Category: Lajme

Përgatiti: Arton Hamiti

Qytetarët që shfrytëzojnë rrugën nacionale Prishtinë – Gjilan, do të përdorin këtë rrugë alternative edhe për një kohë.

Ura në afërsi të Liqenit të Badovcit, rreth 15 kilometra në dalje të Prishtinës, vazhdon të jetë jashtë funksionit tash e një vit.

Pavarësisht se procedurat e tenderimit kanë përfunduar dhe kompania për ndërtimin e urës është kontraktuar, shenja të punimeve nuk ka.

Devijimi që detyrohen ta bëjnë çdo ditë, po i pengon ngasësit.

“Çdo ditë vijmë këndej, po na pengon boll. Qysh po shihet këta s’po marrin masa me e rregullu këtë pjesë”, thotë një qytetar.

“2-3 ditë në javë vijmë prej Gjilani në Prishtinë, po na pengon po s’kemi çka me bo” , thotë një tjetër qytetar.

Por, ka edhe nga ata që u mjafton rruga alternative.

“Na pengon pak, por prapë jemi të kënaqur që e kemi këtë rrugën tjetër”, tha një qytetar.

Sidoqoftë, Ministri i Infrastrukturës, Liburn Aliu, fajin për mosfillimin e punimeve ua la kushteve klimatike.

“Jemi në revidim të planit, për shkak të gjendjes së ujit. Pra nuk mundet aktualisht të fillohet puna për shkak të sasisë së madhe të ujit. Aktualisht nuk mund të vendosen shtyllat e urës, andaj jemi duke e modifikuar projektin në mënyrë që të bëhet me mbështetje anësore. Sidoqoftë e kemi ndërtuar rrugën alternative”, tha Aliu.

Vlera e kontratës së nënshkruar me kompaninë fituese “Dreni Inginiering” është 468 mijë euro. Ura e re pritet të jetë 38 metra e gjatë dhe 7 metra e gjysmë e gjerë.

Përgatiti: Arian Hajdaraj

Pasditen e 20 janarit të vitit 2023, Ministri i infrastrukturës, Mjedisit dhe Planifikimit Hapësinor, Liburn Aliu, kishte vizituar komunat që u përmbytën nga reshjet e shiut.

Nga Tushila e Skënderajt, pas bisedës me banorët që kishin mbetur pa shtëpi, ministri tha se do të angazhohen që ta krijojnë plan, që t’i menaxhojnë më mirë këto raste.

Gati një vit e gjysmë pas kësaj deklarate, ministri Aliu jep informacionin se janë fare pranë përpilimit të Hartës së Menaxhimit të Rrezikut nga Vërshimet, që i kushton buxhetit të shtetit 2.5 milionë euro.

“Jemi në draftim e sipër. E kemi përmbyllë draftin, në qershor pritet ta përfundojmë, por shoqërohet edhe me planin e veprimit”, tha Aliu.
Harta si e tillë, konsiderohet shumë e nevojshme.

“Është një hartë e rëndësishme, e cila synon t’i identifikojë rreziqet e vërshimeve me të cilat po ballafaqohemi. Megjithëse ato janë të befasishme, hartat e tilla janë të nevojshme që të merren masa paraprake që të zvogëlohen rreziqet”, tha Aliu.

Nëse zbatohet edhe plani i veprimit, njohës të fushës së mjedisit vlerësojnë se komunat do të jenë më të gatshme.

“Krijimi i një harte të tillë është një lajm i mirë. Shpresoj që të ketë bashkëpunim të mirë mes institucioneve lokale dhe atyre qendrore, në këtë rast Ministria e Infrastrukturës”, tha Luan Hasanaj nga “Let’s Do It Kosova”.

Nga përmbytjet e qershorit të vitit 2023, një grua dhe djali i saj 5 vjeç, kishin humbur jetën në qytetin e Pejës.

Ndërsa, dëme nga përmbytjet, në vlerë milionëshe, viteve të fundit ishin shkaktuar edhe në Mitrovicë, Vushtrri, Podujevë, Istog e Klinë.

Përgatiti: Krenare Mulliqi

Shiritat kanë mbetur edhe të martën, në hyrje të Bankës Postare Kursimore në Mitrovicën e Veriut. Këtu nuk pati asnjë lëvizje, për aq kohë sa qëndroi televizioni.

Një ditë më parë, policia e mbylli këtë dhe pesë filiale tjera në komunat me shumicë serbe, ku u konfiskuan para në vlerë rreth 2.5 milionë euro, në valuta të ndryshme.

Institucionet tashmë kanë nisur hetimet nën dyshimet për veprën penale shpëlarje e parave, për çka u intervistuan drejtori dhe punëtorë të bankës.

Mbyllja e bankave i ka shqetësuar qytetarët serbë të cilët thonë se tash nuk kanë ku të kryejnë shërbime bankare.

