Category: Lajme

Në mungesë të kuorumit, ka dështuar mbledhja e Komisionit për Buxhet, Punë dhe Transfere, ku në rend dite ishte votimi i disa raporteve financiare. Të njëjtin, thanë se do ta mbajnë në shtator, raporton EO.

Si pikë e parë e rendit të ditës ishte votimi i Raportit vjetor financiar i Buxhetin të Republikës së Kosovës për vitin 2023, i Zyrës Kombëtare të Auditimit për vitin 2023, i Agjencisë për Informim dhe Privatësi, Autoritetit Rregullativ të Shërbimit të Ujit, etj.

Të pranishëm ishin vetëm deputetët e Lëvizjes Vetëvendosje.

Avokati Tomë Gashi, përfaqësuesi juridik i familjes Fejzullahu, ka thënë se do të kërkojë dënim maksimal për dy të miturit që vranë 18 vjeçarin në Podujevë, Lulzimin, pas rigjykimit të Gjykatës Themelore në Prishtinë, raporton EO.

Edhe në rigjykim në rastin e kësaj vrasje, Gjykata të miturin e parë e ka dënuar me 10 vjet burgim kurse të miturin e dytë, me 9 vjet.

Gashi ka thënë se me këtë aktgjykim, është vërtetuar sërish se dy të miturit kanë vrarë 18 vjeçarin në Podujevë, ndërsa s’ka pasur ndryshime në gjendjen faktike.

“Të cilët kanë qenë të involvuar në vrasjen e Lulzim Fejzullahut, të njëjtat kanë shpallur përgjegjës dhe ka vendosur sikurse në herën e kaluar në maj të këtij viti duke shqiptuar dënim për të miturit njërit në kohëzgjatje prej 10 vitesh dhe tjetrit në kohëzgjatje prej nëntë vitesh. Me këtë vendim të Gjykatës i cili është një vendim i përsëritur për shkak se Gjykata e Apelit e ka kthyer në rigjykim dhe në rivendosje, vërtetohet se rasti është kthyer në rigjykim për çështje teknike krejtësisht formale dhe jo cka ka ndryshuar gjendja faktike”, ka thënë Gashi.

Sipas tij, në çdo mënyra të provave vërtetohet vrasja e 18 vjeçarit.

“Gjykata i ka shpallur fajtor për vrasjen e rëndë dhe jo sipas pretendimeve të tyre kinse diçka ka qenë incident momental gjë që është vërtetuar edhe me video ingjizime dhe me prova të tjera që gjithçka i ka paraprijë një sulmi të mëhershëm dhe Gjykata në prizmin tim ka vendosur drejtë. Me këtë Aktgjykim është vërtetuar edhe njëherë se ata që vranë Lulin kanë vepruar në bashkëveprim njëri me tjetrin dhe se vrasjen e rënde e kanë kryer me dashje të plotë. Si avokat – përfaqësues juridik i familjes se Lulit do të paraqes ankesë që dënimi për të dytë të jetë maksimal”, shtoi ai.

Edhe në rigjykim janë konfirmuar dënimet e gjykimit të parë ndaj dy të miturve që e shkaktuan vrasjen e 18-vjeçarit. E.K. është dënuar me 10 vjet burgim, kurse i mituri i dytë A.A. me 9 vjet burgim.

Nga mbrëmë e deri sot në mëngjes, në Lindjen e Mesme ndodhën dy atentate, përfshirë komandantin e lartë të Hezbollahut, Fuad Shukr, në një sulm izraelit në një periferi jugore të Bejrutit si dhe atentati ndaj shefit të Byrosë politike të Hamasit, Ismail Haniyeh, në kryeqytetin iranian, Teheran, raporton Anadolu.

Grupi i rezistencës palestineze Hamas njoftoi herët në mëngjes se Haniyeh u vra në një sulm ajror izraelit në rezidencën e tij në Teheran.

Hamasi e përshkroi atentatin si një “sulm të pabesë sionist”. Kreu i grupit palestinez ndodhej në Teheran për ceremoninë e inaugurimit të presidentit të ri Iranian.

Megjithatë, asnjë njoftim i menjëhershëm nuk është bërë nga Izraeli për sulmin.

Ushtria izraelite gjithashtu pretendoi mbrëmë se vrau komandantin kryesor të Hezbollahut, Fuad Shukr, në një sulm me dron në periferi të kryeqytetit të Libanit, Bejrut.

Fati i tij mbetet i mbuluar me mister pas atentatit të mbrëmshëm, ndërsa deri më tani nuk ka pasur asnjë koment nga Hezbollahu për sulmin.

