Category: Lajme

Programi i Kombeve të Bashkuara për Zhvillim (UNDP) në Kosovë publikoi edicionin e 26-të të Përmbledhjes të Pulsit Publik në një konferencë për media të mbajtur sot.

Anketimi i opinionit të Pulsit Publik nxjerr në pah perceptimet e njerëzve për çështjet socio-ekonomike, politike dhe të sigurisë. Të dhënat për këtë përmbledhje janë mbledhur nga 17 prilli deri më 7 maj 2024, duke reflektuar opinionin e mbi 1,300 të anketuarve që mbulojnë të tridhjetë e tetë komunat, duke përfshirë zonat urbane dhe rurale, dhe duke përfshirë të gjitha komunitetet e Kosovës.

Disa nga gjetjet kryesore të anketës përfshijnë:

• Të dhënat tregojnë se mesatarisht 50.1% e njerëzve janë të kënaqur me punën e institucioneve kryesore qendrore të Kosovës.

• Kënaqshmëria me punën e Kabinetit Ekzekutiv u regjistrua në 53.3%, ndërsa me punën e Kryeministrit u regjistrua në 58.3%.

• Kënaqshmëria me punën e Kuvendit ishte 52.10%, ndërsa kënaqshmëria me Kryetarin e Kuvendit ishte 64.4%.

• Kënaqshmëria me Presidenten është regjistruar në 69%.

• Shkalla e kënaqshmërisë me gjykatat ishte 27.1% dhe me Prokurorinë 26.5%

• Varfëria (16.6%), papunësia (16.3%) dhe çmimet për furnizimet thelbësore (12.7%), u regjistruan si tre çështjet kryesore. Shërbimet e kujdesit shëndetësor (7.8%) dhe mjedisi (5.6%) plotësuan pesë problemet kryesore.

• Për shqiptarët e Kosovës, tri çështjet kryesore ishin papunësia (16.8%), varfëria (16.6%) dhe çmimet për furnizimet esenciale (12.8%). Për serbët e Kosovës, varfëria (15.2%), problemet e hapësirës urbane (13.8%) dhe marrëdhëniet ndëretnike (13.3%) ishin tri çështjet kryesore, ndërsa për komunitetet e tjera të Kosovës, çështjet kryesore ishin varfëria (19.5%), furnizimi me energji elektrike. (14.2%) dhe problemet e hapësirës urbane (11.1%).

• Një total prej 83.2% përqind e të anketuarve raportuan se ndjehen të sigurt nga dhuna dhe krimi kur janë në rrugë. Të dhënat e ndara sipas gjinisë treguan se 83.4% e burrave dhe 82.9% e grave ndjehen të sigurt kur janë në rrugë.

• Të dhënat e ndara sipas përkatësisë etnike treguan se një numër më i madh i shqiptarëve të Kosovës (85.3%) dhe komuniteteve tjera të Kosovës (83.2%) krahasuar me serbët e Kosovës (31.9%) ndiheshin të sigurt kur ishin jashtë në rrugë.

• 60% e të anketuarve besojnë se punësimi në sektorin privat fitohet në bazë të meritës, krahasuar me punësimin në sektorin publik, për të cilin vetëm 32% e të anketuarve kanë pohuar të njëjtën gjë.

• Një rritje si në Indeksin e Demokratizimit (ID-ja) ashtu edhe në Indeksin e Besueshmërisë Ekonomike (IBE-ja) u regjistrua në anketën e fundit të opinionit me ID që aktualisht qëndron në 1.62 dhe IBE në 1.21.

• 27.3% e të anketuarve janë deklaruar se janë shumë të kënaqur apo të kënaqur me drejtimin ekonomik, ndërsa 36.33% e të anketuarve janë deklaruar se janë shumë të kënaqur apo të kënaqur me drejtimin politik drejt të cilit po shkon Kosova aktualisht.

