Category: Lajme

Është ndarë sot nga jeta akademiku kosovar, piktori Tahir Emra.

Lajmin e ka bërë të ditur Akademia e Shkencave dhe Arteve të Kosovës.

Ata kanë njoftuar që i ndjeri do të varroset në varrezat e qytetit të Gjakovës më 8 tetor, teksa AShAK-u po atë ditë do të mbajë mbledhje komemorative në orën 11:00, e më pas do të bëhen edhe homazhet deri në orën 12:30.

“Me pikëllim të thellë njoftojmë se sot, më 7 tetor 2024, në moshën 86-vjeçare ndërroi jetë piktori i shquar, ndër më të shquarit e artit shqiptar, akademik Tahir Emra”, thuhet një njoftimin e AShAK-ut.

“Akademik Emra u lind në Gjakovë më 1938. Shkollën fillore e kreu në vend­lindje, ndërsa të mes­men të artit më 1959 në Pejë”.

“Në vitet 1959-1961 punoi mësues vizatimit në vendlindje, më pas studioi në Akademinë e Arteve Figurative në Beograd. Diplomoi më 1966 për pik­turë, teksa një vit më vonë u zgjodh ligjërues e pastaj profesor në Shkollën e Lartë Pedagogjike të Prishtinës, në Degën e Arteve Figurative”.

“Më pas vijoi studimet pasuniversitare, magjistroi më 1970 dhe më 1974 u zgjodh docent për vizatim dhe pikturë në Akademinë e posathemeluar të Arteve të Universitetit të Prishtinës dhe më 1982 profesor ordinar”.

“Ka qenë docenti dhe prodekani i parë shqiptar i Akademisë së Arteve, pastaj shef katedre në dy mandate. Gjatë viteve ’90, për disa vite ka mbajtur mësim me studentët në atelienë e shtëpisë së tij. Për dhjetë vjet (1994-2004) ka mbajtur mësim në lëndët vizatim dhe pikturë edhe në Akademinë e Arteve të Universitetit të Tetovës. Ishte njëri nga themeluesit e Shoqatës së Artistëve Figurativë të Kosovës dhe pjesëmarrës i rregullt në aktivitetet e saj”.

“Anëtar korrespondent i Akademisë së Shkencave dhe të Arteve të Kosovës është zgjedhur në vitin 2000, ndërsa anëtar i rregullt në vitin 2008. Për një mandat ka qenë sekretar i Seksionit të Arteve të ASHAK-ut”.

“Ka hapur disa ekspozita të pavarura dhe ka marrë pjesë në ekspozita kolektive brenda dhe jashtë vendit. Veprat e tij gjenden në shumë galeri e muze të botës, në institucione dhe në koleksione private”.

“Në vitin 2013 Akademia e Shkencave dhe e Arteve të Kosovës botoi monografinë e piktorit Tahir Emra me riprodhimet e veprave më të njohura dhe me studimin e piktorit Kujtim Buza”.

Shefi i diplomacisë serbe, Marko Gjuriq, tha se nuk mund të jenë të kënaqur siç tha ai “me reagimin e ndërkombëtarëve ndaj Albin Kurtit”

Ai për televizionin serb Happy deklaroi se “Beogradi po ndërton një lloj blloku të ri politik, i cili është i interesuar për bashkëpunim me Serbinë dhe nuk e bën këtë dhe nuk e shikon në mënyrë të njëanshme qëndrimin e Serbisë”.

Ai ka përmendur edhe seancën e fundit të Asamblesë së Përgjithshme të OKB-së.

“Për Serbinë, çdo shtet anëtar i Bashkimit Evropian është i rëndësishëm. Deri në 70 për qind të mallrave tona shkojnë në BE. Rezultatet fenomenale ekonomike që kemi arritur nuk do të ishin të mundshme pa marrëdhënie të mira me vendet e BE-së. Gjatë turneut 18 ditor, unë shkova nga Estonia në Uashington, dhe pastaj në Nju Jork kemi pasur takime me më shumë se 70 burrështetas në mbarë botën. Unë takohem me delegacionin e Vanuatu-s dhe Kurti po e ndjek për t’u takuar me kryeministrin, por me dikë më të ulët në delegacion”, tha Gjuriq.

Demokracia në Veprim i është drejtuar me një letër krerëve të subjekteve politike në vend duke iu kërkuar që lista e kandidatëve për deputetë të jetë e ndarë në mënyrë të barabartë për dy gjinitë.

DnV ka përmendur modelin Zebër- çdo i dyti kandidat të jetë i gjinisë tjetër.

“Përkundër që legjislacioni ynë aktual ka një prag të garantuar prej 30% për gjininë më pak të përfaqësuar në listat zgjedhore, kjo nuk do të duhej t’a kufizojë ambicien e subjekteve politike për të përfshirë sa më shumë gra, dhe për të tentuar krijimin e listave sipas modelit ZEBER. Ky model, me renditje të barabartë mes grave dhe burrave – ku çdo i dyti kandidat është i gjinisë tjetër – do të garantonte një përfaqësim më të drejtë gjinor dhe do të siguronte që gratë të kenë një mundësi më të madhe për t’u zgjedhur në Kuvendin e Kosovës.”

