Category: Lajme

Përplasje e pakënaqësi patën anëtarët e Bordit të Ndërmarrjes Publike të Operatorit të Sistemit, Transmisionit dhe Tregut (KOSTT) me kryeshefin e këtij institucioni, Evatar Zeqiri. Ky i fundit, akuzoi Bordin rreth tendencave për interferime, raporton Ekonomia Online.

Gjatë shqyrtimit të raportit vjetor të KOSTT-it në Komisionin për Ekonomi, Industri, Ndërmarrësi dhe Tregti, kryeshefi i KOSTT-it, Evatar Zeqiri, ka thënë se kohëve të fundit pjesën kryesore të punës është dashur të merret me dy anëtarët e Bordit, Ajrina Gashin dhe Nebih Zariqin, pasi sipas tij, janë marrë më shumë me prokurorim sesa vetë ai.

“Muajt e fundit ka pas tendenca për interferime nga anëtarët e Bordit. Këtu kem anëtarët të cilët janë marrë më shumë më prokurim sesa unë… ka raste të tilla individuale. Zonja Gashi dhe zotëri Zariqi kanë kërku që me raportu zyrtari i prokurimit. Përgjegjësitë janë individuale mirëpo llogaridhënia mbetet të kryeshefi. Kohëve të fundit është bërë e pamundshme me punu prej tyre. Pjesën kryesore të punës m’u ka dasht me u marrë me dy anëtarë të Bordit. Nuk e kam njoftuar Kuvendin se kam mendu që këto çështje mund të zgjidhen dhe janë kalimtare. Unë kam marrë vlerësimin 2-sh. Dosjet e prokurorimit janë në platformë. As unë s’kam qasje. Informatat që janë publike janë publike, ‘filet’ nuk janë publike. Kam pas probleme edhe me staf. Janë marrë me çështje që s’janë të Bordit, por të memaxhmentit. Nuk mundet dikush me konstatu shkelje përderisa janë institucionet kompetente”, ka thënë Zeqiri.

Anëtarja e Bordit, Ajrina Gashi, ka thënë se asnjëherë nuk i ka penguar në punë kryeshefit. Për këtë, tha se është e gatshme të japë përgjegjësi.

“Nuk e mohoj që kam kërku raporte që janë të incizuara. Në fillim të vitit 2024 një anëtar i bordit e ngrit një çështje për transformatorin… Edhe kur kemi kërku raport për të ka qenë procesi i mbyllur… kompania ‘Madkos’ na ka paditë. Po më vjen shumë keq nga kryeshefi. Unë e kam përkrah kryeshefin në çdo sferë. Asnjëherë të vetme kryeshefit ekzekutiv nuk i kam shku në zyre me i pengu gjatë punës. Nëse kam kërku diçka jashtë ligjit, jam e gatshme me dhanë përgjegjësi para cilitdo organ shqyrtues ose ligjor”, ka thënë ajo.

E anëtari tjetër i Bordit, Nebih Zariqi, ka thënë se kohëve të fundit kryeshefi i KOSTT-it e ka luajtur rolin “kinse bordi është jo-ekzistent”.

“Ia kemi dhanë përkrahjen maksimale, çdo moment që e ka kërku, çdo rregullore që e ka pru. Kohën e fundit në mënyrë shumë të ashpër ka nis me lu një rol gati se Bordi është jo-ekzistent. Me kënaqësinë më të madhe e kemi votu këtë djalë që është këtu.  Nuk kemi intervenu në fazën e prokurimit”, ka deklaruar Zariqi.

E anëtari tjetër i KOSTT-it, Jeton Mehmeti, ka thënë se kanë pas standarde të larta profesionale dhe ka pas probleme të brendshme, qysh në javën e parë. Sipas tij, e kanë pasur të vështirë me i respektu standardet për faktin e problemeve të brendshme.