• Mesatarisht, 19.9% e të anketuarve kanë perceptuar se ekziston korrupsioni në shkallë të gjerë. Policia e Kosovës me 12.40% është perceptuar si institucioni më pak i korruptuar, e ndjekur nga organizatat ndërkombëtare me 13.70%.

• Për 65.3% të të anketuarve, informacioni nëpërmjet medias është ai që ka formësuar perceptimin e tyre për korrupsionin në shkallë të gjerë. 26.8% e të anketuarve kanë pohuar se biseda me të afërmit është ajo që ka formësuar perceptimin e tyre, ndërsa 6.3% e të anketuarve kanë pohuar se përvojat personale kanë formësuar perceptimin e tyre.

• Të dhënat e ndara etnikisht treguan se gjithsej 81% e komuniteteve të tjera të Kosovës, 76% e shqiptarëve të Kosovës dhe 54% e serbëve të Kosovës kishin gjasa të votonin nëse zgjedhjet do të mbaheshin së shpejti.

• Gjithsej 10.9% e të anketuarve besojnë plotësisht dhe 40.9% e tyre besojnë se Marrëveshja për rrugën drejt normalizimit të marrëdhënieve ndërmjet Prishtinës dhe Beogradit do të ndikojë pozitivisht në jetën e njerëzve. Të dhënat e ndara sipas përkatësisë etnike treguan se 52.9% e shqiptarëve të Kosovës dhe 51.6% e komuniteteve të tjera të Kosovës kishin një pikëpamje pozitive për Marrëveshjen, krahasuar me 25.7% të serbëve të Kosovës.

Të dhënat shtesë të marra nga ky sondazh dhe nga sondazhet e mëparshme do të vihen në dispozicion në Platformën e Vizualizimit të të Dhënave të Pulsit Publik dhe ASKData: https://bit.ly/44GqPyi

Përmbledhja e Pulsit Publik publikohet dy herë në vit dhe që më shumë se njëzet vite ka ndihmuar që institucioneve dhe akterëve të Kosovës t’u ofrohen të dhëna të paanshme dhe të besueshme për treguesit kryesorë në lidhje me perceptimin e qytetarëve për çështjet socioekonomike, politike, të sigurisë dhe ato mjedisore. Të dhënat e Përmbledhjes së Pulsit Publik 26 janë mbledhur nga 17 prilli deri më 7 maj të vitit 2024, duke e pasqyruar opinionin e mbi 1,300 të anketuarve mbi moshën 18 vjeçare. Mostra përfshinte të njëjtin numër të burrave dhe grave nga të gjitha komunat dhe rajonet e Kosovës, duke mbuluar si zonat urbane ashtu edhe ato rurale. Sa i përket përfaqësimit etnik, mostra përfshinte 896 shqiptarë të Kosovës, 210 serbë të Kosovës dhe 200 anëtarë të komuniteteve të tjera të Kosovës (ashkali, boshnjakë, egjiptianë, goranë, romë dhe turq të Kosovës).

Projekti Pulsit Publik, i cili filloi në vitin 2002, financohet nga USAID-i në Kosovë.

Dyert e Kuvendit të Kosovës janë hapur sot që nga ora 11:00 për mërgimtarët që aktualisht janë me pushime në vendlindje, raporton EO.

Por interesimi për ta vizituar ishte shumë i vogël nga ana e mërgimtarëve.

Të pranishëm ishin disa deputetë të Lëvizjes Vetëvendosje, të cilët shpjeguan për punën që bëjnë si ligjvënës.

Autoritetet në Francë kanë nisur një operacion të madh për të pastruar kompjuterët e infektuar nga një program i spiunazhit kibernetik që ka prekur miliona përdorues në mbarë botën.

“Në prag të Olimpiadës, ky operacion tregon se lojtarë të ndryshëm në Francë dhe jashtë vendit janë të mobilizuar që të luftojnë të gjitha format e krimit kibernetik”, tha kryeprokurorja e Parisit, Laure Beccuau, përmes një deklarate më 25 korrik.

