Category: Lajme

Sot në Kuvendin e Kosovës do të mblidhen disa komisione parlamentare.

Në ora 08:30 do të mblidhet Komisioni për Shëndetësi dhe Mirëqenie Sociale dhe Komisioni për Buxhet, Punë dhe Transfere i cili pret në takim një delegacion nga Komisioni i Punës dhe Çështjeve Sociale nga Parlamenti Gjerman.

Ndërkaq në ora 11:00 Komisioni për Ekonomi, Industri, Ndërmarrësi dhe Tregti, shqyrton raportin me rekomandime për lexim të dytë për Projektligjin për Mbrojtjen e konsumatorit, për Projektligjin për Kripto-asetet. Gjithashtu rishpall konkursin për zgjedhjen e “Kryesuesit të Komisionit Shqyrtues në Autoritetin Rregullator për Shërbimet e Ujit – ARRU”.

Ministri i Kulturës, Rinisë dhe Sportit, Hajrulla Çeku, me fillim nga ora 11:00 do të raportojë në Komisionin për Mbikëqyrjen e Financave Publike, lidhur me raportin e auditimit për pasqyrat financiare vjetore të Ministrisë së Kulturës, Rinisë dhe Sportit, për vitin 2023. (Kuvendi i Kosovës, salla N302)

Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, në ora 13:00 shqyrton draft-planin e punës së Komisionit për sesionin vjeshtor të vitit 2024.

Po ashtu në ora 13:00 Komisioni për Mjedis, Ushqim, Bujqësi, Planifikim dhe Zhvillim, shqyrton në parim Projektligjin për ndalimin e përdorimit të pijeve energjike për personat e moshës nën tetëmbëdhjetë vjeç.

Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit, në ora 13:30miraton raportin e mbikëqyrjes së zbatimit të Ligjit për Administrimin e Pasurisë së Sekuestruar dhe të Konfiskuar.

Sekretari amerikan i Shtetit, Antony Blinken, do të udhëtojë në Egjipt sot mes përpjekjeve të vazhdueshme për të angazhuar partnerët kryesorë rajonalë në Lindjen e Mesme për të paraqitur një propozim të rishikuar për një armëpushim në Rripin e Gazës.

Zëdhënësi i Departamentit të Shtetit, Matthew Miller, u tha gazetarëve të hënën se “Ne vazhdojmë të angazhohemi me partnerët tanë në rajon, veçanërisht me Egjiptin dhe Katarin, për atë që do të përmbajë ai propozim, në mënyrë që palët të arrijnë një marrëveshje përfundimtare.”

Shtetet e Bashkuara nuk kanë dhënë një afat kohor për propozimin e rishikuar, megjithëse zyrtarët janë shprehur se ai do të paraqitet së shpejti.

Propozimi synon të zgjidhë çështjet kryesore që kanë shkaktuar ngërçin disamujor në bisedimet e ndërmjetësuara nga Shtetet e Bashkuara, Katari dhe Egjipti, me synimin për të siguruar një armëpushim mes Izraelit dhe Hamasit dhe lirimin e pengjeve të rrëmbyera nga Hamasi në fillim të luftës më 7 tetor 2023.

Në Kajro, Blinken do të bashkëkryesojë seancën hapëse të Dialogut Strategjik SHBA-Egjipt me Ministrin e Jashtëm egjiptian Badr Abdelatty.

Sekretari Blinken do të takohet gjithashtu me udhëheqësit egjiptianë për të diskutuar përpjekjet për arritjen e një armëpushimi në Gazë, lirimin e të gjitha pengjeve, lehtësimin e vuajtjeve të civilëve palestinezë dhe sigurinë rajonale, tha zëdhënësi Miller, raporton VOA.

Më 17 shtator 1998, në Prishtinë nga policia pushtuese serbe kidnapohet në mënyrë tinëzare dhe zhduket pa gjurmë heroi i kombit Xhavit Haziri.

Xhaviti ishte intelektual, veprimtar, ideolog e organizator me shkathtësi të jashtëzakonshme.

