Category: Lajme

Korporata Energjetike e Kosovës ka bërë të ditur se ka përfunduar me sukses një projekt të rëndësishëm në TC Kosova A.

Projekti, i fokusuar në instalimin e transformatorit të ri, ka si qëllim sigurimin e furnizimit me energji elektrike për shpenzimet e përbashkëta në TC Kosova A.

Transformatori i ri, me kapacitet 40 MVA (220/6.3 kV), me vlerë prej rreth një milion euro, ofron një zgjidhje optimale për furnizimin e sigurt me energji elektrike, duke rritur në mënyrë të konsiderueshme sigurinë në njësitë e prodhimit.

“Transformatori ekzistues, i instaluar në vitet ’70, kishte probleme të shumta dhe humbje të mëdha energjie gjatë transformimit, duke qenë praktikisht i harxhuar dhe gati jo funksional”, thuhet në njoftimin e KEK-ut.

“Vlen të theksohet se transformatori i ri ka humbje shumë më të vogla për shkak të efiçiencës më të lartë në procesin e transformimit të energjisë elektrike nga një nivel tensioni në një tjetër. Kjo do të ndihmojë në përmirësimin e performancës energjetike të sistemit dhe do të kontribuojë në stabilitetin e furnizimit me energji elektrike”.

Në muajin e ndërgjegjësimit kundër kancerit të gjirit, Qendra Kryesore Mjekësore Familjare “Dr. Vezir Bajrami”, në Komunën e Shtimes është bëtë me pajisjen e mamografit. Kryetari i kësaj komune, Qemajl Aliu ka siguruar donacion edhe nga një kompani, nga e cila të gjitha gratë që paraqiten në QKMF-në, do të ketë për një vit analizat dhe ekzaminimet falas në kuadër të diagnozës që kanë.

Po ashtu, Aliu ka bërë të ditur se në QKMF do të risjellë radiologun, shërbimet gjinekologjike dhe së shpejti do të ketë marrëveshje me institutin e anatomisë patologjike në Spitalin e Ferizajt që të kryhet PAP test, e cila diagnostikon në zanafillë kancerin e qafës së mitrës.

“Për të gjitha gratë tashmë të diagnostifikuara me kancer gjiri, e kemi siguruar edhe një donacion nga kompania “Avicena”. Të gjitha gratë për një vit të gjitha analizat dhe ekzaminimet qe do të kenë nevojë këto zonja, t’i kryejnë në kuadër të diagnozës që kanë, mund ti marrin falas nga kompania “Avicena”, duke u lajmëruar në QKMF. Do të diagnostikohen që në zanafillën e tyre, përmes mamografit duke ri sjellë radiologun prapë në komunën e Shtimes, shërbimet gjinekologjike, shumë shpejt do të kemi marrëveshje mes QKMF si dhe Institutit të Anatomisë Patologjike në spitalin e Ferizajt që edhe PAP test, që është një nga analizat qe e diagnostikon, në zanafillë kancerin e qafës së mitrës, të kryhet në komunën e Shtimes”, ka thënë Aliu.

Ndërsa, iniciatori për këtë donacion, deputeti i LVV-së, Dritan Hyseni bën thirrje të shfrytëzohet aparati dhe të sensibilizohet opinioni, që të testohen me qëllimin nëse ka ndryshim në organizmin e tyre, të evidentohet në fazat e hershme dhe të trajtohet me kujdesin maksimal.

“Urojmë që ky aparat të nxjerr vetëm rezultate negative. Bëj thirrje të shfrytëzohet aparati, të sensibilizohet opinioni, që sa më shumë gra të Shtimes, të zonave përreth të vinë dhe testohen, me qëllim që edhe nëse ka ndonjë ndryshim në organizmin e tyre, të evidentohet në fazat e hershme dhe të trajtohet me kujdesin maksimal”, ka shtuar Hyseni.

Po ashtu, donatori i kompanisë “Medica” për pajisjen e mamografit, Adrian Ukelli është shprehur se me këtë pajisje, pacientët do të kenë një jetë më të mirë dhe po ashtu familja do të ketë anëtarin më gjatë pranë familjes.

