Category: Lajme

Policia në Gjakovë, ka publikuar fotografinë e një personi që dyshohet të jetë i përfshirë në një rast të vjedhjes në Rahovec dhe ka kërkuar ndihmë nga qytetarët.

Sipas Policisë, i dyshuari ka vjedhur paratë e bamirësisë në një barnatore në qytetin e Rahovecit.

“Me datën 30.03.2024, në Stacionin Policor në Rahovec është raportuar rasti i vjedhjes së një kutie qelqi me para të destinuara për bamirësi, në një barnatore në qytetin e Rahovecit. Policia menjëherë ka filluar me veprime hetimore, me ç’rast edhe janë siguruar fotografi të personit të dyshuar.

Deri më tani nuk është arritur të bëhet identifikimi i tij, edhe përkundër angazhimeve të shumta hetimore.

Andaj, Policia e Kosovës kërkon nga qytetarët: kushdo që ka informacion për identitetin dhe vendndodhjen eventuale të të dyshuarit të paraqitur në fotografinë e bashkangjitur, të lajmërojnë Policinë e Kosovës, stacionin më të afërt policor, apo përmes aplikacionit digjital ‘’Lajmëro Policinë ‘’ dhe në numrat kujdestarë: 192 (pa pagesë) dhe 0390310482 (Drejtoria Rajonale e Policisë në Gjakovë)” – thuhet në njoftim.

Kryetari i Bordit të Zyrës së Rregullatorit të Energjisë (ZRrE), Ymer Fejzullahu, ka thënë se qytetarët serb në veri të vendit ende janë duke hezituar që t’i nënshkruajnë kontratat me kompaninë serbe, Elektrosever, raporton EO.

Fejzullahu është optimist se deri në fund të këtij viti, qytetarët serb do t’i përgjigjen këtij obligimi. Ndërsa, ka treguar edhe nga cilat tregje merret energjia gjë që është e kontraktuar nga Serbia. Ai ka thënë se kompania serbe, Elektrosever është duke kryer detyrimet në raport me KEDS-in dhe duke i paguar tarifat ZRrE-së.

“E kemi thënë edhe më herët se trendi nuk është si më thënë te pritjet tona. Kemi trend pozitiv në fakt një pjesë e madhe e konsumatorëve kanë nënshkruar kontratat me Elektroseverin por është mirë me u ritheksu se Elektroseveri është duke kryer detyrimet në raport me KEDS-in apo duke paguar tarifat nga ana e ZRrE-së sa i përket tarifave të shfrytëzimit të rrjetit të ASSh-së gjithashtu edhe tarifat e KOST-it apo tarifat e OST-së dhe OT-së që për ne si ZRrE konsiderojmë që është një hap tutje, një numër i madh i konsumatorëve ende janë duke rezistuar ose nuk janë duke i nënshkruar kontratat siç është e paraparë me legjislacioni në fuqi mirëpo pritjet tona janë që deri në fund të këtij viti edhe ata konsumatorë do fillojnë t’i nënshkruajnë kontratat me Elektroseverin dhe shpresojmë që nga viti i ardhshëm edhe ajo pjesë do të jetë 100 për qind si pjesa tjetër e Kosovës”.

“Ne e dimë se 100 për qind e asaj energjisë merret nga tregjet në regjion konkretisht shumica e informatave se energjia merret nga ana e tregut të Serbisë sipas të dhënave që i kemi e gjithë energjia kalohet pothuajse jo e gjitha përmes Malit të Zi dhe Kosovës, pra kjo energji është blerë dhe kontraktuar në tregun e Serbisë”, ka thënë Fejzullahu.

Kryetari i Kuvendit të Kosovës, Glauk Konjufca, ka thënë se të gjitha instancat shtetërore duhet t’i përmbahen të kushteve të kryeministrit Albin Kurti për dialogun. Kryeparlamentari nënvizoi se pa u dënuar kryerësit e sulmit terrorist në Banjskë s’mund të ketë paqe në rajon, derisa vuri në pah se qindra persona po përgatiten në Serbi për një sulm të sërishëm në Kosovë.

