Category: Lajme

Pjesëtarë të përjashtuar të opozitës janë përpjekur të futen me forcë në sallën e Kuvendit të Shqipërisë, i cili u mblodh të enjten në një seancë të rregullt plenare.

Garda e Republikës vendosi gardh metalik pranë hyrjes kryesore në ndërtesën Kuvendit, për ta parandaluar hyrjen e 24 deputetëve të opozitës, të cilët janë të përjashtuar përkohësisht nga pjesëmarrja në seancat e Kuvendit.

Kreu i grupit parlamentar të partisë kryesore opozitare, Partia Demokratike, Gazmend Bardhi, e quajti “akt të turpshëm” vendosjen e gardhit metalik para hyrjes së ndërtesës së Kuvendit.

“Kuvendi nuk është burg dhe as qeli burgu, edhe pse shumica e përfaqësuesve të mazhorancës qeverisëse duhet të ishte në burg dhe jo në atë sallë. Shqipëria bëhet kështu vendi i vetëm që, nga njëra anë, është vend anëtar i NATO-s dhe vend kandidat për në Bashkimin Evropian, dhe, nga ana tjetër, rrethon hyrjen kryesore të Kuvendit për ta mbrojtur nga deputetët ‘armiq’”, shkroi ai në rrjetet sociale.

Në kohët e fundit opozita në Shqipëri ka protestuar në mënyra të ndryshme për ta kërkuar largimin e partisë në pushtet të kryeministrit Edi Rama, Partia Socialiste, dhe zëvendësimin e saj me një qeveri teknike para zgjedhjeve të vitit të ardhshëm.

Deputetët – të cilët u përjashtuan më 2 tetor për një periudhë prej 10 deri në 60 ditë për shkak se dogjën ulëset e tyre në Kuvend – tentuan të hynin me forcë duke u përpjekur ta hiqnin gardhin metalik, por nuk u lejuan nga Garda.

Kuvendi i vazhdoi punimet me deputetët e shumicës, të cilët shkuan në sallë një orë para nisjes së seancës për të shmangur përplasjet e mundshme me deputetë opozitarë. Një grup i vogël i deputetëve të papërjashtuar të opozitës morën pjesë në seancë gjithashtu, dhe kërkuan që të hiqet rrethimi me gardh metalik.

Pranë ndërtesës së Kuvendit në gatishmëri janë edhe automjete të policisë dhe zjarrfikësve, për shkak të situatave të kaluara, kur janë djegur karrige dhe disa manekinë.

Më 30 shtator, deputetë të Partisë Demokratike nxorën jashtë sallës së Kuvendit karriget e tyre dhe u vunë zjarrin në shenjë proteste ndaj burgosjes së deputetit Ervin Salianji. Ai u dënua me një vit burgim për sajimin e një audio-përgjimi.

Shtetet e Bashkuara dhe Bashkimi Evropian kanë shprehur shqetësim dhe keqardhje për skenat që u panë më 30 shtator në Kuvendin e Shqipërisë dhe u bënë thirrje pushtetit dhe opozitës që të zhvillojnë dialog.

Javën e kaluar, opozita organizoi një protestë kundër burgosjes së Salianji, gjatë të cilës u hodhën mjete shpërthyese në drejtim të Kryeministrisë dhe disa objekteve tjera.

Dhjetë zyrtarë policorë u lënduan si pasojë e hedhjes së molotovit, lëndëve piroteknike dhe sendeve tjera të forta.

Policia ka iniciuar kallëzim penal për tre drejtues të Partisë Demokratike në lidhje me këtë protestë./REL

Ish-ministri i jashtëm i Kosovës, Enver Hoxhaj ka ndarë kujtime të rëndësishme nga puna dhe bashkëpunimi me ish-ambasadoren e SHBA-së në Kosovë, Tina Kaidanow, e cila ka vdekur dje.

