Category: Lajme

Në shënimin e 25-vjetorit të themelimit të Policisë së Kosovës, drejtori i këtij institucioni, Gazmend Hoxha, deklaroi se për këto 25 vjet, policia ka dëshmuar se është një institucion i ndërtuar mbi themele të forta, me një mision fisnik të mbrojë dhe të shërbejë.

Ai shtoi se që nga ditët e para të themelimit, policia ka qene dhe vazhdon të jetë gardiane e rendit, ligjit dhe të drejtave të qytetarëve, duke kontribuar në stabilitetin dhe sigurinë e vendit tonë.

“Për 25 vjet policia është përballur me sfida të shumta, por gjithmonë ka triumfuar mbi to. Në këto 25 vjet policia ka arritur një nivel të lartë të profesionalizmit dhe bashkëpunimit me institucionet vendore dhe ndërkombëtare, duke qene një model i suksesit për rajonin dhe më gjerë”, shtoi Hoxha gjatë fjalimit të tij në ceremoninë festive, duke theksuar se e çmojnë dhe vlerësojnë kontributin dhe sakrificën e të gjithë zyrtarëve policorë.

Më tej kreu i policisë u shpreh se Policia e Kosovës është organizatë profesionale dhe se duke respektuar diversitetin gjinor dhe etnik, menaxhmenti i këtij institucioni i kushton një rëndësi të veçantë proceseve të rekrutimit duke inkurajuar sikurse femrat ashtu edhe minoritetet që t’i bashkohen.

“Policia e Kosovës nuk është thjesht një institucion. Ajo është një simbol i përkushtimit për paqen dhe sigurinë, si dhe i rolit të saj të pazëvendësueshëm në ndërtimin e një të ardhmeje më të mirë për brezat që do të vijnë. Sot ky institucion sot është një forcë e respektuar dhe e besuar nga qytetarët”, deklaroi drejtori i Policisë së Kosovës, Gazmend Hoxha.

Presidentja Vjosa Osmani ka thënë se Policia e Kosovës, gjatë çerek-shekullit të punës së saj, vazhdon të jetë një nga institucionet me të besueshme për qytetarët e Kosovës.

Osmani, në ceremoninë qendrore për shënimin e 25-vjetorit të themelimit të Policisë, ka thënë se puna e tyre ka qenë e rëndësishme për ndërtimin e një shoqërie ku mbizotëron rendi dhe qetësia.

Ajo ka kujtuar edhe 23 policët e rënë në detyrë, dhe policin e fundit Afrim Bunjaku, trimëria e të cilëve, siç tha ajo i frymëzon të gjithë.

“6 shtatori shënon një moment të rëndësishëm të Policisë sonë, një ditë që nuk është vetëm një festë e institucionit por nderim për sakrificën e grave dhe burrave që kanë shërbyer dhe vazhdojnë të shërbejnë si gardianë të rendit, sigurisë dhe sovraniteti tonë”.

“Policia, gjatë këtij çerek-shekulli, vazhdon të jetë një nga institucionit më të besuara e të rëndësishme të shtetit tonë. Puna juaj ka qenë e rëndësishme për ndërtimin e një shoqërie ku mbizotëron rendi e qetësia”.

“Nuk mund të flasim për Policinë e Kosovës pa përmendur policët e rënë në detyrë. Në mesin e 23 policëve të rënë në detyrë, i fundit është Afrim Bunjaku, trimëria e të cilëve na frymëzon të gjithëve. Ai bashkë me shumë të tjerë bëri sakrificën më te madhe për vendin tonë. Trashëgimia e të gjithë atyre që dhanë jetën për liri jeton në vlerat që ju pjesëtarët e Policisë së Kosovës i bartni çdo ditë”.

“Në kohë krize edhe sfidash duhet të qëndroni të palëkundur, për sigurinë e shtetit tonë , të ndërtuar me aq mund e sakrificë. Policia jonë duhet të vazhdojë të zhvillohet dhe të jetë e gatshme tu përgjigjet edhe kërcënimeve të reja, në një ambient gjithnjë e më kompleks”.

I dërguari i Bashkimit Evropian për dialogun Kosovë-Serbi, Miroslav Lajçak, tha se ka pajtim për mbajtjen e një rundi të ri të dialogut në nivel kryenegociatorësh.

Pas takimit në Qeveri, Lajçak para gazetarëve tha se shpreson se nuk do të ketë një bllokadë nga ana e serbëve në kufijtë me Kosovën.

Në takimin me Besnik Bislimin u fol dhe për hapjen e Urës së Ibrit, për të cilën Lajçak thotë se duhet të hapet, por me koordinim me aleatët e ngushtë të Kosovës.

“Kemi diskutuar dhe për çështjen e Urës së Mitrovicës, për hapjen e saj për transport, mendimi i Bashkimit Evropian besoj që tashmë është i ditur, por do ta përsëris, duhet të hapet, por të hapet në koordinim më partnerët e ngushtë të Kosovës”.

