Një burrë është arrestuar në Malishevë, nën dyshimin se ka sulmuar fizikisht bashkëshorten dhe vajzën e tij.
“Është arrestuar i dyshuari mashkull kosovar, pasi që i njëjti pas një mosmarrëveshjeje kishte sulmuar fizikisht dy viktimat femra kosovare, bashkëshorten dhe vajzën e tij”, thuhet në raportin e Policisë së Kosovës.
Tutje, Policia njoftoi se viktimat kanë pranuar tretman mjekësor, ndërsa i dyshuari pas intervistimit me vendim të prokurorit është dërguar në mbajtje.
Avokati Tomë Gashi ka njoftuar se nesër në ora 09:00 do të publikohet vendimi i Gjykatës për rastin e vrasjes së Lulzim Fejzullahut, të riut që u rrah deri në vdekje.
Gashi ka akuzuar tre gjyqtarë të Gjykatës Themelore në Prishtinë se njërit prej të akuzuarve nuk i kanë dhënë dënimin meritor.
“Per vrasjen e Lulit kan mekate edhe vete 3 Gjyqtare te Gjykates Themelore ne Prishtine te cilet se paku njerit prej sulmuesve mizore ndaj Lulit per vepra shume te randa penale qe nga tentim vrasja e nje nxanesi ne apo afer oborrit te shkolles ne Besian pak vite me pare nuk i dhan denimin meritor. Po qe se Gjyjatesit do te vendosin denim ne perpjestim me veprat e tije penale ai sot nuk do te ishte ne burg per vrasje te Lulit vetem 18 vjeqar , e Luli do te ishte shendish e mire dhe jo te kalbet ne dhe ne kete moshe kaq te re”, ka shkruar Gashi.
Në fund, Gashi ka thënë se “çdo dënim që familja e Lulit e pret ditën e nesërme është dhuratë për ta sepse Luli nuk jeton më”.
“Çdo denim qe familja e Lulit e pret diten e neserme eshte dhurat per ta sepse Luli nuk jeton ma…!”
Lulzim Fejzullahu, vdiq në moshën 18 vjeçare më 20 janar të këtij viti, gjashtë ditë pas plagëve që mori nga goditja me veturë e më pas me mjete të forta nga disa persona në Podujevë.
Në Drenas janë arrestuar katër persona pasi që të njëjtit pas një mosmarrëveshjeje dhe në gjendje të dehur e kanë sulmuar fizikisht një person, i cili më pastaj me një kaçavidë i ka dëmtuar veturën njërit prej të dyshuarve.
Bëhet e ditur se viktima ka pranuar tretman mjekësor, ndërsa me vendim të prokurorit katër të dyshuarit janë dërguar në mbajtje.
Në Gjykatën Themelore në Prishtinë të martën është mbajtur seanca për koordinim të datave për seancat e radhës në gjykimin Ismet Osmanit-Currit, Ilir Bojkut, Sami Nikës, Mentor Maqanit dhe Adil Thaçit.
Në këtë rast, Ismet Osmani, Sami Nika, Ilir Bojku dhe Mentor Maqani akuzohen për kryerjen e veprës penale “Fajde” dhe “Detyrim”, ndërsa i akuzuari Adil Thaqi ngarkohet me veprën penale “Mashtrim”, raporton “Betimi për Drejtësi”.
Në seancën e së martës prezent ishin prokurori Armend Hamiti dhe të akuzuarit (përveç Currit) me mbrojtësit e tyre: për Ismet Osmanin avokati Besnik Berisha, për Ilir Bojkun avokati Naser Sopjani, për Sami Nikën avokati me zëvendësim Asdren Hoxha, për Mentor Maqanin avokati Naim Rudari dhe për Adil Thaçin avokati Artan Qerkini.
Në koordinim me avokatët, gjykata caktoi seancat e radhës.
Fillimisht, gjykatësja e rastit, Medie Bytyqi caktoi datat e gjykimit për muajin shtator, mirëpo mbrojtësit e të akuzuarve ishin të zënë në ato data, andaj seancat e radhës u caktuan për muajin tetor.
Në këtë rast, Gjykata Themelore në Prishtinë kishte revokuar dorëzaninë dhe kishte caktuar masën e paraburgimit prej 30 ditësh ndaj Ismet Osmanit, pasi që kishte munguar në seancën e 1 korrikut 2024.
