Category: Lajme

Një varg operacionesh të dyshuara si sabotuese kohët e fundit në vendet aleate e kanë ngritur aleancën ushtarake në gatishmëri.

NATO e ka rritur “vigjilencën” e saj mes një rritje të “aktivitetit të shërbimit sekret rus” në vendet e saj anëtare, pranoi të martën Sekretari i Përgjithshëm i aleancës ushtarake, Jens Stoltenberg.

I pyetur për sabotimet e fundit të dyshuara si ruse dhe tentativat për zjarrvënie në magazina, qendra tregtare dhe magazina në të gjithë vendet e BE dhe NATO, Stoltenberg u përmbajt nga vendosja e drejtpërdrejtë e përgjegjësisë mbi Kremlinin.

Por ai tregoi qartë se aleanca po i monitoronte ngjarjet dhe nënvizoi rëndësinë e hetimeve penale në nivel kombëtar.

“Ne kemi parë rritje të aktivitetit të shërbimit sekret rus në të gjithë aleancën, prandaj kemi rritur vigjilencën tonë, kemi shërbimet tona që po monitorojnë nga afër se çfarë po bëjnë rusët,” tha Stoltenberg, i cili do të japë dorëheqjen në tetor pas një dekade në timonin e NATO.

“Është e rëndësishme që edhe kombet të ndërmarrin veprime (me) arrestimet dhe proceset ligjore që kanë filluar tani në Mbretërinë e Bashkuar, në Gjermani, në Poloni dhe në vende të tjera,” shtoi ai.

“Ne duhet të jemi gati dhe duhet të shkëmbejmë informacionet sekrete (…) për t’iu kundërvënë këtyre llojeve të ndryshme të akteve hibride që synojnë të minojnë aftësinë e aleatëve të NATO-s për të ofruar mbështetje për Ukrainën.”

Gjatë fundjavës, një raport i New York Times që citon zyrtarë të sigurisë së SHBA dhe aleatëve pretendoi se disa nga sulmet hibride të fundit – veçanërisht tentativat për zjarrvënie – në Evropë ishin vepër e GRU, krahut të inteligjencës ushtarake të Moskës.

Incidentet përfshijnë përpjekjet e fundit për zjarrvënie në vende anembanë Polonisë, të cilat çuan në arrestimin e nëntë individëve nën dyshimin për sabotim rus të martën e kaluar.

Duke folur për transmetuesin polak TVN24 javën e kaluar, kryeministri polak Donald Tusk tha se të dyshuarit – shtetas ukrainas, bjellorusë dhe polakë – ishin “angazhuar drejtpërdrejt në emër të shërbimeve ruse në akte sabotazhi në Poloni”, duke përfshirë sulmin fizik, zjarrvënien dhe tentativë për zjarrvënie.

Tusk tha se sulmet përfshinin një përpjekje për t’i vënë zjarrin një fabrike bojërash në qytetin perëndimor polak të Wroclaw, si dhe incidente të tjera të fundit në Lituani, Letoni dhe potencialisht Suedi.

Një zjarrvënie e fundit në një magazinë të Ikea në Lituani tani dyshohet se është e lidhur me operacionet e Kremlinit.

Kalimi i lëndës në ndërmjetësim për përleshjen e ndodhur më 13 korrik në vitin 2023 në Kuvendin e Kosovës ndërmjet zëvendëskryeministrit Besnik Bislimi dhe deputetëve të Partisë Demokratike të Kosovës, nuk ndërlidhet me një koalicion të mundshëm për zgjedhjet e reja. Kështu ka thënë për EO, deputeti i PDK-së, Hajdar Beqa.

Beqa, i cili është i përfshirë në këtë sulm, ka deklaruar se ky propozim ka ardhur nga gjykatësi i rastit, Eroll Gashi dhe se kjo është pranuar nga të gjitha palët.

“Është procedurë ligjore, na ka informuar gjyqtari i cili ka udhëheqë këtë lëndë, na ka informua me drejtat që i kemi si të akuzuar dhe si të dëmtuar për të gjitha palët dhe ka qenë një dakordim i të gjitha palëve me ia dhënë një shans që të shkohet me ndërmjetësim dhe është mjet ligjor dhe nuk e di çka ka këtu të keqe, kjo ka qenë propozim dhe pajtim i të gjithë palëve në procedure”, u shpreh Beqa.