Konjufca pas takimit me homologen e saj nga Sllovenia, Urska Klakocar Zupançiq, tha se institucionet e Kosovës janë të përgatitura të përballen me çfarëdo sulmi apo provokimi që vjen nga Serbia. Në anën tjetër, kryeparlamentarja sllovene tha se çështjet ndërmjet Kosovës dhe Serbisë duhet të zgjidhen përmes dialogut, përndryshe mund të ndodhin gjëra sikurse në Ukrainë. Krahas kësaj, ajo theksoi nevojën që dialogu të përfundojë me njohje reciproke, ndërkaq shtoi se ndërmjetësi i dialogut duhet të jetë nga një vend që njeh sovranitetin e të dy vendeve.

“E para le të flasim për atë që është quajtur mosndëshkimi i marrëveshjes nga Serbia. Pikërisht për shkak të saj Serbia ka marrë pozicionin që nuk i zbaton klauzolat e kësaj marrëveshje që ne kemi arrit në Bruksel…Serbia mbi bazën e mosndëshkimit nuk po e zbaton atë. Zotëri Kurti fillimisht ka kërkuar që të sqarohet më së pari nënshkrimi. E dyta çështja e kryekriminelit Radoiçiq që ka marrë përgjegjësinë për sulmin në Banjskë ai ndodhet i lirë në Serbi dhe vepra po trajtohet nga shteti serb gati më i lehtë sikurse me pas bërë shkelje të trafikut… Dhe e treta, letra që ish kryeministrja Bërnabiq i ka dërguar institucioneve evropiane duke e zhvlerësuar marrëveshjen që është arritur në Bruksel…Çdo instancë pas qeverisë dhe formulimit të këtyre kushteve duhet të mbajë atë qëndrim”, tha ai.

Përkushtim të palëve në dialog kërkoi kryetarja e Kuvendit të Sllovenisë, Urska Klakocar Zupançiq,

“(Njohja reciproke)Kjo mund të ndihmojë nëse të dyja vendet e njohin njëra-tjetrën dhe të ketë reciprocitet në njohjen e tyre. Vendet fqinje mund të përpiqen që të ndikojnë këtu, ne dëshirojmë që të shohim se ndikimi ynë do të jetë pozitiv në këtë drejtim. Mendoj se kjo(njohja reciproke) do të ishte shumë e mirëseardhur për të dy vendet… Dyja vendet do të ketë vështirësi për të zgjidhur këtë pa ndihmën e të tjerëve, disa nga vendet kyçe të Bashkimit Evropian do t’iu ndihmojnë në këtë aspekt. Është e rëndësishme gjithashtu se vendet e treta të njohin sovranitetin e të dy vendeve, pasi të dyja vendet janë të njëjtin nivel. Nëse kemi vende të treta që nuk e njohin Kosovën atëherë kjo është e vështirë”, theksoi Zupançiq.

Duke konsideruar të domosdoshme që përgjegjësit e sulmit terrorist në Banjskë të dalin para drejtësisë kosovare, Konjufca tha se ka informacione të sakta se edhe një grup tjetër po përgatitet për sulm ndaj vendit.

“Nuk mund të flasim për fqinjësi të mirë dhe për paqe në rajon pa u dënuar dhe u vënë para drejtësisë kryesitë e këtij krimi (sulmit terrorist në Banjskë) dhe pa u adresuar përpjekjet e tilla destabilizuese…21:23 Institucionet tona kanë informacione të sakta se një grup tjetër prej qindra personash sërish po e bëjnë të njëjtën gjë në serbi, po ushtrojnë, po përgatiten për ndonjë sulm eventual që mund të përjetojmë. Por ne jemi gjithmonë të përgatitur dhe institucionet tona të sigurisë janë në vigjilencën më të lartë që të përballen me çfarëdo që na vjen ose sulm ose provokim nga ana e Serbisë”, tha Konjufca.

Ndërkaq, kryetarja e Kuvendit të Sllovenisë, Urska Klakocar Zupançiq, tha se është e domosdoshme që çështjet mes Kosovës dhe Serbisë të zgjidhen përmes dialogut, pasi përndryshe mund të ndodh sikurse lufta në Ukrainë.

