Category: Lajme

Afër 800 mijë euro është kostoja e renovimeve të Klinikës Emergjente në Qendrën Klinike Universitare të Kosovës, investim i përbashkët ndërmjet Ministrisë së Shëndetësisë dhe Shërbimit Spitalor dhe Klinik Universitar të Kosovës, raporton Ekonomia Online.

Të martën, këto hapësira u përuruan nën praninë e kryeministrit Albin Kurti dhe ministrit të Shëndetësisë, Arben Vitia.

I pari i Qeverisë tha se hapësirat e Klinikës Emergjente i janë nënshtruar një renovimi të tërësishëm, hapësira këto që do të jenë më lehtë të qasshme për stafin dhe qytetarët që marrin shërbime.

Ai ka theksuar se tanimë “kushtet e punës janë në anën e mjekëve”, të cilët më herët përveç pacientëve, janë përballur edhe me kushtet e punës dhe vështirësitë e mëdha.

“Rreth 800 mijë euro janë investuar në klinikën emergjente. Një punë që është dashur të kryhet për pesë muaj, operatori ekonomik e ka kryer për tre muaj. Kemi rritje të numrit të shtretërve nga 20 në 25. Më herët, përveç pacientëve, mjekët janë përballur edhe me kushtet e punës dhe vështirësitë e mëdha. Tani kushtet e punës i kanë në anën e tyre. Në sallën e operimit, tani ekzistojnë edhe kamerat, që domethënë operimi mund te përcillet edhe nga jashtë ne kohë reale”.

Tutje, ai ka shtuar se operatori ekonomik që ka kryer punën është vendor, njëlloj edhe inxhinierët e puntorët.

“Rreth 800 mijë euro është investimi për këtë rinovim. Punëkryesi është vendor, me pronarë, inxhinierë, punëtorë të Kosovës”, ka thënë Kurti.

Klinika Emergjente e Qendrës Klinike dhe Universitare të Kosovës vazhdon ta ketë barrën kryesore në ofrimin e shërbimeve shëndetësore emergjente për pacientët e mbarë Kosovës. Bazuar në të dhënat në prokurimin publik, vlera e kontratës për rinovim të emergjencës është 779 mijë euro.

Në Dhomat e Specializuara të Kosovës (DhSK) në Hagë ka filluar dëshminë dëshmitari i 81-të i Zyrës së Prokurorit të Specializuar i cili ka kodin W04764 dhe është me masa mbrojtëse në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Pyetjet për dëshmitarin i ka filluar ZPS-ja e përfaqësuar nga prokurorja Sarah Clanton. sipas përmbledhjes se lexuar nga prokurorja, ky dëshmitar ka qenë anëtar i UÇK-së.

“Dëshmitari W04764 ka qenë anëtar i UÇK-së i cili ka qenë i pranishëm në Shqipëri dhe Kosovë gjatë vitit 1998 dhe 1999”, tha prokurorja.

Me arsyetimin e mbrojtjes se identitetit të dëshmitarit, seanca kaloi në sesion privat për marrjen e dëshmisë së tij.

Vlen të theksohet se u pranuan në prova materiale të gjitha deklaratat që dëshmitari kishte dhënë më herët për ZPS-në së bashku me materialet përcjellëse.

Kryetari i trupit gjykues, Charles Smith III njoftoi se dëshmia e këtij dëshmitari pritet të zgjasë rreth një ditë e gjysmë e që prej kësaj kohe, tri orë janë ndarë për pyetjet e ZPS-së dhe shtatë orë për kundërpyetjet e mbrojtjes.

Sipas kryegjyqtarit, të gjithë të akuzuarit janë prezent në sallën e gjyqit.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi

Komuna e Vushtrrisë ka nisur të martën punimet për asfaltimin e rrugës “Avni Saraçi”, projekt në vlerë prej 250 mijë eurosh, raporton EO.

Kryetari Ferit Idrizi ka thënë se asfaltimi i kësaj rruge është jashtëzakonisht i rëndësishëm, pasi që ajo do të lidhet me rrugën Drenica dhe me pjesën e rrugës që e lidh Mitrovicën.

Tutje, ai ka bërë të ditur se rruga e re do të jetë me gjerësi 7 metra, e cila do të posedojë edhe shtegun për biçikleta dhe trotuar për këmbësor.