Xhavit Haziri, është njëri nga veprimtarët më të devotshëm të çështjes sonë kombëtare. Ai, qysh nga mosha e hershme rinore u aktivizua në organizatat ilegale që luftonin për çlirim e ribashkim kombëtar, duke qenë njëri nga udhëheqësit më të merituar të strukturave drejtuese të këtyre organizatave.

Intensiteti kulmor i veprimtarisë së tij patriotike, me shembuj konkret, nga viti 1985 e këndej ishte i pandërprerë derisa e rrëmbyen kriminelet e UDB-ës serbe.

Kontributi i tij në rritjen e shkallës së rezistencës kundër pushtuesve dhe organizimin e kryengritjes ishte i madh.

Xhavit Haziri, shpallet Hero i Kosovës për kontributin e tij ndaj atdheut më 26 nëntor të vitit 2010 nga Jakup Krasniqi, ish-ushtrues i detyrës së Presidentit të Kosovës.

Ai tashmë i përjetësuar në bronz i bënë roje lirisë së atdheut.

Gjatë ditës së sotme, ish këngëtari Feronit Shabani i njohur si Fero, ka kërkuar ndihmë duke thënë se është në gjendje jo të mirë për shkak të, siç thotë ai, padrejtësive që i janë bërë.

Në një lidhje të drejtpërdrejtë në emisionin COMPAS në ATV, Fero tha është në gjendje të keqe edhe për arsye se nuk po guxon të flasë nga frika se mos prokuroria e Gjilanit po ia humb të drejtën që ta shoh vajzën e tij për pesë ditë në muaj.

“Me të tregu drejt që unë kom ardh në këtë gjendje shkaku të shumë padrejtësive që më janë bërë dhe shkaku që nuk jam t’u guxu me folë për shumë padrejtësi që mu kanë ba, për arsye se nesër prokuroria mundet me ma marrë inati mua edhe mundet me mi hup ndoshta edhe qeto pesë ditë në muaj që e kam me e pa vajzën”, tha Fero.

“Thirrja e jeme është për Prokurorinë e Gjilanit, sidomos për prokuroren që e ka rastin. Unë s’po di ndryshe qysh me i tregu prokurores që unë jom në gjendje shumë të keqe, çka nëse mua më ndodh diçka nesër, çka nëse unë më nuk mund t’i kontrolloj ndjenja e mia”, shprehet Fero. /atvlive.tv

Gjatë ditës së sotme, ish këngëtari Feronit Shabani i njohur si Fero, ka kërkuar ndihmë duke thënë se është në gjendje jo të mirë për shkak të, siç thotë ai, padrejtësive që i janë bërë.

Në një lidhje të drejtpërdrejtë në emisionin COMPAS në ATV, Fero tha se vajza e tij sot është kidnapuar, për shkak se siç thotë ai, enti social pa i dhënë ndonjë detaj, i kanë thënë se vajza e tij ka ikur.

“Unë si prind i vajzës time ka kohë që më bëhet padrejtësi si në aspektin e vendimeve, po ashtu edhe në aspektin e mospërfilljes dhe të asaj që vet Gjykata ka marrë vendim dhe ka kohë që pres unë ta shoh vajzën time. Befasohna se vajza e ime udhëton nëpër shtete të ndryshme pa lejen time dhe pa u njoftuar se në cilin vend ajo gjindet. Dhe, më tragjike ka qenë ndodhia e sotit ku unë e konsideroj se vajza më është kidnapuar me një lloj mënyrë, për shkak se enti social më ka njoftuar se në ora katër me ardhë me e marrë vajzën, e në moment që unë shkoj me e marrë vajzën në kohën e caktuar që ata ma kanë caktuar, nuk më japin asnjë detaj se në çfarë drejtimi më është marrë vajza, vetëm se më thonë se vajza ka ikur”, tha Fero. /atvlive.tv

Është rritur numri i përgjithshëm i përdorueseve, abuzueseve të drogave në Kosovë.

Rreth 2% e popullësisë së përgjithshme në Kosovë kanë provuar së paku një herë në jetën e tyre një lloj substance narkotike.  Sipas raporteve të dhëna nga institutet që vëzhgojnë nga afër qendrat dhe rastet e individeve të varur nga droga, kjo situatë është shqetësuese dhe duhet  shteti të merr masa institucionale për parandalimin dhe menaxhimin e kësaj situate.

