektohen standardet dhe vlerat, atëherë Kosova do të duhej të anëtarësohej në KiE këtë muaj.

    “Komiteti i Ministrave ka dy zgjedhje: 1) Të veprojë në përputhje me vlerat dhe standardet tona duke e pranuar Kosovën këtë maj. 2) Ose, ta injorojë vlerësimin e detajuar të juristëve të shquar, tri raportuesve, tri komisioneve dhe PACE… duke mos marrë asnjë vendim”, shkroi deputeti gjerman në “X”.

    Kjo e dyta, thotë ai, do të dërgonte sinjal të dëmshëm te deputetët dhe qytetarët.

  • Daçiq: Ndërkombëtarët do të dalin me ndonjë zgjidhje për Asociacionin, në mënyrë që Kosova të pranohet në Këshillin e Europës

    Daçiq: Ndërkombëtarët do të dalin me ndonjë zgjidhje për Asociacionin, në mënyrë që Kosova të pranohet në Këshillin e Europës

    Ministri i Punëve të Brendshme i Serbisë, Ivica Daçiq ka shprehur frikën se komuniteti ndërkombëtar do të dalë me “ndonjë zgjidhje kompromisi” në mënyrë që Kosova përfundimisht të pranohet në Këshillin e Europës edhe pa e themeluar Asociacionin e komunave me shumicë serbe.

    Daçiq megjithatë tha se ndërkombëtarët aktualisht po i bëjnë presion kryeministrit të Kosovës, Albin Kurti për Asociacionin.

    “Ka presion ndaj Kurtit që të bëjë, siç thonë ata figurativisht duke përdorur një term që nuk do të thotë asgjë, ‘një hap të pakthyeshëm drejt formimit të Asociacionit’. Dhe cili do të ishte një hap i pakthyeshëm? Epo, kjo është tani pyetja miliona dollarëshe”, tha Daçiq për TV Prva.

    Ai tha se Kosova në këtë rast mund t’ia dërgojë Gjykatës Kushtetuese draft-statutin e Asociacionit.

    “As nuk e di se çfarë është hapi i madh në këtë, sepse Gjykata Kushtetuese mund të thotë kur të ketë mbaruar gjithçka që nuk e pranon. Pra këtu nuk ka asnjë garanci që dikush do të thotë ‘mirë, ne e kemi pranuar statutin. Pra, le të vazhdojmë’”, tha Daçiq.

    Ai kujtoi se vota e 31 vendeve europiane është e nevojshme që Kosova të bëhet anëtare e Këshillit të Europës dhe se nëse Italia, Franca dhe Gjermania kanë disa rezerva para votimit, Kosova s’do të kishte asnjë shans.

  • Policia zbardh vrasjen e dy të moshuarve në Gjirokastër

    Policia zbardh vrasjen e dy të moshuarve në Gjirokastër

    Policia tha të dielën se zbardhi vrasjen e dy të moshuarve në Bodrishtë të Gjirokastrës, tre ditë më parë, duke arrestuar personin e dyshuar dhe sekuestruar mjetet e dyshuara me të cilat u krye krimi.

    Sipas policisë Thoma Mastora, 69 vjeç, banues në Bodrishtë , i dënuar më parë për vjedhje, akuzohet “për vrasje në rrethana të tjera cilësuese” dhe “mbajtje pa leje të armëve shpërthyese dhe municionit”.

    Drejtori i Policisë së Gjirokastrës, Ardian Çipa tha se 69-vjeçarit, iu gjet dhe sekuestrua në cilësinë e provës materiale sendi i dyshuar i krimit, një sasi municioni luftarak, një mjet prerës dhe prova të tjera që janë dërguar për egzaminim në Institutin e Policisë Shkencore.

    Ende nuk është i qartë motivi i vrasjes pasi në banesën e të moshuarve policia gjeti të paprekura rreth 5 milionë lekë dhe nuk konstatoi shenja të vjedhjes.

    Dy të moshuarit Kosta e Kleoniqi Ilia, 80 dhe 84 vjeç u gjetën të pajetë nga fqinjët në banesë mëngjesin e së enjtes me shenja të forta dhune në trup dhe në kokë.