“Vendimet e njëanshme nga ana e Serbisë që të zgjedhin se cilat klauzola të marrëveshjes të zbatojnë dhe cilat jo nuk shihen në sy të mirë nga komuniteti ndërkombëtarë, kur ne duhet t’i respektojmë të drejtat e të gjitha kombeve që jetojnë këtu. Si politikan neve na pëlqen që të flasim shumë për dialogun, ndonjëherë mund të duket si klishe, por nëse nuk i zgjidhim çështje përmes dialogut, atëherë mund të shohim gjëra të këqija sikurse në Ukrainë. Pasi nuk i kushtojmë vëmendje situatave të cilat mund të qojnë tek lufta. E kuptoj frustrimin në Kosovë, ne kemi marrëveshje të cilat nuk janë implementuar, sulmin terrorist ku ka marrë përgjegjësinë e plotë një person por nuk është i dënuar për këtë. Ka frustrim të madh është e kuptueshme dhe qartë. Dua të shoh që autoritetet e Serbisë të ndryshojnë këndvështrimin dhe të jenë më të hapur në bisedime”, tha ajo.

Në lidhje me rastin e Banjskës, kryetari i Kuvendit, Glauk Konjufca, tha se reagimi i zyrës së Borrell se Kosova s’ka dërguar asnjë raport ishte shokuese, pasi institucionet e vendit e kanë njoftuar BE-në për të gjitha detajet e sulmit të Banjskës.

“Në këtë rast unë kam parë se ata nuk është se kanë vepruar sipas standardeve më të larta evropiane. Preferencat e tyre private dhe individuale kanë pasur ndikim të madh në mënyrën sesi e kanë formësuar ata dialogun. Njëra prej konsekuencave më të mëdha të kësaj qasje ka qenë favorizimi i padiskutueshëm i Serbisë dhe vendosja e Kosovës në një pozicion të pafavorshëm….Reagimi i fundit që e pati zyra e BE-së dhe departamentit të Borrellit ishte shokuese që thoshte se Kosova s’ka dërguar asgjë për sulmin e Banjskës. Përkundrazi BE-ja dhe zyra e Borrellit i ka të gjitha detajet deri në hollësinë e fundit se çka ka qenë sulmi i Banjskës dhe si është kryer”, theksoi ajo.

Krahas këtyre, të dy homologët shprehën vullnetin për thellim të bashkëpunimit ndërmjet Kosovës dhe Sllovenisë.

Në vizitën e saj në Kosovë, kryetarja e Kuvendit të Sllovenisë, Urska Klakocar Zupançiq u prit në takim edhe nga presidentja Vjosa Osmani./kp

Bordi i Zyrës së Rregullatorit të Energjisë (ZRrE) të hënën ka miratuar kërkesën për Listën e Tarifave ALPEX sh.a për zonën e ofertimit të Republikës së Kosovës, si Operator i Emëruar i Tregut të Energjisë Elektrike (NEMO) që ndërlidhen me Tregun Ndërditorë, raporton EO.

Eksperti për tarifa dhe çështje rregullative, Muharrem Gashi, tha se ALPEX ka disa kërkesa për aktivitetin ditor.

“ALPEX ka disa kërkesa për aktivitetin ditor me shtu edhe tarifën ditore, shtimin e tarifës variabile për tregun ditorë, shtimin e tarifës të lirimit për tregun ditorë”, tha ai.

Tutje, shtoi se kanë edhe dy kërkesa tjera.

“Me ndryshu emërtimin e tarifës vjetore dhe provimit, me u bë pagesë njëherë nga tarifa vjetore që është në zbatim. ALPEX, ka volume të vogla tregtimi”, tha ai.

Aty u tha se ky vendim nuk ka ndikim tek tarifat e konsumatorëve.

Për vdekjen e shkrimtarit Ismail Kadare ka shkruar edhe kryetari i PDK-së, Memli Krasniqi.

Krasniqi, ka thënë se Ismail Kadare ishte gjigant i letrave shqipe.

Sipas tij, Kadare ishte më shumë se një shkrimtar.

“Ismail Kadare ishte më shumë se një shkrimtar; ai ishte mishërimi i krenarisë shqiptare, fanar i identitetit tonë kombëtar dhe kampion i trashëgimisë sonë letrare dhe kulturore. Prehu në paqe i dashur Ismail Kadare. Fjalët tuaja do të tingëllojnë përgjithmonë në zemrat tona dhe trashëgimia juaj do të vazhdojë të frymëzojë brezat që do të vijnë”, ka shkruar Krasniqi.