Lajçak u pyet nga gazetarët nëse është tërhequr letra që kryeministrja e atëhershme, Ana Bërnabiq, ia kishte dërguar dhejtorin e vitit të kaluar Bashkimit Evropian. Në atë letër, Serbia shprehu rezerva për Marrëveshjen në rrugën drejt normalizimit të raporteve, të arritur në Bruksel, dhe Aneksin për zbatim, të arritur në Ohër.

Lajçak tha se letra është tërhequr, duke shtuar se ka deklarata kohë pas kohe që nuk po ndihmojnë në këtë drejtim.

Rreth 200 mijë është vlera e pajisjeve mjekësore për Qendrat e Mjekësisë Familjare dhe atë të Urgjencës në Prishtinë, e cila është e ndarë në dy llote. Kështu ka bërë të ditur për Ekonomia Online, drejtori i Shëndetësisë, Izet Sadiku.

Sadiku ka thënë se ky investim përbëhet nga pajisje të ndryshme mjekësore për qendra të ndryshme në Kryeqytet, ndërsa pajisjet e para kanë arritur para 10 ditësh.

“Ne kemi ndarë një buxhet që këtë vit po shfrytëzohet e që është rreth 200 mijë euro i ndarë për vlerën e pajisjeve mjekësore për Qendrën e Mjekësisë Familjare dhe Qendrën e Urgjencës në Kryeqytet, e cila ka qenë e ndarë në dy llote. 150 mijë kanë qenë të dedikuara për pajisje mjekësore në qendrat e mjekësisë familjare dhe 50 mijë për Qendrën e Urgjencës në Kryeqytet. Këto pajisje kanë filluar para 10 ditësh të vijnë, me ardhjen e karrigeve stomatologjike, ku i kemi siguruar tri të tilla për QMF-në në Dardani dhe Hajvali dhe sot është ardhë shumica e materialit tjetër, e cila është e dedikuar laboratori, pajisje për mjekët familjarë dhe shumica është pajisje për stomatologji”, ka thënë Sadiku.

Presidenti ukrainas, Volodymyr Zelensky, sot do ta vizitojë Gjermaninë, ku mbështetësit e ushtrisë të Ukrainës po takohen disa ditë pas një prej sulmeve më vdekjeprurëse që kanë ndodhur gjatë luftës, teksa forcat ruse po bëjnë përparime në fushëbetejë.

Zelensky dhe kancelari gjerman, Olaf Scholz, do të zhvillojnë një takim në Frankfurt, sipas zëdhënësit të Qeverisë gjermane.

Ky zëdhënës nuk dha detaje të tjera lidhur me takimet që do të zhvillojë udhëheqësi ukrainas në Gjermani.

Por, media gjermane Der Spiegel, ka raportuar se Zelensky do të marrë pjesë në takimin e mbështetësve të Kievit – ku përfshihen edhe Shtetet e Bashkuara – që do të mbahet në bazën ajrore amerikane, Ramstein.

Kjo media raportoi se Zelensky do t’u bëjë thirrje shteteve perëndimore për më shumë ndihmë për Kievin gjatë takimit të Grupit të Kontaktit në këtë bazë.

Takimi në bazën që gjendet në jugperëndim të Frankfurtit do të udhëhiqet nga sekretari amerikan i Mbrojtjes, Lloyd Austin.

Ky do të jetë takimi i 24-të i Grupit të Kontaktit që është një aleancë joformale e përbërë nga më shumë se 50 shtete që e mbështesin Ukrainën, raporton rel.

Emisari i BE-së për dialogun Kosovë – Serbi, Miroslav Lajçak, ka mbërritur te ndërtesa e Qeverisë së Kosovës.

Lajçaku besohet se do të takohet me zëvendëskryeministrin Besnik Bislimi, për përgatitjen e takimit me kryenegociatorët në Bruksel.

Për këtë takim, Zyra e Kryeministrit nuk ka njoftuar, përveç Lajçakut përmes një njoftim në rrjetin social “X”.

Të paktën 17 nxënës kanë vdekur pasi një zjarr përfshiu konviktin e shkollës së tyre gjatë natës në Kenia, tha policia më 6 shtator.

Zjarri në Akademinë Hillside Endarasha, në qarkun Nieri, shpërtheu rreth mesnatës dhe përfshiu një konvikt ku po flinin fëmijët.

“Janë 17 raste me fatalitet nga ky incident dhe ka edhe të tjerë që janë dërguar në spital me lëndime të rënda”, tha zëdhënësja e policisë kombëtare, Resila Onyango.

Policia në Kenia nuk bëri publike moshën e viktimave.

Në këtë shkollë fillore vijojnë mësimin afër 800 nxënës të moshës 5 deri në 12 vjeç.

Sipas zëdhënëses së policisë, 16 nga të plagosurit kanë plagë të rënda dhe janë dërguar në një spital aty pranë.

Shkaku i zjarrit, sipas policisë, ende nuk dihet por, autoritetet kanë nisur hetimet.