I ftuar në emisionin Libero, përfaqësuesi i qendrës “Labirinth” z. Muharrem Ademi, shpalosi të dhëna mbi gjendjen e viteve të fundit sa i përket kësaj problematike.

“ Ne kemi një data-bazë ku të regjistruar janë 2800 persona, të cilët kanë kërkuar trajtim më të thellë dhe mosha mesatare ka kaluar në 16 vjec. Pra viteve të fundit, numri i përdoruesëve të rinj është rritur, e poashtu ka raste specifike ku janë nga kjo dukuri janë prekur edhe fëmijët” potencoi Muharrem Ademi.

Sipas rasteve të studimeve thuhet se tashmë nuk bëhët fjalë vetëm për një lloj droge.

“Kokaina është droga që po përdorët më së shumti, që vjen menjëherë pas kanabisit apo marijuanës.” ritheksoi përfaqesuesi i qendrës për trajtim të narkotikëve.

Ndërkohë, tashmë është aprovuar strategjia (shtërore)  e re kundër drogave 2024-2028,  me të cilën parashihen kampanja, udhëzues dhe masa tjera parandaluese të cilat do të synojnë shkollat, kafiteritë, klubet e natës. Përveç kësaj, me aktivitetet parandaluese synohet edhe të rritet roli i sektorit jo-qeveritar në këtë drejtim, veçanërisht organizatave rinore, por edhe roli i shëndetësisë primare në parandalimin e rasteve urgjente të përdorimit  të drogës.

Për më shumë rreth diskutimit të kësaj tematike, ndiqni linkun e emisionit Libero:

Kryeministri Albin Kurti i ka shkuar në vizitë për ditëlindjen këngëtarit Sabri Fejzullahu, i cili i mbush 77-vjet sot.

Në një postim në Facebook, ai thotë se pak njerëz si Sabri Fejzullahu mund të përbashkojnë shpirtin energjik dhe krijimtarinë produktive të kombit tonë.

“Ai me bashkëshorten Nera dhe djalin Ermalin, me vëllezër e mbesa, na pritën me ngrohtësi, dhe gjatë kësaj vizite, Sabriu ndau me ne një udhëtim magjepsës përmes gjashtë dekadave të karrierës së tij. Ai e nisi rrugëtimin e tij muzikor më 5 shtator 1965, dhe prej asaj dite ka qenë një forcë e vrullshme që ka formësuar muzikën pop në Kosovë dhe më gjerë”, ka thënë Kurti.

Tutje, Kurti u shpreh se me Fejzullahun biseduan për përjetimet mbresëlënësë të këngëtarit,

“Duke përmendur bashkëpunimet me figura të shquara dhe momentet kyçe që shënuan karrierën e tij të pasur, si dhe përvojat e tij me njerëz të papërsëritshëm si Jusuf Gërvalla”.

“Çdo histori ishte një pasqyrim i jetës së ndryshimeve të mëdha politike nëpër të cilat kaloi Kosova, e ku mëson diçka më shumë edhe për atë që e ke ditur, gjithnjë të mbështjella me dashurinë e tij të pamasë për artin dhe publikun, e cila ndjehet në çdo performancë të tij”, ka thënë Kurti.

Një tërmet me magnitudë 5.2 ka ndodhur vetëm 5 minuta më parë 62 km në veriperëndim të Buzaut, Rumani, njoftoi Qendra Sizmologjike Evropiane-Mesdhetare (EMSC).

Tërmeti goditi në një thellësi të ndërmjetme prej 137 km nën epiqendrën pranë Buzau, Municipiul Buzău, Rumani, pasdite të së hënës, 16 shtator 2024, në orën 17:40 me orën lokale, shkruan VizionPlus, transmeton KosovaPress.

Në bazë të të dhënave paraprake sizmike, tërmeti nuk duhet të kishte shkaktuar dëme të konsiderueshme, por me gjasë është ndjerë nga shumë persona si dridhje e lehtë në zonën e epiqendrës.