“Sot morra vesh që ky është aparati i parë, për herë të parë në Komunën e Shtimes, duke marrë parasysh se kanceri i gjirit është një sëmundje në rritje, atëherë, ne po e marrim edhe një meritë për çdo rast i cili do të zbulohet në fazë të hershme në mënyrë që pacientëve të kenë një jetë më të mirë dhe po ashtu familja të ketë anëtarin më gjatë pranë familjes”, është shprehur Ukelli.

E drejtoresha e shëndetësisë në Komunën e Shtimes, Mimoza Salihu ka falënderuar kryetarin Aliu për mundësinë, kompaninë “Medica”, “Avicenën” dhe të gjithë mjekët në këtë QKMF për punën e tyre të pa lodhshme.

Pas pranimit të pajisjes së mamografit, kryetari Qemail Aliu së bashku me mjekët e QKMF-së, në shenjë sensibilizimi për ato që janë të prekura nga kanceri i gjirit, kanë ecur në rrugët e Shtimes. /kp

Ministri i Financave, Hekuran Murati tha se nga rritja e pensioneve, do të përfitojnë 304 mijë e 16 qytetarë dhe se kostoja buxhetore është 100 milionë euro shtesë. Rritja e pensioneve nis nga muaji tetor, e ai për kategori të luftës nga janari 2025, raporton EO.

“Është një lajm i mirë për të gjithë pensionmarrësit, sepse rritja do të jetë së paku prej 20 për qind, pra ato pensione që rregullohen sipas skemave dhe ligjit për pensionet e financuara nga shteti, rritja do të fillojë të zbatohet nga ky muaj, pra muajit tetor”.

“Edhe pensioni për kategori të luftës, do të hyjë në fuqi nga janari. Ky numër prek 304 mijë e 16 përfitues. Impakti i tërësishëm buxhetor parashihet të jetë prej 100 milionë euro shtesë”.

Murati ka thënë se për shkak të disa problemeve me kontrata kolektive në disa komuna, qeveria u ka ofruar ndihmë në këtë. Por sipas tij, komunat këtë nuk e kanë shfrytëzuar. Ndër të tjera, Murati thotë se ka pasur kontrata kolektive që janë nënshkruar paligjshëm.

“Në lidhje me kontratën kolektive por edhe të ngjashme, duhet të theksohet mjaftueshëm që buxhetimi për kontrata kolektive duhet të bëhet para se ato të nënshkruhen. Ky është procesi ligjor që duhet ta ndjek secila kontratë kolektive. Pra me problemin që kemi të bëjmë në disa komuna, janë me kontrata kolektive që janë nënshkruar paligjshëm, pa autorizimet e nevojshme. Pra kemi pasur kontrata kolektive që janë nënshkruar në kohë fushate pa kurrfarë financimi”.

“Gjithsesi, ne iu kemi ofruar komunave që të mund të buxhetojnë në një linjë tjetër, që quhet rezerva. Megjithatë nuk ka pasur komuna që e kanë shfrytëzuar këtë mundësi”.

Komisioni Qendror i Zgjedhjeve (KQZ) ka mbajtur mbledhjen e radhës, raporton Ekonomia Online. Besnik Buzhala, drejtor i Zyrës për Regjistrim, Certifikim dh Kontrollin Financiar të subjekteve Politike, tha se është duke vazhduar periudha për ndërrimin e Qendrës së Votimit brenda komunës, e cila ka filluar më 29 gusht dhe do të përfundojë më 26 dhjetor 2024.

Sipas tij, në bazë të të dhënave, deri më 6 tetor 2024 janë pranuar 744 kërkesa për ndërrimin e Qendrës së Votimit (574 përmes platformës elektronike dhe 170 në zyrat e Komisioneve Komunale të Zgjedhjeve) prej të cilave janë aprovuar 725 kërkesa, ndërsa 19 të tjera janë refuzuar.

Buzhala sqaroi se është duke vazhduar periudha e aplikimit për regjistrim të votuesve jashtë Kosovës, e cila ka filluar më 29 gusht dhe do të përfundojë më 26 dhjetor 2024. Në bazë të të dhënave, deri më 6 tetor 2024, përmes platformës elektronike janë pranuar 6 069 kërkesa për regjistrim, prej të cilave janë aprovuar 5 571, ndërsa 498 të tjera janë refuzuar. Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit.