“I pikëlluar mora lajmin për vdekjen e ish-ambasadores së SHBA-së në Kosovë, Tina Kaidanow. Ajo ishte një grua e fortë dhe një diplomate e zonja, e cila shërbeu në Kosovë në një kohë historike të saj dhe me të cilën kam bashkëpunuar ngushtë për shumë vite! Derisa isha pjesëmarrës i negociatave për pavarësinë e Kosovës në procesin e Ahtisaarit në Vjenë me disa kolegë të tjerë, Tinën e takoja në Prishtinë dhe shpesh më udhëzonte me këshilla të ndryshme në një kohë kur po lindte shteti ynë i pavarur.”, shkroi Hoxhaj.

“Kur procesi ishte përmbyllur, por Këshilli i Sigurimit të OKB-së nuk arriti pajtim të plotë për të mbështetur planin e Ahtisaarit në fund të vitit 2007, ishte Tina ajo që në muajin shkurt më tha “ndoshta në fundjavë do të shpallet pavarësia e Kosovës”, duke e përmendur 17 shkurtin si datë të mundshme! E kur pavarësia u shpall dhe Kosova nuk kishte ministri të jashtme, ishte Tina ajo që vinte shpesh në zyrën time dhe shpesh e takoja në Ambasadën e SHBA-së në Prishtinë, për të organizuar vizita në vende të ndryshme, për njohje. Ndër takimet më të rëndësishme, ishte edhe Konferenca Islamike e OBI-së në Senegal, pa përmendur vendet tjera perëndimore.”, ka shkruar Hoxhaj në Facebook.

“E kujtoj ende gëzimin e saj dhe shkëlqimin e syve që kishte kur vendi i saj SHBA njohu pavarësinë e Kosovës dhe Tina ishte ajo që ia dorëzoi njohjen më të rëndësishme personalisht Presidentit dhe Kryeministrit të Kosovës! Aq shumë e donte Kosovën, sa falë vendosmërisë së saj, nënshkruajtëm Marrëveshjen e Fullbrihtit në mes të SHBA-së dhe Kosovës, duke e bërë të jashtëzakonshëm rolin e saj në ndërtimin e shtetit nga themele! Kur e përfunoi mandatin si ambasadore në Kosovë në vitin 2009, sa herë shkova në Washington e takoja me punë e për darkë dhe dëgjoja këshillat e saj për Kosovën! Lajmi për vdekjen e saj më lendoi shumë dhe çdo herë do ta mbaj në mendje dhe zemër kujtimin për të. Kontributi i saj i jashtëzakonshëm në forcimin e marrëdhënieve mes Kosovës dhe Shteteve të Bashkuara, do të mbetet gjithnjë i paharruar. Ajo e donte Kosovën dhe popullin e saj. Pushoftë në paqe!”, shkroi Hoxhaj.

Instituti i Kosovës për Drejtësi, ka reaguar ndaj seancave të jashtëzakonshme të thirrura nga opozita dhe mospjesëmarrja e deputetëve të pozitës.

Sipas IKD-së, opozita parlamentare në Kuvendin e Kosovës ka thirrur tre seanca të jashtëzakonshme për tema me interes publik si për qytetarët dhe për funksionimin e institucioneve të Republikës së Kosovës.

Derisa sipas tyre bojkoti i opozitës përbën shkelje të besimit të qytetarëve.

“Seancat janë thirrur çështjet:1. Debat Parlamentar për komunikimet e kryetares së Grupit Parlamentar të Lëvizjes Vetëvendosje, znj. Mimoza Kusari – Lila, me Milan Radojiçiç;2. Debat Parlamentar për mungesën e ushqimit në Ushtrinë e Republikës së Kosovës;3. Debat Parlamentar për procesin e përllogaritjes së borxheve të kompanive ambalazhuese të ujit dhe mënyrën e shlyerjes së këtyre borxheve nga Ministria e Mjedisit, Planifikimit Hapësinor dhe Infrastrukturës”, thuhet në njoftim.

Përkundër interesit publik për debat parlamentar për çështjet e lartëpërmendura, sipas IKD-së shumica parlamentare, e përfaqësuar nga deputetët e Lëvizjes Vetëvendosje, ka refuzuar të marrë pjesë në seancat e jashtëzakonshme, pa asnjë arsyetim legjitim dhe të besueshëm.

