Category: Lajme

Instituti Hidrometeorologjik i Kosovës ka njoftuar se të enjten do të mbajë mot me diell dhe vranësira të nivelit të mesëm të Troposferës, të cilat vende -vende mund të sjellin riga shiu.

Sipas institutit, temperaturat minimale do të lëvizin ndërmjet 13-15 gradë Celsius, ndërsa maksimalet e ditës parashihen të lëvizin ndërmjet 27-35gradë Celsius.

Do të fryjë erë nga drejtime i juglindjes me shpejtësi 1-4m/s.

“Rekomandohet që në intervalin kohorë 10-16h mundësisht mos të ju ekspozoheni rrezeve direkte të diellit ,sepse ky mot është i papërshtatshëm për një shtresë të popullatës me sëmundje kronike. Të bartim masa mbrojtëse, syze dielli , rroba me ngjyra të lehta, kapelë ose ombrellë”, thuhet në njoftim.

Duke filluar sot nga ora 10:30 do nisin mbledhjet e komisioneve.

Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit shqyrton Projektligjin për Noterinë, për Këshillin Prokurorial dhe atë për të Drejtat Pronësore të Shtetasve të Huaj.

Ndërkaq, nga ora 11:00 fillon komisioni për Ekonomi, Industri, Ndërmarrësi dhe Tregti, ku mban dëgjim publik për Projektligjin për kripto-asetet.

Sot duke filluar nga ora 15:00, do të nënshkruhet Memorandum Mirëkuptimi.

Memorandumi nënshkruhet ndërmjet Komunës së Prizrenit dhe qytetit të Portos së Portugalisë.

Kjo bëhet për bashkëpunim në fushat e turizmit, ekonomisë dhe kulturës.

Një person është arrestuar sonte si i dyshuar për përfshirje në sulm ndaj pjesëtarëve të KFOR-it, vitin e kaluar në Zveçan.

Kjo u konfirmua nga zëvendësdrejtori i policisë për rajonin e veriut, Veton Elshani.

Elshani theksoi se i dyshuari me inicialet L.D u ndalua në një pikë të kontrollit në Bistricë.

“I njëjti është duke u intervistuar në Mitrovicë të jugut dhe pas intervistimit do të vendoset për hapat e mëtejme”, tha ai.

Më 29 maj 2023, ishin lënduar 93 ushtarë të KFOR-it, dhjetëra prej tyre rëndë.

Kjo si pasojë e protestuesve serbë që shkaktuan tensione si shkak i pakënaqësisë për vendosjen e kryetarëve të zgjedhur në zgjedhjet e prillit të po këtij viti.

Stacioni i ri i Autobusëve në Podujevë, është përuruar të mërkurën, me rastin e 25-vjetorit të çlirimit të këtij qyteti, raporton Ekonomia Online.

Në ceremoninë e përurimit të këtij projekti, Kryetari i Komunës, Shpejtim Bulliqi tha se ky stacion që ka marrë një pamje të mrekullueshme do të shërbejë edhe për linjat ndërkombëtare.

Kryetari Bulliqi theksoi projekti i Stacionit të ri është realizuar në bashkëfinancim me Ministrinë e Zhvillimit Rajonal, vlera totale e të cilit është 1.3 milionë euro, ku MZHR-ja ka participuar me 600 mijë euro, për të cilën e ka falënderuar Ministrin Fikrim Damka, kurse pjesa tjetër e projektit është financuar me buxhet komunal.

Edhe Ministri i Zhvillimit Rajonal, Fikrim Damka, u shpreh i lumtur që me sukses është përmbyllur ky projekt i një rëndësie të veçantë jo vetëm për Komunën e Podujevës, por edhe më gjerë.

Ai bëri të ditur se do të ndihmojnë komunën e Podujevës edhe në realizimin e projektit të Tregut të Gjelbër, i cili pritet të ndërtohet në vendin ku ka qenë deri tash Stacioni i vjetër i Autobusëve.

Presidenti i Rumanisë, Klaus Iohannis, pritet të njoftojë më 20 qershor se do të heqë dorë nga gara për t’u bërë shef i ardhshëm i NATO-s.

Ai është pengesa e vetme në rrugën e kryeministrit të Holandës, Mark Rutte, për ta marrë postin e sekretarit të Përgjithshëm të aleancës ushtarake.

Duke folur në Bukuresht më 19 qershor, pas një takimi me presidentin italian Sergio Mattarella, Iohannis tha se së pari do të bisedojë rreth vendimit të tij me Këshillin Suprem të Mbrojtjes Kombëtare të Rumanisë dhe pastaj do ta bëjë atë publik.

Më herët gjatë ditës, Hungaria dhe Sllovakia thanë se do ta mbështesin Rutten, duke e lënë Rumaninë shtetin e vetëm në mesin e 32 vendeve anëtare të NATO-s që nuk e ka mbështetur liderin holandez 57-vjeçar.

Ekspertët mjeko-ligjorë të EULEX-it bashkë me përfaqësuesit e e IML-së dje në pikën kufitare në Merdarë kanë dorëzuar mbetjet e tre trupa të qytetarëve serbë të vrarë në luftën e fundit në Kosovë, që së fundi u identifikuan.

EULEX-i njoftoi se mbetjet e një person i janë dorëzuar familjes, ndërsa të dy të tjerëve i janë dorëzuar autoriteteve serbe.

“Ne mbetemi të përkushtuar për të mbështetur homologët tanë vendorë në IML dhe institucionet e tjera relevante të Kosovës duke ofruar ekspertizë mjekoligjore dhe këshilla në kryerjen e punës komplekse të identifikimit të të gjitha mbetjeve njerëzore në morgun e IML-së, në mënyrë që anëtarët e familjes të realizojnë të drejtën e tyre për të ditur të vërtetën”, thuhet në njoftimin e EULEX-it.

Presidentja Vjosa Osmani ka thënë se angazhimi i Kosovës është i palëkundur që të dalin para drejtësisë personat që kryen dhunime seksuale gjatë luftës së fundit.

Në platformën X, ajo ka shpërndarë një video të sajën derisa ishte duke folur në OKB.

“Në këtë Ditë Ndërkombëtare për Eliminimin e Dhunës Seksuale në Konflikt, ne vazhdojmë të nderojmë guximin dhe qëndrueshmërinë e atyre që kanë duruar tmerre të papërshkrueshme nën regjimin gjenocidal të Millosheviqit. Këto gra dhe burra të guximshëm na kujtojnë detyrën tonë të përbashkët për t’i dhënë fund përdorimit të dhunës seksuale si një armë lufte”.

“Sot, ne shohim të mbijetuar në Kosovë që e transformojnë dhimbjen e tyre në veprim të fuqishëm, duke frymëzuar të tjerë të panumërt në kërkimin e drejtësisë. Angazhimi ynë është i palëkundur: duhet t’i nxjerrim autorët para drejtësisë dhe të sigurojmë që mizori të tilla të mos përsëriten kurrë!”, ka thënë Osmani