ATV

Category: Lajme

  • Davkova betohet si presidente e Maqedonisë së Veriut

    Davkova betohet si presidente e Maqedonisë së Veriut

    Gordana Silanovska-Davkova e ka bërë betimin të dielën si gruaja e parë presidente e Maqedonisë së Veriut prej pavarësimit të vendit në vitet ’90, pasi i fitoi zgjedhjet presidenciale më 8 maj.

    Davkova e mposhti presidentin e deritanishëm, Stevo Pendarovski, duke fituar dyfish më shumë vota se ai në balotazhin e së mërkurës.

    Pasi u betua gjatë një seance para përbërjes në largim të Kuvendit të Maqedonisë së Veriut, Davkova, megjithatë, gjatë fjalimit të saj e shmangu fjalën “e veriut” në emrin e shtetit, ashtu siç kishte paralajmëruar gjatë fushatës së saj.

    Në vitin 2018 u arrit një marrëveshje në Prespë me Greqinë për ndryshimin e emrit nga Maqedoni në Maqedonia e Veriut, duke i dhënë fund mosmarrëveshjeve shumëvjeçare dhe duke i hapur rrugën përpjekjeve të vendit për integrim në BE dhe NATO.

    “Do të jem presidente e të gjithëve, edhe pjesës së majtë edhe asaj të djathtë të Kuvendit; presidente e të gjithë qytetarëve pavarësisht përkatësisë së tyre etnike, fetare apo politike”, ka thënë Davkova.

    Megjithatë, Davkova, në fjalimin e saj nuk foli për çështje që kanë të bëjnë me procesin e integrimit evropian të vendit, i cili varet nga ndryshimet kushtetuese bazuar në një marrëveshje me Bullgarinë, por tha se do të punojë për “evropianizimin e vendit së bashku me shtetet e tjera të Ballkanit”.

    Davkova nuk e mbështet ndryshimin e Kushtetutës, por në një intervistë dhënë Radios Evropa e Lirë së voni, tha se nëse Kuvendi i miraton amendamentet kushtetuese – të cilat do të mundësonin që bullgarët dhe pesë pakicat e tjera etnike të bëheshin pjesë e Kushtetutës maqedonase – ajo do t’i respektonte ato.

    Ndërkohë, Davkova tha se tani “është koha për bashkim” dhe për këtë ajo do t’u drejtohej grave, “sepse duam të tregojmë se nuk kujdesemi vetëm për veten, por edhe për të gjithë rreth nesh. Besimi është shumë i rëndësishëm, dhe unë do ta arsyetoj atë.”

    Ajo u zotua se kabineti i saj presidencial do të pasqyrojë përbërjen etnike të vendit, “ku do të ketë vend edhe për maqedonasit, shqiptarët dhe përfaqësuesit e entiteteve tjera, ndërsa përzgjedhja e tyre do të bëhet bazuar në kritere profesionale dhe jopartiake”.

    Në sallën e Kuvendit ishin përfaqësuesit e të gjitha partive të përbërjes parlamentare para zgjedhjeve të 8 majit.

    Cilat janë kompetencat e presidentit të Maqedonisë së Veriut?

    Presidenti në Maqedoninë e Veriut ka kompetenca të kufizuara.

    Presidenti është komandant i përgjithshëm i Forcave të Armatosura të vendit. Ai dekreton mandatarin për formimin e Qeverisë së re, emëron dhe shkarkon me dekret ambasadorët, pranon letra kredencialet dhe letrat e revokimit të përfaqësuesve të huaj diplomatikë.

    Roli i presidentit është edhe të propozojë dy gjyqtarë të Gjykatës Kushtetuese si dhe dy anëtarë të Këshillit Gjyqësor, të propozojë guvernatorin e Bankës Popullore, të caktojë disa drejtues në postet e sigurisë.