Ajo tha se hetuesit po shënjestrojnë një rrjet të ‘bot’-ëve , që dyshohet se kanë infektuar kompjuterët me një virus. Po ashtu ky rrjet besohet se po vjedh të dhëna nga përdoruesit, “veçanërisht për qëllime spiunazhi”.

Beccuau tha se analistët dhe hetuesit kanë arritur të marrin nën kontroll serverin që ka nën kontroll miliona kompjuterë të infektuar me virus.

Autoritetet franceze e kanë nisur këtë operacion më 18 korrik dhe i njëjti pritet të zgjasë disa muaj. Sipas njoftimit, deri më tani autoritetet kanë arritur të ndihmojnë viktima në disa shtete evropiane.

Në njoftimin e kryeprokurores së Parisit nuk u përmend ndonjë kërcënim specifik ndaj Lojërave Olimpike që do të mbahen në Paris. Por, ndaras, agjencia për siguri kibernetike në Francë tha javën e kaluar se sulmet kibernetike do të jenë “të pashmangshme” gjatë Olimpiadës, e cila nis të premten./REL

Nga një muaj paraburgim është caktuar ndaj pesë të dyshuarve për dallavere me patentë shoferë në Pejë, ndërsa e dyshuara e gjashtë është në arrest shtëpiak

Gjykata Themelore në Pejë ka caktuar masë paraburgimi në kohëzgjatje prej 30 ditësh për pesë të dyshuarit A.SH, R.S, L.G, M.I, D.T, ndërsa për të pandehurën T.SH është caktuar arrest shtëpiak.

Kështu ka bërë të ditur bashkëpunëtorja profesionale e kësaj Gjykate, Elzana Kastrati.

“Sipas kërkesës tuaj, ju njoftojë se ndaj të pandehurve A.SH, R.S, L.G, M.I dhe D.T, është caktuar masa e paraburgimit nga data 23 korrik 2024 deri me datë 22 gusht 2024, ndërsa të pandehurës T.SH, i është caktuar masa e arrestit shtëpiak në kohëzgjatje të njëjtë me të pandehurit tjerë”, thuhet në përgjigjen e Kastratit, njofton“Betimi për Drejtësi”.

Nga ana tjetër, Policia e Kosovës ka njoftuar se gjashtë të dyshuar janë persona zyrtarë në Departamenin e patentë shoferëve, të cilët dyshohen se organizuan provime duke mos i përfillur format zyrtare elektronike.

“Personat e dyshuar, gjashtë (6) prej tyre persona zyrtarë nga departamenti i patentë shoferëve, Ministria e Infrastrukturës, duke bashkëvepruar dyshohet se kanë vepruar jashtë rregulloreve dhe udhëzimeve të Ministrisë së Infrastrukturës, duke organizuar provime për marrjen e patentë shoferëve jashtë orarit zyrtar të punës, duke përdorur metodën e testimeve në formë fizike dhe duke mos i përfillur format zyrtare elektronike. Dyshohet se testet janë plotësuar në emër të kandidatëve nga ana e zyrtarëve të njësisë së patentë shoferëve në Pejë dhe të njëjtat në mënyrë të kundërligjshme janë futur në sistem nga ana e zyrtarit të IT-së”, thuhej në njoftimin e Policisë.

Ministria e Punëve të Jashtme dhe Evropiane e Kroacisë ka njoftuar sot Malin e Zi përmes një note drejtuar Ambasadës së Malit të Zi në Zagreb se Zagrebi ka shpallur kryetarin e Parlamentit malazez, Andrija Mandiq, deputetin Millan Knezheviq dhe zëvendëskryeministrin Aleksa Beçiq, persona të padëshirueshëm.

Zagrebi tha se ky vendim u mor për shkak se këta politikanë kanë kryer veprime të vazhdueshme për prishjen e marrëdhënieve të fqinjësisë së mirë dhe për shkak të, siç u tha, abuzimit të Kroacisë për qëllime të brendshme politike.