“Ky bojkot përbën një shkelje të besimit të qytetarëve dhe detyrave dhe përgjegjësive si deputet të Kuvendit të Kosovës dhe si partia më e madhe parlamentare. Instituti i Kosovës për Drejtësi (IKD) shpreh shqetësim të thellë për këtë situatë dhe kërkon nga LVV të largohet nga rruga e bojkotit kundërkushtetues. Kjo praktikë dhe qasje e LVV është e pazakontë dhe cenon rëndë vlerat demokratike të Republikës se Kosovës. IKD konsideron se debatet parlamentare janë shtyllë e rëndësishme e demokracisë dhe përfaqësimit demokratik, deputetët e shumicës parlamentare e kanë obligim të marrin pjesë në mënyrë aktive në diskutimin e çështjeve që prekin interesat e qytetarëve dhe të shtetit. Bojkoti i seancave parlamentare dëmton jo vetëm integritetin e Kuvendit por edhe injorim ndaj qytetarëve të Kosovës”, thuhet në njoftimin e IKD-së.

Tutje në komunikatë thuhet se deputeti ka detyrimin të respektojë dispozitat kushtetuese dhe ligjin.

“Nga Kushtetuta dhe ligji deputeti vepron në përputhje me besimin që i është dhënë nga qytetarët. Ai duhet të jetë i përgjegjshëm ndaj tyre dhe t’i mbrojë interesat e tyre, duke u angazhuar për një qeverisje transparente dhe llogaridhënëse. Pavarësisht përkatësisë partiake deputetet duhet të ruajnë dhe promovojnë vlerat bazë të garantuara më Kushtetutën e Kosovës. Deputetët duhet të jenë shembull i respektimit dhe promovimit të vlerave demokratike, sundimit të ligjit dhe qeverisjes se mirë. Bojkotimi i deputetëve për çështje ku kërkohet llogaridhënie dhe rezultate ndaj fenomeneve të korrupsionit qeveritar, ruajtjen e integritetit të institucioneve publike dhe sqarimit të situatave ku deputetë të Kuvendit të Kosovës komunikojnë me persona në kërkim ndërkombëtar për vepra penale kundër rendit kushtetues të Kosovës, ulin besimin e publikut në vullnetin politik për shtet ligjor dhe luftim te korrupsionit. Kjo qasje padyshim se pengon rrugën integruese të Kosovës në strukturat euro-atlantike. Po ashtu, IKD shpreh shqetësim për mungesën e vazhdueshme të Kryetarit të Kuvendit në drejtimin e këtyre seancave të jashtëzakonshme”, thuhet në komunikatë.

Instituti i Kosovës për Drejtësi bën thirrje që të gjitha partitë politike, pa dallim, të përmbushin detyrimet e tyre që rrjedhin nga Kushtetuta e Kosovës, ligjet e aplikueshme dhe obligimet ndaj qytetarëve të Kosovës dhe vlerave demokratike që Republika e Kosovës i ka marr përsipër në rrugën e saj drejtë integrimit evropian.

Policia e Kosovës ka njoftuar se brenda 24 orëve janë shqiptuar 2 mijë e 601 gjoba.

Sipas policisë brenda kësaj periudhe kanë ndodhur 21 aksidente trafiku me të lënduar dhe 40 aksidente trafiku me dëme materiale.

Poashtu policia ka arrestuar 14 persona për 24 orë dhe 9 persona janë dërguar në mbajtje.

Instituti i Kosovës për Drejtësi (IKD) ka thënë se deputetët e Lëvizjes Vetëvendosje kanë shkelur Kushtetutën duke bojkotuar tre seancat e jashtëzakonshme të thirrur nga opozita.

Deputetët e pushtetit bojkotuan seancën për komunikimet e Mimoza Kusari-Lilës me kryeterroristin Milan Radoiçiq, për mungesën e ushqimin në Forcën e Sigurisë (FSK) dhe për procesin e përllogaritjes së borxheve të kompanive ambalazhuese të ujit dhe mënyrën e shlyerjes së këtyre borxheve nga Ministria e Mjedisit, Planifikimit Hapësinor dhe Infrastrukturës.