    Presidenti, gjithashtu, ka të drejtën e faljes në përputhje me dispozitat ligjor si dhe kryen funksione të tjera të përcaktuara me Kushtetutën maqedonase. /REL

  • Një muaj paraburgim të dyshuarin për trazirat në Zveçan

    Një muaj paraburgim të dyshuarin për trazirat në Zveçan

    Gjykata Themelore në Prishtinë ka caktuar një muaj paraburgim kundër të pandehurit S.M, për shkak të dyshimit se ka kryer veprat penale “Bashkimi për veprimtari kundër kushtetuese”, “Rrezikimi i personave nën mbrojtje ndërkombëtare”, “Pjesëmarrja në turmë që kryen vepër penale dhe huliganizmi” dhe “Sulmi ndaj personit zyrtar”, lidhur me trazirat e majit në Zveçan.

    Gjykata përmes një komunikate për media ka bërë të ditur “se ekzistojnë arsyet ligjore për caktimin e paraburgimit, duke marrë parasysh mënyrën dhe rrethanat në të cilat janë kryer veprat penale, veçanërisht rrezikshmërinë shoqërore të veprave penale, pasojat nga të cilat janë lënduar shumë pjesëtar të KFOR-it, zyrtarë policorë, gazetarë e qytetarë të tjerë, si dhe dëmet materiale të shumta nga djegia dhe dëmtimi fizik, tregon mjaftueshëm se i pandehuri nëse lihet që të mbrohet në liri do të tentojë që të ndryshojë provat e veprës penale, duke ndikuar në të dyshuarit e tjerë të cilët gjenden të lirë si dhe dëshmitarët tjerë eventualë, po ashtu në rastin konkret ekziston edhe rreziku i ikjes së të pandehurit, i njëjti lehtë mund të arratiset duke marrë në konsideratë faktin se i pandehuri S.M është shtetas edhe i Serbisë dhe nëse lihet në liri, mund të arratisët, andaj në këtë rast caktimi i paraburgimit është i domosdoshëm dhe më se i arsyeshëm”.

    Gjykata ka vlerësuar se pandehuri S.M është shtetas edhe i Serbisë dhe nëse lihet në liri, mund të arratisët.

    “I pandehuri S.M dyshohet se me një grup të dyshuar ka qenë pjesëmarrës i protestave të organizuara me datë 29.05.2023 para objektit të Komunës se Zveçanit, duke sulmuar pjesëtarë të KFOR-it dhe pjesëtarë të Policisë së Kosovës si dhe duke përdorur shkumë ka tentuar të bëjë bllokimin e ventilimit të veturës së Policisë në të cilën në ato momente gjendeshin të ngujuar brenda në veturë zyrtarë policorë, e qëllimi i të pandehurit ka qenë që këtyre zyrtarëve policorë t’ju ndalet furnizimi me oksigjen duke rrezikuar seriozisht jetën e zyrtarëve policorë, me çka nga veprimet e këtij të pandehuri përmbushën të gjitha elementet e veprave penale për të cilat dyshohet”, thuhet në njoftim.

  • Parashikimi i motit për pesë ditët në vazhdim

    Parashikimi i motit për pesë ditët në vazhdim

    Instituti Hidrometeorologjik i Kosovës ka njoftuar se si do të jetë moti për pesë ditët e ardhshme.

    Në njoftimin e këtij instituti bëhet e ditur se gjatë javës pritet të jetë mot me diell dhe me reshje shiu

    Ndërkaq, gjatë vikendit parashihet të ketë rritje të temperaturave.

    Njoftimi i plotë:

    E hënë-Mot me diell dhe vranësira të shpërndara. Temperaturat minimale do të lëvizin ndërmjet 5-8gradë Celsius, ndërsa maksimalet e ditës parashihen të lëvizin ndërmjet 17-20gradë Celsius. Do të fryjë erë kryesisht nga veriperëndimi e lehtë deri mesatare.

    E martë –Moti vranët dhe me intervale me diell. Vranësirat gjatë ditës parashihen të sjellin reshje me shkarkime rrufesh.Në disa zona të izoluara për shkak të zhvillimeve të mëdha të vranësirave konvektive, ekziston rrezik për reshje të breshërit.

    Temperaturat minimale do të lëvizin ndërmjet 5-8 gradë Celsius, ndërsa maksimalet e ditës parashihen të lëvizin ndërmjet 15-18 gradë Celsius, Do të fryjë erë nga drejtimi i veriperëndimit me shpejtësi 1-7m/s.