Deputeti i PDK-së, ka mohuar kategorikisht se ky rast ndërlidhet me një koalicion të mundshëm me partinë në pushtet. Thekson se kjo parti është e gatshme për zgjedhje, ndërsa kryeministër e sheh kandidatin e tyre, Bedri Hamzën.

“Nuk ka të bëjë me koalicion ne përkundrazi mendojmë që Kosovës i vyen një Qeveri e re, një kryeministër i ri, i vyen Bedri Hamza kryeministër dhe mendoj që Kosovës u duhen zgjedhje është në interes të qytetarëve. Si Parti Demokratike jemi gati tani për atë arsye edhe kemi pranuar data të zgjedhjeve por nuk po shihet që janë gati partitë tjera përfshirë edhe mazhorancën”, theksoi Beqa.

Ministrja e Punëve të Jashtme dhe Diasporës, Donika Gërvalla-Schwarz ka takuar homologen e saj në Kanada, Melanie Joly e falënderoi këtë të fundit për mbështetjen që vendi i saj i ka dhënë vendit tonë.

Në komunikatën e MPJD-së thuhet se Gërvalla e ka njoftuar Jolyn për situatën politike në vend, atë të sigurisë duke theksuar veprimet destabilizuese të Serbisë, që siç i tha Gërvalla sot përbën një rrezik për stabilitetin në Ballkanin Perëndimor.

“Ministret Gërvalla dhe Joly diskutuan rreth fuqizimit të partneritetit në ngritjen e kapaciteteve të mbrojtjes së Kosovës, zhvillimit të qëndrueshëm, investimeve strategjike dhe bashkëpunimit në sektorin publiko-privat”, thuhet në njoftim.

Në shënim të 25-vjetorit të pranimit të refugjatëve nga Kosova dhe 15-vjetorit të krijimit të marrëdhënieve diplomatike mes dy shteteve, me qëllim të fuqizimit të miqësisë dhe përparimit të projekteve me interes të përbashkët, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, gjatë një vizite zyrtare në Kanada ka zhvilluar takim me Ministren e Punëve të Jashtme, Mélanie Joly.

Gjatë këtij takimi, e shoqëruar edhe nga Kryetarja e Grupit Parlamentar të Miqësisë Kosovë-Kanada, Mimoza Kusari-Lila dhe Ambasadori i Republikës së Kosovës në Kanada, Adriatik Kryeziu, pasi e falënderoi për mbështetjen që Kanadaja i ka dhënë Kosovës në çlirimin, rindërtimin dhe zhvillimin e saj, Ministrja Gërvalla e njoftoi homologen e saj rreth situatës politike dhe të sigurisë në Kosovë duke theksuar veprimet destabilizuese të Serbisë, e cila sot përbën një rrezik për stabilitetin në Ballkanin Perëndimor dhe në Evropën Juglindore.

Ministret Gërvalla dhe Joly diskutuan rreth fuqizimit të partneritetit në ngritjen e kapaciteteve të mbrojtjes së Kosovës, zhvillimit të qëndrueshëm, investimeve strategjike dhe bashkëpunimit në sektorin publiko-privat.

Në fund të takimit, Ministrja Gërvalla i dhuroi Ministres Joly pullën postare që simbolizon 15-vjetorin e krijimit të marrëdhënieve diplomatike mes dy shteteve dhe mirënjohjen për mbështetjen e Kanadasë për Kosovën.

Kryeministri Albin Kurti është takuar sot në mëngjes me Emisarin e Gjermanisë për Ballkanin Perëndimor, Manuel Sarrazin, në Rezidencën e Ambasadorit të Gjermanisë në Kosovë, Jörn Rohde.

Sipas njoftimit që ka lëshuar Zyra e Kryeministrit, Kurti e Sarrazin kanë folur për progresin në zbatimin e marrëveshjeve të mobilitetit në Procesin e Berlinit, bashkëpunimi rajonal dhe pritjet nga samiti i radhës që në 10-vjetorin e tij do të mbahet në Berlin.

“Kryeministri kujtoi rëndësinë që para samitit të radhës të fillojë zbatimi i marrëveshjes për udhëtim me letërnjoftime ndërmjet Kosovës dhe Bosnjë dhe Hercegovinës, që lehtëson lëvizjen e lirë të qytetarëve”, thuhet në njoftim.