“Jemi në vazhdën e finalizimit të projekteve pas finalizimit të asfaltimit të rrugës Druar-Pestov që inauguruam para disa ditës dhe jemi në prag të finalizimit edhe të rrugës Drenica. Sot jemi duke asfaltuar dhe finalizuar rrugën Avni Saraçi, që është një projekt jashtëzakonisht i rëndësishëm, një arteri që lidhet me rrugën Drenica edhe me këtë pjesën e rrugës që e lidh Mitrovicën”.

“Vlera e projektit është 250 mijë euro, është një rrugë që plotëson të gjitha standardet, e ka gjerësinë e rrugës 7 metra, ka shtegun për biçikleta dhe ka trotuarin për këmbësor. Besoj që kjo shumë shpejt do të lidhet edhe me shëtitoren që kemi filluar që ta ndërtojmë në mes të Urës së Gurit dhe banesës sportive”, ka thënë ai.

Idrizi ka folur edhe për projektet e tjera që janë duke u finalizuar në këtë komunë.

“Kjo është një prej shumë projekteve që jemi duke i realizuar të infrastrukturës në qytetin e Vushtrrisë, jemi duke realizuar edhe rregullimin e sheshit ku kanë përfunduar parkingjet nëntokësore, amfiteatri edhe ai do të jetë i gatshëm qysh në fillim të vitit të ardhshëm. Mandej e kemi tregun e gjelbër të qytetit i cili po ashtu është në realizim e sipër, është rruga Bekim Berisha, është rruga Lumni Surdulli dhe është edhe shkolla fillore Mustaf Venhari që është një projekt shumë i rëndësishëm për nxënësit e këtij qyteti”, ka thënë ai.

Kryeministri i vendit Albin Kurti ka folur sot për takimin që pati javën e kaluar me drejtorin e CIA-s, William Burns, në Prishtinë.

Kryeministri Albin Kurti theksoi se takimi ka shkuar mirë, ndërsa shtoi se vizita e tij në Kosovë është dëshmi e përkushtimit të Shteteve të Bashkuara të Amerikës (SHBA) për sigurinë dhe paqen në Kosovë.

“Takimi ka shkuar shumë mirë dhe natyrisht që ne kemi bashkëpunim me Shtetet e Bashkuara të Amerikës edhe me këtë institucion tejet të rëndësishëm të inteligjencës dhe sigurisë para së gjithash nëpërmjet Agjencisë së Kosovës për Inteligjencë. Unë e falënderoj shefin e CIA-sËilliam Burns, i cili vizitoi vendin tonë dhe kjo është edhe një dëshmi tjetër e përkushtimit dhe kujdesit të Shteteve të Bashkuara të Amerikës për sigurinë edhe parandalimin e çfarëdo kërcënimi të sigurisë për Republikën tonë në kuadër të marrëdhënieve bilaterale të Shteteve të Bashkuara të Amerikës, dhe të paqes dhe stabilitetit e sigurisë rajonale në Ballkanin Perëndimor”, theksoi Kurti.

Këto komente Kurti i bëri gjatë përurimit renovimit të Klinikës Emergjente në Qendrën Klinike Universitare.

Vizita e shefit të CIA-s në Kosovë po duket se i ka dhënë efektet e veta. Ajo që ishte krye temë deri në fillim të javës që shkoi, më nuk po përmendet nga partia në pushtet e Qeveria e Kosovës sot nuk i ka kthyer përgjigje as Dukagjinit nëse priten zhvillime për hapjen e urës mbi Ibër. Por, atje qytetarët dhe përfaqësuesit politikë fajtor për gjendjen po i lënë ndërkombëtarët

Ajo çka ishte temë kryesore javën e kaluar, këtë javë ka mbetur pak nën hije.

Kompania që kreu vlerësimet mbi urën e Ibrit ende nuk ka dhënë raportin final, e lidhur me këtë nuk dhanë ndonjë sqarim as nga ministria e Infrastrukturës, e as nga Qeveria Kosovës këtë të hënë.

Por, në Mitrovicën Veriore thuajse të gjithë janë njëzëri që kjo urë të hapet.

Madje kërkojnë nga ndërkombëtarët, që ose të hapin urën ose të sqarojnë pse nuk po lejojnë një gjë të tillë.

Nexhat Ugljanin, kryesues i Kuvendit Komunal në M.V deklaroi se “Nuk kemi sqarim, nuk ka as përgjigje kur i pyesim, pse janë kundër lëvizjes së veturave, sepse me hapjen e saj lirohet rruga, lëvizja e lirë është fryma demokratike europiane, por që kur i pyesim nuk kanë përgjigje konkrete”.