“KOSTT-i ka arrit të mbajë mirëkuptimin me mekanizma kombëtarë dhe ndërkombëtare, në periudhë të krizave është formuar komunitetin që ka marrë vendime. Probleme që nga lufta në Ukrainë. Me përkushtim maksimal, vërejmë rezultate pozitive, në aspektin e bilancit”, ka thënë Mehmeti.

“Kemi ç’bllokuar projekt kapitalet që kanë qene pezull për vite më radhë, ka hy në fuqi marrëveshja, filloi operimin e pavarur në kuadër të bllokut Shqipëri- Kosovë. U themelua bursa shqiptare për të dyja vendet Kosovë -Shqipëri, për 236 milionë dollarë do të rezultohet projekti për formimin e baterive për energji. Në aspektin e tregut, ka pas iniciativa të ndryshme, nënshkruhet kontrata për projekte që janë në fazën përfundimtare, ndërtimi i nënstacionit në Ferizaj”, ka shtuar ai.

Deputeti i PDK-së, Ferat Shala, iu drejtua Mehmetit se ka thënë atë çka ka qenë e ditur.

“E shfrytëzove me na tregu për ato çka i kemi degjuar dhe i kemi ditë. Për hir të korrektësisë për këtë nuk të kemi thirr”, ka thënë Shala.

Deputetja nga Lidhja Demokratike e Kosovës, Valentina Bunjaku, pyeti së sa ka qenë buxheti i planifikuar për vitin 2023 dhe sa është shpenzuar ai buxhet, si dhe sa kanë qenë projektet dhe sa prej tyre janë realizuar.

Kryeshefi ekzekutiv, Evatar Zeqiri, tha se buxheti i KOSTT-it, në total ka qenë 92 milionë euro, ndërsa është shpenzuar 28,5 milionë euro.

Anëtarja e Bordit, Ajrina Gashi, u shpreh se kur e  kanë kërkuar raportin procesi ka qenë i mbyllur.

“Kemi rastin me operatorë ekonomik që ka bë lëshim të energjisë pa e ditë dhe kjo ka ndodh një vit. Kompania Adkos na ka padit, ne nuk kemi pas asnjë informatë. Nëse kam kërkuar diçka jashtë ligji dhe kodit të qeverisë jam e gatshme me dhënë përgjegjësi para çdo organi të drejtësisë”, ka thënë ajo.

“Kam kërkuar me mirësjellje se ku janë projektet e KOST-it,  ku është zbatimi i tyre kam tri e-maila se nuk përputhen ndryshojnë datat elementet, nuk kam lyp jashtë asaj çka ma lejon ligji, nuk ka shkelë këmba e saj vetëm se ku e kam sallën e them me përgjegjësi këtë”, ka thënë Gashi.

Kryeministri Albin Kurti ka uruar homologun e tij të ri britanik, Keir Starmer, për fitoren në zgjedhje dhe postin e ri.

“Urime për Keir Starmer Partisë Laburiste për fitoren dërrmuese historike mbrëmjen e djeshme. Ju dëshirojmë gjithë të mirat në udhëheqjen e vendit dhe mezi presim për bashkëpunim”, ka shkruar Kurti në X.

Osmani uron Starmerin për fitoren në zgjedhjet në Britani

Njësitet Antikontrabandë të Doganës së Kosovës, kanë gjetur 130 paketime të barnave në një barnatore në Prishtinë të cilat janë kontrabanduar në Kosovë.

Sipas njoftimit të Doganës, informata është dhënë nga qytetarët se në një barnatore gjenden barna pa banderola.

Paketimet e barnave sipas doganës kanë qenë me banderola të shteteve të huaja, të cilat janë kontrabanduar në Kosovë.

“Malli i kontrabanduar është sekuestruar dhe ndaj palës është iniciuar procedura kundërvajtëse”, thuhet në njoftim.

Komisioni Qendror i Zgjedhjeve në Shqipëri ka njoftuar sot se ia ka hequr Alfred Belerit mandatin e kryetarit të zgjedhur të Himarës, pasi Gjykata e Apelit e mbajti në fuqi dënimin e tij me burgim muajin e kaluar.