Ai më tej ka bërë të ditur se Në kuadër të përgatitjeve për organizimin e Zgjedhjeve për Kuvendin e Kosovës, të cilat do të mbahen më 9 shkurt 2025, ka filluar programi orientues i trajnimit për anëtarët e Komisioneve Komunale të Zgjedhjeve.

“Deri më tani, seancat e trajnimit janë mbajtur me anëtarë të Komisioneve Komunale të Zgjedhjeve nga komunat Mitrovicë e Jugut, Skenderaj dhe Vushtrri, Mitrovicë e Veriut, Zvçan, Leposaviq dhe Zubin Potok. Në ditët në vazhdim, programet e trajnimit do të mbahen edhe në regjionet tjera, si: Prishtinë, Prizren, Pejë, Gjilan, Ferizaj dhe Gjakovë”.

Kryetari i AAK-së, Ramush Haradinaj, është takuar ambasadorin e Shteteve të Bashkuara të Amerikës, Jeffrey Hovenier.

Në një postim në Facebook, ai tha se diskutuan për zhvillimet politike.

“E falënderova personalisht ambasadorin Hovenier për angazhimin e tij dhe të ShBA-ve në mbështetje të Kosovës”.

“Partneriteti i vendit tonë me ShBA-të është afatgjatë, strategjik dhe i përjetshëm”, ka thënë Haradinaj.

Presidentja e Republikës së Kosovës, Vjosa Osmani ka udhëtuar për në Mal të Zi për të marrë pjesë në takimin vjetor të krerëve të shteteve të rajonit në kuadër të Procesit të Bërdo Brione.

Presidentja Osmani do të pritet nga nikoqiri i takimit, Presidenti i Malit të Zi, Jakov Milatovic, si dhe nga Presidentët e dy shteteve bashkëthemeluese të Procesit Bërdo Brione, Presidenti i Kroacisë, Zoran Milanovic dhe Presidentja e Sllovenisë, Nataša Pirc Musar. Në sesionin e përbashkët me liderë të rajonit, Presidentja Osmani do të mbajë fjalim, gjersa do të realizojë takime edhe me krerët e disa shteteve pjesëmarrëse.

Takimi vjetor i liderëve do të fokusohet në procesin e zgjerimit të Bashkimit Evropian dhe rëndësinë e anëtarësimit të rajonit në BE. Në sesionin kryesor të liderëve, Presidentja Osmani do të flasë për përkushtimin e Kosovës për integrim të plotë në institucionet euroatlantike, për paqe dhe siguri të qëndrueshme, si dhe për bashkëpunim rajonal.

Kryeministri u pyet nëse do të ndryshojnë pagat e mësuesve dhe policëve dhe mësimdhënësve, në konferencën për media ku njoftoi për rritjen e pensioneve.

Albin Kurti tha se “pagat në sektorin publik janë rritur në vitin e kaluar”.

“Kemi pasur pa numër masa të ndryshme që i kanë ndihmuar kategoritë e ndryshme shoqërore, me ç’rast duhet theksuar se pagat në sektorin publik janë rritur në vitin e kaluar. Sivjet po rriten pensionet, ndërkohë që në mandatin tjetër, ne do ta bëjmë reformën pensionale. Vjet janë rritur pagat në sektorin publik dhe kemi pasur një rritje të ndjeshme, të paprecedentë në Kosovën në këto vitet e fundit, andaj tash jemi të përqendruar te rritja e pensioneve”, tha ai.

Kurti tha se janë “mbi 300 mijë veta në Republikën e Kosovës që do të përfitojmë”, me ç’rast kostoja buxhetore e kësaj tha se është “plus 100 milionë euro”.Ai tha se kjo rritje po bëhet këtë muaj, pasi duan ta fusin këtë në planifikimin e buxhetit për vitin e ardhshëm.