“Është një vendim i pahijshëm, shumë i vështirë, na shkakton vështirësi të gjithë neve që jemi në veri, nuk ishte dashur të vijë deri te kjo. Z. Kurti këtë e ka bërë brenda natës plus e ka konfiskuar krejt materialin, nuk është mirë të uzurpohen lokalet. Unë jam invalidit nuk shoh me syrin e majtë si mund të qarkulloj unë dhe për çfarë me del ai pension nuk më mjaftojnë ato para”, thotë një qytetare.

Por Banka Postare Kursimore tha të martën se mjetet e të gjithë klientëve janë të sigurta dhe nuk do të dëmtohen.

Aksionin e së hënës e kanë kritikuar ndërkombëtarët.

Bashkimi Evropian, Departamenti Amerikan i Shtetit dhe ambasadorët e QUINT-it në Kosovë kanë shprehur shqetësim, duke thënë se aksioni u bë pa koordinim me ta dhe se veprime të tilla mund të ngrenë tensione.

Mirëpo, sipas Ministrit të Financave, Hekuran Murati, kjo është vetëm çështje e ligjshmërisë.

Nënkryetari i Kuvendit Komunal në veri të Mitrovicës, Skënder Sadiku, nuk beson se mbyllja e filialeve të kësaj banke, do të nxisë reagim të serbëve lokalë.

KFOR-i ka konfirmuar se është informuar pak para operacionit të Policisë të së hënës, mirëpo ka kërkuar konsultime paraprake për aksionet e Policisë dhe të FSK-së.

Përgatiti: Arian Hajdaraj

300 mijë euro ia ka ndarë Ministria e Financave asaj për Komunitete dhe Kthim, për një projekt mbështetës për organizatat joqeveritare të komunitetit serb në komunat veriore.

Projekti, sipas ministrit të Financave, Hekuran Murati, deri tash është zvarritur për shkak të masave nga Bashkimi Evropian.

“Kjo ndarje vjen si rezultat i ngecjes së projektit që kanë në raport me mbështetjen e komuniteteve pakicë. Dhe kjo ngecje e projektit ka ndodhë pikërisht për shkak të masave të Bashkimit Evropian dhe kufizimeve të tyre. D.m.th, një veprim i Bashkimit Evropian që ka qenë gjoja për shkak të shtensionimit të situatës në vendbanimet që banohen nga komunitetet joshumicë, ka rezultuar pikërisht në dëmtim të interesave të komunitetit joshumicë”, tha Murati.

Vetëm disa ditë pasi dështoi të ratifikohet në Kuvend, qeveria e miratoi sërish një marrëveshje ndërkombëtare me Fondin Zhvillimor Opec, për të marrë kredi në vlerë prej 40 milionë euro, me 0% interes.

“Konsideroj se është e rëndësishme që të përmbyllet cikli i reformave që ka qenë dhe mjetet të disbursohen. Përveç se ka përfitime financiare, me kushte 20 vjet kthimi, bëhet fjalë edhe për rritjen dhe përforcimin e bashkëpunimit të Kosovës me të gjitha shtetet”, tha Murati.

Qeveria po ashtu mori vendim për shpërbërjen e Ndërmarrjes së Re Energjetike të Kosovës, me kërkesë të menaxhmentit të saj. Vetëm gjatë vitit 2022, ndërmarrja që nuk kryen asnjë funksion, kishte shpenzuar 70 mijë euro për 7 anëtarët e saj.

“Tani kanë pushuar edhe shkaqet juridike për ekzistimin e ndërmarrjes, ndër të tjera, procedura e arbitrazhit lidhur me projektin e termocentralit Kosova e Re”, tha ministrja e Ekonomisë, Artane Rizvanolli.

Buxheti i shtetit synohet të kursehet edhe më tej, përmes lidhjes së marrëveshjes për sigurime sociale me qeverinë e Turqisë, e cila do t’ua pamundësojë qytetarëve me dy nënshtetësitë, të marrin pensione në të dy shtetet njëkohësisht.

Përgatiti: Kastriot Tahiri

Mësimin e përfunduan të premten e javës së kaluar, por maturantët ende nuk e dinë se si do ta përzgjedhin lëndën zgjedhore, në të cilën do t’i testojnë njohuritë e tyre.

Ata nuk u pyetën për këtë njësoj si gjeneratat e kaluara.

“Deri më tani nxënësit ende nuk kanë arritë me u regjistruar. Ende nuk është hapë platforma, momentin që hapet besoj që do të jetë edhe e drejta e aplikimit në lëndën zgjedhore për lëndën që ata duan të testohen”, tha drejtoresha e Gjimnazit Matematikor, Fahrije Retkoceri.

Për këtë çështje, por edhe për mënyrën se si do të aplikohet dhe të paraqitet testi i maturës, sipas Ministrisë së Arsimit, shkollat do të njoftohen këtë javë.
“Nesër kemi takim me koordinator të DKA-ve, e gjatë javës do të takohemi edhe me koordinatorët e shkollave. Platforma është në finalizim dhe të hënën do të bëhet aktive”, tha Fatmir Elezi, udhëheqës i Divizionit për Vlerësim, Standarde dhe Monitorim.