    E mërkurë-Mot i vranët dhe me intervale me diell. Vranësirat gjatë ditës vende -vende parashihen të sjellin reshje shiu .Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 16-19 gradë Celsius. Do të fryjë erë e lehtë deri mesatare nga jugperendimi.

    E enjte-Mot i vranët dhe vende-vende me riga shiu.Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 18-21 gradë, Do të fryjë erë e lehtë kryesisht nga drejtime i juglindjes.

    E premte-Mot i vranët dhe me intervale me diell.Temperauturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 17-22 gradë Celsius. Do të fryjë erë nga drejtimi i jugperendimit e lehtë deri mesatare.

  • Rama mesazh Mitsotakis me vargjet e Naim Frashërit: Dua t’i lë një pusullë meqë nuk e takova, të mos bëhemi armiq

    Rama mesazh Mitsotakis me vargjet e Naim Frashërit: Dua t’i lë një pusullë meqë nuk e takova, të mos bëhemi armiq

    Kryeministri i Shqipërisë Edi Rama nuk nguroi t’i përcillte një mesazh homologut të tij grek, Kyriakos Mitsotakis, në mbyllje të fjalimit të tij gjatë takimit me emigrantët shqiptarë në Greqi.

    Teksa përmendi një nga poezitë e Naim Frashërit ‘Dëshira e Vërtetë e Shqiptarëve’, Rama tha se është koha e miqësisë.
    “Ju kërkoj ndjesë për çdo gabim që ju mendoni se kam bërë por kurrë në asnjë rast nuk i kam tradhëuar ata që ma kanë besuar qoftë një herë me votën e tyre këtë nder të jashtëzakonshëm, nuk ka nder më të madh që mund t’i bëhet një njeriu në jetë së sa të udhëheqë vendin e tij, nuk ka forcë materiale, ekonomike financiare, inidividi apo shtet që më thotë më josh apo më detyron dot mua të përkulem mbi veten pas shpinës suaj, për të cenuar interesat, kjo ishte vizita ime më e bukur në Athinë dhe nuk besoj se do të kem një më të bukur se kjo”, tha Rama.

    “Dëshiroj që edhe në emrin tuaj t’i lë një pusullë mikut tim të zgjedhur nga populli i këtij vendi për të udhëhequr Greqinë kryeministrit Mitsotakis, në vitin 1886 poeti ynë Naim Frashëri shkruajti në greqisht vjershën e tij ‘Dëshira e vërtetë e shqiptarëve’, dua me të gjithë fqinjët me rend e paqe të jetojmë, le të mos bëhemi armiq e të zihemi, shumë të fala nga unë dhe shqiptarët e Greqisë”, shtoi ai.

  • Edhe familja Jashari përfundon procesin e regjistrimit, stafi i ASK-së mirëpritet nga kryefamiljari Rifat Jashari

    Edhe familja Jashari përfundon procesin e regjistrimit, stafi i ASK-së mirëpritet nga kryefamiljari Rifat Jashari

    Kryefamiljari i familjes Jashari, .Rifat Jashari ka pritur stafin e ASK-së për ta kryer Regjistrimin e Popullsisë (ReKos2024).

    “Familja legjendare, Jashari ,përfunduan me sukses obligimin e tyre qytetar, e gjatë procesit nuk mungoi mirëpritja nga ana e tyre me ç’rast u falenderuan nga stafi i ASK-së për të cilët ka mbetur edhe shumë pak kohë deri në përmbylljen e këtij projekti”, shkruan në njoftimin zyrtar të ASK-së.

  • Kurti: Prizreni frymon me Lëvizjen, për këtë jemi garantues

    Kurti: Prizreni frymon me Lëvizjen, për këtë jemi garantues

    300 anëtarë të rijnë i janë bashkuar Lëvizjes Vetëvendosje dje në Prizren.

    Kështu ka bërë të ditur faqja zyrtare e këtij subjekti politik, teksa kryetari i LVV-s njëherësh kryeministri i vendit, Albin Kurti ka zhvilluar një takim me anëtarët e rinj.