DnV thotë se përzgjedhja e këtij modeli do të kontribuojë në promovimin e një demokracie më gjithëpërfshirëse dhe përfaqësuese.

“Modeli “zebër”, që ka filluar të gjejë zbatim edhe në shtetet e rajonit dhe më gjerë duhet parë si masë afirmative dhe praktike për të siguruar përfshirjen e grave, pa kompromentuar vlerën e votës së barabartë. Ky hap përpara do të kontribuojë në promovimin e një demokracie më gjithëpërfshirëse dhe përfaqësuese, duke ndikuar pozitivisht në kulturën politike të vendit tonë dhe në vetë demokratizimin e brendshëm të partive.”

DnV shton se barazia gjinore nuk është thjesht një detyrim ligjor, por një përgjegjësi politike dhe morale.

“Barazia gjinore nuk është thjesht një detyrim ligjor, por një përgjegjësi politike dhe morale që ne të gjithë duhet të promovojmë për të ndërtuar një shoqëri më të drejtë dhe gjithëpërfshirëse. Roli juaj është vendimtar në këtë periudhë, dhe angazhimi juaj do të jetë thelbësor në realizimin e këtij qëllimi. Ne besojmë se miratimi i listave zebra do të përmirësojë jo vetëm përfaqësimin e grave, por edhe besimin e qytetarëve në institucionet tona demokratike.”

Instituti i Kosovës për Drejtësi (IKD) ka publikuar raportin “Përgjegjësia e Mediave ndaj komenteve të paligjshme”, raporton EO.

Në këtë raport theksohet fakti se komentet në lajmet e postuara në rrjetet sociale janë bërë burim kryesor i gjuhës së urrejtjes, fyerjeve, linçimit publik, kërcënimeve e thirrjeve për dhunë. Për këtë është bërë thirrje që Qeveria e Kosovës ta bëjë draftimin e një ligji që merret me këtë çështje.

Betim Musliu, hulumtues i lartë në IKD, ka thënë se në Kosovë përmbajtja mediale e publikuar në rrjete sociale është jashtë çdo rregullimi institucional, kjo pasi, Këshilli i Pavarur i Mediave (KPM) dhe Këshilli i Pavarur i Mediave të Shkruara (KPMShK) nuk kanë juridiksion në përmbajtjen e cila publikohet në rrjete sociale.

“Komente e postuara nga lajmet e publikuara nga mediat në rrjetet sociale janë bërë pothuajse burim kryesor i gjuhës së urrejtjes, fyerjeve, linçimit publik, kërcënimeve, thirrjeve për dhunë. Deri më tani nuk janë marrë masa për këtë dukuri. Sipas jurisprudencës së Gjykatës Evropiane për të Drejtat e Njeriut (GjEDNj) mediat mbajnë përgjegjësi për të kontrolluar komentet e paligjshme të postuara në lajmet e publikuara nga ta në rrjete sociale. Mediat janë të obliguara që të largojnë pa vonesa komente e paligjshme të bëra në publikimet e tyre”.

“Përmbajtja mediale e publikuar në rrjete sociale është jashtë çdo rregullimi institucional, kjo pasi KPM dhe KPMSHK nuk kanë juridiksion në përmbajtjen e cila publikohet në rrjete sociale. GjEDNj ka theksuar se pa u përjashtuar përgjegjësia e komentuesve, përgjegjës për komente e paligjshme nën kushte të caktuara mbajnë edhe publikuesit e postimeve në të cilat publikohen komentet e paligjshme”, ka thënë ai.

Gzim Shala, hulumtues i lartë në IKD, ka thënë se komentet e jashtëligjshme janë ato komente që haptazi cenojnë të drejtat e personave të tjerë, që përbejnë gjuhë të urrejtjes apo nxisin dhunë, dhe se mediat obligohen që pa vonesa t’i largojnë sharjet, linçimet e fyerjet publike.

Shala ka theksuar se Qeveria dhe Kuvendi i Kosovës duhet të miratojnë bazën ligjore adekuate, në përputhje me jurisprudencën e GjEDNj-së, që të specifikohet me ligj përgjegjësia e mediave për komentet e paligjshme në publikimet e tyre në rrjetet sociale.

“Sipas GjEDNj për mediat nuk kërkohet të analizojnë vërtetësinë dhe ligjshmërinë e secilit koment, por përgjegjësia e tyre shtrihet në komentet të cilat haptazi, pa një analizë ligjore apo gjuhësore, kuptohet se janë të paligjshme. IKD rekomandon që KMSHK në rregullativën e saj duhet të parasheh përgjegjësinë e mediave për komente e paligjshme. Draftimi i ligjit duhet që të bëhet në mënyrë të kujdesshme që të adresojë përgjegjësit e mediave në këtë fushë, por në as një mënyrë mos të cenojë pavarësinë e mediave”, ka thënë ai.

