Category: Lajme

Prokuroria Themelore në Ferizaj ka bërë të ditur se ka ndaluar tre persona, të cilët dyshohen për keqpërdorim të detyrës, ndërkaq në mesin e të arrestuar është edhe një noter nga Vitia.

Në njoftimin e Prokurorisë thuhet se në bashkëpunim me Drejtorinë për Hetimin e Krimeve Ekonomike dhe Korrupsionit në Ferizaj dhe në bazë të urdhëresës së lëshuar nga Gjykata Themelore në Ferizaj për kontroll dhe sekuestrim te përkohshëm të shtëpive dhe lokaleve përcjellëse, sot, ka realizuar një urdhër kontroll, ku me ç’rast me vendim të Prokurorit të Shtetit të Departamentit të Krimeve të Rënda, janë ndaluar tre persona të dyshuar në kohëzgjatje prej 48-orësh.

Të dyshuarit janë A.S noter – komuna e Vitisë, I.M Prishtinë dhe F.N, komuna e Dragashit, nën dyshimin e veprave penale “Legalizimi i përmbajtjes së pa vërtetë në bashkëkryerje”, “Falsifikimi i dokumenteve” dhe “Keqpërdorimi i pozitës apo autoritetit zyrtar” sipas Kodit Penal të Republikës së Kosovës.

“Ndalimi i tre të pandehurve në këtë rast është bërë si rezultat i vazhdimit të hetimeve që ndërlidhet me rastin paraprak, ku më herët nga Prokuroria Themelore në Ferizaj, u ndaluan edhe pesë persona të tjerë, për shkak të dyshimit të keqpërdorimit të detyrës zyrtare”, thuhet në njoftim.

Prokuroria Themelore në Ferizaj njofton se ndaj të pandehurve në këtë çështje penale, do të vazhdoj tutje me procedurat dhe veprimet e nevojshme ligjore.

Indeksi Global i Paqes e ngjit Zvicrën dy vende më lart, falë stabilitetit institucional, nivelit të ulët të kriminalitetit dhe sundimit të ligjit.

Zvicra është renditur si vendi i tretë më paqësor në botë për vitin 2026, sipas Indeksit Global të Paqes (Global Peace Index), një raport vjetor i përgatitur nga Instituti për Ekonomi dhe Paqe (Institute for Economics and Peace), transmeton albinfo.ch.

Raporti vlerëson 163 shtete në bazë të 23 treguesve, përfshirë nivelin e krimit të dhunshëm, sigurinë e brendshme, stabilitetin politik dhe përfshirjen në konflikte të armatosura.

Sipas renditjes së këtij viti, Islanda mban vendin e parë si shteti më paqësor në botë, e ndjekur nga Zelanda e Re, ndërsa Zvicra renditet në vendin e tretë, duke u ngjitur dy pozita krahasuar me vitin e kaluar.

Ekspertët vlerësojnë se pozita e lartë e Zvicrës nuk është rezultat i rastësisë, por i institucioneve të qëndrueshme, shkallës së ulët të kriminalitetit të dhunshëm, sundimit të fortë të ligjit dhe angazhimit minimal në konflikte ndërkombëtare.

Raporti thekson gjithashtu konceptin e “paqes pozitive”, që nënkupton krijimin e kushteve të qëndrueshme sociale dhe institucionale që garantojnë siguri dhe mirëqenie afatgjatë për qytetarët.

Këta faktorë kanë kontribuar që Gjeneva të shndërrohet në një nga qendrat më të rëndësishme diplomatike në botë, duke mirëpritur mbi 40 organizata ndërkombëtare dhe duke forcuar reputacionin e Zvicrës si një vend i besueshëm në arenën globale.

Renditja e këtij viti konfirmon edhe një herë pozitën e Zvicrës ndër vendet më të sigurta dhe më stabile në botë./Albinfo.ch

Kryetari i Skenderajt Sami Lushtaku ka deklaruar se nëse PDK arrin marrëveshje bashkëpunimi me LVV-në ai jep dorëheqje nga pozita e kryetarit të degës në Skenderaj.

Lushtaku tha se PDK nuk do duhej të bashkëpunonte me një subjekt politik që gjuhën helmuese dhe degraduese e ka në rend të parë.

“Nëse Partia Demokratike e Kosovës arrin marrëveshje ose lidhë koalicion me LVV-në unë automatikisht jap dorëheqje nga pozita e kryetarit të degës në Skenderaj. Ata e dijnë ma mirë janë kryesia e partisë por për mua është e pa pranueshme bashkëpunimi me një subjekt politik që gjuhën helmuese e ka në rend të parë…”. /rtv21

Kompania Rajonale e Ujësjellësit “Prishtina” ka bërë thirrje urgjente për qytetarët që të përdorin ujin e pijshëm në mënyrë sa më racionale, për shkak të rritjes së konsumit dhe nevojës për sigurimin e furnizimit të qëndrueshëm.