Tutje, thuhet se Kurti theksoi se më 16 maj në Kotor të Malit të Zi, Kosova kërkoi që Ballkani Perëndimor të bëhet pjesë e Autoritetit Kundër Pastrimit të Parave (AMLA) të Bashkimit Evropian për të rritur integritetin financiar dhe për të forcuar bashkëpunimin në luftën kundër krimit financiar, kërkesë kjo që u bë pjesë e deklaratës së përbashkët të lëshuar në Kotor

“Për kontributin dhe rolin e tij në forcimin e marrëdhënieve ndërmjet Republikës së Kosovës dhe Gjermanisë, si dhe në avancimin e bashkëpunimit rajonal, kryeministri e falënderoi z. Sarrazin. Procesi i Berlinit është platforma ku angazhohemi për bashkëpunim rajonal dhe integrim ekonomik. Tregu i Përbashkët Rajonal i dalë nga Procesi i Berlinit së bashku me Planin e Rritjes janë mundësi për zhvillimin e Ballkanit Perëndimor dhe shpejtimin e reformave për anëtarësim në Bashkimin Evropian. Republika e Kosovës është proaktive dhe kontribuese e këtij procesi të rëndësishëm”, thuhet në fund të njoftimit.

Në Panelin e dytë të konferencës rajonale” Trupi jonë nuk është tabu”, është diskutuar çështja ligjore rreth produkteve higjienike, me fokus instrumentet në nivelin rajonal për të zhvilluar dhe forcuar drejtësinë menstruale, raporton Ekonomia Online.

Lindita Toçi nga ministria e Financave tha se Qeveria synon objektivat e Bashkimit Evropian.

“Në aneksin e tretë nuk është i renditur ky lloj produkti mirëpo në bazë të Ligjit aktual ministria e Financave mund të nxjerr një akt ligjor. Qeveria e Kosovës gjithmonë synon objektivën e BE-së në produktet sanitare, pasi ajo e fakton që norma mund të jetë më së paku 5%.”, ka thënë ajo.

Ndërkaq Sanela Shkrieli nga Maqedonia e Veriut tha se ka shumë faktorë ndikues në ndryshimin e taksave në produktet higjienike.

“Më kujtohet reagimi i parë kur filloi të flitej për ketë çështje. Jam e lumtur që është arritur ngritja e vetëdijes që produkti nuk është luks por nevojë. Por kur flitet për politikat gjinore ne duhet ta kemi parasysh se si buxheti ka implikime. Nuk ishte e lehtë por e rëndësishme, sepse kur flasin për ministrinë e Financave edhe buxheti ka të bëjë me të drejta njerëzore, ata duan ti shohin statistikat e të dhënat”, ka thënë ajo.

Anita Stjepçeviq nga Qendra e grave në Mal të Zi i kanë caktuar disa mjete të reja për reduktimin në 7% të higjienës menstruale.

“Në Mal të Zi në fillim të vitit të 2023 kemi caktuar bashkë me mediat dhe disa klube politike në Kuvend mjete të reja për reduktimin në 7% të higjienës menstruale”, ka thënë ajo.

Elirjeta Beka nga Rrjeti i Grave në Kosovë ka ngritur vëmendjen duke theksuar se thuhet se nëse do ta largojnë produktin për çështje menstruale, atëherë gratë do të kërkojnë edhe atë për pelena.

“Kur bëhet fjalë për buxhetin kjo është çështje e varfërisë sepse në Kosovë 25% jetojnë në varfëri dhe 5% në atë të skajshme dhe thuhet se nëse ne do ta largojmë produktin për çështje menstruale, atëherë gratë do të kërkojnë edhe atë për pelena”, ka thënë Beka.

Beka tha se ishte çështja e tabusë dhe sipas saj Qeveria ose Komuna nuk monitoron çka po mësohet në shkolla.

“Kur kam qenë fëmijë kur mësonin për ciklin menstrual mësuesit i kanë larguar djemtë nga klasa. Edhe edukimi ende nuk mësohet në shkolla, përveç largimit të tatimit në produkte menstruale. Duhet të merret shembull Anglia që edhe shkolla të kenë produkte menstruale”, ka thënë ajo

Sanela Shkrieli ka thënë po ashtu se duhet ta dimë kush po i financon lëvizjet kundër gjinisë e sigurisë.