Vrasjet vijnë në mes të një ofensive të vazhdueshme izraelite në Rripin e Gazës që zgjat për më shumë se nëntë muaj, së bashku me një përshkallëzim në kufirin me Libanin ku janë përfshirë Hezbollahu dhe ushtria izraelite.

Autoritetet në Shëngjin thanë se situata me zjarre është drejt përmirësimit. Prefektura e Lezhës njoftoi se gjatë natës janë shuar disa vatra zjarri, që shpërthyen nga pasditja e së shtunës.

“Për ditën e sotme të do të operojnë të gjithë mjetet e Mbrojtjes nga Zjarri që kanë qenë të pranishme dhe një ditë më parë, si dhe 300 efektivë të Forcave të Armatosura dhe rreth 100 forca bashkiake. Po operohet në terren për shuarjen e çdo vatre zjarri të ndezur [trungje të ndezura]”, thuhet në njoftimin e Prefekturës së Lezhës.

Një ditë më parë, në Shëngjin situata u përkeqësua pasi flakët përfshin një kompleks turistik në zonën e njohur si ‘Rana e Hedhun’ . Zjarri arriti deri në bregdet.

Përveç forcave zjarrfikëse, për shuarjen e flakëve u angazhua edhe helikopteri Cougar i Ministrisë së Mbrojtjes së Shqipërisë si dhe dy avionë Canadair, të ardhur nga Italia, si pjesë e mbështetjes nga Mekanizmi Evropian i Mbrojtjes Civile.

Ministri i Brendshëm, ende në detyrë, Taulant Balla, ishte mbrëmjen e 30 korrikut në Shëngjin, nga ku tha se po kërkohet ndihmë shtesë nga jashtë vendit për të vënë nën kontroll situatën me zjarre.

“Jemi në kontakte me [misionin e NATO-s në Kosovë] KFOR për të marrë helikopterët e tyre. E gjitha punë jonë është e pamundur të japë rezultatin që duam. Situata më e vështirë është te ‘Rana e Hedhun’. Por, jam i shqetësuar edhe për kurorën në qytet, te kisha. Është një kurorë e mbjellë me pisha dhe pisha është si një mjet shpërthyes”, tha Balla.

Ai po ashtu tha se nuk ka të dhëna se shpërthimi i zjarrit të ketë qenë i qëllimshëm.

Shqipëria ka rreth 147 mjete zjarrfikëse dhe 1.300 efektivë dhe dy helikopterë Cougar, që sipas autoriteteve janë të pamjaftueshme për të përballuar situatën që krijohet me zjarre gjatë verës./REL

Nënpresidentja Kamala Harris tha të martën në një stadium të mbushur plot dhe të zhurmshëm në Xhorxhia, se muajt e ardhshëm do të ishin një betejë serioze dhe pranoi se demokratët ishin në këto momente të dobëtit, por e siguroi turmën se do të fitonin në nëntor.

“Kemi një betejë përpara nesh”, tha kandidatja e mundshme për presidente. “Ritmi në këtë garë po ndryshon. Dhe ka shenja se Donald Trump-i po e ndjen këtë”.

Pak më shumë se një javë më parë, Xhorxhia dukej se po dilte nga kontrolli i demokratëve: ekipi elektoral i Presidentit Joe Biden u zotua të përqendrohej më shumë në mbajtjen e shteteve që votojnë tradicionalisht demokratët dhe dha tregues se mund të ishin të gatshëm të mos përqendroheshin më shumë në shtete të tjera.

Por tani që Presidenti Biden është larguar nga gara dhe Nënpresidentja Harris është kandidatja e mundshme, demokratët po shprehin shpresa të reja për një hartë të zgjeruar zgjedhore dhe e mirëpritën nënpresidenten në shtetin që i dha Presidentit Biden diferencën e tij më të ngushtë të fitores në vitin 2020.

Zonja Harris tha se kur të zgjidhej, ajo do të punonte për të nënshkruar legjislacion të rëndësishëm për emigracionin dhe për t’i treguar ish-Presidentit Donald Trump se si duket “një udhëheqës i vërtetë”.

Stadiumi i basketbollit me kapacitet rreth 8,000 vende në Universitetin Shtetëror të Xhorxhias ishte mbushur me mijëra votues që tundnin banderola dhe kërcenin në një atmosferë që nuk do të ishte e mundur vetëm 10 ditë më parë, me partinë të përfshirë nga dyshimet nëse Presidenti 81-vjeçar Biden do të vazhdonte të kandidonte pas një paraqitjeje të zymtë që shtoi shqetësimet për moshën dhe aftësitë e tij.