    “Prizreni po e forcon lidhjen me VETËVENDOSJE!-n, dhe kryeqyteti i kulturës e i historisë shumë shpejt do i kthehet punës së mbarë progresiste dhe lidhjes me mirëqeverisjen demokratike”, tha Kurti.

    “Rruga Prizren-Tetovë, hekurudha që do e lidhë Prizrenin me Gjakovën dhe Shkodrën janë dy prej projekteve në infrastrukturë që kemi filluar e që do të kontribuojnë si në lidhjen e shqiptarëve ashtu edhe në zhvillimin ekonomik të Prizrenit”, tha kryeministri, i cili kujtoi spitalin e këtij qyteti dhe Universitetin “Ukshin Hoti” që në këto tre vite janë transformuar.

    “Në Prizren kishim një shkëputje të shkurtër por po kthehemi dhe këtë e dëshmon anëtarësimi i lartë dhe i vazhdueshëm i qytetarëve në subjektin tonë. Prizreni frymon me Lëvizjen për këtë jemi garantues secili prej nesh dhe të gjithë ne së bashku’, tha kryeministri Kurti.

  • Komuna mbyll stacionet e autobusëve, qytetarët dhe ekspertët janë kundër

    Komuna mbyll stacionet e autobusëve, qytetarët dhe ekspertët janë kundër

    Mbyllja e xhepave rrugorë në stacionet e autobusëve në Prishtinë, funksioni kryesor i të cilëve është siguria e udhëtarëve, nga qytetarët dhe ekspertët e komunikacionit po konsiderohet si vendim jo i duhur i komunës.

    Përpara këtij vendimi, autobusët dhe automjetet tjera ndaleshin tek xhepi rrugor, ku udhëtarët hipnin apo zbrisnin, ndërsa pas mbylljes së tyre me kocka, autobusëve e automjeteve iu duhet të ndalen në mes të rrugës. KosovaPress ka qëndruar në rrugën “Agim Ramadani”,në kryeqytet, ku në të dy anët e rrugës janë mbyllur xhepat rrugor dhe automjetet shihen duke u ndalur në rrugë. Kurse, edhe në rrugën “UCK”, po punohet që këta vendstacione të autobusve të mbyllen me kocka.
    Derisa qytetarët ankohen për këtë vendim të komunës, thonë se duhet të tërhiqet mbrapsht.

    Isak Gërguri për KosovaPress thotë se me mbylljen e kësaj hapësire, udhëtarët rrezikohen dhe se po krijohet tollovi në komunikacion. Mbylljen e hapësirës së stacioneve, qytetari Shemsedin Thaqi e quan si vendim jo të qëlluar nga kryetari i Prishtinës. Sipas tij, xhepat rrugor duhet të kthehen ashtu siç kanë qenë më herët.
    Njejtë mendon edhe Osman Krasniqi, derisa thotë se kjo gjë i pengon udhëtarët dhe krijon kolonë.

    Po ashtu, edhe eksperti i komunikacionit, Bekim Ahmeti është kundër vendimit të komunës për heqjen e xhepave rrugor. Sipas tij, funksioni i tyre kryesor është siguria e qytetarëve që përdorin autobusin si mjet transporti.

    Përveç që rrezikon sigurinë e qytetarëve, mbyllja e këtyre hapësirave, sipas Ahmetit mund të krijojë edhe dendësi në komunikacion. Ndërkaq, lidhur me këtë, drejtori i Kadastrës në Komunën e Prishtinës, Donat Lushaku në një prononcim për KosovaPress, thotë se ideja për t’i mbyllur xhepat rrugor ka ardhur pasi është vlerësuar se ata po përdoren nga veturat e qytetarëve apo taksitë ilegale, duke mos u dhënë hapësirë autobusëve për ndalje.

    Pavarësisht pohimit të tij se kjo mund të shkaktojë kolona në trafik, Lushaku thotë se pas analizës së bërë nga Komuna e Prishtinës, bashkë me taskforcën për komunikacion, është vendosur që pothuajse të gjithë xhepat rrugor të mbyllen.