“Këtë po e bëjmë tash në muajin tetor, meqenëse në të njëjtën kohë jemi duke e shkruar edhe buxhetin për vitin 2025 që do të votohet në këtë muaj në mbledhjen e Qeverisë së Republikës së Kosovës. Pra, rritja e këtyre pensioneve është duke u bërë në kuadër të planifikimeve tona afatmesme dhe afatgjata. Përpara, në rastin më të mirë ka pasur planifikime afatshkurtra”, tha Kurti.

Ministri i Financave, Hekuran Murati, tha se kjo rritje e pensioneve u bë e mundur “falë politikave të mirëmenduara dhe rritjes së të hyrave”.

Kolektivi Për Mendim dhe Veprim Feminist ka mbajtur protestë solidarizuese me punëtoret greviste të Kuvendit të Kosovës, raporton Ekonomia Online. “Schafberger shtyp punëtorët, Kuvendi e lejon”, “Punëtorët nuk janë mall”, “Çka bënë njeri me 275 euro në Kosovë”, ishin disa nga pankartat e realizuar nga kjo organizatë për t’u solidarizuar me punëtorët teknik të Kuvendit të Kosovë, të cilët tash e një muaj janë në grevë.

Aktivisti, Lekë Krasniqi tha se protesta synon të sjellë vëmendje mbi kërkesat e punëtoreve për paga dhe kushte më të dinjitetshme pune. Sipas tij, qëndresa e punëtoreve shuhet egërsisht me kërcënime e koncesione simbolike, duke shtuar se pagat janë të pajetueshme, ka shkelje e të drejtave elementare, korrupsion e keqpërdorimi i fondeve.

Madje tha se punëtoret janë duke përballuar vështirësi të shumta gjatë grevës, duke shtuar se aktualisht, pagat e tyre janë vetëm 275 euro, ndërsa ekziston rreziku që për muajin shtator të mos marrin fare pagë dhe të humbasin vendin e punës.

“Trajtimit skandaloz zyrtar i mbivendoset një sërë zhvatjesh e dallaveresh sipas rastit, me të cilat punuesi i tyre, Schafberger, bashkë me kuvendin e heshtur, ia merr nga dora ato pak pare që i mbesin. Ndër muaj e ndër vite, gratë që mirëmbajnë kuvendin dhanë mund e njërës neper korridoret, sallat, kthinat zyrat e parlamentit, duke kryer një punë të stigmatizuar dhe të nënçmuar, në përballje me përbuzjen e shpërfilljen klasiste, seksiste e raciste të parlamentareve e shefave, me paga të mjerueshme derisa kompania private e tenderuar përfiton mbi kurrizin e tyre. Ato pritet që të qojnë muajin me 270€ bruto, kurse vetëm udhëtimi deri në vendin e punës iu kushton disa prej tyre më se 40€ në muaj, 15% të rrogës. Trajtimit skandaloz zyrtar i mbivendoset një sërë zhvatjesh e dallaveresh sipas rastit, me të cilat punuesi i tyre, schafberger, bashkë me kuvendin e heshtur, ia merr nga dora ato pak pare që i mbesin. Orët shtesë dhe pushime te papaguara, punëtorët që përfundojnë punën e dy tre njerëzve, veç për me mbush xhepin e kompanisë”, ka thënë Krasniqi.

“Kjo gjendje nuk ishte një incident i veçuar, Schafberger, kontraktuesi i tyre, në fakt furnizon një mori institucionesh në administratën publike, ministri, komuna e madje edhe Universitetin e Prishtinës. Ne të gjitha këto vende sundon shtypja e njëjtë. Pagat e pajetueshme, shkelja e të drejtave elementare, korrupsioni e keqpërdorimi i fondeve, kurse qëndresa e punëtoreve shuhet egërsisht me kërcënime e koncesione simbolike. E përfituesit dëshirojnë me përsërit të njëjtin ciket edhe këtu. Përveç mjegullimeve burokratike dhe fjalive të buta e boshe prej disave, grevistet po dëshirojnë mi mbrapstë me heshtje e tu e përmend zëvendsueshmerinë e tyre me i shti prapë ne pune. Ato janë kanos madje edhe që janë ulur para kuvendit, një hapësirë e cila pamdehet si publike. Ndoshta deputetët nuk kanë qejf me pa pasojat enje problemi që nuk duan ta zgjidhin”, shtoi ai.