Mirëpo, Apeli e kishte kthyer çështjen në rivendosje, me arsyetimin se aktvendimi i ankimuar është i përfshirë në shkelje esenciale të dispozitave të nenit 384, par.1 të KPPRK-së, ngase shkalla e parë duke vendosur lidhur me masën e paraburgimit ndaj Osmanit, nuk ka vepruar konform dispozitave ligjore në fuqi dhe nuk ka respektuar procedurat e parapara për caktimin e paraburgimit në raste të tilla. Sipas Apelit, nuk janë analizuar drejt dhe në hollësi raportet shëndetësore të të akuzuarit.
Apeli ia kishte kthyer çështjen në rivendosje Themelores me arsyetimin se nuk janë analizuar dokumentacionet shëndetësore, të cilat Themelorja ka mohuar se i ka pasur në shkresat e lëndës.
Ndërsa, në rivendosje, Themelorja sërish revokoi dorëzaninë ndaj Currit, ndërsa ndaj tij lëshoi urdhërarrest.
Aktakuza ndaj Ismet Osmanit i njohur si “Curri”, Sami Nikës, Ilir Bojkut, Mentor Maqanit dhe Adil Thaqit, ishte ngritur më 19 nëntor 2021.
Pesë të akuzuarit, në seancën e mbajtur më 15 korrik 2022 ishin deklaruar të pafajshëm për veprat penale që u vihen barrë.
Më 23 nëntor 2022, Gjykata Themelore në Prishtinë me aktvendim kishte refuzuar si të pabazuara kërkesat për hudhje të aktakuzës dhe kundërshtim të provave, të paraqitura nga mbrojtësit e të akuzuarve, avokatët Kosovare Kelmendi, Besnik Berisha, Naser Sopjani dhe Artan Qerkini.
Kurse, Gjykata e Apelit kishte vërtetuar aktvendimin e Themelores përmes të cilit ishin refuzuar si të pabazuara kërkesat për hudhje të aktakuzës dhe kundërshtim të provave.
Ndryshe, Osmani po akuzohet nga Prokuroria Themelore në Prishtinë për veprën penale të fajdesë dhe detyrimit së bashku me Sami Nikën, Ilir Bojkun, Mentor Maqanin. Kurse, Adil Thaçi ngarkohet për veprën penale “Mashtrimit”. Aktakuzën e plotë mund ta lexoni, duke klikuar në këtë link.
Osmani në një rast tjetër dyshohet për vrasje në tentativë të ndodhur në qytetin e Graçanicës, të të cilin rast të dyshuar janë edhe djali i tij Armir Osmani, Mentor Beqiri e Behar Halili. Për këtë, ndaj tij është lëshuar një urdhërarrest tjetër.
Në mungesë kuorumi, ka dështuar të bëhet konstituimi i Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024 – intervistimi i dëshmitarëve: Fadile Dyla, sekretare e Përgjithshme e MASHTI-t, Avni Rexha, ushtrues detyre i drejtorit të Departamentit të Arsimit Parauniversitar, Drita Kadriu Drejtoria e Arsimit e Komunës Mitrovicë e Jugut.
Deputeti i VV-së, Armend Muja ka thënë se ky komision është formuar nga opozita për të vërtetuar fakte të pa baza dhe pa vend, raporton EO.
“Kërkesa është bërë para një jave nga kryesuesi i këtij komisioni, Shemsedin Dreshaj dhe sot nuk është i pranishëm. Plani ka paraparë që deri në fund të korrikut të intervistohen të gjithë dëshmitarët. Ftesat janë dërguar tek të gjithë dëshmitarët, e shohim që kryesuesi nuk është ardhur dhe as zëvendës kryesuesi. Vështirësitë që i ka opozita për me i vërtetuar faktet e tyre të pa baza. Ne nuk duhet të jemi shkaktar për të propozuar komisione vend pa vend. Komisionet kërkojnë mprehtësi të gjetjeve të fakteve, dhe kërkon shumë punë. Ne kemi dashur që të tregojmë faktet e këtij komisioni hetimor” , tha Muja.
Në komision ishin të pranishëm vetëm katër deputetë nga radhët e VV-së, Armend Muja, Mefail Bajqinovci, Arjeta Fejza dhe Arbër Rexha.
Komuna e Prishtinës ka shkelur ligjin në kontratën 12 milionëshe për “Shërbimi i Arkitektit të Kryeqytetit”, duke caktuar në komision të vlerësimit të ofertave një person i cili nuk ishte pjesë e Komunës së Prishtinës. Kështu u tha në konferencën për media të organizuar nga Demokraci Plus (D+), raporton Ekonomia online.