  • Rama: Shqiptarët nuk janë më të ardhurit e leckosur në Greqi, por qytetarë të barasvlershëm

    Rama: Shqiptarët nuk janë më të ardhurit e leckosur në Greqi, por qytetarë të barasvlershëm

    Kryeministri i Shqipërisë, Edi Rama, gjatë takimit me emigrantët shqiptarë në stadiumin Galatsi në Athinë, foli për kohën kur shqiptarët ishin emigrantët në Athinë dhe vuajtjet me të cilat janë përballur.

    Kreu i qeverisë tha se ata luftuan dhe ia dolën. Sipas tij, tani shqiptarët nuk janë më shërbëtorë, por të zotë të barabartë në Greqi.

    “Ndonjë tha se unë nuk duhej të vija për vizitë tek ju, por mbase kur ta shohin këtë shfaqje gëzimi familjar, ata do kuptojnë që unë nuk kam ardhur të takohem me shërbëtorët e tyre të dikurshëm. Kam ardhur të çmallem me të zotët e barabartë të kësaj shtëpie. Kam ardhur të flas me qytetarët e barasvlershëm në europën demokratike. Ju shqiptaret e Greqisë jeni sot një vlerë e shtuar e punës, e ekonomisë, dijes, kulturës së këtij vendi të bekuar ku qëndron prej 25 shekujsh djepi i filozofisë dhe demokracisë me të cilin na lidh jo vetëm fqinjësia. Fatet tona, zakonet, shtigjet e jetës dhe rrugët e vështira tona”, u shpreh Rama.

    “Shqiptarët nuk janë të ardhurit e leckosur, por janë përfaqësuesit e një vendi krenar që është Shqipëria jonë. Shqipëria e ka ngritur përfundimisht kokën e ulur në shekuj nga dhuna në historinë e saj tragjike dhe i sheh të gjithë në sy me te njëjtin respekt që kërkon dhe meriton nga të gjithë”.

    “Rrugët, përrallat, marrëdhëniet kanë qenë shumë më të lidhura sesa janë dukur apo sesa janë lënë të duken nga retë dhe pluhurat nga politikat e dy vendeve tona. Sot që flasim dy dekada e kusur, dukja e marrëdhënieve tona thotë shumë me pak se realiteti, ndërthurja në jetëve dhe ndërlidhja e rrugëve të së ardhmes të përbashkët te shqiptarëve dhe grekeve. Duket sikur mes Shqipërisë edhe Greqisë ka pasur probleme te përjetshme, por jeta e përditshme mes shqiptarëve e grekëve, përtej pasqyrave verbuese mediatike, vazhdon normale, aktive dhe produktive”, tha Rama.

  • Qytetarët reagojnë për shtrenjtimin e bukës deri në 60 centë, ja sa u rrit në dekadën e fundit

    Qytetarët reagojnë për shtrenjtimin e bukës deri në 60 centë, ja sa u rrit në dekadën e fundit

    Çmimi i bukës ka shkuar deri në 60 centë në disa furra në Prishtinë dhe në disa komuna të tjera në vend. Për këtë shtrenjtim, ankohen qytetarët, derisa furrtarët arsyetojnë rritjen e çmimeve për produktet e bukës. Por nga Shoqata e Mullisëve vlerësojnë se ky çmim nuk ka pasur nevojë të rritet.

    KosovaPress ka siguruar çmimet për gjysmë kilogrami bukë në disa furra në kryeqytet ku shihet se çmimet janë ngritur për 100 për qind në vit, krahasuar vitin 2024 me atë të vitit 2010. Sipas të dhënave të Agjencisë së Statistikave të Kosovës për dhjetë vitet fundit, nga 31 centë sa ishte një bukë gjysmë kilogramësh në vitin 2010, në vitin 2022 ky çmim mesatar ka arrit në 49 centë. ASK nuk ka publikuar çmimet mestarë të bukës për vitin 2023 dhe 2024.