“Duhet të jemi të vetëdijshëm që duhet të luftojmë shumë që mos ti lejojmë lëvizjes kundër barazisë gjinore që ti zhdukin këto që i kemi arritur deri sot. Duhet ta dimë kush po i financon lëvizjet kundër gjinisë e sigurisë. Ka shumë hulumtime që janë çështje të sigurisë kombëtare në sferën publike. Se cili është qëllimi i lëvizjes antidemokratike na duhet fuqi për të folur e rritur zërat, kemi qenë 51 gra në parlament do themi jo dhe amandamentet s’duhet të kalojnë”, ka theksuar ajo.

Lindita Toçi nga ministria e Financave ka deklaruar se brenda këtij viti është e paraparë ta ulin normën.

“Legjislacioni ka me u rishiku. Brenda këtij viti është e paraparë dhe jemi të gatshëm ta ulim këtë normë dhe nuk merr shumë kohë për me e fut zbritjen e TVSh-së për normën e ulet prej 8%”, ka thënë Toçi.

Kampet e emigrantëve në Shëngjin do të jenë funksionalë së shpejti, sipas kryeministres italiane Georgia Meloni, sipas së cilës, projekti po ecën me ritme të mira.

Në një intervistë për “In mezz’ora” në Rai3 të dielën, u shpreh se ky projekt strategjik, “mund të ndryshojë ndjeshëm politikat e menaxhimit të migracionit në BE”.

Meloni nuk kurseu as ironitë për opozitën italiane. “Në fillim na sulmuan sepse sipas tyre, ne po ndërtonim një Guantanamo, dhe tani ata ankohen për vonesat në ndërtimin e Guantanamos”, tha ajo për “In mezz’ora”.

Kryeministrja italiane i doli sërish në mbrojtje homologut të saj, Edi Rama, që sipas saj është sulmuar në mënyrë të padrejtë nga mediat dhe opozita italiane.

“Kënaqësia më e madhe për mua është marrëveshja me Shqipërinë për të menaxhuar atje një pjesë të emigrantëve të paligjshëm që do të donin të vinin në Itali. Kur e shpallëm, shumë njerëz dënuan shkeljen e shtetit ligjor, që e quajtën një qeveri fashiste dhe raciste. Epo, pak ditë më parë, 15 nga 27 vende evropiane nënshkruan një apel drejtuar Komisionit Evropian, i cili ndër të tjera tha se BE duhet të ndjekë modelin italian për marrëveshjen me Shqipërinë. Në përpjekjet për të fundosur çdo përgjigje kundër emigracionit të paligjshëm, Italia po jep shembullin për emigracionin”, tha ajo. /tch

Policia e Kosovës, respektivisht Drejtoria Rajonale e Policisë së Prishtinës, ka qenë pjesëmarrëse e konferencës së 44 të policisë së kryeqyteteve evropiane, që është mbajtur në Tallin të Estonisë nga data 21 deri me 24 maj 2024, raporton Ekonomia Online.

Sipas një njoftimi, në këtë konferencë bashkë me shefa të policisë së kryeqyteteve evropiane, Policinë e Kosovës e ka përfaqësuar shefi i Sektorit Rajonal për Operativë, Major Bekim Bislimi si dhe shefi i Sektorit Rajonal për Resurse, Major Driton Imeri.

“Gjatë konferencës, Drejtoria Rajonale e Policisë së Prishtinë pati privilegjin të bëjë prezantimin mbi sfidat që paraqiten në rastet e trafikimit me armë ilegale në Kosovë dhe Ballkanin jug-perendimor, prezantim ky që u prit me shumë interes nga të pranishmit”, thuhet në njoftimin e PK-së.

Tema tjera të diskutimit në këtë konferencë kanë qenë edhe shkëmbimi i eksperiencave policore me kryeqytetet evropiane me qëllim të gjetjes së mjeteve dhe metodave si dhe ndërmarrjen e masave të cilat do të ishin në funksion të koordinimit dhe ngritjes së kualitetit të bashkëpunimit në mes policive te kryeqyteteve evropiane në parandalimin dhe luftimin e dukurive negative, me theks të veçantë në disa drejtime.