Sipas njoftimit, qytetarët kërkohet të shmangin përdorimin e ujit të pijshëm për larjen e automjeteve, ujitjen e sipërfaqeve të mëdha gjelbëruese dhe bujqësore gjatë orëve të pikut, si dhe mbushjen e pishinave apo përdorime të tjera jo thelbësore.

Nga kompania theksohet se kursimi i ujit është përgjegjësi e përbashkët dhe ndihmon në garantimin e furnizimit të rregullt për të gjithë konsumatorët.

Gjithashtu, theksohet se ndërtesat shumëkatëshe të ndërtuara në 20 vitet e fundit duhet të kenë të instaluara pompa të brendshme, në mënyrë që uji të arrijë në katet e larta, duke respektuar standardin e shtypjes minimale prej 1.5 bar.

Prokuroria Themelore në Prishtinë ka dalë me njoftim për plagosjen e mbrëmshme në rrugën ‘’Feriz Guri’’ në Prishtinë ku pati të shtëna me armë zjarri, si pasojë e të cilave një person ka pësuar lëndime trupore dhe është dërguar për tretman mjekësor në Qendrën Klinike Universitare të Kosovës.

Menjëherë pas pranimit të informatës nga Policia e Kosovës, Prokuroria tha se prokurori kujdestar nga Departamenti për Krime të Rënda, së bashku me njësitet përkatëse kanë ndërmarrë të gjitha masat dhe veprimet e nevojshme hetimore, si dhe sigurimin e provave materiale në vendin e ngjarjes.

“Gjatë veprimeve hetimore të ndërmarra deri më tani, dyshohet se personi me inicialet N.B., ka kryer veprën penale ‘’Vrasje në tentativë’’, nga neni 172 lidhur me nenin 28 të Kodit Penal të Republikës së Kosovës. Po ashtu, me urdhër të Prokurorit të Shtetit, është kryer bastisja nga Policia e Kosovës, ku aty është gjetur një armë e gjatë, shtatë (7) gëzhoja dhe trembëdhjetë (13) fishekë, të cilat do të shërbejnë si prova materiale gjatë zhvillimit të procedurës hetimore”.

Ndërkohë, gjatë ekzaminimeve përkatëse, Prokuroria tha se nga njësitet relevante është konstatuar se në automjetin e viktimës, Sh.K. është gjetur dhe sekuestruar një armë dhe 12 fishekë.

“Prokuroria Themelore në Prishtinë, në koordinim të ngushtë me Policinë e Kosovës, është duke ndërmarrë të gjitha veprimet e nevojshme hetimore për zbardhjen e plotë të rrethanave të ngjarjes, si dhe arrestimin e personit të dyshuar për kryerjen e kësaj vepre penale”.

218 kuti, nga 223 sa janë të votave me postë, ose ndryshe, 97,76% , janë numëruar deri tani nga Komisioni Qendror i Zgjedhjeve. Siç njoftohet në faqen e KQZ’së, nga këto vota, Lëvizja Vetëvendosje radhitet partia e parë, e cila pasohet nga Lidhja Demokratike e Kosovës, më pas nga Partia Demokratike e Kosovës, dhe Aleanca për Ardhmërinë e Kosovës.

Nga rezultatet aktuale, vetëm nga ato me postë, VV’ja ka 73.08% ose 58,712 Vota; LDK’ja ka marrë 11.98% ose, 9,625 Vota; PDK’ja ka 8.25% ose, 6,630 Vota; dhe, AAK’ja ka 4.09% ose, 3,284 Vota.

Pos këtyre, tashmë KQZ ka nisur edhe me numërimin e votave me kusht, ku deri me tani, janë numëruar 28,85%. Nga këto të fundit, VV’ja ka 40.99% ose, 671 Vota; PDK’ja ka 24.62% ose 403 Vota; LDK’ja ka 14.84% ose, 243 Vota: AAK’ja ka 9.84% ose, 161 Vota.

Ndërkaq, pa numëruar dhe ku procesi ende s’ka filluar, janë votat e personave me nevoja të veçanta.

Ndryshe, nga rezultatet e përmbledhura, VV’ja deri më tani merr 53 mandate, PDK ka 22 ulëse, LDK 18 deputetë, dhe AAK’ja 7.

Një aksident tragjik trafiku i ka marrë jetën një të mituri në rrugën Carralevë–Komoran.

Viktima është një 17-vjeçar, i cili fillimisht kishte mbetur i lënduar rëndë si pasojë e aksidentit, por më pas nuk ka arritur t’u mbijetojë plagëve.