Beleri u arrestua pak ditë para zgjedhjeve nën dyshimet për blerje votash dhe u dënua me dy vjet burgim në mars.

Apeli e konfirmoi dënimin e tij në qershor.

“Jemi në kushtet e humbjes së mandatit të kryetarit të Bashkisë Himarë, dhe e shpallim të pavlefshëm këtë mandat”, tha të premten Ilirjan Celibashi, kreu i KQZ-së.

Beleri, me shtetësi shqiptare dhe greke, i fitoi zgjedhjet e majit 2023 si kandidat i opozitës për kryetar të Bashkisë së Himarës – qytet i banuar edhe me popullsi greke në jug të Shqipërisë.

Ai ishte i pranishëm në seancën që u zhvillua në Komisionin Qendror të Zgjedhjeve të premten dhe u përcoll nga forcat e policisë nga burgu i Fierit, ku po e vuan dënimin.

Ambasadori amerikan, Jeff Hovenier, ka lavdëruar “pasionin e kosovarëve” për të festuar 4 Korrikun, ditën e pavarësisë së Shteteve të Bashkuara të Amerikës.

Ai tha se për këtë ndihet “thellësisht i nderuar”.

“Jam i kënaqur që ndoqa dhe mora pjesë në shumë festime dje në Prishtinë të organizuara për nder të pavarësisë së SHBA-së. Pasioni i kosovarëve për t’u bashkuar me ne në festimin e Ditës së Pavarësisë Amerikane është unik, dhe për këtë jam thellësisht i nderuar. Gëzuar 4 Korriku, të gjithëve!”, ka shkruar Hovenier.

Kryetari i Lidhjes Demokratike të Kosovës, Lumir Abdixhiku, ka pritur në takim të dërguarin e posaçëm të Sllovenisë për Ballkanin Perëndimor, Anžej Frangeš.

Në njoftimin e lëshuar nga LDK thuhet se Abdixhiku dhe Franges kanë diskutuar për situatën aktuale politike në vend dhe qëndrimin e Lidhjes Demokratike lidhur me këto ngjarje.

“Gjithashtu u diskutua edhe lidhur me mundësitë e bashkëpunimit dhe thellimit të raporteve mes Kosovës dhe Sllovenisë, vend ky i cili ka ndihmuar Kosovës në proceset shtet-ndërtuese dhe zhvillimore të saj”, thuhet në njoftim.

Presidentja e Kosovës, Vjosa Osmani, ka uruar liderin e Partisë Laburiste, tashmë kryeministër i ri, Keir Starmer pas fitores së zgjedhjeve në Britani.

Ajo ka shprehur bindjen se Mbretëria e Bashkuar dhe Kosova do të vazhdojnë të punojnë së bashku në forcimin e lidhjeve të tyre.

“Urime të përzemërta për Keir Starmer në fitoren tuaj historike në zgjedhje. Mbretëria e Bashkuar ka një vend të veçantë në zemrat e të gjithë kosovarëve dhe jam i bindur se së bashku, ne do të punojmë ngushtë për të forcuar aleancën tonë të gjatë. Ju uroj suksese kur merrni këtë rol të rëndësishëm”, ka shkruar presidentja e Kosovës, Vjosa Osmani në platformën X.

Partia Laburiste ka arritur fitore bindëse në zgjedhjet parlamentare në Britani të Madhe të premten, duke i dhënë fund qeverisjes 14-vjeçare nga Partia Konservatore.

Mbretëria e Bashkuar tashmë ka një kryeministër të ri, Keir Starmer i Partisë Laburiste, i cili i është drejtuar turmave në qendër të Londrës pas fitores historike në zgjedhjet parlamentare.

Me një entuziazëm të dukshëm, Starmer deklaroi se “ndryshimi fillon tani”, duke falënderuar të gjithë ata që kontribuan në fitoren e laburistëve.

“Ju keni bërë fushatë për të, keni luftuar për të dhe tani ajo ka ardhur”, ka thënë Starmer, duke theksuar se mandati i ri i Laburistëve sjell edhe një “përgjegjësi më të madhe”, raporton BBC.