Sipas tyre, anëtari i komisionit për vlerësimin e tenderëve, Kreshnik Ferizi, nuk ishte pjesë e komunës së Prishtinës, duke qenë se kontrata e tij me komunën kishte përfunduar më datë 31 dhjetor të vitit 2022.
Ardit Dragusha, hulumtues në Demokracy Plus, ka paraqitur siç tha prova që dëshmojnë shkelje të procedurave të tenderimit.
“Rregullorja e Prokurimit Publik përcakton se autoritetet kontraktuese kanë të drejtë të angazhojnë ekspertë të jashtëm, në rastet kur kërkohet njohuri dhe ekspertizë e veçantë teknike dhe që ekspertët e tillë nuk janë në dispozicion brenda autoritetit kontraktues. Mirëpo, Kreshnik Ferizi, nuk ishte as i angazhuar as si ekspert i jashtëm në kohën kur mori pjesë në komisionin për vlerësimin e ofertave për këtë tender. Përveç pjesëmarrjes së paligjshme në komision, ekziston dyshimi i bazuar për konflikt të interesit, duke qenë se grupi i operatorëve ekonomik ‘Shërbimi i Akitetktit të Kryeqytetit’, të cilët u shpallën fitues nga komisioni e ku anëtar ishte Kreshnik Ferizi, ofertuan me dokumentacion ku vetë Kreshnik Ferizi figuronte si bashkëpunëtor i Kompanisë ‘Anarch Sh.P.K’”, tha Dragusha.
Një grua ka raportuar në Policinë e Kosovës se është sulmuar fizikisht nga burri dhe vjehrri i saj në Vushtrri.
Sipas Policisë së Kosovës, viktima ka pranuar tretman mjekësor ndërsa dy të dyshuarit janë arrestuar dhe janë intervistuar.
Policia ka bastisur shtëpinë e të dyshuarve ku janë gjetur dhe sekuestruar 11 fishekë.
Pas intervistimit, njëri nga të dyshuarit është liruar ndërsa tjetri është dërguar në mbajtje.
“Vushtrri 29.07.2024, 18:45. Ankuesja femër kosovare, ka raportuar se pas një mosmarrëveshje është sulmuar nga dy të dyshuarit meshkuj kosovarë bashkëshorti dhe vjehrri i saj. Viktima ka pranuar tretman mjekësor, ndërsa dy të dyshuarit janë arrestuar dhe janë intervistuar. Me vendim të prokurorit është bërë bastisja në shtëpinë e të dyshuarve ku gjatë kontrollit janë gjetur dhe sekuestruar 11 fishekë. Pas intervistimit me vendim të prokurorit njëri nga të dyshuarit lirohet në procedurë të rregullt, kurse tjetri dërgohet në mbajtje”, thuhet në raportin 24 orësh të Policisë së Kosovës.
Avokati Arianit Koci, ka njoftuar se është dhënë strishoja e gojës e nënës së Faton Hajrizit.
Në një postim në rrjetin social Facebook, Koci ka thënë se bashkë me nënën e Fatonit janë rrugës për në Skenderaj dhe sipas tij tanimë nuk ka asnjë arsye të mos lirohet trupi që po mbahet në Serbi.
“Strishoja e gojës e nanës së Faton Hajrizit është dhënë. Çdo gjë ka shkuar sipas planit tim. Zonja është me mua, rrugës për në Skenderaj. Tanimë nuk ka asnjë arsye të mos lirohet trupi, posa të kryhet analiza e strishos”, ka shkruar Koci.
Rreth 100 ditë para zgjedhjeve në Shtetet e Bashkuara, kandidati republikan për president, Donald Trump, ashpërsoi sulmet ndaj kandidates demokrate për presidente, Kamala Harris, gjatë një tubimi në Minesota.
“Kemi një viktimë të re tani, Kamala. Kemi një viktimë krejtësisht të re. Sinqerisht, ajo është një radikale e çmendur e së majtës”, tha zoti Trump.
Edhe Nënpresidentja Harris sulmoi zotin Trump, gjatë tubimit zgjedhor në Masaçusets.
“Ndoshta e keni vënë re se Donald Trumpi ka thënë disa gënjeshtra lidhur me të kaluarën time dhe disa nga gjërat që ai dhe numri dy i tij po thonë janë të çuditshme”, tha zonja Harris.
Ekipi zgjedhor i zonjës Harris thotë se ajo mblodhi 200 milionë dollarë që nga futja në garë pas tërheqjes së Presidentit Biden dhe se 66 për qind e tyre janë nga donatorë të rinj.