Udhëheqësi i divizionit për vlerësim, standarde dhe monitorim të këtij procesi, Fatmir Elezi, tha se me qëllim të shmangies së kopjimit nxënësit e të njëjtës klasë do të shpërndahen në klasë të ndryshme.

Por, shpërndarja, sipas njohësit të arsimit, Argjend Osmani, nuk është mënyra më e mirë për t’iu shmangur kopjimit.

“Kopjimi nuk lidhet me aplikimin, por me vetëmenaxhimin brenda klasës. Të rinjtë tanë janë mjaft të përgatitur për përdorim të aplikimit, por problemi qëndron te sistemi dhe vonshmëria që po shkaktohet në platformën e-Kosova”, tha Osmani.

Edhe këtë vit testimi i njohurive të nxënësve do të jetë i ndarë në dy faza. Faza e parë do të mbahet më 25 qershor, ndërsa e dyta më 28.

Këtë vit testit të maturës do t’i nënshtrohen 25 mijë maturantë, 23 mijë të rregullt e afër 2 mijë të viteve paraprake.

Përgatiti: Armand Hoti

Drejtoreshës së Autoritetit Rregullativ të Ujërave, Hajrije Morina, i mbushen sytë me lot kur tregon për problemet me mungesë të stafit profesional.

“Tash ka filluar edhe kërkesat me ardhë për pushime pa pagesë, njëvjeçare, që është shumë problem për ARRU-në. Nuk e di si do t’ia dalim”, tha Morina.

Por anëtarët e Komisionit parlamentar për Ekonomi, kujdesen që ajo të ndihet më komode në pjesën e mbetur të raportimit të saj.

Pasi e merr veten, drejtoresha tregon se pranuan mbi 400 ankesa ndaj Kompanive Rajonale të Ujësjellësit, vitin e kaluar.

“Kryesisht këto ankesa janë për moslexim të ujëmatësit, ose faturim paushall ose për faturim enorm, për një periudhë të gjatë që nuk është lexuar rregullisht ujëmatësi, ose për parashkrim të borxhit, sepse kompanitë e ujësjellësit nuk i kërkojnë borxhet e tyre me kohë”, tha Morina.

Ndërsa, pranon se ende nuk kanë qasje në shërbimet e ujit në komunat veriore të vendit, gjë që e konsideron çështje politike.

“Ne jemi për t’i mbështetur institucionet aty ku ka nevojë, mirëpo ndoshta të iniciohet nga rregullatori diçka, nuk e di sa është ligjore sepse ne jemi kryesisht për pjesën që kompanitë e ujësjellësit kanë licencë”, tha Morina.

Referuar të dhënave të ARRU-së, në vitin 2023 janë prodhuar mbi 130 milionë litra ujë.

Përgatiti: Driton Sadiku

Qeveria e ndryshoi formën e përfitimit, por nuk e rriti vlerën e ndihmës për familjet me asistencë sociale.

Me reformën në skemën sociale, jo të gjitha familjet që kanë fëmijë nën moshën 5 vjeçare do të jenë përfituese, njashtu edhe jo të gjithë ata që janë në marrëdhënie pune do të penalizohen nga kjo ndihmë.

Ministri i Financave, Hekuran Murati, përmendi vetëm herët e kaluara, kur janë marrë vendime të tilla.

“Sa i përket shumës si të tillë ne gjatë viteve të kaluara kemi ndryshuar formulën e përllogaritjes, pastaj edhe kemi rritur mesatarisht shumën, ka qenë për 30 për qind, normalisht që në vazhdimësi shohim sipas nevojës dhe përshtatim, mirëpo aktualisht jemi në fazën e pilotimit dhe me informatat që mbledhim nga ky pilotim do të shohim si të vazhdojmë tutje”, tha Murati.

Pika e parë për të qenë përfitues të ndihmës sociale është që familja të ketë të ardhura nën 100 euro për kokë anëtari.

Sipas ministrit Murati, kjo është bërë me qëllim të heqjes së diskriminimit dhe rritjes së punësimit.

Por, ndryshe mendojnë ekonomistët, teksa thonë se qeveria duhet të përkrahë sektorin privat e jo të merret me skema sociale.

“Orientimi qeveritar në një politikë shumë më tepër sociale sesa zhvillimore është dëmi më i madh që po i bëhet Kosovës. Vërehet që viteve të fundit shumë më tepër kemi qenë të orientuar në këtë drejtim që të mbështetet aspekti social përmes ndihmave afatshkurtra sesa të mbështetet sektori privat për zhvillim ekonomik dhe derisa nuk kemi zhvillim ekonomik të qëndrueshëm barra sociale do të jetë shumë më tepër pengesë dhe ngarkesë për shtet se sa zhvillim”, tha Safet Gërxhaliu, ekonomist.

Gërxhaliu vlerëson se reformat në skemën sociale mund t’i shtojnë familjet me asistencë sociale, teksa aktualisht llogaritet që rreth 25 mijë familje janë përfitues të socialit në nivel vendit.

Aktualisht pensionet variojnë nga 70 deri në 250 euro, varësisht nga gjendja e familjes përfituese.