Rezultatet paraprake tregojnë se laburistët vazhdojnë të fitojnë vende në të gjithë Mbretërinë e Bashkuar, ndërsa Partia Konservatore po përjeton një nga rezultatet më të dobëta në histori, me tetë ministra që kanë humbur pozitat e tyre.

Ish-sekretari i Punëve të Jashtme dhe Diasporë, Behar Isma, ka bërë fajtor ish-ministrin Enver Hoxhaj për punësimet e disa diplomatëve në vitin 2011. Sipas tij, Këshilli i Pavarur Mbikëqyrës ka konstatuar se ata nuk janë pranuar në bazë të ligjit për shërbimet e jashtme dhe ligjit për shërbimin civil, raporton Ekonomia Online.

Ai këto deklarata i bëri në Komisioni Hetimor Parlamentar lidhur me nivelin e menaxhimit të marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës.

E këto deklarata të ish-sekretarit të MPJD-së përplasen deputet e pozitës me atë të PDK-së, Ariana Musliu-Shoshi.

Deputeti i VV-së Haxhi Avdyli, ka pyetur Isman në lidhje me konkursin e hapur në vitin 2011, e që në vitin 2022 ish-sekretari Isma me një vendim të tij i kishte larguar nga puna këta të fundit.

“Ky komision është ngrit edhe për tërheqjen e disa diplomatëve që janë bërë në vitin 2022, dhe arsyeja gati gjithë kësaj ka qenë ky komision të themelohet, pse keni tërheq disa diplomatë në vitin 2022 të cilët janë emëruar në vitin 2011, kush e ka mundësuar pranimin e tyre, me çfarë ligji janë pranuar, dhe a ka dhënë ndonjë vendim këshilli i pavarur mbikëqyrës i shërbyesve civil rreth kësaj tërheqje, dhe në bazë të asaj a është konstatuar ndonjë shkelje. Rreth këtyre tërheqjeve ka pas pluhur shumë. Kur janë emëruar këta a kanë pas garanci se këta do të kthehen pas mbarimit të misionit në MPJ. A keni ndërmarrë hapa konkret për këtë konkurs të vitit 2011, se e di që keni marrë hapa, por duke ditë se këtu ka shkelje të renda të ligjit a e keni drejtuar edhe këtë në prokurori, nëse po, a keni marrë përgjigje rreth emërimit të këtyre diplomateve që edhe pas një kohë të gjatë kanë marrë pagesa, si janë rregulluar ato. Sepse kjo shkelje është bazë për një hetim më të madh, a keni pas guximin që për atë periudhë t’i adresoni në prokurori ketë konkurs”, ka pyetur Haxhiu.

Ish-sekretari Isma tha se në bazë të Këshillit të Pavarur Mbikëqyrës ka konstatuar se të gjitha këto emërime janë kundërligjore.

“Përmes procedurave të këtij konkursi del se janë propozuar disa kandidatë të cilët janë jashtë dispozitës ligjore, ministri i asaj kohe kishte përzgjedhur persona konkret të cilëve u ka lëshuar vendim për t’i dërguar në misione diplomatike. Përzgjedhja e tyre dhe vendimi i lëshuar për ta është bërë sipas praktikës së ngjashme me atë që bëhen emërime dhe angazhime të emëruarve politik. Vendimi për angazhimin e tyre në mision, duke pas si referencë atë konkurs, përmban vendimin, gradën, misionin, si dhe pagën në të njëjtën vendim. Se ky konkurs dhe kjo procedurë e dërgimit të emëruarve  politik me vendim të ministrit nuk ka qenë as për së afërmi në përputhje me legjislacionin në fuqi për shërbyesit civil të cilët edhe e ka bërë vlerësimin Këshilli i Pavarur Mbikëqyrës për shërbimin civil ndër disa vendime të tij. Me rastin e kthimit nga misioni i tyre një pjesë e tyre janë sistemuar në Ministri dhe kanë udhëhequr me departament. Edhe Këshilli e konfirmon se këta nuk janë pranuar më bazë të ligjit për shërbimet e jashtme dhe ligjit për shërbimin civil. Këshilli i Pavarur Mbikëqyrës ka vlerësuar si kundërligjore këto sisteme edhe në shumë raste”, ka thënë ai.