“Trafikimi i paligjshëm i armëve të zjarrit dhe atyre të luftës, nga grupet e strukturuara kriminale, Rreziqet që lidhen me kalimin e paligjshëm të kufirit nga shtetasit e huaj dhe sfidat për riatdhesimin e tyre, Sfidat për të ardhshmen lidhur me policimin modern, përshtatja në rekrutim të gjeneratës “Z”, theksohet në njoftim.

Konferenca e 44-të, e drejtorëve të policive të kryeqyteteve Evropiane, ka mbyllur punimet me miratimin e deklaratës së përbashkët nga shtetet pjesëmarrëse, prej disa pikash të nxjerra nga temat e trajtuara dhe diskutimet e zhvilluara përgjatë gjithë konferencës.

Konferenca e radhës, të zhvillohet në vitin 2025 në Madrid të Spanjës, ndërsa në vitin 2026 në Helsinki-Finlandë.

Me pajtim të palëve në procedurë, lënda ndaj zëvendëskryeministrit Besnik Bislimi dhe deputetëve Hajdar Beqa, Bekim Haxhiu dhe Mergim Lushtaku, për përleshjen e ndodhur më 13 korrik 2023 në Kuvendin e Kosovës, ka shkuar në ndërmjetësim.

Mbrojtësi i të akuzuarit Besnik Bislimi, avokati Florent Latifaj tha se pas konsultimit me të mbrojturin e tij, pajtohen që kjo lëndë të shkojë në procedurë të ndërmjetësimit, raporton “Betimi për Drejtësi“.

Edhe mbrojtësi i të akuzuarit Hajdar Beqa, avokati Hajzer Salihu tha se do t’ia japin një shans procedurës së ndermjetësimit.

Po ashtu, edhe mbrojtësja e të akuzuarit Mergim Lushtaku, avokatja Besjana Ismaili e mbështeti deklarimin e avokatit Salihu, e cila tha se pajtohen që kjo lëndë të shkojë në ndërmjetësim.

Gjithashtu, mbrojtësi i të akuzuarit Bekim Haxhiu, avokati Ardian Megjani, u pajtua që lënda të shkojë në ndërmjetësim.

Deklarimet e avokatëve të tyre i mbështetën edhe katër të akuzuarit.

Po ashtu, që kjo lëndë të shkojë në ndërmjetësim u pajtua edhe i dëmtuari, Hekuran Murati si dhe prokurorja Nebahate Salihu.

Më pas, gjykatësi Eroll Gashi tha se gjykata merr vendim që kjo çështje penale të shkojë në procedurë ndërmjetësimi, e nëse arrihet marrëveshja, do të hudhet poshtë aktakuza.

Por, në rast se nuk arrihet marrëveshja në ndërmjetësim, gjykatësi tha se procedura do ta vazhdojë ku ka mbetur në gjykatë.

Fillimisht, para pauzës për konsultim rreth procedurës së ndërmjetësimit, mbrojtësja e të akuzuarit Mërgim Lushtaku, avokatja Besjana Ismaili deklaroi se nuk është pajisur me të gjitha shkresat e lëndës përkundër kërkesës së parashtruar në Prokurori, perveç aktakuzës së pranuar nga Gjykata.

Lidhur me këtë, prokurorja Nebahate Salihu deklaroi se Prokuroria i ka bërë gati të gjitha shkresat e lëndës dhe ka tentuar të kontaktojë mbrojtësin tjetër të Lushtakut, avokatin Faton Fetahu, mirëpo ka qenë i paqasshëm.

Më pas, në këtë seancë prokurorja ia dorëzoi të gjitha shkresat e lëndës avokates Ismaili.

Kurse, gjykatësi Eroll Gashi pyeti palët nëse pajtohen që lënda të shkojë në procedurë të ndërmjetësimit, e nëse arrihet ky pajtim, aktakuza do të hudhet sikur nuk ka ekzistuar kurrë. Në këto rrethana, me kërkesë të mbrojtjes për disa momente u ndërprere seanca për t’u konsultuar lidhur me këtë çështje.

I pranishëm në seancë ishte edhe ministri i Financave, Hekuran Murati në cilësinë e të dëmtuarit.