Postimi i tij i plotë:

Lamtumirë, Gjenerali i letrave shqipe!

Gjatë jetës, ndonjëherë mendojmë se disa nga personalitetet të cilat na kanë frymëzuar dhe që me veprimtarinë e tyre jemi rritur e formësuar – do t’i kemi pranë përgjithmonë. Megjithatë, ja që vdekja është e pamëshirshme dhe troket në derën e secilit – edhe të gjigantëve.

Ismail Kadare, me një stil krejt të veçantë dhe origjinal, ishte një gjigant i letrave shqipe. Një personalitet dhe një zë i cili përgjatë jetës së tij i bëri jehonë thellësive të historisë, kulturës dhe vetë shpirtit tonë njerëzor.

Kadareja, mendja brilante pas veprave të përjetshme si “Kronikë në gur”, “Gjenerali i ushtrisë së vdekur”, “Prilli i thyer” dhe dhjetëra veprave të tjera, ka lënë gjurmë të pashlyeshme në të gjithë botën letrare.

Shkronjat dhe fjalët e tij thurën mozaikun e ndërlikuar të shqiptarëve, duke sjellë në jetë betejat tona, triumfet tona dhe shpirtin tonë të palëkundur.

Megjithatë, duke na e thyer edhe korrikun, Gjeneralin e letrave shqipe vdekja na e mori vetëm fizikisht. Ai, nëpërmjet rrëfimeve dhe veprave që la mbrapa, ka kapërcyer hendekun e kohës dhe fizikes, duke i takuar barasvlefshëm dhe përjetësisht të shkuarës, të tashmes dhe të ardhmes tonë.

Ismail Kadare ishte më shumë se një shkrimtar; ai ishte mishërimi i krenarisë shqiptare, fanar i identitetit tonë kombëtar dhe kampion i trashëgimisë sonë letrare dhe kulturore.

Prehu në paqe i dashur Ismail Kadare. Fjalët tuaja do të tingëllojnë përgjithmonë në zemrat tona dhe trashëgimia juaj do të vazhdojë të frymëzojë brezat që do të vijnë.

Faleminderit që na dhatë dhuratën e tregimit tuaj të jashtëzakonshëm. Do të na mungosh thellësisht, por nuk do të harrojmë kurrë. 🌹

Kadeti i Forcës së Sigurisë së Kosovës Shaban Shehu ka diplomuar në Akademinë e Mbrojtjes kroate.

Kjo, është bërë e ditur përmes një postimi në faqen zyrtare të FSK-së, në rrjetin social Facebook.

Shehu, do të vazhdojë edhe studimin master në Kroaci, kurse pas përfundimit do t`i bashkohet Forcës së Sigurisë së Kosovë

“Kadet Shaban Shehu pas katër vite studimi në Akademinë e Mbrojtjes kroate ka përfunduar me sukses të shkëlqyer akademinë dhe ka marr gradën nëntoger, dhe për shkak të rezultateve të larta gjatë studimit ai do të vazhdoi edhe studimin master, pas përfundimit do t`i bashkohet Forcës së Sigurisë së Kosovë për të dhënë kontributin e tij në ngritjen dhe avancimin dhe për të shpërndarë njohurit tek ushtarakët e FSK-së”, thuhet në njoftim.

Një ngjarje e trishtë ka ndodhur mëngjesin e së dielës në Podujevë, ku dy gra janë arrestuar nën dyshimet se janë përfshirë në vrasje të një foshnje gjatë lindjes. Gruaja shtatzënë është njëra nga të arrestuarat e cila dyshohet se ka kryer abort të kundërligjshëm dhe më pas ka kërkuar ndihmë në Qendrën Klinike Universitare të Kosovës.

Sinjali ka mësuar me burime se dy të arrestuarat janë nënë e bijë, të cilat po dyshohen se janë përfshirë në këtë rast tronditës.