Një aksident trafiku ka ndodhur mbrëmjen e së shtunës në rrugën Gjilan- Prishtinë, ku një veturë ka rënë në Liqenin e Badocit dhe kanë vdekur tre të rinjtë që ishin në automjet.

Policia e Kosovës ka dhënë detaje përmes raportit 24 orësh.

“AKSIDENT TRAFIKU ME FATALITET Rr. Gjilan-Prishtinë / 05.10.2024 – 23:00. Është raportuar se në rrugën magjistrale Gjilan – Prishtinë te liqeni i Badovcit, një veturë me targa vendore në lëvizje dyshohet se ka shkaktuar vet aksident dhe si pasojë e lëndimeve tre persona – viktimat, drejtuesi i veturës dhe dy pasagjerë meshkuj kosovarë kanë ndërruar jetë, vdekjen e të cilëve e ka konstatuar mjeku. Njësitë relevante policore, prokurori, njësitë emergjente dhe të kërkim-shpëtimit kanë dalë në vendin e ngjarjes dhe me urdhër të prokurorit trupat e pa jetë janë dërguar në IML për obduksion.” – thuhet në raport.

Inspektorati Policor i Kosovës arrestuar të dielën një zyrtar policor në Fushë Kosovë me dyshimin se i njëjti ka kryer veprën penale të “Kanosje”.

“Inspektorati Policor kishte pranuar informacione nga Policia e Kosovës se ky zyrtar policor (zyrtar i njësisë për mbrojtje të afërt i cili ishte jashtë detyrës zyrtare) dyshohet se ka kanosur dy zyrtarë policorë të kanë qenë në detyrë.

Dyshohet se kanosja ka ndodhur pas një mosmarrëveshje në komunikacionin rrugor në rrugën “Dardania”, në kryqëzim me rrugën “Hajrullah Zymi”, pranë shkollës “Mihail Grameno” në Fushë Kosovë”, thuhet në njoftimin e IPK-së.

Pas pranimit të këtyre informacioneve, hetuesit e IPK-së në koordinim me prokurorinë kanë ndërmarrë veprime hetimore pas të cilave zyrtari policor i dyshuar në këtë rast është arrestuar kurse nga prokurori kompetent i është caktuar masa e ndalimit për 48 orë.

Lidhur me rastin e njëjtë, si pjesë e procedurave administrative dhe hetimore, zyrtari policor është suspenduar.

Kryeministri Albin Kurti, bashkë me ministrin e Financave, Hekuran Murati do të mbajnë sot konferencë për media.

Konferenca nis nga ora 13:30 në Ndërtesën e Qeverisë.

Ndërkaq, nga ora 11:00, Kurti merr pjesë dhe në hapjen e Panairit të Janjevës, “Mirëserdhët në Janjevë”.

Policia e Kosovës në koordinim me Prokurorinë Speciale, sipas gazetës Sinjali, është duke zhvilluar një operacion policor brenda ndërmarrjes publike “Pallati i Rinisë” në Prishtinë.

Sipas sinjalit, me urdhër të Prokurorisë Speciale po kryhen kontrolle dhe deri më tani një person është arrestuar.

Dyshimet raportohen se janë ngritur për keqpërdorime dhe përfshirje të personave të caktuar në veprimtari të kundërligjshme.

Sot, në ora 12:00, para Kuvendit të Republikës së Kosovës, do të zhvillohet një protestë në mbështetje të punëtoreve teknikë të Kuvendit, të cilat kanë hyrë në grevë që prej tri javësh.

Organizuar nga Kolektivi për Mendim dhe Veprim Feminist, protesta synon të sjellë vëmendje mbi kërkesat e punëtoreve për paga dhe kushte më të dinjitetshme pune.

Sipas njoftimit të Kolektivit, punëtoret janë duke përballuar vështirësi të shumta gjatë grevës.

“Ato për tri javë rresht janë duke qëndruar në të ftohtë, në shi e pa mbështetje… për të kërkuar rrogë dhe kushte të dinjitetshme pune,” theksohet në deklaratë.

Aktualisht, pagat e tyre janë vetëm 275 euro, ndërsa ekziston rreziku që për muajin shtator të mos marrin fare pagë dhe të humbasin vendin e punës.

Në njoftim, po ashtu, ngrihet shqetësimi për kompaninë Shcafberger, e cila ka injoruar kërkesat e punëtoreve, duke krijuar pasiguri për të ardhmen e tyre, sidomos me përfundimin e kontratës së kompanisë me Kuvendin në fillim të nëntorit.

“Përkeqësimi i kushteve klimatike dhe përfundimi i kontratës paraqet rrezik të drejtpërdrejt për to,” thotë Kolektivi.