“Ministria e Punëve të Jashtme shpreh keqardhjen që shumica në Parlamentin e Malit të Zi vendosi të shpërfillë thirrjet e vazhdueshme të Republikës së Kroacisë për të mos ndërmarrë lëvizje që mund të ndikojnë negativisht në marrëdhëniet tona dypalëshe dhe në rrugën evropiane të Malit të Zi. Në këtë kontekst, vihen në pah veprimet e zyrtarëve politikë të përmendur, të cilët nuk mund të konsiderohen dashamirës dhe fqinjësorë në raport me Republikën e Kroacisë dhe as nuk janë në përputhje me qëllimin e deklaruar për anëtarësim të Malit të Zi në Bashkimin Evropian”, u tha në njoftim.

Sipas Ministrisë kroate, fqinjësia e mirë është një ndër elementët kyçë të procesit të zgjerimit dhe atij të stabilizim asociimit “dhe një nga kriteret kryesore për vlerësimin e përparimit në procesin e anëtarësimit të Malit të Zi” në Bashkimin Evropian.

Kroacia tha se e mbështet anëtarësim e Malit të Zi në BE.

“Republika e Kroacisë pret që Mali i Zi të sillet në përputhje me vlerat evropiane dhe në frymën evropiane dhe se të përqendrojë përpjekjet e tij në përmbushjen e mëtejshme të kushteve dhe kritereve në procesin e anëtarësimit”, u tha në njoftim.

Mandiq dhe Knezheviq udhëheqin dy parti të ish-Frontit Demokratik prorus, ndërkaq Beçiq është udhëheqës i demokratëve.

Më herët gjatë kësaj jave, Fronti Demokratik u bë pjesë e Qeverisë të Malit të Zi, që udhëhiqet nga kryeministri Millojko Spajiq.

Hyrja në ekzekutiv e Frontit Demokratik dhe të Partisë së Boshnjakëve nga Ambasada e Shteteve të Bashkuara të Amerikës në Podgoricë u prit me shqetësim, pasi Uashingtoni tha vuri në pah se në ekzekutiv kanë hyrë parti që nuk e dënojnë agresionin rus kundër Ukrainës dhe janë kundër sanksioneve të Bashkimit Evropian kundër Rusisë.

Politika e Frontit Demokratik është në kundërshtim me politikën zyrtare të Malit të Zi, i cili është kandidati më serioz për anëtarësim në Bashkimin Evropian./REL

Jakub Kiwior është i prirur të kalojë nga Arsenali këtë verë. 24-vjeçari iu bashkua Arsenalit nga skuadra italiane Spezia për rreth 20 milionë euro në janar 2023 dhe vazhdoi të bëjë 30 paraqitje në sezonin e tij të parë të plotë për “Topçinjtë” sezonin e kaluar.

Problemet e dëmtimit në mbrojtje të Arsenalit dhe rënia e formës së Oleksandr Zinchenko nënkuptonin se Mikel Arteta mbështetej shumë në shkathtësinë e Kiwior-it, veçanërisht në gjysmën e dytë të sezonit, me polakun që luante si qendërmbrojtës por edhe në krahun e majtë.

Por ardhja e Riccardo Calafiori nga Bologna që tashmë duket e sigurt mund të zvogëlojë minutazhën e Kiwior dhe mbrojtësi është i interesuar për të siguruar minuta të rregullta sezonin e ardhshëm në atë që është një fazë vendimtare e karrierës dhe zhvillimit të tij, përcjellë KosovaPress.

Sipas “Gazzetta dello Sport”, Interi ka vënë në pah disponueshmërinë e mundshme të Kiwior dhe lojtari i Arsenalit i ka thënë ‘po’ kampionëve të Serie A.

Raporti thotë se Kiwior ka kaluar kapitenin e Torinos, Ricardo Rodriguez, në krye të listës së ngushtë të objektivave mbrojtëse të Simone Inzaghit dhe Interi është i vendosur ta rrëmbejë polakun.