Burimet kanë bërë me dije se vajza 19-vjeçare në bashkëkryerje me nënën e saj, pasi e ka lindur foshnjën në banjon e shtëpisë derisa ka qenë rreth 7-muajshe – dyshohen se e kanë hedhur në tualet.

Për rastin kanë folur edhe nga Prokuroria Themelore në Prishtinë për Klankosova.tv ku kanë kërkuar ndalimin e të dyjave grave.

Dhjetëra regjistrues të angazhuar në procesin e regjistrimit të popullsisë, kanë protestuar të hënën para Agjencisë së Statistikave të Kosovës, të cilët shprehën ankesat e tyre rreth pagesave për periudhën e angazhimit për punën në terren, raporton EO.

Ata pretendojnë që ASK-ja nuk e respektoi kontratën me ta, ndërsa përfaqësuesit e protestuesve zhvilluan edhe një takim me përfaqësuesit të ASK, të cilët ju premtuam se do të gjejnë zgjidhje për këtë çështje.

Përfaqësuesja e protestuesve, Lirie Aliu, ka thënë janë të pa kënaqur me pagë që u janë dalë dhe se sipas saj janë 200 regjistrues që kanë pasur problemin e tillë.

Ajo ka thënë se ne takim me përfaqësues të ASK-së u është premtuar se do të zgjidhin këtë problem, teksa kanë paralajmëruar edhe protesta tjera nëse nuk gjejnë zgjidhje.

“Arsyeja pse sot jemi këtu është se jemi të pakënaqur me pagat që na u janë servuar. Pas bisedës e sipër me Yll Shalën, erdhëm në një konkludim që është formuar një komision që kanë me u rishiku prej A deri në ZH të gjitha ankesat që janë bërë në rast se ka pasur diçka parregullsi në bazë të pagesave që është dashur që të bëhen. Na dhanë fjalën që shumë shpejt kanë me u shqyrtua ato dhe çka ka pasur gabime paret do të dalin në konto. Para dy dire është krijuar një grup i ankesave që ka arritur afër 200 që janë te pakënaqur, ka edhe të tjerë që ende nuk kanë marr informata”, ka thënë Aliu.

Ylli Shala menaxher i projektit të regjistrimit, ka thënë se në lidhje me këtë çështje është krijuar një komision i cili është duke i shqyrtuar të gjitha ankesat.

“E vërejta këtë pakënaqësi përmes mediave po menjëherë kemi intervenuar e kemi formuar komisionin i cili është duke i shqyrtuar të gjitha ankesat e regjistruesve dhe gjitha pagesat që janë bërë. E kemi edhe një pjesë të stafit që nuk është paguar, jemi në proces që sot ose nesër finalizohen edhe ato. Ne si ASK e kemi bërë një kontratë me regjistrues dhe mbrapa asaj kontrate qëndrojmë dhe çka do që del jemi të gatshme që me paguar pa kurrfarë problemi”, ka thënë ai.

Në lidhje me këtë ASK-ja sot ka njoftuar të gjithë regjistruesit e angazhuar gjatë Regjistrimit të Popullsisë (ReKos2024) se ka formuar një Komision që do të merret me shqyrtimin e të gjitha ankesave rreth pagesave për periudhën e angazhimit për punën në terren.

Sipas njoftimit, meqenëse ASK-ja ka pranuar disa ankesa rreth mënyrës së pagesave, Komisioni do të merret me verifikimin në sistem të secilit regjistrues dhe pyetësorëve të aprovuar nga sistemi, në mënyrë që të vërtetohet ndonjë lëshim teknik që ka mund të ndodhë.

“Në bazë të ankesave të pranuara deri më tani, shihet se ka një keqkuptim nga regjistruesit rreth mënyrës së kompensimit ndërmjet pagës bruto dhe neto, mënyrës së përllogaritjes së pyetësorëve të plotësuar, si dhe në disa raste për ato intervista që sistemi i ka klasifikuar si intervista jo të rregullta. Sidoqoftë, ASK-ja do të veprojë sipas të gjitha procedurave dhe në bazë kontratës. Nëse verifikohet ndonjë lëshim teknik eventual, kompensimi i mjeteve do të kryhet menjëherë. Të gjitha ankesat mund të parashtrohen te Departamenti i Administratës së ASK-së në email: [email protected]”, thuhet në njoftim.