Guvernatori i Nju Hempshër, republikani Chris Sununu thotë se entuziazmi mbi kandidaturën e zonjës Harris do të shuhet brenda 30 ditësh. Ai këshillon dyshen republikane Trump – Vance të përqëndrohen tek politikat e tyre, në vend të sulmeve personale.
“Qëndroni tek çështjet që shqetësojnë elektoratin. Njerëzit janë në shqetësuar sepse nuk mund të paguajnë faturat, sepse nuk ndihen të sigurt në shtëpitë, apo komunitetet e tyre. Këto janë çështjet që do t’i bindin ata të votojnë për Trumpin në nëntor”, thotë ai.
Guvernatori i Merilendit, demokrati Wes Moore, thotë se beson se vizioni i zonjës Harris për të ardhmen do ta ndihmojë atë të fitojë besimin e votuesve të pavendosur në shtetet përcaktuese.
“Mendoj se njerëzit tani po thonë se më në fund mund të diskutojnë mbi opsionet që kanë në këto zgjedhje. Ata e shohin se kjo nuk është garë vetëm për mbrojtjen e demokracisë, por edhe vlerave bazë, mënyrës se si i mendojmë liritë ekonomike”, thotë ai.
Nënpresidentja Harris pritet të shpallë numrin dy të kandidaturës së saj para Kuvendit Kombëtar Demokrat që pritet të mbahet në gusht në Çikago.
Profesorja e Shkencave Politike dhe anëtarja e Dhomës së Përfaqësuesve në shtetin Rod Ajlënd, demokratja June Speakman, thotë se zakonisht përzgjedhja e nënpresidentëve ka për qëllim balancimin e kandidaturës.
“Në shumë raste përcaktohet nga rajoni. Ajo është nga pjesa perëndimore. Prandaj mund të zgjedhë dikë nga pjesa qendrore, për të siguruar votat që ndryshe nuk mund t’i merrte. Trumpi e balancoi kandidaturën e tij me dikë që është shumë më i ri”, thotë zonja Speakman.
Zonjën Harris e pret një javë e ngarkuar, me një ndalesë të planifikuar elektorale në Atlanta të Xhorxhias.
Bazuar në faqen e fushatës së zotit Trump në internet, ditëve në vijim kandidati republikan do të ketë tubime zgjedhore në Pensilvani, Nevada dhe Arizona./VOA
Tetë raste të dhunës në familje janë raportuar gjatë 24 orëve të fundit në Kosovë. Dy raste kanë ndodhur në Prishtinë, ku Policia i ka arrestuar dy persona. Njëri shtetas i Shqipërisë dyshohet se e ka sulmuar fizikisht bashkëshorten. Viktima ka pranuar trajtim mjekësor, e i dyshuari është dërguar në mbajtje.
Ndërsa, një grua ka raportuar se është sulmuar fizikisht nga djali i saj. Ai është arrestuar dhe dërguar në mbajtje
Në Ferizaj, një grua është sulmuar nga bashkëshorti i saj. Palët janë intervistuar dhe më pas i dyshuari është dërguar në mbajtje. Rasti është iniciuar si “lëndim i lehtë trupor dhe dhunë në familje”.
Policia e Kosovës e ka arrestuar një person në Malishevë pasi dyshohet se i ka shkaktuar lëndime trupore bashkëshortes së tij. Autoritetet thanë se ai vuan nga sëmundje mendore, derisa viktima s’ka pranuar të marrë trajtim mjekësor. Një i dyshuar tjetër është arrestuar në Malishevë, me dyshimin se ka sulmuar bashkëshorten dhe vajzën e tij. Viktimat kanë pranuar trajtim mjekësor.
Policia e Kosovës e ka arrestuar një person në Gjakovë, me dyshimin se e ka sulmuar fizikisht të dashurën e tij pas një mosmarrëveshjeje.
Viktima s’ka pranuar trajtim mjekësor, e i dyshuari është dërguar në mbajtje.
Në Vushtrri Policia njoftoi se kanë raportuar dy raste të dhunës në familje.
Gruaja është ankuar se është sulmuar nga bashkëshorti dhe vjehrri i saj. Ajo ka pranuar trajtim mjekësor, e të dyshuarit janë arrestuar. Shtëpia e të dyshuarve është bastisur dhe janë gjetur 11 fishekë. Me vendim të prokurorit, Policia e ka liruar njërin prej të dyshuarve.
Ndërsa, pas një mosmarrëveshjeje verbale me bashkëshortin, një grua është larguar te shtëpia e prindërve të saj.
Palët janë intervistuar.