Thuhet se Arsenali deri më tani nuk ka qenë i pranueshëm ndaj idesë së një marrëveshjeje huazimi për Kiwior, të cilin Interi e favorizon për shkak të situatës së tyre financiare. Megjithatë gjigantët italianë janë të gatshëm të luajnë lojën e pritjesm për lojtarin deri në fund të afatit kalimtar veror.

Kiwior, i cili gjithashtu ka qenë i lidhur me Juventusin në javët e fundit, është i lidhur me një marrëveshje me Arsenalin deri në vitin 2028.

Pas Ballkanit që e bëri të martën, sot është radha që Drita dhe Llapi të zbresin në fushë për ndeshjet e tyre në kuadër të rrethit të dytë të Ligës së Konferencës.

Për dallim nga Ballkani dhe Llapi, për Dritën sonte do të nis sezoni në garat evropiane.

Të kaltrit nga Gjilani do të kenë përballë islandezët e Breidablik.

Skuadra e Zekirija Ramadanit synon që të marrë rezultat pozitiv në ndeshjen e parë në Islandë, para se të martën të pres kundërshtarët në Kosovë.

Në rast kualifikimi, Drita në rrethin e tretë do të ndeshjet me fituesen e çiftit Auda-Cliftonville.

Kjo ndeshje që luhet sonte nis nga ora 21:15.

E po sot, por nga ora 19:00 në Brondyb Stadium, Llapi i shkon ekipit të Brondbyt.

Llapjanët kërkojnë të shkaktojnë befasinë e madhe, edhe pse një gjë e tillë nuk do të jetë aspak e lehtë.

Në rast se nënkampionët e Kosovës kalojnë më tej, atëherë në rrethin e tretë të do ndeshjen me njërin mes polakëve të Legia Warszawa ose uellsianëve të Caernarfon Town.

Vlen të ceket se në këtë fazë Llapi erdhi pasi u eliminua nga rrethin i parë kualifikues i Ligës së Evropës.

Kryetarja e Komisionit për negocimin e teksteve shkollore, Merita Januzaj është intervistuar për rreth dy orë në Komisionin Hetimor Parlamentar për procesin e subvencionimit të blerjes së teksteve shkollore dhe mjeteve mësimore, raporton EO.

Jonuzaj ka thënë se kanë arritur ta zbresin çmimin e teksteve shkollore nga 5 milionë e 800 në 4 milionë e 800 mijë.

“Si zyrtare ministrisë sa herë është kërkuar një informatë ne iu kemi përgjigje pozitivisht kërkesave të Kuvendit. Është një proces si hallkë e ndërmjetme e procesit të teksteve shkollore. Pasi përzgjidhen tekstet shkollore vlerësohet tekstet atëherë departamenti i caktuar bënë kërkesën dhe hapet tenderi. Detyra jonë është me kërku me ulë çmimin me aq sa mundet. Kemi pasur takime me shtëpitë botuese për të ulur sa më shumë çmimin. Çmimi ka qenë 4 milionë e 300 mijë kurse oferta në shtëpitë botuese ka qenë rreth 5 milionë. Jemi munduar me ulë ofertat dhe kemi ulur diku mbi 1 milion ofertën totale të shtëpive botuese. Prej 5 milionë e 800 mijë kemi përfunduar në 4 milionë e 800 mijë euro. Shtëpitë botuese nuk kanë dashur më zbrit fare çmimin. Tekstet e abetares, gjuhës boshnjake, turke, tekstet e diasporës kanë rritur më shumë çmimet e teksteve”, tha Januzaj.

Kryesuesi i këtij Komisioni, Shemsedin Dreshaj ka pyetur Januzaj se sa kanë ulur saktë çmimin secila shtëpi botuese.

Ajo ka deklaruar se afro 1 milionë ka zbritje të çmimeve në shtëpinë botuese “Dukagjini”.