Ngjashëm, mendon edhe asamblisti tjetër nga radhët e iniciativës qytetare “Mitrovica”, Skënder Sadiku, veçse ky prapë insiston që gjithçka të veprohet në koordinim me ta.

Skënder Sadiku, Iniciativa qytetare “Mitrovica” tha “Vonë është hapja e urës, është dashtë edhe të mos jetë temë fare tash, është bërë matja se sa mund të duroj kjo urë, po askush nuk ka ba matje sa mund të durojnë njerëzit.”

Kurse edhe qytetarët e Mitrovicës Veriore, thonë se janë ndërkombëtarët ata që kanë ndërprerë këtë proces.

Nysret Krasniqi, qytetar tha se ” Hapja e urës është e nevojshme, se urat lidhin çdo popull, por ndërkombëtarët janë kundër, kanë dal pengesë, edhe pa vendos ata nuk mundët kërkush me hap”.

Zymber Ismajli, qytetar deklaroi se “Kjo nuk është dashtë me u mshel hiç I vjen vakti edhe hjeket, se këto ndërkombëtarët i majnë nuk i mbajnë as serbët, ndërkombëtarët për interesa të veta politike, qetash ata me dashtë me i hjek i hjekin edhe kerkush zo nuk bon hiç, hiç”.

Për planet e Qeverisë në hapjen e urës ose veprimet e tyre tutje, nuk janë përgjigjur sot për Dukagjinin.

Javën e kaluar kur ishte në SHBA e para vizitës së shefit të CIA-s në Prishtinë, kryeministri Albin Kurti tha se ‘nuk do t’i befasojnë ndërkombëtarët por as nuk mund të presin pafundësisht’.

Policia e Kosovës ka njoftuar për një rast të dhunës në familje që ka ndodhur ditën e hënë në Podujevë.

Policia bën të ditur se ka arrestuar një person, pasi ka ushtruar dhunë fizike ndaj gruas së tij.

“Podujevë / 26.08.2024 – 15:20. Është arrestuar i dyshuari mashkull kosovar, pasi që kishte ushtruar dhunë fizike ndaj bashkëshortes së tij viktimës femër kosovare. Nga i dyshuari është sekuestruar një armë zjarri AK-47 me 200 fishekë”, njofton policia.

Me vendim të prokurorit i dyshuari është dërguar në mbajtje.

Në mesin e akuzave ndaj Pavel Durov, themeluesi dhe CEO i aplikacionit të mesazheve Telegram, i cili ishte arrestuar në Francë, është edhe “refuzimi i dhënies së informacion për autoritetet”, transmeton Anadolu.

Sipas lajmit të gazetës britanike “The Guardian”, prokurorja publike e Parisit, Laure Beccuau, ka thënë se akuzat kundër Durov përfshijnë krime të tilla si transaksione të paligjshme, abuzim seksual të fëmijëve, mashtrim dhe refuzim për të dhënë informacion autoriteteve.

Ajo tha se Durov u arrestua si pjesë e hetimit “X”, i cili u hap më 8 korrik pas një hetimi paraprak nga oficerët e Luftës së Krimit të Organizuar.

Durov, i cili po merret në pyetje në polici, po hetohet për 12 krime të ndryshme.

Presidenti francez, Emmanuel Macron, gjithashtu bëri një deklaratë në llogarinë e tij në rrjetet sociale, duke pohuar se Durov u ndalua si pjesë e hetimit gjyqësor në lidhje me Telegram dhe sipas tij, ky “në asnjë mënyrë nuk ishte një vendim politik”.

– Procesi i arrestimit dhe më pas

Sipas raportimeve në mediat ruse dhe franceze, Durov ishte arrestuar më 24 gusht për akses në përmbajtje të paligjshme në Telegram. Arrestimi i Durov në aeroportin e Parisit, shkaktoi shumë polemika.

Telegram njoftoi se kompania është në përputhje me ligjet e Bashkimit Evropian (BE) dhe i përshkroi akuzat kundër Durov si “absurde”.

Ndërkohë që u bënë shumë reagime nga Rusia në lidhje me ndalimin e Durov, pronari i rrjetit social X, Elon Musk, gjithashtu bëri thirrje për “lirimin” e Durov.

Autoritetet gjyqësore franceze zgjatën periudhën e paraburgimit të Durov. Përderisa periudha e paraburgimit në Francë është e kufizuar në maksimum 96 orë, mund të vendoset nëse Durov do të lirohet apo do të mbahet në arrest në fund të kësaj periudhe.