Kryetari i Prishtinës, Përparim Rama ka thënë se është përmirësuar rrjeti i kanalizimit në kryeqytet.

Rama thotë se janë duke punuar në ndërtimin e 17.3 km rrjet të kanalizimit fekal në fshatrat e Prishtinës.

Sipas tij ky projekt do të përmirësojë kushtet higjienike për banorët e këtyre zonave.

“Jemi duke punuar intensivisht mbi ndërtimin e 17.3 km rrjet të kanalizimit fekal në fshatrat e Kryeqyteti Prishtina. Ky projekt i rëndësishëm do të përmirësojë ndjeshëm kushtet higjienike dhe cilësinë e jetës për banorët e këtyre zonave”, shkruan Rama në Facebook.

Policia në Prishtinë ka arrestuar një person, pasi raportohet se i njëjti duke mos përfillur urdhrin e lëshuar nga gjykata, kishte shkuar te banesa e bashkëshortes dhe dyshohet se ua ka drejtuar armën.

Gjatë kontrollit në banesën e të dyshuarit nuk është gjetur asgjë e dyshuar.

Me vendim të prokurorit, i dyshuari është dërguar në mbajtje.

Në rrugën Prishtinë – Mitrovicë ka ndodhur një aksident trafiku mes një kamioni dhe një veture.

Policia njofton se lëndime të rënda trupore ka pësuar ngasësi i veturës, i cili është dërguar në QKUK për tretman mjekësor.

Dy ankuese femra kanë njoftuar policinë se mbrëmjen e së hënës janë ngacmuar nga një i dyshuar në Prishtinë.

Bëhet e ditur se në konsultim me prokurorin, i dyshuari pas intervistimit është dërguar në mbajtje.

Rritet numri i rasteve të lindjeve para kohe, kaq foshnje u trajtuan në Neonatologji që nga janari

Ka shënuar rritje numri i rasteve të foshnjeve që kanë lindur para kohe dhe që kanë pasur nevojë për trajtim pas lindjes, në Klinikën e Neonatologjisë, të Qendrës Klinike dhe Universitare të Kosovës.

Përmes një komunikate për media të Shërbimit Spitalor Klinik Universitar të Kosovës (SHSKUK), bëhet e ditur se nga 1 janari deri më tani, në këtë klinikë janë trajtuar 430 foshnje, numër ky në rritje, krahasuar me vitet e tjera.

“Këto foshnja janë trajtuar për Asfiksioni Perinatal,( mungesë e oksigjenit para dhe pas lindjes), prematuritet( lindje para kohe), me komplikime, anomali të ndryshme kirurgjik, neonatale, anomali neurokirurgjike, e që trajtohen para dhe pas operimit të tyre, dhe infeksionet e ndryshme. Stafi i klinikës, me sukses po trajton edhe rastet e prematurëve (foshnjet e lindura para javës së 36, të shtatëzanisë ) deri tek prematurët me peshë ekstreme të lindjes, 500-999 gramë. Raste të tilla janë të predispozuar ndaj shumë komplikimeve për shkak të papjekurisë së gjithë sistemeve. Trajtimi bëhet sipas protokolleve bashkëkohore, duke filluar qe nga dhënia e kortikoideve nga ana e gjinekologë-obstetërve, deri tek mbështetja respiratore, jo -invazive dhe invazive”, thuhet në komunikatë.

Ndërsa, një nga manifestimet e prematuritetit ( lindjes para kohe), është edhe kriza e apnesë ( ndërprerja e frymëmarrjes), këto foshnje trajtohen me CPAP, në të tilla raste ndihmon ampula caffeine citrate, por jo të gjithë rastet kane nevojë për këtë lloj trajtimi.

Ne disa raste përveç Caffeine Citrate, përdoret ampula Aminophylinë, si terapi alternative.

“Foshnje të lindura parakohe, prej javës 28 deri 33, të shtatëzanisë dhe që kanë manifestuar kriza të apnesë, kanë qenë 175, e që trajtuar me Caffeine Citrate, ose Ampula Aminophylinë. Ndërsa foshnje të lindura prej javës 34 deri në 36, të shtatëzanisë kanë qenë 255, ku prej tyre 50 foshnje kanë pasur përkrahje me Caffeine Citrate, ose Ampula Aminophylinë”, thuhet më tutje në komunikatë.

Vlen të theksohet se ShSKUK, ka siguruar të dy ampulat, por për shkak të shpenzimit përtej planifikimit, Ampula Caffeine Citrate, ka munguar disa ditë, e që është zëvëndësuar si alternativë me Ampulën Aminophylinë.