    Shumë zona në Jug të Shqipërisë banohen vetëm nga të moshuar, pasi fëmijët e tyre kanë emigruar jashtë vendit dhe krimi i rëndë ngjalli reagime të forta në opinion.

  • Antidroga arreston tre persona në Fushë-Kosovë

    Antidroga arreston tre persona në Fushë-Kosovë

    Ditën e djeshme hetuesit e antidrogës së Policisë së Kosovës në Regjionin e Prishtinës, gjatë punës operative në terren në funksion të parandalimit dhe luftimit të dukurisë së abuzimit dhe shitblerjes së substancave narkotike edhe në nivel rruge kanë pranuar informata relevante se rrugën “Dardania” në Fushë Kosovë, personi i dyshuar me iniciale (R.H.) është duke u marr me shitblerje të substancave narkotike të llojit Kokainë.

    Pas një pune hetimore dhe me urdhëresë të lëshuar nga Gjykata Themelore në Prishtinë me datën 04.05.2024 hetuesit policor të antidrogës kanë implementuar një plan taktik, ku fillimisht rreth orës 19:20 në Rr. “Dardania” Fushë Kosovë është ndaluar i dyshuari me iniciale (G.B; viti i lindje 1993) dhe gjatë kontrollimit të tij është gjetur një qese e vogël e mbushur me pluhur ngjyrë të bardhë substancë e dyshuar narkotike e llojit Kokainë me peshë 0.5 gram. Në vazhdimësi të operacionit rreth orës 20:40 është ndaluar vetura e tipit Fiat ngjyrë hiri, të cilën e drejtonte personi me inicialet (R.F; viti i lindjes 1996) dhe pasagjer në veturë ishin edhe personat me iniciale (E.F; dhe F.K;), ku gjatë kontrollimit të tyre tek i dyshuari (R.F:) janë gjetur tri (3) qese të vogla të mbushura me pluhur ngjyrë e bardh substancë e dyshuar narkotike e llojit kokainë me peshë 1.6 gram .

    Në lidhje me rastin është njoftuar Prokurori Kujdestar nga Departamenti i Krimeve të Renda në Prishtinë dhe operacioni ka vazhduar në Rr.”Dardania ” në Fushë Kosovë, tek banesa e të dyshuarit me iniciale R.H; viti i lindjes 1965), ku gjatë bastisjes apo kontrollit në banesë janë gjetur provat dëshmitë tjera si në vijim:

    (46) dyzet e gjashtë paketime të vogla të mbushura me pluhur ngjyrë të bardhë, substancë e dyshuar narkotike e llojit kokainë, të gatshme për shitje me peshë të përgjithshme 23.3 gram.

    (1) Një peshore e vogël digjitale që shërben për matje në sasi të vogla .

    Para të gatshme në valuta te ndryshme me vlerë prej (730 euro) që dyshohet se janë përfituar nga shitja e narkotikeve .

    (2) dy telefona celular.

    Në vend të ngjarjes kanë dalë njësia K-9 dhe njësia e Forenzikes Regjionale-Prishtinë, e cila ka bërë fotografimin dhe konfiskimin e të gjithave dëshmive/provave të gjetura materiale.

    Të dyshuarit janë arrestuar dhe në konsultim me Prokurorin Kujdestar pas intervistimit janë dërguar në qendrën e mbajtjes për 48-orë, për proceduar të mëtejme ligjore.

    Vlen të potencohet se i dyshuari me iniciale F.K;(1991) pas verifikimit në data bazën e Policisë figuronte se ka urdhër arrest me vuajtje të dënimit nga Gjykata Themelore në Prishtinë.

    Hetime të tjera lidhur me rastin janë duke vazhduar nga antidroga e Policisë në bashkërendim me prokurorinë.

  • Aliu zotohet se punimet në magjistralen Prishtinë-Mitrovicë do të përfundojnë brenda afateve

    Aliu zotohet se punimet në magjistralen Prishtinë-Mitrovicë do të përfundojnë brenda afateve

    Për më shumë se 10 vite, ekskavatorë e kamionë gjenden në magjistralen Prishtinë-Mitrovicë.

    Punimet në këtë rrugë, shpesh herë janë ndërprerë, ndërsa ministri i Mjedisit, Planifikimit Hapësinor dhe Infrastrukturës, Liburn Aliu, thotë për Ekonomia Online se punimet po vazhdojnë me intensitet të lartë.