Deputetja e VV-së Fitore Pacolli, ka pyetur ish-sekretarin se a ka pasur shkelje në emërimin e këtyre pozitave në atë vit.

“A ka pasur shkelje të rëndë të ligjit në emërimin e këtyre pozitave”, ka pyetur ajo.

Ish-sekretari Isma ka thënë se këto janë edhe konstatimet të Këshillit.

“Për hir të vërtetës së këtyre fajeve që po i them, janë vendimet e Këshillit për të cilat emra nuk jam i interesuar të jap. Këto janë tre vendimet të Këshillit të Pavarur Mbikëqyrës, tre vendime me numra të ndryshme që i referohen ankesave që zyrtarët në mënyrë të kundërligjshme janë avancuar kanë bërë në Këshill dhe për të cilat Këshilli i ka refuzuar të triat dhe ka konfirmuar ligjshmërinë e vendimeve të cilat unë i kam marr”, ka thënë ai.

Deputetja Pacolli ka pyetur se cili ministër ka qenë në atë kohë kur kanë ndodhur këto emërime.

“A mund të na tregoni se gjatë periudhës që kanë ndodhur shkeljet cila ministra  kanë qenë në krye të ministrisë”, ka pyetur ajo

Ish-sekretari Isma ka thënë se ministër në atë kohë kur kanë ndodhur këto punësime ka qenë Enver Hoxhaj.

“Ministër ka qenë i opozitës së tanishme i koleges deputet këtu, Enver Hoxhaj, në përudhen më të gjatë të gjithë këtyre emërimeve edhe sigurisht ministrave të tjerë. Një pjesë e këtyre vendime ka ndodhur edhe në periudha të tjera”, ka thënë ai.

E pas këtyre deklaratave pati përplasjes mes deputetëve të VV-së dhe deputetes së PDK-së, Ariana Musliu-Shoshi.

Musliu Shoshi ka thënë se ish-sekretari nuk duhet të jep konstatime në lidhje me këtë rast, pasi sipas saj, kjo çështje është në gjykatë.

“Rasti është në gjykatë për të cilën ti nuk ke kompetencë, rasti është në gjykata, gjykata jep verdiktin final. Nuk je personi kompetentë me jep konkluza të tilla me i shku ministra që kanë qenë”, ka thënë ajo.

Kryetarja e Komisionit, Time Kadrijaj, ka pyetur se a ka qenë në bazë të ligjit pozita që ai ka pasur.

“Është ftuar në cilësinë e dëshmitarit ish-sekretarin e MPJD-së, Behar Isma. Për të sqaruar sjelljen tënd dhe raportit tënd në cilin vit je pranuar dhe në çfarë pozitë je pranuar. A është konform ligjit pozicioni yt. A është me ligj mbajtja e pozicionit ushtrues detyre për dy vite. Ju si jurist, ku mbështete ligjërisht avancimi juaja me rritjen e koeficienete mbi 100 për qind. Ku bazohen ligjërisht gradat ju që i keni dhënë dhe pesë gradat tuaja që i keni marr në prill të këtij viti”, ka thënë ajo.

Ish-sekretari Isma tha se pozitën e U.D e ka mbajtur sipas ligjit dhe rregullave.

Ai ka thënë se edhe për gradimet nuk ka pasur kapërcim të ligjit dhe rregullores për shërbimin e jashtëm.