    Derisa qytetarët kërkojnë nga Ministria e Industrisë dhe Tregtisë të shtojnë numrin e inspektorateve në mënyrë që të monitorojnë çmimet në terren, thonë se vështirë po arrin të ja dalin me këto çmime. Qytetarja, Zarife Sopjani, derisa vlerëson se duhet të lirohet buka, thotë se çdo ditë e më tepër po u rendohet jeta me çmime të larta.

    Se çmimi i bukës është shtrenjtë dhe duhet të lirohet e po ashtu të shtohen kontrollet e inspektoratit në furra, e thotë edhe qytetari, Hasan Abazi.

    Ai për KosovaPress thekson se duhet të ketë ulje të çmimit të bukës, jo të ketë rritje pa arsye.

    Edhe një qytetar tjetër, i cili ka dashur të mbes anonim është ankuar për çmimin e bukës.

    Se ka rritje të çmimit të bukës në disa furra në vend, e ka pohuar edhe menaxheri i një furre në kryeqytet, Safet Zeneli, i cili ka theksuar se rritja e çmimeve ka ardhur si pasojë e rritjes së pagave të punëtorëve. Po ashtu sipas tij, liberalizimi i vizave ka ndikuar që të kenë probleme me mungesë të punëtorëve.

    Në anën tjetër, Muhamet Farizi nga Shoqata e Mullisëve ka deklaruar për KosovaPress se çmimi i grurit nuk ka ndonjë lëvizje të madhe, për çfarë thotë se furrtarët nuk kanë pasur arsye të rrisin çmimin e bukës.

    Kryetari i organizatës për Mbrojtjen e Konsumatorit, Selatin Kaçaniku derisa thotë se nuk ka arsyeje të rritet çmimi i bukës, shton se me këtë ngritje është duke u varfëruar gjepi i qytetarëve. Ai ka kërkuar nga qeveria që të marrë masa të menjëhershme në këtë drejtim.

    Sipas të dhënave të Agjencisë së Statistikave të Kosovës një bukë 500 gramësh nga 31 centë sa ka kushtuar në vitin 2010, në vitin 2011 është rritur në 0.40 centë, në vitin 2012 ka shënuar rënie dhe çmimi ishte 0.39 centë, në vitin 2013 çmimi i bukës ishte 0.37 centë, në vitin 2014 çmimi i bukës ishte 0.36 centë, në vitin 2015 ishte 0.33 centë, rënie të çmimit të bukës pati edhe në vitin 2016, ku një bukë kishte çmimin 0.29 centë. Po ashtu sipas ASK-së në vitin 2017 çmimi i bukës ishte 0.28 centë, në vitin 2018 çmimi i bukës ishte 0.29 centë, në 2019 ishte 0.35 centë, në 2020 po ashtu 0.35 centë, në 2021 çmimi i bukës u rrit në 0.37 centë, ndërsa rritje e çmimit të bukës është shënuar edhe në vitin 2022, ku çmimi i bukës ka shkuar në 0.49 centë. Derisa për vitin 2023 dhe 2024 nuk ka të dhëna për çmimin mesatar të bukës, ndërkaq KosovaPress ka hasur në disa furra me çmimin e bukës deri në 60 centë për këtë vit, për një bukë 500 gramë.

  • Arrestohet një person në Rahovec, ushtroi dhunë në familje nën ndikimin e alkoolit

    Arrestohet një person në Rahovec, ushtroi dhunë në familje nën ndikimin e alkoolit

    Një person në Rahovec është arrestuar, pasi i njëjti nën ndikimin e alkoolit ka ushtruar dhunë në familje.

    Sipas raportit 24 orësh të Policisë së Kosovës, viktima mashkull kosovar, ka raportuar se babai i tij i dyshuari mashkull kosovar–nën ndikim të alkoolit, ka ushtruar dhunë në familje si dhe e ka sulmuar fizikisht viktimën.

    “Viktima mashkull kosovar, ka raportuar se babai i tij i dyshuari mashkull kosovar–nën ndikim të alkoolit, ka ushtruar dhunë në familje si dhe e ka sulmuar fizikisht viktimën. I dyshuari është arrestuar dhe me vendim të prokurorit, është dërguar në mbajtje”, njofton Policia e Kosovës.