Përkundër interesit publik për debat parlamentar për çështjet e lartpërmendura, IKD-ja ka thënë se shumica parlamentare, e përfaqësuar nga deputetët e Lëvizjes Vetëvendosje, ka refuzuar të marrë pjesë në seancat e jashtëzakonshme, pa asnjë arsyetim legjitim dhe të besueshëm. Ky bojkot, sipas tyre, përbën shkelje të besimit të qytetarëve dhe detyrave dhe përgjegjësive si deputet i Kuvendit dhe si partia më e madhe parlamentare.

“Instituti i Kosovës për Drejtësi (IKD) shpreh shqetësim të thellë për këtë situatë dhe kërkon nga LVV të largohet nga rruga e bojkotit kundërkushtetues. Kjo praktikë dhe qasje e LVV është e pazakontë dhe cenon rëndë vlerat demokratike të Republikës se Kosovës. IKD konsideron se debatet parlamentare janë shtyllë e rëndësishme e demokracisë dhe përfaqësimit demokratik, deputetët e shumicës parlamentare e kanë obligim të marrin pjesë në mënyrë aktive në diskutimin e çështjeve që prekin interesat e qytetarëve dhe të shtetit. Bojkoti i seancave parlamentare dëmton jo vetëm integritetin e Kuvendit por edhe injorim ndaj qytetarëve të Kosovës”, thuhet në reagim.

Deputeti, siç shkruan IKD-ja, ka detyrimin të respektojë dispozitat kushtetuese dhe ligjin, të cilat përbëjnë bazën e funksionimit të një shoqërie demokratike. Ky obligim e vendos deputetin “në një rol të rëndësishëm, ku veprimet dhe vendimet e tij duhet të reflektojnë vlerat dhe parimet e shtetit ligjor”.

“Nga Kushtetuta dhe ligji deputeti vepron në përputhje me besimin që i është dhënë nga qytetarët. Ai duhet të jetë i përgjegjshëm ndaj tyre dhe t’i mbrojë interesat e tyre, duke u angazhuar për një qeverisje transparente dhe llogaridhënëse. Pavarësisht përkatësisë partiake deputetet duhet të ruajnë dhe promovojnë vlerat bazë të garantuara më Kushtetutën e Kosovës. Deputetët duhet të jenë shembull i respektimit dhe promovimit të vlerave demokratike, sundimit të ligjit dhe qeverisjes se mirë. Bojkotimi i deputetëve për çështje ku kërkohet llogaridhënie dhe rezultate ndaj fenomeneve të korrupsionit qeveritar, ruajtjen e integritetit të institucioneve publike dhe sqarimit të situatave ku deputetë të Kuvendit të Kosovës komunikojnë me persona në kërkim ndërkombëtar për vepra penale kundër rendit kushtetues të Kosovës, ulin besimin e publikut në vullnetin politik për shtet ligjor dhe luftim te korrupsionit. Kjo qasje padyshim se pengon rrugën integruese të Kosovës në strukturat euro-atlantike. Po ashtu, IKD shpreh shqetësim për mungesën e vazhdueshme të Kryetarit të Kuvendit në drejtimin e këtyre seancave të jashtëzakonshme”, thuhet tutje në reagim.

IKD-ja u ka bërë thirrje të gjitha partive politike të përmbushin detyrimet që rrjedhin nga Kushtetuta, “ligjet e aplikueshme dhe obligimet ndaj qytetarëve të Kosovës dhe vlerave demokratike që Republika e Kosovës i ka marr përsipër në rrugën e saj drejt integrimit evropian”.

Kryetari i Aleancës për Ardhmërinë e Kosovës, Ramush Haradinaj, ka reaguar pas lajmit për vdekjen e Tina Kaidanow, ambasadores së parë të SHBA-së në Kosovë.

Haradinaj tha se Kaidanow, ishte një mike e madhe e Kosovës dhe një diplomate e jashtëzakonshme.