    “Aktualisht jemi në proces të mirë të punimeve. Punimet po vazhdojnë me një intensitet të lartë, pra pasi është nënshkruar kontrata e re punët po ecin mirë”, thotë Aliu.

    Tutje ai bëri të ditur se rezultatet e punimeve do të shihen shumë shpejt.

    “Shpronësimet janë kryer të gjitha. Të gjitha problemet teknike janë eliminuar, nuk ka ndonjë pengesë që do mund të bënte që të ngecin punët. Kështu që presim edhe rezultate të shpejta por besoj që brenda një kohe shumë të shpejtë pjesën e segmentit që e lidhë pjesën e Vushtrrisë me Prishtinën do ti kemi të përfunduara e pastaj edhe pjesën tjetër deri në Gojbulë e që gjithçka do realizohet brenda afateve”, thotë Aliu.

    Afati kohor që i është dhënë kompanisë ndërtuese për këtë magjistrale është 25 muaj ndërkaq projekti i saj ka kosto në vlerë prej 25 milionë euro, si fond i siguruar me huamarrje nga fondi ndërkombëtar OPEC për zhvillim ndërkombëtar dhe Fondi Saudit për Zhvillim.

  • Konjufca: Gëzuar Pashkën të gjithë bashkëqytetarëve të besimit ortodoks

    Konjufca: Gëzuar Pashkën të gjithë bashkëqytetarëve të besimit ortodoks

    Kryekuvendari, Glauk Konjufca i ka uruar Pashkët të gjithë bashkëqytetarëve të besimit ortodoks.

    “Kjo festë që vjen në frymën e ripërtëritjes dhe rikthimit të shpresës, që kërkon reflektimin për rëndësinë dhe domethënien e sakrificës, që kërkon të forcojë vlerësimin, respektin dhe përkujdesin ndaj njëri-tjetrit, le ta gjejë gjithkënd përreth vlerave të solidaritetit dhe mirësisë”, shkroi ai.

    “Ajo na tregon për efektin e madh ndriçues mbi errësirën, tregon se e mira triumfon edhe kur mund të duket e pafuqishme, se drejtësia nuk është vetëm çështje force, por më së pari, çështje besimi dhe insistimi tek ajo. Këto mësime të vyera i shërbejnë përnaltësimit të jetës shpirtërore, teksa pasqyrohen në jetën shoqërore. Mbarësi, gëzim, shëndet e harmoni në familjet tuaja, sot e gjithmonë!”, shtoi Konjufca në Facebook.

  • Pashkët ortodokse, Kurti: Në ditë si kjo, festojmë edhe bashkëjetesën kulturore e fetare të shoqërisë sonë

    Pashkët ortodokse, Kurti: Në ditë si kjo, festojmë edhe bashkëjetesën kulturore e fetare të shoqërisë sonë

    Kryeministri i Kosovës, Albin Kurti, ka uruar të gjithë besimtarët ortodoksë për festën e Pashkëve.

    Kurti ka uruar që fryma e Pashkës të dhurojë mirëqenie, shëndet, lumturi e begati.

    “Fryma e Pashkës ju dhuroftë mirëqenie, shëndet, lumturi dhe begati, që t’i gëzoni dhe ndani me familjet, miqtë dhe fqinjët tua”.

    Më tutje i pari i vendit ka thënë se në këtë ditë kujtojmë bashkëjetesën kulturore e fetare të shoqërisë në Kosovë.

    Postimi i plotë:

    Pashkë të bekuar!

    Besimtarëve ortodoks dhe bashkëqytetarëve tanë, ju uroj Pashkën për shumë mot. Le të na përcjellë kjo festë me urime për fillim të ri, shpresë të ringjallur, e besim të forcuar.

    Fryma e Pashkës ju dhuroftë mirëqenie, shëndet, lumturi dhe begati, që t’i gëzoni dhe ndani me familjet, miqtë dhe fqinjët tuaj.

    Në ditë si kjo, festojmë edhe bashkëjetesën kulturore e fetare të shoqërisë sonë. Aty ku të gjithë qytetarët e të gjitha besimeve, pa dallim, mund të jetojnë së bashku në paqe dhe prosperitet.