“Çështja e avancimit tim dhe pozicionimi që mbaj. Në bazë të rregullores ne fakt, vendimin e qeverisë, për themelimin e akademisë diplomatikë në kuadër të MPJD, është në diskrecion të ministrit të vlerësoje dhe caktojë drejtor të akademisë. Ndërkaq prej atij pozicioni më 10 janar të vitit 2022 jam caktuar si UD i sekretarit të përgjithshëm i MPJD. Vlerësimi im është që kjo pozitë është mbajtur konform ligjit dhe rregullave. Sa i përket çështjes së gradave, janë të rregulluara me rregulloren për  shërbimin e jashtëm dhe vlerësoj se sipas këtij ligji dhe kësaj rregullore, nuk ka asnjë kufizim në përcaktimin e gradës së parë të diplomatëve që janë të punësuar në MOJD, dhe vlerësoj se cdo gjë ka qenë konform rregullave”, tha Isma.

Ndërkaq Ish-sekretari Isma ka folur edhe për gjendjen në të cilën e ka gjendur ministrinë kur marrë pozicionin në vitin 2022.

“Është shumë me rëndësi të potencojmë gjendjen që kam gjet ministrinë në vitin 2022 kur kam marrë detyrën e kemi pas me mungesë të raportimeve, në mungesë të rregullsive sa i përket regjistrimit të pasurisë l, raportimeve lidhur me shpenzimet e misioneve si avanse që kanë arritur në vlerën 2.2 milion dhe vetëm për dy vite këtë vlerë e kemi kthyer në vlerë simbolike 18 mijë euro dhe kemi mbyllur  gjitha këto obligime”, ka thënë ai.

Gjykata e ka aprovuar kërkesën e Prokurorisë për vazhdimin e masës së paraburgimit ndaj dy të dyshuarve për spiunazh – Bedri Shabani dhe Muharrem Qerimi”, të cilët ishin arrestuar në fillim të muajit qershor.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve B.Sh dhe M.Q, Gjykata Themelore në Prishtinë – Departamenti Special me datë 05.07.2024  ka marr Aktvendim dhe ka aprovuar kërkesën e Prokurorisë Speciale të Republikës së Kosovës, ashtu që masa e paraburgimit dy të pandehurve iu është vazhduar në kohëzgjatje prej 2 (dy) muaj”, thuhet në përgjigjen e Gjykatës Themelore në Prishtinë për “Betimi për Drejtësi”.

Bedri Shabani bashkë me Qerimin ishin arrestuar nën dyshimin se janë marrë me aktivitete të spiunazhit.

Sipas PSRK-së, dy të pandehurit dyshohen se kanë kryer veprën penale “Spiunazhi” nga neni 124, par. 3 të Kodit Penal, ndërkaq i pandehuri M.Q. ka kryer edhe veprën tjetër penale “Mbajtja në pronësi, kontroll ose posedim të paautorizuar të armëve” nga neni 366, par.1 të Kodit Penal, si dhe ekziston dyshimi se të pandehurit kishin për t’i kryer veprat penale për të cilat dyshohen.

Ndryshe, Prokuroria Speciale e Kosovës e Republikës së Kosovës (PSRK) kishte njoftuar se pas zhvillimit të hetimeve disamujore, në bashkëpunim me Policinë e Kosovës dhe Agjencinë e Kosovës për Inteligjencë (AKI), ka zhvilluar bastisje në dy lokacione të Kosovës dhe ka arrestuar dy persona me nënshtetësi kosovare, B.Sh dhe M.Q., të dyshuar për kryerjen e veprës penale “Spiunazhi”.

Policia e Kosovës (PK) përmes raportit 24 orësh, ka bërë të ditur se në shtëpitë e dy të dyshuarve që u arrestuan të mërkurën për spiunazh, u gjetën dhe sekuestruan dokumente të ndryshme, kompjuter, telefona, USB, DVR, kaseta, armë, municione, maska, gasmaska ushtarake dhe shumë dëshmi të tjera.

Sipas Policisë, arrestimi i të dyshuarve erdhi pasi në bashkëpunim me Agjencinë e Kosovës për Inteligjencë dhe Prokurorinë speciale, janë ndërmarrë veprime hetimore lidhur me dyshimet për spiunazh.