Ai ka shkruar se shërbimi i saj si ambasadorja e parë e ShBA-së në Kosovën e pavarur dhe kontributi i saj për Kosovën do të mbeten përjetësisht në kujtesën tonë.

“Ajo luajti rol të fuqishëm në procesin e pavarësimit të Kosovës, si Shefe e misionit të zyrës amerikane. Shërbimi i saj si Ambasadorja e parë e ShBA-së në Kosovën e pavarur dhe kontributi i saj për vendin tonë do të mbeten përjetësisht në kujtesën tonë”, ka shkruar ai në Facebook.

Derisa, kryetari i AAK-së tha se Tina ishte një grua e fortë, mbështetëse e paepur e lirisë dhe demokracisë së Kosovës.

Krerët e shteteve dhe qeverive të BE-së kërkojnë të enjten një emërues të përbashkët për grindjen mbi migracionin në Bruksel. Kievit i premtohet ndihmë e mëtejshme, kundër rezistencës së Hungarisë.

Praktikisht në çdo samit të muajve të fundit, 27 krerët e shteteve dhe qeverive të BE-së kanë diskutuar për kufizimin e imigracionit dhe kthimin e azilkërkuesve të refuzuar. Kjo temë është në fokus edhe në takimin e së enjtes (17.10.) në Bruksel. As pakti i BE-së për azilin, i cili u miratua gjashtë muaj më parë, ende nuk i ka dhënë fund debatit. Duke pasur parasysh numrin në rritje të refugjatëve dhe rritjen e partive populiste të krahut të djathtë, shumë qeveri po bëjnë thirrje që të merren masa më shpejt ose veprime që shkojnë përtej rregulloreve të dakorduara. Disa anëtare të BE as nuk duan t’i përdorin këto rregulla të BE.

Qëndrime të ndryshme

Polonia psh. dëshiron të pezullojë përkohësisht të drejtën e azilit duke marrë shkak nga qëndrimi i Bjellorusisë dhe Rusisë, të cilat, sipas Varshavës, po kontrabandojnë në mënyrë të qëllimshme emigrantët në vend. Finlanda mbylli kufijtë e saj për emigrantët nga Rusia në korrik. Qeveria holandeze e ekstremit të djathtë ka kërkuar të tërhiqet tërësisht nga rregullat e BE-së për azilin. Hungaria po kërkon gjithashtu një të ashtuquajtur opt-out në Bruksel.

Pas sulmit islamik me thikë në Solingen disa javë më parë, qeveria gjermane vendosi kontrolle në kufijtë me fqinjët e saj të BE-së, disa prej të cilëve e kritikuan fqinjin. Berlini po ushtron presion edhe mbi Italinë dhe Greqinë për të rikthyer njerëzit që fillimisht hynë në BE atje, por më pas u zhvendosën në Gjermani.

Rregulla më të ashpra dëbimi

Ka shumë ndryshime aktualisht në politikën e migracionit të BE-së, por jo gjithmonë synohet një drejtim i përbashkët. Ujdia po shfaqet në kërkesën për rregulla më të rrepta të dëbimit. Shumica e vendeve anëtare, përfshirë Gjermaninë, po i bëjnë thirrje Komisionit të BE-së që të ushtrojë më shumë presion mbi qeveritë që nuk duan të marrin përsëri bashkatdhetarët e tyre.

Ndërkohë Presidentja e Komisionit Evropian, Ursula von der Leyen ka reaguar me një letër drejtuar 27 shteteve të BE-së. Ajo shprehet për një kuadër të ri ligjor për të përmirësuar aftësinë e BE-së për të vepruar. Vetëm rreth një e pesta e shtetasve të vendeve të treta, të cilëve iu kërkua të largoheshin nga vendi janë kthyer. Von der Leyen mbron përafrimin e procedurave të shteteve anëtare në mënyrë që migrantët pa të drejtë qëndrimi të mos mund të shfrytëzojnë boshllëqet në sistem.

Italia si model?