Pamjet e siguruara nga vendi i ngjarjes tregojnë një veturë të shkatërruar nga përplasja, ndërsa qytetarët kanë tentuar t’i ofrojnë ndihmën e parë të riut para mbërritjes së ekipeve emergjente.

Rasti është konfirmuar nga zëdhënësja e Policisë për rajonin e Prishtinës, Flora Ahmeti.

“Sot rreth orës 09:00, kemi pranuar informatën se në rrugën Carralevë–Komoran ka ndodhur një aksident trafiku me pasoja fatale. Në këtë aksident ka qenë i përfshirë një automjet”, ka deklaruar Ahmeti.

Ajo ka bërë të ditur se si pasojë e aksidentit, ngasësi i automjetit nuk ka arritur t’u mbijetojë plagëve.

“Si pasojë e aksidentit ngasësi i automjetit nuk ka arritë të përballojë plagët dhe i njëjti ka vdekur. Vdekja e viktimës (mashkull), i mitur, është konstatuar nga ekipi mjekësor në QKUK”, thuhet në konfirmimin e Policisë.

Njësitë policore kanë dalë në vendin e ngjarjes dhe po hetojnë rrethanat që çuan në këtë aksident fatal.

Komuna e Rahovecit e udhëhequr nga kryetari Smajl Latifi është komuna e parë në nivel vendi që ka bërë sigurimin shëndetësor për nxënësit parafillor.

Latifi ka theksuar se ky projekt është pjesë e zotimeve të programit qeverisës, me qëllim që fëmijëve t’u sigurohet mbulim i shpenzimeve eventuale shëndetësore gjatë qëndrimit në institucionet parashkollore.

“Unë e kam pas synim dhe e kam shpalos si pjesë thelbësore të programit qeverisës për këto 4 vite edhe sigurimin shëndetësor për fëmijët meqë ne nuk po arrijmë sepse nuk është edhe kompetencë e jona me realizu sigurim shëndetësor për të gjithë qytetarët sepse është kompetencë më të larta shtetërore, qeverisë, parlamentit, zbatimit të një ligji i cili ka ngelë. Ne kemi dashur që së paku fëmijëve t’iu sigurojmë dhe t’iu mbulojmë shpenzimet eventuale dhe t’i mbulojmë si komunë, kjo do të jetë së paku për 4 vite sa do të jem unë këtu”, ka thënë Latifi për IndeksOnline.

Nga ky projekt përfitojnë përafërsisht rreth 350 nxënës. Vlera e parashikuar e kësaj kontrate ka qenë 78,000 euro, ndërsa ajo është finalizuar në shumën prej 69,600 eurosh.

Një raport nga Komisioneri i Lartë i OKB-së për të Drejtat e Njeriut zbuloi se të paktën 58 shtete dhe territore ishin të mbushura me mina tokësore në vitin 2025.

“Është thellësisht shqetësuese që, pothuajse 30 vjet pas miratimit të Traktatit për Ndalimin e Minave Kundër Personelit, këto armë shpërthyese vazhdojnë të vrasin dhe plagosin njerëz, shpesh dekada pasi janë vendosur ”, tha Komisioneri i Lartë Volker Turk në një njoftim për shtyp.

“Është e nevojshme që të gjitha shtetet të angazhohen për t’i dhënë fund prodhimit, përdorimit dhe transferimit të këtyre armëve dhe për të intensifikuar bashkëpunimin për të hequr minat që janë vendosur tashmë”, shtoi ai.

Sipas këtij raporti, i cili bazohet në informacione nga agjencitë qeveritare, OJQ-të, organizatat humanitare dhe shoqëria civile, të paktën 1,945 persona u vranë dhe 4,325 u plagosën nga minat tokësore dhe mbetjet shpërthyese të luftës në vitin 2024.

Në njoftimin e saj, Fushata Ndërkombëtare për Ndalimin e Minave Kundër Personelit (ICBL) raporton më shumë se 5,000 vdekje dhe lëndime në vitin 2025 në 40 vende.

90% e viktimave janë civilë.

Midis vendeve të prekura nga minat tokësore janë Myanmari, Siria, Afganistani, Ukraina, Nigeria, Mali, Jemeni dhe Burkina Faso.

Komisioni Qendror i Zgjedhjeve ka bërë të ditur se në Qendrën e Numërimit dhe Rezultateve, ka nisur numërimi i votave me kusht.

Sipas përditësimeve të fundit në platformën e KQZ-së, deri më tani janë numëruar pesë nga 52 kutitë e vendndvotimeve.

Nga këto rezultate, VV renditet e para, Aleanca e dyta, e treta LDK dhe PDK e katërta.