“Në total ‘Dukagjini’ prej 4 milionë e 260 mijë euro ka zbrit rreth 3 milionë e 459 mijë euro, ‘Albasi’ ka pasur 1 milion e 400 mijë dhe ka zbritur 1 milion e 200 mijë euro, ‘Berati’ prej 50 mijë ka zbrit në 42 mijë euro, edhe tekstet e minoriteteve ishin pjesë e negocimit dhe ato e kanë rritur vlerën e çmimit. Pas negocimit kur e ka dorëzuar raportin nuk ka ndonjë përgjegjësi tjetër se nuk është më në rolin tonë”, tha Januzaj.

Një person ka njoftuar se ka hasur në mjete të dyshuara shpërthyese në Fushë Kosovë.

Në vendin e ngjarjes kanë dalë njësitet përkatëse, ndërsa ekipi për deminim i FSK-se ka tërhequr nga vendi i ngjarjes tri mjete të dyshuara granata dore.

Për rastin është njoftuar edhe prokurori.

“Rr. Tahir Zemaj, Fushë Kosovë 24.07.2024-09:45. Ankuesi mashkull kosovar, ka raportuar se derisa ka qenë duke punuar, ka hasur në mjete të dyshuara shpërthyese. Në vendin e ngjarjes kanë dalë njësitet përkatëse, ndërsa ekipi për deminim i FSK-se ka tërhequr nga vendi i ngjarjes tri mjete të dyshuara granata dore. Lidhur me rastin është njoftuar prokurori”, thuhet në njoftim. /Express/

Autoritetet franceze kanë eliminuar disa komplote që kishin për objektiv Olimpiket e Parisit. Mes të arrestuarve është edhe një rus, thanë autoritetet të mërkurën, vetëm pak ditë nga ceremonia e hapjes së Lojërave Verore të Parisit.

Franca ka qenë në gatishmëri të lartë gjatë javëve të fundit ndërsa përgatitjet për Lojërat Olimpike janë në fazën përfundimtare. Lojërat nisin zyrtarisht të premten në lumin Seine me një ceremoni madhështore dhe masa të rrepta sigurie.

Prokurorët thanë se kishin arrestuar të martën një rus 40-vjeçar në apartamentin e tij në Paris, nën dyshimet se kishte planifikuar të “destabilizonte Lojërat Olimpike”.

Ndaj tij janë ngritur akuza se punonte për shërbimet e zbulimit të një shteti të huaj me qëllim provokimin e trazirave në Francë, krime që mund të dënohen me deri 30 vjet burg, sipas një deklarate nga zyra e prokurorit të Parisit.

Gjatë kontrollit të shtëpisë së të dyshuarit në Paris, organet e rendit gjetën sende që “ngjallën frikën e qëllimit të tij për të organizuar ngjarje që mund të çonin në destabilizimin e Lojërave Olimpike”, thanë prokurorët.

Ambasada ruse në Paris tha se nuk kishte marrë asnjë njoftim nga autoritetet franceze për arrestimin dhe u ka kërkuar zyrtarëve shpjegime pasi njoftimeve, ndërsa nuk ka komente të mëtejshme.

Organizatorët e Lojërave Olimpike po përballen me sfida të mëdha sigurie, përfshirë shqetësimet e sulmeve kibernetike, mes tensioneve të larta ndërkombëtare për shkak të luftës së Rusisë në Ukrainë dhe konfliktit Izrael-Hamas në Gazë.

Sipas zyrtarëve francezë dhe ekspertëve të sigurisë kibernetike në Evropë dhe Shtetet e Bashkuara, fushatat dezinformuese të orkestruara nga Rusia kanë për objektiv Lojërat Olimpike dhe zgjedhjet e fundit në Francë.

Rreth 35,000 punonjës të rendit do të jenë në rrugët e kryeqytetit francez gjatë Lojërave Olimpike me rreth 45,000 gjatë ceremonisë së hapjes. Përveç kësaj, 10,000 ushtarë po marrin pjesë në operacionet e sigurisë në rajonin e Parisit.

Rreth 40 vende po ndihmojnë Francën gjatë këtij sezoni duke dërguar të paktën 1900 punonjës rendi.