Sipas presidentes së Komisionit Evropian, vendet e BE duhet të mendojnë për ngritjen e qendrave të kthimit jashtë BE-së. Ajo i referohet bashkëpunimit mes Italisë dhe Shqipërisë, ku do të përpunohen kërkesat për azil nga emigrantët që u kapën nga autoritetet italiane në Mesdhe në dy qendra pritjeje. Edhe “Modeli i Ruandës” po diskutohet, i cili nënkupton zhvendosjen e procedurave të azilit në Afrikë. Si mund të funksionojë kjo në praktikë dhe mbi çfarë baze ligjore mbetet e paqartë. Por shtete partnere për këtë model nuk janë shfaqur ende.

Ndihma për Ukrainën pavarësisht bllokadës së Hungarisë

Në samitin e BE-së këtë të enjte diskutohen gjithashtu pasojat e luftës së agresionit të Rusisë në Ukrainë. Presidenti Volodymyr Zelenskyj do të prezantojë “planin e tij të fitores” në Bruksel. Ai mund të marrë me vete premtimin e një kredie prej 35 miliardë eurosh që BE vendosi javën e kaluar – ky është kontributi evropian në paketën e ndihmës së vendeve të G7-s, e cila arrin në 45 miliardë euro.

Kredia do të paguhet me të ardhura interesi nga pasuritë e ngrira të Bankës Qendrore Ruse. Megjithatë, Hungaria është kundër një zgjidhjeje që do të siguronte përdorim afatgjatë dhe të sigurt të fitimeve nga interesi dhe në këtë mënyrë po bllokon një pjesëmarrje të SHBA. Pasi Uashingtoni dëshiron të sigurojë që fondet ruse të destinuara për të shlyer kreditë të mbeten në fakt të ngrira dhe po i bën thirrje BE-së ta ndërpresë zgjatjen e sanksioneve ndaj Rusisë çdo gjashtë muaj, por ta zgjasë këtë periudhë në tre vjet.

Përshkallëzimi në Lindjen e Mesme

Një vit pas sulmit të Hamasit ndaj Izraelit, samiti i BE trajton të enjten edhe përkeqësimin e situatës në Lindjen e Mesme. BE-ja ka vështirësi për të gjetur një pozicion të unifikuar në lidhje me situatën në Lindjen e Mesme. Disa shtete anëtare, përfshirë Gjermaninë, theksojnë të drejtën e Izraelit për vetëmbrojtje, ndërsa të tjera, si Spanja dhe Irlanda, vënë theksin më të madh tek kriza humanitare e popullatës civile palestineze në Rripin e Gazës.

Rusia e ka sulmuar Ukrainën me 56 dronë dhe një raketë lundruese mëngjesin e së enjtes, thanë Forcat Ajrore të Ukrainës.

Kryetari i administratës ushtarake të Kievit, Serhiy Popko, tha se kryeqyteti u sulmua nga dronët ruse, ndërsa Vitaliy Kim, guvernatori i Mikolaiv, tha se në shënjestër të sulmeve ruse ishte infrastruktura energjetike e rajonit jugor.

Kundërajrorët ukrainas i rrëzuan 22 dronë rusë mbi rajonet Sumi, Kiev, Poltava, Çernihiv, Zitomir, Mikolaiv, Çerkasi, Odesa dhe Ternopil, ndërsa 27 dronë u rrëzuan nga bllokimi elektronik, thuhet në njoftim.

Ministria e Mbrojtjes e Rusisë, ndërkohë, tha se kundërajrorët e saj i rrëzuan 13 dronë ukrainas mbi tri prej rajoneve të saj të enjten.

Lufta në Ukrainë ka nisur më 24 shkurt të vitit 2022.

Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

Në një lëvizje të rrallë, bombarduesit me rreze të gjatë B-2 u përdorën kundër Houthive, të cilët kanë sulmuar anijet në korridorin e Detit të Kuq prej muajsh.

Nuk ishte menjëherë e qartë se çfarë dëmi shkaktuan sulmet, por mediat lokale raportuan të goditura janë vendet rreth kryeqytetit të Jemenit, Sanaa, të cilin grupi e ka mbajtur që nga viti 2014.

U raportuan gjithashtu sulme rreth bastionit të Houthive në Saada.

Sekretari amerikan i Mbrojtjes, Lloyd Austin tha se bombarduesit B-2 kishin në shënjestër “pesë lokacione nëntokësore të ruajtjes së armëve në zonat e kontrolluara nga Houthit e Jemenit”, shkruan skynews, përcjell Telegrafi.

“Ky ishte një demonstrim unik i aftësisë së SHBA-së për të shënjestruar objektet që kundërshtarët tanë kërkojnë t’i mbajnë jashtë mundësive, pavarësisht se sa thellë janë varrosur nën tokë, të ngurtësuara apo të fortifikuara”, tha Austin.

Siç raporton Komanda Qendrore e Shteteve të Bashkuara, vlerësimet e dëmeve janë duke u zhvilluar dhe nuk tregojnë viktima civile.

Ndryshe, Houthit kanë shënjestruar më shumë se 80 anije tregtare me raketa dhe dronë në Detin e Kuq që nga fillimi i luftës në Gaza tetorin e kaluar.

Houthit pohojnë se ata synojnë anijet e lidhura me Izraelin, SHBA-në ose Mbretërinë e Bashkuar në një përpjekje për t’i dhënë fund fushatës së Izraelit kundër Hamasit në Gaza.

Megjithatë, shumë nga anijet e sulmuara kanë pak lidhje me konfliktin, duke përfshirë disa të destinuara për në Iran.

Houthit gjithashtu vazhdojnë të lëshojnë raketa që synojnë Izraelin dhe kanë rrëzuar gjithashtu një numër të dronëve ushtarakë amerikanë.

Rebelët kërcënuan me sulme të reja pas pushtimit tokësor të Libanit nga Izraeli dhe vrasjes së liderit të Hezbollahut, Hassan Nasrallah.

Katër raste të dhunës në familje janë raportuar gjatë 24 orëve të fundit në Prishtinë, Lipjan, Junik dhe Rahovec.

Sipas raportit 24 orësh të Policisë, në njërin rast nuk raportohet për të arrestuar kurse tre të tjerët kanë shkuar në procedurë të rregullt, raporton “Betimi për Drejtësi“.

Në Prishtinë raportohet se një grua ka njoftuar Policinë se bashkëshorti i saj ka shkuar tek vendi i saj i punës, ku e ka ofenduar dhe ka tentuar ta sulmojë.

“Prishtinë 16.10.2024-11:00. Ankuesja femër kosovare, ka njoftuar se bashkëshorti i saj i dyshuari mashkull kosovar, kishte shkuar te vendi i saj i punës ku ka ofenduar dhe tentuar ta sulmojë. E njëjta deklaron se ka dhunë psikike nga i dyshuari në vazhdimësi. Nuk raportohet për të arrestuar”, thuhet në njoftim.

Kurse, në Lipjan një ankuese ka raportuar se është sulmuar nga vëllai i saj, kurse rasti shkoi në procedurë të rregullt.

“Lipjan 16.10.2024-21:30. Ankuesja femër kosovare ka njoftuar se ishte sulmuar fizikisht nga vëllai i saj. Me vendim të prokurorit pas intervistimit rasti shkon në procedurë të rregullt”, thuhet në njoftim.

E në Junik, thuhet se dy vëllezër janë rrahur mes vete, të cilët pas intervistimit janë liruar në procedurë të rregullt.

“Junik 15.10.2024-22:20. Raportohet se në rrethana të panjohura janë rrahur mes veti dy vëllezër. Të dyshuarit janë arrestuar dhe pas intervistimit me vendim të prokurorit janë liruar në procedurë të rregullt”, njofton Policia.

Ndërsa, në Rahovec raportohet se një burrë është përleshur me bashkëshorten e saj, të dy i liruan pas intervistimit.

“Rahovec 15.10.2024-08:00. Është raportuar se i dyshuari mashkull kosovar, pas një mosmarrëveshje është përleshur me bashkëshorten e tij. Të dyshuarit janë arrestuar dhe pas intervistimit me vendim të prokurorit janë liruar në procedurë të rregullt”, thuhet në njoftim. /BetimipërDrejtësi